دوشوندورن شاعير Düşündürən şair (Bəxtiyar Vahabzadə)

 

 

Prof .Maarifə Haciyeva

پروفسور دکتر معارفه حاجی اووا

آذربايجانين اونلو و سئويلن شاعيري بختیار واهابزاده (1925-2009) شعيرلرينين بيرينده 

ياشاماق يانماقدير، ياناسان گرک، 

حياتين معناسي يالنيز اوندادير. 

شام اگر يانميرسا، ياشامير دئمک، 

اونون ياشاماسي يانماغيندادير دئيير.

 
گئرچکدن ده، زامان-زامان خالقينين آلين يازيسيني، طالعييني دوشونه‌رک، خالقينين ميللي حاقي و گله‌جگي آدينا ياشاديغي توتاليتار سووئت رئژيمي ايچريسينده حاقسيزليق و عدالتسيزليکله موباريزه‌يه گيرميش، حاقيني آلماديقجا يانيب-ياخيلميش، شام کيمي داملا-داملا گؤز ياشي تؤکموشدور. اونا گؤره شامين يانماسي ياشاماق علامتي اولدوغو کيمي، اينسانوغلونون دا دوشونه-دوشون، شام کيمي يانا-يانا، يانديقجا ارييه-ارييه ياشاماسي دا بشر اؤولادينين ياشاماق پاسپورتودور. 
باشقا بير شعرينده ده

ياراديبدير اينام مني، 


من اينامين اؤولادييام
دئميشدير بؤيوک موتفککير شاعيرب.واهابزاده. 
بئله مودريک دوشونجه طرزي شاعيرين بوتون ياراديجيليغي اوچون خاراکتئريکدير و اسرلرينين آنا خطي ايچيندن کئچن بير سونلوقدور.

ب.واهابزاده بوتون اثرلريندخالقينين درد-سريني، طالعييني، تاريخيني اؤن پلانا چکميش، مومکون اولان بوتون ادبي اوصوللاردان ايستيفاده ائده‌رک قاداغالارين حؤکم سوردويو سووئت رئژيمي سيستئمينده سيستئمينین اصل سيماسيني آچيب گؤسترمه‌يه چاليشميشدير. شاعير سووئتلربيرليگي دؤنمينده 70 ايل داوام ائدن توتاليتار رئژيمده و سيياسي قاداغالارين حؤکم سوردويو بير سيستئمده «اؤز سروتي اؤزونه قنيم اولموش» آذربايجان خالقينين ثروت و لياقتينين، ديل و شرفينين تاپدالانماسيني اثرلرينده عکس ائتديرمک اوچون موختليف ادبي اوسوللاردان ايستيفاده ائده‌رک سؤزونو دئييردي. بونلاردان بيري ده بير ادبي اوسول اولاراق خالقينين درديني يابانچي آدرئسلرده گؤسترمکله اؤزونون دئديگي کيمي ميلتينين درديني اؤزگه‌يه عنوانلاياراق، باشقاسينين ياسيندا اؤز اؤلوسونه آغلامیشدیر.

ايچيمي گؤسترمه‌ديم جاهيل توتان گوزگوي

اوزده گولوب، اورکده نيسکيليمه آغلاديم. 

ميلتيمين درديني اونوانلاييب اؤزگي، 

باشقاسينين ياسيندا اؤز اؤلومه آغلاديم.

جاهيلين توتدوغو آينادا ايچيني گؤسترمه‌يهن شاعير فيکريني باشقا ادبي اوسوللارلا دا اوخوجوسونا چاتديرا بيليردي. مسلن، «لنينله صحبت» آدلي پوئماسيندا شاعير ظاهيرا لئنينه حسن رغبتيني گؤسترسه ده، اصلينده لنينين اثرلريندن گؤتوردويو سيتاتلارلا رئژيمده اولان حاقسيزليغي «قيزيم، سنه دئييرم، گلينيم ائشيت» اوصولو ايله ايفشا ائديردي. لنينين روس ميلتچي شووينيزمينه قارشي اولدوغونو اساس گؤتوره‌رک، شاعير آذربايجان خالقينين تاريخي کيمليگينين وکيلين، رئژيمده اولان ميللي آيري-سئچکيلينين داواچيسينا چئوريلير. اونون عؤمرو بويو يازديغي چوخسايلي پوئمالاريندا و شعرلرينده بو دوشونجه طرزي حاکيمدير. 

