گونئي آذربايجان ادبیياتي حاقيندا مولاحيظه لر

 

 

 

چاغداش گونئي آذربايجان ادبياتي عومومتورک ادبياتي نين دانيلماز پارچاسيدير. هم ده تورک دونياسي نين ادبي و ايجتيماي نايليتلري نين منيمسنيلمه سي باخيميندان زنگين بير مدنيتين واريثيدير. هر بير ادبي حاديثه  نين يارانماسيندا و دبياتين اورتايا چيخماسيندا ادبي ديلين اؤنملي تاثيري واردير1. گونئي آذربايجاندا ادبي ديلين اينکيشاف مرحله لريني آشاغيداکي کيمي قئيد ائتمک اولار: 

  1.کلاسسيک ادبي ديل مرحله سي 

  2.پهلوي دؤورو ادبي ديل مرحله سي 

  3.ايران ايسلام اينقيلابيندان سونراکي ادبي ديل.  

  قئيد ائتمک لازيمدير کي، آذربايجان ادبي ديلي بيرينجي مرحله ده عومومتورک ديللري نين اينکيشاف پروسئسينه داخيلدير. يني، تورک دونياسي نين بيريندي مينيلليکدن باشلاياراق ائپوسدان ميفولوگييايا قدرکي و اوندان سونراکي ادبي پروسئسلرين مجموعسونا داخيلدير و اونون آيريلماز ترکيب حيصه سيدير. خ-خيي اسردن باشلاياراق شيفاهي خالق ادبياتيندان يازيلي ادبياتا کئچيد دؤورو بير چوخ شاعير، اديب و فيلوسوف اورتايا قويموشدور. بو مرحله  آذربايجاندا آکادئميک سويييه ده آراشديريلميش و ايجتيمايته تقديم ائديلميشدير.  

  آذربايجان ادبياتي نين ايکينجي مرحله ده، يني پهلوي رئژيمي دؤورونده کي  اينکيشافي آچيق-آشکار قارشيسي آلينميشدير. بوتون تزييقلره باخماياراق رسمي قاداغالاري گؤزاردي ائديب خالقي اوچون جانيني تهلوکه يه آتان موباريز يازيچي و  شاعيرلريميز اولموشدور. اونلارين اثرلري کيچيک کيتابچالار شکلينده گيزلي صورتده نشر ائديله رک الدن-اله گزيب اوخونموشدور و بئلجه گله جک ادبياتيميزين اينکيشافي نين تمه لي قويولموشدور. اؤنملي بير مسله ني قئيد ائتمک لازيمدير کي، پهلوي رئژيمي دؤورونده، يني 1945-46-جي ايللرده گونئي آذربايجان ميللي دؤولتي نين يارانماسي بوتون باسقيلارا سون قوياراق ميللي ديل و ادبياتين  اينکيشافيندا اؤنملي آدديملار آتميش اولدو2. درس کيتابلاري يازيلاراق مکتبلرده و اونيوئرسيتئتلرده آزيربايجان تورکجه سينده تدريس ائديلدي. اونو دا وورغولاماق لازيمدير کي، بو ايشده قوزئي آذربايجان عاليملري نين تمنناسيز يارديملاري اولموشدور. آنجاق ميللي حؤکومت شاه رئژيمي طرفيندن دئوريلديکدن سونرا بوتون ادبي، علمي، ايجتيماعي-سياسي نايليتلر دوردورولدو. حتّی، قانوني شکيلده آذربايجان ديلينن ايستيفاده سينه قاداغا قويولدو. لاکين آذربايجان يازارلاري و شاعيرلري اؤز ادبياتلاريني مخفي و گيزلي شکيلده سوردورمه يه داعوام ائتديلر. بو دؤورون ان مشهور و اؤنملي شاعير و يازارلاريندان محمد بيرياني گؤسترمک اولار3. يئنه قئيد ائتمک اولار کي، گونئي آذربايجان ادبيات خاديملري مجبوري سورگونلره گؤندريله رک اولدوقلاري يئرلرده ديللريني و ادبياتلاريني اينکيشاف ائتديرمکدن چکينمه ديلر. اونا گؤره ده آذربايجاندان کناردا، خوصوصيله ده تهران و ايرانين باشقا شهرلرينده يازيب يارادان آذربايجانليلارين سايي گوندن-گونه آرتميش اولدو. حتّی، گونئي آذربايجانليلارين يازيچي شاعير و اديبلري قوزئي آذربايجانا موهاجيرت ائده رک قوزئيده مهم ادبي اينکيشافا ايمضا آتديلار.  

