عمادالدین نسيمينين ديني فلسفي گؤروشلري

عمادالدین  نسيمينين ديني فلسفي گؤروشلري


İ.NƏSİMİNİN DİNİ –FƏLSƏFİ GÖRÜŞLƏRİ


 

PROF.DR.VUQAR ƏHMƏD

پروفسور . دوکتور  وقار احمد

 

 

 

 

 آچار سؤزلر:

 قرآني-کريم، اهل بيت،حروفیلیک،غزل،تشبيه،عروض. 

  سید عمادالدین نسيمي بوتون ياراديجيليغي بويو حياتيميزين معناسي، بشريتين اينکيشاف پروقرامي، هيدايت قايناغي اولان موقدس قرآني-کريمدن بهره لنميشدير. محض قرآني-کريمين موبارک آيه لريندن قايناقلانماق داهي شاعيرين بوتونلوکله ياراديجيليغي نين آنا خطيني تشکيل ائتميشدير. سووئتلر دؤنه مي زامانيندا نسيمي نين  " ان الحق  "  فلسفه سيني آتئيزم ايدئولوگيياسي نين طلبلري اساسيندا تاماميله اکس ايستيقاماته يؤنلديرديلر. البتته، قورولوش اؤزو آتئيزمه اساسلانان بير قورولوش ايدي، بو سببدن ده نسيميسئور ادبياتشوناس-عاليملريميز بؤيوک شاعيرين ياراديجيليغيني محض بو ايستيقامتدن تحلیل ائديرديلر. عکس-تقديرده اونلار نسيميني گله جک نسيللره چاتديرا بيلمزديلر. شوبهه سيز کي، زامان کئچدي، حاق اؤز يولونو تاپدي، باشقا ساحه لرده اولدوغو کيمي ائلم ساحه سينده ده قاداغالار گؤتورولدو، هر شئي اولدوغو کيمي گؤرونمه يه باشلادي و نسيمي ياراديجيليغي نين گئرچک اوزو مئيدانا چيخدي. نسيمي حاقيندا يئني علمي-تدقيقات اثرلري يارانماغا باشلادي و عاليملريميز گئرچگي اکس ائتديرن شکيلده نسيمي نين ياراديجيليغيني خاراکتئريزه ائتمه يه باشلاديلار. هر کس اؤزونمخسوس بير شکيلده نسيمييه ياناشماغا باشلادي و بوتون بونلار نسيمي نين بديعي ايرسينده کي  کودلارين آچيلماسينا خيدمت گؤسترمکده دير.   " نسيمين نين پوئتيک هونري نين اساسيندا اونون اللها و اونون قودرتينه ميسيلسيز، صميمي ايماني و اينامي دوروردو. اونون تفککورونو ايشيقلانديران و آيدينلاشديران بو ايمان ايدي، اللها هودودسوز و شريکسيز بير سئوگيسي ايدي. الله سئوگيسي نسيمي اوچون هر شئيدير. شاعير اللهدان و اونون ايقراريندان باشقا هئچ نه ايستمير.. اونون مؤعجيزه يه اوخشايان بيان شعرلري خوصوصي بير روحي وضعيتين عکسيدير: بو حالدا الله سئوگيسي اونون بوتون وارليغينا حاکيم کسيليردي، اونون عاغليني و ايلهاميني ايشيقلانديريردي، فيکريني ميسيلسيز درجه ده ايتيلشديريردي " . (9. ص.131). 

  عمادالدین نسيمي ياراديجيليغي نين اساس قايه سي و ايدئياسي ايسه، يوخاريدا قئيد ائديلديگي کيمي، حيکمت و مؤعجيزه لرله زنگين موقدس قرآني-کريمين موبارک آيه لري ايله باغليدير. بو سببدن ده ايلک اؤنجه  " ان الحق  " دئييلن فلسفي باخيشلاريني تحلیل ائلمک لازيمدير. مثلن، موقدس قرآني-کريمين  " ص "  سوره سي نين 84-جو آيه سينده اوجا آلله بويورور:  " قال فالحق والحق اقول " . ترجومه سي ايسه بئله دير:  " آلله بويوردو: حاق منده دير و من حاق سؤيلرم. "  نسيمي ايسه بونو اوجا اللهين آديندان، سادجه اولاراق شعر ديلينه چئويره رک بيان ائدير: 

      

  بولموشام حقي، ان الحق سؤيلرم،    

  حاق منم، حاق منده دير حاق سؤيلرم!(15) 

  سؤز يوخ کي، نسيمي ده اؤز سلفلري خاقاني، نيظامي و باشقا قودرتلي شاعيرله ميز کيمي موقدس قرآني کريمه اوجا اللهين اونا بخش ائتديگي درجه ده يييلنميشدي و بوتون علملرين قايناغي اولان بو آلله کيتابينيين ايستر موتشابيه، يعني چتين آنلاشيلان، ايسترسه ده تئز آنلاشيلان موبارک آيه لريني اؤزونون حيات شوعاعرينا چئويرميشدي. 

   موقدس قرآني-کريمين  " الشورا "  سوره سي نين 223-227-جي آيه لرينده اوجا آلله بويورور:  " اوجا مقامدان ائشيتديکلريني اونلارا تلقين ائدرلر و اکثريتي يالانچيدير. پئيغمبر شاعير دئييلدير. شاعيرلره يالنيز آزغينلار تابع اولارلار. مگر گؤرمه ديزمي اونلار هر بير واديده دربه دريلر؟! و اونلار اؤزلري ائتمه ديکلري شئيلري دئييرلر؟! آنجاق ايمان گتيريب ياخشي ايشلر گؤرن، اللها چوخ ذيکر ائدن، ظولمه اوغراديقدان (پئيغمبر و ايسلام ديني علئيه اينه هجو ائشيتديکدن) سونرا (ونلارا جاواب اولاراق شعرلر يازماقلا) اينتيقام آلانلاردان باشقا! ظولم ائدنلر تئزليکله بيله جکلر کي، نئجه بير دؤنوش يئرينه قايتاريلاجاقلار. "   آيه لر نازيل اولاندان سونرا اوچ نفر شاعير حضرت محمد علئيه اسسالاتو-وسسللمين يانينا گليب سوروشورلار کي،  " الله بو آيه لري نازيل ائدنده بيزيم ده شاعير اولدوغوموزو بيليردي، بس بيز ايندي هانسي نؤو شاعيرلردن ساييليريق؟ "  الله رسولو بويوردو:  " ايمان ائتميش اولانلار و ياخشي عمللر ائدنلر موستثنادير. "   

   او زامان، يني جاهيليت دؤورونده، هله ايسلام ديني نين تزه آياق آچديغي زامانلاردا موشريک شاعيرلر شهوت نوماييش ائتديرن، فيتنه-فساد تؤرتمگي تبليغ ائله ين و Bاتن پيس عمللره چاغيران شعرلر يازيرديلار. بئله کي، موشريکلرين، يني بوتپرستلرين اکثريتي موقدس قرآني-کريمين موبارک آيه لري نظمله نازيل اولدوغوندان، عئيني زاماندا، الله رسولونون اللهين پئيغمبري اولدوغونا اينانماديقلارينا گؤره، اونو شاعير حساب ائديرديلر. لاکين حضرت محمد (ص)شاعير دئييلدي، شاعير اولماقدان چوخ اوستون ايدي. اوجا الله موقدس قرآني-کريمين  " حقه "  (حق اولان قیامت) سوره سي نين 41-42-43-جو آيه لرينده بويورور:  " او شاعير سؤزو دئييلدير! نه آز اينانيرسينيز! او کاهين سؤزو ده دئييلدير! نه آز دوشونورسوز! او عالملرين ربي طرفيندن نازيل ائديلميشدير! "  

