قيرخ ايلده يارانميش گونئي ادبيياتينين پانورامي(گورونتو) دکتر اسمیرا فواد

سون قيرخ  ايلده يارانميش  گونئي ادبيياتينين پانورامي(گورونتو)


دکتر اسمیرا فواد


"گونوموزون گونئي ادبياتي - پوئزييا " آدلي بو آنتولوگييايا 20-جی عصرين 80-جي اوللريندن اعتيبارن ادبياتا گلميش، گ.آذربايجاندا 1960-جي ايلده و اوندان سونرا دوغولوب بويا-باشا چاتميش، صنعتده اؤز سؤزونو دئميش شاعيرلرين آنا ديلينده فرقلي ژانر و اوسلوبلاردا قلمه آلديقلاري شئير و پوئمالاريني داخيل ائتميشيک. بو اثرلر گونوموزون گونئي ادبياتيندا باش وئرن يئنيليکلرين، ادبي پروسئسلرين اينجه ليکلريني داها ياخيندان ايزله مک، حياتا، اينسانليغا، يازارلارين ايجتيماعي-سياسي و ميللي مثله لره باخيشلاريني اؤيرنمک باخيميندان اولدوقجا گرکلي و ديقتلاييقدير.       

آذربايجان ادبياتي اوزره موتخصيصلر، اونيوئرسيتئتلرين فيلولوگييا فاکولته لري نين طلبه لري و گئنيش اوخوجو کوتله سي اوچون نظرده توتدوغوموز بو کيتاب علمي تدقيقاتلار، سانباللي آراشديرمالار و اوتايين ادبياتي اوزرينده اينجلمه لر آپارماق آماجيندا اولان قلمداشلار اوچون ده بير قايناق، يئني منبع اولاجاقدير...  گونوموزون گونئي شاعيرلري نين آراسيندا هئچ بير فرق قويمادان، حسساس روحلارينا توخونمادان، ياراتديقلاري پوئزييا اؤرنکلريني اينجله مه دن، سادجه، اونلارين دوغوم تاريخلرينه عصاسن، يني، خرونولوژي آرديجيلليقلا سيرالاميشيق...  ديرلي اوخوجونون نظرينه بير اؤنملي مثله ني چاتديرماق ايسته ييرم. آنتولوگيياداسيز پوئزييا اؤرنکلري نين نه قدر بؤيوک محبتله، يوکسک پوئتيک اوستاليق و يئني نفسله قلمه آلينديغيني گؤره جک، حاديثه لره، تاريخي اولايلارا، دوننه و بو گونه، اينسانين دويغو و دوشونجه لر عالمينه، سئوگي دونياسينا، ايجتيماعي-سياسي و ميللي مسله لره اوريژينال، بير-بيريني تکرارلامايان پوئتيک باخيشين، شئير صنعتينه اؤزل ياناشمانين شاهيدي اولاجاقسينيز... و بو اؤزل باخيشين، فرقلي ياناشمانين اورتا و عالي تحصيليني آنا ديلينده دئييل، ايران ايسلام رئسپوبليکاسي نين دؤولت ديلي اولان فارس ديلينده آلان يازارلار طرفيندن سرگيلنديگيني بيلديکده، طبعيي کي، تعجوبلنه جکسينيز. چونکي اونلارين – يعني، ايراندا اهالي نين بؤيوک اکثريتيني تشکيل ائدن


