صمد یهرنگي چاغداش گونئي آذربايجان اوشاق ادبياتينين ياراديجيسيدير

 


Doç.Dr.ESMİRA FUAD

دوچنت دکتر اسميرا فواد 

 

"يوخ آنا، من آرتيق بو گزيلردن بئزميشم. من گئتمک ايسته‌ييرم. يقين فيکيرلشه‌جکسن کي، بو سؤزلري منه کيمسه اؤيره‌ديب. ائله دئييل، آنا جان، من چوخدان بو فيکيرديم. آنجاق باشقالاريندان دا چوخ شئيلر اؤيرنميشم. مثلا، گؤرموشم کي، بير چوخ باليقلار ياشلانديقدان سونرا گيلئيله‌نيرلر کي، عؤمورلريني معناسيز کئچيرميش، چوروموشلر. بيلمک ايسته‌ييرم کي، دوغرودانمي ياشاييش ائله داريسقال بير موحيطده چابالاييب ياشلانماقدير، يوخسا باشقا تور (جور) ده ياشاماق مومکوندور؟.. (صمد یهرنگي. "بالاجا قارا باليق" حکایه سيندن...)"

عئينن بو اؤرنکده "بالاجا قارا باليق" حکایه سينين قهرمانينين دئديگي کيمي، عؤمرونو باشقا تورلو ياشاماق-معنالي کئچيرمک، "گونئي آذربايجان کندليلرينين جانلي ديلي، سورگونه دوشموش گلنکلرين اوياق ويجداني، "حئيدربابايا سالام"اين سطيرلري آراسيندا دونيايا آياق آچيب، ساوالانا، خالخالا طرف اوز توتان گزرگي بير اؤيرتمن (جلال آل احمد)" و قلم اهلي اولماق، "دوزو-دوز، اَيريني-اَيري" يازاراق خالقي جهالت يوخوسوندان اوياتماق، اونو خوشبخت گؤرمک اوچون دونيايا گلدي بؤيوک صمد یهرنگي... ياشاديغي معنالي عؤمور پايي ايله تانرينين گونئي خالقينا-اينسانليغا بخش ائتديگي اؤزل بير ناخيش اولدو...

هيجري 6 شهريوئر 1318-جي ايل//24 اييون 1939-جو ايلده دوغولدو دونيانين مؤعجيزه شهرلري سيراسيندا اؤز يئري اولان قديم تبريزده... آتاسي عزت کيشي ساده زحمت آدامي-ائولر، مئهمانخانالارا، چايخانا و ايداره‌لره تولوقدا سو داشييان تولوقچو، آناسي سارا خانيم ايسه ائودار قادين ايدي. لاکين بئش ائولادي-ايکي قيزي، اوچ اوغلو ايچريسينده کيچيک سمه‌دي داها چوخ عزيزليه‌رک "قارابالا" چاغيران ايززت کيشي او، دوغولاندان بير گون اؤنجه اربابلا دالاشديغينا گؤره ايشدن چيخاريلميشدي. صاحيبکارا بويون اَيمک ايستمه‌يهن غورورلو آتا يئنه ده اربابلا سؤزلشميش، حاقسيزليغينا دؤزه بيلممشدي... آناسي سارانين اريني: "فيلانکس بير ايش يئرينده 4 ايلدير ايشله‌يير، آنجاق هئچ واخت اربابلا دالاشماييب. سن ايسه ايل قورتارماميش ايشدن چيخاريليرسان" ،- سوچلاماسينين جاوابيندا ايززت کيشي: "من باشقالاري کيمي اربابا يالتاقلانا بيلمرم. کيملردنسه جسوسلوق ائتمگي باجارمارام. ائله دالاشماغيميز دا بونا گؤره‌دير" ،- دئميشدي... صمد بو ار کيشينين، منليگيني هر شئيدن اوجا توتان نر آتانين تربييه‌سي آلتيندا بؤيويور، تؤکدوکلريني ييغا-ييغا مکتب ياشينا چاتير..

ايلک و اورتا تحصيليني تبريز شهرينده‌کي"دبیريستان تربييت و دانشسراي" کيمي تانينان مشهور مکتبده آلير. عاييله چتينليکله دولانديغيندان بؤيوک قارداشي اسد کيمي، صمد ده تحصيليني عالي مکتبلرده دئييل، تبريز پئداقوژي کوللئجينده داوام ائتديرير. اؤيرنجيليک چاغلاريندا او، بوش واختلاريني ثمرهسيز کئچيرمير، بير نئچه يولداشي ايله بيرليکده "خنده" ("گولوش") آدلي هفته‌ليک ديوار قزئتي بوراخماغا نايل اولور. ادبي-تنقيدي خاراکتئرلي، ساتيريک روحلو ايلک يازيلاري دا محض طلبه‌ليک ايللرينين، چيلغين گنجليک دؤورونون محصوللاريدير. اوشاقليق و يئنييئتمه‌ليک چاغلاريندان ايجتيماي-سياسي، معنوي-ايدئولوژي پروسئسلري ياخيندان ايزله‌ييب دريندن موشاهيده ائدن گله‌جک اديبين بو مؤوضولو قلم محصوللاري سونرالار دؤورونون بير سيرا تانينميش قزئت و ژورناللاريندا "س.قارانقوش" ،"چينگيز" ،"بابک" ،"یهرنگ" ،"س.آدام" ،"سولما" و س. تاخما آد-ايمضالارلا چاپ ائتديرير. ائله همين چاغلاردان دا او، يالنيز گئرچکلري، ياشاديقلاريني و ياشامي بويونجا گؤردوکلريني "دوزو-دوز، اَيريني-اَيري" يازماغا باشلايير. تئخنيکومو بيتيرديکده آذرشهر-توفارقان بؤلگه‌سينين گؤزدن اوزاق، کؤنولدن ايراق، اوجقار بير کند مکتبينه - ماماغان (گوغان)ا موعليم ايشله‌مه‌يه گؤندريلير. هر بير سوسيال اينکيشافدان، يئنيليکلردن گئريده قالميش کندي صمد اؤزونمخسوس شکيلده "تانرينين بئله اونوتدوغو يئر" آدلانديرميشدي...