  لاکين او دؤورده ايمان گتيرن، اللها و اونون رسولونا اينانان، نماز قيليب ذکات وئرن، سالئه ايشلر گؤرن شاعيرلر ده وار ايدي کي، بو شاعيرلر، اؤز شعرلريني کوفر اوزرينده قرآن اوزدنيراق شاعيرلره جاواب اولاراق اوجا اللهي ذيکر ائدن، اونا شوکر ائدن، اونون حاق الله اولدوغونو و وارليغيني، عئيني زاماندا اونون رسولونون حاق پئيغمبري اولدوغونو بيان ائدن گؤزل شعرلر يازيرديلار.  

   شوبهه يوخدور کي، بوتون وارليغي ايله اوجا اللها، اونون رسولونا، حضرت پئيغمبر علئيه اسسالاتو وسسلمين پاک اهلي-بئيتينه باغلي بير شاعير اولدوغوندان نسيمي ده اؤز سلفلري کيمي شهوت اسيري اولان، اييرنج شئيلري تبليغ ائدن شاعيرلردن دئييلدي، عکسينه يالنيز و يالنيز اوجا اللهي ذيکر ائدن، اللها شوکر ائدن، اللهين حاق اولدوغونو، شريکسيزليگيني، هر شئيه قادير اولدوغونو، مرحمتي نين و رحمتي نين سونسوزلوغونو، بير سؤزله عالي کئيفيتلريني، زاتي و صيفتلريني بيان ائديردي.   

   بو سببدن ده شاعيرن ياراديجيليغيني ايزله يهرکن اونون ان عالي مقصدي نين بيلاواسيته اوجا اللهين اينتهاسيز بؤيوکلوگونو و بوتون وارليغي احتيوا ائتديگيني پوئتيک جيزگيلرله نوماييش ائتديرديگيني گؤروروک:

منده سيغار ايکي جاهان، من بو جاهانا سيغمازام، 

گؤوهري لامکان منم، کؤوني مکانا سيغمازام. (5.ص.158) 

   شاعير بوردا اوجا يارادانين ديليندن ايکي جاهان دئينده شوبهه يوخ کي، ماددي و معنوي عالمي نظرده توتور و ايستر ماددي دونيا، ايسترسه ده آخيرت دونياسي نه قدر بؤيوک اولسا دا اوجا اللهين هئچ بير دونيايا سيغماياجاغيني وورغولايير. ماتئرياليستلره گؤره کاينات اوچون هر هانسي باشلانغيج و سون يوخدور. يني کاينات اينتهاسيزدير. ماتئرياليست فلسفه نين اساسيندا دا محض بو  " ستاتيک کاينات مودئلي "  آنلاييشي دايانير. ماتئرياليستلره گؤره، کاينات حرکتسيزدير. لاکين دؤوروموزده کي  موشاهيده لر کايناتين باشلانغيجي نين اولماسيني قطعيتله سوبوتا يئتيرير. بوندان علاوه  کاينات هر آن حرکت ائدير، دييشير و گئنيشله نير. يني اللهدان باشقا هر شئيين، حتّی کايناتين دا بير باشلانغيجي و سونو واردير. بونا ميثال اولاراق اوجا الله موقدس قرآني-کريمين 51-جي سوره سي  " ذاريات "  (سوورولوب داغيدان کولکلر) سوره سي نين 47-جي موبارک آيه سينده بويورور: " بيز گؤيو قودرتيميزله ياراتديق  و بيز اونو گئنيشلنديرمه دييک " .  

اونو دا قئيد ائدک کي، موقدس قرآني-کريمده بير چوخ حاللاردا  " سما "  کلمه سي  " کاينات "  و  " کوسموس "  آنلامينا گلير و بو دا کايناتين گئنيشلنديگيندن خبر وئرير. 20 عصرين اوللرينده روس فيزيکي آلئکساندر فرئدمان و بئلچيکالي آستروفيزيک گئورگئ لئمايتر کايناتين فاصيله سيز حرکت حاليندا اولدوغونو و گئنيشلنديگيني نظري اولاراق حسابلاميشلار و بو 1929-جو ايلده موشاهيده لرله تاماميله سوبوتا يئتيريلميشدير. لاکين اوجا الله سونسوز و حودودسوزدور. شاعير ده بونو حئيرتاميز بير شکيلده وورغولايير: 

  عرشي ايله فرشي، کافي-نون، منده بولوندو جومله چون، 

   کس سؤزونو و افزم اول، شرح و بيانا سيغمازام!(5.ص.158) 

 

  شاعير عرش دئينده گؤيلري، فرش دئينده ايسه يئر کوره سيني نظرده توتور. اوجا الله موقدس قرآني-کريمين 71-جي  " نوح "  سوره سي نين 18-19-جو آيه لرينده بويورور: 

" سونرا سيزي يئنه اورا قايتاراجاق و (قیامت گونو ده ديريلديب اوردان دا) چيخارداجاقدير. الله يئري سيزين اوچون خالي ائتدي (فرش کيمي آياقلارينيزين آلتينا دؤشدي) کي، اونون گئنيش يوللاريندا گزه سينيز. "  

" کاف "  ك  ايله  " نون "  ن ايسه قرآن حرفلريدير، بئله کي، ك کايناتاين   يارانماسيني،  ن ايسه اوجا اللهين کايناتين ياراديليشيني و حياتين گئديشاتيني لؤوحي-محفوظدا ملکلره قلمله يازديرماسيني بيلديرير:  " بئله کي، اوجا الله  " حوروفي-مقطعه "  حرفلريندن اولان  " نون "   ن سوره سي نين بيرينجي آيسيند:-آند اولسون قلمه و ملکلرين يازديقلارينا، ياخود لؤوحي-محوفوظدا يازيلانلارا کي " ،-بورورور.  

کؤوني مکاندير آيتيم، ذاتينه دير بيدايتيم، 

 سن بو نيشاندا بيل مني، بيل کي نيشانا سيغمازام! 

 کيمسه گوماني ظنيله اولمادي، حدديله بيليش، 

حقي بيلن بيلير کي، من، ظني گومانه سيغمازام! 

صورته باخ و منيي صورت ايچينده تانه کيم؟! 

جيسمي ايله جان منم، ولي جيسمييله جانه سيغمازام! 

هم صدفم، هم اينجييم، حشري،   سيرات ادينجييم، 

بونجا قوماشي-رخت ايله، من بو دوکونا سيغمازام!  

گنجي-نيهان منم من اوش، عئيني عيان منم، من اوش، 

گؤوهري-کان منم، منم اوش، بهره ه بوکانا سيغمازام!  

