حکومه بيللوري Hökumə Billuri (1026-2000)

حکومه بيللوري  Hökumə Billuri (1026-2000)


 

دکتر ساکيبه السگر اوا 

Sakibə Ələsgərova

filologiya üzrə fəlsəfə doktoru dosent, əməkdar müəllim

                                                                                                 

 

 

 

عؤمور گئدر ايزي قالار، 

  شاعير گئدر سؤزو قالار. 

                      ح.بيللوري 

  حکومه (حکیمه) ايبراهيم قيزي بيللوري 3 مارت 1926-جي ايلده گونئی آذربايجانين زنجان شهرينده، دميرچي عاييله سينده  دونيايا گؤز آچيب. بوتون اوشاقلار کيمي، او دا قايغيسيز، خوشبخت بؤيوموشدو. يئنييئتمه ياشينا چاتاندا ايسه حيسسلري، دويغولاري اونون دوشونجه سيني دييشير، تفککورونده حاقا، عدالته تاپينماق کيمي فيکيرلر اويانيردي. البتته، بونلار هله تام فورمالاشماميشدي. 10-15 ياشينداکي  قيز بيلميردي کي، نه اوچون تبريزدن، زنجاندان قوهوملاري، قونشولاري، قارداشلاري آراز چايي نين او بيري سمتينه جان آتير، جنوبدان شيمالا باش گؤتوروب گئديرلر. حکومه اورتا مکتبي يوکسک قييمتلرله بيتيرديگي اوچون اونا تکليف ائتديلر کي، ائله اورادا قاليب موعليم ايشله سين. او بو تکليفدن فرحلندي. ايلک گوندن اعتيمادي دوغرولتماغا چاليشدي. لاکين دويوب، آنلاييب گؤرنده کي، قوهوم-اقربالاري پرن-پرن دوشوب، بلکه ده اؤزوندن آسيلي اولماياراق گيلئيلندي:

 " داغلار، اوخ اولوب گؤزومه باتيرسان. آراز،

منيم قانيم کيمي نييه بولانيق آخيرسان؟

اوزون دؤنسون، آي خان آراز،

 نييه قارداشي قارداشدان آييريرسان؟ " 

گنج حکومه سئوينجيني، کدر و اينتيظاريني پوئتيک فورمادا بيلديرمگي باجاريردي. دوزدور، او، هله گله جک قيسمتيني، نئجه حيات طرزي ياشاياجاغيني بيلميردي. يالنيز خياليندا بو حيسسلر دولاشيردي:  " زامان، دؤوران ان عدالتلي حؤکمدار، عاديل حاکيمدير. بو موطلق قانونلار قارشيسيندا نييه حاقسيزليق قاليب گلير؟ "    

  ايلک شعیرلريني اورتا مکتب ايللرينده يازيب. قلمه آلديغي  " فهله " ،  " گؤيرچين " ،  " صبح آچيلدي "  آدلي ايلک شعیرلري  " آذر " ،  " وطن يولوندا "  قزئتلرينده و  " آذربايجان "  ژورناليندا درج اولونوب. 

سید جعفر پيشوري نين ليدئري اولدوغو آذربايجان دئموکرات پارتيياسي نين زنجان ويلايت کوميته سينده رهبر وظيفه لرده چاليشيب. 

1946-جي ايلين دئکابريندان قوزئی آذربايجاندا موهاجيرتده ياشاييب. همين واختدان فعال بديعي و علمي ياراديجيليقلا مشغول اولوب، دؤوري مطبوعاتدا مونتظم چيخيش ائديب. نهايت، حکومه ده آرازين بري سمتينه تشريف گتيردي. 20 ياشيندا قيز اوچون بو، اولا بيلسين، آرزو اولونماز سفر ايدي. آنجاق او گلمه لييدي، باشقا علاجي يوخ ايدي. چکيشمه لردن، ديديشمه لردن جان قورتارمالييدي. قلبي نين کؤورکليگي آز کئچميش ديل آچيب دانيشدي:

کاش تبريز اولايدي، بير ده او گونلر،

 قاليب گلديگيميز او آيدين سحر،

آزادليق اولايدي، بير ده کي ظفر،

قلبلرده مين اوميد يانديران آتش،

اوفوقدن بايراق تک ائنيدي گونش...

يورد حسرتي اينسانين دينجليگيني عرشه چکير. ائله هئي گؤزلري يولدا، قولاغي سسده قالير. دوغرودور، گنج حکومه سووئت آذربايجانينا گلمگيندن پئشمان دئييلدي. او، صمد وورغوندان، ميرزه ايبراهيموودان، سليمان روستمدن دايم قايغي گؤروردو. 1947-جي ايلده باکي دؤولت اونيوئرسيتئتي نين فيلولوگييا فاکولته سينه قبول اولوندو. آما اورگيندن نيسگيل چکيلمه دي.  

  1952-جي ايلده آذربایجان دولت  دانشگاهینین (اينديکي باکی) فيلولوگييا فاکولته سيني بيتيريب.  " ايران آذربايجان رئاليست دئموکراتيک ادبياتي "  مؤوضوسوندا پایان نامه مدافعه  ائديب. فيلولوگييا علملري ناميزه دي علمي درجه سيني آلير. آذربايجان علملر آکادمیاسی ياخين و اورتا شرق خالقلاري اينستيتوتوندا باش علمي ايشچي وظيفه سينده چاليشيب. 