  اوچونجو مرحله  ايسه ايران ايسلام اينقيلابيندان سونرا باشلاميش اولدو. بو دؤورده پهلوي دؤورونده قاداغا اولونموش آذربايجان ديلي نين قورخوسو آرادان قالديريلدي. گيزلي و مخفي يازيلان اثرلر بير-بير ايشيق اوزو گؤره رک چاپ اولونماغا باشلادي. تام دقيقليگي ايله دئسک، آذربايجان ادبي ديلي و ادبياتي نين فورمالاشماسي باشلادي و شاعير و يازيچيلاريميزين اثرلرينده اينقيبالي آب -هاوا اسمه يه باشلادي. موختليف قزئتلر، ژورناللار، او جومله دن، دده قورقود، وارليق، چنلي بئل، آذربايجان کوراوغلو، اودلار يوردو، آراز، يولداش، بيرليک، اينقيلاب يولوندا، سهند، خدافرين، آفتاب آذربايجان، اميد زنجان، خالق سؤزو، ايشيق، اميد آذربايجان، بايرام، آغري و بير چوخ بو سپکيده ژورنال و قزئتلر نشر اولماغا باشلادي. اورتايا يئني ادبيات فورماسي چيخدي. اؤنجه اينقيلابي احوالي-روحييه ايله باشلايان ادبيات سونرا تاماميله ميللي موستوييه کئچميش اولدو. بو حاقدا گونئي آذربايجان مطبوعاتيندا اينتيشار تاپان وطنپرورليک مؤوضوسو ايله دولو يازيلارا راست گلمک اولار.  

  گونئي آذربايجان ادبياتي يئني دوغموش اوشاق کيمي هر گون بؤيومه يه باشلادي. بؤيودوکجه ده اؤزونو درک ائتمه يه، اؤزونو ايناملا ايره ليلتمه يه جهد گؤستردي و چوخلو ادبي اثرلر مئيدانا گلدي. بو ادبي حاديثه لرين باشيندا دوکتور حسين صديق دوزگون، حبيب ساهير، حميد نيطقي، عزيز مؤحسوني، دوکتور جاواد هئيت، پروفسور محمد تاغي، ذهتابي، پروفسور  گنجعلي صباحی، محمد علي فرزانه، حسن مجيدزاده ساوالان، ايسماعيل هادي، دوکتورحسین شرقی دره جک سوي تورک، صديار وظيفه  ائل اوغلو دورور4.  

  تبريز و تهراندان باشقا رئگيون ادبياتي داها گئنيش ووسعت آلدي. آذربايجانين بوتون شهر و کندلرينده ادبي درنکلر ياراديلاراق ديل و ادبياتين اينجلنمه سينه باشلاديلدي. رسمي شکيلده ديليميزده يازيب اوخوماق اولماديغيندان و مکتبلرين فعاليت گؤسترمه مه سي نتيجه سينده دئمک اولار کي، فردي اوسلوبلار بوتؤو ادبي اوسلوبلا موقاييسه ده اوستونلوک تشکيل ائتدي. کؤکو کلاسسيک ادبياتا دايانان شعرلر يازيلماغا باشلاندي. اونون دا سببي اوندان عيبارت ايدي کي، اينسانلار هله ياخين کئچميشده بوتون يازيلاريني دئمک اولار کي، فارس ديلينده يازاراق ياراديجيليغا باقلاميشديلار و ياراديجيليقلاريني او ديلده ياراداراق، آنا ديلي نين سؤز خزينه سيندن محروم ايديلر. ائله بو دؤورده يارانان ادبياتا نظر سالديقدا ايلک اؤنجه يازيلان نظم و نثر اثرلرينده فارس و عرب سؤزلريني قاباريق شکيلده گؤرمک مومکوندور. بئله يازيچي و شاعيرلريمزدن بيري نازير شرفخانئييدير.  

