آذربايجاندا يئر آدلارينين ايضاحي

 

 

آذربايجاندا يئر آدلارينين ايضاحي

G.Azərbaycanda yer adlarının izahı

Prf.Dr.Həcər Hüseynova


Dr.Hüseyn Şərqidərəcək Soytürk   

 دکتر حسين شرقي دره جک سوي تورک 

پروفسور دکتر  هجر حسين اووا 

    

 خلاصه. بيلديگيميز کيمي، تبريز يئر اوزونون ان قديم اينسان مسکنلريندندير.

 آذربايجان کيمي بير جوغرافييانين مرکزيني ايفاده ائدن تبريز شهري هر زامان حاکيميتلرين ديقت مرکزينده اولموشدور.

آنجاق تبريز آدي نين آنلامي، ائتيمولوگيياسي باره سينده موختليف وئرسييالار ايره لي سورولموشدور. ايلک نؤوبه ده، قئيد ائتمک لازيمدير کي، شهرين آدي دا اؤزو قدر قديم و معناليدير. بعضا تورکلر اونو تومريس خاتونون شرفينه اولاراق تومريس//تاوريس//تابريز فونئتيک واريانتلاريندا ايضاح ائتميشلر. تبريز آدي حاقيندا موختليف فيکيرلر سؤيلنسه ده، بو سؤزون قديم تورک سؤزو اولماسي دانيلماز فاکتدير. تاريخي حاديثه لردن، لينقويستيک و ائتنولينقويستيک آراشديرمالاردان معلوم اولور کي، تبريز سؤزو قديم شرق-تورک سؤزودور. 

    

  آچار سؤزلر: يئر آدلاري، جنوب، ميللي، توپونيم، تورک 

    Расшифровка географических названий в Южном Азербайджане

Хусейн Шаркыдереджек Сойтюрк

Тегеран

Хаджар Гусейнова

АГПУ, профессор кафедры

азербайджанского языкознания

Резюме. Как известно, Тебриз - одно из старейших человеческих поселений на Земле. Город Тебриз, который представляет собой центр такой географии, как Азербайджан, всегда был в центре внимания властей. Однако по поводу значения имени Тебриз выдвигались разные версии. Прежде всего, следует отметить, что название города такое же древнее и многозначительное. Иногда турки объясняли это в честь Томрис Хатун в фонетических вариантах Томрис // Таврис // Тебриз. Хотя по поводу названия Тебриз существуют разные мнения, неоспоримым фактом является то, что это слово является древнетюркским. Исторические события, лингвистические и этнолингвистические исследования показывают, что слово Тебриз - слово древнего Востока.

   Ключевые слова: топонимы, южный, национальный, топоним, турецкий

 

Explanation of place names in South Azerbaijan

 

Hussein Sharkhıderejek Soyturk

Tehran

Hajar Huseynova

ASPU, Professor of the Department

of Azerbaijani Linguistics

 

Summary. As we know, Tabriz is one of the oldest human settlements on earth. The city of Tabriz, which represents the center of geography like Azerbaijan, has always been in the center of attention of the authorities. However, various versions have been put forward about the meaning of the name Tabriz. First of all, it should be noted that the name of the city is as ancient and meaningful. Sometimes the Turks explained it in honor of Tomris Khatun in the phonetic variants Tomris // Tavris // Tabriz. Although there are different opinions about the name of Tabriz, it is an undeniable fact that this word is an ancient Turkish word. It is known from historical events, linguistic and ethnolinguistic researches that the word Tabriz is a word of the ancient East.

 

        Keywords: place names, southern, national, toponym, Turkish

 

  آننوتاسييا. مقاله ده اوزون ايللر حقيقي رئال تدقيقاتلاردان کناردا قالان گونئی آذربايجان يئر-يورد آدلاري ائتيمولوژي، سئمانتيک تدقيقاتا جلب ائديلميشدير.  آذربايجان توپونيملري نين ائتيمولوگيياسي نين سياسي مقصدلر نامينه تحريف ائديلمه سي، تورک منشالي قديم يئر آدلاري نين تحريف ائديله رک فارس منشالي آدلار کيمي ايضاح ائديلمه سي مسله سينه موناسيبت بيلديريلميشدير. 

