نباتي چاغي آذربايجان ادبياتي

 

 دکتر حسین محمد زاده صدیق دوزگون

 

نادر شاهين اؤلوموندن مشروطيّتين غلبه‌سينه قده‌ر، آذربايجان ادبيات تاريخيني ايكي اساس و فرقلي دؤورلره بؤله بيلريك. ايلك دؤور خانليقلار دؤورو و ايران- روس ساواشلاري‌نين تركمانچاي معاهده‌سي ايله سونا چاتماسي دؤور و ايكينجي دؤور، همين تاريخدن «ستارخان»ـين تهراني فتح ائتمه‌سينه قده‌ركي دؤور. بيرينجي دؤورون أن قاباريق سيماسي ملاه پناه واقف و ايكينجي دؤورون أن تأثير ائديجي، آدليم و اؤنده گؤدن شاعيري سيد ابوالقاسم نباتي دير.

 

بو دؤورون بؤيوك شاعيرلر و اديبلري‌نين هاميسي دئمك اولاركي اونون ياراديجيليق تأثيري آلتيندا قالميشلار. «عندليب قراجه داغي»، «خرّم كوردشتي»،‌ «ذكري اردبيلي»، «راجي تبريزي»،‌«شكوهي مراغه‌اي»، «محمدعلي هيدجي»، «حمزه نگاري قاراباغي»، «محمد باقر خلخالي»، «لعلي ايرواني»، «فقير اردوبادي» و «سيد عظيم شيرواني» اونون شعري‌نين پرستش‌كارلاري و تعقيب ائديجيلرينه چئوريلميشدير.

 

آشاغيدا نباتي‌نين ياشاديغي چاغدا ياشايان و يازيب يارادان و نباتي ايله آز- چوخ علاقه‌ده اولان شاعيرلرين آدلارين چكيب، قيساجا ياراديجيليقلارينا نظر ساليريق:

 

1-  عندليب قاراجاداغي[1]

 

«عندليب قاراداغي‌»نين ياشاييشي حاققيندا هئچ بير سند و قئيد بيزه معلوم دگيلدير. يالنيز ليلي و مجنون مثنويسينده اؤزو حاققيندا دانيشاركن، دئييركي اصلي اهر شهريندندير و گنجليگينده ايروان شهرينده سردار «حسين قلي خان» سارايينا گئتميش و اورادا ميرزه‌ليك ايشي ايله مشغول اولموشدور. اونون نباتي ساياق شعرلري چوخدور. او جمله دن آشاغيداكي بئشليك:

 

گؤردوم اهرده بير گولِ رعنا، عجب! عجب!

 

 جلّاد و جان‌ستان و دل آرا، عجب! عجب!

 

اولموش نشانِ حوسن، هويدا، عجب! عجب!

 

 سالميش جهانا شورش و غوغا، عجب! عجب!

 

وه! وه! نه خوش ايميش بوتِ زيبا، عجب! عجب!

 

* * *

 

اول بي‌وفا قيلير نه قيامت قيامتي،

 

 هر باخيش ايله محو ائدير اهل سلامتي.

 

باللهي أوزونون يئنه وار چوخ علامتي،

 

 هر دل‌شكسته كيم گؤروب اول سرو قامتي.

 

فرياد چكدي، سؤيله‌دي: به! به! عجب! عجب!

 

* * *

 

پژمرده قيلدي صرصر غم نوباهاريمي،

 

 ايام هيجر اليمدن آليب اختياريمي،

 

كسدي فراق رشته‌ي صبر و قراريمي،

 

 بي‌دردلر، ائشيتدي منيم آه و زاريمي،

 

 طعن ايله قيلديلار نه تماشا، عجب! عجب!

 

* * *

 

اي عندليب! گولشنِ هيجران و درد و غم،

 

 جؤور بلا كشيده‌ي دؤوران و بخت كم!

 

گؤز ياشيني گولاب كيمي تؤكمه دم به دم،

 

 مشكل‌گشا امير عرب، خسرو عجم،

 

حلّ ائيله‌سين بو مشكلي مولا، عجب! عجب!

 

نباتي‌نين همين وزن و همين قافيه و رديف ايله گؤزل بير بئشليگي بيزه معلومدور.[2]

 

«عندليب قاراداغي» عاشيق شعري طورماسيندادا چوخ اثرلر ياراتميشدير و شيرين و اويناق شفاهي ادبيات سؤرجوكلريني، نباتي ساياق ديلينده ايشلتميشدير:

 

دولانيم باشينا، اولوم قوربانين،

 

 آلا گؤزلو ياريم! ايندي دة- دانيش!

 

بالله! سنه قوربان اولماقدان سواي،

 

يوخدور اؤزگه كاريم، ايندي دة- دانيش!  

 

«عندليب قاراجاداغي»، نباتي‌دن قاباق دونيادان كؤچموشدور. اونون ايجاد ائتديگي «حيدري» نوع شعرلر، گؤزل جيناسلار ايله دولودور:

 

صانع قدرتدن سياه ساچلارين،

 

 عارضينده نه زندانا دوشوبدور.

 

بيريسي حبشدير، بيريسي هيندو،

 

 بد عمللر خوش مكانا دوشوبدور.

