تورک بالاسی قورد اولار باسدیغی یئر یورد اولار

Türk balası qurd olar basdığ ye yurd olar


Sorumlu müdür:Dr.HÜSEYN ŞƏRQİDƏRƏCƏK (SOYTÜRK)

مدیر مسئول: دکتر حسین شرقی دره جک (سوی تورک)

 

دده لریمیزبویوک اینام و جسارتلری همده عینادکارجاسینا عدالتسیزلیه قارشی مجادله لری؛گورسن نه دن ایندی بیزیم قانیمیزدا و روحوموزده آز تجعلی تاپیر.یادا هیچ اوندان اثر علامت ده بئله یوخدور. ایللردیر عین اورتامی پایلاشاراق آجیلارینا قاتلاشدیغیمیز وطن نه دن آغوشونو بیزه آچمیر؟

 ایستکلریمیز سونور  و یوخ اولور . هر گون اومیدلریمیز سویا دوشره ک سارسینتی ایچینه دوشوروک.گل قارداشیم دئدیک ده هامیدان اونجه بیز واریق؛ اولوم اولونجا گئنه  بیز اون سیرالارداییق.سئچیریک اما سئچیلمیریک؛ اولوروک اولولاشمیریق. خلاصه گوزله یه گوزله یه گوزوموزون کوکو سارالیب.

هردن اوزومدن سوروشورام گوره سن منیم وارلیغیم نیه ساکینجالی دی.اوزومو الشدیریرم ایاقدان باشا باشدان ایاغا ,اوزومو تنقید آتشینه توتورام اما نتیجه سی اولمور کی ؛ اولمور سبب و گوناه تاپا بیلمیرم. من نیه بو گونه قالمیشام اوزوم اوزومدن خبرسیز آنجاق باشقالاری منیم منلییمدن خبرداردی. شوبهه لنرک کتابلاری اوخوماغا باشلاییرام.حتی درس کیتابلارینی یئنیدن اوخویورام لاپ 30 ایل اوول اوخودوغوم کیتابلاری. باخیرام کی ؛ سیستملی شکیلده منیم منیلییم تحقیر؛ تحریف وقارالانیر.

سوروشورام حافیظه ویادداشیمدان آخی سن بوردا دوغولون بوردا ساواشدین و بوردا سئودین وسئودالاندین هم ده یوا قوردون لاپ اوغروندا ساواشدین.آنجاق گوون بولمادین.

هر شئی ایش , آش دئییل چاغداش یاشام شرطلرینین اوز طلبلری وار : حاق ؛ عدالت ؛خیرخواهلیق ؛الهی و بشری سئوگی ؛کولتورل احتیاجلار ؛پئشه اوغورلاری ؛ ساییلیب سئچیلمک حتی شهرت قازانیب سئوینمک و...

حاییف, بونلاری بولماق وبیلمک اونلارین اولسون. دوشونمک بئله عقلدن اوزاقدیر.یاساقلار ؛قورخولار ؛ اومیدسیزلیک لر  و اولومسوزلوقلار مثبت ایستکلری اوسته له میش اولور.

آنا دیلیمیزین سیاسیلشمه سی اوز اوزلویوندا تورک اینسانینا کیملیک بوحرانی یاراتمیش و بیر چوخ ایره- لیله ییشدن اوزاق قویموشدو.مرکزلشمه ومرکزلشدیریلمه بیر چوخ تالانت واستعدادلاری اوزه چیخماغا قویمامیشدی.

ال اله وئرن بوتون یارادیلمیش مانع لره بیزلری دوردورمامالیدیر.عکسینه دیم دیک دورمامیزی ساغلامالی وهر گون ایره لیه داشیمالی دی.

بوتون وئریلن وعدلری حیاتا گئچیریلمه مه سی یئنه ده صاف قلبلی جوشقو دولو تورک اینسانینی روحونا اوستون گلمه لی دیر.اونا گوره کی ؛تورک بالاسی قورد اولار و باسدیغی تورپاقلاری وطن قیلار.یعنی ال ده ائتدیی اوغورلاری مثبت یونده دیرلندیرمه یی باجارار.

ائله بونا گوره ده بو آتا سوزونه باش ووردوق کی ,گئچمیشیمیزدن گلن وارلیق آوازی  ژنلریمیزده محفوظ قالمیش اولسون.