اوسته ليک، "تانرينين بئله اونوتدوغو بو يئر"لرده سياسي قاداغالار، سرت قايدالار، کسکين سئنزورا شراييطي حؤکم سوروردو. بو قاداغالار، اونودولان و اونوتدورولان يئرلرين ازه‌لي ساکينلرينين آغريلاري، پروبلئملري، ادبي-ايدئولوژي موناقيشه‌لر، گونئيده کوتلوي دوشونجه فعالليغينا، ميللي تفککورون فورمالاشماسينا نايل اولماغين يوللاري و س. سمه‌دين کيچيکياشليلار آدينا يازديغي، لاکين اساسن بؤيوکلره اونوانلانان بير سيرا بديعي اثرلرينين ده مؤوزوسونا چئوريلير. 
ماماغان کند مکتبينده درس دئديگي ايللرده صمد دايم تحصيليني داوام ائتديرمک باره‌ده دوشونور، آرزوسونو گئرچکلشديره‌جگي آني گؤزله‌يير... و همين آنين گليشي اوزون سورمور و 1956-جي ايلده تبريز اونيوئرسيتئتينين فيلولوگييا فاکولته‌سينين اينگيليس ديلي و ادبياتي بؤلومونه (غيابي) داخيل اولور، 1961-جي ايلده اونيوئرسيتئتي بيتيرير و اينگيليس ديلي و ادبياتي اوزره فيلولوق، عئيني زاماندا عالي درجه‌لي موعليم ايختيصاصينا يييله‌نير...

صمد یهرنگي بوندان سونرا بوتون شوورلو عؤمرونو کؤرپه‌لر، اؤلکه‌نين گله‌جگينين قوروجولاري اولاجاق اوشاقلارا هسر ائدير. اونلارين ساوادلانماسي و ادبياتي اؤيرنه‌رک اسل اينسان، ائلين دردلرينه ملهم اولا بيله‌جک بير وطنداش کيمي بؤيومه‌سي قايغيسينا قالير... اوشاقلارا دايم قورخماز و بيليکلي-بيلگين اولماغي، حاقيني طلب ائتمگي، حاقسيزليق، عدالتسيزليک قارشيسيندا يئنيلممگي تؤوسييه ائدير... اثرلرينده ده اوشاقلارين ياشانتيلاريني، آذربايجانين، ائلجه ده ايراندا ياشايان ديگر خالقلارين درد و پروبلئملريني قلمه آلير، کؤرپه فيدانلارا آنلاديردي کي: "سيلله‌يه سيلله ايله جاواب وئرمک، اؤز حاقيني سون داملاسينا کيمي آلماق گرکدير..."

"اولدوزلا دانيشان گلينجيک" اؤيکوسونده ايسه او، کاسيب، يوخسول طبقه‌نين طرفينده اولدوغونو، اونلاري دوشوندويونو اولدوزون ديلي ايله بئله ايفاده ائدير: "منيم ناغيليمي يوخسول، ناز-نعمتدن محروم اولان اوشاقلار اوچون يازين..."

وار-گوجو ايله چاليشير کي، سويداشلاري آراسيندا مؤوجود اولان کوتلوي ساوادسيزليغي آرادان قالديرسين. تصادوفي دئييل کي، مجيد تبريزيوند اونون ادبي-بديعي ياراديجيليغا ساوادسيز کندليلر اوچون عريضه يازماقلا باشلاديغيني قئيد ائديب... 

صمد آريق، سيسقا بير گنج اولماسينا باخماياراق غئيري-عادي گوج، ائنئرژي ايله چيينينده اولاغان اوستو معاريفچيليک ميسسيياسي داشيييردي. سويداشلارينين جهالت يوخوسوندان اويانماسي، هئچ دئييلس، اؤز عريضه‌سيني يازا بيلمه‌سي سويييه‌سينده ده اولسا، ساوادلانماسي اوچون هر آي آيليق ماعاشينين چوخونو موختليف کيتابلار آلماغا خرجله‌يير، چيينينده کيتاب دولو هئيبه کند به کند، ائوبئو گزه‌رک پايلايير، مکتبياشلي اوشاقلاري ايسه هديه ائتديگي کيتابلارلا داها چوخ سئوينديريردي... او، اؤيرنجيلري ايله بير دوست-آرخاداش کيمي داورانير، هر ايشده اونلارلا بيرگه حرکت ائده‌رک يانلاريندا اولور، کيچيک سويداشلاريني حقيقتي، دوغرو يولو سئچمه‌يه يؤنلنديريردي. او، سانکي اؤيرتمک، خالقين بالالارينا، يئنييئتمه و گنجلرينه دوزگون يول گؤسترمک، اونلاري سئومک اوچون دوغولموشدو... بؤيوک پئداقوقون خاراکتئرينده‌کيبو عوضسيز جهتي يازار دوستو غلامحسين ساعدي ده تصديقله‌ييردي: صمد "بوش واختلاريندا ساعاتلارلا کيتاب ماغازالارينين قارشيسيني کسديرر، کيتاب سئچميه گلن يئنييئتمه‌لره بيلگيلر وئرردي. درس دئديگي مکتبده اؤيرنجيلرله ال-اله وئريب گؤزل بير کيتاب ائوي دوزلتميشدي…"

بؤيوک شاعير مفتون اميني يازيردي کي، او، اوشاقلارا آتادان و آنادان داها مئهريبان ايدي. حتّي اوشاقلار هئچ بير شئيده اوندان چکينميرديلر... يني، صمد اونلارين سيرداشي، دردداشي، فيکير اورتاغي اولماغي دا باجارميشدي... 
بو، دانيلماز بير گئرچکدير کي، صمد یهرنگي "ياشاييشيندا دا، درس اوتاغيندا دا، يازي ماساسينين آرخاسيندا دا، اؤز ادبي دونياسيندا دا، هر شئيدن اؤنجه اؤيرتمن ايدي (عبدالله امير هاشيمي جاوانشير)". چيينينده اؤز آيليق ماعاشي ايله آلديغي و اوشاقلارا-شاگيردلرينه پايلاياجاغي موختليف کيتابلار، بديعي اثرلر، ناغيل و داستانلار دولو هئيبحثي، گؤزلرينده صاباحا ديبسيز سئوگي، اوزونده ايسه چوخ واخت گولوش اولان بو عئينکلي، فداکار موعليم هر بير سويداشينين سئويمليسي، ياخين دوستو ايدي...