 

عزيزيم نه مكاني،/ دهقانين‌نم اكاني،

 

عشقي‌نين آواره‌سي،/ نه يئري، نه مكاني.

 

عاشيق ايله اوّلدن،/ يئديگي نمك هاني؟

 

* * *

 

پرتوِ جمالين اولدو منوّر،/ تعجب ائيلرم، الله اكبر!

 

مئهر روخساريندان خورشيد انور،

 

 بير ذرّه‌دير آسيمانا دوشوبدور.

 

عزيريم آسيمانا،/ زولف أوستن آسما يانا.

 

وئرمز فلك حريفي،/ شاه جنت عاصي مانا.

 

حسرتيندن فغانيم،/ چولقاشيب آسيمانا.

 

«عندليب» ايله نباتي‌نين مطلق گؤروشمه‌لري و دئييشمه‌لري اولموشدور. بو فرضيه،‌ اؤزل بير آراشديرما موضوعو اولابيلر.

 

2-  نصرت اردبيلي[3]

 

«سيد عظيم شيرواني» اؤز تذكره‌سينده اونون حاققيندا يازير:«قطب العرفا . . . مولانا نصرتعلي‌شاه اردبيلي مشاهير عرفادندير و اعاظم وزرادن. تولد شريفلري 1225- نجي سنه‌ده دارالارشاد اردبيلده واقع اولان . . . و كتاب مثنويسي دارالارشاد اردبيلده اولدوغوم زامانلار نظر حقيره يئتدي. گومانيم بودوركي، نه ملّاي رومي و نه ملّا احمد نراقي اول مطاليبده عالي مضمون و شيرين كلام دئمه‌ميشلر. حيف كي او جنابين عؤمرلري وفا ائتمه‌ييب، همان كتاب ناتمام قالميشدير.

 

و ملّا نباتي اوشتوبونلو و عاجز خلخالي و ذكري اردبيلي . . . او بزرگوارين شاگردلريندندير.

 

و تاريخ هيجري‌نين 1267 سنه‌سينده دارالسّلطنه تهراندا وفات ائديبدير. و بو غزل توركي او بزرگواردنديركي شاگيردي عاجيزين غزلي‌نين مقابلينده ايراداً و تنبهً بويورموشلار. تبركاً ثبت اولونور:

 

شوكر لله! كي كؤنول اولدو تجلّي دليسي،

 

 يئنه أوز قويدو بيابانا بو ليلا دليسي.

 

غل و قلّاده و زنجيره مگر بند اولور،

 

 بير كؤنول كيم اولا بير زولف چليپا دليسي.

 

يا مگر نرگس بستانا سالير طرف نظر،

 

 بير كؤنول كيم اولا بير گؤزلري شهلا دليسي؟

 

عشقين آدابيني فرهاد ايله مجنون نه بيلير،

 

 بيريسي داغ آيي‌سيدير، بيري صحرا دليسي!

 

داغ ايله باغ، گؤزوم! عاشيق ايچون يكساندير،

 

 هره بير يانا گئدير واحد و يكتا دليسي.

 

عاغلا گل، واعظ و زاهيد سؤزونه توتماقولاق،

 

 بيري دونيا دليسي دير بيري عقبا دليسي.

 

 عاجز آثار ره عشقه قدم باسمادي، حيف!

 

 بو سؤزو خبط خيال ائتدي او سئودا دليسي.

 

3-  مير حمزه نگاري

 

حكيم سيد ابوالقاسم نباتينين چاغداشلاريندان اولان «مير حمزه نگاري»، هر شاعيردن داها چوخ اونون تأثيري آلتيندا ايدي و اونو اؤزونه اوستاد سئچميش و شعرلرينده اونون شيوه‌‌سيني دوام ائديردي. مثال ايچون، نباتي‌نين:

 

گئت دولانگيلن، خامسن هنوز،

 

 پخته اولماغا چوخ سفر گرك.

 

مطلعلي چارپاراسينا، گؤزل نظيره يازميشدير:

 

درد و محنتين، اي صنم، صنم!

 

 عشق ايله چكن بير منم، منم.

 

عار و واريني راهِ مئهرده،

 

 تار و مار ائدن، بير منم، منم.

 

  * * *

 

چكميشم جفا، ائيله بير وفا،

 

 سن‌ده العطاء، جان سنه فدا،

 

راهِ مئهرده زار و بي‌نوا،

 

 تارك الوطن بير منم، منم.

 

  * * *

 

يار نازنين، حوسني بي‌قرين،

 

 شاهراهدا انتظاركش،

 

غم چكيب همين ائيله‌ين بينا،

 

 خانه‌ي حزن بير منم، منم.

 

  * * *

 

ائيله‌گيل خيطاب، وئرمه‌گيل عذاب،

 

 أوزدن آل نيقاب ائيله‌گيل ثواب،

 

تخم مئهريني رشك آفتاب،/ سينه‌يه اكن بير منم، منم.

 

«شيخ سيد حمزه نگاري» قاراباغ ولايتي‌نين علم و ادب مركزينده بؤيوموش، ياشاميش و اورادا طريقت باشچيليغينا چاتميشدير. اونون ديواني دفعه‌لر داش باسما اصولي ايله چاپ اولوبدور. غزللري چوخ اويناق و شورانگيزدير و مريدلري طرفيندن عارفانه توپلانتيلاردا سماع ايله اجرا اولونارميش:

 

الحمد لله! فيكريمدير الله،

 

 فيكريمدير الله، الحمد لله!

