آرازين حسرت ادبیاتي

 

ARAZIN HƏSRƏT ƏDƏBİYYATI

 

 

PROF.Maarifə Haciyeva

Dr.Hüseyn Şərqiderecek Soytürk 

پروفسور معارفه حاجی اووا

دکتر حسین شرقی دره جک سوی تورک

  

حسرت ادبیاتي دئديگيميز ادبيات ايکي دوستون، ايکي سئوگيلي نين، ايکي قونشونون، بير-بيرينه حؤرمت بسله ين  ايکي اينسانين حسرتيندن يارانان ادبيات دئييلدير.  بو ادبيات بير سويدان اولوب بير-بيريندن زورلا آيري  سالينان قارداش خالقين، اونون تورپاغي نين، بو تورپاغين يئتيشديرديگي اينسانلارين يازديغي جان يانغيسي ادبياتيدير. 

  آذربايجانين هم اوتایندا، هم ده بوتایندا 1813-جو ايلدن يارانان  " حسرت ادبياتي " نين مؤوضوسو اؤزونمخصوصلوغو ايله سئچيلن اؤزل مؤوضودور.  بو ادبياتين موضوعوسوندا  صمد وورغوندان سلیمان روستمه، مممد راحيمه، بختييار واهابزاده يه، مممد آرازا، نريمان حسنزاده يه، خليل رضا اولوتورکه، محمد حسین شهریارا، سهنده، سؤهراب طاهيره، بالاش آذراوغلونا، مدينه گولگونه، علي توده يه قدر نئچه-نئچه قلم اوستادي نين يازديغي حسرت نغمه لري دايانير. 

  هله کئچن عصرين ايکینجی ياريسيندا ياشاميش علی آغا کورچايلي بيزيم  " حسرت "  آدلانديرديغيميز مفهوما بئله آچيقلاما وئرير:

 

" پارچالانسا ايکييه واحيد بير تورپاق،

 فقط،سؤيله مک اولماز بونا نه اينتيظار،

نه حسرت،  يوخ، بونون آدي يوخدور، 

  وارسا، قارداش، اؤزون تاپ.  "

   

  آراز چايي بويونجا بؤلونمه دن سونرا آذربايجانين طالعي ايله يارانان حسرت موضوعوسو ميللي و اونلو خالق شاعيري صمد وورغونون ياراديجيليغيندا خوصوصي يئر توتور. اونون بير جوخ شعیرلرينده، خوصوصن ده  " 20 باهار "  اثرينده کي  آشاغيداکي کؤنولداغلاييجي  ميصراعلار ديقت چکير: 

   

  آخما آراز، دايان آراز، 

  اينصاف ائيله بيزه بير آز، 

  بير اورگي ايکي يئره، 

  جللاد کيمي بؤلمک اولماز.

 

  صمد وورغونون  " کؤرپونون حسرتي "  شعیري ايسه  " خدافرينين کؤرپوسو "  ايله علاقه دار خوصوصي اهميت داشييان شعیردير. بختييار واهابزاده بو شعیرين يازيلماسيني بئله شرح ائدير:  " 1948-جي ايلده صمد وورغون حيات يولداشي ايله برابر ایراوانا گئديرميش. آرازين  اوستوندن سالينميش  " خدافرين "  کؤرپوسونون يانيندا قاتارين دايانماسيندان ايستيفاده ائدن شاعير کؤرپونو سير ائتميش، کؤرپونون اوستونده بيتن اوتلار شاعيره پوئتيک ماتئريال وئرميشدير. عادتن چايلارين  اوستونده کي  کؤرپو بو تايدان او تايا کئچمک اوچون سالينلر. لاکين بو کؤرپو آراز چايي ايله ايکي يئره پارچالانميش واحيد بير وطني بيرلشديره بيلمير. ايکي قارداش بير-بيريندن آيري دوشموش، بو تايدان او تايا گئديش-گليش کسيلميش، کؤرپو ايستيفاده سيز قالميش و بونا گؤره ده اوستونده ياباني اوتلار بيتميشدير "  (باخ: ب.واهابزاده  " صمد وورغون " . باکي، 1969، ص. 236-237). 