گرچي موحيطي عظمم، آديم آدمدير، آدمم، 

دار ايله کون-فکون منم، من بو مکانه سيغمازام!(5 ص.158)   

" کون-فکون " ،  " اول دئسه اولاسيدير "

  - آنلاييشينا گلير و اوجا الله، حضرتي آدم (ع)يارادارکن  "کون آدم "  سؤيله دي، يي  " ياران آدم! " ،- دئدي و حضرت آدم (ع)درحال ياراندي.  

   

  جان ايله هم جاهان منم، دهريله هم زامان منم،  

  گؤر بو لطيفي کي، من دهرو زامانه سيغمازام.  

   

  ذره منم، گونش منم، چار ايله پنج و شش منم، 

   صورتي گؤر بيان ايله، چونکي بيانا سيغمازام.  

   

  ذات ايليم، صيفات ايله، گول شکرم نابات ايله،  

  قدر ايليم برات ايله، بسته دهانا سيغمازام.  

   

  نارا يانان شجر منم، چرخه چيخان هجر منم، 

   گؤر بو اودون زبانه سين، من بو زبانا سيغمازام.  

   

  شهد ايله هم شکر منم، شمس منم، قمر منم،  

  روحي-روان باغيشلارام، روحي-روانا سيغمازام.  

   

  تير منم، کامان منم، پير منم، جاوان منم،  

  دؤولتي-جاويدان منم، آيينه دانا سيغمازام. (5.ص.158) 

" گؤر بو لطيفي کي، من دهر و زامانا سيغمازام! "  دئينده شاعير اللهين زامانا سيغماديغيني، لزامان اولدوغونو، زاماني خيلقتلري اوچون ياراتديغيني بيلديرير. بوردا شاعير  " قدرايلييم برات ايله "  دئينده موقدس قرآني-کريمين نازيل اولدوغو  " قدر "  گئجه سيني، عئيني زاماندا  " برات " ، يعني باغيشلانما گئجه سيني نظرده توتور.   

   

  گرچي بو گون نسيمييم، هاشيمييم، قريشييم، 

مندن اولودور آيتيم، آيتي-شانا سيغمازام! (5.ص.158) 

 

چوخلاري، علي الخصوص دا ايمان اهلي، اوجا اللهين عالملره رحمت اولاراق گؤندرديگي حضرت محمد (ص) هاشيمي   شجره سيندن و  " قريش "  طايفاسيندان اولدوغونو بيلير. بئله کي، داهي شاعير بوردا آرتيق حضرت محمد (ص) ديليندن چيخيش ائدير.  

اي اوزو گول، لبلري مرجانيميز، 

اي گؤزو نرگيز، شاهي مستانيميز، 

اوزونه قارشي سوجود ائيله يير ملک، 

سجده يه اينکار ائدر شیطانيميز. 

نونون، عئينين، حق کيتابيدير ولي، 

صورتين نقشي دورور قرآنيميز! 

 صورتي-حقدير جامالين، اي نيگار، 

اوش نبي نين سؤزلري قرآنيميز.(10. ص.77) 

   

بو ميصراعلاردا نسيمي اؤزونون ايسلام دينينه، موقدس قرآني کريمه نه قدر باغلي اولدوغونو بيان ائدير.  

   نسيمي هم ده بير اهلي-بئيت شاعيري ايدي، بئله کي، اونون ياراديجيليغيندا اهلي بيته اولان سئوگيسي اؤزونمخصوص  لفظي، آهنگي، پوئتيک نيظامي، خطاسيز دوزومو، حئيرت آميز آخيجيليغي ايله اوخوجونو باشدا حضرت محمد (ص اولماقلا اونون پاک اهلي-بئيتي نين، عئيني زاماندا، اونلارين نورلو اؤولادلاري نين الله يانينداکي مقاميني خاراکتئريزه ائدير: 

من قولامي-خاندانام، پاديشاهيمدير علي. 

احتيياجيم وار اونا، پوشدو-پناهيمدير علي. 

کؤنلومو قيلدي مونوور، مئرهي-ايمامدير علي. 

  قيبله گاهيمدير محمد، سجدگاهيمدير علي. 

   

گلديلر حاقدن بيانه، سيرري آغاز ائتديلر، 

سؤزلريله بو جاهان مولکونه پرواز ائتديلر، 

حمدالله بيز گداني، محرمي-راز ائتديلر، 

قيبله گاهيمدير محمد، سجدگاهيمدير علي. 

   

تا اجلدن پاديشاهيمدير حسن خلقي-ريضا، 

دونيادا عقبادا سر-تاجيم حسيني-کربلا، 

نور-چشميمدي ايمام زین العابدین، 

قيبله گاهيمدير محمد، سجدگاهيمدير علي. 

جان و ديلدن بنده، باقرالعلوم -جعفرم، 

موسي کاطيم، ايمام رضايا کنترم، 

پشاه تاغي، بابا ناغي يولوندا پاک بسترم، 

قيبله گاهيمدير محمد، سجدگاهيمدير علي. 

   

  ماثواتر ائيله يير بيزلري دياري-لحلته، 

  حاکيم اونلاردير بو گون، لاييقدير اونلار حؤرمته، 

لا دئينلر اوغراييرلار بو جاهاندا مؤحنته، 

قيبله گاهيمدير محمد، سجدگاهيمدير علي. 

 

جومله ميز آرزو ائدنلر عسگرييه عسگروض، 

  مهدي صاحب زامانا بيز تولی ائيلروض، 

حمدالله ائيله، اي نسيمي، بيز يولونو گؤزلريز، 

قيبله گاهيمدير محمد، سجدگاهيمدير علي. (15) 

   

   نسيمي حضرت علي (ع)چوخ سئوميش و اونو اؤز ديوانيندا اينتهاسيز بير سئوگي ايله مدح ائتميشدير: 

 

     اول نسيمي، رحمتي فجري خدا، 

     اول ايمدادو دين سيرري مورتضی. 

     جان و تن، گؤزو ايله گؤرن عالم، 

     اول کي، چوخلار اولدو، آندان آدمي. 

     اول شهيدي آشدي، فضلي زولجلال. 

     بند و زيندانلاردا، اولدو ماه و سال. 

     اول مسيحا، سياحت ائيله ين، 

     عرشي هر يئرده حاقي سؤيله ين. 

     اول بلادان آه و افغان ايتمه ين، 

     سؤيله ين اسراري، پونهان ايتمه ين. 

     خظبه عالم، پيشووايي اهلي ديل، 

     سروري، آفاقي اميرالمومنين.  (15) 

   

   نسيمي، عئيني زاماندا بير سيرا اثرلرينده  " صراط موستقيم " له، يعني اوجا اللهين قويدوغو هيدايت يولو ايله ياشاديغيني، ايبليسه اويماديغيني، ذره قدر ده دونيا ماليندا گؤزو اولمديغيني،آرزويسي نين يالنيز اوجا اللهدان گلديگيني، قیامت گونو سئوگيلي پئيغمبريميزين اونون شفاعتينه گله جگيني، خار ايچينده بيتن قؤنچه گوله، اؤز ديليني قويوب باشقا ديللره ميننت ائلمه ديگيني، عئيني زاماندا، يالنيز اوجا الله قارشيسيندا اَييلديگيني بديعي سؤزون ان يوکسک، ان تاثيرلي واسيطه لري ايله اوخوجوسونون نظرينه چاتديرير:  

   

  خار ايچينده بيتن قؤنچه گوله ميننت ائيله مم، 

  عربي، فارسي بيلمم، ديله ميننت ائيله مم. 

