حسین (ع) اورکلرین فاتیحی ،کربلا ایسه قلبلرین باش کندی

حسین (ع) اورکلرین فاتیحی ،کربلا ایسه قلبلرین باش کندی

HÜSEYN ÜRƏKLƏRİN FATİHİ, KƏRBƏLA İSƏ QƏLBLƏRİN BAŞKƏNDİ



SORUMLU MÜDİR:Dr.HÜSEYN ŞƏRQİDƏRƏCƏK(SOYTÜRK)


مدیر مسئول :دکتر حسین شرقی دره جک (سوی تورک)


 

 

 

 

 

 

 

 

 

 

 

 

تاریخ بویو عظمتیندن آزالمایان امام حسین(ع) حرکاتی ، گونوموزده ده اوز ماهیتینی قوروریاراق داهادا عظمتلی حال آلماقدادیر. اونون تاثیر دایره سی حادثه نین باش وئردیی جغرافیادان داها اوزاقلاردادا گورونمک ده دیر.

امام حسینین دیک دوروشو و ظولمه قارشی سرگیله دیی جسارت و عزمکارلیق یزیدلرین بو گونده سارایلارینی لاخلاتماخدادیر.

هر کسه تاریخین حقیقتلری آیدیندیر. باخمایاراق کی،بیر عصر دن چوخ حادثه نین اوزریندن زامان گئچمیشدیر. گئنه ده عاشورادا باش وئرن و تاریخین مجراسینی دییشدیرن کربلا اولایی اوز تازه لیینی قوروماقدادی. بیلیریک کی، تاریخده بیر چوخ حادثه لر اولموشدور آنجاق اونلارین عظمتی گون گئچدیکجه آزالمیشدیر .رنگسیزلشمیش و اهمیتینی ایتیرمیشدیر. کربلا دا باش وئرن حاققین سسی قیامی او قدر ماهیتجه زنگیندیر کی بوتون ناحق اولان حاکیم دایره لر اونو باسدیرماغا چالیشسادا اونون بویکلویونو پرده له یه بیلمه میشدی.عدالتین حاقق سسی اولان امام حسین قیامی هم ده مظلولارین حاققلارین آلینما آدرسی اولموشدور . امام حسین(ع) بوتون سئودیکلرینی ده بو نابرابر ساوشدا ایتیرسه ده او اورکلرین فاتیحی اولاراق نینوانی ده آزادیخواهلارین باش کندی یاپمیش اولموش.

کربلانین توپراقلاری حالا حسین قوغوسو ایله سوسلنمک ده دیر.علی اصغر و علی اکبرلرین گول قوغوسو حسین عاشقلرینی مست ائتمکده دیر.

زینب (س)ین اوزگورلوک سسی حالا قولاقلاردا زنگوله چکمک ده دیر. ابوالفضل العباسین غیرتی ایندی ده مردلرین نامردلر قارشیسیندا اوز جانلیلیغینی قوروماقدادی.سوسوز دوداقلارین تمکینلی فریادی تاریخین باغرینی یارماقدادی.کربلا کونوللرین باش کندی اولاراق یئنه عاشورا وتاسوعا نیسگیلینی  یانان اورکلره آشیلاماقدادی."دینین یوخسا هئچ اولماسا مردجه داوران" نیدالاری بو گون ده شهیدلری عطرینی قوخویان توپراقلاردان اشیدیلمک ده دیر.

مردلیین نامردلییه ،ایگیتلیین آلچاقلیغا غلبه چالدیغی یئر کربلادی. بشریتین خلقتدن بو گونه قدر اوزگورلویو حیس ائتدیی قیام ایسه حسین (ع) قیامیدیر.اونودولمویان و هر گون دیرینین آرتماسیله آزادیخواهلیق اورنه ینه چئوریلمکده دیر.

