مرادعلي قریشی (قافلانتي) نين حيات و ياراديجيليغي حاقيندا

دسته: ادبییات
منتشر شده در چهارشنبه, 17 بهمن 1397 16:05
نوشته شده توسط Super User

" سؤندورمديم اورييمده وطنيمين چيراغين "

MURAD ƏLİ QUREYŞİ(QAFLANTI)NİN HƏYATI VƏ YARADICILIĞI HAQQINA


ديلبر رضايئوا

 Dilbər Rzayev 

موعاصير گونئي آذربايجان شاعيري مراد علی قریشی قافلانتي 1933(1312 )جو ايلدهچارويماق ماحالي نين حيدراباد کندينده آنادان اولموشدور. قافلانتي نين اوشاقليق چاغلاري رضا شاهين آذربايجاندا يئريتديگي شووينيست سيياست ايللرينه، خالقين ان چتين گونلرينه تصادوف ائدير.

او، يئددي ياشيندا کندلرينده کيميرزه محمدين مکتبينه گؤندريلير. 1942(1321)-جي ايلده تحصيليني بوراخيب عاييله سينه کؤمک ائتمک اوچون آتاسي ايله بيرليکده ايشله مکمجبوريتينده قالير. بو زامان 13-14 ياشلي قافلانتي نين عاييله سي وطنيني ترک ائديب ايرانين باشقا يئرلرينه کؤچمه لي اولور.

کؤچدوکلري کندده بير نئچه ايل ياشاديقدان سونرا، 1950//1329-جي ايلده او،تهران شهرينه کؤچور. بو شهرده مراد علي نين طالعيي وطندن ديدرگين دوشموش مينلرله سويداشي نين طالعيينه قوووشور.1952//1331-جي ايلده کيچيک بير رئزين فابريکينده ايش تاپير. او، گوندوزلري ايشله يير، گئجه لرسه درس اوخوماقلا گونونو کئچيرير. بو مينواللا يالنيز دؤرد ايل تحصيل آلا بيلير.

Description: قا1940-جي ايللرده قافلانتي ادبياتا، خوسوسيله آشيق شعرينه و صنعتينه بؤيوک ماراق گؤسترمه يه باشلايير. او، بوش واختلاريني آشيق اوجاقلاريندا کئچيرير و فولکلوروموزون بير قولو اولان آشيق صنعتيني دريندن منيمسه يير.عئيني زاماندا اؤزو ده شعر يازماغا باشلايير. قافلانتي 1971(1350)-جي ايللرين اووللرينده تهراندا ياشايان بير نئچه آذربايجان شاعيري ايله ده تانيش اولور.

1976//1355-جي ايلده نوصرت اللاه فتحي آتشبيلي نين واسيطه سيله تهراندا فعاليت گؤسترن"دوستلار گؤروشو "آدلي ادبي درنه يه عوضو اولور. دوکتور سالام اللاه جاويدين تشببوسو ايله قورولان بو درنک همين ايللرده بير چوخ آذربايجان شاعيري نين ادبي اينکيشافيندا اؤنملي رول اوينايير.

بو دؤورده آذربايجانين ميللي شاعيري بولود قاراچورلو سهند قافلانتي نين ايستعدادلي بير ائل شاعيري اولدوغونو دويور. سهند، قافلانتي شخصيتينده و شعرينده باريز شکيلده گؤزه چارپان جسورلوق، موباريزليک، دؤنمزليک حيسسلري نين قايناغيني اونون زحمتله يوغرولان شرفلي ياشاميندا گؤرور و اوستاد بير شاعير کيمي قافلانتي پوئزياسي نين اينکيشافينا اؤز موثبت تاثيريني گؤسترير.

1978//1357-جي ايلده تبريز شهرينده کي" ائلدار "نشرياتيندا قافلانتي نين شعرلريندن عيبارت" سئچيلميش اثرلر " اي چاپ اولونور. همين ايللرده تهراندا يايينلانان" يولداش "،" اينقيلاب يولوندا " ،" آزادليق " ،" يئني يول " ، کؤرپو " ،" دده قورقود " ،" بهاري-زنجان " ،" گونش "و س. کيمي ژورناللارلا جيدي و سيخ امکداشليق ائدير.

باکيدا چاپ اولان" گونئی آذربايجان ادبياتي آنتولوگيياسي "و تورکيه ده يايينلانان" ايران تورکلري نين ادبيات آنتولوژيسي "کيمي توپلولاردا قافلانتي نين شعرلري يئر آلير.