  صراط موستقيم اوزره گؤزتيريم رحيمي، 

  ايبليسين تعليم ائتديگي يولا ميننت ائيله مم. 

  بير عجايب درده دوشدوم هر کس گئدر کارينا، 

  بو گون بولدوم، بو گون يئديم، حاق کريمدير يارينا. 

  ذره جه طاماهيم يوخدور بو دونيانين وارينا، 

  عروضومو وئره خدادير، قولا ميننت ائيله مم، 

  اول نسيمي، جان نسيمي، اول قني مئهمان ايکن، 

  يارين شفاعتلري احمدي موختار ايکن، 

  جومله نين آرزوسون وئرن اول قني ستار ايکن، 

  يئر اوزوونون خليفه سي، هونکارا ميننت ائيله مه! (15) 

   

ايمانلي شخصلره چوخ ياخشي معلومدور کي،8-جي عصردن، يعني آذربايجان خالقي ايسلام دينيني قبول ائله يندن بري اؤلنلريميزين روحونا دايم  " فاتحه "  وئرميش، صالاوات چئويرميش و  " ياسين "  اوخوموشوق. فاتحه موقدس قرآنين آناسي و آچاري آدلانير و يئددي آيدن عيبارتدير. بيز اساسن فاتحه نين آيه لريني ان ساده شکيلده آنلاميشيق و حضرت محمد (ص محض عرب ديلينده نازيل اولدوغوندان اونو عرب ديلينده منيمسه ميشيک، هم ده ايلاهياتچي عاليملريميزين سعيي نتيجه سينده آذربايجانجا ترجومه سيني ده اؤيرنميشيک. لاکين بيز اونو ساده شکيلده آنلاديغيميزا گؤره اونون فلسفي درينلرينه وارماميشيق و نييه محض فاتحه سوره سي نين قرآنين آچاري، آناسي اولدوغو باره ده دوشونمه ميشيک. نسيمي ايسه اوجا اللهين اونا بخش ائتديگي کرامتله، بصيرت گؤزونون آچيلماسي ايله بو موبارک سوره نين يئددي آيه سي نين حيکمتلريني، معنا ايچينده معنا داشيديغيني اؤزونمخصوص شکيلده آچاراق بيان ائدير: 

   

" فاتحه ام الکيتابين گؤستر آيهسي ندير؟ 

بیست و هشت و سي و دو حرفين خولاصه سي ندير؟ 

دوققوز آتا، يئددي آنا، دؤرد تايادان وئر خبر، 

دو چهارو پنج و ششين ساق و بونياسي ندير؟ 

اوچ يوز آلتميش آلتي منزيل، قيرخ سککيز يئرده ميزان، 

اي کي يئتميش يئددي حرفين اون ايکي خاصي ندير؟ 

صيدرو و کؤوثر ندندير، نؤ فلکين گرديشي، 

اون ايکي بورجو کواکيب چايي، مأواسي ندير؟ 

يئددي يئردير، يئددي گؤگدور، يئددي دريا، يئددي خط، 

يئددي موصحف، يئددي آيت، يدی بیضاسي ندير؟ " ( 11.ص.53.) 

   

ادبياتشوناس عاليم يقوب بابايئو داهي شاعيرين بو اثرينده کي  رقملره بو جور آيدينليق گتيرير:  " دئمه لي، فيلوسوف شاعيره گؤره وارليق موستويسينده موعين رقملر ايفاده ائتديگي حقيقتلر خاوسا يوخ، مقصدلي نيظاما، جيدي هارمونييايا خيدمت ائدير. بو رقملردن اساسن 1-ووجودي-کل، تؤوحيد، 2-ايکي جاهان، ماددي و معنوي عالم، 4-دؤرد عنصور، 6-آلتي جهت و دونيانين 6 گونده يارانماسي، 8-بهيشت، 9-فلک، 12-بورج و يا اون ايکي امام، 17-اون يئددي رکت نماز و س. معنالاري بيلديرير. لاکين بعن عيني رقم داها چوخ، يعني باشقا آنلاملاردا دا ايشله ديلير. مثلن: 5-بئش واخت نماز، بئش دويغو عوضوو، 5 اوصول دين ايسلامين تمل پرينسيپي، شعيه لرده 5 عالي کيمسنه و س. ياخود 14-ايکي دفعه  نازيل اولونان و 7 آيدن عيبارت  " الفاتحه "  سوره سي نين 2-يه وورولماسيندان آلينان رقم ( " صب المثاني " ) 4 وجه (انسان اؤزو) سؤزونون عربجه يازيليشينداکي حرفلرين ابجد حسابي ايله ايفاده ائتديگي رقملردن آلينان جمع؛ اينسان جامالينداکي 7 خط و اونلارين يئرلري نين جمعي؛ اينسان اوزونده کي  7 آنا (خطي امييه) و 7 آتا (خطي-ابيه)؛ قرآنين 29 سوره سي نين باشلانغيجيندا يازيلميش 14 حرف و س " .(3.ص.93)   

   بوندان علاوه  قيد ائتمک لازيمدير کي، هم دونيوي علملره، هم ده ايلاهيات علملرينه اساسن گؤيون يئددي قاتي، يئرين يئددي قاتي و اوکئانلارين دا يئددي قاتي وار! بوندان علاوه ، اوجا الله موقدس قرآني کريمين موبارک آيه لريني يئددي حرفله نازيل ائتميشدير و محض حضرت محمد (ص.)  " معراج " آ قالخارکن اوجا اللهين حؤکمو ايله  " سيدرت المنتهی " يا يوکسلميش، يعني اونو معراجا آپاران ملگين حتّی قالخا بيلمه ديگي بير مقاما يوکسلميش و بوردا اونا آرتيق ملکسيز، يعني بيلاواسيطه وهي ايله اوجا الله طرفيندن  " فاتحه "  سوره سي، عئيني زاماندا  " کؤوثر " ،  " البقره "  سوره سي نين  " آیه الکرسی "  آدلانان 255-256-جي آيه لري،  " آمنه رسولو "  آدلانان 286-جي آيه سي نازيل اولونموشدور.   

غزلخان شاعير، فوضوليشوناس حاجي مايل  " فاتحه "  سوره سينه تامام باشقا ايقتيقامتدن تحلیل وئرميش، سوره ني بيلاواسيطه حضرت محمد (ص) و اونون پاک اهلي بيتي ايله علاقه لنديرميشدير.  

   بونو دا قئيد ائتمک لازيمدير کي، نسيمي سلفلريندن آلديغي درسلره رغمن هئچ واخت شعره خيانت ائتمه ميش، شعر خزينه ميزي داها دا زنگينلشديرمکدن اؤترو بوتون پوئتيک قليبلردن، بديعي ايفاده واسيطه لريندن اولدوقجا مهارتله ايستيفاده ائتميشدير.  