 

كؤنلومده والله ديدار دلخواه،

 

 ديدار دلخواه، كؤنلومده و الله!

 

ذكريمدير الله هر بير محلده،

 

 هر بير محلده ذكريمدير الله!

 

استغفر الله! بي‌ راهليقدان،

 

 بيراهليقدان استغفر الله!

 

كئچمزم بالله بزم سماعدان،

 

 بزم سماعدان كئچمزم بالله!

 

ورديمدير الله سيد نگاري،

 

 سيد نگاري ورديمدير الله!

 

«سيد حمزه نگاري»، نباتي‌نين بير چوخ مستزادلارينادا نظيره يازميشدير او، نباتي‌نين اؤلوموندن (1262 هـ.) سونرا، اون ايل داها ياشاميشدير و عشق حاققيندا اونون سؤزلريني دفعه‌لر تكرار ائتميشدير:

 

آنلاگيل عشق نه‌دير، دينله نه معنادير بو،

 

 باده‌ي لوطف خدا، بخشش مولادير بو.

 

ايچه‌ليم شام و سحر ايچره‌ ولاكين بي‌جام،

 

 جامه حاجتمي اولور؟ باده‌ي معنادير بو!

 

حرف سيز عاشق شئيدالارا تسليم ائيله،

 

 درس اسراري نه خوس درس دل‌آرادير بو!

 

مخفي دير عشق، خفيّاتي هويدا ائيلر،

 

 سؤيلرم بؤيله‌دلي، گؤر نه معمّادير بو.

 

قاصيد اي مير نگاري گؤرونور خنده زنان،

 

 واري بير خئير خبر، عالمه بُشرادير بو.

 

4-   فقير اردوبادي

 

«حاج آقا ابن محمد فقير اردوبادي» هيجري 1252- نجي ايلده اردوباد شهرينده دونيايا گلميشدير. آتاسي‌نين تجارت ايشي ايله مشغول اولدوغو ايچون، اوشاقليق و گنجليگيني تبريزده كئچيرميشدير و اورادا تحصيل آلميشدير.

 

اونون ديوانيندان قالان يگانه أليازما گلشن عرفان آدلانير. بو أليازماني دوستو «محمد تقي صدقي» حاضيرلاميش و فقيرين اوغلو «محمد سعيد اردوبادي» طرفيندن، أليازما «محمد آقا سلطان زاده»يه وئريلميشدير. او ايسه، اثرين سئچيلميش شعرلريني 1989 نجو ايلده آغلار قلم اليمده عنواني ايله چاپ ائتديرميشدير.[4] او انجمن شعرا آدلي بير محفيل آچميش و اونا رهبرليك ائديرميش.

 

«فقير اردوبادي»نين بؤيوك باباسي «ميرزا حاتم اردوبادي»ده شاه عباس زاماني‌نين شاعيرلريندن ساييليرميش. «محمد سعيد اردوبادي‌»نين يازديغينا گؤره، «فقير اردوبادي» اوشتوبون كنديندن ائولنميش و نباتي ايله قوهوم ايميش.[5]

 

او نباتي ايله گل- گئت ائديب يازيلاشاردي. او جمله‌دن نباتي‌يه يازديغي بير منظوم مكتوبو اليميزده‌دير:

 

اي سرورِ دلِ خونين، فرح قلب ملال!

 

 اي مه برجِ شرف، شمسه‌ي ايوان جلال!

 

بوته‌ي گلبن توحيد، گول باغ نبي،

 

 گولشن سبز سيادتده ايا تازه نهال!

 

يئتيرير مخلصِ ديرينه جنابوزا سلام،

 

 بعد اؤز يالاني ائيلر سيزه تقرير مقال

 

كي: بو هيجران اودونا عاشقِ دل‌سوخته‌ني،

 

 نولا بير دم ائده‌سيز لوطف‌له مهمان وصال؟

 

مصرِ غوربتده بوگون يوسف ثاني‌سن اگر،

 

 پير كنعاني‌دا ياد ائيله عزيزيم، مه و سال.

 

ايسته‌ييب كي بيله‌سيز حاليمي هر آيدان بير،

 

 چرخ اگيب قدديمي سن‌سيز ائله‌ييب مثل هلال.

 

ايل اولور ائيلمه‌ميشدير بيزي طغرا ايله باد،

 

 اوخويوب شؤوق وصاليز ديليمي ائيله‌دي لال.

 

قلم آلديم اله تا قصه‌ي هيجراني يازام،

 

 ديل چكيب ناله كدوتك كي ده‌ير باد شمال.

 

ديل قوشون بيرجه كدو ايچره ساليب گؤندرديم،

 

 من رضايام اونا اود وور گيلن يا، سوياسال!

 

ياخشي تحرير قيلارديم غم هيجراني، ولي،

 

قيليب آشفته منيم حاليمي زولف و خط و خال!