«گولوستان»، «آغلار-گوله‌ين»، «يوللار اوغوللار»، «حيات - اؤلوم»، «تضادلار»، «آمريکا گؤزه‌لي»، «مرضیه»، «باغيشلايين، سهو اولوب»، «لياقت»، «غم ايچينده سئوينج»، «اضطيرابين سونو»، «شبي هيجران»، «ساده آداملار»، «آتيلميشلار»، «دؤرد يوز اون آلتي»، «موغام»، «ادبي هئيکل»، «هر باهارين قارانقوشو»، «قييمت»، «لنينله صحبت»، «فاجيعه »، «شهيدلر»، «ايکي قورخو» کيمي پوئمالارينداکي اساس آنا خط، دوشونجه طرزي خالق، وطن، تورپاق، ديل، دين، ميللي-معنوي ديرله‌دير. آدلاري کئچن بوتون پوئمالارينين هر بيري آيريليقدا اينجه لنرک، بونلارين هر بيرينده زامان هانسي سؤزو دئمک ايسته‌ييرسه او سؤزو شاعيرين دئديگيني موشاهيده ائتمک اولار.

ياراديجيليغينين ايلک ايللريندن ميللي دوشونجه‌لري، حاقسيزليغا قارشي اوسيانکارليغي، ناراحات طبيعتي ايله خالقينين سئويمليسينه چئوريلن ب.واهابزاده 1959-جو ايلده 34 ياشيندا «گولوستان» آدلي بير پوئما يازدي. پوئما آذربايجانين ايشغالچيليق تاريخي ايله باغليدير. روسييا ايله ايرانين ايشغالي نتيجه سينده آراز چايي بويونجا ايکييه بؤلونن آذربايجان تورپاقلاري 1813-جو ايلده «گولوستان» آدلي بير موقاويله ايله تاريخلشدي و بو موقاويله‌نين ايضطيرابي بو گون ده داوام ائدن بير عدالتسيزليک اورتايا چيخاردي.

ب.واهابزاده چارليق روسيياسي ايله ايران آراسيندا باغلانميش «گولوستان» موقاويله سينين ايشغالچي ماهيتيني ايفشا ائدير و بو موقاويله‌يه نيفرتيني، ناراضيليغيني بيلديرن پوئماني موقاويله‌نين باغلانديغي يئرين آدي ايله باغلي اولدوغو اوچون «گولوستان» آدلانديرير. شاعير هر ايکي ايشغالچي دؤولتين آذربايجان اوچون اؤزگه، ياد طرفلر اولماسيني، «گولوستان» موقاويله سينده اونلارين هئچ بيرحاقي اولماديغيني ايفاده ائده‌رک يازيردي:

 

قويولان شرطلره راضيييق دئيه، 

طرفلر قول چکدي موعاهيده‌يه. 

طرفلر کيم ايدي؟

هر ايکيسي ياد!

يادلارمي ائده‌جک بو خالقا ايمداد؟ 


ب.واهابزاده تورپاغي ايکييه بؤلونسه ده آذربايجان خالقينين معنوي دونياسينين بؤلونمه‌ديگيني، سارسيلماديغيني، بير سازين، بير تئلين سسييله آغلاييب-گولدويونو

 
تورپاغي ايکييه بؤلرسن، آنجاق،

چتيندير بدني جاندان آييرماق. 

آييرماق کيمسه‌يه گلمسين آسان، 

بير خالقين بير اولان دردي-سريني. 

او تايدان بو تايا مصطفی پايان، 

اوخويور واحيدين غزللريني  شکلينده ايفاده ائدير.

1990-جي ايلين 20 يانواريندا سووئت رژيمي طرفيندن آذربايجانا قارشي تؤره‌ديلن قانلي جينايتلر، سويقيريمي حاديثه سي ايله باغلي ب.واهابزاده «شهيدلر» پوئماسيني يازدي.