  صمد وورغون همين شعیرده بو کؤرپونو يارادان معماري خاطيرلاياراق يازير:  

  بيلديم، او، معماردير، او ياراداندير، 

  ياخين گل اوخوجوم، باخ اللرينله، 

  او آراز اوستونده خيلي زاماندير، 

  آغلايير خار اولموش عمللرينه. 

  البته، صمد وورغون  " خيلي زامان "  دئديگي زامان آذربايجان تورپاغي 150 ايل ايدي کي، آراز بويو بؤلونموشدو، ايندي ايسه تاريخ 200 ايلي گؤسترير. 

  سووئت دؤنه مینين 40-جي ايللرينده  صمد وورغون  " کؤرپونون حسرتي "  شعیري ايله برابر  " يانديريلان کيتابلار "  شعیريني ده يازير. او،  " يانديريلان کيتابلار "  شعیرينده شاهليق رژيمي ايللرينده گونئی آذربايجاندا آنا ديلينده اولان کيتابلارين وحشيجه سينه يانديريلماسيني، خالقين ديلينه، اونون ميللي-معنوي ديرلرينه، تاريخينه توتولان ديوان کيمي ديرلنديره رک يازيردي:  

   

  جللاد! يانيب کول اولسا دا، کوله دؤنن آرزولار، 

  طبيعتين آنا قلبي قول دوغماميش اينساني. 

  ...قانلار ايله يازيلميشدير هر آزادليق داستاني، 

  طبيعتين آنا قلبي قول دوغماميش اينساني. 

  ...ازل باشدان دوشمنيمدير اوزو موردار قارانليق... 

  منم اودلار اؤلکه سي نين گونش دونلو اؤولادي!..

  هر تورپاغين اؤز عشقي وار، هر ميلتين اؤز آدي – دئيه شاعير سطير آلتي ميصراعلاري ايله شووينيستلره " هر ميلتين اؤز آدي وار "  مئساژيني گؤندرير. 

  آذربايجان ادبياتيندا (ايستر بوتای، ايسترسه ده اوتایدا اولسون) آراز چايينا موراجيعت بير خالق ديپلوماتيياسينا چئوريلميشدي. سئوگيليدن آيريلان دا، وطندن آيري دوشن ده، آغري-آجي چکن ده، دوست-دوشمني تانييان دا و ان عومده سي تورپاغي يارييا بؤلونن، حاقي تاپدانان، وطن دردي چکن ده، آرازين ديپلوماتييا ديلي ايله دانيشير. چونکي آراز بو چاغيريشدا بؤلندي، آييراندي، وطني تن اورتادان بؤلندي، قارداش-باجيني بير-بيريندن آيري سالاندي. بونا گؤره دير کي، ايستر فولکلوردا، ايسترسه يازيلي ادبياتدا آرازا اينسان کيمي موراجيعت خالقين ديپلوماتييا ديليدير. 

  آرازين کؤشکونه باخ، 

  اوروسون مشقينه باخ، 

  درد اليندن اوخورام، 

  دئييرلر عشقينه باخ. 

 

  آراز، آراز، خان آراز، 

  سولطان آراز، خان آراز، 

  گؤروم سني ياناسان، 

  بير درديمي قان، آراز. 

 

  آراز، آراز، خان آراز، 

  داغلاردان آشان آراز، 

  قارداشدان آيري سالدين، 

  قوروياسان کاش، آراز.

 

  آراز، سندن کيم کئچدي، 

  کيم غرق اولدو، کيم کئچدي، 

  سن گل قازاوات ائيله، 

  هانسي گونون خوش کئچدي.

 

  آراز بويو ايکييه بؤلونموش تورپاقدان يارانان حسرتي ديله گتيرن شاعيرلردن بيري ده بختيار واهابزاده دير. 1959-جو ايلده يازديغي  " گولوستان "  پوئماسيندا شاعير وطني ايکي ائدنلري لعنتليرک آرازا موراجيعت ائدير: 

    

  اي آراز سپيرسن گؤز ياشي سن ده، 

  کئچديکجه اوستوندن چؤلون، چمنين، 

  سني آرزولارا سد ائيله ينده، 

  نييه قورومادي سولارين سنين؟ 

   

  دمير چپرلري عشقيم، ديلگيم،  

  تاريخيم، عنعنه م اوسته قويدولار، 

  يارييا بؤلوندو جانيم، اورگيم، 

  يارييا بؤلوندو آرازدا سولار.