 

قالماييب تندن اثر ذرّه‌جه جز حلقه‌ي ميم،

 

 بير نيشان يوخدو قديمدن كي، مگر حلقه‌ي دال.

 

فلكين سازشي يوخ بو دل زاريمله منيم،

 

 آچماييب شاهد مطلب منه عالمده جمال.

 

مدتي زولفه وئريب دل، كئچيريب عمر دراز،

 

 گه كئچر وصل ايله، گه هيجر ايله، گه فيكر و خيال.

 

گر گئدم گولشنه سن‌سيز، منه گولخن اولو باغ،

 

 گه ايچم باده فراغيندا اولور غئير حلال.

 

شبِ هيجران غميني بسدي فقيرا! ائله بس،

 

 تا شبِ قدري ايله روز وصال اولسا وصال.

 

مختصر ياخشيدي سؤز، خامه‌ني الدن يئره قوي،

 

 اوردوبادي دگيسن، وئرمه بو حد خرجه كمال.

 

ريزه كرمانا توتوب بار ائله‌ييب گؤندرمه،

 

 چشمه‌ي خضره نه‌لاييق تؤكه‌سن آب زلال؟

 

يوخ ولي عئيب، نباتي آلير عالمده نبات،

 

 بيلير البته غزل اهلي، بلي، قدر غزال![6]

 

«فقير اردوبادي» نباتي‌نين بير چوخ اثرلريني‌ده استقبال ائتميشدير. ميثال ايچون نباتي دئيير:

 

اي گؤزوم! ياتماداهي، گل داهي بيدار اول، اول!

 

 خوابِ غفلتدن اويان، بير گئجه هشيار اول، اول!

 

و «فقير اردوبادي» دئيير:

 

گئتمه چوخ خوابه، گؤزوم! بير دفعه بيدار اول، اول،

 

 ايچمه غفلت مئييني، دهرده هشيار اول، اول!

 

5-   شاه نگار خانيم رنجور

 

«شاه نگار خانيم» بنت كاظيم، اؤز ولايتي قازاخ ماحاليندا «ملّا خانيم» لقبي ايله مشهور ايميش و «فريدون كؤچرلي» دئميشكن:«چوخ مؤمنه و عابده، عصمتلي و حيالي بير عورت ايدي، واختي‌نين چوخونو عيبادتده و رياضتده كئچيره‌ردي. . . »[7] اوندان مناجات، تحميديه و مرثيه‌لردن علاوه غزليات مجموعه‌سي الده‌دير. بير چوخ شعرلريني‌‌ده نباتي‌دن ايلهام آلاراق، اونون اثرلرينه نظيره كيمي يازميشدير:

 

نه كوفروم وار، نه ايمانيم،

 

 نه دينيم وار، نه اديانيم،

 

فامّا شاهِ غفرانا،

 

 اوميدِ بي‌امانام من.

 

  * * *

 

نه حوسن اهلي كماليم وار،

 

 نه بير صاحب جماليم وار.

 

نه مولكوم وار، نه ماليم وار،

 

 دئييرلر بير شبانام من.

 

  * * *

 

نه دير طاليب، نه دير مطلوب،

 

 نه دير راغيب، نه دير مرغوب.

 

نه دير جاذب، نه دير مجذوب،

 

 نه ظنّ اولسا، چنانام من.

 

«شاه نگار خانيم» رنجور، «شيخ سيد حمزه نگاري»نين مريده‌لريندن ايدي و بير چوخ غزللريني اونا خيطاب يازميشدير:

 

اي دريغا! كيم اوشاهين مه جمالين گؤرمه‌ديم،

 

 أوز سوروب درگاهينا، روخسارِ آلين گؤرمه‌ديم.

 

اؤتمه‌ديم كويوندا هر شب تا سحر بولبول كيمي،

 

 يئتمه‌ديم مقصودا بيردم، گول وصالين گؤرمه‌ديم.

 

دستِ پاكين بوس ائديب، هم هر طرف «هو! هو!» دئيه

 

 

 

 سئير ائدن سرمستِ ريندلاابالين گؤرمه‌ديم.

 

اي دريغا! كيم اوماهين حلقه‌ي عشّاقدا،

 

 سئيري چالاركن، وجودِ بي‌مثالين گؤرمه‌ديم.

 

اي دريغا! درگهينده عاشق شئيدا‌سي‌نين،

 

 خوب آوازين، داهي شيرين مقالين گؤرمه‌ديم.

 

عفو قيل، يا ربّنا! هر دم دل ديوانه‌مي،

 

 جرم و عصيان ايله گؤردوم، ياخشي حالين گؤرمه‌ديم.

 

در جهان الحمدُ لله! خسته‌ي رنجوره‌ني،

 

 مدح شاهيندان سوايي بير كمالين گؤرمه‌ديم.

