علمي آراشديرما  

  صلاح الدين خليل اوف 

برگردان : حسین شرقی دره جک

 

 

 

دونياني داها درين آنلاماق اوچون علم، داها اينجه دويماق اوچون پوئزييا وار.

فلسفه ايسه دويغونون اؤزونودرک مقامي و ايدراکين پوئتيک سويييه سيدير.

فلسفه ايله پوئزييا آراسيندا موناسيبت مثله سي عصرلر بويو هم شاعيرلرين، هم ده فيلوسوفلارين ديقت مرکزينده اولموشدور.

 

  پلاتون فلسفه ايله پوئزييا آراسيندا نيفاقدان دانيشير، آريستوتئل ايسه پوئزييانين فلسفه يه (تاريخدن) داها ياخين اولدوغونو دئييردي. کانت پوئزييانين بوتون صنعت نؤولري آراسيندا ان اوستون اولدوغونو وورغولاييردي...

 و بو اوستونلوگون بير عاميلي ده اونون واختاشيري فلسفه ايله اوتوروب-دورماق شانسيدير. آما کانتين اونوتدوغو بير مقام وار: پوئزييايا سادجه صنعتين بير نؤوو کيمي باخيلا بيلمز. پوئتيکليک هم قديمليگينه، هم ده اهاته دايره سينه گؤره راسيونالليقدان گئري قالمير و هر شئيين ايضاحيني عاغيل چرچيوه سينده آرايانلار پوئتيکليگين مغزيني توتا بيلمزلر. تصادوفي دئييل کي، هؤلدئرلين بير شعيرينده حياتين پوئتيکليگينه ايشاره ائدير و هايدئگئر اونون بو بير ميصراعسنين شرحينه بوتؤو بير اثر هسر ائتميشدير. 

  بو مقامدا  " فلسفه و پوئزييا "  پروبلئمينه شرقدن و قربدن باخيشلارين دا فرقلي اولدوغونو خاطيرلاتماق يئرينه دوشر. هانس قادامئر  "فلسفه و پوئزييا "  آدلي اثرينده قرب فلسفه سيني شرق مودريکليگيندن فرقلنديرن جهتلردن بيري کيمي، پوئزييا ايله فلسفه نين مسافه لي اولدوغونو و گاه اوزاقلاشيب، گاه دا ياخينلاشمالارينا باخماياراق، آرالاريندا هميشه پوزيتيو بير گرگينليک اولدوغونو قئيد ائدير. 

  بلي، شرقده فلسفه و پوئزييانين سينکرئتيکليگي، اونلارين تام آيريلا بيلمه ديگي و بلکه هئچ آيريلماق ايستمه ديگي اؤنملي بير مقامدير.

و بو موناسيبتلري ايزله مک ايستسک، ان موناسيب ادبي مئيدان نيظامي ياراديجيليغيدير. 

نيظامي پوئزيياسينا فلسفه تاريخي کونتئکستينده باخاق. 

  بعضا فلسفه تاريخي آيري-آيري خالقلارين فلسفي فيکير تاريخي کيمي (مثلن،  " قديم يونان فلسفه سي " ،  " ايسلام اؤلکه لرينده فلسفه " ،  " کلاسسيک آلمان فلسفه سي "  و س.) تصنيف ائديلير. لاکين بونون هئچ بير علمي-مئتودولوژي اساسی يوخدور. صؤحبت آنجاق واحيد عومومبشري فيکير پروسئسينه هانسي خالقين هانسي دؤورده و نه کيمي بير پاي وئرمه سيندن، بو پروسئسده نه درجه ده فال ايشتيراکيندان گئده بيلر کي، بو دا  " فلسفه تاريخي نين "  پرئدمئتينه آيد اولان مثله دئييل. بو باخيمدان، زردوشتون، کونفوتسي نين، سوکراتين فيکيرلري عومومبشري سعجيييه داشيديغي کيمي، فرابي نين، ايبن سينانين، بهمنيارين فلسفي تدقيقاتلاري دا عومومبشري مضمونلودور. 

  فلسفه تاريخي عومومبشري فلسفي فيکرين واحيد بير پروسئس کيمي اينکيشاف يولونو اکس ائتديرير. تبييدير کي، ايلک فلسفه تاريخچيلري ده محض فيلوسوفلارين اؤزلري اولموشلار. پلاتونون  " ديالوقلار " ی، آريستوتئلين  "مئتافيزيکا " سي اونا قدرکي فلسفي فيکير حاقيندا معلومات وئرن، اونلارين مغزيني عکس ائتديرن عصاس منبعلر حساب اولونور. هله آنتيک دؤورده بعضي فيلوسوفلار داها چوخ محض فلسفه تاريخي اوزره ايختيصاصلاشميشديلار. بونا ان گؤزل ميثال ديوگئن لائرتسکي ساييلا بيلر. پلوتارخ عصاسن تاريخچي اولسا دا، هم ده فلسفه تاريخچيسي ايدي. 

  آذربايجاندا دا فلسفي فيکير تاريخينه داير معلوماتلار لاپ چوخدان، هله اورتا عصرلردن قلمه آلينميشدير. نيظامي گنجوي نين  " ايسگندرنامه "  اثري (خصوصا  " ايقبالنامه " ) سادجه بديعي اثر کيمي دئييل، هم ده بير سيرا موهوم عومومبشري فلسفي ايدئيالار و دونيا خالقلاري نين بير چوخ بؤيوک فيلوسوفلاري حاقيندا معلومات وئريلمه سي باخيميندان دا اولدوقجا اهميتليدير. نيظامي اؤزونمخصوص بير فهمله فلسفه تاريخينه بير تاريخ کيمي دئييل، محض بير فلسفه کيمي ياناشير. بئله کي، موختليف دؤورلرده فرقلي اؤلکهلرده ياشاميش بؤيوک فيلوسوفلار تاريخي و جوغرافي سدلري آشاراق بير ماسا آرخاسيندا اوتورور، داها دوغروسو، واحيد حؤکمدارين دؤوره سينه توپلاشيرلار.  " فيکرين، ايدئيانين زاماني و مکاني يوخدور " مؤوقعييندن چيخيش ائدن نيظامي مجليسه تاريخين قارانليقلاريندا قالانلاري دئييل، بوتون زامانلار اوچون نور منبعيي اولانلاري توپلايير و اؤزو ده اونلارلا بير مجليسده اَيلشير. مجليسه يئددي فيلوسوف چاغيريلميشدير. ايکيسي ايسه ائو صاحيبلريدير: حؤکم صاحيبي، قيلينج توتان ايسگندر و سؤز صاحيبي، قلم توتان نيظامي. اصلینده، بوتون دئييلنلر نيظامي نين اؤز فيکير سوزگجيندن کئچيريليب قلمه آلينير. او، اؤزوندن اول ياشايانلارين مؤوقعييني سونراکي زامانلارين بيليکلري ايله زنگينلشديرير و يئني آرقومئنتلر علاوه  ائدير.