بونونلا یاناشی 12 رمضان دا باش وئرن ترور اولایلارینی قینیاراق ,ترورو وترورچولاری لعنت له ییریک. شهیدلریمیزه تانری دان رحمت دیله یرک ؛ یارالیلاریمیز عاجیل شفا تمنی ائدیرک. میلتجه باشیمیز ساغ اولسون.

 

رمضان روح ایله جیسمین باغداشلاشان حسرتینین چلنگی دیر

الله قرآن کریمده بویورور:ای او کسلر کی، ایمان گتیرمیسینیز.سیزه واجیب دیر  ائله گئچمیشده کیلره واجیب اولموشدور کی ،همیشه دوروست وپاک اولاسیز.

دوغرولوق و تمیزلیک ان یوکسک اینسانی اوزللیکلردندیر. رمضانین روحوموزا هوپاراق بیزی دوروستلویه سووق ائتمه سیده ایچ دویقو و ایستکلریمیزین تمل اساسی دیر.

هر گون تانرییا یاخینلاشمانین یولو اوباشداننان باشلایان بیر قووشما حسرتینین چلنگی دیر .دونیانی زاواللی بیلن هر کس بو اویانیشدا ایچینده بیریکدیردیی حسرتین قاپیلارینی آرالاماغا باشلایاراق ایناملا ایناندیغی ایمانین کوکوسو ایله فرحله نیب و اوچماغا باشلار. بو حیسلرین آدی دوغرولوق و مومینلیکدیر.

اوروج برابرلیین ،اوزگورلویون و سئومه یین تمل داشی دیر.آج قالاراق ایچینده کی توغلوغون فرقینه واراجاغینی بیله جکسن.11 آی نه قدر دونیا دوشگونو اولدوغو آدامین ایچندن دوشونجه لرینه چیخاجاق و اطرافیبنی یئنی دن آنلاماق گوجو اولوشماغا باشلامیش اولاجاق.

یوخسوللوغون دردینی اولمامانین فلسفه سینی حتی سوسوزلوغون نه قدر آجی اولدوغونو بیر زاد اینسان اوز جیسمی و روحو ایله درک ائتمه یه باشلامیش اولور.بو حیسلر قیامتین و فلاکتین خاطیرلاتماسی کیمی دیر . اون گوره ده اویاندیریجی واویاریجی دیر. رمضان یاخود اورجلوق حیکمتلرین آیدینلانان آیی دیر. بو آی سیناو (امتحان)،قیام ودوغرولوق آیی دیر.گرچی رمضانین معناسی بئله :یوکسک ایستیلیک،چوخ ایستی داش دئمکدیر.آنجاق اونون اساس غایه سی حرییت و اوزگورلوکدور.هر کس اوز ایراده سینه تابع اولاراق داخیلی ایستک وتانریسل سئوگینی روحسال بیرلشیملرله بیرلیمده ان قوتسال اینسان سئوگیسیله بوتولشمه سیدیر.

نه گوزل کی بو آی قرآن ،بو مقدس کیتابیمیزین نازل ائلان آیدیر.اصلینده هدایت و رهبرلیک آیی دیر.حقین باطلدن سئچیلمه آیی دیر. متزلزل دونیا دا حققه تاپینما و اوردان یولا چیخماقدیر.اوزوموزدن الله ا دوغرو یوکسه لیشین نردبانی اولان اوروجلوق هم ده پیس و قورخونج غیر اینسانی دویقو و دوشونجه لریمیزله حسابلاشمانین مکتبی دیر. نتیجه چیخاریب عمللریمیزی دوزلویه و ثاوابا همده خیرخواهلیغا یونلندیرمه ییمیزین فرصت زامانیدیر. بیر معنالی اولاراق سئوگی ومحبتین نیفرت وقددارلیغا غالیب اولان معنوی دیرچلیش دیر اوروجلوق آیی.الله اوروج و عیبادتلرینیزی قبول ائتسین.

بو آی هم ده ایناجیمیزین ان بویوک و اولوی اینسانی علی (ع) شهادت آیی دیر .موولامیزین قانیلا سوواریلن رمضانی دا بوتون سئونلرینه تسلیت دیله یینده بولوناراق.حاقین یولجوسو اولماقدان الله بیزی اوزاق توتماسین.