     1955-جي ايلده  " شعیرلر " ، 1963-جو ايلده  " آزادليق باهاري " ، 1970-جي ايلده  " ايتحاف " ، 1980-جي ايلده  " سنين کؤنول اوتاغين "  و س. کيتابلاري موسکوا و باکيدا روس ديلينده نشر اولونوب.  

  بيللوري حکومه (حکيمه) ايبراهيم قيزي  - آذربايجان شاعيري، ادبياتشوناس، فيلولولوگييا علملري ناميزه دي (1963)، آذربايجان س س ر امکدار اينجه صنعت خاديمي (1984). آذربايجان

 

علملر آکادمیاسینين ياخين و اورتا شرق خالقلاري اينستيتوتوندا باش علمي ايشچي اولموشدور. ياراديجيليغي دؤولت طرفيندن  " امک وئتئراني "  مئدالي ايله قييمتلنديريليب. بير چوخ شعیرلرينه موسيقيلر بسته له نيب. 

اثرلرينده آذربايجانين ايکييه بؤلونمه سي فاجيعه سيني تکرار-تکرار ياشاييب. تبريزي گئجه لر يوخوسوندا گؤروب، آما يوخولاري هئچ زامان چين اولماييب.

گونئي داغلاريندان بير اودوم هاوا، مئشه لريندن بير تک يارپاق ديله ييب. وطنين سويوندان بير اوووج ايچمک و آرازين او تايينا قدم باسماق حسرتيني چکيب. 

حيات گؤزلريمده سؤنمه دن قاباق، 

سيزدن بير ديلگيم اولاجاق آنجاق. 

توفانا، کوله يه دؤندرين مني، 

گؤندرين وطنه، گؤندرين مني. 

حکومه بيللوري نين شعیرلري نين بؤيوک بير حيصه سي ميللي فاجيعه  نين دوغوردوغو ياشانتيلار اولوب. شخصي آغريلاريندان دوغولان شعیرلري اوخوجو قلبيني ريققته گتيرير، کدرلنديرير و گؤزلريني ياشاردير. تصادوفي دئييل کي، اونون اثرلرينده تبريز، آراز، وطن، آيريليق ان چوخ تکرارلانان سؤزلردير. شاعيره نين ان تاثيرلي و ياددا قالان اثرلريندن بيري محض  " تبريز "  شعیريدير: 

 حسرتين يانديرار، پؤرشودر مني، 

  ظريف چيچک کيمي اوشودر مني، 

  سسلم ساوالان ائشيدر مني، 

    قيزيننام اودونا، کؤزونه تبريز! 

    چوخ حاقسيزليقلارين، فاجيعه وي حاديثه لرين ايشتيراکچيسي اولماسينا باخماياراق، ياراديجيليغيندا صاباحا اؤلمه ين بير اوميد، اينام حيسسي آپاريجي خط کيمي کئچير.  " اينانيرام او پارلاق گونه "  دئين شاعيره وطنين بوتؤولشه جگينه و خالقي نين اؤز آزادليغينا قوووشاجاغينا بؤيوک بير اينام بسله ييب. آذربايجان اونون شعیرلرينده بوتؤودور، تامدير و بؤلونمزدير. واحيد و آزاد آذربايجان ايدئياسي اونون حياتي نين مضمونونو و ياشامي نين قايه سيني تشکيل ائديب. 