 مثلن، فالئسين (نيظاميده  " واليس " )  " هر شئي سودان يارانميشدير "  فيکريني اينکيشاف ائتديره رک و تکميللشديره رک ديگر مؤوجودلوق حاللاري نين سودان نئجه تؤره يه بيله جگي نين علمي-بديعي ترننومونو وئرير؛ سو سئيرلنده اود و هاوا، قاتيلاشاندا تورپاق يارانير: 

    

  من ده عرض ائلگيم: دونيايا تمل، 

  منجه، سو اولموشدور هر شئيدن اول. 

    

  سونرا سويون ديگر تمل وارليقلارا نظرن ايلکينليگي، اود، هاوا و تورپاغين دا اولوشوموندا ايشتيراکي تصوير اولونور: 

    

  قيزغين حرکتدن و چاخناشمادان، 

  او يئره چاتدي کي، اود اولدو عيان. 

    

  قيزغين حرکت و چاخناشما... ايستيليگين ذرهجيکلرين خاوتيک حرکتي ايله ايضاحي 1827-جي ايلده کشف ائديلميشدير. نيظامي بو بئيتده همين ايدئياني يئددي اسر اول سؤيله ميشدير. شاعير داها سونرا وارليغين ديگر تمللريني قلمه آلير: 

    

  ايلديريم بوخاردان آييردي اودو، 

  بوندان روتوبتلي هاوا دوغولدو. 

  سويون قاتيليغي گئتديکجه آرتدي، 

  همين قاتيليق دا يئري ياراتدي. 

    

  داها سونرا نيظامي سويون ايلکينليگيني ايثبات ائتمک اوچون  " نوطفه  "  ايله باغلي ميثال گتيرير کي، بونون دا  " قوراني-کريم " اين تاثيري ايله (ن-نهل سوره سي، 4-جو آيه؛ ياخود ات-تاريق سوره سي، 6-جي آيه و س.) دئييلديگينه شوبهه يوخدور. بئله ليکله، فالئسين مؤوقئيي سونراکي دؤورلرين بيليکلريندن ده ايستيفاده ائتمکله آرقومئنتلشديريلير. عئيني سؤزلري نيظامي نين، ديگر فيلوسوفلارين تعليملرينه موناسيبتيله باغلي دا دئمک اولار. بير شئي شکسيزدير کي، بورادا نيظامي نين فلسفه تاريخچيسي کيمي، يوخسا ياراديجي فيلوسوف کيمي چيخيش ائتديگيني آييرماق چتيندير. 

  نيظامي نين  " ايقبالنامه " سينده فالئسين ديليندن دئييلن فيکيرلره فوضولي نين  " متلول-اعتيقاد "  اثرينده ده راست گليريک:  " ايلک اونسور سودان عيبارتدير، سويون هر بير شکله دوشمک قابيليتي اولدوغونا گؤره اونون سيخلاشيب-برکيمه سيندن يئر، سئيرلمه سيندن اود و هاوا عمله گلميشدير. گؤي ايسه اودون توستوسوندن تؤرنميشدير " . فوضولي اؤزو ده بو فيکره طرفدار چيخير و  " قوراني-کريم " اين هود سوره سيندن 7-جي آيني ميثال گتيرير:  " اونون عرشي سو اوزرينده ايدي " . 

  فوضولي پيفاقوردان، هئراکليتدن، دئموکريتدن، پلاتوندان دا ميثاللار گتيرميش و بونلارين ايچيندن اؤزونه داها دوغما اولان  " وارليغين سببي محبتدير "  (هئراکليت) ايدئياسيني اؤنه چکميشدير. 

  فوضولي يونان فيلوسوفلاريندان ايقتيباس گتيرمکله کيفايتلنمير، اونلاري اؤز مؤوقئيي نين، رهبر توتدوغو ايدئيانين/ کونسئپتين ايضاحي اوچون، مقصديؤنلو صورتده يادا سالير. محمد پئيغمبره ايستينادلا سؤيله ديگي و اؤزونون ده بوتون ياراديجيليغي بويو اؤنه چکديگي  " تانري نين ايلک ياراتديغي شئي عاغيلدير "  فيکريني قديم يونان فيلوسوفلاري نين اثرلرينده ده آراياراق، بونو خوصوصيله وورغولايير. پيفاقورا ايستينادن اولجه عاغيل ايله روحون، سونرا ديگر شئيلرين ياراديلديغيني ايديعا ائدير. فوضولي نين تفسيرينده آريستوتئل ده فال عقلين هر شئيدن اؤنجه اولدوغونو قبول ائدير. شاعير بو درين فلسفي ايدئياني بئله تقديم ائدير:  " عاغيل اؤز ماهيتيني و سببيتيني خاطيرلاميش و بو خاطيرلامادان شئيلر نشت ائتميشدير " . بيز  " خاطيرلاماق "  ايفاده سيني اونا گؤره خوصوصي وورغولاييريق کي، بونونلا شاعير بير طرفدن پلاتون تعليميني اؤنه چکير، ديگر طرفدن ده موعاصير هولوقرافيک يادداش کونسئپتي نين تمل ايدئياسينا يول آچير. 

  ديقتله ياناشيلديقدا فوضولي يونان فيلوسوفلاري نين فيکيرلرينه موراجيعتده چوخ واخت سربستليک گؤسترير. نيظامي کيمي، او دا يئري گلنده اؤز فيکريني باشقاسي نين واسيطه سيله دئيير. مثلن، يوخاريدا آريستوتئله ايستينادن دئديگي فيکيرده خاطيرلاما آکتي ياراديجيليق اوچون عصاس کيمي وئريلير. قديم شرقين دوعاليست منبعلرينه ايستينادلا يازديغي فيکيرده ده ايلک منبع اولان مودريک نور (سوهرورديد: نور ال-انور) اؤزو حاقيندا دوشونرکن بو دوشونجه دن وارليغين ايکي اساسی اولان ايشيق و قارانليق يارانميشدير. داها سونرا هئراکليته ايستينادن دئديگي فيکره گؤره، ايلک اونسورون تصووروندن روح و اقل يارانميشدير. فلسفه تاريخيندن معلوم اولدوغونا گؤره، ايراده و تصوورون دونيانين اساسی کيمي گؤتورولمه سي شوپئنهاوئره مخصوصدور. ماراقليدير کي، فوضولي ده عئيني مؤوقئدن چيخيش ائدير؛ نيي ايسه خاطيرلاماق، دوشونمک، تصوور ائتمک اونون يارانيشي، هيسسي مؤوجودلوغو اوچون شرط اولور.  " نيينسه يارانماسي اوچون اونو ايستمک، لاپ چوخ ايستمک لازيمدير "  فيکري عیسی پئيغمبرده ده واردير.  " ايستمک "  ايسه بير طرفدن، ايرادي آکت اولسا دا، ديگر طرفدن، سئوگي، محبتدير.  "وارليغين سببي محبتدير "  قناعتينه فوضولي فيکرين محض يوخاريدا گؤسترديگيميز تکامول يولو ايله گليب چيخميشدير. 