 

6-  ميرزا مهدي شكوهي

 

«ميرزا مهدي شكوهي» ماراغايي «عندليب قاراداغي» و سيد ابوالقاسم نباتيدن سونرا، او دؤورده عموم خلق شعري طرزينده يازان ان گوجلو شاعيردير. او، قوشمانين اون هجالي شكليني و تجنيسين داها ساده نوعلاريني ياراتماقلا برابر، رسمي مكتوب شعريميزين بعضي اؤزلليك‌لريني قوشما شعرينه كئچيرميشدير. ميثال ايچون نباتي‌نين «گلسين، گلمه‌سين» مشهور قوشماسينا بنزه‌‌تمه‌ده دئيير:

 

بير دئين يوخدور او مه جمالا،

 

 عاشقِ نالان گلسين، گلمه‌سين؟

 

حسرتي چوخدور بزم وصالا،

 

 بو ديده گريان گلسين، گلمه‌سين؟

 

او، 1245 هـ . ايلينده آنادان اولموشدور. آتاسي آيناسازليق ائده‌رميش. او، گنجليگينده «ناشي» تخلص ائدردي. عؤمرونون بير چوخ ايللريني ماراغادا كئچيرن شاعير، توركيه، عربستان و اورتا آسياني گزديكدن سونرا، ياشامي‌نين سون ايللريني تهراندا كئچيرديكدن سونرا‌، تكرار ماراغايا قاييتميش و 1315 هـ . ايلينده اورادا وفات ائتميشدير. اونون اثرلر كُلّياتيني ايلك دفعه اوغلو «ميرزا حسن شكوهي» 1321 هـ . ايلينده تبريزده نشر ائتميشدير.[8]

 

شكوهي، نباتي كيمي شعرده وزنين اويناقليق و آهنگدارليغينا چوخ دقت يئتيرميش و هجا وزني‌نين ان اويناق و شورانگيز بحرلريني سئچميشدير.

 

7-  عاشيق حسين شمكيرلي«آشيق حسين شمكيرلي»ده نباتي‌نين دوغولدوغو ايل (1215 هـ .) دونيا گلميش و 80 ايله ياخين ياشاميشدير.

 

اونون نباتي ساياغي عارفانه طنزلري واردير. نباتي‌نين فارسجا يازديغي «هله لنگ لنگ لنگم»[9] شعرينه نظيره اولاراق، دئيير:

 

لوطويام بامبولويام، طالبِ بنگم سنه نه!

 

 چوخ گولوب، چوخ دانيشان، چوخدا جفنگم، سنه نه!

 

آتارام دوشمن ايچون توپ و توفنگم، سنه نه!

 

 درد و غم باركشي‌ام،‌ كؤهنه پشنگم، سنه نه!

 

و يا:   

 

. . . شمكيرلي عاشيق حسينم، من بورادا يئر ائيله‌ديم

 

 اورمو، سالماس، ماراغاني، اصفهاني زار ائيله‌ديم!

 

گزديم‌چچني، كركزي، نه‌قورخدوم، نه عار ائيله‌ديم،

 

 دميرقايي دربند، قوبا، گورجوستاني‌خوار ائيله‌ديم.

 

 تولكوسن سن، گئريده دور، شير و پلنگم، سنه نه!

 

8-  ابوالحسن راجي

 

«ابوالحسن راجي»، نباتي‌ ايله بير زاماندا ياشاميشدير، نباتي‌نين اؤلوموندن أوچ ايل سونرا، مكه‌ّدن قاييداركن، دريادا غرق اولموشدور.

 

  اونون:

 

منيم ديليمجه،‌ صبا! سؤيله يارا تئز گلسين،/ دوشوب آياغينا عرض ائت دوباره: تئز گلسين!

 

و يا:

 

مندن صبا دة اول گوله قوربانينام سنين،/ رحم ائتگيلن بو بولبوله، قوربانينام سنين.

 

مطلعلي غزللري، نباتي‌نين:

 

صبا، مندن سؤيله او گو‌‌‌ل‌عذارا،/ بولبول گولوستانا گلسين گلمه‌سين.

 

مطلعلي قوشماسينا نظيره كيمي يازيلميشدير.

 

راجي‌نين بير چوخ تجنيسلري، نباتي ساياغي دير.

 

هابئله اونون «حضرت علي» (ع) حاققيندا يازديغي اوزون قصيده‌سي، نباتي‌نين قصيده‌لريني يادا سالير:

 

يئري وار اولماسا زولف سيه بو سرو قامتده،/ بو سؤز مشهور عالمدير، گئجه اولماز قيامتده.

 

9-  عاشيق علسگر

 

«عاشيق علسگر»، آذربايجان عاشيق شعري‌نين ان اوجا قلّه‌لريني فتح ائدن بير شاعيردير. نباتي كيچيك ياشلاريندا ايكن، او دونيا گلميشدير.

 

او، نباتي ساياغي تجنيسلر چوخ يازميشدير:

 

كؤنول سن كي دوشدون عشقين بحرينه،

 

 نارين چالخان، نارين سيلكين، نارين أوز!

 

دوست سني باغينا باغبان ائيل

 

 آلماسين در، گولون اييله، نارين أوز!

 

  * * *

 

تيكديرميسن قصر، ايوان، اودا سن،/ او سئوديگين، او گؤزلين، اودا، سن!

 

قياباخدين، مني سالدين اوداسن،/ انصاف ائيله، گل كؤنلومون نارين أوز!

 

  * * *

 

گل سينيق كؤنلومو ساري، دور گئدك،

 

 ترلانسان، آولاتما ساري، دور گئدك!

 

علسكرم! بيزه ساري دور گئدك،

 

 بير درديمي ائيله ييبسن نارين، أوز!