آذربايجان تورکلري نين ياشاديقلاري ازه لي-ابدي، آتا-بابا يوردلاريندا آنا ديلينده-دوغما تورکجه ده نه مکتبلري، نه درس کيتابلاري، نه ايلک، اورتا و عالي تحصيل ايمکانلاري، نه ده ايش يئرلري اولوب. ياد ديلده دانيشان، بو ديلده اوخويوب بوتون ايش حياتيني قوران قلم آداملاري نين بو مؤحتشمليکده ادبيات ياراتمالاري، بيرجه کلمه ايله دئسم، اصل مؤعجيزه دير!!!   بو مؤعجيزه ني يارادانلارين قناعتينجه، شاعيرين اسل شاعيرليگي اونون کلاسسيک شئير قليبلرينده، يني اروز وضعنينده شئير يازماسي، بو وضعنده اؤزونو تصديقله مه سي ايله موعينلشير. گئرچک شاعير موطلق شکيلده قلميني قزل، قصيده، مثنوي، قيطعه ژانرلاريندا سينامالي، عئيني زاماندا دوشونجه لريني يوکسک پوئتيک سويييه ده ايفاده ائدن مودئرن شعيرلر ده يازمالي، دويغولاريني ان گؤزل فورمالاردا يانسيتماليدير.     آنتولوگييادا يئر آلميش 114 مؤليفين اثرلري ايله تانيشليق گؤستره جک کي، تکرارچيليقدان اوزاق، اؤز فردي ياراديجيليق يوللاريني جيزان و بؤيوک عزمله بو يولون يولچوسو اولان چاغداش دؤوروموزون گونئي شاعيرلري بو وظيفه لرين عؤهده سيندن باجاريقلا گليرلر. بو باجاريغي عيانيلشديرمک اوچون اونلارين


قلمه آلديقلاري قزللره، خالق شئيري اوسلوبوندا يازديقلاري پوئتيک اؤرنکلره، عئيني زاماندا مودئرن، يئني شعيرلرينه اوستونلوک وئرميشيک. چونکي اونلارين هر بيري نين ياراديجيليغيندا بو اوچ خط اؤزونو آيدينجا گؤسترمکده دير. آنتولوگييادا داها چوخ قزللرينه يئر وئرديگيميز عيرفان علمي نين سيرلرينه واقيف اولان درين موطاليه لي صالح سجادي نين فيکرينجه، قزل يازماق چوخ چتين، هم ده مسئوليتلي، زيروه لري گؤيلرله اللشن عظمتلي ساوالان داغينا، اونون ان


اوجقار نؤقطه سينه چيخماق کيمي موشکول بير ايشدير. البتته، بو يولدا باشاريلار قازانماق هر شاعيره نصيب اولان موتلولوق دئييل: 

  قزل ندير؟ ساوالان زيروه لي عينادجيل داغ،  

  اينانما کي، بو داغي هر قوزو يولوق چيخدي. 

  بو شعيره زيروه ده سون وئرمک ايسته مزديم، آما، 

  سؤزون دوداقلارينا قورخودان اوچوق چيخدي. 

قزل، قصيده، مثنوي، قيته، مودئرن شئيرلر يازمالاري بير يانا، اونلارين کلاسسيک ادبياتدا و آشيق ياراديجيليغيندا اؤنملي يئر توتان دئييشمه لرينه توخونماماق حاقسيزليق اولاردي. اونا گؤره ده نشريميزده چاغداش دؤورون دئييشمه لريندن يالنيز داهي فوضولي، نباتي، واحيد، موعاصيرلريندن اي.جميلي، گ.گ.ئرئنول و ح.اوشارلا دئييشن سوسن نواده ی رضینين قلم تجروبه لرينه يئر وئرديک. ياش کاتئقوريياسينا اويغون اولانلاري آنتولوگييادا اوخوياجاقسينيز، آما بو مقامدا سوسن خانيمين ايستعدادلي شاعير ايسماييل جميلي ايله دئييشمه لريندن بير نئچه يارپاق سونماغي گرکلي سايديق: 

  سوسن رضي:  

  جان گؤزويله باخمايان، يار حوسنونو گؤرمز عيان، 

  جاني بيتاب اولمايان، جاناني بيتاب ايسته مز... 

  گول کيمي فاني اولار حوسني- جمالين گوللري، 

  مست اولان حوسني کمالا، شربتي-ناب ايسته مز... 

  قاش گئدر، کيپريک گئدر، ديش تؤکولر، ساچ آغارار، 

  چشمئ ظاهير بين جمالي نقشي بر آب ايسته مز... 

  بلکه اينسان چوخ سئور اوزده گؤزلليکلر، ولي 

Description: اورمووو  طينتي خوش يوغرولوبدور، خويي- ناباب ايسته مز... 