  آکتوالليق. موعاصير ديلچيليگين آکتوال مسله لريندن بيري نين ده قديم يئر-يورد آدلاري نين، توپونيملرين توپلانماسي، تدقيقي و ائتيمولوژي جهتدن دوزگون علمي قناعتلرين الده ائديلمه سي مسله سيدير. بو سيرادا  آذربايجان توپونيملري نين ده سيستئملي شکيلده آراشديريلماسينا احتياج واردير.  

  مئتود. آراشديرما زاماني تاريخي-موقاييسه، قارشيلاشديرما و آرئال مئتودلاردان، موعاصير ديلچيليک اوصوللاريندان ايستيفاده ائديلميشدير.  

گيريش. و. مينورسکي (مشهور ايرانشوناس عاليم) دئميشدير کي، ياقوت حموي  " منجم البلدان "  اثرينده يازير کي  بو شهرين آدي ياقوت خانيمين شهري زيارتي زاماني تئبريز آدلانميشدير (17). بو ايسه اونو سؤيله مه يه اساس وئرير کي  تبريز قديم آذربايجان منشالي آددير. خزر دنيزي نين جنوبوندا ياشايان اينسانلار بو شيوه ايله دانيشيرميشلار. مينورسکييه گؤره. بو آدين تاريخي ساسانيلردن اؤنجه لره گئديب چيخير. تئبريز سؤزو عرب قرافيکاسي ايله يازيلارکن تبريز واريانتي فورمالاشميشدير. يعني تئبريز > تبريز اولموشدور (4). 

  موسطافا مؤميني نين قناعتينه گؤره،  " دانيشنامه ايسلامي "  کيتابيندا آذربايجانين يئرلي اهاليسي بؤلومونده تبريزين آدي توري//تورو (يعني ايستي سو)//دورو .تميز،پاک آنلاميندادير.بو حاقدا خالق ائتيمولوگيياسي مؤوجوددور.

ميلادي تقويمين 4-جو يوزايلينه قدر يئرلي اهالي تبريز سؤزونو تورو//توري کيمي ايشلتميشدير 5. حاضيردا تبريزين قمبرآباد قصبه سي نين ساکينلري تبريزين آديني تورو//توري کيمي ايشلتمکده دير. قديم يازيلاردا، او جومله دن  " ابوالفدا "  اثرينده شهرين آدي تبريز//توريز اولاراق گؤستريلميشدير. آلمان ديلچيسي ويلهئلم آيرلئسس ايسه تبريز آدي نين، ائتيمولوگيياسي نين مورککب اولدوغونو قئيد ائتميش و آدين ايکي سؤزدن عيبارت اولدوغونو سؤيله ميش: تب + رز کومپونئنتلريندن عيبارت اولوب،  " ايستي، سيجاک سو "  معناسيني ايفاده ائتديگيني بيلديرميشدير.  

  هيجري 721-جي ايلده  " تقويم البلدان "  کيتابيندا شهرين آدي توريز شکلينده گؤستريلميشدير. عئيني آد  " وفيات اوليان "  کيتابيندا همين واريانت قئيد ائديلميشدير3. مشهور ابن بطوطه  "  مووکيل بن  امير جلال الدين بن الفلکي  التوريزي "   ده  بير شخص آدي و همين شخصين منسوب اولدوغو يئر آدي کيمي سؤز آچميشدير. يعني امير جلال الددين بن فلکي  توريزي. بو آدين ترکيبينده، گؤروندويو کيمي، توريزي سؤزو يئر منسوبلوغو  کيمي ايشله ديلميش، شخصين منسوب اولدوغو يئري ايفاده ائتميشدير.  

