آذربايجان لغتچيليک تاريخينه بير باخيش

آذربايجان لغتچيليک تاريخينه بير باخيش

Azərbaycan lüğətçilik tarixinə bir baxış


 

 

 آکادمیک محسن ناغي سويلو

    Akademik Möhsün Nağısoylu

 

 

ديلچيليک علمي نين باشليجا ساحه لريندن بيري اولان لغتچيليگين آذربايجاندا قديم تاريخي و زنگين عنعنه لري واردير. لغتلر هر بير خالقين حيات طرزي نين، عادت عنعنه لري نين، ديلين سؤز خزينه سي نين تاريخي آسپئکتدن آراشديريلماسي باخيميندان  بؤيوک اهميت  داشيير.  بري باشدان قئيد ائدک کي،  کلاسسيک آذربايجان ادبياتي نومونه لري دؤورون طلبينه گؤره موسلمان شرقينده ان چوخ ياييلان اوچ ديلده: عربجه، فارسجا، تورکجه يازيلديغي کيمي، اورتا عصرلر آذربايجان لغتچيليگي ده آدي چکيلن هر اوچ ديلي احاطه ائتميش، بو ديللرين خوصوصيتلريني اؤزونده احتيوا ائتميشدير.  

  مؤوجود قايناقلارا اساسا آذربايجان لغتچيليگي نين ايلک نومونه سيني  مشهور آذربايجان شاعيري، فارسجا مکمل  "ديوان " صاحيبي اولان قطران تبريزي نين (1012-1091) 1046-جي ايلده قلمه آلديغي  " تفاسير "  ( " ايضاحلار " ) اثريني قبول ائتمک اولار. فارس ديلي نين ايلک ايضاحلي لغتي ساييلان بو کيتابدا  قطران تبريزي تخمينن 300 عدد قديم و  چتين  آنلاشيلان فارس منشالي سؤزون معنالاريني ايضاح ائتميشدير. سؤزلرين ايلک و سون حرفينه گؤره ترتيب ائديلميش ان قديم آذربايجان لغتي اولان  " تفاسير "  قيسمن اؤيره نيلسه ده، نشر اولونماميشدير. بونون دا باشليجا سببي  اثرين اليازمالاري نين گونوموزه قدر  گليب چاتماماسيدير. بونونلا ياناشي، سونراکي يوزيلليکلره آيد  بير چوخ فارس  لغتلرينده   " تفاسير " دن نومونه لره يئر وئريلميشدير کي، بو دا اونون واختيله مؤوجود اولماسيني ثوبوت ائدير.  

11-جو يوز ايلليکده اسدي توسي ده ناخچيواندا  "لغتنامه"  ( " سؤزلوک " ) و يا  " صحاح الفرس "  (فارس ديلي نين دوزگون لغتي " ) آدلي بير سؤزلوک ترتيب ائتميشدير. قطران تبريزي نين  " تفاسير " ي کيمي فارس ديلي نين  ايضاحلي لغتي ساييلان بو کيتابدا 1700 عدد فارس منشالي سؤزون  ايضاحي وئريلميشتير. بو سؤزلر آراسيندا قطران تبريزي نين کيتابيندا ايضاحي وئريلميش لئکسيک واحيدلر ده يئر  آلميشدير کي، بو عاميل ده مؤليفين  " تفاسير " دن يارارلانديغيني ثوبوت ائدير. اسدي توسي نين لغتي نين قديم بير نوسخه سي  گونوموزه قدر گليب چاتميش و تهراندا يايينلانميشدير. ايستر قطران تبريزي نين، ايسترسه اسدي توسي نين لغتلرينده خ يوزايلليگين سونلاريندا ياشاميش تورک اصيللي بؤيوک لغتچي ايسماعيل جؤوهري نين عرب ديلي نين ايضاحلي لغتي  اولان  " صحاح "  اثري نين تاثيري  حيسس اولونور. قيد ائدک کي،  تورکولوگييا علمي نين اؤندري، بايراقداري ماحمود قاشغارلي دا قطران تبريزي و اسدي توسي نين چاغداشي اولموش و مشهور  " ديوان الغات تورک "  اثريني قلمه آلميشدير. بو فاکت خي يوزايلليکده  موسلمان شرقينده لغتچيلييه نه درجه ده بؤيوک اؤنم وئريلديگيني  ثوبوت ائدير.  

  قاشغارلي نين بنزرسيز ديل عابيده سي اولان بو اثري آذربايجاندا سووئتلر بيرليگي دؤنمينده آذربايجان تورکجه سينه ترجومه اولونسا دا، نشر ائديلمه ميش و بونا گؤره ده اؤلکه ميزده اوزون مودت عرضينده لغتين بئسيم آتالاي طرفيندن تورکجه يه ائديلميش ترجومه سيندن ايستيفاده  اولونموشدور.

2006-جي ايلده قاشغارلي نين آدي چکيلن اثري راميز عسکرين ترجومه سينده  باکيدا نشر اولونموشدور (8). 

  آذربايجان مؤليفلري نين قلميندن چيخميش کلاسسيک  لغتلردن بيري ده دؤورونون مشهور عاليملريندن بيري کيمي تانينان هوبئيش طيفليسي نين (و.1203) 1153-جو ايلده تاماملاديغي   " قانون الادب "  آدلي اثريدير. عربجه-فارسجا لغت اولان  " قانون الادب "   کيتابيندا مؤليف 48 قايناقدان ايستيفاده ائتميشدير کي، اونلارين آراسيندا  تورک اصيللي فيلوسوف و عاليم جارالله زمخشري نين (1074-1143) عرب ديلينده يازديغي  " مقدمه الادب "  اثري خوصوصيله سئچيلير. قطران تبريزي نين سؤزلوگوندن فرقلي اولاراق طيفليسي نين بو لغتي نين چوخلو سايدا اليازمالاري مؤوجوددور کي، اونلاردان دا ان قديمي مؤليفين ساغليغيندا حاضيرلانميش 1153-جو ايل تاريخلي قييمتلي بير نوسخه دير (ايستانبول سلمانييه کيتابخاناسي، محمت حافظ افندي، ن.- 434). طيفليسي نين  " قانون الادب "  اثري بير نئچه اليازما اساسيندا ايراندا نشر اولونموشدور ( باخ: 42). قئيد ائديم کي، طيفليسي نين بو اثريني عوثمانلي مؤليفي سعدالدين موستقيمزاده ه.1182/م.1769-جو  ايلده " اللغات ثلاثه"  آدي ايله تورک ديلينه ترجومه ائتميشدير.   