  1952-جي ايلده حکومه بيللوري شرق دونياسي نين سؤز، صنعت، پوئزييا کوريفئيلريندن اولان شهريارا مراجيعتله يازميشدي: قوي زامان دولانسين، سنسه بئله قال! شاعير دييشمه يه تاپماسين ماجال. تبريزي، زنجاني سن يادينا سال، گل اؤپوم موبارک، اودلو سطريني، سندن تبريزيمين آليم عطريني... زمانه سي نين تانينميش ادبياتشوناس عاليمي، سون درجه حسساس، ديقتچيل اينسان علي سولطانلي حکومه خانيملا اونيوئرسيتئتين آوديتوريياسيندا تانيش اولوب، اونون شعیرلريندن ممنون قالديغيني بيلديريب.  " قيزيم، سنين ياراديجيليغيندان ذؤوق آليرام. گئتديگين يول چتيندير، آما شرفليدير. سنه اورگينجه اوغورلار آرزولاييرام " ،-  دئييب. عئيني زاماندا علي سولطانلي گنج شاعيرين ايلک  " منيم آرزوم "  و  " اؤلمز قهرمان "  کيتابلاري حاقيندا  " ادبيات و اينجه صعنت "  قزئتينده گئنيش مقاله ده درج ائتديريب. طلبه ليک ايللريني اوغورلا باشا ووران حکومه بيللوري  " آذرنشر " ين بديعي ادبيات شعبه سينده ايشه قبول اولونوب. ياراديجيليغي محصولدار اولدو.  " شاعيرين ياديگاري " ،  " مندن اوزاقلاردا "  شعیرلر توپلوسو ايشيق اوزو گؤردو. چوخ کئچمه دي ايجتيماعي-سياسي فعاليتيني نظره آليب اونو آذربايجان دئموکرات پارتيياسي مرکزي کوميته سي نين اورقاني اولان  " آذربايجان "  قزئتي نين باش رئداکتورو وظيفه سينه تعيين ائتديلر. تخمينن دؤرد ايل اورادا ايشله دي، اورگينده کي  آرزولاري پوئتيک ميصراعلارلا، پوبليسيستيک قئيدلر واسيطه سيله ده اوخوجولارا چاتديردي. لاکين پوئزييا اونون وارليغيندان، دامارلاريندان، قانيندان سوزولوب گليردي. ايستسه ده، اوندان آيريلا بيلميردي. بعضا دوشونردي:  " نه ياخشي اليم قلم توتور، کؤنلومدن کئچنلري يازيب آزاجيق دا اولسا، ساکيتلشه بيليرم. يوخسا اورگيم غوصه دن چرله يردي " . خالق شاعيري بختييار واهابزاده يازيردي کي،  حکومه خانيم کؤورک شعیرلر مؤليفي اولدوغو کيمي، هم ده سون درجه مدني، عاليجناب اينسان ايدي. اونون 20-يه ياخين کيتابي ياديگار قاليب. اصل ضيالي اول منسوب اولدوغو خالقيني، سونرا اؤزونو دوشونمه ليدير. بيللوري محض بئله قلم صاحيبلريندن ايدي. بختييار موعليم حکومه بيللوري ايله باغلي باشقا بير مقامي بئله خاطيرلايير:  " 1958-جي ايلده  " گولوستان "  پوئماماسی  " شکي "  قزئتينده درج اولونموشدو. قارا قوووه لرين تضييقينه، تعقيبينه معروض قالميشديم. بئله دار مقامدا قايغيکئش اينسانلار مني مودافيعه  ائتديلر، اونلاردان بيري ده حکومه خانيم ايدي. او، ايستعدادلي شاعير، گئنيش بيليکلي علم خاديمي، حسساس قلبلي اينسان کيمي هله ده يادداشيمدا ياشايير " . حکومه بيللوري 1963-جو ايلده  " ايران آذربايجاني نين رئاليست-دئموکراتيک ادبياتي "  مؤوضوسوندا پایان نامه مودافيعه  ائده رک فيلولوگييا علملري ناميزه دي علمي درجه آلميشدير. بير ايل سونرا آذربايجان علملر آکادمیاسنين ياخين و اورتا شرق خالقلاري اينستيتوتوندا باش علمي ايشچي وظيفه سينه دعوت اولونموش، عؤمرونون سونونا قدر اورادا چاليشميشدير. حکومه بيللوري امکدار اينجه صنعت خاديمي فخري آدينا، موختليف فرمانلارا، ديپلوملارا لاييق گؤرولموشدور.  " اورک دوستاق اولدو درده، فراغا "  دئسه ده، اونون عؤمروندن بوگونوموزه دايم آنيلان اونودولماز خاطيره لر ياديگار قالميشدير. حکومه بيللوري 22 نويابر 2000-جي ايلده باکيدا وفات ائتميشدير. 

  وطن حسرتي ايله قلبي دؤيونن شاعيره نين ائل آراسيندا مشهور شعیرلريندن بيري ده  " تبريز "  شعريدير. سکسه نينجي ايللرين سونونا ياخين آذربايجان ميللي حرکاتي نين گئنيشلنديگي دؤوورده مشهور س س ري ميلييوونچوسو جنّت علييئو طرفيندن، همچينين بو شعر اساسيندا  " تبريز "  موسيقيسي بسته لنميشدير. 

  قوللاريم دولانا بوينونا بير گون، 

  يئنه باش قويارام ديزينه، تبريز. 

  حسرتدن هيجراندان جانا دويموشام، 

  دويونجا باخارام گؤزونه، تبريز. 

   

  بولانيق سولارين آخسين دورولسون، 

  تزه گوللريندن بوسات قورولسون، 

  او گول جامالينا بير ده وورولسون، 

  بير قوبار قونماسين اوزونه، تبريز، 

   

  گولوستان باغي نين سئيرينه گليم، 

  لاله ياماجيندا بير ده دينجه ليم، 

  اؤتن گونلريمه يئتيشمز اليم، 

  دوشوم هئچ اولماسا ايزينه ،تبريز. 

   

  بولانيق سولارين آخسين، دورولسون، 

  تزه گوللريندن بوسات قورولسون، 

  اؤ گول جامالينا بير ده وورولوسون، 

  بير قوبار قونماسين اوزونه، تبريز. 