او، ياساق اولونموش آنا ديليني اوغروندا اؤله‌جک قدر چوخ سئويردي... آنا ديلينده تحصيل آلماق ايمکانينين اولماماسي و بو دورومدان چيخيش يوللارينين آختاريلماسي مسلسي صمد یهرنگيني ان چوخ دوشوندورن پروبلئملردن بيري ايدي. اؤز دؤورونده بو پروبلئمين چيخيش يوللاريندان بيري کيمي آنا ديلينده درسليکلرين يازيليب چاپ ائديلمه‌سيند، آنا ديلينده مدرسه‌لرين آچيلماسيندا گؤروردو. صمد یهرنگي مير مئهدي اعتيماد، ميرزه حسن روشدييي، حبيب ساهير کيمي اؤندرلرين قوتسال ايشيني داوام ائتديرمه‌يه قالخيشدي، اوشاقلارين آنلايا بيله‌جگي ساده تورکجه‌ده "اليفبا" کيتابي يازدي، لاکين ايرانين رسمي قوروملاري بو درسليگين چاپينا ايجازه وئرمه‌دي و ايسلام-اي ايرشاد ايداره‌سي طرفيندن گئري قايتاريلدي... بو اعتيراضين اساس سببي ايسه آذربايجان تورکلرينين آنا ديلينده تحصيل آلماسينين قارشيسينا چکيلن کئچيلمز سدد ايدي. بو آدديمي سمه‌دين بؤيوک قارداشي اسد یهرنگي واختيله سياسي آکت کيمي قييمتلنديرميشدي. چونکي قارداشينين اونا اونوانلاديغي: "من ايمضامي خالقين ذهنينه جفنگييات وئرن بير چوخ مؤليفلر کيمي کيتابين اوستونه يازا بيلمرم. من عؤمرومده بيرجه دفعه ده اولسون "ش" حرفيني اوشاقلارا "شاه" سؤزو ايله اؤيرتمه‌ميشم. "شاهبانو" و "وليهد" سؤزلرينين اوستوندن آتيليب کئچميشم. من کيتابيمين بيرينجي صحيفه سيني اونلارا نئجه هسر ائده بيلرم؟ قوي ائويميزين دامي اوچسون. من "ش" حرفيني "شاه" ،"شاهبانو" سؤزلري ايل، "ه" حرفيني "وليهد"کلمه‌سي ايله اؤيره‌ده بيلمرم. بلي، قارداشيم، اونلار منه بونو تکليف ائديرديلر. دئ گؤروم، نه ائتمه‌لييم؟ بوتون حقيقتلري و شرفيمي بو کيتابين يولوندامي قويوم؟ بس اوندا شاگيردلريم، اوشاقلارا نه جاواب وئره بيلرم؟ "24 ساات يوخودا و آييقليقدا" حکایه مي مشغوليت اوچون يازماميشام. اونا گؤره يازميشام کي، سن دونيانين هر يئرينده ياشايان اؤز بالاجا قارداشلاريني ياخشي تانيياسان. اونلارين دردلرينين چاره‌سي حاقيندا دوشونه‌سن..." - سؤزلريند، طبيعي، همين قاداغانين سيرري و هانسي مطلبين گيزلنديگي آيدين اولور...

البتت، اديبين آرايا-عرصه يه "باياتيلار" ،"اوشاق ادبياتينين اؤنمي" ،"ايرانين طبيعتي مساينينده آراشديرما" ،"پارا-پارالار" ،"آذربايجان افسانه‌لري" ،"آذربايجان اوشاقلاري اوچون فارسي اليفبا" ،"تاپماجالار، قوشماجالار" ،"آذربايجان و مشروطه" ،"فولکلور و شعر" ،"مقاله‌لر توپلوسو" کيمي کيتابلاري سيراسيندا بو گونه‌دهک چاپ اولونماميش همين "اليفبا" کيتابي دا واردير. "ميللي مدنيتينين اوياق ويجداني" ،گونئي آذربايجان "کندليلرينين جانلي ديلي" اولماغي باجاران صمد یهرنگي اينگيليس و فارس ديلينده اولان بعضي ادبيات نومونه‌لريني تورکجه‌يه چئويرمکله ده اوغراشير. عئيني زاماندا مئهدي اخوان ساليس، احمد شاملو، نيما يوشيج، فوروغ فوروخزاد و باشقا شاعيرلرين شعرلريندن سئچمه‌لري آذربايجان تورکجه‌سينين تبريز شيوه‌سينه چئويره‌رک سويداشلارينا سونور. ميللي تفککورون، مييلي يادداش کودلارينين فولکلور قايناقلاريندا قورونوب ساخلانديغيني ياخشي بيلن صمد یهرنگي قوتسال بير يول دا توتموشدو - کند-کند، اوبا-اوبا دولاشاراق خالق ادبييياتي نومونه‌لريني توپلايير، بو قييمتلي اينجيلرين يازييا آليناراق قورونماسي قايغيسينا قاليردي. آنجاق بو ايش، "توپلاييجيليق فعاليتي اديب اوچون هئچ ده آسان اولماييب. پهلوي رئژيمينين ياراتديغي تهلوکه‌لر، سؤيلگيجيلرين داها چوخ قادينلار اولماسي، بو باخيمدان اونلارلا صؤحبتلرين آپاريلماماسي و س. (م.عباسووا. خالق جبهه سي.- 2015.- 4 مارت.- ص.14)" توپلاما ايشينده ميلت و يورد سئوداليسينا خوصوصي چتينليکلر ياراديردي. سونرالار اؤيرنجيلريندن بيري - اي.د.ماماغاني موعليمينين بو فداکارليغيني بئله خاطيرلايير: "صمد یهرنگي تتيل گونلرينده بيزه گه‌لر، هر گئجه يئمکدن سونرا آنامين ناغيل سؤيله‌مه‌سيني صبرسيزليکله گؤزله‌يردي. لاکين آنام بو ناغيللاري منه دانيشار، صمد موعليم ايسه شاگيرديني تکرار دينله‌مکله اونلاري يازييا آلاردي". 

آذربايجان ناغيللاريني توپلاياراق فارس ديلينه چئويرير و ياخين دوستو، مسلکداشي یهروز دهقاني ايله بيرليکده چاپ ائتديريب آذربايجان شيفاهي خالق ادبياتي خزينه‌سينين قاپيلاريني فارسديللي اوخوجولارين اوزونه آچير. صمد یهرنگي کاميل پئداقوق اولماقلا ياناشي، هم ده اوريژينال دست-خطه ماليک ايستعدادلي اؤيکو يازاري، ييرمي عصر ايران و آذربايجان ادبياتينين ان گؤرکملي آدلاريندان بيري ايدي. گونئي آذربايجاندا چاغداش دؤور اوشاق ادبياتينين يارانماسي و گليشمه‌سي محض اونون شرفلي آدي ايله باغليدير.

اوشاقلار اوچون ناغيللار، همچنين باش قهرمانلاري اساسن اونسيتده اولدوغو شاگيردلري اولان و اونلارين باشينا گلن اولايلاردان بحث ائدن سون درجه ماراقلي اؤيکولر قلمه آلير، اؤزلليکله "آللئقورييا و تشخيصلره يئر وئرمکله اؤرتولو شکيلده ان اوريژينال يوللا اؤز فيکير و دوشونجه‌لريني ياييردي (م.عباس اوا. خالق جبهه سي.- 2015.- 4 مارت.- ص.14)". "عادت" ،"بينام (آدسيز)" ،"نارينج قابيغي" ،"بالاجا قارا باليق" ،"اولدوز و قارغالار" ،"24 ساعات يوخودا و آييقليقدا" ،"چوغوندورساتان اوغلان" ،"بير هولو، مين هولو" ،"محبت ناغيلي" ،"تلخون" ،"لبو ساتان اوشاق" ،"قوجا آرواد و قيزيل جوجه‌سي" ،"کوروغلو و کئچل حمزه" ،"اولدوزلا دانيشان گلينجيک" ،"چوخ بختييار آغا" و س. کيمي حکایه لرينده او، بولاق سويو کيمي دومدورو، صاف اوشاق دونياسيندان بؤيوکلرين بولوندوغو عالمه بير پنجره آچير و آچديغي پنجره‌دن توپلومو بوتون چيزگيلري، آيرينتيلاري ايله ياشليلارين گؤزلري اؤنونده جانلانديريردي... و بؤيوکلر، ياشليلار دا همين اثرلره ماراق گؤستريرديلر... 