  اولکي يوزايلليکلردن فرقلي اولاراق  13 عصردن اعتيبارا آذربايجاندا تورک سؤزلريني احاطه ائدن لغتلر ده اورتايا چيخير. ايلک بئله لغت اصلا گونئي آذربايجاني نين خوي شهريندن اولان و عؤمرونون چوخونو عوثمانلي تورپاقلاريندا، داها دوغروسو، کاستامونودا چوبان اوغوللاري بيليگي ساراييندا کئچيرميش حسام الدين حسن بين عبدالمؤمين خويي نين  " تحفه الحسام "  آدلي اثريدير. مشهور تورک عاليمي ذکي وليدي توغانين يازديغي کيمي، حسام الدين خويي عربجه و فارسجا فصيح (بلاغتلي) ديوان ديليني و هر ايکيسي نين ادبياتيني مکمل بيلميش و  سلجوقلولار و ائلخانيلر دؤورونده آنادولودا اينکيشاف ائدن اسلام مدنيتيني  کاستامونودا لاييقينجه تمثيل ائتميشدير. قئيد ائدک کي، خويي نين  " تحفه الحسام "  اثري آذربايجان لغتچيليگي تاريخينده نظمله قلمه آلينميش ايلک فارسجا-تورکجه سؤزلوک حساب ائديلير (3، 20). قئيد ائديم کي، ياخين شرقده ايلک منظوم لغت  ابو نصر فراهي( بدرالدین مسعود بن ابی بکر ) نين 1220-جي ايلده تاماملاديغي  " نصاب الصیبان "  ( " اوشاقلار اوچون اساس " ) آدلي کيتابيدير (3، 14-15). عربجه-فارسجا بو منظوم سؤزلوک يازيلديغي دؤوردن باشلاياراق ياخين شرقده  گئنيش ياييلميش و اونا چوخلو نذيره لر يازيلميشدير. حسام الدین خويي ده چاغداشي ابو نصر فراهي نين لغتينه نذيره اولاراق  " نصيب الفيتيان "  ( " گنجلرين قيسمتي " ) آدلي عربجه-فارسجا بير منظوم سؤزلوک ترتيب ائتميشدير.  

  حسام الدین خويي نين  " تحفه حسام "  اثرينه گلينجه، اؤنجه قئيد ائديم کي، مؤليفين بو اثري تکجه آذربايجاندا دئييل، بوتؤولوکده ياخين شرقده ايلک منظوم فارسجا-تورکجه لغتدير (3، 20). 20 بابدان عيبارت اولان بو ديرلي لغتده کي  بيتلرين سايي موختليفدير: ان آز 6 بيت، ان چوخ 32 بيت. بيتلرين عومومي سايي 302-يه برابردير. لغت آشاغيداکي بيتلرله باشلايير: 

  خدا تانري، توانگر  معنيسي باي، 

  ايشه بويروق ائديجي کارفرماي. 

  ستاره -  ييلدوز او خورشيد     گونش،  

  زمين   يئر،  آسمان  گؤگ، ماهدور آي. 

  تبر   بالتا، کيليج   شمشير-او-تير   اوک، 

  سپر   قالخان، کمين    بوسو، کمان  ياي. 

  شوش   اؤيکن، قوردئ    بؤيرک، دست  الدور، 

   زبان  ديل، دل   کؤنول، سر   باش، آياق  پاي. 

  اؤرنکدن ده گؤروندويو کيمي، حسام الدین خويي ساده بير شعير ديلي ايله اؤنجه اساسا فارسچا سؤزلري قئيد ائتميش، سونرا ايسه اونلارين تورکجه قارشيليقلاريني وئرميشدير. لغتين نظمله اولماسينا گلينجه، بو، مؤليفين سويداشلارينا، خوصوصيله ده اوشاقلارا و گنجلره  آسان بير يوللا فارس ديليني  اؤيرتمگي قارشيسينا بير مقصد اولاراق قويماسيندان ايره لي گلير.   

  قيد ائديم کي، ديگر قديم منظوم لغتلرده اولدوغو کيمي، حسام الدین خويي نين آدي چکيلن اثرينده ده اليفبا سيستئمينه عمل ائديلمه ميشدير. لغتده يئر آلان تورکجه سؤزلره گلينجه، اونلارين چوخو  نيطق حيصه لرينه گؤره فئيللردن عيبارتدير. بورادا ايسيم، صيفت، ساي و عوضليکلره آيد نومونه لر ده وئريلميشدير. لغتده کي  تورکجه سؤزلر سيراسيندا  اينسان و قوهوملوقلا باغلي سؤزلر، موختليف اشيا آدلاري، فلورا و فاونا عالمينه آيد لئکسيک واحيدلر داها چوخدور. لغتده يئر آلان بير چوخ سؤزلر موعاصير آذربايجان ديلي باخيميندان آرخايک سعجيييه داشييير. مثلن: آييتماک (سؤيله مک)، آلپ (ايگيد)، ايسيرماک (ديشله مک)، اوتاجي (حکيم)، سين (قبير)، توتوق (پرده)، اوچماک (جنت) و س. لغتده سؤزلرله ياناشي، بير چوخ دئييم و ساده جومللرين ايشلنمه سي ده  ديقتي چکير. ماراقليدير کي، حسام الدین خويي آدي چکيلن ديرلي لغتينده ايستر فارس ديلينه، ايسترسه ده  آذربايجان تورک ديلينه مخصوص بير سيرا آتالار سؤزلريني ده ايشلتميشدير. مثلن: هر کی جويد يابد ايسته ين بولا؛ هر کی با گل ستيزد، عاقبت بئچيند خار کيم گوله ايريشورسه، سونوجي ديکن دره دي. 