اجتماعی شبکه لر ده یارانان تورکجه ادبیات İctimai şəbəkələrdə yaranan türkcə ədəbiyyat

Sorumlu müdir:Dr.HÜSEYN ŞƏRQİDƏRƏCƏK (SOYTÜRK)

مدیر مسئول دکتر حسین شرقی دره جک(سوی تورک)

 

یاساقلاردان دوغان دوشونجه اوزگورلویو هر گون قاباریق شکیل ده اوزونو گوسترمک ده دیر.گئنیشلنن و یایقینلاشان بو ایله تیشیم آراجی بوتون زورلوقلارا میدان اوخویاراق ستمه معروض قالمیش کولتور و مدنیتلرین توتاناغینا چئوریلمیشدی.

آنجاق چوخلو ادبی  سحولرین بوراخیلدیغی دا  ائله  بو سوسیال مئدیا مکانی اولموشدور.

اوخومادان یازماق، دانیشماق، اویرتمک و اویرنمک اولماز. شعر یازماق گوزل دیر، آنجاق یئترلی دئییل.اونا گوره آنا دیلیمیزی داها ایره لیلره داشیماق اوچون هر گون اوخویوب و یازمالییق.آرتیق زامانی گلمیشدیر کی، دوشونجه و ایستکلریمیزی ، بیلیم و قاورانیملاریمیزی دیرلی تورکجه میزده گلیشدیرک.
یایملانان کیتاب و درگیلریمیز ائله جه ده سانال یاییم کانلاربندا داها چوخ متن یعنی نثر اوخویوب و اوخوتدورمالییق. شعریمیزی ده هر زامانکی کیمی  اوخودوقجا داها دولغون یازیب یاراتمالییق. بو منیم دوشونجه مدی، سیز دیرلی سویداش ، دیلداش هم ده وطنداشلاربملا پایلاشماق ایسته دیم.
ائله دی.ائشیتمک،گورمک،دینلمک،دویماق و سزمک کیمی ییلنمک گوسترگه لری وار.هامیسیدا اوز-اوزلویونده اونملی دیر.

 بیر رسمی ایتیم وار بیرده توپلومسال ایتیم اونون یانیندا چئوره ده اوز ائتگیسینی بوراخیر.آنجاق بونلارین هامیسی دوزنلی ایتیمین سوزگه جیندن گئچدیکدن سونرا آکتواللیق قازانیر.

بیریسی چوخ ذکالی اولا بیلر آنجاق هامینین بیلدینی بیله بیلمز. او اوزدن هامینین یازدیغینی اوخویوب اویرنمه لی ومنیمسه مه لی دیر. اوخوماق آنا فاکتوردور. اوخومادان اوزمان اولماز .آنجاق داهی اولا بیلر.

هامیدا داهی دئییل. تاریخیمیزی یاخود دونیا فکیر تاریخینی اینجه له سک بونلاردان نئچه سینی گوره بیلریک. اونا گوره ادبیاتیمیزی و دونیا ادبیاتینی یئنیلیکلریله برابر اوخویوب خالقا سوندوغوموز اثرلریمیزده اونو یانسیتمالییق.

 شعر روح و دویقونون عقلی وشعوری بیرلشمه سینین هم ده فردی و اجتماعی معلوماتللیغین سوزمه سیدی.
کیمسه شعری سوز ییغینیندان عبارت حساب ائدیرسه یانیلیر.اونون شعری یالنیز اونون یاشادیغی زامان دا فیزیکی شخصییتینه و سوسیال موقعینه گوره دینله نیله جک.ادبیات تاریخینده یئر توتا بیلمز.

بوتون یازدیقلاریمیز ادبیاتمیزین گلیشمه سینده ائتگلیدیر. آنجاق درین دوشونجه و دولغون آنلاملی یازیلارین اوزونه خاص یئری وار.هم ده بیزدن اونجه یارانمیش ادبیاتین بو گون اوخونوب ، یاییلماسی قطعا گله جک ادبیاتین دولغونلاشماسیندا مثبت رولو اولاجاقدیر.

رسمی ادبیاتین دولت دسته یی سایه سینده بوتون ادبیاتلاری اوسته له مه سی اونون زنگین اولدوغو آنلاما گلمز . اونا گوره کی ایران دا رسمی ادبیات منجه دوغارقانلیغینی دولته باغلی اولدوغوندان ایتیریب .آنجاق تورک (آزربایجان) یئرلی ادبیاتی و دیل زنگینلیی کونوللو اولدوغوندان اوز دوغوشونا داوام ائتمک ده دیر.هم ده تورکجه ادبیاتمیز بویوک تورک دونیاسی ادبیاتیندان تاثیرله نرک هر گون یئنی سوزلره و چاغداشلیغا حامله اولور.