1987//1366-جيايل تهراندا تشکيل اولونان" گونئی آذربايجان شاعيرلري نين بير قروپو "آدلي ادبي درنگين قوروجولاريندان و فال ايشتيراکچيلاريندان اولور. بو درنک سونرالار" ساهير ادبي- مدني درنيي "آدي ايله اؤز فاليتينه داعوام ائدير.

1990(1369)-جي ايلده قافلانتي نين يئني بير شعر کيتابي تهراندا" نشر مينا "چاپ ائوي طرفيندن ياييلير. بو کيتاب" عؤمور آيناسي "آدلانيردي.

م.قافلانتي نين" عؤمور آيناسي "آدلانديرديغي کيتابي، شاعيرين، اينسان- شاعير عؤمرونون آيناسيدير. بيز بو آينايا باخارکن، شارين کئچيرتديگي ايضطيرابلاري، هيجانلاري دويوروق؛ سئوينجلريني، کدرلريني حيسس ائديريک؛ آرزو و اوميدلريني، محبت و نيفرتلريني باشا دوشوروک. بو کيتابدا اونون موختلف ايللرده موختليف مؤوزولاردا، يازديغي اثرلرين نومونه لري توپلانيب و ياراديجيليغي نين سعجيييوي خوصوصيتلريني اؤزونده جملشديره بيليب.

شاعيرين" عؤمور آيناسي "آدلانديرديغي بو شعر مجموه سي اونون شخصي حياتي و معنوياتيندا اکس اولونان ايجتماي حاديثه لرين پوئتيک دونياسي نين گوزگوسودور، دئسک، يانيلماريق. قافلانتي کئچيرتديگي ايزترابلاري، هيجانلاري، سئوينجلريني، کدريني و معنوياتيندا پوزولمايان ايريلي- خيردالي ايجتيماعي حاديثه لرين ايزلريني، شعرلرينده عکس ائتديرمه يه چاليشير.

پروفئسسور ووقار احمد" مراد لي قریشی نين ياراديجيليغي "آدلي مقاله سينده يازير:" مراد علي قریشی ايستر ايران شاهينا، ايسترسهشووينيستلره، ايسترسه ده اونلارا گوونن ريياکار ائرمنيلره قارشي اؤز ياراديجيليغيندا سرت نيدالارلا، کسکين تشبئه لرله، عئيني زاماندا رذيل ائديجي هجولرله موباريزه آپاريب. بئله کي، اونون بوتون بديعي ايرسيني گؤزدن کئچيررکن بونون شاهيدي اولوروق." چکيل قارا دومان "شعرينده غورورلا" آذر ائلي " ،" آذر اؤلکه سي "ايفاده لريني وورغولايان مراد علي قریشی" اوتان خالقيميزدان دئديم دوشمنه "شعرينده ايران شاهي نين بوتون گوناهلاريني، جينايتلريني ميرواري تک دوزدويو ميصراعلاردا بيان ائدير " (1، ص.3).

 

اوتان خالقيميزدان دئديم دوشمنه،

آرتيرما زولومو حاق سؤز دئينه.

بير گون ده قاليب گه لريک سنه،

بوينونو بورماغا ماجالين اولماز،

بير سو کي تؤکولدو، يئرينه دولماز.

 

نئچه ايل ميلتين قانين سوروبسان،

نئچه قهرمانين بوينون ووروبسان،

هر زامان خلق اوچون تله قوروبسان،

آييليب بو ميلت يوخودان دورار،

بوتون قان ايچنين بوينونو وورار.(4.ص.29)

 

يوخاريدا سايديغيميز عاميللرين بير-بيرينه قوووشماسي شاعيرين صنعت ايدئاللارينا دوز ايستقامت وئرير. اونون حاقيقي صنعت يولونا قدم قويماسينا کؤمکچي اولورلار.

قافلانتي نين" بيزيم کندين بير ايلليک تاريخي آدلي اثري آذربايجانين ميللي دئموکراتيک هؤکومتي زامانلارينا 1945-46(1324-25 ايللرين) تسادوف ائدير. قافلانتي 1945-46(1324-25-جي) ايللرده آذربايجاندا خالقيميزين باشيندان کئچن قانلي-قادالي حاديثه لرين، ديدرگين آذربايجانليلارين ايچتيماعي طالعيي نين و چميتده ياشايان يوخسول اينسانلارين عدالت اوغروندا آپارديغي موباريزه نين شاهيدي اولموشدور. او سونرا بوتون بو گؤردوکلريني چوخ صداقتله بير منظومه شکلينده ديله گتيرميشدير...