حسام الدین خويي عيني زاماندا ياخين شرقده گئنيش ياييلميش منشاتا (اينشا، مکتوبلار) آيد فارسجا و عربجه ايکي اثر ده يازميشدير. قايناقلاردا خويي نين فارسجا ديوان صاحيبي اولماسينا داير  معلوماتلار وئريلمه سينه باخماياراق، مؤليفين بو اثري گونوموزه قدر گليب چاتماميشدير. خويي نين الده اولان فارسجا شعيرلري سادجه بير نئچه قصيده و رباعيدن عيبارتدير.  

  حسام الدین خويي نين اساس اثري اولان  " تحفه حسام "  لغتي اورتاچاغدا گئنيش ياييلاراق بؤيوک شؤهرت قازانميش و اونا نذيره اولاراق بير نئچه سؤزلوک يازيلميشدير. همين نذيره لردن ان مشهورو عوثمانلي شاعيري و عاليمي ايبراهيم بن خدايداد شاهيدي مؤولوي نين 1514-جو ايلده يازديغي  " تحفه شاهيدي "   آدلي تورکجه-فارسجا منظوم لغتيدير. شاهيدي لغتي نين اؤن سؤزونده بو کيتابين  " تحفه حسام " آ  يازيلميش بير نذيره اولدوغونو بئله ديله گتيرير: 

   

  اوکودوم اولا تحفه حسامي 

  معطر اولدي آنينلا جان مشامي. 

  خدا شاد ائيله يه روحون حسامين  

  وئره جنّتده اعلاسين مقامين 

  گتوردي نظمه بونجا دري مکنون  

  سليس و شوخ، رنگاميز و  مووزون 

  جهاندا ياکدي بير شعمي-منوور 

  کي سؤنمز حشره ده ک نفعين گؤرنلر 

  ديلرديم کي يازام بير خوشجا نامه 

  نذيره اولا اول تحفه حسامه.

 

  حسام الدین خويييه بؤيوک احتيرام بسله ين شاهيدي بو سببله اؤز اوغلونا حسام الدین آديني قويموشدور. شاهيدي نين اوغلو حسام الدین شاهيديزاده ده  " تحفه حسامي "  آدلي کيچيک حجملي فارسجا تورکجه بير منظوم لغت ترتيب ائتميشدير. قئيد ائديم کي، بو لغتده قرامماتيکا قايدالاري نين ايضاحينا داها چوخ يئر آيريلميشدير. 

   " تحفه شاهيدي "  لغتيندن وئرديگيميز نومونه لرله باغلي اونو دا قئيد ائديم کي، شاهيدي نين بو ميصراعلاري او دؤورون ايستر عوثمانلي اوخوجوسو، ايسترسه ده آذربايجان اوخوجوسو اوچون عيني جور آنلاشيلان  بير ديلده قلمه آلينميشدير. نئجه کي، يونوس امره نين، قاضي بورهان الدي نين، عمادالدين نسيمي نين، محمد فضولی نين و ديگر سؤز اوستالاري نين ديلي چاغداش تورکيه و آذربايجان اوخوجوسو و آراشديريجيلاري اوچون عيني سوييه ده دوغما و سئويلندير. 

  بو مسله يه ديقت يئتيرن مشهور تورک عاليمي آگاه سيرري لئوئند يازير:  " تورکيه تورکچه سيني آذربایجان تورکجه سي ايله، ايلک دئويرلئرده کئسين اولاراک آييرماغا اولاناک يوکتور. هئر ايکي کول آراسيندا بوگون گؤرولئن آييريملار، ايلک دئويرلئردئ پئک بئليرلي دئغيلدي. اورتاک اؤزئلليکلئرين چوغو زامانلا تورکيه تورکچه سينده کايب اولموش، بونا کارشيليک آذربایجان تورکچه سينده داها بئليرلي بير حال آلميشتير "  (9، ص.93). لئوئند’ين بو سؤزلرينه علاوه  اولاراق قئيد ائتمک ايسته ييرم کي، بو ايکي ديل آراسيندا ياخينليق 19  يوز ايلليگين سونو و 20 يوز ايلليگين اوللرينده يئنيدن گوجلو بير شکيلده داوام ائتميشدير. مثلا، او دؤورون آذربايجان اوخوجوسو و ضياليلاري ناميق کامالين، رضا توفيقين، توفيق فيکرتين و ديگرلري نين اثرلريني اؤز  شاعير و يازارلاري سانميش و اونلاري آسانليقلا اوخويوب سئوه رک تاثيرلنديکلري کيمي، تورکيه ضياليلاري دا  آذربايجاندا نشر اولونان  " فويوضات "  و  " موللا نصر الدين "  درگيلريني، آذربايجان شاعير و يازيچيلاريندان علي بي حسينزاده نين، حيين جاويدين، محمد هادي نين و ديگرلري نين اثرلرينه بؤيوک احتيرام و سئوگي بسله ميشلر.  

  13-14 يوزيلليکلرده ياشاميش هيندوشاه بن سنجر ناخچيواني نين تخمينن 1280-1300-جو ايللر آراسيندا قلمه آلديغي  " الصحاح العجميييه "  ( " فارسجانين دوزگون سؤزلوگو " ) آدلي ديرلي اثري کلاسسيک آذربايجان لغتلري سيراسيندا اؤزل بير يئر توتور.   