 پوئماني بوتون يؤنلري ايله ايضاح ائدن شاعير بو گئجه‌ني «دوشمنه نيفرت گئجه سي» آدلانديردي و ايکييه بؤلونموش آذربايجانين شيمال تورپاقلارينين دوشمني اون دوققوزجو عصرده چارليق روسيياسي و اييرميینجی عصرده سووئت روسيياسي اولدوغونو ايفاده ائتدي.

ب.واهابزاده نين 1990-جي ايلده يازديغي «شهيدلر» پوئماسينين قهرمانلاري سانکي «گولوستان» پوئماسينداکي عدالتسيزلييه قارشي اؤز موناسيبتلريني بيلديرنلردير.

«گولوستان»داکي هايقيران چاغيريشلار ايندي آزادليق وغروندا جانلاريندان کئچن شهيدلر جاواب وئرير.

ب.واهابزادنين ياراديجيليغي بوتون پارامئترلري ايله اينجه لنسه، اونون شاعيرليگي بيرينجي جرگه‌ده يئر آلديغي گؤرونور. 
کلاسسيک آذربايجان شاعيري سولئيمان روستمين بير شعرينده بختیار واهابزاده حاقيندا لطيفه‌يه و حقيقته بنزه‌ين بئله بير بيتي وار:
 

قاتلاييب ديزينين آلتيندا قويار، 

عاليم بختیاري، شاعير بختیار.

 
سولئيمان روستم ب.واهابزاده نين شعر دونياسيني آشاغيداکي شکيلده بئله ده ايفاده ائتميشدير: «بختیار واهابزاده نين ياراديجيليغيندا منيم خوشوما گلن ندير؟ايلک نؤوبه‌ده وطنداشليق، آذربايجانچيليق، سونرا دا جسارت و درينليک. اونون آذربايجاندان کناردا نشر اولونان شعرلرينده ايمضاسينين يانينا آذربايجان سؤزونو يازماماق دا اولار، چونکي اونون بوتون ياراديجيليغينا آذربايجان مؤهورو وورولموشدور».

گؤروندويو کيمي، سولئيمان روستم بختیار واهابزاده نين شاعيرليگينه داها چوخ قييمت وئرسه ده، بختیار واهابزاده آذربايجان ادبياتي علمينين اينکيشافيندا قييمتلي خيدمتلري اولان بير علم آدامي اولموشدور، فيلولوگييا علملري دوکتورو، پروفسور، آذربايجان ميللي علملر آکادئميياسينين حقيقي عوضوو، آکادئميک کيمي علمي مرتبه‌يه يوکسلميشدير. 
علميليکله بديعيليک بختیار واهابزاده ياراديجيليغينين ايکي اؤنملي جهتيدير. هر ايکيسي ده فلسفي آغيرليغي ايله سئچيلير.

 او، هم يازان، هم ده يوزان، دوشونجه‌لريني علمي سوزگجدن کئچيرن بير تفککور ساهيبي اولدوغو اوچون، اونون مولاحيظه و دوشونجه‌لرينده بير فلسفي مئيار اورتايا چيخير. بعضاً اثرلرينده علمي اولانلا بديع اولاني آييرماق، سرحدلنديرمک بئله مومکون اولمور. آذربايجان فولکلورو، محمد فضولي، ميرزه علي اکبرصابير، محمد هادي، صمد وورغون ياراديجيليغيندان بحث ائدن علمي آراشديرمالارينداکي تحليل علمي نتيجه‌لري ايله فرقله‌نير. «صمد وورغون» (1968)، «صنعتکار و زامان» (1976)، «ساده‌ليکده بؤيوکلوک» (1978)، «وطن اوجاغينين ايستيسي» (1982)، «شنبه گئجه سينه گئدن يول» (1991) کيمي نئچه-نئچه علمي-تدقيقات، علمي پوبليسيستيک کيتابلاريندا، چوخسايلي علمي-تنقيدي مقاله‌لرينده قييمتلي و اوريژينال علمي مولاحيظه لر سؤيله‌ميشدير.

بديعي اثرلرينده اولدوغوکيمي علمي ياراديجيليغيندا دا «آنا ديلي» ايفادسي بختیارواهابزاده نين ياراديجيليغيندا آلتي جيزيله‌رک وورغولانير. 