هومانيزم، اينساني موناسيبتلرين مراد لي قریشی قافلانتي نين شعرلري نين، ائلجه ده" بيزيم کندين بير ايلليک تاريخي "پوئماسي نين عصاس ايدئيا ايستيقامتيني تشکيل ائتديگيني وورغولايان ادبياتشوناس عاليم، تنقيدچي، فيلولوگييا اوزره ائلملر دوکتورو ائسميرا فواد (شوکورووا) شاعيرين صنعتکارليغيني، پوئتيکاسيني دا يوکسک قييمتلنديرير و پوئمادان اؤرنکلر گتيره رک يازير:" بديعي تصوير و ايفاده واسيطه لريندن گئنيش صورتده ايستيفاده ائدن مراد علي قریشی قافلانتي نين" بيزيم کندين بير ايلليک تاريخي "پوئماسينداکي" آذر ائللري نين ياسلي گونويدو، قانلي اورگي نين پاسلي گونويدو "- ميصراعلاريندا" ياسلي گون " ،" پاسلي گون "و" قانلي اورک "ايفاده لري ايله آرديجيل اولاراق اوچ ائپيتئت ياراديليب. قافلانتي بو ائپيتئتلرله 21 آذر هرکاتي نين قلبه چالماسيندان سونرا گونئي آذربايجاندا قورولموش ميللي حؤکومتين رضا شاه پهلوي قوشونلاري نين خاريجي هاوادارلاري نين کؤمگيله خوصوصي غدارليق و گؤرونمه ميش آمانسيزليقلا مغلوب ائتديگي قانلي اولايي خاراکتئريزه ائتميشدير " (2، ص.14).

قوربت آب-هاواسي، اوزون ايللر دوغما وطنيندن آيريليق، حزينليک، کدر و هسرت هيسسلري اونون آلوولو ميصراعلارينداکي جوشغونلوقلا ياناشي دويولماقدادير.

اينسانليق عشقيله چارپان صنعتکار اورگي شاعيري کلاسسيک شعريميزين موعاصير سسلنن عنعنه لرينه باغلايير و اولو نيظامي، نسيمي، فوضولي، واقيف، ساهير ايرثينده قاباريقلاشان اينسانليق لياقتينه کؤکلنميش صنعت يولونو يييلنمه يه دوغرو يؤنلدير:

 

شاعيره صداقت، شرف، شان وئرن،

شعر دامارينا ايستي قان وئرن.

شاعرليک يولونو دوز نيشان وئرن،

اينسانليق عشقيله چارپان اورکدير.(4.26)

 

قافلانتي نين ايجتماعي ليريکاسي نين باش مؤوضوسو محض گونده ليک حياتيميزدا باش وئرن حاديثه لر، جمعيتيميزده اولان اينساني خوصوصيييتلرين ترننومو، خالقيميزين معنوياتيناياد اولان عئيبجرليکلره قارشي اعتيراض، بير سؤزله، اينسان سعادتي، وطنين آبادليغي، دوستلوق، امين-آمانليق کيمي مثله لردير.

شاهليق اوصولي-ايداره سي نين ايراندا اللي ايلدن آرتيق حؤکم سورن منفور سيياستين، قانلي-قادالي ايللرين جمعيتده ياراتديغي نئقاتيو حاللار زيندانلاري آباد، اؤلکه ني ويران قويموشدو. ايستيبداد و ديکتاتورلوق ايستر-ايسته مز شعري، پوئزيياني عوصيان بايراغينا چئويرميشدي. او زامان قافلانتي نين دا شعرلرينده بو عوصيانکارليق، فرياد موتيولري داها گوجلو ايدي:

 

گؤرورم چوخداندير باتيبلار ياسا ،

شاهلارين ظولموندن دولوبدور کاسا.

اورکلرده اولفت اکن ده يوخدور

ديللر قاداخلانيب، قوللار باغلانيب،

هئچ بير جينقيرتي دا چکنده يوخدور.(4.ص.37)

 

" اونون هر ميصراعسيندا، هر بئيتينده آذربايجان خالقي نين نيسگيللي طالعيي آيدين تصوير اولونوب. قافلانتي شخصي حياتيندا چوخ عذاب و اذيتلر چکيب، شاهليق رئژيمي نين دؤزولمز و آغيرشرايتينده ياشاييب؛ عدالتسيزليکلري قانييلا، جانييلا حيسس ائديب، مجبورن دوغما يورد-يوواسيني بوراخيب، تحصيل عوضينه چؤرک دالينجاقاچيب.. بونلارين هاميسي ايستر- ايسته مز گنج قافلانتي نين ظولمه، عدالتسيزلييه قارشي يؤنله ديب. او شاه رئژيمينه درين نيفرت بسله ييب و اونون ييخيلماسيني اورکدن آلقيشلاييب. بو دؤور شاريرين اثرلرينده درين ايز بوراخيب " (3، ص.43).