   

  اسماعيل جميلي: 

  جاندا جانان سئوگيسي موغني ائيلر عاشيقي، 

  خاکي پايين گوهري زاييد زرئ ناب ايسته مز… 

  راضي اولدوقدا کؤنول تاپسين فنا اييله بقا، 

  حضرتي حاقدان ساواي مولکونده ارباب ايسته مز.. 

  باغي سئودادا آچان سوسنلرين خوش جيلوه سي 

  سئوگيدندير اؤزگه بير تزيين ناباب ايسته مز… 

    

  سوسن رضي: 

  حوسني-يوسيفدن آليبدير باغدا سوسن جيلوه سين، 

  جيلويي ناب ايسته ين هر گولدن گولاب ايسته مز. 

  حاق يولوندا سير ائدنلر اکمل او اجمل گرک، 

  مکتبئ عشق او جونون ناپوخته توللاب ايسته مز.. 

  سن جميليدن سوروش، ائي گول بقانين سيرريني، 

  فاني و باقي فنادير، آچما بو باب، ايسته مز! 

قئيد ائتمگي گرکلي ساييريق کي، شاهليق، مونارخييا قورولوشونون حؤکم سوردويو، آزاد دوشونجه نين بوغولدوغو، اؤزگورلوک دوشونجه سي نين داشيييجيلاري اولان آيدينلارين جيدي تضييق، باسقي آلتيندا ساخلانديغي بير دؤنمده ياشايان و دؤورون حاقسيزليقلاري نين شاهيدي اولان گونئي يازارلاري اويانيش چاغيني آدلاياراق بو گون اعتيراض و عوصيان روحو سون حدده چاتان ديره نيش مرحله سيني کئچمکده ديرلر. طبعيي، اولويورددا سون چاغدا دالغالانان ميللي حرکات هر مرحله ده اولدوغو کيمي، 1979-80-جي ايللردن سونرا يارانان و يارانماقدا اولان ادبياتي دا گوجلو ائتکيسي آلتينا آلميش، ميللي-معنوي ديرلره، گلنکلره سؤيکنن بؤيوک يازارلار اوردوسو يئتيشديرميشدير. 1980-جي ايللردن باشلاياراق ميللي کيملييه، تاريخين آچيلماميش قاتلارينا، ايشيقلي و قارانليق صحيفه لرينه، ميللي مدنيته و ادبياتا قاييديش حرکاتي نين گوجلنمه سي سونوجوندا اويانان گنج يازارلار جيدي آدديملار آتير و گونئي آذربايجان ادبياتي نين پوئزييا، نسر، ادبي تنقيد و علمي آراشديرما، تدقيقات ساحه لرينده بؤيوک اوغورلار قازانيرلار. اونلارين اکثريتي نين اوخوجولارينا سوندوغو ليريک-پوئتيک متنلرين آغير، دوشوندوروجو فيکير يوکو، فلسفي ايچريگي، فورما الوانليغي گئرچکدن هئيرانليق دوغورور. آنا ديلينده تحصيل آلمايان، ادبي ديلي هله ده فورمالاشا بيلمه ين، کيتابي نين چاپي اوچون آيلارلا، ايللرله ايجازه آلا بيلمه ين، دونيايا گتيرديگي اؤولادينا بئله تورکجه آدلار قويماق ياساقلانان (چوخ شوکور کي، بو مسله سون ايللر بير قدر يومشاليب) ياراديجي گنجليگين تورکجه ده بو سوييه ده اثرلر ياراتماسي و دوغما ديله بونجا بؤيوک سئوگي سرگيله مه سي اونلارين اؤزونو ده گونون قهرمانينا چئويرمکده دير. 

 روقيه صفري نين کيچيک بير سربست شعير متنينده -  " اي اسن يئل "  شيرينده تورکون تاريخينه چوخ آيدين ايشاره، ائيهام وار. اوزاق سيبيردن اؤتوکنه ده ک اوزانان اوجسوز-بوجاقسيز اراضييه صاحيب اولموش دؤيوشکن تورک فاتئحلري نين دونيادا ياراتديغي يئني جوغرافي مکانا - تورانا اسن يئللرله سالام گؤندريب اوز توتان گنج شاعيرين شانلي کئچميشله ايلگيلي اؤزلميني دويور، ميللي کيمليکسيز ياشاماغين قهري نين چکيلمزليگيني آنلاييريق. حتّی سوندا بوگونکو چالپاشيق، آنيلمايان، خاوتيک چاغدا بو ديرلره صاحيب اولماياجاقسا،  " قوي تورپاغيم اولسون مزاريم، کيمليگيمسه باش داشيم! "  بياني گوجلو تاثير قوووه سينه ماليک بير مئساژدير:  

  اي اسن يئل!  