 

10-  سيد عظيم شيرواني

 

«سيد عظيم شيرواني»، نباتي ايله بير چاغدا ياشايان عارف شاعيردير. نباتي آشاغي- يوخاري 20 ياش سيد عظيم‌دن بؤيوك اولموش و 12 ايل اوندان قاباق اؤلموشدور. بو ايكي عارف شاعيرين شعرلري آراسيندا بير چوخ بنزرليك‌لر واردير.

 

ميثال ايچون نباتي‌نين بورادا تقديم ائتديگيميز بيرينجي مخمّسي‌نين اؤلچو و اوياقي ايله، سيد عظيم ديوانيندا بير نئچه غزله راست گلمك اولور. او جمله‌دن آشاغيداكي مطلعلي غزللر:

 

نئجه همتاي توتوم هر بوت زيبايا سني،

 

 وئرمرم تانري بيلير جمله بو دونيايا سني![10]

 

* * *

 

يئنه بير نامه ايله يادا ساليب يارمني،

 

 بخت هاندان بو ايشه گؤردو سزاوار مني.[11]

 

* * *

 

چكمه، اي دوست! بوگون دامن صحرايا مني،

 

 يوخدور اول ماه، آپارما بو تماشايا مني![12]

 

* * *

 

  سانما گولدور گتيرن صحن گولوستانا مني،

 

 گوله سن‌سيز نظر ائتسم گتيرر جانا مني.[13]

 

* * *

 

  اؤلدورور گرچه، كؤنول! حسرتِ پابوس سني،

 

 وار اوميديم كي فلك ائتميه مأيوس سني![14]

 

11-  حكيم هيدجي[15]

 

«حكيم ملا محمدعلي هيدجي» 1270 هـ . ايلينده زنگان شهري‌نين 70 كيلومترليگينده قرار تاپان «هيدج»‌ده دونيايا گلميش، قزوين و نجف حوزه‌لرينده درس اوخوموش و تهران‌دا يئرلشميش، 1346 هـ . ايلينده وفات ائتميشدير. او، فيلسوف شاعير كيمي نباتي چاغي آذربايجان ادبياتي تاريخينه داخيل اولور. مكمل توركجه ديواني، دانشنامه عنوانلي عرفاني منظومه‌سي و فارسجا يازديغي ديوان، شرح منظومه و رساله‌ي دخانيه آدلي اثرلري واردير.

 

او «شيخ شهاب الدين سهروردي»نين عربجه شعرلريني‌ده تضمين ائتميشدير. او جمله‌دن:

 

منم غم دوشگونو غربت دوچاري،

 

 پوزولموش گولشني، سولموش باهاري.

 

كؤنول آغلار گئده‌يديم كنده ‌ساري،

 

 اَقول الجّارَتي و الدَّمع جاري.

 

و لي عزم الرّحيل اِليَ الدّياري.  

 

او، اؤز غزللرينده، عرفاني معنالاري توركجه يازاركن، نباتي‌دن ايلهام آلميشدير. باشدان باشا ديوانيندا نباتي حال و هواسي دويولور:

 

قيلدي مني تازه‌دن بير گؤزو شهلا دلي،

 

 بولبول شئيدا كيمي بير گول حمرا دلي.

 

مذهبي آتديم خدا، اولدوم عجب بوت پرست،

 

 ائيله‌دي من كافري بير بوتِ زيبا دلي.

 

قيس عبث اولمادي چؤللرين آواره‌سي،

 

 قيلدي او بيچاره‌ني عشوه‌ي ليلا دلي.

 

اونون آشاغيداكي غزلي، نباتي‌نين دوشونجه‌سي ايله قوشا گلن بير مضموندا يازيلميشدير:

 

دانيشما زاهيد آگر سؤز ائشيتمه‌ديم سنه نه،

 

 من اؤز خُداما گناه ائتديم ائتمه‌ديم سنه نه!

 

نئچون مني سؤيوره‌ن گئتميشم كليسايا،

 

 دگيلدي كعبه نصيبيم‌ده گئتمه‌ديم، سنه نه!

 

دئديم من ائيلمه‌رم التفات دونيايا،

 

 يئريتديم اؤز سؤزومو يا يئريتمه‌ديم،/ سنه نه؟

 

منه اگر دئديلر گل قيلاق داليندا ناماز،

 

 باخيب صلاحيما بو امره بيتمه‌ديم، سنه نه؟

 

12-  ملا مهرعلي فدوي[16]

 

«ملا مهرعلي فدوي» 1182 هـ . ايلينده زنوز كندينده دونيايا گلميش، خوي، تبريز، مشهد، اصفهان، نجف شهرلرينده درس اوخوموش و تبريزده يئرلشميشدير. 80 ياشيندا 1262 هـ . ايلينده تبريزده وفات ائدن «ملامهرعلي» تقوالي مجتهد مهارتلي اديب و شاعير اولموش، توركجه، عربجه و بعضاً فارسجا شعرلر يازميشدير. اونون:

 

ها عليٌّ بَشَرٌ كَيفَ بَشر،/ رَبَّهُ فيهِ تَجَلّي و ظَهَر.[17]

 

مطلعلي رائيّه قصيده‌سي ديللر ازبري‌دير.