اثرلريني "بيز اوشاقلارا: - اوغورلوق ائتم، يالان دانيشما! - کيمي مصلحتلر وئرمک عوضين، اونلارين اوغرو اولمالارينين سببيني آچيب گؤسترمه‌ليگيک. چونکي اينسانلاري يئتيشديرن موحيطدير. ياخشي اينسان يئتيشديرمک ايسته‌ييريکس، موحيطي ده يئتيشديرمه‌لي و اينسانيلشديرملييک" ،- عقيده سي ايله يازيب-ياراديردي صمد یهرنگي... اوشاق طبيعتيني آنلايان تجروبه‌لي پئداقوق کيمي کؤرپه فيدانلارا يالنيز دوغرويا اينام، حقيقته سئوگي، شر، پيسلييه و خيانت، آغا قارا، يالانا حقيقت، گؤز ياشلاريني سئوينج شلاله‌سي، هيچقيريغي گولوش، محروميتلري تانرينين قيسمتي کيمي کيمي قلمه وئرنلره نيفرت آشيلاييردي. بو نيفرتين اونلارين ياشامي اوچون، ياخشيني پيسدن آييرا بيلمه‌سي اوچون گرکلي اولدوغونو دوشونوردو.

دوکتور منوچؤهر هزارخاني "بالاجا قارا باليغين دونياگؤروشو" آدلي مقاله‌سينده يازير کي، "یهرنگينين اوشاقلارا اؤيرتديگي نيفرت (گر او، اؤيرتمه‌سه،حيات اؤزو اؤيرده‌جکدير) اينساني بير نيفرتدير. پيسليي، خيانت، پيسلره و خبيسلره نيفرتدير. صونعي و ساختا سئوگي و محبتين مبلليغلري ايکي مين ايلدير کي، مثلاي اؤرت-باسدير ائتمک اوچون بيهوده سي گؤستريرلر. لاکين بير دفعه بئله، اونو منطيقي شکيلده حلل ائتمک فيکرينده اولماميشلار..."

صمد اؤز خالقينين پروانه‌سي ايدي. اثرلريني فارس ديلينده قلمه آلير، ائلين ياراتديغي آغيز ادبياتي نومونه‌لريني ده فارس ديلينه چئويرير، بو ديلين اوخوجولارينا گؤستريردي کي، اونون دا خالقينين آنا ديلينده-آذربايجان تورکجه‌سينده زنگين ادبياتي، بؤيوک مدنيتي واردير. ادبيات اونون اوچون ظولم و حاقسيزليق، جهالت و نادانليق عليه ينه ان اعتيبارلي موباريزه سيلاهي، خالقي جهالت يوخوسوندان اوياتماق سيلاهي ايدي. اثرلرينه گوجلو يانغي، اؤلسييه سئوگي و او درجه‌ده ده نيفرت حيس اي حاکيمدير. نيفرت و محبت ياراتديغي ادبياتين-اؤيکو و مقاله‌لرينين گؤزلليک مئياري ايدي... شاهيدي و ايشتيراکچيسي اولدوغو، بوتون روحونو قارسان اولايلاري اثرلرينه مؤوزو و موتيو سئچن يازارين دوشونجه‌سينه گؤر، "گرک اؤزونو اودا آتاسان کي، يانميشلارين درديندن خبرين اولا. تونقالدا کناردان اليني قيزديرماقلا يانميشلارين نه‌لر چکديگيني آنلاماق مومکون دئييل..." 

بو پرينسيپلرله ياشايان یهرنگي ياراديجيليغينين آنا خطي گونئي آذربايجان کندينين گئرچکليکلري، بو کندده ياشايان خالقين ياشامي، پروبلئم و آغريلاري، وطن سئوگيسي، اؤزگورلوک، ميللي بيرليک، ميللي حاق و حوقوقلارين قازانيلماسينين گرکليگي، دوزلوک و دوغرولوق، وفا و اعتيبار، ائشدئشليک-قارداشليق کيمي مسله‌لر ايدي... او، لاقئيدليگي ان بؤيوک بلا سايير، حياتيني "سسسيز گؤل کيمي" کئچيرن، يالنيز "قوي من ساليم اولوم، اؤزگه‌لر ايله ندير کاريم؟" پرينسيپي ايله ياشايان و "دينج ياشاييشينين پوزولماسيني ايستمه‌ين باشياشاغي، يولاگئدن" زومره‌لري، اوزده اؤزونو دينه اينانان کيمي گؤسترن، آنجاق رامازان آييندا جمعي اوچجه گون اوروج توتوب ناماز قيلان ساختاکار ديندارلاري، توتدوغو مأمور پوستونو ايتيرمه‌مه‌سي اوچون شرف و لياقتيني ايتيريب صاحيبينين قولونا چئوريلن مسلکسيزلري تنقيد حدفينه چئويريردي. "چوخ بختييار آغا" حکایه سينين قهرماني محض بئله تيپلردن بيريدير.

اديبين ليريک احوالي-روحيييه‌ده يازديغي و منصور شعر تاثيري باغيشلايان "قار دنجيکلري" مينيمال حکایه سينده ده اوخوجو گئرچکلرين آيرينتيلارينا وارماقلا ياناشي، يازارين ايچ دونياسي، کؤورک دويغولاري ايله ده باش-باشا قالير... قار دنه‌سينين طالعيينده حوقوقلاري اليندن آلينميش و هئگئمون دؤولتلرين ايداره‌سينده اريگيب يوخ اولماق تهلوکه‌سي ايله اوز-اوزه قالان خالقلارين طالعييني گؤرور، بو قدردن قاچماغين چيخيش يوللاريني دوشونوردو...