  کولومو سوووراجاقسانسا،  

  باري اؤلکه مه دوغرو اس،  

  بير گلديگيمه واراييم.  

  قوي ساغ اليم اؤتوکنه پاي اولسون،  

  سول اليمسه سيبيريمي توتسون!  

  آراز لايلامي سيزلاسين بئشيگينده  

  اؤزلملي باخيشلاريما.  

  قوي تورپاغيم اولسون مزاريم،  

  کيمليگيمسه باش داشيم،  

  بو آنيلمايان چاغدا،  

  اي اسن يئل!.. 

  گؤرون مليحه عزيزپور " ايچينيزده هر آن آد دييشديرن ميکروبلار "  شعيرينده تورکو، منسوب اولدوغو قؤومو نئجه عظمتله، غورور و ايفتيخار، عئيني زاماندا داخيلي بير خينجلا سونور اوخوجولارينا: 

  بو بيزيک، 

  تاريخ ياشلي تورک! 

  اسيرلرين چرچيوه سينه سيغمايان ار 

  دوستاقلارا يئرلشمه ين نر! 

  سؤيلگين، نئجه قويروق بولاييرسينيز 

  سوفراميزين باشيندا 

  ائهئئي...! قاپيميزين ايتلري؟! 

  البته کي، زامان ترسه گئييب باشماغيني. 

  يوخسا، دوياردينيز 

  قوردوموزون سسي نئجه اوزانير 

  آلتايلاردان بالکانلارا... 

  گؤرردينيز، قارتاللاريميز نئجه آسلان اوولايير! 

  گؤللريميز نئجه نهنگ ياشادير باغريندا... 

  گؤرردينيز، آتلاريميز هله ده دنيزدن چيخير. 

  بيزيم، اولو تورکوستان چؤلونده – آت بئلينده 

  قيزيل صحيفه لريميزي آرتيرماق اوچون قوجا تاريخ کيتابينا... 

  باشا دوشوروک، بيج فلسفه نيز، اؤلومدن سود امير... 

  بو بيزيک! 

  تورک اوغلو تورک! 

  اوغوز خاقان، آلپ ار تونقا، تومريس، 

  آتيللا، بابک، آتاتورک!.. 

آنتولوگييادا يئر آلان آيري-آيري اؤرنکلردن ده گؤروندويو کيمي، اونلار اثرلرينده موکاليمه، تشبيه، لفف و نشر ( " بوکمه و يايما "  کلاسسيک شعرده سونراکي ميصراعلاردا تعيين، تامامليق و خبرله تاماملانان سؤزلرين ايلک ميصراعلاردا ايشله ديلمه سي)، موباليغه (بديي يالانين ماراقلي واسيطه سي)، تشبئه (بديعي متنده اوخشاتماق، بنزتمک ميسسيياسيني يئرينه يئتيرن موکممل و موفصل تشبئهلر) و مئتافورا (بير اشيا، وارليق و حاديثه يه مخصوص علامتين باشقا بير اشيا، وارليق و يا حاديثه  اوزرينه کؤچورولمه سي يولو ايله يارانان و هر ايکيسي موقاييسه، بنزتمه عصاسيندا يارانديغي اوچون بزن فرقلنديريلمه سي چتينليک تؤره دن، تشبئهدن فرقلي اولاراق قارشيلاشديريلان طرفلردن بيري نين ايشتيراک ائتمه ديگي بديعي تصوير واسيطه سي) حوسني-تحليل (گؤزل اساسلانديرما، سبب و بهانه گتيرمگين گؤزلليگي)، تلميه پوئتيک فيقورلاريندان مهارتله ايستيفاده ائتديگيني نومونه لرله ثوبوت ائدير، آنا ديلي نين اينجه ليکلريني، سؤزلرين معنا چالارلاريني گؤزل بيلديکلريني گؤستريرلر. ياراتديقلاري وزن و قافيه سيستئمي شعيرلري نين موسيقي قاتيني، آهنگيني دوزنله يير، هؤردويو نفيس ليباس ايسه سؤزلرين داخيلينده کي  معنالارلا وحدت تشکيل ائدير. 