  کلاسسيک ادبياتين يئني يارانان گونئي آذربايجان ادبياتينا تاثيري گؤزه چارپاجاق درجه ده گوجلو ايدي. هر کس شعرلريني يازاندا نسيميني، فوضوليني اؤرنک گؤتوروردو. گئت-گئده چاغداش ادبياتيميزين آپاريجي قولو قزل ژانري اولسا دا، ياواش-ياواش ذؤوقوموزو اوخشايا بيلميه جک کيم گؤرونمه يه باشلادي. ائله بونا گؤره ده آذربايجان شيفاهي خالق ادبياتينا مئيل آرتدي و بونا نومونه اولاراق شهريارين حيدربابا منظومه سيني گؤسترمک مومکوندور. اينکار ائديلمزديرکي، آذربايجان قزه لي نين يارانماسي و آذربايجان اينساني نين بو ژانردان ايستيفاده ائتمه سي گؤسترير کي، ايلک اؤنجه آذربايجان اديب و يازارلاري عرب و فارس ديلرينده ياراتديغي اثرلردن ايلهام آلاراق سونرا اؤز ديللرينده ياراديجيليغا باشلاميشديلار. ايسلام دينینين قبول ائديلمه سي عرب و فارس ديللري نين ده ديلميزده يايغينلاشماسينا سبب اولموشدور5. ائله بونا گؤره ده بو گونکو گونئي آذربايجان ادبياتيندا شهريار فئنومئنيني نظره آلاراق فولکلور، يعني شيفاهي خالق ادبيياتي ياراديجيليغيني اؤرنک آلاراق کلاسسيک ادبياتيميزي اؤرنک سئچنلرله پارالئل حالا گلميشدير. فولکلوروموزون و فولکلوردان يارانان ادبياتيميزين اؤنجوللريندن دوکتور ميرهيدايت حصاري و اوستاد جمشيد شيبانيني گؤسترمک اولار.  

  آذربايجانين جوغرافي حودودلاريندان کناردا آنجاق آذربايجاندا يارانميش ادبياتين تاثيري ايله يئنيدن جانلانماغا باشلايان باشقا تورک اولان  و ايرانين مرکزينده ياشايان طايفالار دا اؤز ادبياتلاريني ياراتماغا باشلاديلار. اونلاردان ان مشهورو «حکيم» لقبي ايله تانينان قاراخانين نوه سي تئيمورخان اوغلو تيليمخاندير کي، ساوه شهري نين مزدقان ماحالي نين مرغئيي کندينده ياشاميشدير. اونون شعرلرينده فولکلورو و آشيق ادبياتيني حيسس ائتمک مومکوندور. اونون ياراديجيليغيني، حتّی، تورکمن ادبياتيندان آذربايجان ادبياتينا کئچيد کيمي ده ديرلنديرمک مومکوندور: 

  سيمورقو سمندر طوتي و مينا 

  طاووس و قو تئزر و سار او ملخ چين 

  هوما کرکس هوکو کنتوره، قجير 

  ابابيل بايقوش و ککليک، گؤيرچين. 

   

  قاراقوش او قيرقي قيزيل قازالاق  

  غرقاوول دوراش او شوپر بولبول، زاغ 

  دورنا او هوپارا انقوت او کلاغ 

  خوروز او اؤردک و قارغا، سيغيرچين. 