  هيندوشاه ناخچيواني بو لغتينده فارس ديلچيليگي تاريخينده ايلک دفعه  اولاراق فارس ديلي نين مورفولوژي قايدالاري نين، خوصوصيله ده فعل  بحث نين علمي بير شکيلده ايضاحيني دا وئرميشدير.  قئيد ائدک کي، لغتين بو بؤلومو عرب ديلينده دير. عوموميتله،  اثر اوچ بؤلومدن عيبارتدير: 

  1.عربجه مقدمه؛ 

  2.فارسجا-تورکجه لغت؛ 

  3.فارس ديلي نين قرامماتيکاسي (عرب ديلينده). 

  تورک لئکسيکوقرافييا تاريخي نين اؤيره نيلمه سينده، فارس و تورک ديللري نين سؤز وارليغي نين 14-13 عصرلرده کي  عومومي منظره سي نين اؤيره نيلمه سينده بو اثر عوضسيز ديل تاريخي قايناغيدير.  " الصحاح العجمييه "  حاقيندا ايندييه ده ک بير نئچه مقاله يازيلميش (2؛3؛4؛5؛) و  لغتين متني ايلک دفعه  ناقيض بير اليازماسي اساسيندا آذربايجان عاليمي غلامحسین بیگدیلي طرفيندن 1983-جو ايلده تهراندا نشر اولونموشدور (7). آذربايجان عاليملريندن جمعيله صاديقووا و طيبه علسگرووا ايسه 1993-جو ايلده  " الصحاح"  العجمييه "   نين اوچ قديم اليازما نوسخه سي اساسيندا علمي-تنقيدي متنيني نشره حاضيرلاميشلار (1). بو موکممل نشرده مؤليفلرين ه.ناخچيواني و اونون حياتي، علمي-بديعي ياراديجيليغي حاقيندا ييغجام و ديرلي معلوماتلاري اؤزونده احتيوا ائدن گيريش مقاله سي ده يئر آلميشدير.  

  فارسجا-آذربايجان تورکجه سينده نثرله يازيلميش ايلک لغت ساييلان  " الصحاح العجميه "  اثرينده سؤزلرين عومومي سايي 5000-دن چوخدور کي، اونلارين سيراسيندا تورکجه سؤزلرين چکيسي داها آرتيقدير. 1280-1300-جو ايللر آراسيندا ترتيب اولونموش بو ديرلي لغتين ان باشليجا اؤزلليکلريندن بيري بورادا عرب ديلينده اولان قرامماتيک اوچئرکده فارس ديلي نين مورفولوژي قايدالاري نين، خوصوصيله ده فعللرين ييغجام بير شکيلده و علمي سيستم حاليندا آچيقلانماسيدير. بوتؤولوکده اثر اساسا فارسجا-تورکجه لغتي و فارس ديلي نين قرامماتيک قايدالاريني احتيوا ائدير. 

  ه. ناخچيواني فارس منشالي سؤزلري آدلار و فعللره آييراراق اونلارين اساس خوصوصيتلريني ايضاح ائتميشدير. 21 باب و 393 فصيلدن عيبارت اولان اثرده فارسجا سؤزلر سونونجو حرفلر اوزره اليفبا سيستمي ايله ترتيب اولونموشدور.  

  ه.ناخچيواني نين  " الصحاح العجميه "  لغتي ايکي باخيمدان خوصوصيله بؤيوک اهميت داشييير. بيرينجيسي، اثر ياخين شرقده، بوتؤولوکده لغتچيليک تاريخي و عنعنه لري نين، کلاسسيک لغتلرين ترتيب پرينسيپلري نين اؤيره نيلمه سي باخيميندان عوضسيز ديرلي قايناقدير. ايکينجيسي ايسه ه.ناخچيواني نين بو لغتي ايستر فارس لئکسيکولوگيياسي نين، ايسترسه ده آذربايجان-تورک لئکسيکولوگيياسي نين تاريخي آسپئکتدن اؤيره نيلمه سي اوچون ديرلي معلوماتلاري اؤزونده احتيوا ائدن اهميتلي بير اثردير. بئله کي، بورادا هم موعاصير فارس ديلي، هم ده چاغداش آذربايجان ديلي اوچون آرخايک سعجيييه داشييان بير سيرا سؤزلر، ائلجه ده دؤورون ائتنوقرافيک منظره سيني اؤزونده داشييان بير سيرا لئکسئملر يئر آلميشدير. لغتده کي  موعاصير آذربايجان ديلي اوچون آرخايک سعجيييه داشييان سؤزلر سيراسيندا آشاغيداکيلاري قئيد ائتمک اولار: آغ (تور)، آي آغيلي (ايين دايروي شکلي)، دمرن (اوخ اوجو)، دينله مک (ساکيتلشمک)، اکشي، (تورش)، اکشيمک (تورشوماق)، گديک (نقصان، زده، دئشيک)، اومک (تلسمک)، ايرلاييجي (مغنني، خواننده)، ايسيرماق (ديشله مک)، قيلاووز (بلدچي)، قيرغيل (اورتا ياشلي کيشي)، سوجي (شراب)، توغانجي (قوش اووچوسو)، تؤره (قايدا-قانون)، اولاشماق (چاتماق، يئتيشمک)، اويز (آغجاقاناد)، يئلمک (تلسمک)، ييلديرماق (پاريلداماق) و س.  قئيد ائدک کي، بو سؤزلرين چوخو اورتا عصرلره آيد آذربايجان تورک يازيلي آبيده لري نين ديلي اوچون ده ايشلک لئکسيک  واحيدلردير.  

  لغتده ايشلنن ائتنوقرافيک سعجيييه لي و خالق ديليندن گلن آيري-آيري سؤزلر ده ديقتي چکير. مثلن، ه.ناخچيواني فارس ديلينده اولان  " آبستن "  (حاميله) سؤزونون تورکجه قارشيليغيني  " يوکلو "  شکيلده وئرميشدير. معلوم اولدوغو کيمي، بو سؤز حاضيردا دا خالق دانيشيق ديلينده بو آنلامدا ايشلنمکده دير. ائتنوقرافيک سعجيه داشييان سؤزلر سيراسيندا ايسه  " شانئدان "  (داراق قابي) سؤزونون قارشيلغي اولان  " تاراقليق " ، قديم فارس سؤزو اولان  "سور "  (اياققابي) لئکسئمي نين تورکجه يه ترجومه سي نين  " ايپله قيلدان اولان باشماق " کيمي وئريلمه سيني قئيد ائتمک اولار.  