 

  آذربايجان  دؤولت اونيوئرسيتي نين فيلولولوگييا  فاکولته سيني (1952) و موسکوادا ايجتيماعي علملر آکادئميياسيني (1963) بيتيرميشدير. گونئی آذربايجاندا ميللي آزادليق و دئموکراتيک حرکاتين (1941-45) فعال ايشتيراکچيسي اولموشدور. اثرلري:  " منيم آرزوم "  (1949)،  " موباريزه ايللرينده "  (1951)،  " شاعيرين ياديگاري "  (1957)،  " سندن اوزاقلاردا "  (1961)،  " سحر گونشي "  (1964)،  " ايسترم "  (1969)،  " چينار گؤزله يير مني "  (1975)،  " شعرلر "  (1980)،  " بير ده باهار گلسه "  (1984) و س. کيتابلاري،  " سريييه "  ( " اؤلمز قهرمان " )،  " سنين حياتين " ،  " مهين " ،  " او گؤيلرين آلتيندا "  پوئمالاري مؤوجوددور.  م. شهريارين فارسجا شعرلريني آذربايجان، صمد وورغونون  " زنجي نين آرزولاري "  پوئماسيني، ج.جاببارلي. م.ديلبازي، نبي خزري و س. شعیرلريني ايسه فارس ديلينه ترجومه ائتميشدير. موعاصير گونئی آذربایجان ادبياتينا، او جومله دن م.شهريارين حيات و ياراديجيليغينا داير تدقيقاتلارين مؤليفيدير. آذربايجان دئموکرات فيرقه سي مک اورقاني  " آذربايجان "  قزئتي نين باش رئداکتورو (1956-60)، آذربايجان  علملر آکادمیاسینین شرقشوناسليق اينستيتوتونون باش علمي ايشچيسي (1964 ايلدن) اولموشدور. 

  دونيادا چوخ اينقيلابچيلار اولوب. تاريخه چوخ قهرمانلارين ايزي دوشوب. آنجاق تاريخ اينقيلابلار دؤورونده گونئی آذربايجان فدايلري قدر وطنپرور، اعتيبارلي دؤيوشچولر گؤرمه ييب. سينانميش، وطنينه وورغون، ان چتين زامانلاردا بئله اوميديني ايتيرمه ين، وارليغييلا ووروشان، آنا ديلينده دانيشاني باغرينا باسان، سيلاحا ساريلميش، سينه سي سنگر، يوز نفري بير نفر کيمي دؤيوشچودور فدايلر. فدايلره حسر اولونموش چوخ سايدا ادبي نومونه لر وار. هر شاعير و يازيچي اؤز اوسلوبوندا اوغول و قيزلاريميزين بديعي پورترئتيني ياراديب. ائله ح.بيللوري سايسيز-حسابسيز شعیرلرينده اونلاري آنيب، قهرمانليقلاريني وصف ائديب. خالقا آزادليق بخش ائدن آذربايجان دئموکراتيک پارتيياسي نين يارانماسي نين 5-جي ايلدؤنومو موناسيبتيله يازديغي  " سالام سنه ائل آديندان " ( حکومه بيللوري. موباريزه ايللرينده. باکي، 1954، ص 49  ) اثرينده پارتيياسينا اولان محبتيني بير دؤيوشچو ايراده سييله وصف ائديب. دوغما  پارتيياسيني سرين بير ياز سحرينده چيخان گونشه بنزه دير.  

  بو گونش شفقييله اينسانلارين اورگيني ايسيدير. باخماياراق کي، فعاليتده دئييل، اينسانلار هله ده اونا اينانير. بو پارتييا اطرافيندا خالقين قهرمان اوغول و قيزلاريني توپلاميشدي. اينسانلارا آزادليق، خوشبختليک، سعادت يوللاريني گؤسترن پارتييانين کئچميش عوضولري هله ده اؤزونو اونا ساديق عسگر حساب ائدير. چونکي بو پارتييا حاقيقتدن يارانيب، خالقين حاق سسيني هايقيرير. خالقين اونا يئنه احتيياجي وار.  

 

  سن سون قويدون  او قانلارا، 

  سن سون قويدون فلاکته 

  سن سون قويدون حاقسيزليغا 

  سن سون قويدون اسارته. 

  بير ايل ياشادي، آما چوخ ايش گؤردو: حاق سؤيله ين اينسانلاري زيندانلاردان آزادليغا چيخاران، سعادته يول آچان، آنديني پوزمايان، آدي اوزون ايللر  ياشاياجاق اولان بير پارتييادير ه.بيللوري نين عوضوو اولدوغو دئموکرات پارتيياسي. خيانت اولماسايدي، هله آمئريکالي  جللادلاري دا نيويورکا قوواجاقدي.  

  شاعيره نين  " سرييه " ( ح. بيللوري. اؤلمز قهرمان. باکي، 1950، ص 26  )پوئماسي نين قهرماني دا همين پارتييانين وفالي، صداقتلي عوضوودور. شاعيره شاهيدي اولدوغو فاجيعه لردن بيريني قلمه آليب. اوزون قيش گئجه لري نين بيريدير. او، دوشونجه لره داليب. سؤزونده دايما آچيق اولان شاعيره دوشونجه لريني قلمه آلماق ايسته يير. اونون مقصدي فارس شووينيزمي نين قانلي قانونلارينا قارشي عوصيان ياراتماقدير. بو عوصيان بئيينده باشلاماليدير، يني اول درک اولونوب، سونرا کوتله يه چاتديريلماليدير. حيسسلريني 4-5 ايل قلبينده داشيديقدان سونرا گوناهسيز بير قيزين حياتيني پوئماسيندا تصوير ائتمه يه چاليشميشدير. اينقيلابي دئموکراتيک حرکات فاللارينا وئريلن ايشگنجه لري گؤزويله گؤرن شاعيره اونلارين طالعيينه آجييير. وطنيني قلبن سئون بو اينسانلارين وارليغيني تاپدالايانلاري آنجاق قلمي ايله جزالانديرا بيلر. اليندن باشقا کؤمک گلمير. اونا گؤره ده کينيني، نيفرتيني ورقلره تؤکور، او وحشي وارليقلارا قارانليق مزار قازير: 