  بلي، فوضولي ده نيظامي کيمي، بؤيوک فلسفه کلاسسيکلري نين فيکيرلرينه سربست ياناشير و اونلاري اؤز ايدئيا تکامولونه يولداش ائدير. آما ماهيتلر داها آيدين ايفاده اولونور. مثلن، پلاتونون تعليمي بئله ايضاح ائديلير:  " عالم ايکي عالمدن عيبارتدير: 1. عقل عالمي کي، اقلي قليبلر و روحاني صورتلر اورادادير. 2. ايچريسينده جيسماني بدنلر و نؤوه منسوب جيسملر اولان و پارلاق بير گوزگو کيمي اشيانين شکليني اؤزونده اکس ائتديرن دويغو (حيسس) عالمي؛ بئله کي، بو عالمده کي  وارليقلار او عالمده کي  وارليقلارين ايزلري (اينعکاسي)-دير " . 

  نيظامي اينساني يئر اوزونون اشرفي، ان اوجا وارليق سايير و اينسان عاغلينا، ائلمه چوخ يوکسک قييمت وئرير. بونونلا بئله نيظاميده اينسانين مکاني يئردير و اونون بؤيوکلوگو دونياني ايدراک ائتمه سينده دير. او، نسيميدن فرقلي اولاراق آللاه، دونيا و اينساني فرقلي مرتبه لرده نظردن کئچيرير، عئيني موستوييه گتيرمير: 

    

  من نيم، بير ذره - گؤزله گؤرونمز، 

  سندن نور آلميشدير او ذره - سؤنمز. 

  سنين قودرتينله آشکار اولموشام، 

  هر بير خزينه يه آچار اولموشام. 

    

  آللاهلا اينسانين نيسبتيني و موناسيبتيني ايفاده ائدن بو کونسئپت مؤولانادا  " داملا و دريا"  تيمثاليندا داها دا اينکيشاف ائتديريلميش، نسيمي ياراديجيليغيندا ايسه ايشيغين ذرهسي منبعيي ايله، داملا دريا ايله عئينيلشديريلميشدير. بيز آللاهي گؤره بيلميريک، آما اونون وارليغي اينساندا تجللي ائدير. آللاها سئوگي ده اونون ياراتديقلارينا سئوگيدن کئچير. 

  او واختا قدر پئيغمبرليگين سوبوتو مؤعجيزه لر ساييليردي. سون پئيغمبر اينسانلاري عاغليني ايشلتمه يه، اؤزونه گوونمه يه چاغيرير. يعني مؤعجيزه لر دؤورو بيتير و حياتين اؤزونو آنلاماق و شعوورلو/ياراديجي صورتده ياشاماق دؤورو  اينسان دؤورو باشلايير. 

  - تک بير مؤعجيزه  وار، او دا حيات اؤزودور.  "حيات چئشمه سيندن کئچدي محمد " ، - دئيير شاعير  " ايقبالنامه " ده. 

  نسيميده ايسه حاقين اونواني اينساندير. اينساني اوجالدان اونون سادجه عاغيل صاحيبي اولماسي دئييل، حاقين داشيييجيسي اولماسيدير. نسيمي اينساني هر شئيدن يوکسک توتور و دونيانين وارليغيني دا اينسان وارليغي نين تظاهورلريندن بيري، من-اين ديشا يانسيماسي، وحدتدن کثرته، ايدئال دونيادان جيسماني دونيايا کئچيد کيمي گؤرور. 

  آللاهين دا، دونيانين دا وارليغي اينسانين اونو تمسيل ائتمک سيقلتي سايه سينده اوزه چيخير. سيرادان بيري، ياريمچيق، ناقيض اينسان بو سيقلتدن و قودرتدن محرومدور و نسيمي  "اينسان "  دئينده،  " من "  دئينده محض بو بؤيوک ميسسييانين داشيييجيسيني، اينسانليغين حدفي اولان اينساني-کاميلي نظرده توتور. 

  قرب پوئتيک فيکرينده اينسانا موناسيبت خريستيان دونياگؤروشو ايله هودودلانديغيندان، بوردا اينسان آنجاق گوناها باتميش، اؤز موقدس ميسسيياسيندان آيري دوشموش و بوتون آمالي بو گوناهدان تميزلنمکله محدودلاشان بير وارليقدير. اينسان مرکزلي دونيايا قاييديش اوچون آوروپا ان آزي مين ايلليک قارانليق تونئلدن کئچمه لي اولموشدو. 

  ايسلامين دونيايا باخيشيندا ايسه اينسان آرتيق فرقلي بير ستاتوسا ماليکدير. 