ب.واهابزاده نين ادبي فعاليتي چوخيؤنلودور. او، ليريک شعرلري ايله برابر بير چوخ درام اثرلري، پوئمالار، حکايه‌لر ده يازميشدير. «کيمدير حاقلي»، «ايکينجي سس»، «يوللارا ايز دوشور»، «ياغيشدان سونرا»، «ويجدان»، «فرياد»، «هارا گئدير بو دونيا» کيمي درام اثرلرينده ب.واهابزاده ايجتيماعي-سياسي مضمونلو مسله‌لري اله آلير و بونلاري يوکسک صنعتکارليقلا حلل ائدير.

معنوي-اخلاقي تميزليک، اينسان معنوياتينداکي پسيخولوژي سارسينتيلار، اونون درام اثرلرينين تمليني تشکيل ائدير. ب.واهابزاده مووففقيتله تاماشايا قويولان درام اثرلرينده ده اصلينده شعر و پوئمالاريندا معنوي-اخلاقي پروبلئملري مؤوضو ائدير. شعرله يازيلميش «فرياد» آدلي تاريخي-فلسفي درام اثرينده ب.واهابزاده اون دؤرد اثر تورک دونياسينين بؤيوک شاعيري عماالدين نسيمينين دؤورو و حياتيندان بحث ائدير. «هارا گئدير بو دونيا» اثرينده ايسه کؤکه قاييتماق مسله سيني اؤنه گتيرير. بو جهتي يوکسک قييمتلنديرن عمومميللي ليدئر حيدر علييوين مولاحيظه لري چوخ قييمتليدير: «اثرده کؤکه قاييتماق مسله سي وار. من اونون معناسيني بئله آنلاييرام کي، کؤکوموزده اولان او مثبت جهتلري گؤتورمک لازيمدير». 
قلميني حکايه و پوبليسيستيک يازيلاردا دا سينايان بختیار واهابزاده نين قلميندن «مشهور آدام»، «آلابزک چامادان»، «اورک دؤيونتولري»، «ننمين خالچاسي»، «ساعات»، «يالتاقليق»، «شوبه»، «رقابت»، «عقيده»، «پيس آدام»، «فوتوآپارات» کيمي حکايه‌لر ده چيخميشدير.
 

بختیار واهابزاده ياراديجيليغيندا محبت، طبيعت، سيياسي مؤوضولاردان توتموش نيي آختارسان تاپماق اولار. اونون ليريک شعرلرينين آنا خطيني حيسسين مودريکليگي تشکيل ائدير. اوخوجوسونو هميشه وطنپرورليي، نجيبليي، خئيرخواهليغا چاغيران ليريک شعرلري سؤزون اصيل معناسيندا اوخوجونو دوشوندورن شعرلردير. بو شعرلر شاعيرله اوخوجو آراسيندا فلسفي موکاليمه يارادير. شعرلرده اينسانين بؤيوکلوگو و مغرورلوغو تقدير اولونور، خالقين ديني و معنوي ديرلري قييمتلنديريلير، هر بير ميلتين عالي حاقي اولان کؤله‌ليکدن آزاد اولماق ايدئياسي تبليغ اولونور. او يازير کي:

 
بير خالق اوچون سفالت

يا آجليق، يا فلاکت،

بير ائله ذلت دئييل، 

آما ميلت قول اولسا، 

آياقلارا چول اولسا،

فيکيرجه يوخسول اولسا،

او، هله ميلت دئييل.

 
ب.واهابزاده نين ديني-معنوي ديرلره باغلا شعرلريندن بيري 1977-جي ايلده يازديغي «آلله اکبر» شعريدير. شاعير 1977-جي ايلده ايستانبولدا اولارکن ميناره‌دن ائشيتديگي«آلله اکبر» سسيندن سحيرلنه‌رک بو شعري يازديغيني سؤيله‌يير. شعرين ايکي بندي بئله‌دير:


آللاها يوکسلن اولو بير يولون،
 

ايلکين پيللسيدير آلله اکبر.

حاقي دانانلارين اوزونه ديميش، 

حاقين سيللسيدير آلله اکبر. 