  هانسي اينسانيت قانونلاريندا 

  وطنپرورلره اؤلوم يازيلميش؟ 

   شاعيره اثرين پرولوقوندا اؤز هيسسلريني تصوير ائتديکدن سونرا سومرين کندي نين تصويرينه کئچير. سويوق قيش گئجه سيدير. شيددتلي کولک وار. طبيعت تئز-تئز شکليني دييشير. کند کلوبونداکي ايجلاسدا فيرقه نين گؤستريچي ايله تبريزه نوماينده سئچيلير. اثرين قهرماني سريييه ده ايجلاسدا دانيشير و دئيير کي، ائله نوماينده سئچيلمه ليدير کي، خالقا، وطنه جان يانديرسين. شاهسئون قيزي سرييه  ائلين فخريدير. اونون آدي چکيلنده ايلک نؤوبه ده مردليک، قهرمانليق، صداقت کيمي کئيفيتلر يادا دوشور. سون درجه نجابتلي اولان بو قادين دوشمنه نيفرتله بسلنميشدير. 

يئري گلنده جبهه  اوغلو کيمي سنگرده دؤيوشور، يئري گلنده ده صاديق بير آنا کيمي اوغلونو اؤپوب اوخشايير. فاصيله سيز  قار کند يوللاريني باغلاييب، آنجاق ساکيرليکدير.  کندده بير سعادت حؤکم سورور. سرييه بالاسينا آنا ديلينده لايلاي چالير. سونرا اوغلونو ياشلي آناسينا وئريب آت اوسته قالخير. تبريزه نوماينده سئچيليب. هامي قورخور کي، چووغونا دوشه بيلر، گئتمه سين. آنجاق سريييه عيناديندان دؤنمور. 

  زاوال قورخاغيندير، قورخمايانلارا 

  اؤلوم ده، زاوال دا چوخ يابانچيدير، 

  ايراده ضربه دير، قودرت قامچيدير، 

  - دئيه رک تبريزين يولونو توتور. اونون کندينده اينسانلار امکله دولانير. يالنيز بير ايلدير اوشاقلار تحصيله جلب اولونوب. تاريخ سوبوت ائديب کي، اينسانلار ائلم ايله يوکسه لير. آنجاق ايرتيجا اوزون ايللردير آذري خالقيني کيتابا، علمه، تحصيله ياخين قويموردو.  ايندي  کندده  اربابين  سؤزو  کئچمير،  زامان  دييشيب، عدالت حؤکم سورور، خانين ظولموندن نيشان قالماييب. 

قانون قارشيسيندا بوتون اينسانلار 

برابرديرسه، اوردا عدالت ده وار 

  دايما فيکيرلي اولان سرييه شاهسئون ائلي نين کئچيرديگي پيس گونلري دوشونور. سسسيز آخشامين گؤزلليگي بئله اونو کدرلي فيکيرلردن آييرا بيلمير. اؤز وطنينده قريب ياشاماق، کؤچري حيات سورمک اونلارين طالعيينه مي يازيليب؟ حيات يولداشي قهرمان اونلاري سالاملايان يئني دؤورانين، گؤزل گونلرين خوشبختليگيني ياشاماغي تؤوسييه ائدير. اثرين قهرماني حيات يولداشي نين فيکريني تصديقله يير. شاعيره فاصيله لرله اولسا دا سريييه يه آزادليغين سئوينجيني خاطيرلادير. موقتي ده اولسا کئچميش دوشونجه لردن اوزاقلاشير و دئيير: 

  گئتدي قارا گونلر، گئتدي او دملر 

  آرتيق بير ايلدير کي، بيگانيم من، 

  کدره، غوصه يه، عالمه، بيلسن 

  آرتيق ائليم خوشبخت، يوردوم دا خوشبخت، 

  گولور گؤزلريمه سعادت، حيات. 