" حيات فلسفه سي، ميللي کيمليک، ميفيک دونياگؤروشلري آلتيندا گيزلنن تاريخي، ديلده کي  کودلو سؤزلرده ياراديليشين سيرلريني (شميل صاديق) "  عاريف شاعير و يازارلار محض بو کيمي پوئتيک فيقورلار واسيطه سي ايله اوخوجولارا چاتديريرلار. ماراقلي جهت بوراسيندادير کي، گونئي آذربايجان شاعيرلري نين ائله اؤزلري نين ده عؤمورنامه لري، ياشانتيلاري و خاطيره لري اثرلري نين، شعيرلري نين سطيرلري آراسيندان اوخونور. گئنلليکله، هئچ گؤزله نيلمه دن شعوورالتي ساخلانجلار عومومي معنايا قوشولور. طبيعي، آخي شاعير، ياخود يازار اکثر حاللاردا اؤزونو، ايچ دونياسيني، ياشانتيلاريني، آجيلاريني، اورک آغريلاريني و حيات نشه سيني، سئوينجيني هايقيرماق مؤحتاجليغيندان قلمه ساريلير.        

بو مؤحتاجليق چاغداش دؤورون ديره نيش ادبياتي نين اؤنده گئدن نوماينده لريندن بيري، ميللي فعال، ايللرله ائوين دوستاقخاناسيندا ياتان ايبراهيم ساوالانين شعيرلريندن ده دويولور. موجاديله دن، چارپيشمالاردان، باسقيلاردان جانا دويموش ليريک قهرمانين ديليندن دانيشان شاعيرين قيزيني آزاد ياشاما، دوغايا و اينسانجا گون کئچيرمه يه چاغيريش سسلري هر بير اوخوجونون اورک تئللريني تيترده جک. سئومک، خوشگؤرولو اولماق، آنلاماق و سونوندا موتلو اولماق وارکن، ندن اينسانلار سيلاحا ساريليب اطرافي اؤلوم، گؤز ياشلاري ايله قاپسامالي، اؤز قارينداشلارينا سونسوز کدر و حوزن ياشاتمالاريديرلار:    

  قيزيم، من سنه 

  نه ماهني اؤيرده جگم، 

  نه ياد ديلده سورود، 

  نه ده قوران… 

  گئت، هر نه يه اينانيرسان، اينان… 

  منيم سنه پاييم، 

  کيچيجيک باغچا و نئچه گولدان، 

  توخوم اک، سو سپ. 

  هر گون گونش دورمادان اويان! 

  سرچه سسينه، سارماشيق هوه سينه، 

  من سنه نه سالام اؤيرده جگم، 

  نه ساغوللاشما… 

  يالنيز چيچک بئجرمک اؤيرده جگم، 

  چيچک بئجرمک… 

فرانسيز، اينگيليس گؤزللري نين هاميسيني بير يانا قويان، اونلارلا اونسيت، سئويشمک مني يالنيز شعيره، موسيقييه يئتيرير، آنجاق  " سن، اي تورک قيزي، مني ائويمه قايتاريرسان! سني دوشوننده ياغيش دا تورک ديلينده ياغير! "  اعتيرافيندا بولونان رسول يونانين جيزديغي  " يالقيز آدامين رسمي "  دوشوندوروجو، گئرچکلييه سؤيکه لي و تاثيرليدير. شاعيرين رسمده تصوير ائتديگي يالقيز آدام ائليندن آيري سالينميش، پارچالانميش بير ميلتين يالقيزليغيندا ياشاديغي کدرين اوبرازيدير اصلینده: 

  يالقيز آدامين رسمي 

  اوزون بير کوچه دير 

  و اونون ديبينده اولان  

  باغلي قاپي. 