"آليشقانليق" حکایه سينده صمد یهرنگينين نؤوبتي تنقيد حدفي ساوادسيز، مکتبده گونونو شاگيردلره بيليک عوضين، معناسيز، جفنگ، توتاق کي، شوشه‌نين رنگي ندير؟ – کيمي سواللار وئره‌رک بوتون درس بويو جاوابيني گؤزله‌مکله واختيني اؤلدورن، شاگيردلرسه اولمايان دوغرو جاوابي بيلمه‌ديکد، بوتون سينفي آشاغي سويييه‌لي کيمي قييمتلنديره‌رک ديرئکتورا شيکايت ائدن و اؤزونو بيليکلي گؤسترن ديپلوملو شارلاتانلاردير. صمد دريندن تأسوفله‌نير کي، بئله ياشاييشا آليشميش سويييه‌سيزلر ده موعليم آديني داشييير، عؤمرونو اوشاقلارا جفنگيات دانيشماقلا باشا وورور، خالقين کاسيبچيليقلا، بير قارين آج، بير قارين توخ بؤيوتدويو و مکتبه گتيريب اونا اعتيبار ائتديگي بالالاريني منن شيکست ائديرلر: "بئلنجيک ايشلره و سؤزلره اؤيرتمن آليشدي: بو تور درس وئرمه‌يه، بالاجا اوشاقلاري آياقيالين، قيچي آچيق گؤرمه‌يه، اونلارين اوخولا گلنده ياشلي گؤزلرينه باخماغا، ايش يئرينين زيرت-پيرتينا... ايدمان ساعاتلاريندا ايکي دنه جيريق توپو اللي دنه اؤيرنجينين قاباغينا آتيردي کي، ايدمان ائلسينلر. بئلج، اوندا هر شئيه آليشقانليق اولدو. اوشاقلارا، اونلار کي، هله بيلميرديلر شيشه‌نين بوياغينين رنگي ندير؟.."

"آه-اين ناغيلي" عاييله سيني سئون، اوچ قيزينين قايغيسينا قالان و اونلارين ايستکلريني يئرينه يئتيرن جفاکئش بير آتانين عاغيللي، فراستلي کيچيک قيزينين نفسينين قولو اولان خبيس اينسانلارين بدبختلييه سوروکله‌ديگي نئچه-نئچه اينساني سِحر و افسونون کؤمگيله اولکي خوشبخت حياتينا قايتارديغيندان بحث ائدير. اوستاد يازار "تلخون" پووئستينده بو مؤوزونو داها دا گئنيشلنديرير و بو دفعه تاجير آتانين يئددي قيزينين آرزوسونو نئجه گئرچکلشديرمه‌سيندن سؤز آچير. کيچيک قيز تلخونون آتاسيندان "بير اورک، بير جيير" ايستگي فولکلورا سؤيک چوخ درين معنالاري اؤزونده احتيوا ائدير. صمد بو ايستکله اوشاق و گنجلره اورکلي، جسارتلي اولماق، آغجيير، قورخاق اولماماق و موباريزه‌لرده اودماق، ايگيد بير دفعه،قورخاقلارسا گونده نئچه دفعه اؤلوب-ديريلر، ايسماريجيني يوللاييردي... 

"آدسيز" حکایه سينده اينسانين بللي بير آدلا چاغيريلماسينين گرکليليگي، اؤزونون ده داشيديغي آدينا لاييق اولماسي مسلسيني اساس گؤتورن صمد یهرنگي جاهيلليک گيردابيندا چابالايان سويداشلاريني سابير، ميرزه جليل ساياغي گوله-گوله تربييه ائتمک، اونلارين گؤزونو آچماق و گئرچکلري گؤسترمک يولونو توتموشدور. آروادي طرفيندن باشقا بيريسي ايله آلداديلان کيشينين جاهيلليگينه آجييان مؤليف گوله-گوله اونا گئرچکلري آنلاتماق ايسته‌يير و اثرين سونوندا اؤز ائوينين قاپيسيني دؤين "آدسيز"اين آروادينين "دئ گؤروم آدين ندير؟ آديني دئمه‌سن سني ايچري بوراخان دئييلم" سوالي قارشيسيندا دوشوندوکلري اونون نه درجه‌ده جاهيل و بدبخت اولدوغونو يانسيدير: "دوغرودان دا آدي نه ايدي. بونو داها اوخوماميشدي. آديني اونوتموشدو. بلکي ده دوغولوشدان آدي يوخ ايدي. کشکه بو جور اولاردي، او آندا اوووناردي، اؤز-اؤزونه دييردي: بيزيم ائششگيميزين قودوقلوقدان قويروغو يوخ ايدي. آما بيليردي کي، نه واختسا آدي وار ايميش..."
"بالاجا قارا باليق" حکایه سينده "لوطفا مني تهقير ائتمگين! منيم آديم قاراجا باليقدير. سيز ده آدينيزي سؤيله‌سنيز تانيش اولاريق" ،فيکري ده اينسانين، ياخود هر بير جانلينين دوغولوشدان بللي بير آدي داشيمالي، هاردا اولورسا-اولسون، همين آدلا چاغيريلمالي اولدوغونون تصديقيدير...

چوخلاري کيمي، من ده بو فيکيرديم کي، يازار اصلينده اؤزونو، ياشاميني-باشينا گلن، گتيريلن اولايلاري يازير، وارليغييلا اؤيوندويو و سئوديگي اينسانلاري، غورور دويدوغو شخصيتلري، هئيراني اولدوغو دوغما طبيعت گؤزلليکلريني، بيرگه عؤمور سوردويو اورتامي وصف ائدير، شاعيرلر ايسه بوتون بو اؤزلليکلردن وجده گله‌رک اونلاري پوئتيک ووسعتله نظمه چکير... ايچ دونياسينين ساخلانجلارينين، ياشامي سوره‌سينده اوزلشديگي اولايلارين عکس-سداسي اولمايان اثرلر اوخوجونو اينانديرا بيلمير. سمه‌دين ده ياشامينين معناسي، اثرلرينين ايلهام قايناغي بو اؤزلليکلر، ان چوخ دا هر گون تماسدا اولدوغو اوشاقلار ايدي. او، يالنيز بطنيندن قوپدوغو خالقين طالعييني دوشونوردو. بو طالعيي صاباحين بؤيوکلري اولاجاق بالاجالار هلل ائده‌جگيندن اونون خوش گله‌جگه قوووشماسي اوچون ياشامين آغري-آجيلاريني محض بالاجالارين گؤزلري قارشيسيندا جانلانديرير، حياتين سيرلريني آنلاماقدا اونلارا يارديمچي اولوردو. بو يؤنلو دوشونجه‌لرينين يئر آلديغي ايلک قلم تجروبه‌لري - "عادت" و "بينام (آدسيز)" حکایه لري 1959-جو ايلده درج ائديلير... "بالاجا قارا باليق" حکایه سيني ايسه 1960-جي ايللرين اوللرينده آغ ورقلره کؤچورور... بو اؤيکو سمه‌ده بؤيوک اوغور گتيرير، ياشامينين مانيفئستينه دؤنوشور، آديني بير سيرا دونيا اؤلکه‌لرينده تانيدير...

بئله کي، اثر 1965-جي ايلده ايتالييانين بولونييا شهرينده کئچيريلن اوشاق ادبياتي اوزره بين الخالق فئستيوالين قاليبي اولور و قيزيل مئدالا لاييق گؤرولور. بيرينجي يئري توتدوغونا گؤره "بالاجا قارا باليق" حکایه سين، ائلجه ده گونئي آذربايجان ادبياتينا و خالقينا دونيا خالقلارينين ماراغي آرتير، اثر ايتاليان، فرانسيزاينگيليس و تورک ديللرينه چئوريله‌رک گئنيش تيراژلا نشر ائديلير.