  اساس مقصد بو سعادتي ابدي ياشاتماقدير. خالقين حياتي بو سعادته  باغليدير. اؤلکه نين باهاري خزان گؤرمه سين دئيه اونو قوروماق لازيمدير. شاعيره سرييه نين ديقتيني ستولون اوستونده کي  کيتابا يؤنلدير. جيلدين اوزرينده   " آزاد سووئت قاديني  "  سؤزلري يازيليب. شکيلدکي قيزين آلنينداکي ووقار، باخيشينداکي معنا اثرين قهرمانينا خوش تاثير باغيشلايير. اونو خوشبخت گؤرور. دونيا قادينلاريندان فرقلنن، آرزوسو، عشقي، ايستگي، وطني، ايشي، امگي آزاد اولان بو قادي نين يئرينده اولماق ايسته يير. آناسي اونو ياتماغا سسله يير. آنجاق سرييه نين کئچيرديگي دويغولار يوخودان دا شيريندير.  بو دويغولاردان سونرا آناسي ايله کدرلي نوتلار اوزرينده صؤحبت ائدير. آناسيندان پارچالانميش اورگين نئجه ساغالا بيله جگيني سوروشور. آنا:  " ايکييه  

   بؤلونن بؤيوک بير اورک بيرلشسين گرک " دئيير. شاعيره بورادا يارالي آرازا  " يوکله نير " .  سريييه نين ديلي ايله دئيير : 

اوندا قوي ديبيندن قوروسون آراز 

بير قلبين هئچ ايکي صاحيبي اولماز 

  بوتؤو آذربايجان دردي شاعيره ني دوشوندورور. اصلینده بو، اونون هميشه کي   قايغيسيدير، هئچ زامان اونودولمايان قايغيسي. سرييه خيالي بيرليک احوالي-روحييه سينده دير. آرازين اوستونه يئني کؤرپولر سالينيب. جولفادان کئچن ماشينلار تبريزدن گلن، باکيدان قاييدانلاردير، آرتيق ايکييه بؤلونن يوللار قوووشور. مينگه چئويردن تبريزه ايشيق چکيلير و س. سووئت رهبريني  گؤرمگي آرزولايير. قهرمانين شيرين خياللاري اوزون سورمور. فيرقه دن خبر گليب:  " تهران آذربايجانا اوردو گؤندره جک " . سرييه کند کلوبوندا چيخيش ائدير.  " دوشمنين حيله سينه آلدانماماليييق " ،-  دئيير. دوشمن آياقلارا قاندال، قوللارا زنجير گتيرير. قانيچن ياغي اؤلوم گتيرير. آنجاق ائله ائتمه ليگيک کي، اؤزو اؤلومله اوزلشسين. 

  گونئی آذربايجان آنتولوگيياسي نين اييي جيلدينده اوخويوروق:  " اينقيلابين قاراگوروهچولار طرفيندن گؤزله نيلمز و آرزوولونماز چتين يوللارا سالينماسي، البتته، خالق کوتله لرينده غضب، نيفرت، کدر ده دوغورموشدور. " (   گونئی آذربايجان آنتولوگيياسي. 3 جيلد، باکي، 1988، ص. 11  )

  1946-جي ايلين دئکابريندا غلبه نين تهلوکه ايله اوزلشمه سي خالقي چيخيلماز وضعيته سالميشدي کي، ه.بيللوري ده همين واخت کئچيرديگي حيسسلري قهرمانين حياتينا يانسيتميشدير. 

  کندده کي  سعادته کؤلگه دوشوب. قملي بير قيش آخشاميدير. سرييه پژمورده حالدير، گؤزلرينده کدر وار. بيلير کي، خالق آياغا قالخيب، دوشمنه قارشي  

  يوروشه حاضيرلانير. اوغلونو سينه سينه باسان سريييه آيريليق واختي نين گلديگيني بيلير. او، اؤولادلارين حياتي زيندانا دؤنمه سين دئيه دؤيوشه گئدير. کؤرپه سينه سؤيله يير کي، ايشدير قاييتماسام، قانيمي يئرده قويما، بلکه سون گؤروشدور، وطن چاغيرير. اودلار يوردونا وفاسيز چيخماماق لازيمدير.  

  سرييه وطنين ساده عسگري اولسا دا، گوجلو ايراده سي، قلبه، ظفر عزمي اونو قودرتلي گؤسترير. قملي سحرين آچيليشي اؤزويله آيريليق، کدر گتيردي. رژیم ژاندارماسي ايره ليله ديکجه قوجا تبريزين گؤزلليگي ايتير، زنجان، مرند، قاراداغ دوشمن الييله تالانير، يانير. فيرقه نين ياراتديغي يئني نه وارسا: کينو، تئاتر،  مکتب آتشه وئريليب. ائولردن ناله لر اوجالير، آنا کؤرپه سيني، باجي قارداشي آختارير.له کئچن يئريندجه اؤلدورولور. شاعيره ژاندارمي دانيشديرير: 

  دئيير:  " شاهنشاهين امري بئله دير. 

  بوتون آذريلر قولدور، کؤله دير، 

  بوغازدان آسماساق دئموکراتلاري 

  گولمز، شاهنشاهين گولمز باهاري. "  

  سارايداکي ساتقين جانيلرين گؤستريشلري آذربايجاني قورخوتمور. کوتله سيلاحا ساريلير، آنجاق بومبا ايله دولو حربي ماشينلارلا -تهران اوردوسويلا قارشيلاشير. 