  ميلادي 5-جی عصرده پاوئستوس بوزاند تبريزين آديني ائبروز//ئورئز//ئورئش اولاراق قئيد ائتميشدير. يئنه ميلادي 11-جی عصرده ستئپانوس تارقونئتس شهرين آديني ائوروز و يا دئوروز شکلينده ايفاده ائتميشدير. بو سؤز ايسه ائو سؤزو ايله علاقه لنديريله رک  " توپلو، توپلاشما، توپلو مسکونلاشما "  شکلينده ايضاح ائديلميشدير6 . بعضي آراشديرماجيلارا گؤره، تبريزين آدي ميلادي 246-جي ايله قدر  " شهريستان " آدلانديريلميشدير. تورک سويلو اشکانيلرين حاکيميته گلمه سي ايله شهرين آدي ائورژ و يا ائورز آدلانديريلميشدير. تاريخده اردوان-اشکاني سرکرده سي اردشير ساساني طرفيندن اؤلدورولدوکدن سونرا تبريزي ساسانيلر اله کئچيرميش و شهرين آدي ائوروژ، يعني اينتيقام و يا اؤج آلما معناسيني ايفاده ائتميشدير. اؤج سؤزو قديم سؤزدور، حاضيردا دا ديليميزده  ايشلنمکده دير.  

 تبريز شهري نين آدي ائولييا چلبي نين  " سياحتنامه " سينده  " ايستي تؤکوجو، قيزديرما تؤکوجو "  کيمي ايضاح ائديلميشدير. بو ايسه سهند داغيندان وولکان پوسکورمه سي و همين وولکانين، آتشين تبريز دوزونده سويوماسي ايله علاقه لنديريلميشدير. يعني تبريز سهند داغي نين اودلاري نين سويوماسي، فارسجا  " تبريز "  اودون، آتشين سويودوغو يئر شکلينده معنالانديريلميشدير (7). 

  تبريزين- موختليف سسلنمه فورمالاري واردير:10-11-12-13-14-15-16-17-18-19 

  1.تئبريز- اسکي خزرلرين شيوه سينده. 

  2.تربيز- بو گون تبريزليلرين شيوه سينده. 

  3.تورئژ – بيزانسلي فاوئست ميلادي 4-جو يوزيلده و ميلادي 11-جي يوزيلده آسسوليک همچينين ميلادي 4-جو يوزايلده واردان طرفيندن يازيلميشدير. 

  4.تورئئژ –مارجو پولونون سياحتنامه سي ميلادي 13 –جو يوزايلده. 

  5.تاوراز – قديم فارس ديلينده. 

  6.تارامئکس –آسسوريجه  ايکينجي شاروخين ( سارگئن) کيتابه سينده ميديياليلار طرفيندن ميلادان اؤنجه 705-732 –جي ايللرده . 

  7. تاوري // توري -70 – 80 ايل اؤنجيه دک تبريز و اطرافي نين دئييم طرزينده. 

  8.تاوريس – فرانسيز ديلينده ميلادي 8-9 –جو يوزايللرده. 

  9. تاوريس و توريز-  " ابن بطوطه نين سياهتنامه سي "  و  "  تقويم البلدان " ايسلامدان سونراکي يازيليش طرزينده. 

  10.تاوريز – اولئاريوسون  " سياهتنامه " سينده. 

  11.تيويريسس – تيويريز  ائولييا چلبيده. 

  12. گابريز – گئروتانين  " سياهتنامه " سينده. 

  13. تاورئگ – داورئگ –ئرمه ني قايناقلاريندا. 

  14 . تاربيسس – آسسور شاهي نين سئنهاريب کيتابه سينده، ميلاددان اؤنجه 681-705 – جي ايللرده. 

  15. تارمايسس –  تايپسيسس  " تبريز  قديم از کوهنترين اَيام تا کنون "  کيتابي. 

  16. تارماکيس – تامراکيس  "  7 مين ايل ايران تورکلري نين تاريخي  "  کيتابي. 

  17. تابريس –دابريز – اوژئن فلاندئن. 

  18. تاباريز –تبار ايز – دکتر. حسیين محمدزاده صديق دوزگون. 

  19. تبريز – ايسلامدان سونراکي قايناقلاردا ( " فتوح البدان  "   " سؤورئتولرز  "    "  تاريخ  طبري  "   "ابن اثير  "   "  تاريخ يعقوبي  "  و بو گون کي يازيلاردا. 