   کلاسسيک بديعي ايفاده واسيطه لرينده  " مدور "  خوصوصي يئرلردن بيريني توتور. مدور دايروي دؤوره دئمکدير. بو واسيطه ايله يازيلميش ميصراعنين و ياخود بئيتين هانسي کلمه سيندن باشلاييب اوخودوقدا معنا ايتمير. نسيميده بو جور ريتميک قوروما ماليک غزللر واردير. اونلاردان بيريني گؤسترمکله داهي شاعيرين صنعتي نين نه قدر زنگين اولدوغونو آچيق-آيدين گؤرريک: 

   

اي باهاريم، اي نيگاريم، اي شيکاريم، شاهيديم، 

اي حريفيم، اي ظريفيم، اي شريفيم، سروريم. (5.ص.98) 

         

" تشبيه آذربايجان پوئزيياسيندا ان گئنيش ياييلميش واسيطه دير. ائله بير آذربايجان شاعيري يوخدور کي، تشبيهدن ايستيفاده ائتمه سين. تشبيه ذاتن اؤزلوگونده بير فلسفي کاتئقورييادير. تشبيه ده ائميوسيونال تاثير چوخ گوجلودور. شاعيرلر اساسن تشبيهلر واسيطه سيله اؤز شاعيرليک قدرتي نين هانسي درجه ده اولدوغونو نوماييش ائتديره بيلر.  عرب ادبياتشوناسي ايبن قوطيبه يه گؤره،  " شعريتده کي  موقاييسه ساده بنزتمه ياراتماق اوچون دئييل، پرئدمئت و حاديثه لري داها دقيق تانيماق و آييرد ائتمک مقصدي داشييير. اوخشار صيفتلر و آرتيق جهتلر ايسه شرطي خاراکتئر داشييير. اونلار نه قدر چوخ اولارسا، موقاييسه داها موکممل ساييلير. بو ساياق قارشيلاشمادا بو موحاکيمه باشقا بير موحاکيمه نين دوغرولوغونو وورغولاماق اوچون دليل کيمي گتيريلير " . ( 13.ص. 12، 99، 107). 

   نسيمي تشبيه لردن اولدوقجا گئنيش شکيلده ايستيفاده ائتميشدير و اونون اثرلرينده بو بديعي ايفاده واسيطه سي بديعي سؤزون قوووتلنمه سينده اولدوقجا مهم رول اويناميشدير:  

   

  قمر چهره م، پري رويوم، ظريفيم، شوخوم و شنگيم، 

  چمن بويوم، گول انداميم، زهي سروي گولوستانيم، 

  ظريفيم، نازيکيم، حب حبيبيم، طرفه محبوبوم، 

  حيجازيم، کعبه  و توروم، بهيشتيم، حوری ريضوانيم.  

   

 (اينجم، گؤزل دورانيم، سئوداليم، بنزرسيز سئويله نيم، کعبه م، توروم، جنّتيم حوريم، ريضوانيم.)  

  چيراغيم، شميم، شميمي نوروم، ضيام، اولدوزوم، شمسيم، 

  هزاريم، بولبولوم، وئرديم، نسيميي خوش الهانيم، (15) 

(چيراغيم، شميم، نوروم، ايشيغيم، اولدوزوم، گونشيم، بولبولوم، گولوم، نسيميم، خوش اوخويانيم.)  

موقدس قرآني-کريمدن قايناقلانان بلاغت، بديعييات علملري آذربايجان کلاسسيک ادبياتيني حدديندن آرتيق زينتلنديرميش و زنگينلشديرميشدير. آذربايجان شاعيرلري نين علمي فهمي، پوئتيک تخيوللو بيلاواسيته موقدس قرآني-کريمين موبارک آيه لري نين تاثيري ايله اينانيلماز درجه ده ايشيقلانميش و بوتون بشريته اؤرنک اولاجاق سويييه ده اولدوقجا مؤحتشم اثرلر ياراتماغا وادار ائتميشدير. بو دا اؤز نؤوبه سينده شاعيرلرين ادبي ايرسينده بديعي تصوير سيستئمي نين قورولماسينا موثبت تاثيريني گؤسترميشدير. محض بو سببدن ده  پوئتيک تخييولون گئرچکلشمه سي اوچون ايشلنن بديعي تصوير سيستئمي هم ده بو ايفاده واسيطه لريندن عيبارتدير. 

   مثلن،  " حسني تعليل " ده بير صيفت ادبي سبب کيمي حاقيقي سببين يئرينه ايشله ديلير.  " عکس "  سؤزونون معناسي ترسينه چئويرمک،  " تبديل "  سؤزونون معناسي يئردگيشمه،  " تدوير "  ايسه دؤور ائتمک دئمکدير. بير چوخ پوئتيک واسيطه لر کيمي بونلار دا موقدس قرآني-کريم بلاغتيندن ايره لي گلن بديعي تصوير اوسوللاريدير. موقدس قرآني-کريمين بير سيرا آيه لري واردير کي،  " عکس "  آدلانان پوئتيک قليبه اويغون هم باشدان، هم سونرادان اوخونارکن بير-بيري نين تکراري اولور. بئله کي، نسيمي بو جور بديعي تصوير اوسوللاريندان اؤز اثرلرينده مهارتله ايستيفاده ائتميشدير.  " حسني تعليللر " ،  " عکسلر " ،  " تبديللر " ،  " تدويرلر " ، عئيني زاماندا ايستر کلاسسيک، ايسترسه ده موعاصير پوئزييادا ان چوخ ايشلنن" ايستيعاره لر " ،  " تکريرلر "  دايم اونون شعرلري نين بزگي اولموشدور: 

   اي موسلمانلار، بو گون اول  ياري-پونهان آيريلير، 

   آغلاماييم، نئيلیيم، چون گؤوده دن جان آيريلير. 

   اي صنم، هيجران اليندن ناله ي-زار ائيلرم، 

   گؤزلريمدن ساناسان، دريايي-عوممان آيريلير. 