 

زامانسیز یاشام اولومون گیردیی باشسیز گووده نین اوره یی دیر

 


مدیر مسئول دکتر حسین شرقی دره جک (سوی تورک)


 Sorumlu müdir:Dr.HÜSEYN ŞƏRQİDƏRƏCƏK(Soytürk)



 

گونلرین بیر گونو جسور بیر اوغلان اوزاق- اوزاق یوللار گئدرک بیر گوز اوخشایان آدایا گلیب چاتیر آدا دا تک بیر خاقان یاشییرمیش. اوغلانی گورجک سئوینیر و اوندان ایسته ییر کی اونون یانیندا قالسین و گئتمه سین. آنجاق اوغلان گئتمک ایسته ییر.خاقان اونا دئیر کی، یانیمدا قالسان سنی عدلیه باخانی (وزیر) ائدرم.

اوغلان خاقانین اوزونه باخاراق دئییر:

-بوردا کیمسه یوخ کی ، من اونو یارقیلایام (محاکمه ائدم).

خاقان دئییر : اوزونو یارقیلا؛

بو محاکمه دن چتینی دونیادا یوخدور کی ، دونیادا اوزون اوزونو یارقیلایاسان واوزونو حاقدا ان دوزگون ودوغرو قراری وئره بیله سن.(آنتوان د.اگزوپری)

تقویم اولاراق خدافرین درگیسی 13 ایللیک اولدو بو اوزون زامان کسیینده من ده تک اوزوم اوزومون باخانی و ناظری اولدوم. تک ال ایله یاردیمسیز بو اوزون یولو گئتمه یی اوزومه بورج بیلدیم.آنجاق مطبوعات دونیاسی هم چتین هم ده سرت وآمانسیز بیر دونیادی.بو قارلی بورانلی آب وهاوادا دوستلاردا بعضا یاری یولدا قویوب گئدیر اینسانی، اودا منجه اولمالی دی. آنجاق اویرندییم بیر قانون اولدو کی ، گلن گئدر سن ایسه باشلاتمیسانسا یولا داوام دئیرک هر تورلو زورلوقلارا دوزه جکسن. آیریسئچگیلره اویرنه جکسن. باشی دیک توتاراق وارام دئیه جکسن. اوغورلارا آرخالاناراق اوغورسوزلوقلاری یئنی دن دیرلندیره جکسن.

طبیعی کی ،دیرلی و دییشیک بیر ایش گورورسن سنه او زامان هر شئینه قاتلاشاجاقسان .هم ده اوزونو یاقیلایاراق زامانلا یاریشاجاقسان . یول اوزون واینجه اولسادا سئوگی دولو یوکو وار ان آزی عشقین کسیشدیی بیر نقطه ده اورتاق مخرج وار ،اودا اولوسونلا اوز آراندا اولان عهده و پیمانا زامانلا یاریشاراق وفادار قالماقدی. گئنه ده اوزومله قرارا گلدیم بو بیر ایلی ده ائنیشی و یوخوشو ایله سیز دیرلی وطنداشلاریمیزین معنوی خدمتینده اولماقلا شرفلی یولو سوردوروم. اولکه نین اقتصادی وضعیتی ایشی داوام ائتدیرمک ده منی بودرتسه ده دوز استقامت ده الله ین کومه یی ایله باشاریلارا باشاری قاتاراق بو اویقارلیق ومدنیت ایشیمیزی دوام ائده جییک. تکی یئترکی، سیزلر بیزیمله اولون معنوی دسته یینیزی اسیرگه مه یین.

بو ایل ایچریسینده یئنه ده دیلیمیزین ، دیلچیلیمیزین ، مدنیت و علمیمیزین ،سورونلارین واوغورلارین جارچیسی اولاجاییق.