باشقا بير منبعده تبريز آدي تامراکيز//تارماکيس شکيلده گؤستريلميشدير. قئيد اولونموشدور کي، بو آددا بير تورک طايفاسي مؤوجود اولموشدور. اونلار تيکديکلري قالايا اؤز ائتنوسلاري نين آديني وئرميشلر. 

  پروفئسور محمد تاغي ذهتابي  کيريشچي  " ايران تورکلري نين اسکي تاريخي "  کيتابي نين 559-جو صحيفه سينده تبريز شهري نين ائتيمولوگيياسي مسله سينه 4 صحيفه  يئر آييرميشدير. اونون فيکرينجه،تبريز حربي قالا اولموش و تامراکيس آدلانميشدير. يعني تامراکيس بو قالانين تمليني قويان شخص اولموشدور18. ميلادي اوچونجو مين ايلليگين سونلاري، ايکينجي مين ايلليگين اوللرينه آيددير. آريلرين بو جوغرافييايا گلمه لريندن چوخ اؤنجه بير آسسوري لؤوحه سينده تبريز حاقيندا اوخويوروق: تامراکيس بورادا بزکلي ديوارلاري، مؤحکم بونؤوره لي مؤحکم بينالاري دوزلتديرميشدي. بو قالا سو ايله دولو خندکلرله قورونوردو. بورادا قوشون هميشه حاضير وضعيتده ساخلانيليردي... 

  من بو ويلايتي هؤرومچک تور آتان کيمي محاصيره ائتديم و قالاني ايشغال ائتديم " .يئنه همين منبعده محمد تاغي ذهتابي  کيريشچي يازير: بو شهرين تامراکيس آديني تومريس خانيمين آدي ايله باغلي ايضاح ائدنلر واردير18. لاکين تبريز اهمنيلر، يعني هخامنشيلرين بيرينجي شاهي کوروش//کيرين دؤيوشده اؤلدورولن تورک ايسگؤز –ماسساگئت و يا ايسکيت ائللري نين باشچيسي افراسياب و يا  آلپ ار تونقانين قيزي تومريسدن چوخ-چوخ اوللر تيکيلميشدير. يئرلي قاراداغ اهاليسي ايندي ده تبريزه  " تومروس " ،- دئيه خيطاب ائديرلر.  

تبريز سؤزو ايکي کلمه دن دوزلن بير آددير:تبر-ايز. ديگر واريانتي ايسه تومار-اوس//تامرا-کيس اولموشدور. بوراداکي اوس//وز//يز کومپونئنتي نين آچيقلاماسي قديم تورکجه ميزده قبيله، طايفا آنلاملي  " هوز "  سؤزو ايله باغليدير.تورک ديليندن کورد ديلينه کئچميش بو سؤز فارس ديلينده ايشلنمکده دير. بعضا  " کند "  معناسيندا دا ايشلنميشدير.  

" کوردجه-فارسجا هژار "  سؤزلوگو (سوروش نشرياتي.1376 شمسي ايلي) و  " بيجار- کوردجه سؤزلوگو " نده (همين نشريات 1379 شمسي ايلي) همين سؤز قئيده آلينميشدير.  

  قئيد ائتمک لازيمدير کي، بيزيم آرخايکلشميش تورک سؤزلري نين چوخو چاغداش کورد (کورمانجي) ديلينده ايشلنمکده دير. مثلل  " هون "  سؤزو قديم تورکجه ده  " ائل، خالق "  معناسيندا ايشلنميشدير.

 ( "وارليق "  درگيسي قيش-1377 شمسي ايلي، ص.18). نون حرفي نين ز يه چئوريلمه سينه گؤره  "ديوان لغات التورک "  ده ده اؤرنکلر واردير. ماحمود کاشقارلي نين دکتر.  دبير سياقي نين کؤچوردويو سؤزلوگونده  " سه مز "  سؤزونون ايضاحيندا بو مسله يه توخونموشدور. 