 

«ملا مهرعلي فدوي»‌نين آشاغيداكي مطلعلي قصيده‌سي:

 

يوخ‌گوله‌عشقي بولبولون، عشق‌بودور كي‌منده‌وار،

 

 گولده‌نه‌حوسن اي‌پري!‌حوسن‌بودور كي‌سنده‌وار.[18]

 

ايله نباتي‌نين:

 

مئيده نه لوطف اي پري! نشئه اودور كي سنده‌وار،

 

 آب حيات لذّتي لبلريني امنده‌ وار.

 

مطلعلي قصيده‌سيني مقايسه ائده بيلريك. «ملا مهرعلي»نين خلق ايچينده چوخ معروف بير غزلي‌ده واردير:

 

درس عشق اوخومويان زاد اولماز،

 

 اولسا مفتي آدي بير آد اولماز!

 

. . . عاشق اولدون فدوي عقلي بوراخ،

 

 بير عروسه ايكي داماد اولماز!

 

13-  ذكري اردبيلي[19]

 

آذربايجان عرفان و مدنيت مركزي اردبيل شهرينده دوياشايان ذكري 1205 هـ . ايلينده دونيايا گلميشدير. او، نباتي ايله بيرليكده «نصرت اردبيلي» يانيندا شاگيردليك ائتميش و اونا مريد اولموشلار.

 

او، شعر دونياسيندا عرفان جارچيسي دير:

 

هواي عشق ايله دولدور كؤنول جانانه‌سين، يارب!

 

 غم عشق ايله تعمير ائت بو غم ويرانه‌سين، يارب!

 

اونون بير چوخ شعرلري نباتي ساياغي يازيلميشدير:

 

آب و آتش، خاك و بادام، بيلميرم آيا نه‌يم؟

 

 آنلارام الحق كي محو طلعت جانانه‌يم!

 

كافر و گبر و يهود و ائرمني بيردير منه،

 

 دين و مذهب بيلميرم من عاشق ديوانه‌يم!

 

عالمين قصر زر اندوزوندان اومّيد اومموشام،

 

 من خرابات اهليم، فطرتده ويران خانه‌يم.

 

و يا:

 

پير مئيخانه كي سرگرم شراب ائتدي مني،

 

 ائوي آباد، عجب خانه خراب ائتدي مني![20]

 

14-  كمينه خانم

 

60 ايله ياخين عؤمر ائدن «فاطيمه خانيم كمينه»، نباتي ايله بير چاغدا ياشايان أوچونجو شاعره‌ي محترمه[21] دير. اونون آدي، تذكره‌لرده چوخ احتراملا ذكر اولونور. اونون دولغون مضمونلو ديواني الده‌دير. غزللرينده و قوشمالاريندا، نباتي‌يه نظر سالماسي آيديندير. ايكي ديوانين مقايسه‌سينده بير چوخ هماهنگ بئيتلر تاپماق اولار.

 

نباتي دئيير:

 

مرحبا، نام خدا، قدرتِ يزدانا باخين

 

دئيه‌سن مصره بوگون يوسف كنعان گلدي.

 

كمينه ايسه دئيير:

 

گؤره‌لي دل، سر زولفونو، كؤنول بند اولدو

 

 مصرده يوسف كنعان نئجه زندانا دوشوب.

 

نباتي:

 

نيسبت سنه اي شوخ، زوليخا اولا بيلمز

 

 بو عيشوه‌ده بو غمزه‌ده ليلا اولا بيلمز.

 

بس‌كي مني گؤرجك، منه وحشي كيمي باخدين

 

 ايندي داهي مجنون منه همتا اولا بيلمز.

 

كمينه:

 

البته دلِ شادا دگيل كيمسه قرينه،

 

 همتا اولا بيلمز اونا بيچاره كمينه.

 

15-  عاشيق پري

 

«عاشيق پري» نباتي ايله چاغداش اولان آدليم بير عاشيقدير. او، نباتي‌نين دوغولدوغو ايل (1215 هـ . ) دونيايا گلميشدير. او، عصري‌نين ان تانينميش عاشيق و شاعيرلريندن اولموش، روان طبعي، حاضير جوابليغي و عاغيلليليغي ايله شؤهرت قازانميشدير. ادبي انجمن و ائل تويلاريندا فعال اشتراك ائدن عاشيق پري‌دن كيچكيك بير ديوان اليميزده‌دير. بو ديواندا، «ملا پناه واقف»، «جعفرخان نوا»، «ميرزا جان مدد» و باشقا شاعيرلرين شعرلرينه نظيره‌لره راست گليريك. او، سيد ابوالقاسم نباتي‌يه‌ده چوخ حؤرمت بسله‌ين بير شاعير ايميش.

 

نباتي‌نين:

 

صبا مندن سؤيله او گول‌عُذارا

 

 بولبول گولوستانا گلسين، گلمه‌سين؟

 

مطلعلي قوشماسينا جواب اولاراق دئيير:

 

مرشد كاميلدن درسيمي آلديم

 

 جان گؤتوروب بو مئيدانا گلميشم.

 

بولبول آبادانا، بايقوش وئراندا

 

 عندليبم، گولوستانا گلميشم.

