بیزیم حاققیمیزدا

خدآفرین درگیسی اولاراق 10- ایلدیر یاییملانماقداییق. بودرگی اونجه لیکله آذربایجان تورک کولتورونه ، اونون تانیتلماسی و آراشدیریلماسی هم ده بومدنیتین اولاناقلارینین آلقیلانماسینا و اونون یایقینلاشما و درینلشمه سینه قوللوق ائدیر. آیریجا بودرگی آنادیلی و آنادیللی تورکجه یازار و اوخورلارین گوونج و اینام قایناغی دیر. 30 میلیون دان چوخ ترک لرین ایران دا بارماقلا سایلاسی قدر مطبوعات ارگانی اولدوقدا اونلارین بیرچوخو فارسی هفته لیک لرین آرا صحیفه لرینده و بیرده وارلیق درگیسی واردیرکی ، اودا اوچ آید دا بیر نشراولونور. بونو نظره آلاراق بیز 10 ایل دیرکی هرآیی قوجاق دولوسالاملار و داغارجیق دولو فولکلور ، علم ، بیلیم ، ادبیات ، سوسیال پرابئلم لر ، ادبی یارادیجیلیقلار دیل بیلیمی ، دیل اویرتیمی ایله دیرلی اوخوجولارین قاپیسینی دویوروک. .

خدآفرین آدی حقینده : خدآفرین آذربایجانین آن گوزل بولگه لریندن بیرینین آدی دیر. بوبولگه قاراداغین آن گوزل مدنیت مرکزلریندن دیر. اهالی تورک دور. بوردا خالق اوزانلاری سایقین دیر. تاریخی آبیده لرله دولودور. ایکی آذربایجانی بیرلشدیرن کورپو بورادا یئرله شیر، آرازچایی اوزه ینده قورولان بوکورپولر قدیم ایپک یولونون ان اونملی اثرلریندندیر. خدآفرین بیرچوخ تاریخی قلعه لره ائوصاحبلیی ائدیر و اونون آن بویوک دایاغی بابک قالاسی دیر.

خداآفرین تاریخی زنگینلیک له یاناشی طبیعی و دوغال گوزللیه ده مالیک دیر. هوندور داغلاری ، سیخ مئشه لری ، سرین دره لری ، بول سولو چشمه لری ، همیشه آخار چایلاری گوزاوخشایاندیر. بونا گوره ده او اولوسلارآراسی قوروق ساییلیر. توپراغی وئریملی ، اینسانلاری قوناقجیل و مهرباندیر. بوردا علم و ادیبیات هرزامان دیرلی حساب ائدیلمیشدیر. ادبییاتیمیزین بویوک لریندن بیری ابوالقاسم نباتی بورالی دیر. مین لر ایل محتشم تاریخه صاحب اولان خدآفرین اونلارلا ده تاریخی شخصیته ائو اولموشدور.

خدآفرین قارشیسندا قان آغلایان قاراباغی هرگون حوزون و دردله آناراق عمله ده خاچ یوروشلرینین ارمنی لر طرفیندن آرازین اوتایندا یانیق توپراق سیاستینین یورتمه سینین شاهیدی دیر. قارشی دا یانان مسلمان ائولری قاچقین دوشن مینلرله مسلمان تورک بیزه خاچ پرست لرین وئردیی گوزداغی دیر. خدآفرین آجی آیریلیغین قدیم تانیقی دیر. یئراوزریندن بولونسه ده وطن چایی اوزریندن آتالاریمیزین یاپدیغی کورپولر اوزریندن بیرله شیر و قوجاقلاشیر. بیزده فیزیکی کورپونو معنوی کورپویه چئویره -رک  قلم لریمیزله  تفکورموزله  عقلی کورپونویاراتماغا جهد ائتدیک.

 

خدآفرین درگیسی ئین یارانماسی :

17 – ایل اونجه یعنی 1996 -جی ایلده بیرایده اولاراق منیم طرفیمدن اورتایا آتیلدی اویرنجی اولدوغوم اوایللرده بوایشی حیاتا کئچیرمک اوچون اسلامی ارشاد اداره سینه باش ووردوم. اوراد فورملاری دولدو- راراق ایذین آلماغی بکله دیم. بوگون – صاباح دوزیئددی ایل چکدی و من آرزوما قووشدوم. اولکه میزده تورک دیللی نشرلرین اولماماسی بوایشین نه قدرچتین اولدوغونو گوزاونونه گتیریردی. بونونلا یاناشی تورک سئوگیسی وارکن تورکجه سئودالیلاری اولدوقدا کئچمیش رژیمین یاراتدیغی آنتی تورک اتمسفری حالا دوشونجه لرده قالماقدا ایدی. باخمایاراق بودیلی دانیشانلارین سایی اون میلیونلارلادیر. آنجاق آنادیللی مکتب و اوخوللارین اولماماسی بودیلین آلت یاپیلی اولوشومونا جدی ضربه لر وورموشدو. بوتون بونلاری گوز اونونه آلاراق، یوردوموزا ، آنامیزا ، آناوطنیمیزه اونون شیرین دیلینه زنگین مدنیتینه  وورغونلوغوموز و سرگیله مه یه باشلادیق.

7- ایل بکله یشدن سونرا ایندی سوزدن – عمله کئچدیک 2004- جوایلین  پاییزینین ایلک آییندان خدآفرین درگیس نشر اولونماغا باشلادی. ایلک آنادیللی آیلیق درگی اولاراق تهراندا باسیلدیق و بوتون آذربایجانا اوجومله دن تهرانا یاییلدیق. بیرینجی ساییمیز اون مین تیراژلا باشلادی. اوخوجولاردان و خالقیمیزدان چوخ اولوملو تپکیلر آلدیق. باخمایاراق رقابت دونیاسیندا بیزی سئومه ینلرده آزدئیلدی. کیمیسی بیزه خور باخدی ، کیمیسی بیزی سئوه رک اوره ک لرینه باسدی. بعضی لرده درگینی قورخا – قورخا اوخوماغا باشلادی.