اجتماعی شبکه لرده تورکجه یازانلارینین و یارادیجیلارینین آرتماسی بونون گوسترگه سیدیر.آنجاق بوردا اوزل قورویوجو قایدالارین اولماماسی و قوللانیجیلارین آنا دیللی تمل ساوادسیزلیغی اورتایا غیری هماهنگلییک چیخاردیر کی ، اودا زامانین اوتوشو ایله دوزنلنمیه یه دوغرو یونه له جکدیر.یئترکی اوزونو درک دورمادان اینکیشاف ائدیریلسین.

اوزاق گله جک ده مرکزلشمیش دولتلرین ایتیم و اویرتیم ده گوجونون آزالماسی قاچینیلمازدی. کوره- سل معلوماتلانما سرعتله ایره لیله مک ده دیر. بو تور ایتیم هم ده گونجل و ائورنسلدی.

سوسیال مئدیانین گوجو دانیلماز و اونون ائتگیسی قاچیلمازدی.تک یونلولویه سون و مرکزلشمیش تعلیم سیستمینه باغلیلیغین یوخ درجه یه قدر آزالماسی دئمک دیر.کمیسه یه شکایت ائتمه دن اوز اوزلویوموزو وار گوجله ایرلیه داشیمالییق. سوسیال مئدیانین گوجوندن یارارلاناراق واریغیمیزی قوروماقلا قالمایاق . اونو گوجلندیررک باشقالارینیدا اونون ائتگی دایره سینه آلاراق بویوک مدنیتین گوجونو سئوگی و باریشلا هر کسه گوسترمیش اولاق.

 

 

تورک بالاسی قورد اولار باسدیغی یئر یورد اولار

Türk balası qurd olar basdığ ye yurd olar


Sorumlu müdür:Dr.HÜSEYN ŞƏRQİDƏRƏCƏK (SOYTÜRK)

مدیر مسئول: دکتر حسین شرقی دره جک (سوی تورک)

 

دده لریمیزبویوک اینام و جسارتلری همده عینادکارجاسینا عدالتسیزلیه قارشی مجادله لری؛گورسن نه دن ایندی بیزیم قانیمیزدا و روحوموزده آز تجعلی تاپیر.یادا هیچ اوندان اثر علامت ده بئله یوخدور. ایللردیر عین اورتامی پایلاشاراق آجیلارینا قاتلاشدیغیمیز وطن نه دن آغوشونو بیزه آچمیر؟

 ایستکلریمیز سونور  و یوخ اولور . هر گون اومیدلریمیز سویا دوشره ک سارسینتی ایچینه دوشوروک.گل قارداشیم دئدیک ده هامیدان اونجه بیز واریق؛ اولوم اولونجا گئنه  بیز اون سیرالارداییق.سئچیریک اما سئچیلمیریک؛ اولوروک اولولاشمیریق. خلاصه گوزله یه گوزله یه گوزوموزون کوکو سارالیب.

هردن اوزومدن سوروشورام گوره سن منیم وارلیغیم نیه ساکینجالی دی.اوزومو الشدیریرم ایاقدان باشا باشدان ایاغا ,اوزومو تنقید آتشینه توتورام اما نتیجه سی اولمور کی ؛ اولمور سبب و گوناه تاپا بیلمیرم. من نیه بو گونه قالمیشام اوزوم اوزومدن خبرسیز آنجاق باشقالاری منیم منلییمدن خبرداردی. شوبهه لنرک کتابلاری اوخوماغا باشلاییرام.حتی درس کیتابلارینی یئنیدن اوخویورام لاپ 30 ایل اوول اوخودوغوم کیتابلاری. باخیرام کی ؛ سیستملی شکیلده منیم منیلییم تحقیر؛ تحریف وقارالانیر.