  لغتده ديقتچه کي جي مقاملاردان بيري ده ه.ناخچيواني نين آيري-آيري فارس سؤزلري نين تورکجه قارشيليغيني ايضاحلارلا، بعضا ده آيريجا جومله شکلينده وئرمه سيدير. بو قبيلدن اولان سؤزلر سيراسيندا آشاغيداکيلاري قئيد ائتمک اولار:  " افدستا بير  کلمه دير کي، مورکبدير.  " افدن "  کي  " عجب "  معناسيندادير و  " ستادن "  کي، اؤگمکدير، يعني  " عجب اؤگمک " .  " پازهر-بير تاش کي، آنينلا آغو (زهر -  م.ن.) دفع ائدرلر.  " خشفشار "  بير قوشدور کي، سودا اولار و قارا رنگي. فرسنگ اون ايکي بين آديمدير. خارا قاتي قارا تاش؛ خاور گون باتاسي، گون توغانا دا دئرلر، آما اول اصحدير (دوزگوندور م.ن.). نهاري آزاجيق تام کي، صاباح يئنير. 

  بو نومونه لر 14عصر آذربايجان-تورک نثر ديلي نين، خوصوصيله، ده علمي اوسلوبياتي نين آراشديريلماسي، باخيميندان دا اهميتليدير. اونو دا قئيد ائدک کي، بيرينجي نومونه ده وئريلن مورککب قورولوشلو فارس سؤزو آرخايک سعجيييه داشييير: اونا موعاصير فارس ديلي نين ايضاحلي لغتلرينده راست گلميريک. يئري گلميشکن اونو دا قئيد ائدک کي، لغتده کي  بو قبيلدن اولان ايضاحلار ه.ناخچيواني نين آدي چکيلن اثرينده ايضاحلي لغتلره آيد خوصوصيتلرين ده يئر آلديغيني ثوبوت ائدير.   

  لغتده بعضي مرکب قورولوشلو فارس منشالي سؤزلرين قارشيليغي اولاراق اونلارين تورکجه يه حرفي ترجومه شکيلده وئريلمه سي حاللاري دا ديقتي چکير. فيکريميزجه، آشاغيداکي تورک منشالي سؤزلري ه.ناخچيواني فارسجادان حرفي ترجومه شکلينده ديليميزه چئويره رک اؤزو ياراتميش و ايلک دفعه  آدي چکيلن لغتينده ايشلتميشدير:  

  بارکش يوک چکيجي؛ بدکيش ياراماز دينلو؛ چهارپا کؤنول قاپيجي؛ ديلروبا دؤرت آياقلو؛ خارکش توبراق چکرک؛ جامه شوي تون يويوجو؛  مرده شوي اؤلو يويوجي و س.  

  بوتون بو اؤرنکلر، ائلجه ده مقاله نين حجمينه گؤره لغتين قئيد ائتمه ديگيميز ديگر کئيفيتلري اونون، حقيقتن ده، آذربايجان لغتچيليک تاريخي، ادبي ديلي تاريخي اوچون نه درجه ده ديرلي بير قايناق اولدوغونو آچيق-آشکار بير شکيلده ثوبوت ائدير.  

  لغتده بعضي فارس سؤز بيرلشمه لري نين تورکجه يه قارشيليغي اولاراق سؤز بيرلشمه سي شکلينده وئريلمه سي حاللارينا دا راست گليريک. مثلن: تير کئشتي گمي اوقي، چوب دستي -ال آغاجي و س. 

  ه.ناخچيواني نادير حاللاردا بعضي فارس سؤزلري نين قارشيليغيني وئررکن اونلارين آنا ديلينده مجازي معنادا ايشلنن واريانتلاريني دا ايشلتميشدير. مثلن: چاپلوسي (يالتاقليق) ديلکوچيليک، چيرئگي يوزسوزلوک و س. قئيد ائدک کي، بو سؤزلردن بيرينجيسي ديلکوچليک موعاصير ديليميزده تولکولوک شکلينده، ديگري ايسه عابيرسيزليق، حيازيسليق واريانتيندا ايشله نير.  

  هيندوشاه ناخچيواني نين لغتنده فارسچا سؤزلر نيطق حيصه سي اولاراق آدلارا  و فعللره بؤلونموش، سونرا ايسه اونلارين تورکجه قارشيليقلاري وئرميشدير. فارسجا سؤزلر سونونجو حرفلر اوزره دوزوله رک بابلارا بؤلونموشدور. بابلارداکي سؤزلر ده ايلک حرفلر اوزره اليفبا سيراسيندا فصيللره آيريلميشدير. اثر  21 باب و 393 فصيل اوزره ترتيب اولونموشدور. هيندوشاه ناخچيواني نين بو ديرلي لغتي 16-15 يوزايلليکلرده اورتايا چيخان چوخلو فارسجا-تورکجه سؤزلوکلره اؤزونون بؤيوک تاثيريني گؤسترميشدير. مثلا: قاراحیصاري  " شامل اللغت " ، خطيب رستم مؤولوي  " وسیله المقاصد " ، نعمت الله بن احمد رومي  " لغت نعمت الله "آدلي سؤزلوکلرينده ناخچيواني نين آدي چکيلن اثريندن يئترينجه فايدالانميشلار.  

  هيندوشاه ناخچيواني نين عرب ديلينده ترتيب ائتديگي  " مأوارد العرب " ( " عربين يئري و کؤکو " ) آدلي آنتولوگيياسي، فارسجا يازديغي  " تجارب السلف ( "سلفلرين تجروبه لري " ) آدلي تاريخه داير اثري  و  فارسجا بير نئچه شعيري ده  گونوموزه قدر گليب چاتميشدير.  