" سه مز "  سؤزو  " کؤک، دولو، توپپوش "  معناسيندادير.بورادا عرب ديلينه اويغون اولاراق، بو سؤزده يازيدا ن حرفي  ز يه چئوريلميشدير. بو فاکتا اساسلاناراق دئيه بيلريک کي، هون سؤزو ده هوز سؤزونه چئوريلميشدير. يعني هون طايفا آدي اؤنجه لر هوز شکلينده يازيلميشدير. مثلل، ايرانين حوزيستان ايالتي و يا همدان ايالتي.    همدان ايالتي نين اهاليسي هوري-آراتتا-ايللان-کوتتي-ماننا و س. اولموشدور. بعضيلري ده بو سؤزو  " ائل، اوبا، خالق "  معناسيندا ايستيفاده ائتميشلر. زامانلا هوز سؤزو اؤز يئريني باشقا سؤزلره وئرميش، لاکين بعضي يئرلرده اهالي همين سؤزدن ايستيفاده ائتمکده دير. مثلا؛ خوز//خون//هون//ائل و س. ه-ح حرفي خ-يه چئوريلميشدير: خوزيستان//هوزيستان. بعضي يئرلرده گ> ک-يه چئوريلميشدير. بئله ليکله، هوز سؤزو  تبريز سؤزونده ايز //هيز فورماسينا چئوريلميشدير. يعني اينسانلارين ياشاديغي يئر، شهر. 

  تبريز شهري نين تاريخي، ميفولوگيياسي، ائتنوقرافيياسي و ديلچيليک باخيميندان ماراقلي جهتلري واردير. معلومدور کي، وئريلن بعضي ايضاحلار بعضا اويدورما اولوب، فانتاستيک فيکيرلره سؤيکنه بيلير. بعضا آدين معناسيني ايفاده ائدن معنالار ساختالاشديريلا بيلير. مثلن، تبريز شهري نين آدي نين ايضاحیندا دئييلير کي، گويا هارون الرشيدين خاتونو زوبيده خانيم خسته له نير، قيزديرمادان اؤلمک اوزره ايکن اونو تبريزه گتيريرلر. بورادا زوبيده خانيم ساغالير. بو دا اويدورما ائتيمولوگييادير، علمي جهتدن قبول ائديله بيلمز. همين افسانه يه گؤزه، تبريز آديني  " قيزديرما سالان، قيزديرما تؤکن "  شکلينده ايضاح ائتميشلر. حالبوکي زوبيده خانيم فارسجا بيلمه ميش، عربجه دانيشميشدير. او باخيمدان گرک همين شهره  " يزيل الحمي "  دئمک لازيم گلردي. 

  ايضاحي يازانلار بعضا موختليف ماراقلارا خيدمت ائتديکلريندن يوزوملاري دا اونا اويغونلاشديرميشلار. آنجاق نظره آلماق لازيمدير کي،  " تب//تو " -حرارت سؤزلري عرب سؤزلريدير و داغدان، داشدان آخان وولکان آخينتيسي آنلاميندا اولاراق سهندين پوسکورمه سي نتيجه سينده همين لاوانين تبريز دوزنگاهيندا سويوماسينا گؤره او حرارتي سؤندورن، سويودان "  معناسيندا قبول ائتمک داها دوغرو اولار. 

   احتيمال ائتمک اولار کي، شهره آد ائله بو خوصوصيتينه گؤره وئريلميشدير. سهنددن آخان قاينار وولکان آخينتيسي نين تبريز دره سينه آخيب، اورادا سويوماسي پروسئسيني عکس ائتديرن  " حرارت سويودان، حرارت سالان " .  

 حاضيردا تبريز ياخينليغيندا آينالي دئييلن مکان وار. اصلینده يئرين آديني چوخ واخت يانليش اولاراق عئينالي آدلانديريرلار. بونون سببي وولکان لاواسيندا يئرين سطحينه چيخان پارلاق داشلارين ايستي نين تاثيريندن قيزارميش تورپاقدا اوزاقدان پاريلداماسيدير. (مولليف)  

 ديليميزين جنوب ديالئکتينه منسوب اولان تبريز شيوه سينده آ>ئ؛ آ>ع عوضلنمه لرينه اساسن، آلما>الما؛  آينا>عينا شکلينده تلفوظ ائديلير. بونا گؤره ده همين جوغرافي آدين دوزگون تلفوظ شکلي  " آينالي "  اولماليدير، يعني  " پاريلدايان داغ " .  