 

گؤيلرين نيداسي اوجاليب يئردن،

دايم خيلاص ائدير خيري شردن،

قدرتيکاميلين ميناره‌لردن،

گلن نغمه سيدير آلله اکبر. 


بختیار واهابزاده نين ميللي-معنوي ديرلري، وطنداش مؤوقعييني، آنا ديلين، وته‌نين فوسونکار طبيعتينه موناسيبتيني عکس ائتديرن شعرلري ايله برابر، يارادانين اينسان اوغلونا وئرديگي ايلاهي و مجازي عشقي عکس ائتديرن شعرلري ده اونون سئوگي دولو بير دونياسي اولان موتفککيرليگيندن خبر وئرير.يارديجيليغيندا اؤنملي يئري اولان بئله شعرلري معاصير اينسانين معنوي عذابلاري، کؤنول چيرپينتيلاري، اورک يانغيسيدير. 
فيلوسوف-شاعيرين سياسي-ايجتيماعي، تاريخي-فلسفي اثرلري سياسي کسکينليگي ايله فرقلنديگي کيمي ليريک-عاشيقانه شعرلري ده حيکمتلي
فلسفي فيکيرلرله زنگينليگي ايله فرقله‌نير. «اگر سئويرسنسه، آياق سسيمدن گرک بيلسن کي، بختیار گلير» - بيتينده سئوديگي قاديني او قدر حسساس اولماغا سسله‌يير کي، او، آياق سسيندن بئله سئوگيليسينين گلديگيني بيلسين.

ب.واهابزاده محبت ليريکاسينا عنوانلاديغي چوخلو غزل، قوشما، گرايلي يازميش، سئوگي دولو بير شاعير کيمي ده تانينميشدير. او، محبت شعرلرينين بير قيسميني «حسرت نغمه‌لري»، «سئوگي دويغولاري»، «سون گؤروش» کيمي باشليقلارا بؤلوب اثرلرينه داخيل ائتميشدي. محبت ليريکاسيندا دا آنا ديلينين گؤزلليگيني، بو ديلين فلسفسيني پوئزييايا گتيرن شاعير سئوگي شعرلرينين بيريني «ياخشي» آدلانديرير.

 آذربايجان ديلينده «ياخشي» قشنگ، گؤزل، «ياخشي» - بلي، هه، «ياخشي»- مکتبده بيلييه وئريلن قييمت، يعني «دؤرد» کيمي چالارلاري ايفاده ائدير.

ب.واهابزاده سئوديگي قاديندان «ياخشي» دئيه آلديغي مثبت جاوابي پوئزييانين ديلينه گتيره‌رک ديلده يئني معنا چالارلاري يارادير. 

من «اعلا» دا، من «ياخشي» دا،

قييمت آلديم يوز-يوز دفعه،

آنجاق هئچ بير قييمتيمده،

چاتماميشام، 
گولوم، سنين «ياخشي»نداکي،
 

او شرفه دئيير قييمتلي سؤز اوستادي. 


بختیار واهابزاده‌ليريکاسيندا قيرميزي رنگله يازيلان بير «تورپاق»، بير «وطن»، بير ده «ديل» کلمه سي واردير. بو اوچ کلمه اونون بوتون ياراديجيليغينين آنا خطيدير دئسک، يانليش اولماز.
 
معلومدور کي، بختیار واهابزاده ياراديجيليغينين فورمالاشديغي دؤور سووئت دؤورونه تصادوف ائدير. بو دؤورده خالق حياتينا، ميللي دويغولارا، دؤولتچيليک ايدئولوگيياسينا موناسيبت بيرمعنالي اولماميشدير. وئليکوروس شووينيزمينه آلوده‌چيليگين باش آلديغي بير دؤورده آنا ديلي ايله باغلي مؤوضولار هر بير صنعتکار اوچون ميلتچيليک کيمي يوزولوردو. بو دؤورده ب.واهابزاده «لاتين ديلي» شعريني يازدي و بو شعر ايله باغلي قالديريلان هاي-کوي شعري کؤلگلنديرنلرين الينه فورصت وئردي.
 