  هيندوشاه ناخچيواني نين اوغلو، مشهور تاريخچي شمسددين مهممد ايبن هيندوشاه ناخچيواني ده لغتچيليکله مشغول اولاراق 727/1317-728/1328-جي ايللرده  " صحاح الفرس "   " فارسجانين دوزگون سؤزلوگو "  آدلي اثر يازميشدير. 2300 عدد فارس منشالي سؤزون ايضاحي وئريلميش بو لغت ده 150 نفره ياخين فارسديللي شاعيرين اثرلريندن ايستيفاده اولونموشدور کي، اونلار سيراسيندا مؤليفين هموطنلري اولان آذربايجان شاعيرلري نين قلميندن چيخميش پوئزييا اؤرنکلري ده واردير.

محمد ناخچيوا نين بو ديرلي لغتي 1344/1966-جي ايلده تهراندا نشر اولونموشدور (6).  

  13-جو يوز ايلليگين ديرلي سؤزلوکلريندن بيري ده سيد احمد جمالددين ايبن موهننانين  " هيليتول-اينسان و هلبتول-ليسان "  ( " اينسانين بزگي و ديلين مئيداني " ) آدلي اثريدير. لغت مؤوجود عنعنه يه گؤره عرب ديلينده يازيلماسينا باخماياراق، اونون اساس آراشديرما اوبيئکتي قديم آذربايجان تورکجه سي، اونون سؤزلوگو و قرامماتيک اؤزلليکلريدير. لغتده يئر آلميش تورکجه سؤز و دئييملرين چوخو موعاصير آذربايجان ادبي ديلينده و اونون ديالئکت و شيوه لرينده ايشله نيلمکده دير. داها  چوخ  " ايبن موهننا لغتي "  آدي ايله تانينان بو قييمتلي کيتابدا دؤورون تورکجه سي ايله ياناشي، يازيلديغي چاغين مدنيتي، علمي، دؤولتچيليگي و اينسانلارين گونده ليک حياتي ايله باغلي ديرلي بيليکلر ده يئر آلميشدير. لغت ايلک دفعه  1900-جو ايلده تانينميش روس تورکولوقو پلاتون مئليورانسکي طرفيندن  " عرب فيلولوقو تورک ديلي حاقيندا "  آدي ايله چاپ اولونموشدور. مئليورانسکي نين فيکرينجه، آنونيم مؤليفين قلميندن چيخميش بو اثر 13-جو يوزايلليگين اورتالاريندا هولاکيلر زامانيندا ايرانين شيمالغرب طرفينده - گونئي آذربايجانين اورميه بؤلگه سينده يازيلميشدير. عاليم بو فيکريني اونونلا اساسلانديرير کي، بو کيتاب سؤزلوک اوچ ديلي: تورکجه ني، موغولجاني و فارسجاني احتيوا ائدير.

چونکي او زامانلار يئرلي اينسانلار و اوردونون موعين بير قيسمي تورکجه، ائلخانيلر موغولجا و اهالي نين بؤيوک بير قيسمي  ده فارسجا دانيشميشلار. لغته بؤيوک دير وئرن مئليورانسکي يازير: بورادا سسلرين مخرجي حاقيندا وئريلن بيليکلر بو گون آوروپا ديلچيليگي نين لابوراتورييا تجروبه سينه اساسلانان نظري تدقيقاتلاري قدر موکمملدير "  (1).

 عاليم بونو دا علاوه  ائدير کي، عوموميتله، 13-14 يوز ايلليکلرين شرق و تورک ديلچيليک علمي 19 - جو يوزايلليکده آوروپادا اورتايا چيخان تاريخي موقاييسه لي ديلچيليکدن هئچ ده گئري قالمير "  (1، 8).   

  بن مهنا لغتيني 1934-جو ايلده تورکيه ده (استانبولدا) نشر ائتديرن عبدالله  باتتال دا بو قناعتده دير کي، کيتابداکي کليمه لرين اساسيندا اسکي آذربايجان تورکجه سي دايانير.

اوچ بؤلومدن عيبارت اولان سؤزلوکده اؤنجه فارس ديلي، سونرا تورک ديلي و ان سوندا موغول ديلي ايله باغلي ديرلي معلوماتلار وئريلير. 

  لغت اوچ بؤلوم اوزره قورولموشدور. بيرينجي بؤلوم عربجه-فارسجا سؤزلوکدن عيبارتدير. سونراکي ايکي بؤلوم ايسه عربجه-فارسجا سؤزلوک و عربجه-موغولجا سؤزلوکدور. بو بؤلوملرين ده هر بيري ايکي ياريمبؤلومدن تشکيل اولونموشدور. بيرينجي ياريمبؤلومده آدي چکيلن اوچ ديلين فونئتيک، مورفولوژي و لئکسيکولوژي اؤزلليکلري ايضاح اولونور. ايکينجي ياريمبؤلومده ايسه بو ديللره آيد سؤزلرين عربجه يه ترجومه سي وئريلير. 

  بن موهننانين بيلديرديگي کيمي، او، بو کيتابي آدي چکيلن ديللري اؤيرنمک ايستينلرين آرزوسو ايله قلمه آلميشدير. مولليف اونو دا قئيد ائدير کي، کيتابي يازارکن هم خالق دانيشيق ديليندن، هم ده موختليف يازيلي قايناقلاردان يارارلانميشدير.  

  سؤزلوکده يئر آلان تورکجه سؤزلر سئمانتيک معنا قروپلاري شکلينده 24 بؤلومه آيريلميشدير. بو بؤلوملر آراسيندا بدنده کي  اعضالار، خسته ليکلر و  درمانلار، يئمک و ايچه جکلر خوصوصييله بؤيوک ماراق دوغورور.  

  لغتين موختليف اليازما نوسخه لرينده يئر آلان سؤزلرين عومومي سايي 1700-1920 جيواريندادير. 