  بو مقامدا بيز شرق/يسلام رئنئسسانسي ايله علاقه دار بير يانليشا دوزه ليش وئريلمه سيني واجيب ساييريق. بئله کي، بو موضودا يازانلارين اکثريتي ايسلام رئنئسسانسي نين 11-12 عصرلرده، خليفه مؤمين و هارون الرشيد دؤورونده قديم يونان منبعلري نين عرب ديلينه ترجومه سي ايله باشلانديغيني دوشونورلر. يعني آنتيک ادبي-فلسفي ايرثين يئنيدن اويانيشي، جانلانماسي... اصلینده، قربده ده، رئنئسسانس آنتيک هومانيزمين اينتيباهي کيمي تقديم اولونسا دا، آز-چوخ اينصافي اولانلار هاراداسا بير کونجده و يا مؤعتريضه ده عربلرين/موسلمانلارين دا رولونو قئيد ائديرلر. دوغرودان دا، آوروپا رئنئسسانسي، آنتيک ايرسين برپاسي کيلسه طرفيندن محو ائديلميش يونان اوريژينال متنلري نين عربجه دن لاتينجايا ترجومه سي سايه سينده مومکون اولموشدور، - صليب يوروشلرينده الده ائديلميش ان بؤيوک قنيمت... آما بو ترجومه آکتي محض آوروپادا يونان ايرسي نين ايکينجي حيات قازانماسي، آنتيک مدنيتين هومانيست روحونا دؤنوش پروسئسي اوچون اؤنمليدير. ايسلام عالمينده اينسانين دونيانين مرکزينه دؤنوشو داها اؤنجه باش وئرميشدي، هم ده يونان مدنيتي نين اينتيباهي کيمي دئييل، سادجه يئني دينين يارانماسي ايله. اينساني دونيانين مرکزينده گؤرمک، وارليغين اشرفي سايماق - ايسلام ديني نين اساس کرئدولاريندان بيري ايدي. و بو يئني دونياگؤروشونون ادبياتدا وصفي ده شرق/ايسلام شاعيرلري نين ميسسيياسي ايدي. يعني نيظامي نين اينسان مرکزلي دونيا کونسئپتي محض يونانلاردان دئييل، ايلک نؤوبه ده  " قرآنکريم " دن قايناقلانيردي. 

  نيظامي  " ايقبالنامه " نين محمد (ص) پئيغمبره ايتحاف بؤلمه سينده يازير: 

    

  جنّتدن تورپاغا گلديسه عدم، 

  او قويدو تورپاقدان جنّته قدم. 

    

  اصلینده، بوردا صؤحبت ايلک پئيغمبرين جنّتدن يئره ائنيشيندن و سون پئيغمبرين يئردن جنّته يوکسه ليشيندن گئدير. 

  فلسفه موستويسينه کئچسک و مؤوضونو اينسانين تاريخي عاقيبتي و ميسسيياسي اولاراق قلمه آلساق، بئله دئمک اولار: ايلک اينسان موکممل اولماقلا باهم موکممل بير موحيطد/شرايتده - جنّتده ياراديلير... جيسماني اينسانلار - اينسان ايدئياسي نين جيسماني تجسسوملري ايلک حاليندان - کاميلليک زيروه سيندن اوزاقلاشير و اوزون بير ائنيش يولو باشلانير. چوخالديقجا ائنير، ائنديکجه چوخالير... - کثرت دونياسي. اينسان اوغلونون  " ايلک گوناه "  دامغاسي عصرلر بويو کيلسه نين آنتي هومانيست ايدئولوژيسينده حاکيم مؤوقئ توتور. 

  ايلک اينسان - اينسان عوموميسينين/ايدئياسي نين تجسسومو؛ ازه لي اولماسا دا، - ابدي... بلي، (بير سحو اوزوندن) اينسانين کوسميک ترانسفئري باش وئرير. واحيد اولان چوخلوغا کئچير، جيسماني دونيادا ايدئيا/ماهيت اؤزو دئييل، تظاهورلري پئيدا اولور، وحدتدن کسرته کئچيد باش وئرير، موکممل تک اؤز وارليغيني ناقيض چوخلار حاليندا داعوام ائتديرير. 

  پئيغمبرليک ميسسيياسي - اينسانين يئنيدن اؤز ايلک حالينا، ايدئيا تمه لينه دؤنمک عزمي، اؤز عالي ميسسيياسيني برپا ائتمک جهدي - آدمين خلق اولدوغو ابدي مکانا دؤنوش نيسکيلي! 

  و اؤزو کاميللشديکجه، موحيطين ده کاميللشمه سي، - جنّتين ائله بو دونيادا ياشانماسي فورصتي! 

  جنّتين برپاسي ايکي ايستيقامتد: بيري - اينسان يئر اوزونده بير جنّت قورماق اوغروندا اوزون بير يولچولوغا چيخير، - سيويليزاسييا يولونو سئچير. نيظامي بو هدفه چاتماغين يولونو گؤسترمکله قالمير، حدفين اؤزونو ده تصوير ائدير، -  " خوشبختلر اؤلکه سي " . بو ايدئال مسکنه اصلینده اينسانين بو دونيادا قورماق ايسته ديگي جنّت کيمي ده باخيلا بيلر. 

  او بيري يول: اينسان اؤز ايلکين من-اينه دؤنوش اوچون جيسماني دونيانين جاذيبه سيني دف ائدير و  " دونياسيني دييشرکن "  جيسمي اولماسا دا، روحو يئنيدن جنّته دؤنور. نيظامي دئميش، تورپاغي دف ائديب يئنيدن جنّته قدم آتير، - اينکاري اينکار آکتي. 

  او واختا قدر پئيغمبرليگين دليلي مؤعجيزه لر ساييليردي. سون پئيغمبر اينسانلاري راسيونالليغا، عاغليني ايشلتمه يه، اؤزونه گوونمه يه چاغيرير. يني مؤعجيزه لر دؤورو بيتير و حياتين اؤزونو آنلاماق و شوورلو/ياراديجي صورتده ياشاماق دؤورو - اينسان دؤورو باشلايير. 

  - تک بير مؤعجيزه  وار، او دا اينسان حياتيدير.  " حيات چئشمه سيندن کئچدي محمد " ، -دئيير شاعير  " ايقبالنامه " ده. 

  ...يني حتّی پئيغمبر ده هامي کيمي اؤز اينسان عاقيبتيني ياشايير، حياتين رئالليقلاري ايله اوزلشير، کئشمکئشلريندن کئچير. پئيغمبر اوچون ده شرفلي اولان اينسان حياتي، اينسانليق يولو بوتون سئچيلميش اينسانلار، بوتون لياقت صاحيبلري اوچون ده ان بؤيوک شرفدير.  

  هئچ بير شاعير و هئچ بير فيلوسوف دا موحيطين فؤوقونده، تکباشينا يئتيشمير. هر زامانين اؤز روحو وار و هر بير موتفککير ايلک نؤوبه ده اؤز دؤورونون فيکير آخينيني تمسيل ائدير. نيظامي و اونون داوامچيلاري دا. نسيمي ايرسي نين ده همين دؤورده، همين مکاندا ياييلميش فلسفي دونياگؤروشو و فيکير عنعنه لري ايله موقاييسه لي تحليلي گؤسترير کي، بو زيروه يه يوکسلن يول سادجه حروفیليکدن کئچمير… اونون نيميدن اؤنجه تاثيرلنديگي حضرت علي (ع) نين  " نهج البلاغه " سي، منصور حلاجين  " تواصين " اي، ش.ي.سوهروردي نين  " ايشراقيليک "  فلسفه سي، نيظامي نين  " خمسه " سي، ماحمود شبوستري نين  " گلشن راز " اي، زنگين تصوووف عنعنه لري و اونون دا همين دؤورده گئنيش ووسعت آلميش بکتاشيليک طريقتي وار ايدي. 