   اول سببدندير کي، من بيمار و رنجور اولموشام، 

   خسته کؤنلوم مرهمي، شول درده درمان آيريلير.(10.ص.247) 

" نسيمي پوئتيک ايرثينه بير موبهمليک گتيرن، اونون شعرينده هم ده بديعي دير کسب ائده رک  " سيرري "  نين اساسيني تشکيل ائدن ايسه تصوووف مجازلاري و حروفي رمزلري نين چوخلوغودور. يوزايلدن-يوزايله، شعريدن-شعره اينکيشاف ائده رک، معنا توتومونو گئنيشلنديرن و چوخسسايلي تصووف آنلاييشلاري نين موشته رک لئکسيک فوندونو يارادان تئرمين- مجازلار نسيمي شعري نين ده پوئتيک و فلسفي فيکري اؤزولونو تشکيل ائدير. بونا باخماياراق، موتفککير شاعيرين شعر صنعتي نين سيرلرينه يييلنمک و درينليکلرينه نوفوذ ائتمک اوچون عنعنه وي، موشترک فلسفي-ديني مضمونلو پوئتيک دئييملري بيلمک کيفايت ائتمير. نسيمي اؤز سيرريني 19 يوزيلليگين اوخوجوسونا آسانليقلا آچمير. اونون زنگين فيکير دونياسي نين ظاهيري  " اؤرتويو "  مؤوقعيينده اولان مجازلارين حقيقي آنلاميني باشا دوشمک اوچون شاعيرين اوچديللي (تورک، فارس و عرب) بديعي-فلسفي محصولونون دؤنه-دؤنه موطاليه ائديلمه سي و اينجلنمه سينه احتيياج دويولور. اونو  دا قئيد ائتمه لييک کي، نسيمي نين ديداکتيک، اؤيره ديجي خاراکتئرلي شعرلري بير چوخ حاللاردا اونون روحي حالتي و داخيلي هيجانلاريني ايفاده ائدن اثرلري نين  " آچار " ي  مؤوقعيينده دير " .(14.ص.125) 

  8 عصرده، ميلادي تقويميله 767-جي ايلده خليل بن احمد عروض وزنيني ياراتدي. او، عروض وزني حاقيندا تام بير سيستئم ياراتدي. عرب فونئتيکاسيندا صايتلر اوزون، اورتا، قيسا اولماقلا اوچ تلفظ وضعيتي واردير. بونا گؤره ده عروض وزني عرب شعري ايله اولدوقجا راحات اويوشوردو. بو سببدن ده خليل بن احمد عروضون 15 بحريني موعينلشديرميشدير. سونرادان عروضون 4 بهره ي ده موعين ائديله رک 19-آ چاتديريلميشدير.  

تورکديللي پوئزييادا عروض وزنينده ايلک اثر يوسيف بالاساقونلونون (يوسيف خاص حاجيب) 10 عصرده کاشغار شهرينده يازديغي  " قوتادقوبيليک "  (خوشبختلييه آپاران علم) پوئماسيدير.  

   تورک ديلينده يازان آذربايجان شاعيرلري ده 10- عصردن اعتيبارن عروض وزنينده يازيب-ياراتماغا باشلاميشلار.  

" عروض وزني عصرلردير کي، شعريميزه يولداشليق ائدير. بوتون داهي کلاسسيکلريميزين اثرلري دئمک اولار کي، بو وزنده يازيلميشدير. اونا گؤره ده بو وزنين نظري اساسلاريني اؤيرنمه لي و بو وزنده يازيلميش شعرلري دوزگون اوخوماغي باجارماليييق " . (4.ص.3)  

  نسيمي عروض وزني نين بير چوخ بهره لرينده اثرلر ياراتميشدير، لاکين شاعير اساسن  " رجز "  و  " رمل "  بحر لريندن ايستيفاده ائتميشدير. بئله کي، اونون ديوانيندا هجز بهره ينده 70، رمل بهره ينده ايسه 96 شعر واردير. لاکين شاعير رجز، منصوريه، مضارع، خفيف، موتداريک و سايره بحرلرده ده اثرلر ياراتميشدير. اونون غزللري نين بديعي-ائموسيونال ايمکانلاري حودودسوزدور. شاعير آذربايجان ديلينده غزله زنگين اوسلوب چالارلاري گتيرميشدير. اونون ميللي شعريميز قارشيسيندا ان بؤيوک خيدمتلريندن بيري خالق اوسلوبوندا ياراتديغي غزللردير. بو غزللر نسيمي ادبي-ايرثينده چوخلوق تشکيل ائدير و اساسن عروض وزنی نين اويناق بحرلرينده يازيلميش، سليس کولوريتلي نومونه لردير و اوريیه یاتيملي آهنگلري ايله نغمه-ترانه مقاميندادير: 

   

مهري روحون تابينه دوشدو کؤنول، يانه دير؟ 

شمعه دوشن نارينا يانسا گرک يا ندير؟ 

اي مهي بدرين اوزو مهري روخوندن خجيل، 

شمعينه گؤر جانيمي، کيم نئجه پروانه دير. (10.ص.222) 

   

عروض وزنی نين سيرلرينه موکممل صورتده يييلنن شاعيرين غزللري الوان مجازلار سيلسيله سي ايله زينتليدير. شاعير عنعنه لردن گلمه و بديعي سيستئم حالينا دوشموش بديعي فيقورلاردان ياراديجي شکيلده ايستيفاده ائتمکله، دوغما خالقين لوغت فوندوندان بو سيلسيله ني دولغونلاشديرميش، کاميللشديرميشدير.  

" نسيمي نين ياراتديغي ديني-فلسفي شعر ديلي اونون تورک خالقلاري نين پوئزيياسي تاريخينده ان بؤيوک، ان ميثليسيز خيدمتي ايدي. بزن اونون ديلي نين اصيلليگينه بئله، شوبهه ائتمک ايسته ييرسن، چونکي بو ديل موعاصيرلريندن موقاييسه گلمز درجه ده موکممل، پوئتيک و ساده دير، آنلاشيقليدير " . (9.س.131) 

  نسيمي نين داهي شاعير اولماقلا ياناشي، مؤمين بير اينسان اولدوغونو هله 1991-جي ايلده، يني سووئت ايتتيفاقي  داغيلماميشدان، بوتون قافقازين شئيخوليسلامي حاجي اللهشوکور پاشازاده قلمه آلديغي  " قافقازدا ايسلام "  کيتابيندا قئيد ائتميشدير: 

    " خاقاني ده، نيظامي ده، فوضولي ده، نسيمي ده - الله اونلارين هاميسيندان راضي اولسون! اللها، اونون پئيغمبرينه و کيتابينا اينانان، تقدير اولونانا عمل ائدن، اينکار ائديلندن يان کئچن مؤمين آداملار اولموشلار. مؤمينلر اوچون ايسه ان سجيييوي خوصوصيت دي نين تقدير ائتديگي عملي صالح ليکدير. بو آداملارين دونيادويومونون اساسيني دين تشکيل ائدير. دئمه لي، اونلارين عمللري ده، صنعتي ده ديندن بهره له نير. اگر بيز اونلارين دينه قارشي چيخديقلاريني ايديعا ائتسک، اونلارين عمللرتيني ده، صنعتيني ده اينکار ائتميش اولاريق! " (6.ص.150)  

   تاريخي منبعلره گؤره، نسيمي، نيمي شاه فضل الله بن ابو محمد تبريزي نين نايبي اولموش و نعيمي حؤکمدار امير تئيمورون اوغلو ميرانشاهين امري ايله قتله يئتيريلندن سونرا حوروفيليگي تبليغ ائتمه يه باشلاميشدير. 