  بن موهننانين بو ديرلي لغتيني 2008-جي ايلده مشهور  آذربايجان عاليمي، آکادئميک توفيق حاجييو آذربايجان ديلينه ترجومه ائتميش و نشره حاضيرلاميشدير.  مترجم لغتين  آذربايجان تورکچه سينه ترجومه سينده پ.مئليورانسکي نين نشره  حاضيرلاديغي کيتابي اساس گؤتورمکله ياناشي، ع.باتتالين نشريندن ده يارارلانميشدير. بو لغتين آذربايجان ديلينه ترجومه سينده کي  تورکجه سؤزلرين عومومي سايي 2839-ه برابردير.  قئيد ائديم کي، ت. حاجييئو بو ديرلي ترجومه سينه بؤيوک بير اؤن سؤز، ائلجه ده قئيد و شرحلر ده يازميشدير.    

  تانينميش تورکيه عاليمي نيهات سامي بانارلي  " رسيملي تورک ادبياتي تاريخي "  کيتابيندا بوتون تورک دونياسي نين بؤيوک شاعيري فوضولي حاقينداکي بيلگيلرينده اونا آيد ائديلن فارسجا-تورکجه بير منظوم لغتدن ده بحث ائدير. بانارلي نين  يازديغينا گؤره، فوضولي نين بو منظوم لغتي پاکيستانين لاهور شهريند کي پنجاب اونيوئرسيتئتي کيتابخاناسينداکي اليازما توپلوسوندا يئر آلميشدير. بانارلي تورک عاليمي فاحير ايزه ايستينادن فوضولي نين منظوم سؤزلوگوندن بو بيتلري اؤرنک اولاراق وئرير: 

  يئر- زمين، گؤگ-آسمان، گون-آفتاب- و آي-ماه،  

  روز-گوندوز، گئجه-شب، ييلديز-ستاره، سؤز-سخن 

  يئتر-ميرسد دان، يولدين-ز راه 

  گئديش-رفتن است  و  گليش-آمدن  

  يورگيم ياندي غميندن-سوخت قلبم از غمت 

  سورمادون حالوم-نپرسيدي بدان حال مرا. 

  گؤروندويو کيمي، بو اؤرنکده کي  ايلک بيتلر حسام الدین خويينين  " تحفه- حسام "  لغتينده ده بير  آز فرقلي شکيلده يئر آلميشدير. بورادا ديقتچکيجي داها بير مقام اؤرنکده کي  سون بيتين فضولینين بو ميصراعلاري ايله سسلنمسيدير.  

  پريشان حالين اولدوم، سورمادين حال  پريشانيم، 

  غميندن درده دوشدوم، قيلمادين تدبير درمانيم. 

  بونونلا بئله، دوشونورم کي، آدي چکيلن لغتين فوضولي قلميندن چيخماسي حاقيندا  قطعي بير فيکره  گلمک اوچون  آيريجا بير علمي آراشديرمايا احتيياج واردير. 

  يوخاريدا آديني چکديگيميز گؤرکملي آذربايجان عاليمي هوبئيش طيفليسي نين يوخو يوزومو  کيتابي اولان  " کامله التعبير "  اثريني 1548-جو ايلده تورکجه يه چئويرن خيزر بوازيجي نين  " کوامله التعبير "  آدلي ترجومه سيني ده موعين معنادا عربجه-تورکجه-فارسجا سؤزلوک کيمي ديرلنديرمک اولار. بئله کي، بوازيجي نين ترجومه سينده 1780-ه ياخين تورک منشالي سؤزون عربجه و فارسجا قارشيليقاري  دا وئريلميشدير. 

  12-جی يوزايلليکده ده آذربايجان ديلچيلري بير سيرا سؤزلوکلر ترتيب ائتميشلر کي،  اونلار سيراسيندا محمد حسين ين خلف برهان تبريزي نين 1651-جي ايلده  تاماملاديغي  " بورهان قاطع "  ( " توتارلي ثوبوت " ) آدلي سانباللي لغتي خوصوصيله موهوم يئر توتور. فارسجا ايضاحلي لغت اولان بو ديرلي کيتاب ايکي باخيمدان اولکي لغتلردن  فرقله نير: بيرينجيسي، او، حجمينه گؤره اولکي لغتلرله موقاييسه ده ان بؤيوکدور. بئله کي، بورادا 20.000-ه  ياخين سؤز يئر آلميش، عئيني زاماندا اونلارين هانسي ديله منسوبلوغو دا گؤستريلميشدير. ايکينجيسي، لغتده اليفبانين هر بير حرفينه آيريجا بير بؤلوم آيريلميشدير کي، اونلارين عومومي سايي عرب  اليفباسينداکي حرفلرين سايي قدردير، يعني 28-ه برابردير. محمد تبريزي سؤزلوکده 28 بؤلومدن سونرا علاوه  بير بؤلوم يازاراق، بورادا لغتي ترتيب ائده رک اونوتدوغو سؤزلري ايضاح ائتميشدير. 

   " برهان قاطع "  لغتي يازيلديغي واختدان اعتيبارا ياخين و اورتا شرقده بؤيوک شؤهرت قازانميش و سونراکي دؤورلرده اورتايا چيخان بو جور لغت اوچون باشليجا قايناق رولونو اويناميشدير. موعاصير ايران سؤزلوکلرينده ده ان چوخ موراجيعت ائديلن قايناق محض محمد تبريزي نين بو کيتابيدير. لغت عوثمانلي تورکييه سينده ده بؤيوک ماراقلا قارشيلانميش و 1797-جي ايلده مشهور مترجم عاصيم افندي طرفيندن عوثمانلي تورکجه سينه ترجومه اولونموشدور. عاصيم افندي بو ترجومه اوزرينده 6 ايل چاليشميش و تورکجه متنه علاوه لر ده ائتميشدير. بو ديرلي ترجومه 1799، 1835 و 1870-جي ايللرده ايستانبولدا و بولاکدا نشر اولونموشدور. محمد تبريزي نين  " برهاني قاطع "  کيتابي دا بير نئچه دفعه   نشر اولونموشدور کي، اونلارين سيراسيندا مشهور ايران عاليمي محمد معینين حاضيرلاديغي بئش جيلدليک تهران نشري (1963-جو ايل) خوصوصيله بؤيوک اهميت داشييير. عاليم بو نشره اؤزونون ديرلي قيدلريني ده علاوه  ائتميشدير.  