  فضل الله نعيميدن، حروفيليگين بير تعليم کيمي ياييلماسيندان خيلي اؤنجه مؤولانا يازيردي: 

     " رحمت ايله زحمت آراسيندا  بير نؤقطه فرقي واردير. 

  آلله ديلرسه، زحمتده کي  نؤقطه ني قالديرار " . 

    

  يعني نينکي ديل، حتّی اليفبا دا فيکرين آتريبوتونا چئوريلميشدي. خوصوصن عرب اليفباسي فيکرين فانتازيياسي اوچون گئنيش مئيدان آچيردي. هم ده اليفبانين آرئالي عرب ديلي نين آرئاليندان چوخ گئنيش ايدي؛ فارس و تورک ديلينده سؤيلننلر ده بو اليفبا ايله قلمه آلينير، ادبياتلاشير، يازيلي متنه چئوريليردي. خوصوصن حروفيليک طريقتي محض يازييا، اليفبايا خوصوصي اؤنم وئرديگيندن، بو تعليمين بير سيرا اساس ايدئيالاري؛ رقملرين معنالانديريلماسي، پيفاقورچولوقلا علاقه لر ده يئنه عرب اليفباسي زمينينده اوزه چيخيردي. 

  نسيميني داها دقيق آنلايا بيلمک اوچون عرب اليفباسي نين اؤزلليکلري يئترلي دئييل. درينلره وارماق اوچون ديليميزين - تورک ديلي نين فلسفي پوتئنسيالي دا آچيلماليدير. 

  مثلن، نسيمي لئکسيکونوندا موهوم يئر توتان  "اوز "  سؤزو-حاق، حقيقت، وارليق کونتئکستينده معنالانديريلير. 

    

  حاق-تعالانين کلامي صورتين تفسيريدور، 

  اي اوزون انا فتحنا، حاقدن آچيلدي بو باب. 

    

  بلي، ان درين حقيقتلر اوزده گيزله نير. و حقيقتين اوزه چيخماسي، بوتون سيرلي-سِحرلي، مقدس کيتابلارين آشکار اولماسي اوچون اوزدن نيقابي/پردني قالديرماق لازيمدير. 

  کيم کي، حاققي پرده سيز اوزونده، ائي جان، گؤرمه دي... - دئين شاعير، بو پردني وارليق ايله يوخلوق آراسيندا کيميلري اوچون کئچيد، کيميلري اوچون کئچيلمز سدد کيمي گؤرور. 

   " اوز " ،  " سيما " ،  " صيفت "  آنلاييشلاري نين بير طرفدن، اينسان صورتيني ايفاده ائتمه سي، ديگر طرفدن،  " حقيقتين آچيليشي " ، گيزلينلرين اوزه چيخماسي، ايچ دونياسي نين اوزه ترانسفئري آنلاميندا ايشلنمه سي سادجه پوئزييا و فلسفه اوچون بير شانس اولماييب، هم ده ديلين اؤز حيکمت قاتينا نوفوز ائتميشدير. 

  ديليميزده وارليقلا يوخلوغون ديالئکتيکاسينا ماراقلي بير ميثال:  " اوزلو "  و  " اوزسوز " اون عئينيت و فرق مقاملاري! اوزسوز = سيماسيز = اؤز مؤوقئيي اولمايان.  " اوزلو "  اولماق - اوزونو ايتيرمکدن قورخماماق. (کيم قورخماز؟ - احتياط اوزو اولان و يا چوخوزلو اولان = سيماسيز.)  " اوز قويماق "  -  " اوز قويوبمو کي، اوزوم دره " ؛  "سيزين قارشينيزدا اوزوم يوخدو... " ، - يعني اوزومو ايتيرديم. آما سادجه تک اوزو (سيماسي) اولان اوزونو ايتيرمگي درد ائده بيلر.  " اوزونو ايتيرمک "  - آبيرسيزلاشماق - ايکيوزلو/چوخوزلو اولماق - سيماسيزلاشماق و س. اوزلولوک = چوخوزلولوک. 

  بوردان ثابيتليک و دييشکنليک، وحدت و کسرت موضولارينا کئچيد يارانير. فلسفه ده ثابيتليک - وارليغين، دييشکنليک - يوخلوغون علامتي ساييلير.  " سيماسيز "  - اؤزونه آيد، ثابيت سيماسي اولمايان دئمکدير. 

  بلي، ائله بير دونيا وار کي، اوردا هر شئيدن بير دنه دي... و بو بير دنه هر شئيين ان کاميليدي؛ يا آرتيق اولوشموش حالدي (مطلق گله جک - سون منزيل - هدفده کي  ايشيق)، يا دا هله پوزولماميش حالدير (مطلق کئچميش - ايدئال حال، ايدئيا و يا لؤوحي محفوظ). و بير ده ائله بير دونيا وار کي، اوردا هر شئيين چوخلو نوسخه لري وار، آما هئچ بيري تام کاميل دئييل، ايدئال دئييل - يا اولوشوم، يا دا پوزولوش حاليندادير - بو، جيسماني دونيادير. پروسئسين هانسيسا بير مقامي، مقاملار چوخلوغو... ايکي يول وار: بيري - پوزولما/پوزولوش سورجي، او بيري - اولوشما/ولوشوم سورجي. بيرينجي نين ايدئال حالي ايلک ياراديليش حالي - آلله يارادير و سونرا بو دونيايا - کسرت دونياسينا آتير/قووور/گؤندرير و بوتون مومکون واريانتلارين يوخلانماسي و يا ياشانماسي اوچون اونو چوخالدير - هره بير يول سئچير... 

  بوردان دا زامان و مکان پروبلئمينه کئچيد يارانير: 

    

" مکانسيز اولدو نسيمي، مکاني يوخدور آنين، 

  مکانا سيغمايان اول بيمکان مکاني نئيلر؟! " . 

    

  بلي،  " مکاني يوخدور آنين! " ، - دئيير نسيمي. 

   " نسيمي "  دئمکله - اؤزه ايشاره ائدير شاعير، آما اؤز مکانسيز... و زامانسيز. 