  يالقيز آدامين رسمي 

  رسمده گؤرونمه يهن 

  پاسلي پيانودور. 

  يالقيز آدامين رسمي 

  اسن يئلدير، سولغون آي. 

  يالقيز آدامين رسمي،  

  بوتون کدرلرين رسميدير... 

گونئي آذربايجاندا چاغداش دؤور پوئزيياسي نين ان اونلو قادين ياراديجيلاري ايچريسينده نيگار خياوي، فرانک فريد ايپک، روقيه کبيري، فريبا ايبراهيمي  آفاق، سوسن نواده ی رضي، معصومه ائلقيزي، ليلي کهالي، شريفه جعفري، مليحه عزيزپور، زيبا کرباسي، سحر خياوي، ويدا حشمتي، حکيمه باباکيشيزاده نغمه، ميهن کريمي، ساراي محمدرضايي، روقيه عبديلي سازاق، معصوم جاببارپور، شلاله جاوانشير، نسيم جعفري، مارال تبريزلي، رعنا زارع، ليلا ندايي، شبنم فرضيزاده اردبيلي، روباب امانپور، ليدا احمدي، تورکان اورمولو، اولکر اوجقار چيچک آغبولوت، اکرم دوروستي، نئگين ازه لي نين و ب. ايمضالاري داها چوخ ديقت چکير. اونلارين شعيرلرينده کي  ان اؤنملي جهت شابلوندان، سوني پافوسدان اوزاق مؤوقعيين سرگيلنمه سي، ياشاما، سياسي سيخينتيلارا، وطنده وطنسيزليک، ميلي کيمليکسيز ياشاماغا محکوملوغا قارشي اعتيراض نوتلاري نين کسکينليگيدير. بونونلا دا گونئي آذربايجانين چاغداش دؤور يازار خانيملاري ميللي  حرکاتينا دستک وئريرلر.  " آنجاق بو دستک يالنيز وطني تعريفله مک و اونون باشينا دولانماق دئييل، بلکه تنقيد و تحليل باخيميندان اينکيشاف ائتمکده دير. بو اعتيراض ائو موحيطينده اولان عاييله سيخينتيلاريندان باشلايير و راسيزمين باشيميزا گتيرديگي فاجيعه يه اعتيراضلا دا داوام ائدير "  (س. آروز).  

نئگين ازه لي بو دورومون ندنلريني يانليشلاريميزدا، تاريخچيلرين فاکتلاري تحريف ائتمه سينده، بوتون بشريتين واحيد بير اورقانيزم اولدوغونو و بونا گؤره ده بير اعضانين آغريسيني ديگر اعضالارين دا حيسس ائتديگيني و چکديگيني اونوتماسيندا، بير بوشقابدا-دونيادا ياشامالارينا رغمن، اينسانليغا، هم ده اؤزلرينه فاجيعه لر تؤرتمکده اولدوقلاريني آنلاماماقدا گؤرور. خانيم شاعير سوچلاماسيندا گئرچکدن ده چوخ حاقليدير: 

  تاريخچيلر نه واخت خيانت ائتمه ييبلر کي... 

  بو خيانتلردن بيريسي ده سنين گولوشلرينه 

  گؤز  يوممالاري اولوب. 

  مثلن، سن دوغويا باخيب گولدويونده، 

  هيند اؤلکه سينده بير کپنک 

  هيجاندان قاناد چيرپير. 

  سانکي بير توراتانين توزاغينا دوشموش، 

  اؤزونو قورتارماق ايسته يير، 

  سئوگيليم! 

  همن آن باتي اؤلکه سي نين سولاريندا 

  فيرتينا قوپوب، بير سونامي يارانير کي،  

  قلمي شاعيرلرين الينده تيترمکدن 

  دايانديرماق اولمور… 

  قلمسه شاعير بيلمه دن زوووب يازير: 

  سن، گولوشون و.... سونامي!! 

  اودور کي، ميلت شاعيرلردن قورخوب تاريخچيلري سئوير. 

  گولوشلرين – فيرتينا، 

  گولوشلرين – دئوريم، ييخان، 

  اي سئوگيلي!.. 