  ايضاحلاريني دا وئريلميشدير کي، اونلارين آراسيندا تورک منشالي سؤزلر ده واردير. محمد تبريزي، عوموميييتله، فارس ديلينده ده ايشلنن تورک منشالي سؤزلري آيريجا قيد ائتميشدير.  

  اورتا عصرلر آذربايجان لغتلري نين اکثريتي اوچون سعجيييوي اولان بير جهتي خوصوصي اولاراق قئيد ائتمک لازيمدير. بو ديرلي قايناقلار اوزرينده  آپاريلان موشاهيده لره اساسا دئيه بيلريک کي، اونلارين چوخونو يالنيز عاديجه لغت کيمي ديرلنديرمک اولمور. مثله بوراسيندادير کي، کلاسسيک لغتلرده، بير قايدا اولاراق، عرب، فارس و تورک ديللري نين اساس قرامماتيک قايدالاري نين دا ساده بير ديلله آچيقلامالاري، ايضاحلاري وئريلير. بو ديرلي لغت نومونه لري نين داها بير اؤزلليگي اونلارين تدريس وسايطي رولونو اوينامالاريدير. بئله کي، اونلارين چوخو مدرسه شاگيردلري و طلبه لري اوچون حاضيرلانميشدير.  ائله بو سببدن ده اورتا اسرلر آذربايجان لغتلري ساده و آنلاشيقلي بير ديلله ترتيب اولونموشدور. بو خوصوصيتينه گؤره کلاسسيک آذربايجان لغتلري موعاصير لغتلردن اساسلي شکيلده فرقله نيرلر. بو معنادا سؤزوگئدن لغتلري کلاسسيک تکجه لغت اؤرنکلري دئييل، عئيني زاماندا قرامماتيکا کيتابلاري کيمي ده ديرلنديرمک لازيم گلير. 

  اورتا عصرلر آذربايجان لغتلري نين بير حيصه سي فارسلارا و عربلره آذربايجان تورکجه سيني اؤيرتمک مقصديله ترتيب اولونموشدور. کلاسسيک لغتلرين موعين نومونه لري نين باشليجا هدفي ايسه عکسينه، تورکلره، او جومله دن آذربايجان تورکلرينه عرب و فارس ديللريني اؤيرتمک اولموشدور. 

  کلاسسيک لغتلريميزين بعضي نومونه لري نين شعير شکلينده اولماسي نين باشليجا سببي ده ائله بودور. شعيرين آسان بير شکيلده ازبرله نيب ياددا قالماسيني نظره آلان مؤليفلر بيله رکدن لغتلريني منظوم شکيلده قلمه آلميشلار. بو جور منظوم لغتلر، يوخاريدا  قيد اولوندوغو کيمي، اساسا مدرسه شاگيردلري، خوصوصيله ده کيچيکياشلي اوشاقلار اوچون نظرده توتولموشدور. 

  بئله ليکله، اورتا عصرلر آذربايجان لغتلري حاقينداکي بو کيچيک قيدلريميز آدي چکيلن دؤورده آذربايجاندا لغتچيليک صنعتي نين گئنيش اينکيشاف ائتديگيني، رنگارنگ اؤزلليکلر داشيديغيني،  بؤيوک بير يول کئچديگيني و گئت-گئده تکميللشديگيني آچيق-آشکار بير شکيلده ثوبوت ائدير.

ƏDƏBİYYAT:

 

T. Hacıyev. Dilçiliyimiz və dilçilik institutumuz / Türkologiya, № 3, 2015

Seyid Əhməd Cəmaləddin İbn Mühənna. Hilyətül-insan və həlbətül-lisan. Tərcümə, nəşrə hazırlayan, qeyd və şərhlərin müəllifi Tofiq Hacıyevdir. Bakı:  BSU, 2008

Təyyibə Ələsgərova, Cəmilə Sadıqova. Hüsaməddin Xoyi. “Töhfeyi- Hüsam”. Bakı: İrşad, 1996

Hinduşah Naxçıvani. Əs-Sihah əl-əcəmiyyə, Giriş, elmi-tənqidi mətn, əlavə, sözlük filologiya namizədləri C.Ə. Sadıqova və T.Ə. Ələsgərovanındır. Bakı:  Şərq-Qərb, 1993

Mənzərə Məmmədova. Qətran Təbrizinin “Təfasir” adlı əsəri // Əlyazmalar xəzinəsində, № 3, 1972, s. 63-72

Mənzərə Məmmədova. XIII-XIV əsrlərdə yaşamış azərbaycanlı leksikoqraflar// Əlyazmalar xəzinəsində, № 4, 1976, s. 94 -110

Cahangir Qəhrəmanov. Hinduşah Naxçıvaninin “Sihah əl-əcəm” lüğətin­dən fraqmentlər/ Əlyazmalar xəzinəsində, № 3, 197, s. 121-140

Mahmud  Qaşğarlı. Divanu luğat it-türk. Azərbaycan dilinə tərcümə edən Ramiz Əskər  4 cilddə, Bakı: Ozan - 2006

Agah Sirri Levend. Türk Edebiyatı  Tarihi. İstanbul, 1988

Sihah-ol-əcəm. Be-ehtemam-e Golamhoseyn Begdeli. Mərkəz-e nəşr-e daneşqahi. Tehran, 1361

Həsən Zərinəzadə. “Sihah əl-əcəm” və “Siyah əl-fürs”ün müqayisəsi / İran filologiya məsələləri. Bakı, 1973, II cild

Тифлиси  Абу-л Фазл Хубайш. Описание ремесел  (Байан ас-санаат). Перевод с персидского, введение  и комментарий Г.Л. Михалевича. Москва: «Наука», 1980.