  زامان محدود، هودودو اولان، لوکال بير حرکتين سورکليليک اؤلچوسودور. سونسوز مکاندا باش وئرن پروسئسلر زامانلا اؤلچوله بيلمز. سونسوزلوق - اينسان ذکاسي اوچون الچاتمازدير. آما بو شعیرده نسيمي سونسوز زاماندان دئييل، بير اينساندان و اينسانليغين سورکلي عؤمرو موقابيلينده بير اينسانين سونلو/که سيلن عؤمروندن، - سونسوزلوق موقابيلينده آندان بهس ائدير. اينسانين نورمال، گونده ليک حياتي مکان-زامان کونتينيوموندا لوکاللاشير/مويينلشير/به ليرله نير، آما مکانا سيغماديغي، اونون ديشينا چيخديغي آنلار دا اولور. و بؤيوک اينسانين نورمال اينساندان فرقي محض بئله آنلاردا اوزه چيخير. 

  بو آن سئزگي آنيديرمي، وجد و يا کشف آنيديرمي، يوخسا ايلاهي عشق مقاميديرمي؟! بو آنين مؤعجيزه سيني دويماق اوچون گرک هئچ اولماسا عؤمرونده بير دفعه  اونو ياشاميش اولاسان... شيمشک بير آندا چاخير، دونيا ايشيقلانير و يئنه اولکي حالينا دؤنور. بو آني هامي ياشايا بيلمير، اونون سيقلتيني آنجاق ياراديجي اينسانلار بيله بيلر. 

  نسيمي نين زامانا موناسيبتي بوش يئرده اولوشماميشدير. عصرلر اؤنجه نيظامي سئزگي/وئرگي آني نين سيقلتيني بئله ديرلنديريردي: 

    

  نه لازيم دونيادا فرسيز بير شامتک 

  گئجه لر اوزونو جان وئريب سؤنمک؟ 

  خوشبختدير شيمشکتک يالنيز بير آندا 

  پارلاييب سؤننلر فاني جاهاندا. 

    

  ذهنين/منطيقي دوشونجه نين آدديم-آدديم کئچديگي يولو سئزگي وجد مقاميندا بير آندا کئچير و بو آندا بوتون قارانليقلار ايشيقلانميش اولور... قرب فلسفي فيکري اينتويسييانين اينتئللئکتدن/ذهيندن داها يوکسک بير مقام کيمي شرحينه آنجاق 20 عصرين اوللرينده بئرقسونون تيمساليندا ياناشا بيلميشدير. اونو دا قئيد ائدک کي، بيزيم شاعير-فيلوسوفلارين سئزگي تعليمي قربين اينتويسييا کونسئپتيندن داها موکممل اولموشدور؛ سادجه اؤنجه تئرمينلرين قارشيليغي نين موعينلشديريلمه سي طلب اولونور. 

  يني نيظاميدن فوضولييه دهک دؤرد اسرليک دؤور عرضينده بيزيم ميللي فلسفي دوشونجه نين اؤز آوراسي، اؤز سيمووليکاسي و بديعي-ائستئتيک اوسلوبو وار ايدي. و دويانين پوئتيک-فلسفي فيکير فضاسي نين ان پارلاق اولدوزلاري محض بو زامان-مکان کونتينيوموندا برق ووروردو. 

  ياخود وحدت ايدئياسي! ان الحقدن وحدتي ووجودا کئچيد! 

  نؤقطه نين/صيفيرين پوتئنسيال زنگينليگي! نؤقطه دن آچيلان يئني وارولوش! باشقا دونيادا - باشقا بير خط و يا باشقا اؤلچو اوزره داوام! 

  نسيميده زامان، وارليق و يوخلوق مثله لري موعاصير فلسفه باخيميندان چوخ آکتوالدير. اونون هله ايندييه دهک آچيلماميش زامان کونسئپتي اصلینده هم کانت، هم ده هايدئگئرين زامان تعليملرينه ايشيق توتور: 

    

  چکمه الميني بيهوده يئره وارلا يوخون، 

  اولان اولدو، اولاجاقسا هله مئيداندا دئييل. 

    

  هايدئگئر وارليغي  " ايندي "  کيمي تقديم ائدرکن، کئچميش و گله جگي عئينيله نسيمي نين بو بئيتينده کي  آرقومئنتله ايضاح ائدير: کئچميش داها يوخدور، گله جک ايسه هله گلمه ييب، دئمک کي، وار اولان آنجاق  " ايندي " دير. 

  ياخود: 

  بي وفا دونيادان اوساندي کؤنول، 

  يوخ دئدي، دونيايي يوخ ساندي کؤنول. 

    

  وفاسيز دونيا، وصالسيز حيات يوخا برابردير. وفا دا، وصال دا - اينسانين اؤز ايلاهي منشايينه قوووشماسي، حاقين اوزه چيخماسي، گونشين ايچدن دوغماسيدير. وارليق آنجاق حاقا اولاشماق، او-نا قوووشماقلا قازانيلير. حياتين، دونيانين گئرچک سيماسي بيزه سئير مقاميندا دئييل، کشف مقاميندا آچيلير. عصرلر سونرا بو حقيقت هوسسئرل فئنومئنولوژيسينده يئنيدن اوزه چيخاجاقدي... 400 ايل سونرا کانت زامان و مکاني اينسانين اؤز اقلي فاليتي نين واسيطه سي اولاراق گؤره جک، 550 ايل سونرا هايدئگئر زامان آنلاييشينا وارليق و يوخلوغون ديالئکتيکاسي کونتئکستينده يئنيدن باخاجاقدي... آما تأسوف کي، نسيمييه ايستيناد ائتمه دن، اوندان خبرسيز: - کانت، هوسسئرل، هايدئگئرمي خبرسيز، بيزمي خبرسيز؟! 

  تأسوف کي، بيزده موقاييسه لي تهليل آپاريلمير. آپاريلاندا دا آنجاق شرق کونتئکستينده، کئچميشين فونوندا آپاريلير. موعاصير فلسفه سانکي آنجاق قربه مخصوص ايميش و اونلار اؤز سيستئملريني سيفيردان باشلاياراق قوروبلارميش. آما فلسفه تاريخي بوتؤو بير فيکير پروسئسي، شرقدن قربه فيکير آخينيدير. بورادا آييرماق بزن مومکون اولمور. نسيميني ده تکجه فزلوللاه نيمي اوزريندن آراشديرماق عدالتسيزليکدير و بئله اؤنيارغيلي باخيش اونون فلسفه سيني، ياراديجيليغيني مهدودلاشديرير. 

  دوغرودور، شاعيرين فلسفه سي منصور هللاج اوزريندن ده آراشديريرلار. چونکي اونون  " ان الحق "  ايدئياسي نين کؤکلري منصور هللاجا، حتّی اوندان داها اوله گئدير. 