  شاعير ادبي حاديثه لري سئزميش اولسا دا، آنجاق طبيعته وورغونلوغونو گيزله ده بيلمه ديگيندن ميثلي گؤرونمه ين بير شعري ده بير چوخ قوشلارين آديني چکه رک يازميشدير. آنجاق شاعير تيليمخانين مختومقولو فراغييه اولان سئوگيسي اونون شعرلرينده ده اؤزونو گؤسترميشدير.  

  اي يارانلار، موسلمانلار! 

  جبريده يورومه لي اولدو 

  نئجه زحمت چکن جانلار 

  جفاني گؤرمه لي اولدو. 

   

  تيليمخان، گؤوول نئچين آغلاماسين 

  جانيم گئتمه لي اولدو 

  دان يئلي نامه گتيرمز 

  قوربته يئتمه لي اولدو. 

  بئله نومونه لري چوخ وئرمک اولار. آنجاق آذربايجانين اراضيسي داخيلينده ياواش-ياواش کؤزرن ميللي ادبيات اونون ياراديجيلاري نين زنگين اثرلري ايله دولغونلاشماغا باشلادي. بونلاردان بيري يئنيليکچي «شاعير» لقبي آلان، اصلینده آشيق و شيفاهي خالق ادبياتيندان  ايلهام آلان حبيب ساهيردير. معلومدور کي، 1920-جي ايلدن 1978-جي ايله قدر سورن ايکي آذربايجان آراسيندا علاقه لرين اولماماسي، اوسته ليک ايراندا تورکجه مطبوعات و نشرياتين قاداغان ائديلمه سي حبيب ساهيرين بير اولدوز تک پارلاماسي ايله سونا چاتير. بؤيوک شاعيريميز حبيب ساهير هرطرفلي بير شاعير اولدوغونا گؤره ياراديجيليغي دا دئمک اولار کي، ميللي و هرطرفليدير: 

  اوشاقليقدا قارا يئره سوروندوم 

  جاوانليقدا درده قمه بوروندوم 

  اوفوقلرده سينيق آي تک گؤروندوم 

  کوردوستاندا کاک ميرزاليق ائله ديم 

  ايستامبولدا  بختييارليق ديله ديم. 

  بيلديگيميز کيمي شاه رئژيمي دؤورونده شعرلريني فارسجا يازان حبيب ساهير يئني يارانان ايمکانين نتينجه سينده آنا ديلينده يازماغا باشلاميشدي و حبيب ساهير دؤنوشو آدلانان بو مرحله ده اونو اؤرنک گؤتوروب يولونو داوام ائدنلر ده چوخ اولموشدور. «سحر ايشيقلانير»، «کؤوشن» کيمي ديرلي اثرلرده اونون ادبي ايرثي توپلانيب خالقا چاتديريلميشدير. 

  آي دوغارکن کؤلگلنميش سولاردا 

  آيين گوموش ايشيقلاري تيترردي 

  داغ چيچگي درن نازلي قيز منه 

  شراب ايله دولو بير جام وئرردي. 

  حبيب ساهيري اينجله ديکجه معلوم اولور کي، سربست شعريميزين بانيسي اولان حبيب ساهير ده کلاسسيک ايرثيميزي اؤز شعرلرينده داوام ائتديرميشدير. بئله شاعيرلريميزدن بيري ده صديار وظيفه  ائل اوغلودور. او، يازديغي بوتون اثرلرده بديعيليگي، خلقيليگي و اوريژينالليغي ساخلايا بيلميشدير. آشيق ادبياتي نين درين مفتونو اولان ائل اوغلو دئمک اولار کي، کلاسسيک و ميللي مفکوره ميزن محصوللاريندان ديرينجه بهره لنه بيلميشدير. او، قارا قوووه لره سينه گره رک بئله يازميشدير: 

  دئييرلر چوخ قديمدن بير گون 

  سيرريني قويويا دئييب دللک 

  سيرريني دئييب کي، پارتلاماسين سينه سينده اورک. 