تکجه او تايلي-بو تايلي آذربايجانين دئييل، خاريجي اؤلکه ادبياتشوناسلارينين دا يوکسک قييمتلنديرديکلري "بالاجا قارا باليق" حکایه سينين اؤزلليگي ايچينده ايشيق - يولگؤستريجيليک فونکسيياسي، دنيز فنري ستاتوسو داشيماسيدير... 

اوشاق ايکن: "آرخين سونو هارادير؟" – دئيه خياللارا دالان، "آنجاق آرخين باشلانغيجي، سونو اولماز، آرخ هر زامان آخار و هئچ يئره ده چاتماز" دوشونجه‌سيندن او يانا آدلايا بيلمه‌يهن آناسيندان، هر گون ناغيل سؤيله‌ديگي اون بير مين دوققوز يوز دوخسان دوققوز (کور اوغلونون 7777 دليسي يادا دوشمورمو؟)، ائلجه ده ميليونلارلا باليقدان - اصلينده سويداشلاريندان فرقلي اولاراق "دونيادا هر شئيين سونو يوخدورمو؟ گئجه ايله گوندوزون سونو وار؛ هفته‌نين، آيين، ايلين سونو وار، دئمه‌لي سولاريندا اوزدويوموز بو آرخين دا سونو وار!" قناعتينه گلن و سواللارينين جاوابيني بولماق اوچون صفره - آرزولارينين دالينجا گئديب بؤيوک دونيايا چيخماق ايسته‌ين قاراجا باليقدان...

اثر هانسي جهتلرينه گؤره بو گون ده اؤز آکتوالليغيني ساخلايير و سطيرالتيندا ساخلي بؤيوک معنالاري ايله ديقت چکير؟ اديب ايلک باشلانغيجدان وورغولايير کي، سوکونت مغلوبيتدير، حرکت ائتمک، موباريزه آپارماقسا ايستگينه نايل اولماغين ان کسه يولودور. دونياني، جوغرافييا علميني، هارادان گليب هارايا گئتديگيميزي، ايلکيميزي و سونوموزو اؤيرنمک، بيلمک لازيمدير،

يازان صمد اوشاقلارا قاراجا باليغين ديلي ايله اؤيره‌دير کي، "هر شئيين بير باشلانغيجي اولدوغو کيمي، سونو داوار. بوتون چايلار و آرخلار آخيب دنيزه تؤکولور. آنجاق بعضيلري ده باتاقليقلارا هوپور..."

آيين سؤيله‌ديکلرينه ااساسن ايسه ديقتي آي ايشيغينين نئجه يارانديغينا يؤنلدير: "سئوگيلي قاراجا باليق، منيم ايشيغيم يوخدور. من ايشيغي گونشدن آليب يئره گؤندريرم..." بو سؤزلردن سونرا اساس مطلبين اوزرينه گلير، اگر اينسان-سطيرالتيندا ايسه بير خالق (سارتده اولان گونئي تورکلري) اگر ايستس، هر شئي الده ائده بيلر: - سن هئچ بيليرسنمي کي، اينسانلار اوچوب گليب منيم اوزريمه قونماق ايسته‌ييرلر؟ چتين ايشدير، آنجاق اينسانلار ايسته‌ديکلري هر شئيي…"

 حياتا کئچيره بيلرلر، يئتر کي، ايسته‌سينلر...

جسارت و بيليک بوتون باغلي قاپيلاري اينسانين اوزونه آچير و موشکوللري آسانلاشديرير، - کيمي مطلبلري بالاجا قارا باليغين دوستلارينين فيکيرلري ايله کيچيکياشلي اوخوجولارينا چاتديرير: "سن بيزي جهالت يوخوسوندان اوياتدين. بيزيم عاغليميزا گلمه‌ين شئيلري سن بيزه اؤيرتدين. گؤروشمک اوزره قورخماز و بيلگين دوست!" 

وورغولاديغي اؤنملي مطلبلردن ديگريني ايسه سطيرالتي دئييل، آچيق شکيلده بيان ائدير: - گوج بيرليکده‌دير! صمد یهرنگي "ائل بير اولسا، ضربي کرن سينديرار" گئرچگيني باليقودان قوشونون: "...دنيز آختاريشيندا اولان باليقلار او قدر چوخالميشلار کي، باليقچيلار باليق توتماق اوچون دنيزه تور آتاندا تورو دارتيب باليقچيلارين اللريندن چيخارير و دنيزين ديبينه آپاريرلار" ،- سؤزلري ايله ادبي موستوييه گتيرير. ائل-اوبايا، خالقلارا بدبختليک، اؤلوم گتيرن قارا قوووه‌لرين، خبيسنيتلي اينسانلارين ايچ اوزونو آچير، اوشاقلارا بالاجا قارا باليغين ديلي ايله آنلادير کي، آزادليق وئريلمير، آلينير. بونون اوچون چابا گؤسترمک، پلانلي شکيلده حرکت ائتمک گرکدير: "آرخاداش، آغلاماق، آناني چاغيرماق چاره دئييلدير. قالخ و اؤز آزادليغينين اوغروندا فيکيرلش، بير ايش گؤر!.." 

حاکيم سينفين عصرلردن بري يوروتدويو "پارچالا، داخيلي ايغتيشاشلاري آلوولاندير، طريقت داوالارينا مئيدان وئر، اينسانلاري بير-بيرينين جانينا ساليشدير، راحاتجا حؤکم سور" سيياستينين داوام ائتديگينه باليقودانين "اؤزگورلوگونوزو قازانماق اوچون او قارا باليغي اؤلدورمه‌ليسينيز!" سؤزلري ايله ديقت چکن صمد یهرنگي وورغولايير کي، دوشمنين مکرلي سيياستينه اويماق اولماز: "کسينليکله اونون تکليفيني قبول ائتمگين. بو ريياکار باليقودان ايسته‌يير بيزي بير-بيريميزه اؤلدورتسون. منيم بير پلانيم وار…"

او، اوشاق صافليغي ايله دوشونور کي، حياتدا هر شئيين بير بد‌لي وار، اگر من (سطيرآلتيندا) هئچ کيمله دوشمنچيليک ائتميرمس، نه اوچون دوشمنچيليک و پيسليک گؤرمه‌لييم، ندن من "يئييلمه‌لييم؟": "باليقودان قوشون گوجو منه چاتارمي؟ آنجاق من کي اونا هئچ پيسليک ائتمه‌ميشم، بيزيم کي آراميزدا هئچ بير دوشمنچيليک يوخدور، ندن مني يئمک ايسته‌سين؟" 

يئرسيز لووغاليق و تکببور، خودبينليک، جاهيلليک، ساوادسيزليق بوتون بلالارين تؤره‌ديجيسي کيمي اونون اساس تنقيد حدفلري ايدي. اؤزلريني اسل-نجابتلي، اولو سويلو، بوتون ياراتيقلاردان گؤزل سايان چؤمچقويروقلارا جاوابيندا اونون تنقيد حدفيوه ايستگي بير داها آيدينلاشير: "سيزين اؤزونوزو بو قدر بينميش اولمانيزي هئچ عاغليما گتيرمزديم. آنجاق اولسون، من سيزي باغيشلاييرام. چونکي بوتون سؤيله‌ديک-لرينيز جهالتينيز و بيلگيسيزليگينيز اوزوندندير. جاهيل اولماسايدينيز، بيلردينيز کي، دونيادا سيزدن فرقلي چوخلاري وار کي، گؤرکملري اؤزلري اوچون چوخ دا سئويمليدير".