 

  آييرماق کيمسه يه گلمه سين آسان، 

  بير خالقين بير اولان دردي-سريني، 

  او تايدان بو تايا مصطفی پايان، 

  اوخويور واحيدين غزللريني. 

   

سونراکي شعیرلرينده ده بختييار واهابزاده  "آراز " 

موضوعوسونا دفعه لرله قاييداراق :

آرازين بو تايي وطنيم، 

او تايي وطنيم – دئيير.

  آذربايجان شاعيرلري نين يازديقلاري حسرت شعیرلرينده موضوعو و فيکير دايره لري گئنيش اولسا دا، اونلاري بيرلشديرن آذربايجان خالقي نين ميللي وارليغي، تاريخي و طالعي، وطنداشليق غيرتي، بير-بيرينه اولان سئوگيدن دوغان حسرتدير. بو موضوعودا يازيلان شعیرلرين پوئتيک زيروه سي نين سلیمان روستمله محمدحسین شهریار يازيشمالارينداکي حسرت موتيولري تشکيل ائدير. 

   

  اورک بيردير، بدن بيردير، شهریار، 

  وطن بيردير، وطن بيردير، شهریار

دئين سلیمان روستم قان قارداشينا حسرتله دئيير: 

  فيکريم بير آن آيريلمايير يانيندان، 

  گؤروم بلا اوزاق اولسون جانيندان. 

  آيري دئييل قانيم سنين قانيندان، 

  بير وطنين اؤولادييق، شهریار، 

  ماهني، شعیر فرهادييق، شهریار! 

   

  ايگيد، شانلي بير ميلتين اوغلوسان، 

  آدلي-سانلي بير ميلتين اوغلوسان، 

  ستارخانلي بير ميلتين اوغلوسان، 

  آيري دئييل آنان، آنام، شهریار، 

  جان قارداشين سلیمانام، شهریار. 

  سلیمان روستمين  " تبريزيم " ،  " آراز قيراغيندا " ،  " حسرت چکيرم " ،  " آنا ديليمه ديمه " ،  " بلي، جنوبلويام "  کيمي شعیرلرينده موقدس بير آمال – آذربايجان آمالي واردير. بو يئرده يئنه سلیمان روستم وطن تورپاغيني بير-بيريندن آييران آرازي خاطيرلايير.  

  

  قلبيمي آراز اوستونده کي  کورپو اوسته آسسينلار، 

  کئچيب فصيللر اونوتماسين بو شاعيرين شعیريني، 

  تئز کؤچرسم بو دونيادان باش داشيما يازسينلار، 

  ايکي يئره پارچالانميش اورگيمين درديني. 

   

آذربايجان تورپاغي نين ميللي روحلو شاعيري سهندين 

   

  يارادان اليني سيخ سلیمانين، 

  او ائل قدري بيلن يوکسک اينسانين، 

  سؤيله کي، هله ده آخير آراز، 

  دونيادا هئچ بئله اينصافسيز اولماز

 شعیرينه جاواب اولاراق سلیمان روستم يازيردي: 

   

  دوشونورم گئجه-گوندوز يئنه من، 

  بير ميلتچين ايکي اولماز بير وطن، 

  هم او ساحيل، هم بو ساحيل قديمدن، 

  تورپاغيمدير، تورپاغيدير سهندين، 

  وطن عشقي بايراغيدير سهندين. 

   

  بو حاق سؤزو کولکلره وئرميرم، 

  ندن، ندن او تايدان گول درميرم، 

  بو گوناهي من آرازدا گؤرمورم، 

  چونکي آراز  سيرداشيدير سهندين، 

  گؤزياشيمدير، گؤز ياشيدير سهندين. 

   

  آذربايجانين ميللي شاعيري شهریارين سلیمان روستمه يازديغي بير چوخ شعیرلري وار. بونلاردان بيري ده  " قارداشيم سلیمان روستمه ايتحاف " دير. بو شعیرده حسرت، هيجران سيمفونيياسي وار. 