بو فاجه لي، دؤزولمز شرايت، شاعيري اورکدن سارسيديرسا دا، اونون ائل ايله بيرليکدهموبارزه عزميني گوجلنديرير، سسيني ائللرين سسينه قاتاراق سانکي شانلي اينقلابين نهايت قلبه چالاجاغينا ايناميني عکس ائتديريردي:

سن اي قان گؤلونده اوزن تاجيدار،

بيل، گئجه داليندا آيدين سحر وار.

گله جک او گون کي سنين سارايين-

ائللرين اليله ويران اولاجاق

قيشا چئوريله جک باهارين، يايين.(4.ص.28)

 

م.قافلانتي نين شعرلري نين ايلهام منبعيي، اونلارين اؤزگي، ماياسي وطن تورپاغيدير. بو تورپاغين باري، برکتي، صداقتلي اينسانلاري، ائل-اوبالاري، ووقارلي داغلاري، چايلاري نين نغمه سي، بولاقلاري نين دورولوغو، مئشه لري نين سيخليغي، ايلاهي گؤزلليکليگي ، خالق قهرمانلاري، موسيقيسي، دونه ني، صاباحي و بوگونو شاعيرين اورگينده نغمه لره، ميصراعلارا چئوريلير، اونلارا قول-قاناد وئرير، شاعيرده نجيب حيسسلر، نيکبين احوالي- روحييه، جسورلوق، دؤنمزليک، متانت، ووقار کيمي اينسان خاصيتلريني ياشادير و بو خاصيتلرين نغمکارينا چئويرير. اونو شاعير ائدن، اودو-کؤزو،ايشيغي سؤنمه ين وطن تورپاغيدير. شاعير" سؤندورمه ديم اورگيمده وطنيمين چيراغين "قناعتينده حاقليدير. چونکي اونون دوشونجه سينه گؤره، اگر بو چيراق سؤنرسه، او، شاعيرليگيني، اينسانليغيني، هر شئييني ايتيرر:

وطنيم شمدير، من ده پروانا،

دولاننام باشينا من يانا-يانا

اورگيم باغليدير آذربايجانا

هر زامان قئيدينه قالميشام-قاللام (4.ص.33).

شاعير، وطنين بو گونو ايله برابر، دونه نيني ده دوشونور. وطن قهرمانلارينين سيماسيني، اونلارين حياتيني، موبارزه سيني گؤزلري اؤنونده جانلانديرير. رومانتيک خياللار، رؤيالار عالمينده اوشاقليق چاغلاري، آنا لايلاسييلا قوشا نغملنن ساز و بولبول جه-جهلري قوينوندا بير داها يئنيدن (رؤيادا) دوغولور:

قافلانتييام آنديم او گونلري من

جانلاندي گؤزومده چيچکلي وطن.

کئچدي اورگيمدن او گول، او چمن،

بولبوللو باغلاري ياديما دوشدو (4.ص.31).

وطنين آبادليغي، ائللرين شاد و خوشبخت ياشاييشي الوان بويالارلا، صميمي آهنگله گؤزلريميز اؤنونده جانلانير:

چاغلاسين شلاله لر،

چتير آچسين لاله لر،

قورتارسين قم،ناله لر،

سئوينسين ائل، سئوينسين (4.ص.12).

بو آرزو و ايستکلر تکجه وطنله محدودلاشمير. او، يئر اوزونده صولح و امين-آمانليق، اينسانلارين ميلليتيندن آسيلي اولماياراق قارداشجاسينا ياشاماسيني تؤوصويه ائدير و اينسان الي، اينسان ذکاسي ايله بزنميش دونياني بئله گؤرور:

دونيا گؤزللشسين اينسان عليله

بوتون گؤزلليکدن کام آلسين اينسان

ياشاسين،ياشاسين اؤز عمليله

آزادليق قوينوندا قوجالسيناينسان (4. ص.23).

م.قافلانتي نين اثرلري مضمون، فورما اعتيباريله توکنمز سؤز ثروتيميزدن قيدالانير. بونو دا جسارتله دئمک اولار کي، اينقيلابدان سونراکي اينکيشاف ائتمکده اولان ادبياتيميز، خوصوصيله شعريميزين آخيني شاعيرين ياراديجيليغيندان يان اؤتمه ييب. بو ادبي موحيط شاعيرين شعرلرينه مضمون و فورما، اوسلوبي جهتدن ده گوجلو تاثير گؤسترميشدير.