مؤوجود دورومدان عاغيللا دوشونوب چيخيش يولو تاپماغين دا مومکونلوگونو گؤسترير. "نييه مني ديري-ديري اودمورسونوز؟ من او باليق تورلريندنم کي، اؤلدوکدن سونرا بدنلري زهر تولوغونا دؤنور..." تدبيرلي و عاغيللي قاراجا باليغين قورغوسو ايشه يارايير. او، عاغيللا دوشونه‌رک باليقودان قوشون کيسه‌سيندن-اؤلومون پنجه‌سيندن، خيلاص اولور، آنجاق تاماميله قورتولا بيلمير، چونکي باليقودان قوش ايلديريم سورعتي ايله شيغيييب اونو يئنيدن اوولايير و ائله ديري-ديري اودور. ييرتيجي قوشون کيسه‌سينده اوولانميش چوخلو سايدا سويداشلاريني گؤرن قاراجا باليق "ناققاني اؤلدورمک و بوتون باليقلاري بو غدار هئيوانين تهلوکه‌سيندن قورتارماق ايستگي ايله" قيزبوغانين باغيشلاديغي قيلينجلا کيسه‌ني ييرتاراق سويداشلاريني خيلاص ائدير، اؤزو ايسه موعمالي شکيلده يوخا چيخير...

قيزبوغانين: "من آرتيق گئتمه‌لييم. چوجوقلاريم يوخودان اويانميشلار" ،باليقلاردان بيرينين ايسه "خانيم، اؤولاديني لازيمينجا تربييه ائتمميسن، ايندي ده جزاسيني چکيرسن" ،- فيکيرلري ايله واليدينلره اؤولادلاريني دوغرو-دوزگون تربييه ائتمگين، هر ايشدن اؤنجه اوشاغا محبت و شفقت گؤسترمگين گرک اولدوغونو خاطيرلاديردي...

اينسانلار اوچون، بطنيندن دوغولدوغو خالق، ائل اوچون گرکلي اولماق، عؤمرو معنالي ياشاماق، باشقالارينا فايدالي اولماق گئرچگيني آنلاديردي. ميللي حرکاتين مانيفئستي کيمي ديرلنديريلن "بالاجا قارا باليق" حکایه سينده ده بو تئندئنسييا قاباريقدير: "اؤلوم هر آن مني ياخالايا بيلر. آنجاق من باشارديغيم قدر ياشامالي، اؤلومدن قاچمالييام. آنجاق اؤلومله قارشيلاشا دا بيلرم. اؤنملي دئييل، اؤنملي اولان بودور کي، منيم حياتيم و يا اؤلوموم باشقالارينين حياتينا نئجه تاثير گؤستره‌جکدير..." صمد یهرنگي اؤرنک اولاسي ياشامي و اؤلومو ايله او تاثيري گؤستردي.

چوخ گنج چاغيندا، 29 ياشيندا، 1968-جي ايلين 31 آوقوست گونونده ايراندا، خومارلي ياشاييش منطقه سي ياخينليغيندا آراز چاييندا موعمالي شراييطده بوغولان صمدين ايران دؤولتينين گيزلي تشکيلاتي اولان ساواک طرفيندن اؤلدورولدويو گومان ائديلير. بو اؤلومو موعمالي، سيرلي ائدن، گومانا چئويرن، هم ده ندنلريني بليرله‌ين بير مقام اوزمگي باجارمايان سمه‌دين آراز چايينا چيممک اوچون (ؤزو ده آوقوستون سونوندا) باش وورماسي ايدي. ديگر مقام ايسه اوزمگي بيلن بير اؤيرتمه‌نين بو جور آسانليقلا چايدا بوغولماسيدير. حالبوکي اينسانلار بؤيوک آذربايجانين قوزئييندن گونئيينه بو چايين ايچريسيندن کئچيبلر... حاديثه بير، گومانلار مين اولور هميشه... آما صمدين ايمپئرييا گوجلرينين الي ايله 1828-جي ايلده تورکمنچاي "صولح" موقاويله‌سي آدي ايله ايکي يئره بؤلوشدورولموش آذربايجاني مکانجا هم آييران، هم ده بيرلشديرن بير چايدا-آرازدا بوغولماسي فاکتينين اؤزو عمللي-باشلي بير موعمادي... اينسانلارا و اوشاقلارا بيليک-ايشيق اؤتورن، اؤزو ده اونلاري جهالت و صفالتدن خيلاص يولونو گؤسترن ايشيغا چئوريلن سئويملي موعليملرينين اؤلومونه شاگيردلري هئچ وجهله اينانماديلار، بو حاديثه ني باهارين يئريني قيشين آلماسي، باهارلا برابر بولبولون اوچوب گئتمه‌سي و يئرينه لعنته گلميش قارغانين قونماسي کيمي اوبرازلاشديرديلار و گئتديگي يولا چيخيب گؤز ياشلاري ايچريسينده گونلرله اونون يولونو، گليشيني گؤزله‌ديلر... او ايسه گلمه‌دي... 

سمه‌دين بوتون خالقي گؤز ياشيندا بوغان و 31 آوقوست 1968-جي ايل تاريخينده گئرچکلشن اؤلوم اولايي ايله باغلي هر بير سويداشي کيمي بؤيوک بير فاجيعه ياشايان و بو خبره اينانا بيلمه‌ين ياخين دوستو، اونلو يازار جلال آل احمد يازيردي: "ايندي من نئجه اينانيم کي، صمد اؤلوبدور؟ اولمايا "بالاجا قارا باليق" يئنيدن دوغولماق اوچون آراز چايي ايله خزره قوووشوب؟ بير گلنگين، بير ديلين، بير اولوسون اورتاغي اولان چايدا بوغولوب صمد. مدينه موسلمانلار اوچون نئجه قوتسال ايديس، آراز دا صمد اوچون او قدر قوتسال ايدي". و صمد اونون نظرينده "تک باشينا بير خالقين آنا ديلينه اولان بورجونو اؤدمگي بوينونا گؤتورن" (وارليق، 1359 (1979)، سايي: 6، ص.73) بير يازار ايدي...