معلومدور کي، گونوموزده ده لاتين ديلي اؤلو ديللر سيياهيسيندادير. يالنيز رئسئپتلرده (نسخه) ياشايان بو ديل حاقيندا ب.واهابزاده نين عوصياني بو ايدي کي، اؤزو ياشاييب ديلي اؤلنين، يوخسا ديلي اؤلوب اؤزو ياشايان خالقينمي ديلي اؤلودور. بو شاعيرين سطرالتي ايفاده‌لرينده‌کي عوصياني ايدي.


لاتين ديلي

ميلت اؤلوب، ديل ياشايير.

«آنا» دئين، «تورپاق» دئين، «وتن» دئين،

يوخ بو ديلده. 

آنجاق يئنه ياشايير بو ديل، 

هه‌کيملرين، 

عاليملرين، 
لوغمانلارين ديليدير بو،

هانسي ديله اؤلو دئيک؟ 

وطن وارکن، 

کيچيک، يوخسول کومالاردا،

 دوستاق اولان بير ديلمي؟

يوخسا اوزون اسيرليکدن کئچيب گلن، 

خالقي اؤلن،

اؤزو قالان بير ديلمي؟ 

شاعيرين آنا ديلي ايله باغلي اثرلريندن بيري «مرضیه» اثريدير. بختیار واهابزاده «مرضیه» پوئماسينا اثرين قهرماني مرضيه اوسکويينين آديني وئريب. لاکين اثرده آنا ديلينينن مصيبتي اثرده آلوولو بير ديلله قلمه آلينيب. اثرده اجداديميزين بيزه ميراث قويوب گئتديگي گؤزل آنا ديليميزي ديليم-ديليم دوغراتماغا، تيترتمه‌يه، بوينو بوکوک قالماغا، آياقلاردا کيليم اولماغا، عالي طبقه‌لرده دانيلماغا، ياساق ائديليب کيليدلنمه‌يه، يئتيم قالماغا وادار ائتمک ايسته‌ينلره آلوو پوسکورور. شاعير او اؤز ديليميزين و‌کيلي کيمي دئيير کي:


اي وطن گؤزه‌لي، گل اؤپوم سنين،

وطن ديلي دئين دوداقلاريندان دئيير.

باشقا بير شعرينده ايسه:

 
هر اولوسون
 

ان قييمتلي ثروتيدير آنا ديلي،

اؤولادلاري يئر اوزونه سپلنسه،

پرن-پرن دوشنلرين

وحدتيدير آنا ديلي.

قوربتي ده وطن ائدن آنا ديليم، 

سؤزلرينين نغمه سينده

روحوموزو جانلانديران آنا ديليم! 

مني آنا وته‌نيمين

بوتون اوغول-قيزلارييلا

قوهوم ائدن آنا ديليم دئيه‌رک آنا ديليميزين وکيلينه چئوريلير. 
گؤروندويو کيمي، ب.واهابزاده پوئزيياسي وطن آدلي بير آنا تورپاقدان گؤيرميش پوئزييادير. بختیار واهابزاده نين ايستر شعرلريند، ايستر درام اثرلرينده و پوئمالاريندا، ايسترسه علمي و پوبليسيست اثرلرينده آذربايجانين تاريخي جوغرافيياسيني و مدنيتيني اکس ائتديرن مقاملار وار. بو اثرلر کولل حاليندا آذربايجانين ميللي-معنوي ائنسيکلوپئديياسيدير.

بو دا بيزه حاق وئرير دئيک کي، بختیار واهابزاده اييرمي 20-جی عصرآذربايجان ادبياتينين شريکسيز ميللي فيلوسوف شاعيري، دوشونن و دوشوندورن ضياليسيدير. اونون مودريکليگي اينساني دوشوندورور، کاميللشديرير. بو معنادا بختیار واهابزاده پوئزيياسيني «دوشونجه‌لر پوئزيياسي» (رسول ريضا) آدلانديرانلار تاماميله حاقليدير. 