تنقيدچي و شاعير هسن ايلديريم" عؤمور آيناسي "کيتابينا يازديغي موقدديمه ده قلم دوستونون شعرلرينده تصوير اولونان اوبرازلارين خاراکتئريک خوصوصيتلريني بئله دينلنديرير: " م. قافلانتي نين شعرلرينده آذربايجان شعرينه خاص اولان، دوغمالاشان بير سيرا اوبرازلارلا راستلاشيريق. بو اوبرازلارين بير چوخو شيفاهي ادبياتيميز واسيطه سيله يازيلي ادبياتيميزا کؤچوب و اورادا باشقا اوبرازلارلا برابر حوقوقلو ياشاماقدادير. آنجاق قافلانتي بو اوبرازلارين خاراکتئريک خوصوصيتلريني ساخلاياراق اونلاري موعاصيرلشديرير، اؤز معنوي دونياسي و دؤورو ايلهاويغونلاشديرير و اونلاري يئني آمپولادا تقديم ائدير:

مارال بير آن منه باخدي.

قلبيمي يانديريب، ياخدي،

بخت اولدوزو گؤيدن آخدي.

بير آخشامين سون چاغيندا،

قافلانتي نين قوجاغيندا.(4.ص.16)

بو" مارال "ماهنيلاردا دينلدييگيميز، چؤللرده گؤردويوموز مارالدان بير آز فرقله نير. بو مارال اينسانيلشميش مارالدير. قافلانتي نين بو قبيلدن اولان اوبرازلاري نين هاميسي بئله بير خاراکتئر داشييير . اونلار شاعيرين دؤورو، موحيطي ايله اويغون اولان گؤزلليکلرين، تميزليکلرين فاجيعه لي و تراژيک صورتلريديرلر. " (4.ص.6)

آذربايجان خالقي نين شاعير اوغلو مراد لي قریشی قافلانتي 2005//1384-جو ايل فئورالين 15-ده ابديته قوووشموشدور. جنازه سي دوستلاري، عاييله سي و آذربايجان مدنيت سئورلري نين موشاييعتي ايله تهرانين جنوب حيصه سينده يئرلشن" يافت آباد "مزارليغيندا دفن اولونموشدور.

اودلو-آلوولو اثرلريي ايله آذربايجان پوئزيياسيندا اؤزونمخصوص ايز آچان م.قافلانتي آذربايجان ادبياتي ياشاديقجا وار اولاجاق، دايم ياشاياجاقدير.

خولاصه

م.قافلانتي نين" عؤمور آيناسي "آدلانديرديغي کيتابي، شاعيرين، اينسان- شاعير عؤمرونون آيناسيدير. بيز بو آينايا باخارکن، شارين کئچيرتديگي ايضطيرابلاري، هيجانلاري دويوروق؛ سئوينجلريني، کدرلريني حيسس ائديريک؛ آرزو و اوميدلريني، محبت و نيفرتلريني باشا دوشوروک. بو کيتابدا اونون موختلف ايللرده موختليف مؤوضولاردا، يازديغي اثرلرين نومونه لري توپلانيب و ياراديجيليغي نين سعجيييوي خوصوصيتلريني اؤزونده جملشديره بيليب.

شاعيرين" عؤمور آيناسي "آدلانديرديغي بو شعر مجموه سي، اونون شخصي حياتي و معنوياتيندا عکس اولونان ايجتماي حاديثه لرين پوئتيک دونياسي نين گوزگوسودور دئسک، يانيلماريق. قافلانتي کئچيرتديگي ايضظرابلاري، هيجانلاري، سئوينجلريني، کدريني و معنوياتيندا پوزولمايان ايريلي- خيردالي ايجتيماعي حاديثه لرين ايزلريني، شعرلرينده عکس ائتديرمه يه چاليشير.

ادبيات:

1.ووقار احمد. مراد لي قریشی نين ياراديجيليغي." خالق جبهه سي "، 2015. 6 فئورال. س.3

2. ائسميرا فواد. گونئي آذربايجان شاعيرلري نين ياراديجيليغي ايله باغلي دوشونجه لر " ." خالق جبهه سي " . 2016. 16 ماي، س.14.

3. خئيروللا خ. (ساپلاق)" قوجامان ائل شاعيري " ." خودافرين "درگيسي. 2005-1384،ساي 4. س.43

4. مراد لي قریشی قافلانتي. عؤمور آيناسي. تهران،" نشر مينا " ، 1369-1990.