سیزلردن سیخ خواهیش ده بولوناراق ایسته ییریک

 

بیزی اوز فیکیر و دوشونجه لرینیزدن محروم قیلمایاسیز.شاعیر و ادیبلریمیزدن،استاد و اویرنجیلریمیزدن تک جومله ایله میللتینی ، دیلینی سئون،آذربایجانمیزا کونول وئرن هر بیر سویداشیمیزدان ، دیلداشمیزدان ایسته ییرم کی نئجه 12 ایل یانیمیزدا اولدونوز گئنه ده بیزمله قالین کی تورکلویوموزه و اولوسال کیملییمیز ییه دوراق . گله جک نسیللریمیز بو آلان یوخ ،بلکه غرورلو وارلیق اولاناغی ساغلامیش اولاق. بو آی هم ده مولا علی (ع) دوغوم گونونو اوزونده احتیوا ائدیر. اونون دا برکتینی یاشاما دیله یی ایله  بو مناسبتله آتالار گونونو هامییا تبریک دئیرک. اوزومه بورج بیلیرم دیرلی آرخاداشلاریما او جومله دن علی محمدنیا یا اونا گوره کی درگیمیزین ایش یئرینی بیزه تامین ائدییندن دولایی و استاد ابراهیم یلتقیانا  و بویوک میرزاییه مادی یاردیمدا بولوندوغوندان اوتورو اوز منت دارلیغیمی بیلدیریرم. یاشاسین دیلیمیز ، دینیمیز ، مدنیتمیز وغیرتمیز. وار اولسون وارلیغیمیز و اونا شعاردا یوخ ، عمل دا صاحیب چیخانلار. اونوتمایاق کی هر بیر مدنی و میللی وارلیق اونون یولوندا وئریلن مجادیله نین کمیت و کیفیتیندن آسیلی دیر.

گئچن ایل بیر چوخ آنا دیللی و یا خود تورک-آذربایجان یونوملو مطبوع اورقانلاری دا ایشیق اوزو گوردو . بیزده اونلارا باشاریلار دیله ییرک اوزون عمرلو اولمالارینی دیله ییریک. چوخلوقدا بیر اولاق

GƏLİMLİ GEDİMLİ DÜNYA ƏZƏLİ SONU BİLİNMƏZ DÜNYA

اینسان اوغلی تانرینین ان سئویملی ایجادی اولماقلا یاناشی،هم ده هم عاغیللی و سئویملی یارانمیشدیر.اونون دونیایا گلیشی و دونیادان کوچوشوده سیرلی ومعمالی اولماقلا یاناشی سئویندیریجی و اوزوجودور.گلیشیمیز هامییا سئوینج و گولیش وئررکن ،ابدی گئیشیمیز اوره کلری آجیدیر.اوزلری سولدورور.نه دن گلیب نه دن گئتدییمیز حالا بیلمه دییمیزدن همیشه دوشونجه لییک.

مادی اوغورلار ،معنوی قازانیملار هر زامان اینسانی غرورلاندیریر.عکسینی دوشونسک اوندا اینسان نه قدر اوزگون و مکدر اولیر.دونیانین عمرونو نظره آلدیقدا اینسان اوغلینون عمرو 100 اولسا بئله چوخ آز دیر .هئچ کیمی سایلیر. آنجاق بو آز ومحدود عمر پاییندا کیمیلر نه ایشلر گئویریر اونو تک یارادان بیلیر.

یارادانا بیزی یراتدیغیندان دولایی نه قدر شوکور ائدنلر وار، اونون سایی بیلینمیر .هم ده یاراندیغیندان شکایتله ننلرده اولا بیلر .بو اینسان دئیلن یاراتیغین هله هله نه سئودالاری وار الله بیلیر.تکی سئودالاریمیز خیره ، اینسان سئورلییه ، تانری سئورلییه ونهایت اینسان تکی اینسان اولماق سئوداسی اولسون.

درگیمیزین آرخا قاپاغیندا ادیب احمد یوکنکی افندیمیزین شکیلینی (گورسه لینی) وئرمیشیک .بو بویوک تورک اینسانی تخمینا 800 ایل اونجه بیرکیتاب یازمیش "عتبه الحقایق" آدیندا کی بو کتابی من حاضیرلامیش و اوخوجو کیتله سینه سونموشام .ایچریلیی دولی نصیحتلی سوزلرله دی.اونو اوخوماغی دا اونریره رم. دوغروسو اینسانین ایگینی فراحلادیر.

اساس فیکیردن اوزاقلاشمادان دئمک ایسته ییرم کی ،گوره سن ایلک گلیشیمیزده کیملیک برگه سینی بیز بیلمه دن بیزه وئریب ،آدین بودور وکیملردنسن.سونرا ایسه هانسی کولتورون ، دیلین ، بایراغین واولکه نین قوجاغیندا بویومه یه باشلایاراق سئوگیلره وغم کدره حاضیر اول کیمی بویویوروز.