  بير قارغي گؤيريب قالخيب قويودان 

  بو قارغيني کسيب توتک دوزلديب چوبان 

  هامي بيلير دانيشماز قارغي 

  قورو اولا، ياش اولا. 

  آنجاق بو قارغي دانيشيب، سسله نيب توتک… 

  گؤروندويو کيمي، مودئرنيزم اويدورماسينا اينانمايان شاعير رئاليزمه، او جومله دن ده آذربايجان خالق ياراديجيليغيندان بهره لنمه يه اوستونلوک وئريب. قارا قوووه لر ادبياتيميزي افسانه لريميزدن، ناغيللاريميزدان، فولکلو-روموزدان اوزاقلاشديرماغا جهد ائتسه ده، آنتيرئاليست ادبي قوووه لر بيزي ناغيللار و تاپماجالار، هم ده طبعيي حيات طرزيميزدن و ياشام معيارلاريميزدان اوزاقلاشديرماغا چاليشسا دا، گؤرونور کي، آذربايجان ادبياتي يئنه جه اؤز مجراسيندا داوام ائتمکده دير. ائله صايب تبريزي نين دئديگي کيمي: 

  نه احتيياج کي، ساقي وئره شراب سنا 

  کي اؤز پياله سيني وئردي آفتاب سنا 

  شرابي لعل اوچون تؤکمه ابرو زينهار  

  کئ دم به دم لبي لعلين وئرر شراب سنا 

  باشقالاري نين جهد ائديب بيزي ميللي وارليغيميزدان اوزاقلاشديرماسي موختليف ادبي حاديثه لر اونواني ايله کيمليگيميزه توخونوب و اونو زدله مه سي جنوبي آذربايجاندا ميللي دوشونجه لي ياراديجيلاريميز طرفيندن دئمک اولار کي، قارشيسي آلينميشدير.  

  مودئرنيزم، آنتيرئاليستيک، پوستمودئرنيزم و بو کيمي ادبي جريانلار هاميسي اصلینده گونئي آذربايجان ادبياتيني دوغرو مجراسيندان چيخارتماغا يؤنلميش قارا قوووه لرين ايشلريدير.  

  پوستمدئرنيزمه گلديکده ايسه بو مئتود فورماجا صنايعلشمه دؤورونه مخصوص اولدوغونا گؤره فورماليزم آدلانير. مضمونجا ايسه همين دؤوره مخصوص اولاراق رومانتيزم خوصوصيتلرينه ماليکدير. پوستمودئرنيزمين اؤزونمخصوص مورککبليگي اونون اصيل ماهيتي نين اوزه چيخماسيني چتينلشديرير. اونا قارشي آمانسيز موباريزه آپاريلماسي لازيم گلير. آنجاق آذربايجان پوئزيياسيندا بوتون دؤورلرده اولدوغو کيمي شاعيرلريميز مؤحکم آدديملار آتاراق ميللي مجرادا ايره ليله ميشلر. بونا ميثال اولاراق عليرضا نابديل اوکتاي تنقيدي و اينقيلابي رئاليزمي ايله آذربايجان ادبياتيني مودئرنيزمين بوغولدوغو گيردابدان اوزاقلاشديراراق موباريزه مئيدانينا چکميشدير. آذربايجان شعري رئاليزمدير و بونون گؤزل جهتلري، سئوگي يؤنلري آشيق ياراديجيليغيندا اؤزونو گؤسترمکده دير. بؤيوک ميللي شاعيريميز بولود قرچؤرلو سهند «سازيمين سؤزو» اثرينده، شهريار ايسه «حيدربابا» اثرينده خالقا باغليليقلاريني و صنعتين نه قدر خالقا خيدمت ائده بيله جگيني نوماييش ائتديرميشدير. آذربايجاندا گئدن ادبي جريانلار و حاديثه لر مضمون اعتيباريله کلاسسيک، مودئرن، پست مدئرن گؤرونسه ده، آنجاق ماهيت اعتيباريله ميللي و خلقيدير. چونکي هر بير ياراديجي صنعتينه اؤز مسئوليتيني در ائده رک ياناشماقدادير.  