بوتون ياراديجيليغيني آذربايجانچيليق، تورکچولوک، دؤولتچيليک مفکورسينه و ميللي-معنوي ديرلرين قورونماسينا حسر ائدن وطنپرور شاعيربختیار واهابزاده سؤزون اصل معناسيندا وطن و خالق اوچون ياشاميشدير. دئيه بيلديکلرينه جسارتي چاتميش، دئيه بيلمه‌ديکلري ايسه «ديلينين وجوندا» قالميشدير. 
آذربايجاندا و اونون حدودلاريندا ب.واهابزاده ياراديجيليغيني ايزله‌ينلر اونون حاقيندا بير-بيريندن ماراقلي فيکيرلر سؤيله‌ميشلر. آلمان شرقشوناسي هانس احمد شميدئه «بير اينسانين اؤز خالقيني و اؤز دوغما ديليني دليجسينه سئوه بيلمک قابيليتيني من بختیار واهابزاده‌دن اؤيرنديم» دئميشدير.
 
اصلن آذربايجانلي، ايرانين مشهد شهرينده ياشايان مهدي مونججيمي ممقاني ب.واهابزاده‌يه يازديغي بير شعريندواهابزاده نين ميللي روحونو، اونون بوتؤو آذربايجان دوشونجه سيني ديله گتيرميشدي. شعرين ايکي بيتي بئله‌دير:
 

 

بختیار اولدو آدين، درد غمي لذتله يئييب، 

بيليريک، سن اؤزونه کئيفي حارام ائيلميسن. 

شکي شهرينده دوغولدون، نفسين چاتدي بيز، 

سن آذربايجاني اؤز شعرينه جمع ائيلميسن.

 

1995-جي ايلده تورکييه‌نين دوققوز پرئزيدئنتي سولئيمان دميرل باکيدا اولارکن ب.واهابزاده ايله گؤروشونده «سيزين ادبي ياراديجيليغينيز بوتون تورک دونياسينين معنوي بيرليگي و يوکسه‌ليشي ايله باغليدير. سيزي سادجه آذربايجانلي قارداشلاريميزين دئييل،چاغداش تورک دونياسينين بؤيوک بير قلم اوستادي کيمي سالاملاييرام».

مشهور تورک عاليمي محمت کاپلان ب.واهابزاده شعريني «بريليانت کيمي بير شعر» آدلانديرميشدير. پروف. آحمت بيجان ائرجيلاسون ايسه «واهابزاده بيزه اؤيرتدي کي، هر بير ميلتين آنا ديلي او ميلتين ناموس و ويجدانيدير».

20 -جی عصرده آذربايجان ادبي موحيطينين يئتيشديرديگي فيکير دوهاسي، سؤز باهاديري ب.واهابزاده بؤيوک عاليم، پوبليسيست، هم ده مؤوضو اعتيباريله رنگارنگ، درين مفکوره‌لي فيلوسوف شاعير کيمي عصرين پوئزييا عالمينه اؤز مؤهورونو وورموشدور. 

ب.واهابزاده حاقيندا يازيلان مقاله‌لردن بيرينده اوخودوم کي، «بختیار سياسته گلمه‌دن سياستچي، دؤولت وظيفه سيني توتمادان بير دؤولت خاديمي، ميللي ايستيقلال حرکاتينين هئچ بير قوروموندا ايشتيراک ائتمه‌دن همين حرکاتين باشچيلاريندان بيري، داها دوغروسو، اونون ويجداني اولموشدور.

بختیار ميلت، ديل، آزادليق فدايسي، شاعير-فيلوسوف، شاعير-جارچي، شاعير-موباريز، شاعير-ائتنوقراف، دراماتورق، پوبليسيست، عاليم، موعليمدير. بختیارين اؤزوندن سوروشسان، او دئير کي، من سادجه بير شاعيرم» (حسن حسن اف). 
بختیار واهابزادنين هر بير اثري عکس صدا دوغورموش، شيديرغي بير سورعتله اوخوجولار آراسيندا ياييلميشدير. چونکي اونون اثرلري آذربايجان آدلي آنانين حالال سودوندن، ايستي نفسيندن يوغرولموشدور.

 

آذربايجان، آدين آتش، 

اؤزون ايشيق، سؤزون ايشيق. 

آلوولاردان يارانميسان، 

بيز آدينلا تانينميشيق.

سن دوستا دوست، 

دوشمنينه گؤز داغيسان، 

آلنين آچيق، 

اوزون آغدير. 

يئنيلمزليک بايراغيسان.

 
بئله وصف ائدير دوغما آذربايجاني بختیار واهابزاده.