    " شاه فضل الله ين اؤلوموندن سونرا اونون فيکيرلري و طريقتي بوتون ايسلام عالمينه ياييلميشدير. الي-الييول-الا، سید عمادالدین نسيمي و باشقالاري کيمي اونون جانيشينلري و نايبلري آنادولويا قاچميش، بکتاشيلرين تکيه لرينه و خانگاهلارينا يول تاپيب، بکتاشي طريقتي نين عوضينه حوروفي طريقتيني تبليغ ائتمه يه باشاميشدير " (7.ص.256-257)  

   نيمي طرفيندن ياراديلان و نسيمي نين عوضوو اولدوغو  " حروفیلیک "  ايسه اوجا الله طرفيندن حضرت محمد (ص)مه نازيل ائديلن موقدس قرآني کريمين حرفلري نين دونيانين و کايناتين سيرلريني احتيوا ائلمه سيني گؤسترن بير طريقت ايدي: 

    " حروفیلیک "  تعليمي نين بانيسي آذربايجان يازيچيسي و موتفکري تبريزلي فضل الله الحروفي نيمي ايدي. او، حروفیلیک ايدئيالاريني تبليغ ائتمک و حروفي تشکيلاتلاريني ياراتماق مقصديله شرق اؤلکه لريني چوخ گزميشدي. حروفيليگين اساس مودعالاري نيمي نين  " جاويدنامه "  ( " ابديت کيتابي " ) اثرينده شرح ائديلميشدير. حروفيلر بو فيکيرده ايديلر کي، عرب اليفباسي نين حرفلري موقدس خاراکتئر داشييير و دونيانين سيرلريني آچماق اوچون بير واسيطه دير " .(1.ص.219)  

    " نسيمي نين اوستادي-حروفي طريقتي نين اساسيني قويان نيمي درين دوشونجه سي، علمي و بيليگينه گؤره مؤولانه درجه سينه يوکسلميشدي، اونون  " جاويدان کبير "  و جاويداني صغير "  اثرلري ايسلام عالمينده، خوصوصيله ده شيعه مذهبلي موسلمانلار آراسيندا چوخ مهشور ايدي. بوتون فلسفي گؤروشلري يارادانين تکليگينه و اينتهاسيز بؤيوکلوگونه حصر اولونموش نيمي نين جانيشيني و نايبي نسيمي اونون يولونو شرفله داوام ائتديرميش و عؤمرونون آخيرينا قدر ده اؤز مؤحتشم اثرلري ايله حروفيليگي تبليغ ائتميشدير: 

   

سيرري ان الحق سؤيلرم، عالمده پونهان گلميشم، 

هم حق دئرم، حق منده دير، هم ختمي-اينسان گلميشم " . (8.ص.107) 

  نسيمي نين اوستادي نيمي،  " حرويفيليک "  جرياني نين نظري اساسلاريني اؤز دوشونجه لرينه رغمن، موقدس قرآن کريمين موبارک سوره لري نين باشلانغيجيندا ايشاره اولونان  " حروفي مقطعه "  حرفلريندن آلميشدير. بئله کي، موقدس قرآني-کريمين بير چوخ سوره لري  " هوروفي-مقطعه "  مثلن:  

  صاد ص  آي ن ع   قاف ق    رار   نونن    ميمم   لام  ل  اليف ا    

  و ايلاخير حرفلريله باشلايير. ايستر حضور مجليسلرينده، ايسترسه ده رحمته گئدنلريميزين مزاري اوستونده ان چوخ اوخونان  " ياسين "  ياس سوره سي ده  " حروفي-مقطعه "  حرفلري ايله باشلايير.  " حروفي-مقطعه "  حرفلري ايله آيه لرين ايچينده کي  حرفلرله فرقي، اونلارين بوردا گؤستريلديگي کيمي بوتؤو شکيلده اوخونماسيدير.يني موقدس قرآني کريمي اوخويان حافيظ و ياخود قارئ بو حرفلري بوتؤو شکيلده، اؤزو ده بير چوخ حاللاردا اوزاداراق تلفظ ائدير.  

   نسيمي ايسه موقدس حرفلره اؤزونمخصوص شکيلده بير معنا وئرير: 

  من اوتوز ايکي حروفم  " لم، يه، زل " ، 

  يوخدور اورتاغيم، نه ميثليم، نه دبل. 

  چون عبديدير آخيريم، ازل ازل، 

  اولو آخير منم، عز و جل.(15) 

اونو دا موطلق قئيد ائتمک لازيمدير کي،  " حروفي-مقطعه "  حرفلري سيرري-خدادير، اوجا آلله لا حضرت محمد (ص) آراسيندا اولان رمزلردير و الله رسولو بو حرفلرين معناسيني کيمسه يه آنلاتماميشدير. بئله کي، دايم قرآن تفسيرچيلري بو حرفلره جوربجور ايضاحلار وئرسه لر ده، بونلار، سادجه اولاراق، فرضيييه لردير، چونکي يوخاريدا دئييلديگي کيمي بو الله لا رسولو آراسيندا اولان بير سيردير، اصل حاقيقتده ايسه ايندييه قدر بو سيرري آچماق کيمسه يه قيسمت اولماميشدير.  

   گؤرونور نسيمي نين اوستادي نيمي ده بو حرفلرين سيرريني اؤزونمخصوص شکيلده قبول ائتديگي اوچون بير نؤو تفککورونون قلبه سي کيمي بونو حقيقت حساب ائلميش و اؤز دوشونجه لرينه رغمن بو حرفلرين اساسيندا  " حروفیلیک"  طريقتيني ياراتميشدير.  

    يوخاريدا دفعه لرله قئيد اولوندوغو کيمي نسيمي اوجا الله ا چوخ باغلي ايدي و او قدر باغلي ايدي کي، ايلاهي عشقدن ياخشي معنادا مست اولوردو. بونا گؤره ده ذاتن اوجا يارادانين عشقي ايله مست اولان شاعير بوتون ياراديجيليغي بويو باشقا-باشقا بيچيملرله ايشارلنن الله عشقيني بو اثرينده قلمي نين حئيرت آميز قدرتيله بيلديرير: 

   

چون مني بزمي-ازلده ائيله دي اول يار مست، 

اول جهتدن گؤرولور بو چشميمه ديار مست. 

عشقي-صوبحاني مئيليندن واله اولدو شؤيله بيل، 

عرش مست و، فرش مست و، کؤوکب و سيار مست. 

انبيياو و، اؤولوياو و،، اصفييا و، اتقييا، 

اولدولار حق مجليسينده شؤيله بيهوشيار مست.  

کؤنلوموز نوري-تجلل، جيسميميزدير کوهي-تور، 

جانيميز ديدارا قارشي اولدو موسی وار مست. 

اي نسيمي، سيرري-حققين محرمي سنسن بو گون، 

سؤيله دين قدرت ديليله، معنيي اصرار مست. (2.ص.35) 

  عمادالدین نسيمي بو اثرده مؤوجوداتين، ايک نؤوبه ده پئيغمبرلرين، اؤوليالارين، عملي-صالحه بنده لرين ايلاهي عشقيله مست اولدوقلاريني سؤيله يير. شاعير اينسانين ووجودونو تور داغينا، کؤنلونو ايسه  " نور " آ بنزه دير. يني ايلاهي نورون تجللاسي قارشيسيندا حضرت موسی (ع)کيمي اؤزوندن گئدنده ده اگر اوجا الله اؤز سئوديگي بنده سيني اؤز نورونا غرق ائديبسه همين بنده دونياسيني دييشنه قدر همين نور واسيطه سيله الله عشقي ايله مست اولاجاقدير. موقدس قرآني-کريمدن خبري اولانلار دا بيليرلر کي، الله ين کيتابي نين 24-جو سوره سي اولان  " نور "  سوره سي نين 35-جي آيه سينده اوجا الله بويورور:  " الله نور ايچينده نوردور و ديله ديگيني اؤز نورونا قوووشدورار. 