ماهمود دؤولتابادي اونونلا سون گؤروشونو بئله خاطيرلايير: "او گئتدي. دؤنوب آرخاسينجا باخديم. چييينلريني ساللاييب، باشيني آشاغي ديکميشدي، ياواش-ياواش اوزاقلاشير، سول يؤنه گئديردي. منسه دونوب قالميشديم، هارايا گئتديگيمي بيلميرديم…"
بلکه او دا عئينيله آراز چايينين کناريندا گئجه‌لر آيي، گوندوزلرسه گونشي قارشيلايان کندين "چايدا پالتار يويان قادين و قيزلارينين ماهنيلاريني دينله‌ديکدن، بير سوره ده چايدا چيمن اوشاقلارا تاماشا ائتديکدن سونرا يولچولوغونا داوام ائدن" قهرماني بالاجا قارا باليق کيمي يئني، داها بؤيوک دونياني آختارماغا، شاگيردلرينين مينلرله سوالينين دوغرو جاوابيني بولماغا گئتدي؟..

گئتدي، آما او، آرتيق اؤزونون نئچه-نئچه داوامچيسيني يئتيرميشدي، بالاجا قيرميزي باليق کيمي... ننه باليغين "بالاجا قارا باليق" ناغيليني دينله‌ديکدن سونرا ياتان "اون بير مين دوققوز يوز دوخسان دوققوز کيچيک باليغين ايچينده بوتون گئجه‌ني اوياق قالان و سحره‌دک يالنيز دنيزي دوشونن، يئني دونيايا چيخماق عشقي ايله يئرينده چابالايان بالاجا قيرميزي باليق کيمي... گئنيش دونيايا – آزادليغا چيخيش يولونو گؤسترن ايشيق کيمي...

"گؤبلک دوغولماميشام آتا-آناسيز، آنجاق گؤبلک کيمي گؤيرديم، آما گؤبلک کيمي تئز آياقدان دوشمه‌ديم. هر يئرده بير شئه واريديسا اؤزومه چکديم. مني سوواران اولمادي. گؤيرديم. اييده آغاجي کيمي اَيري-اويرو و آز سويا قانعولوب، آذربايجان کندلرينين اؤيرتمه‌ني اولدوم" ،- دئين صمد یهرنگينين اؤلوموندن آز کئچمير کي، هم ده اؤيرتمه‌ني اولدوغو عقيده داشلاري یهروز دهقاني، ح.ماناف فله‌کي،کاظيم سعادتي، اشرف دهقاني اونون اؤنرديگي يولو توتاراق "فدايان خلق-خالق فدايلري" تشکيلاتيني ياراداراق ميللي موباريزه‌يه باشلاييرلار...

او، اؤزوندن سونرا بئله سيلينمز ايز قويدو، ابدي اولاراق يادداشلارا، کؤنوللره کؤچدو. قوتسال عمللري و بنزرسيز اثرلري، درين ياشام فلسفه‌سي صمد یهرنگي يولونو-مکتبيني ياراتدي. بو فلسفه نئچه-نئچه اثرين، تدقيقاتلارين، کيتابلارين مؤوزوسونا چئوريلدي. عبدالله امير هاشيمي (جاوانشير)، غلامحسين سيدي، محمدعلي فزانه، احسان تبري، ماحمود دؤولت آبادي، عمر اؤزکان، مفتون اميني، ايسماييل اولکر (مد‌دي)، صابير نبي اوغلو (ميروو)، واقيف سولطانلي، غلامرضا صبري تبريزي و ب. گؤز ياشلارينني ايچينه آخيدا-آخيدا ديرلي يازيلار قلمه آلديلار، ايلقار الف اوغلو ايسه پووئست و حکایه لريني توپلاديغي "محبت ناغيلي" کيتابينا ديرلي اؤن سؤز (باکي: "آذرنشر" ،1984) يازدي... بولود قاراچورلو سهند "قوربانيمي قبول ائله آراز" ،اليرزا نابديل اوختاي "صمد کؤنلومده‌دير" ،ک.م.سؤنمز "ايکي صمد، ايکي طالع" ،م.ق.قافلانتي "من آرازام" شعرلريني، حسين دوزگون ايسه "صمد یهرنگي" پوئماسيني اونون عزيز خاطيره‌سينه حسر ائتديلر... 

دوشونورم کي، بؤيوک صمد یهرنگييه هسر ائديلميش شعر، ائلئگييا و مقاله‌لرده‌کيفيکيرلرين ان بيتکين، قاپساملي پوئتيک ايفاده‌سي بولود قاراچورلو سهندين "ائلين ديرلي بالاسينين" فاجيعه لي اؤلوموندن اون گون سونرا، 6 سئنتيابر 1968-جي ايلده يانا-يانا يازديغي "قوربانيني قبول ائيل، آراز!" آدلي آغي، هم ده عوصيان شعرينده يانسييير:

صمد! کيمي چاغيريم؟

نه قدر باغيريم، صمد! 

نه يازيم صمد؟! 

دنلي خرمه‌نيمين يانماسين يازيم؟ 

سرين سو کوزمين جالانماسين يازيم؟

داغلي سينمين آلوولانماسين يازيم؟

من سنه نه يازيم صمد؟

حسرتيم کيمي ياخاجاق؟

گؤز ياشيما کيم باخاجاق؟ 

آراز يئنه ده آخاجاق!

 سؤيله من، سؤيله آراز! 

ندن بيزله اولدون بئله آراز؟

کسدين ايکي قارداش آراسين

آلدين موغان’ين "سارا"سين

بوغدون ائليمين ديرلي بالاسين! 

بسدير! بسدير!

قوربانيمي قبول ائله آراز... 

Description: images (2)آرازين نؤوبتي سيرادان بيري دئييلدي... بو دفعه کي قوربان ييرمي عصر آذربايجان اوشاق ادبياتينين گؤرکملي ياراديجيلاريندان بيري، حکايه و پووئست يازاري، خالقينين، آنا ديلينين و اودلار يوردونون پروانه‌سي، آزادليق فدايسي، ادبياتشوناس، کاميل پئداقوق، پوبليسيست، ترجومه‌چي، اوشاقلارين "اوستاد" دئييب سئوديکلري، گئديشي ايله اونلاري يئتيم قويان معنوي آتا، غيري-عادي ايستعداد و ذکا صاحيبي صمد یهرنگي ايدي... آديني و سوياديني داشيماقدان بو گون مينلرله داوامچيسينين شرف دويدوغو موعليم-اينسان ايدي... گؤره‌سن آراز قوربانينا يئنه‌دمي: "آراز اوسته، بوز اوسته، کاباب يانار کؤز اوست، صمدي اؤلدوردولر، دانيشديغي سؤز اوسته!" - دئييب گؤز ياشلارييلا اونا لايلا دئيير؟!..