 

16-  محمد باقر خلخالي

 

«محمد باقر» ولد آخوند «ملاحيدر بن آخوند ملا احمد» 1250 هـ . ايلينده خالخال بؤلگه‌سي‌نين شئيخدر آباد كندينده دوغولموش، سونرا عائله‌سي ايله برابر قارابولاق كندينه كؤچموشدور. گنجليگينده معدن الاسرار مؤلفي «ملاعلي زنجاني» يانيندا درس اوخوموش، سونرالار اؤزو دوشونجه صاحيبي بؤيوك عاليم اولموشدور. [22] اوندان غزللر ديواني و تولكوناغيلي يا ثعلبيه عنوانلي 1500 بئيتليك مثنويسي واردير.

 

«آخوند ملامحمد باقر خلخالي»، شريعت علملرينده، اجتهاد مقامينا يئتيشين بير عالم اولماسينا باخماياراق، غزللرينده عارف بير شاعير كيمي ظهور ائدير. اونون، نباتي شعرلري ايله سسله‌شن بير چوخ غزللري واردير. ميثال ايچون:

 

دل پژمرده‌مي تا مايل جام ائيله‌ميشم،

 

 اؤزومو داخيل عنوان عظام ائيله‌ميشم.

 

مكتب عشقده تا مصحفِ حوسنون گؤردوم،

 

 سئير ائديب درسيمي بالمرّه تامام ائيله‌ميشم.

 

خبر آلديم:«نييه گوللر ييخيليبدير بي‌هوش؟»

 

 دئدي دلدار:«بو گولشنده خرام ائيله‌ميشم!»

 

  * **

 

دلبره باخ گؤر نئجه جانانه دير،

 

 آلماغا جان عشوه‌سي مردانه‌دير!

 

قوي دولانيم باشينا پروانه تك،

 

 عشق اودونا يانماغا پروا نه‌دير؟

 

من اوقارا گؤزلرينه عاشيقام،

 

 عشوه‌سي چوخ، شيوه‌سي مستانه‌دير.

 

لعل لبين شربتيني هوشيار،

 

 ايچسه دئير، مئي نه‌دي، مينا نه‌دير؟

 

مسجيده بؤركوم آتالار، گير منم،

 

 مست يئري گوشه‌ي مئيخانه‌دير!

 

دوش چؤله «باقر» نه عجب ياتميسان؟

 

 قوي دئيه‌لر:«بو گئده ديوانه‌دير!»

 

17-  عاجز سرابي

 

يئتميش ايكي ايل ياشايان عاجز سرابي، شاعير و خطاط ايدي. اونون قوشمالاري نباتي‌نين قوشمالاري ساياغيندادير:

 

سيز گؤرون صانع بي‌چون،

 

 نه عجب صنعت ائيله‌ميش.

 

بوگؤزلين أوزون جنت،

 

 قدّين قيامت ائيله‌ميش.

 

و يا:

 

هاچاناجان آمان چكيم،

 

 بو ظاليم هيجران اليندن.

 

بو ائوييخان سيتمكارين

 

 آمان، الامان اليندن.

 

 

 

 

 



17- جنوبي آذربايجان ادبياتي آنتالوگياسي، باكي، 1981، ص 43 .

18- باخ 2- 8

19- سيد عظيم شيرواني، اثرلري، باكي، ج 2، تذكره، ص 198 .

20- فقير اردوبادي، آغلار قلم اليمده، باكي، 1989.

21- همان، ص 9.

22- همان، ص 139 .

23- آذربايجان ادبياتي، ج 1،‌ ص 249 .

24- كليات ميرزا مهدي شكوهي، تبريز، 1321 هـ . (داش باسماسي).

25- ديوان فارسي نباتي، ص 45.

26- سيد عظيم شيرواني، ديوان، باكي، ج 1، ص 574.

27- همان، ص 580

28- همان، ص 595

29- همان، ص 609

30- همان، ص 640

31- ح. م. صديق، حكيم هيديجي و آذربايجان فيلسوفلاري، زنگان، 1382، (حكيم هيدجي كنگره‌سي مناسبتي ايله نشر اولموشدور).

32- محمد كمالي وحدت، ديوان و شرح حال ملا مهرعلي، تبريز، 1383.

33- همين قصيده‌ني «هريسي» آدلي چاغداش شاعيرلريميزدن بيريسي تضمين و ترجمه ائتميشدير. بو تضمين بئله باشلايير: تانري‌نين قدرتي اشياءدا گزر،/ آپارار پي بو سؤزه اهل نظر.

            لفظده صورت معناني گؤرر،/ ها عليٌّ بشرٌ كيفَ بَشر.

34- بو قصيده‌ني «فرهاد ميرزا» زنبيل آدلي اثرينه داخيل ائتميشدير.

35- دكتر جابر عناصري اردبيلي، منتخبي از غزليات ذكري اردبيلي، تهران، 1382 .

36- منتخبي از غزليات ذكري اردبيلي، ص 66 .

37- تعبير فريدون كؤچرلي‌نيندير.

38- باخ ح. م. صديق. هفت مقاله پيرامون فولكلور و ادبيات مردم آذربايجان، دنياي دانش، تهران، 1357، ص 151 .