" آذربايجان خالقي نين داهي شاعيري عمادالدین نسيمي نين اؤزونمخصوص-پوئتيک و فلسفي فيکير دونياسي واردير. او، هر شئيدن اول، حروفيلييه مخصوص فلسفي فيکيرلرين ان بؤيوک ترننومچوسو و تبليغاتچيسي اولموشدور. نسيمي شعرلري اؤزونون حروفیلیک طريقتي نين، زمانه سي نين سياسي-ايجتيماعي فيکيرلري نين پوئتيک سالنامه سي نين اؤزونمخصوصلوغونو سعجيييلنديره رک، چوخ حاقلي اولاراق دئييب کي، آنجاق معنا اهلي نسيمي نين سؤزلريني درک ائده بيلر " .(11.ص.291) 

  نسيمي بيزه يول گؤسترير! او بيزه اوجا اللهين حاقيقتلريني، قرآني، حضرت محمدي، اهلي بيتي، اماملاريميزي، وطنيميزي، تورپاغيميزي، ديليميزي، دينيميزي، ميللي و ديني ديرلريميزي، علميميزي، ادبياتيميزي، عادت-عنعنه لريميزي، اجداديميزي، سوي-کؤکوموزو، سلفلريميزي سئومگي آنلادير، اوجا الله ين دوستلاريني، دوشمنلريني تانيدير، صراط-موستقيمله، يعني اوجا الله ين قويدوغو هيدايت يولو ايله ياشاماغي باشا سالير، بؤيويه، آغساققالا، آغبيرچه يه حؤرمت ائلمگين اوجا يارادان يانيندا نه قدر ديرلي اولدوغونو و ذاتن بو دونيادا حالالليقلا عؤمور سورمگين واجيبليگيني  بيان ائدير.  

   داهي شاعيرين اثرلري اصلینده بيزلر اوچون درسدير، اؤيود-نصيحتدير، تؤوسييه دير، ايلک اؤنجه ايسه ايسلام حؤکملري نين و اخلاقي نين بير آيناسيدير. بو سببدن ده نسيميني اوخوماق، نسيميني اؤيرنمک، نسيميني يئني باخيشلارلا تدقيق و تحلیل ائلمک چوخ واجيبدير. نسيمي بير دونيادير، بئله کي، بيز بو دونيانين درينليکلرينه وارا بيلسک، هم اؤزوموزچون، هم خالقيميز اوچون چوخ شئيلر الده ائله يه بيلريک! چونکي نسيمي دونياسيندا هئچ بير خطا يوخدور! هر شئي چوخ گؤزلدير، چوخ پاک و صافدير. چونکي نسيمي، اوجا الله ين کايناتين، حياتين، وارليغين، مؤوجوداتين، مخلوقاتين تک بير ياراداني و حاق الله اولدوغونو، اونون بشر اؤولادينا بخش ائتديگي هر آيسينده معنا ايچينده معنا اولان موقدس قرآني کريمين ميسيلسيزليگيني، اوجا الله ين عالملره رحمت اولاراق گؤندرديگي سئوگيلي پئيغمبريميز حضرت محمدين (ص.) و اونون پاک اهلي-بئيتي نين بشريتين خيلاصي اوچون نيجات گميسي اولدوغونو، اينجلنميش، نقشلنميش، جيلالانميش، حئيرتاميز پوئتيک قليبلرله، بديعي ايفاده واسيطه لري ايله اولدوقجا روان و آيدين شکيلده نظريميزه چاتديرميشدير. بيز آذربايجان خالقي اولاراق هر زامان قورور دويماليييق کي، نيظامي، فوضولي و نسيمي کيمي تک آذربايجان، يا موسلمان شرقي نين ادبياتينا دئييل، دونيا ادبياتينا قييمتي هئچ بير شئيله اؤلچولمه ين تؤهفه لر، لعللر -داهي شاعيرلر بخش ائتميشيک! 

  خولاصه 

  بو آراشديرمادا عمادالدین نسيمي نين ديني-فلسفي گؤروشلرينه نظر سالينير. 

  سید عمادالدین نسيمي بوتون ياراديجيليغي بويو حياتيميزين معناسي، بشريتين اينکيشاف پروقرامي، هيدايت قايناغي اولان موقدس قرآن کريمدن بهره لنميشدير. محض قرآني-کريمين موبارک آيه لريندن قايناقلانماق داهي شاعيرين بوتونلوکله ياراديجيليغي نين آنا خطيني تشکيل ائتميشدير. سووئتلر دؤنه مي زامانيندا نسيمي نين  " ان الحق  "  فلسفه سيني آتئيزم ايدئولوگيياسي نين طلبلري اساسيندا تاماميله عکس ايستيقاماته يؤنلديرديلر. البتته، قورولوش اؤزو آتئيزمه اساسلانان بير قورولوش ايدي، بو سببدن ده نسيمي سئور ادبياتشوناس-عاليملريميز بؤيوک شاعيرين ياراديجيليغيني محض بو ايستيقامتدن تحلیل ائديرديلر. عکس تقديرده اونلار نسيميني گله جک نسيللره چاتديرا بيلمزديلر. شوبهه سيز کي، زامان کئچدي، حاق اؤز يولونو تاپدي، باشقا ساحه لرده اولدوغو کيمي ائلم ساحه سينده ده قاداغالار گؤتورولدو، هر شئي اولدوغو کيمي گؤرونمه يه باشلادي و نسيمي ياراديجيليغي نين گئرچک اوزو مئيدانا چيخدي. نسيمي حاقيندا يئني علمي-تدقيقات اثرلري يارانماغا باشلادي و عاليملريميز گئرچگي اکس ائتديرن شکيلده نسيمي نين ياراديجيليغيني خاراکتئريزه ائتمه يه باشلاديلار. هر کس اؤزونمخسوس بير شکيلده نسيمييه ياناشماغا باشلادي و بوتون بونلار نسيمي نين بديعي ايرسينده کي  کودلارين آچيلماسينا خيدمت گؤسترمکده دير.  نسيمين نين پوئتيک هونري نين اساسيندا اونون اللها و اونون قودرتينه ميثيلسيز، صميمي ايماني و اينامي دوروردو. اونون تفککورونو ايشيقلانديران و آيدينلاشديران بو ايمان ايدي، الله ا حودودسوز و شريکسيز بير سئوگيسي ايدي. الله سئوگيسي نسيمي اوچون هر شئيدير. شاعير الله دان و اونون ايقراريندان باشقا هئچ نه ايستمير.. اونون مؤعجيزه يه اوخشايان بيان شعرلري خوصوصي بير روحي وضعيتين عکسيدير: بو حالدا الله سئوگيسي اونون بوتون وارليغينا حاکيم کسيليردي، اونون عاغليني و ايلهاميني ايشيقلانديريردي، فيکريني ميثيلسيز درجه ده ايتيلشديريردي.