  آرازيم وورسون باش داشدان-داشا، 

  گؤز ياشي گرک باشلاردان آشا، 

  نئجه ياد اولسون قارداش قارداشا، 

  نه دين قانير، نه ايمان آيريلیق، 

  آمان آيريليق، آمان آيريليق! 

 

  محمدحسین شهریارين سلیمان روستمه يازديغي شعیرلرين هاميسي حسرت، آيريليقدان يارانان شيکايت مکتوبلاريدير. شيکايت – يئنه آرازدير. او، بؤلدويو اوچون تقصيرليدير. 

   

  گؤز ياشيمسان، آي آراز، قويما گؤزوم باخسا دا گؤرسون، 

  نه يامان پرده چکيبسن ايکي قارداش آراسيندا! 

  دئمه داغ-داشدي، سلیمان مني سندن آييران شئي، 

  بير چيباندير کي، چيخيبدير گؤز ايله قاش آراسيندا، 

  شهریارين سلیمان روستمه يازديغي حسرت مکتوبوندان سطيرلر: 

  بيز بير دريا قان وئرميشيک، 

  زيندانلاردا جان وئرميشيک، 

  قيرخ نسلي قوربان وئرميشيک، 

  شريعتي تک اينسانلار، 

  تختي کيمي پهليوانلار! 

   

  هردن بئله سسين گلسين، 

  گؤزوموزون ياشين سيلسين، 

  منيم ده بير اوزوم گولسون، 

  هاچان سني گؤره بيللم؟ 

  قول بوينووا هؤره بيللم؟ 

   

  قارداشلارين گؤزوندن اؤپ، 

  بختييارين اوزوندن اؤپ، 

  صمدين ده سؤزوندن اؤپ، 

  من ده تکم، سيزه قوربان، 

  تک جانيم هاميزا قوربان! 

   

  ياخشيليغي اليميزدن آليبلار، 

  ياخشي بيزي يامان گونه ساليبلار

- دئين محمدحسین شهریار دا آرازين بو بيري تاييني اؤزله يير، چونکي 

   

  او تايدادير شکي، شيروان، قاراباغ، 

  بو تايدا دا مئشکين، اهر، قاراداغ، 

  بير-بيرلرين آرازدان آلميش سوراق، 

  آراز بيزي آيرمادا داغلاييب، 

  سون اؤزو ده گئجه-گوندوز آغلاييب. 

 

  دئيرکن ايکييه بؤلونموش آذربايجان تورپاقلاري نين آراز آدلي بير دردچکن اولدوغونو خاطيرلادر. 

   

  آراز دئير اولدوز کيمي آخارام، 

  گؤز آلتييلا ساغا-سولا باخارام، 

  قهرله نيب ايلديريمتک چاخارام، 

  کسمه لييم ايکي قارداش آراسين، 

  آغلادارام باغلاتمادان ياراسين. 

   

  بيزلر کي وار بير ديل، بير قان قارداشيق، 

  قارداش قالسين، اينسانلاريق، يولداشيق، 

  آياقلارا پيس ساريشيب سارماشيق، 

  پاسپورت ايله دئيير گلسن، سؤزوم يوخ، 

  پاسپورت دئيير، آدام واردير، اؤزوم يوخ. 

   

  1941-1945-جي ايللرده آذربايجاندا باش وئرن اينقيلابي حاديثه لره قاتيلان مدينه گولگون 1940-جي ايللردن بري او زامان سووئت آذربايجاني آدلانان آذربايجاندا حياتيني داوام ائتديرسه ده، حسرت و اوميدله  آذربايجاني – آرازين او تاييني ياد ائدير،  " مني اوزان ائتدي وطنين دردي "  دئيير. اونون  " چاغلا آرازيم، چاغلا "  شعیرينده دوغولدوغو تورپاق آنيلير، بو وطنله او وطنين آراسيندا قويولان تيکانلي مفتيللر شاعيره راحاتليق وئرمير.  " بيرجه يول يوخوما گل باري،  مگر يوخومدا دا سرحد وار منيم "  دئيير و غم اورتاغي اولان آرازا بئله موراجيعت ائدير: 

   

  نه آجييميش حسرتين، 

  نه شيرينميش شفقتين، 

  سني اونوتماق چتين، 

  چاغلا، آرازيم، چاغلا. 