  گولوشلرين،  

  تاريخ… 

بو تاريخ آجيلاري کييان خياو، ايسماييل مددي اولکر (وصالي) هادي قاراچاي، حسين شرقي دره جک (سويتورک)، بهبود مورادي (ائلچيبي) آراز احمداوغلو، رسول قديري، عدالت دومان، محمد رضا لوايي، آذريار دانيشور، نورالدين موقددم (آيدين دومان)، علي جاوادپور، ميرجامال حسيني (اينجيک)، معسود هاراي، سعيد موغانلي، حيدر بايات رامين جاهانگيرزاده، ائلشن بؤيوکوند، بولود مورادي، علي رشتبر (قاييب)، موصطافا شيخپور، اوختاي وطنخواه، لوطفعلي برقي، ناصير شاهبازي، آيدين آراز، آيدين يئنيلمز، رضا ويدي آرتانين و باشقالاري نين اثرلرينده داها آيدين دويولور... 

گونئي يازارلاري نين آياق ايزلري اونلاري پارچالانميش وطنيميزين قوزئيينه و هر بير گوشه سينه، ياد اللرده اسير اولان قاراباغا، 1987-89-جو ايللرده قوزئيده کوکره ين ديرچه ليش حرکاتينا، گونئي له قوزئي آذربايجان آراسيندا تيکانلي مفتيللردن اولوشان سرحدلرين آچيلماسينا، 20 يانوار//قارا يانوار حاديثه لرينه، خوجالي سويقيرغينينا دا آپاريب چيخارير. اونلارين اورکلري قوزئي آذربايجانلا بير دؤيونور، جيسمن و مکانجا آيريليغا محکوم ائديلميش خالقين ديگر ياريسي نين سئوينجينه شريک اولور، کدرينه اوزولورلر... بو مقامدا علي رشتبر قاييبين  " اسير "  شعيرينده کي  سسله نيشلري تعجوب دوغورمور، عکسينه تام صميمي تاثير باغيشلايير: 

  من نئجه يازماييم قاراداغيمدان؟ 

  باغريمدا سيزلايان يارا داغيمدان، 

  العسگر اوجاغي قاراباغيمدان،  

  ائرمني بايراغي اوستونده اسير،  

  هله ده يادلارين الينده اسير.  

دفعه لرله قئيد ائتديگيميز کيمي، بؤيوک شهرييارين، سهند، ساهير، ص.بهرنگي، سؤنمز، ساوالان، ح.نيطقي، ع.ن.اوختاي و ديگر کلاسسيک سؤز اوستادلاريميزين، ائلجه ده ن.منظوري، ع.داشقين، ح.الوو، ج.بوزورگ امين، ن.زهري، ع.سلامي، ه.قاراچاي، ه.شاهبازي، سحر خانيم، م.عزيزپور و ديگر چاغداش شاعير و آراشديرماچيلارين سعيلرينه، بو يؤنده کي  خيدمتلرينه باخماياراق، گونئيده بو گون هله ده واحيد ادبي ديل تام شکيلده فورمالاشا بيلمه ييب. سؤز اوستالاري نين اکثريتي دانيشيق ديلي ايله ادبي ديلين فرقلنديريلمه سيني گرکسيز سايير و اثرلريني دانيشديقلاري طرزده، ياخود شيوه و ديالئکته اويغون يازماقدا داوام ائديرلر.  