  ائلجه ده  " وحدتي ووجود "  تعليمي. ايستر بيزده، ايسترسه ده تورکيه ده بو تعليمين ايبن عربي ايله باشلاديغيني دوشونورلر کي، بو دا يانليش تصووردور. ايزلر بيزي داها اؤنجه لره آپارير. حاقين ايچدن درک اولونماسي، دونيانينمي اينسانين ايچريسينده، اينسانينمي دونيانين ايچريسينده اولماسي ايدئياسي چوخ زامان باشا دوشولمور. بونا گؤره ده اينسان - دونيا موناسيبتلرينده وحدت ايدئياسيندان چيخيش ائديلمه سي قاچيلمازدير. 

  تمللره گئتمه دن بئله بير مقامي وورغولاياق کي، ايستر  " ان الحق "  ، ايسترسه ده  " وحدتي ووجود "  تعليمي اورتا عصرلرده سادجه آيري-آيري شخصلرله باغلي اولماييب، دؤورون فيکير عنعنه سينه، بير فلسفي دوشونجه آخينينا چئوريلميشدي. اصلینده بو ايسلامي دوشونجه نين فلسفي اؤزونودرک آختاريشي، بؤيوک تسوووف آخيني نين موهوم قوللاريندان بيري ايدي. و بو مؤحتشم قوووشاقدا ديني دوشونجه، فلسفه و پوئزييا دا بير آرايا گلميشدي. بئله بير قوووشمانين ان گؤزل نومونه لريندن بيري ده ماهمود شبوسترييه (1287 - 1320) مخصوصدور. او دا آذربايجانين جمعي بير قرينه ياشاميش، آما مؤحتشم بير فلسفي ايرس قويوب گئتميش، دونيادا چوخ آز بيلينن فيلوسوفلارينداندير. نسيمي نين يازيب-ياراتديغي آرئالدا فيکير آخيني شبوستري ياراديجيليغيندان کناردا اولوشا بيلمزدي. بو رابيطه  ان آزيندان فيکيرلرين موقاييسه سينده اوزه چيخير. ايکي آذربايجانلي شاعير-فيلوسوفون ياراديجيليغيندا واريثليک مقاملاري ائله ايلک موقاييسه لردن اوزه چيخير. هم ده ايدئيا وحدتي وار. بيزجه، آذربايجانلي فيلوسوفلارين وحدت حاليندا آراشديريلماسي سادجه فلسفي باخيمدان دئييل، هم ده ميللي روحون تاريخي بوتؤولوگونو ايزله مک باخيميندان ماراقليدير. 

  عوموميتله، نسيمي فلسفه سي يئنيدن آراشديريلماليدير. اونون پوئزيياسي حاقيندا آز يازيلماييب، آما فلسفه سي حاقيندا جيدي تدقيقاتا احتيياج واردير. يازانلار چوخ اولا بيلر، آما اونو سادجه حروفیليک چرچيوه سينده آختارماقلا مطلبه اولاشماق مومکون دئييل. نسيميدن اولکي و سونراکي فلسفي تمللرله علاقه  قورولماسي بو بؤيوک فيکير مأخذي نين آچيلماسي اوچون ايلکين شرطدير. 

  بيز ديقتي بؤيوک فلسفي يوکو اولان بعضي مقاملارا يؤنلتمک ايسترديک: 

  ايدئيانين بيرينجي دئييليشي: من - هر شئيم، بوتون دونيا؛ کورئيي-عرض، يئرلر، گؤيلر - منده دير... باشقا دئييليشي ده بودور کي، منده اولمايان هئچ بير شئي يوخدور. باخ، بو مقام - چوخ اينجه بير مقامدير. بئله بير منطيقي کئچيد مومکونمو؟! 

   " ان الحقق - حاق منده دير "  ايفاده سي نه آنلامينا گلير؟ 

  سوالي ترسينه قويساق: - حاق منده دئييلسه، من حاقين ديشيندامي قاليرام؟ 

  آخي، حاق بوتون دونياني احتيوا ائدر. حاق - بوتون وارليقدير، اونون ديشيندا هئچ نه يوخدور. 

  باشقا سوال -  " ان الحق - حاق منده دير "  ايفاده سي  " حاق هر يئرده دير، هم ده منيم ديشيمدادير "  آنلامي ايله نه کيمي بير موناسيبتده دير؟ 

  ياخود - اگر صؤحبت احتيوا ائتمکدن گئديرسه - هم منده دير، هم باشقا وارليقلاردادير… 

  يني من آيري، يئرده قالان دونيا آيريدير، هاکک دا هم مني، هم ده دونياني احتيوا ائدير. 

  نسيمي نين سلفي ماهمود شبوستري دئيير: 

    

  اؤزون تا گؤردو بير شخص معين، 

  سوال ائتدي، دوشوندو بس نيم من؟ 

  کئچيب اول ذره ليکدن کل له يئتدي، 

  اونو سئير ائيله دي، سونرا قاييتدي. 

    

  نسيمي نين موعاصيري شاعير آبدال ايسه سانکي نسيميني تکرار ائدير: 

    

  ذره و گونش منم، گيزلي منم، فاش منم. 

    

  يعني بو ايدئيالار بوتؤولوکده دؤورون روحوندا وار ايدي. و فرقلي شاعيرلر بو روحو فرقلي سويييه ده جانلانديرا بيليرديلر. 

  فوضولي دئيير: 

    

  منده اولان آشيکار سنسن، 

  من خود يوخام، اول کي وار - سنسن! 

    

  بوردا  " من "  و  " سن " اين عئينيتي، سادجه سئون و سئويله نين عئينيتيني آشير. فرقلي بير باخيش بوجاغيندا سوبيئکت و اوبيئکتين بير-بيرينه کئچمه سي تصوير اولونور کي، بو دا عصرلر سونرا فئنومئنولوگييا آدلي فلسفي تعليمده اؤز عکسيني تاپميشدير.  " من "  و  " سن "  - ايکي سوبيئکت بؤلگوسو سارتر و لئويناسدا آچيلير. سونرا ايسه  " من " ،  " سن "  و  " او "  (يني بير باشقاسي) کيمي داوام ائتديريلير. فوضولي نين دئديکلريني واختيندا بيز اؤزوموز آچا بيلمه ديگيميز اوچون سارترلار آچير و سانکي يئني تمل قويور، سيفيردان باشلاييرلار. 

  ياخود: 

  آنيب تنهاليغي قبر ايچره نيفرت قيلما اؤلمکدن، 

  طريقي-اونس توت کيم، هر اوووج توپراق بير آدمدير. 