  نتيجه: 

  نتيجه اولاراق اونو قئيد ائده بيلريک کي، فارس ديلينده تورک منشالي يئر آدلاري نين ايضاحي، ائتيمولوگيياسي فاجيعوي شکيلده دير. بير چوخ توپونيملريميزين ماهيتينه وارمادان، اونلاري فارسجايا ترجومه ائده رک ايضاح ائتمه يه چاليشيرلار. بو دا نه علمي جهتدن، نه ده اينسانليق باخيميندان دوغرو دئييل. مينلرجه بئله آدلاري نومونه گؤستره بيلريک. گليسي-گلوسنگ؛ آتقيران-اسب کوشان؛ دميرچي-حددادان؛ آخما قايا - احمقيييه؛ ساري قايا-ساريقييه و س. بو کيمي آدلاري فارس ديلينده معنالانديريب اؤز ديللرينه اويغونلاشديرميشلار. تبريز آدي دا تب-قيزديرما؛ ريز-دوشورن شکلينده ايضاح ائديلميشدير. سؤزسوز کي، شهر اينسانين حرارتيني دوشورن يئر دئييل.  

  ديلچيليگين توپونيمييا شعبه سينده مهم پروبلئملردن بيري ميللي تورکمنشالي توپونيملريميزين دوزگون علمي ائتيمولوگيياسي نين اؤيره نيلمه سيدير. ديلچيلرين   بيليمسل تاپينتيلاري، حتّی بعضا فانتاستيک مصلحتلري اساسيندا بير ائلين، بير اوبانين، بير خالقين، حتّی بير ميلتين بئله طالعيي دييشه بيلير. چونکي هئچ بير مکاني آدسيز، هئچ بير آدي صاحيبسيز ايضاح ائتمک دوزگون دئييل. حالبوکي آذربايجان جوغرافي آدلاري، آدلارين ديل منسوبيتي، يارانما و فورمالاشما واحيدلري منشاجه عئينيدير. تبريز آدي دا بو قايدادان ايستيثنا دئييل. اونون منشايي، باشقا ديللرده، باشقا سيستئملرده آراماق دوغرو دئييل. تبريز آديني تورکمنشالي يئر آدلاري سيستئمينده آراشديرماق داها دوغرودور. اونا گؤره ده تبريزي آذربايجان جوغرافي ديل موحيطينده آراشديرماق لازيمدير.  

   

ادبیات

1.مؤمنی، مصطفی، «تبریز»، دانشنامه جهان اسلام (جلد ششم)، بنیاد دائرةالمعارف اسلامی

2.یاقوت. معجم‌البدان. صص. ج ۱ ص ۸۲۲.

3.مینورسکی. تاریخ تبریز. صص. ۶.

4.مینورسکی. تاریخ تبریز. صص. ۸۷.

 5.مجله یول، شماره ۱۷، سال ۱۳۷۰، ص ۲۱

6. شاردن، ج ۲، ۱۳۳۵، ص ۴۱۴

7.آذربایجان در سیر تاریخ ایران، رئیس نیا، ۱۳۷۰، ج ۲، ص ۱۰۲۴

8.قاموس اعلام، استانبول، ۱۸۸۹، ج ۱، ص ۲۸

9.برهان قاطع، خلف تبریزی، همان، ص ۲۳2.

10.Tabrīz, Encyclopaedia of Islam

11.Graham Wilson (1896), p.323

12. ackhouse Eastwick (1864), p. 327.

13.Tabrīz, Encyclopædia Britannica

14•«Tabrīz»، Encyclopædia Britannica 2008

15•Backhouse Eastwick, Edward (1864)، Journal of a Diplomate's، Smith, Elder and Co.

16•Graham Wilson, Samuel (1896)، «Three Years' Residence in Persia»، Persian Life and Customs، Oliphant, Anderson and Ferrier

17•Minorsky, V. , -[C.E. Bosworth]; Blair, Sheila S.، «Tabrīz»، Encyclopaedia of Islam (2nd Edition)، Brill Academic Publishers،

18. Məhəmmədtağı Zehtabi KİRİŞÇİ “ İran türklerinin əski tarixi .tebriz əxtər nəşriyyatı .2003 . s 559