  1946-جي ايلين 12 دئکابري – 21 آذري. آذربايجان تاريخي نين ان قانلي جينايتلري نين تؤره ديلديگي گونلردن بيري. اثرين قهرماني سحردن سنگرده آتيشير. دؤيوش قابيليتينه گؤره هر کسدن اوستوندور. موباريزه قيزيشير. شاعيره اونون داخيلي هيسسلريني وئرمه يه چاليشير. جاواندير، قلبينده آرزولاري وار، چوخ قودرتليدير، اونو ائل اوغوللاري آلقيشلايير. بو جور اينسانلار بختيياردير. آنجاق سنگرده حياتين او بيري اوزو ده وار. سنگرده اؤلن ده، اؤلدورولن ده وار. اؤلنلر  " وطن " ،-  دئييب تورپاغي قوجالقلايير. دوشمن بو هيسسلري آنلاماق گوجونده دئييل. اونلارين وطني، عزيزي، حياتي پولدور، دوللاردير. قوجا افسر سرييه ني ائوه - کؤرپه سي نين يانينا گؤندرمک ايسته يير. آنجاق قهرمانين مقصدي موباريزه ني داوام ائتديرمکدير. اونا گؤره دؤيوشو ياريمچيق بوراخماق ويجداني ساتماق و آلچاق عملدير. شرفلي اؤلومه داها اوستونلوک وئرير. يادلارين وطني قانا بوغماسي خالقين آزادليغي نين اليندن آلينماسي دئمکدير. 

  مين دوشمن اؤلمه سه  بو گون بو يئرده، 

  دؤنمرم ائويمه، دؤنمرم بير ده. 

  سرييه فدايلرله برابر چارپيشير، الينده آوتومات دوشمنه آتش و نيفرت پوسکورور. آنجاق هر شئي تک بو سنگردن عيبارت دئييل. دوشمن آذربايجانين بؤلگه لريني قانا بويايير. کند آغساققالي نين سنگره گليشي سرييه ده قورخو يارادير. گؤره سن نييه گليب؟ کنده دوشمن تهديديمي وار؟ قوجا اونا سرهنگين تاپشيريغيني سؤيله يير: اگر سرييه سنگردن اوزاقلاشسا، اونا هئچ کس توخونماياجاق، باغيشلاناجاق، حتّی اينانسين دئيه شاهين تاجينا دا آند ايچيبلر. سرييه بو سؤزدن غضبله نير و باغيشلانانلاري بدبخت آدلانديرير. قوجا اساس مسله يه کئچير؛ سن تسليم اولماسان، اونلار کندي توپا توتاجاقلار. چاره سيز قالان سرييه راضيلاشمالي اولور. 

  او کندده ائليم وار، اوبام وار منيم، 

  بو يئري قلبيمتک اوشاقليغيمدان   

  سئوميشم. بو تورپاق منيم وطنيم. 

  گوماني، موقدس يوردو آذربايجانين تالانماسينا دؤزمور. بورادا سئويملي اوغلو، گوناهسيز آناسي دا ياشايير. آنجاق نه شاعيره، نه اثرين قهرماني ائلي، اوباني تالايان او شرفسيزلرين آندينا اينانمير. حيسياتي، شرافتي اولمايان، خميري حيله ، بؤهتان و آلداتماقلا يوغرولان ژاندارم و افسرلر آندينا عمل ائتميه جک. سرييه آرتيق سنگرده تکدير، گولله سي ده قورتاريب. تکليفلرينه عمل ائتمه ليدير، يوخسا کندده قان سو يئرينه آخار. اثرين قهرماني دار آغاجينا گئدن يولو اولجه دن گؤرور. آنجاق موقاويمت آرتيقداندير.دوشونور کي، کندين کوله دؤنمه مه سي اوچون بو فداکارليغي ائتمک لازيمدير. اؤلومه آپاريلديغيني بيله-بيله سنگردن چيخير. جاني نين قان تؤکه جگيني بيلير. ان چوخ دا اونلارين حيله سيني اوزه چيخارماق ايسته يير. قوي خالق گؤرسون کي، اونلارا اينانماق عوامليقدير و بو خبر وطنيميزه ياييلسين. 

  ييرتيب پارچالاماق، باخ، اونا خاصدير، 

  قورد اوچون قان ايچمک بير ائهتيراسدير.  

  حکومه بيللوري نين 1949-جو ايلده نشر اولونموش شعیرلر توپلوسونون موقدديمه سينده اوخويوروق:  " گونئی آذربايجان خالقي نين تاريخينده يئنيدن قارا گونلر باشلادي. اؤلکه نين هر يئرينده دار آغاجلاري قورولدو. خالقين يوزلرله قهرمان، ايگيد اوغوللاري اعدام ائديلدي، زيندانلارا آتيلدي. "(  ح. بيللوري. منيم آرزوم. باکي، 1949، ص. 4  )