    

  شئکسپيرين هاملئتي، اونون قبيريستانليقدا اينسانين تورپاغا دؤنوشو ايله باغلي فلسفي ريجتي قربده فلسفي دونياگؤروشون اولوشماسينا بؤيوک تاثير گؤسترميشدير. اوندان بير عصر اؤنجه فوضولي  " هر اوووج توپراق بير آدمدير "  دئيير. چوخ ماراقلي مقامدير:  " هر اوووج توپراق بير عالمدير "  ده دئمک اولار. چونکي بوردا  " عالمله "   " آدمين "  بير عئينيتي دويولور. آدمين، اينسان اوغلونون باشلانغيجا دؤنوشو بوتون دونيانين، طبيعتده کي  سيرکولياسييانين آنالوقو کيمي کئچير. يني اينسان ايله طبيعت آراسينداکي وحدتدن صؤحبت گئدير. دونيانين ماددي و معنوييه آيريليشي آرخا پلانا کئچير، گوجونو ايتيرير و بو ايکي دونيا عئيني بير دونيانين فرقلي تجلليلري کيمي اوزه چيخير. وحدتي-ووجود تعليمي نين داها بير آسپئکتي، اؤرنگي: 

  اي ملک سيما کي، سندن اؤزگه حيراندي سنه، 

  حق بيلر، انسان دئمز هر کيم کي حيراندي سنه. 

    

  ايکي فرقلي واريانت: اولا، مني و دونياني احتيوا ائدن داها بؤيوک، سونسوز مکان وار. آما دونيا مگر سونلودورمو؟ بس من؟ من مگر سونلومويام؟ اوندا بيز ايکي سونسوزو احتيوا ائدن بير سونسوزلوقدان دانيشمالي اولاريق. ديگر طرفدن، دونيا دئديگيميز واحيد دئييل، نئجه کي، من اؤزومو اوندان آييريرام، ائلجه ده باشقالاري آييرير... و باشقالاري سادجه اينسانلار دئييل، هر نه قدر شئي وارسا - هاميسي سونسوزدور. دونيا اؤزو سونسوز سايدا سونسوزلارين جمعي کيمي! 

  ايکي جور سونسوزلوق وار: بير  " سونسوز کيچيک "  کي، هر شئيه داخيلدير. و بير ده  " سونسوز بؤيوک "  کي، هر شئيي احتيوا ائدر. 

  يئنه ده داملا و دريانين، ذره و گونشين ديالئکتيکاسي! 

   " ايچيميزده کي  سونسوزلوغو کشف ائده بيلسک، اؤزوموز ده سونسوزلوغا قوووشموش اولاريق " . 

  زئنون  " آخيللئس و تيسباغا "  آپوريياسيندا محض بو مقامي: سونسوز کيچيکلرين توپلامدا سونلو اولدوغونو نظره آلماميشدي. سادجه اولاراق او دؤورون رييازي تفککورو بونا ايمکان وئرميردي... 

  و بير د: سونسوزلوق بير طرفدن سورکليليک، ديگر طرفدن ده توکنمزليک آنلامينا گلير و بونلارين دا بير عئينيت مقامي وار. 

  اصلینده، هر شئي سونسوزدو؛ بيزه سونلو کيمي گؤروننلر ده. سادجه بيزيم ايدراکيميز سونلو سايديقلاريميزين سونسوزلوغونو تصوور ائتمک اوچون يئترلي اولمور چوخ واخت. گؤرونور، بو گونون فلسفي تفککورو رياضي تفککوردن گئري قالير... 

  مقصديميز سادجه بونلاري خاطيرلاتماق دئييل. مقصديميز ديقتي سونلو و کيچيک سايديقلاريميزين (او جومله دن حياتين، عؤمرون) بؤيوک و حتّی سونسوز پوتئنسيالينا يؤنلتمکدير. 

  سادجه دوشونجه نين حدودلاريني گئنيشلنديرمک... بونون اوچون ايسه علمي-منطيقي چرچيوه ني آشاراق بديعي دوشونجه نين هودودسوز اوفوقلريندن بحرلنمک طلب اولونور. 

  وحدت ايدئياسي نين فرقلي چالارلاري، دونيانين بوتونلوگو، داخيلي وحدتي حاقيندا ايدئيالار قديم چين فلسفه سينده ده وار:  " گؤي و يئر، هر شئي منيم اؤزومدن، روحومدان، نفسيمدن و جانيمدان آرتيق دئييل. اؤلن هئچ بير شئي، دوغان هئچ بير شئي يوخدور " . 

  آما بيزيمکيندن فرقليدير. چين فلسفه سينده دئييلير:  " بوراخ، قوي جانيميز گؤيون و يئرين، هر شئيين جاني ايله قاريشسين؛ آغاجلارين جالاناراق بير آغاجا چئوريلديگي کيمي " . 

  بيزده ايسه سونرادان قاريشماق، جالانيب بيرلشمک دئييل، تملده بيرليک ايدئياسي ترننوم اولونور. و بو بيرليگين... يئنه ده اينسان دايانير. 

  شاه ايسماييل خطاي يازير: 

    

  يئر يوخ ايکن، گؤي يوخ ايکن، تا ازلدن وار ايديم، 

  گؤوهرين يئکدانه سيندن ايره لي پرگار ايديم. 

  گؤوهري آغ ائيله ديم، توتدو جاهاني سربسر، 

  يئري-گؤيو، عرشي-گورشو يارادان ستتار ايديم. 

    

  اينسان اونا گؤره ازلدن وار ايدي کي، او، ايلاهي روح داشيييجيسيدير. 

  اينسانين بو خوصوصي، فؤوق ال ستاتوسو غرب فلسفه سينده اوزون مودت ديقتدن کناردا قالميش، حتّی رئنئسسانس دا هومانيزمي آنجاق بليرلي بير مقاما قدر آکتواللاشديرا بيلميش، اينسانمرکزلي دونيا مودئلينه کئچيد آنجاق 20 عصرين اوللرينده اؤزونه يول آچا بيلميشدير. و بو  " فرقلي "  باخيشا گؤره ماکس شئلئر فلسفي آنتروپولوگييانين ياراديجيسي حساب اولونور. 

  نييه؟ چونکي بيز اساسی نيظامي طرفيندن قويولان و نسيمي فلسفه سينده آرديجيل پرينسيپ و تعليم کيمي اولوشان، کريستاللاشان يئني فلسفي کونسئپتي واختيندا پوئزييا ديليندن فلسفه ديلينه چئويريب دونيايا تقديم ائده بيلمه ميشيک.