   

  ايراندا شاهليق رژيمي ايللرينده  شووينيستلر آذربايجان تورکلري نين آنا ديلينده مکتبلر، مدرسه لر آچيلماسيني قاداغان ائتميشدي. آنا ديلينده يازيب-اوخوماق ايمکانيندان محروم اولمانين آغري-آجيسي مدينه گولگونون شاه جللادلاري طرفيندن اؤلدورولموش آذربايجانين موجاديله چي قيزي مرضيه اوسکويييه ايتحاف ائتديگي بير شعیرده ايفاده ائديلميشدير.  اوسکوده موعليمليک ائدن،   " زباني مادر "  (آنا ديلي) درسينده شاگيردلرينه اؤز آنا ديلي اولان آذربايجان تورکجه سي ايله شعیر ازبرلتديگي اوچون  مرضيه اوسکويي  سوچلاناراق شاه زيندانلارينا آتيلميشدير. فقط بو قهرمان موعليمه خانيم خالقي نين قلبينده ياشاماقدادير. مدينه خانيم يازديغي کيمي: 

  تبريز اوستو اوسکودو، 

  تبريزين کؤکسونده سن، 

  مرضيه 

  آغگون آرزولارينلا، 

  بوتون يئر اوزونده سن، 

  مرضيه - مرضيه. 

اؤز خالقي نين ديليني تدريس ائتمک اوچون حياتي سؤندورولن مرضيه اوسکويي بختييار واهابزادنين ده  " مرضيه "  آدلي پوئماسي نين يازيلماسينا وسيله اولموشدور. 

  آراز، تبريز... شعیرلريميزده، نثريميزده، آديميزدا، سوي آديميزدا ياشايان کلمه لردي. بونلار اؤزونه آراز تخلوصو سئچن شاعير مممدين شعیرلرينده پوئتيکلشه رک مممد آرازا چئوريلن سوي آديدير.  " من آراز شاعيرييم " ،  " آراز ياديما دوشوب "  شکلينده  اونون شعیرلرينده پوئتيکلشه رک شعیر چلنگينه چئوريلير آراز. 

   

  منه دئيير بيريسي، 

  چوخ يازيرسان آرازدان، 

  نه بيليم گاهدان قوزو، 

  گاهدان آسلان آرازدان،

 

  ...يوخ آراز دئينده من، 

  يالنيز چاي دوشونمورم، 

  او تاريخدير، باخيرام، 

  آغلايير دا، گولور ده. 

  ...من آرازين سسييم، 

  من اونون ياتاغييام، 

  من اونون ساحيلييم، 

  من اونون لپه سييم، 

  داغلاري يارا-يارا، 

  ان بؤيوک دريالارا، 

  ديلده سؤز، الده قلم، 

  اونونلا گئتمه لييم. 

   

  آذربايجان تورپاقلاري نين آراز چايي ايله باغلي يارانان باياتيلار دا خالق ادبياتيندا خوصوصي مرحله يه ماليک حسرت پوئزيياسيدير. 

  آراز او تايي داملار، 

  آغزي قيفيللي داملار، 

  او تايا حسرت قاليب، 

  بو تايداکي آداملار. 

   

  آرازام من بولوننام، 

  ساحيل بويو دولاننام، 

  آيريليق دوشن گوندن، 

  درددن درده قالاننام. 

   

  آرازدير غم بيچيبدير، 

  درد اکيب غم بيچيبدير، 

  دينديرمیين غم آغلار، 

  آراز حسرت بيچيبدير. 

  گؤروندويو کي،  ايکي قارداشا حسرتيله يازيلان شعیرلر جان يانغيسيندان يارانان پوئزييا نومونه لريدير، آذربايجان ادبياتي نين دوغماسيدير. بو شعیرلر ادبياتيميزين سياسي شعیرلري دئييل، حسرت شعیرلريدير.