  شاعيره نين و قهرمانين دوشوندوکلري باش وئردي. هامي تبريز مئيدانينا ييغيليب. اينسانلارين قلبينده ايضطيراب وار. غضب، کين، نيفرت، اينتيقام حيسسي اوزلردن اوخونور. آذربايجان ائلي نين گؤزل پريسيني، قهرمان قيزيني، مقصدي اوجا، قلبينده بؤيوک بير دونيا ياشادان فدايسيني دار آغاجينا طرف گتيريرلر. او، خوشبخلييه دوغرو   گئديرميش کيمي فخرله، ووقارلا يئريیير. حياتي نين قانلي صحنه سي اوينانيلير، اينسان قلبينه سيغمايان وحشت وار. آرخاسينجا کوتله گئدير. تميز بير مقصد اوغروندا موباريزه آپاريب. ايللردن بري دويونجا راحاتليق، يوخو گؤرمه ييب. آج، سوسوز گونلري چوخ اولوب. آنجاق يادلارا اَييلمه ييب. سارسيلمايان ايراده سي ايله اؤلوم کورسوسونه قالخير. اونو خيانتده تقصيرلنديرنلره سؤزو وار. آزادليق موجاهيدي نين قييمتيني تاريخ وئره جک. تورپاغيني سئون بير فداي نين بو آدلا اؤلدورولمه سي اونا آغير گلير: 

  خيانت سيزيندير،  " آغالار " ، سيزين 

  منجه، بو آد سيزه ياراشير آنجاق. 

  منسه اؤولادييام قوجا تبريزين. 

  ويجدانيم تميزدير، قلبيم ده پارلاق. 

  سرييه محکمه سيز اؤلومه گئدير. آنجاق دوشمنلره قورولاجاق حيات محکمه سينه اينانير. ائل قيزيني تانييانلار آغلايير. سرييه ايسه اونلارا  " گؤزونوزون ياشيني کينينيزله قورودون "  دئيير. اوزاقدان فداي مارشي نين سسي، نوماييشچيلرين شوعاعرلاري سسله نير:  " ياشاسين  پيشوري! محو اولسون موطلقيت! "  و س. قورخويا دوشن  " آغالار "  حؤکمون يئرينه يئتيريلمه سيني ايسته يير. سرييه سون سؤزلريني دئيير:  " من اؤلسم ده وطن ياشايير. کوتله ني اؤلدورمک اولمايير " . چکيلن کنديرين اوجو اونون بوغازينا کئچير و قانلي جينايت بئله سونلانير. 

  سريييه اؤلرکن اؤز نغمه سينده، 

  بير قهرمان کيمي سون نفسينده 

" وطن، وطن "  دئييب يومور گؤزونو، 

  شرف دونياسيندا گؤرور اؤزونو. 

  حيات داوام ائدير. آنجاق وطن يولوندا شهيد اولانلارين يئري تاريخين نظرينده، اينسانلارين قلبينده، آللاهين حضوروندا بامباشقادير. ائپيلوقدا سرييه نين بير قدر بؤيوموش اوغلو آتاسي ايله صؤحبت ائدير. او، آتاسيني دؤيوشه يوللايير. ائللر اونا داياقدير. آتاسينا اوغورلو سفر، دوستلارا قلبه، يادا اؤلوم آرزولايير. بو هله 1949-50-جي ايللر ايدي. کؤرپه لرين يوخوسو دا، آرزوسو دا چين چيخير.

قاباقدا 1979-جو ايلين قوووتلي آلوولاري و مستبد شاهليق اوسولونون دارماداغين اولدوغو زامان وار. 

کئشمکئشلي حيات يولو کئچن شاعيره 2000-جي ايل نويابرين 22-ده باکيدا وفات ائديب. 

 

   " آنا "  

  تبريز کدرلييدي، سن آغلاييردين، 

  گئجيدي بيز سندن آيريلان زامان. 

  پريشان گؤرکمين، او سون سؤزلرين، 

  بير آن خاطيريمدن چيخماميش، اينان. 

  آديني ديليمه گتيرنده من، 

  سانکي آلوو ياخير دوداقلاريمي. 

  ياخين گل، ياخين گل اؤپوم اوزوندن، 

  اؤپوم رنگي قاچميش ياناقلاريني. 

  ائله ملول-ملول باخما اوزومه، 

  باخيشين قلبيمه اود ساچير، سنين. 

  سن يالقيز دئييلسن، سيخما قلبيني، 

  بؤيوک بير خالقين وار، بؤيوک وطنين. 

  او خالقين، او ائلين قيزيسان، سن ده 

  اونون قدرتي ده، شؤهرتي ده وار. 

  قهرمان يوردوموز سارسيلماميشدير، 

  سويوب تالاسا دا اونو ياغيلار. 

  بيليرم، چوخ سيخير سني آيريليق، 

  اسارت دونياسي باشينا داردير. 

  لاکين اونوتما کي، هر بير گئجه نين، 

  مين بير شوعاع ساچان گوندوزو واردير! 

   " اليمدن نه گلير؟ " ، دئمه بير داها 

  دئمه کي، قوجايام، ساچلاريم دوم آغ. 

  وطن اؤز قهرمان اوغلو، قيزيني 

  هر زامان، هر زامان گنج ساخلاياجاق. 

  آلنينين ختلري، بياض ساچلارين، 

  کئچميش حياتيندان بير ياديگاردير. 

  حؤرمت او ساچلارا، نيفرت کئچميش: 

  بو گونون اؤز آدي، معناسي واردير! 

  قالخ آنا، قالخ آنا، سني دؤيوشه 

  چاغيران اؤز قيزين، اؤز وطنيندير! 

  باخ، يانير اودلاردا اودلار ديياري، 

  بو وطن، بو تورپاق، بو ائل سنيندير!