معلومدور کي، بوندان اؤنجه کي  زامانلاردا قوزئي ده  گونئي ادبياتي اؤرنکلريندن اولوشان موختليف آنتولوگييالار نشر اولونوب. اونلارين سيراسيندا ان قاپسامليسي و فاکتلارلا زنگيني گونئيين شاعير، تذکيره چي و ائلئشتيرمه ادبيات تنقيدچيسي يحيا شيدانين عرصه يه گتيرديگي اوچ جيلدليک مشهور  " ادبيات اوجاغي "  توپلولاريدير. اوندان هئچ ده گئري قالمايان آکادئميک ميرزه ايبراهيمووون رهبرليگي و ياخيندان ايشتيراکي ايله نشر اولونموش دؤرد جيلددن عيبارت  " جنوبي آذربايجان ادبياتي آنتولوگيياسي " ، علي کافکاسييالي نين  " ايران تورک ادبياتي آنتولوژيسي (6 جيلدده) " ، ائلميرا آخوندووا و خورامان قولييئوانين داها چوخ روسديللي اوخوجولارين معلوماتلانديريلماسي  مقصدي ايله روس ديلينده نشره حاضيرلاديقلاري  " جنوبي آذربايجان پوئزيياسي آنتولوگيياسي "  و  " جنوبي آذربايجان نثري آنتولوگيياسي " ، پروانه مممدلي نين ترتيب ائتديگي " گونئي آذربايجان ادبياتي آنتولوگيياسي – چاغداش دؤور " ، ووقار احمد و ديلبر رضايئوانين بيرگه مؤليفليگي ايله ايشيق اوزو گؤرموش  "جنوبي آذربايجان شعيري آنتولوگيياسي (19-20عصرلر) " ، واقيف سولطانلي و ايرج ايسماعيلين تقديمينده  " گونئي آذربايجان نثري "  آنتولوگيياسي ديقت چکن نشرلردير.  آنجاق بو نشري ديگرلريندن فرقلنديرن اساس خوصوصيت اونون سون 40 ايله ياخين زامان کسيگينده گونئي آذربايجاندا فورمالاشان ادبياتي قاپساماسيندا، احاته ائتديگي پوئزييا اؤرنکلري نين بؤيوک بير حيصه سي نين ايلک دفعه  چاپ اولونماسيندا، ائلجه ده مؤليفلر و اونلارين ياراديجيليقلاري حاقيندا موعين فيکير يوروتمه يه ايمکان وئرن کيفايت قدر اثرين، عئيني زاماندا کيمليگي نين تانيديلماسيندا اؤنملي رول اوينايان فوتوشکيللري نين ده سونولماسيندادير. 

آنتولوگييانين عرصه يه گلمه سينده سون کيتابلاريمين جيدي و مسئوليتلي رئداکتورو فيکرت سولئيمان اوغلونون، بوتون بو مودت بويونجا ساغ اليم اولموش بؤيوک يازار رسول قديري نين، اونلو يازار، ناصير و تورکولوق علي داشقين، تانينميش شاعيرلريميز ائلشن بؤيوکوندين، معسود هارايين، ايسماعيل اولکرين و مليحه خانيم عزيزپورون زحمتيني، ايستي-ايستي يازيلميش شعيرلرين اليمه چاتماسيندا گؤسترديکلري چابالاري هئچ اونوتماياجاغام... 

 تورکيه نين اونلو فيلوسوف يازاري جميل مئريچ  " قرب کولتورون وطنيدير، شرق عيرفانين. نه قربي تانيييريق، نه شرقي، ان آز تانيديغيميز ايسه اؤزوموز... "  دئييردي. گونئي آذربايجاندا سون چاغين ديناميک اينکيشاف ائدن ادبياتينا، اؤزلليکله پوئزييايا نظر سالديقدا بورادا ياشايان خالقين اؤزونمخصوص کولتورو، سؤز صنعتي، کيتاب مدنيتي، سؤزياراتما قودرتي نين نه قدر يوکسک اولدوغو يانسييير. مؤحتشم مدنيت يارادان بير خالق، سوسمايان ديلي، اؤزونو، کيمليگيني، تاريخيني اؤيرنمک ايسته ين شاعيرلري اولان خالق ايسه دونيا تاريخيندن هئچ واخت سيلينمير، ابديياشارليق قازانير... 

 ابدي ياشارليق قازانميش خالقين يازارلاري نين ياراتديغي بنزرسيز پوئتيک دونيانين قاپيلاريني اوزونوزه آچيريق، عزيز اوخوجولاريميز!.. اؤزوموزو، گونئييميزي داها ياخيندان تانيماق، هم ده داها چوخ سئومک اوچون!.. آخي، اؤزونو، اؤز تاريخيني، ادبي-مدني ايرثيني، ميللي ديرلريني سئومه ين اينسان، توپلوم، خالق باشقاسيني دا سئوه بيلمز! گلين سئومه يه اؤزوموزدن باشلاياق!.. بو سئوگيني بوتون دونيايا اؤتورک.