درگینین دیلی وآماجی : درگیمیزی ایکی دیللی اولدوغوندان ( تورکجه – فارسی ) بیز بوایکی دیلده یازماغا باشلادیق ، مطبوعات تجروبه میزین البته آنا دیلده اولمادیغیندان چوخ زحمت لره قاتلاشدیق. آنجاق هرآی ، هرایل گئری قالدیقدا هم اوخوجولاریمیز چوخالدی ، هم ده گئنیش جوغرافی آلاندا تانینمانما باشلادیق. بونونلا یاناشی اولکه ده اولان تورکه فوبینی ده یاواش – یاواش آرادان قالدیرماغا باشلادیق. ایلک ایللرده بعضی فرد و یازارلار طرفیندن دیشلانساقدا دوولت طرفیندن اوگئی آلقیلانساقدا یورولمادان بیخمادان دیک دوراراق ، گرچک یولدا اولدوغوموزا ایناناراق بوتون مادی و معنوی چتین لیک لره سینه گره رک یولا داوام ائتدیک. دیلمیز تورکجه، آنلایشمیز تورکجه، سئودامیز تورکجه اولدوغوندان بوشمعین باشینا مینلرله پروانه توپلاشدی. درگی مسلکی بیرعملدن سئودا و عشق مجراسینا یونلدی. گنج یازارلارین، آنادیللی سئودالیلارین یوواسینا چئویریلدیک. اونلارین قلملرینین سیناق میدانینا چئویریلدیک. تورکجه نی دانیشیب یازانما یانلارا اورنک اولدوق، اولکه ده خدآفرین مکتبی اولاراق دیلمیزین اوزللینی، گوزللینی ساغلاماغا باشلادیق. دیرلی اوستاد وحوجالاریمیزدن اویود و نصیحت لر آلدیق. کئچمیش دن گلجه یه بیرچیراق توتدوق. قورقود ددنین دیلی ایله یازدیق، فضولینی، نسیمی نی، شهریاری ، یونس امره نی، علی شیرنوایی نی، نباتی نی، ادیب احمد یوکناکینی، یوسف بالاساغونلونو ، ماحمود کاشغرلی نی ، و اونلارلا بیلیم، کولتور و ادبیات اینسانیمیزی آراشدیردیق ، اویرندیک و اویرتدیک. دیلمیز تورکجه میز دیر، تورکجه میز وارلیغیمیز شعارینا دون گیئندیردیک. سیزده  یوردوموزو ، دیلمیزی و ائلیمیزی سئومه یه دعوت ائدیریک.

خدآفرین درگیسی نین یولو : مدنیت واویغارلیغیمیزی تانیتماق، دونیا ادبیاتیندان اوز ادبیاتیمیزا ترجومه یولو ایله قازاندیرماق، فولکلور و شیفاهی خالق ادبییاتی و زنگینلیک لریمیزی آراشدیرماق، دوزگون و دوغرو دیلده یازیب اوخوماق. ادبی فورما اولوشدورماق و بوادبییاتی اولکه ده پایلاشاراق یایقینلاشدیر ماق. اولکه ده کولتورلر آراسی قایناشمادا بیزده اوز وارلیغیمیزی اورتایا قویاراق ازیلمک دن، اونودولماقدان قوروماق و اونواینکیشاف ائتدیرمک. علمی، ادبی – اجتماعی یونوملو مقاله لری آذربایجان سورونلاری چرچیوسینده نشرائدیرمک و اونلارین حللینه تشبوث ائتمک. مکتبی اولمایان اوخوجولاریمیزا آنادیل اوخول وظیفه سینی یئرینه یئتیرمک.یازیچی وشاعیرلریمیزین اثرلرینین چاپ اولونماسینا قاتقیدا بولونماق.اولکه ده قارداشلیق دیرلرینی ترویج ائتمک.بیرلیمیزی بوتولویوموزو ساغلاماق وبرابر حقوقلو وطنداشلیق حاقینا سوزده یوخ عملده ییلنمک.یوردوموزا اولکه میزه دیلیمیزه ودینیمیزه خمت ائتمک.

 

 

 

بیزیم له علاقه ، ارتباط واولاشیم یوللاری:

آدرس : تهران خ انقلاب اسلامی ، خیابان وصال شیرازی پ 7 طبقه 3 واحد 5

تلفن : 09192281916

ایمیل : این آدرس ایمیل توسط spambots حفاظت می شود. برای دیدن شما نیاز به جاوا اسکریپت دارید

جی میل : این آدرس ایمیل توسط spambots حفاظت می شود. برای دیدن شما نیاز به جاوا اسکریپت دارید

دیقت: قایناغی گوسترمه شرطی ایله، خدآفرین درگسنیدن قایناق کیمی استفاده ائتمک اولار.

دیل – ادبییات، تاریخ ، ادبییات تاریخی – اجتماعی مسئله لر ، تورکولوژی ، فولکلور – شعر گوندرمه ینیزی رجا ائدیریک. عرب الفباسی ایله تورکجه یا زیلان مقاله لر ترجیح ائدیلیر.

 

                                                          سیزنیله

                                 دکتر حسین شرقی درچک سوی تورک

                                            باش یازار و تاسیس چی