هیچ سوروشدونوز بو گلیش نه دن ، بو گئدیش ندن، بیر دوغاندا آلدیغیمیز برگه دن خبرسیز ، بیرده اولیب گئدرکن وئریلن اولیم برگه سیندن خبرسیز اولان بو یاراتیق نه دن بو عجایب و معمالار دولی ایشیقلی دونیایا گوز آچیر گورسن؟

قارانلیق بیر گرچکدی ،آیدینلیق اولماسا . بو اساس وارلیغین تام اوزودور.

گلین اوز دوغما کیملیمیزی اونو بوروموش ویا بورویه جک قارانلیقلاردانم قورویاق  .

گلیشی اونا سورولمادان گئدیشی ده اون بیلدیریلمیر.بونو اونوتمایالیم.

 

نووز بایرامی اولوسال پایلاشما و یاردیملاشمانین تاریخمیزدن گلن ان توتارلی اورنه یی دیر

مدیر مسئول دکتر حسین شرقی دره جک (سوی تورک)Sorumlu müdir:Dr.HÜSEYN ŞƏRQİDƏRƏCƏK(SOYTÜRK)

 

یئنی گون (ارگنه کون) یادا نوروز بایرامی تورکلرین تاریخده قویدوغو ان دیرلی ایزلردن بیری دیر. بو اوجا اولوس بشریت تاریخینه وئردیی چوخلو  اونملی اخلاقی ، علمی ، مدنی (اویقار) همده سیاسی واجتماعی وئریلر وئرمیشدی.

تاریخده اورنک اولاجاق بیر میللتین اویه سی اولماقدان غرور دویاراق دئمک ایسته ییرم کی ازل باشدان  یعنی بو بایرامین یارانیشیندان اوزو بری همیشه نیت خیرخواهلیق و بشری دیرلرین اوجا توتولماسی اولموشدور. اونوتمایاق ده ده لریمیزین قوردوقلاری سیولیزاسییالار هامیسی ستمه و ظولمه قارشی دیره نیش سیمولو اولموشدور.

نووروز بایرامی  ارنلریمیزین اسلام مدنیتی ایله سنتزله شمه سیندن سونرا یئنی آشیریما گیرمیشدیر.دیریلیشی سیمولیزه ائدن ارگنه کون یا ارگنه گون ایندی کی تعبیرله  یئنی گون ویا نووز بایرامی ایلک اونجه تورک اولوسونون ستمه ،عدالتسیزلییه قارشی مبارزه سیندن دوغموش اولوسال توره دیر. همده بویوک بیر ایتگیدن سونرا یازین، باهارین گلیشینی دمیر دویه رک اوزونه یئنی گوج  و تپر وئره رک یاشاما عزمله باشلاماسیدی.

دوستاقلیقدان و اسارتدن همده قارا قیشدان قورتولوش بایرامی دیر. بو بایرامی ایندی بوتون دونیا اینسانینین ثروتی اولاراق سئوگی وپایلاشمانین آنا خطی دیر. یازی قارشیلارکن کیرلیلیکلردن قورتارمانین و پاکلیغین هم ده گوزل حیسلرین و یئنیلیکلرین بایرامیدی.  میللی دیرلریمیزین دینی دیرلریمیزله باغداشلاشماسی تمیز روحون جارچیسی اولموش دور.

قوهوم قونشو ایله گوروشمه اولانینی پایلاشما ،یاشلی و قوجالارا سایقی وسئوگیی بسله مک ، مرحمتلی اولماق ،اولوتانریا قلبا یاخینلاشماق و هر کسله سعادتی بولوشمک و کینه نفرت ائتمک ان واجیبی کوسویه سون قویماق کیمی دیرلری اوز ایچریلیینه آلان بو بایرام گلنک و گورنکلری گورون نه درجه ده انسان مقامینا طبیعتین قوجاغیندا بسله ییرک اونم وئریر.

بیزده خافرینچیلر اولاراق بو بایرامی سیز دیرلی اوخوجولارمیزا تبریک دئیرک. یئنی ایلده جان ساغلیغی و اوغورلار دیله ییریک. بایرامینیز موبارک و قوتلو اولسون. یاریملاشمانی و پایلاشمانی اونوتمادان یولا داوام.