  قاضي بورهان الديندن باشلايان سوفيزم حرکاتي عاريفانه، سوفييانه شعر اوسلوبو محمد فوضوليده فلسفي تعليم تربييوي ايدئالا قوووشاراق ديگر گلن شاعيرلريميزه ايلهام قايناغي اولموشدور. اونا گؤره ده بو گون گونئي آذربايجان ادبياتي کلاسسيک شعريميزين آتاسي حساب ائديلن عماد الدين نسيمي نين گئرچک داوامچيلاري اولاراق يوللارينا داوام ائتمکده ديرلر. بير سؤزله، گونئي آذربايجان ادبياتي ميللي شعوورون چيچکلنمه سي نين و ميللي پوئزيياميزين گوجله نيب ياييلماسي نين قوللوغوندادير.  

  بو تکجه پوئزيياميزدا يوخ، هم ده نثريميزده اؤزونو گؤسترمکده دير. نثريميزده ده اؤنه چيخان چوخ يازارلاريميز واردير. او جومله دن ايسماعيل هادي، رضا همراز، پرويز شاهمره سي، حسين دوزگون، محمدرضا کريمي باغبان، سلمان سفريان، اکبر صالحي، عليرضا ذیحق، روقیه کبيري،  اکبر رضاييني گؤسترمک اولار. نثر نومونه لرينده ده يئنه بيز کلاسسيک و رئاليزمه، ائلجه ده ديره نيش و موقاويمت احوال-روحييه سينه راست گليريک. قئيد ائتمک لازيمدير کي، بو گونکو گونئي آذربايجان ادبي ديلي و ادبياتي هر بير دؤولت قايغيسيندان کناردادير. ائله بونا گؤره ده گونئي ادبياتي اؤزو اؤز اينکيشافيني تامين ائدیر.

 رسمي دؤولت ايداره لرينده چاليشان ياري فارس، ياري عرب و بير آز دا تورکجه قاريشيغي اولان ديلي دانيشانلارين ياراتديغي ادبيات - دؤولتين بعضي قوروملاريندا و او جومله دن راديو-تئلئويزييا و بعضي مطبوعات اورقانلاريندا ايستيفاده اولونور و دئمک اولار کي، بو ديلي و ادبي ياراديجيليغي فارسجا بيلنلر داها راحات باشا دوشورلر. لاکين عومومي خالق کوتله سي اونا آنلاماقدا چتينليک چکيرلر و بو ادبياتي اوخويانلارين سايي چوخ آزدير. بورا ديني ادبيات، او جومله دن مرثيه ، نوحه و بعضي تئلئويزييا و راديو وئريليشلرينده حاضيرلانان پروقراملاري داخيل ائتمک اولار. 

  ادبيات 

  1.سلام الله جاويد. «دوستلار گؤروشو». 1359 (شمسي تقويمله)، تهران. ادبيات اوجاغي نشرياتي. 

  2.انور اوزون. ايران تورک باسيني نين 200 ييلي (1814-2014). ترابزون، 2014. ائسئر اوفسئت. 

  3.محمد تاغي ذهتابي. ايران تورکلري نين اسکي تاريخي. تبريز، 1379 (2001-جي ايل). اختر نشرياتي 

  4.گونئي آذربايجان ادبيات تاريخي (20عصر). باکي، 2013، قانون نشرياتي. 

  5.اسميرا فواد. محمد حسين شهريار. بيبليوقرافييا. باکي، 2017