سوروشورام حافیظه ویادداشیمدان آخی سن بوردا دوغولون بوردا ساواشدین و بوردا سئودین وسئودالاندین هم ده یوا قوردون لاپ اوغروندا ساواشدین.آنجاق گوون بولمادین.

هر شئی ایش , آش دئییل چاغداش یاشام شرطلرینین اوز طلبلری وار : حاق ؛ عدالت ؛خیرخواهلیق ؛الهی و بشری سئوگی ؛کولتورل احتیاجلار ؛پئشه اوغورلاری ؛ ساییلیب سئچیلمک حتی شهرت قازانیب سئوینمک و...

حاییف, بونلاری بولماق وبیلمک اونلارین اولسون. دوشونمک بئله عقلدن اوزاقدیر.یاساقلار ؛قورخولار ؛ اومیدسیزلیک لر  و اولومسوزلوقلار مثبت ایستکلری اوسته له میش اولور.

آنا دیلیمیزین سیاسیلشمه سی اوز اوزلویوندا تورک اینسانینا کیملیک بوحرانی یاراتمیش و بیر چوخ ایره- لیله ییشدن اوزاق قویموشدو.مرکزلشمه ومرکزلشدیریلمه بیر چوخ تالانت واستعدادلاری اوزه چیخماغا قویمامیشدی.

ال اله وئرن بوتون یارادیلمیش مانع لره بیزلری دوردورمامالیدیر.عکسینه دیم دیک دورمامیزی ساغلامالی وهر گون ایره لیه داشیمالی دی.

بوتون وئریلن وعدلری حیاتا گئچیریلمه مه سی یئنه ده صاف قلبلی جوشقو دولو تورک اینسانینی روحونا اوستون گلمه لی دیر.اونا گوره کی ؛تورک بالاسی قورد اولار و باسدیغی تورپاقلاری وطن قیلار.یعنی ال ده ائتدیی اوغورلاری مثبت یونده دیرلندیرمه یی باجارار.

ائله بونا گوره ده بو آتا سوزونه باش ووردوق کی ,گئچمیشیمیزدن گلن وارلیق آوازی  ژنلریمیزده محفوظ قالمیش اولسون.

بونونلا یاناشی 12 رمضان دا باش وئرن ترور اولایلارینی قینیاراق ,ترورو وترورچولاری لعنت له ییریک. شهیدلریمیزه تانری دان رحمت دیله یرک ؛ یارالیلاریمیز عاجیل شفا تمنی ائدیرک. میلتجه باشیمیز ساغ اولسون.

 

تورک سوی آدلارینا یئنی آچیدان باخیش

TÜRK SOYADLARİNA YENİ AÇIDAN BAXIŞ


مدیر مسئول: دکتر حسین شرقی دره جک (سوی تورک)

SORUMLU MÜDİR:Dr.HÜSEYN ŞƏRQİDƏRƏCƏK (SOYTÜRK)

 

 

اینسان اوغلو شعورلو حیاتا باشلادیغی گوندن بری همیشه آد-سان پئشین ده اولموشدور. بو اوزدن ده اینسانلار آراسیندا فرقلیکلر اورتایا چیخمیشدیر.اینسانلار آراسیندا اونجه یئر- یورد سونرا ایسه طایفا آدلاری یارانماغا باشلامیشدیر.

ایش بولگوسو اورتایا چیخدیقدا بو سبب اوزره بیر سورو آدلار عمله گلمیشدیر.سیاسی قورولوشلارین یارانماسیلا باغلی بیرچوخ آدلار او جمله دن خان ، خانیم ، خاقان ، امیر ،سید، شاه و... یارانمیشدیر.اینانج ودینی دوشونجه لر اساسیندا دا خیلی آدلار اورتایا چیخمیشدی.دئمک اولار کی گونوموزده ده حالا ان یایقین آد قویما گوسترگه لری حساب ائدیلیر.

سئوگی ومحبتین اورتایا چیخاردیغی بیر چوخ ایسملر ده واردیر.بونلاردان علاوه تکنولوژی نین ده اوزو ایله گتیردیی آد وآدلاندیرمالار واردیر.

بو دئدیکلریمیز آدلارین اورتایا چیخماسیندا اونملی عامیل حساب ائدیلیرسه ده تام دا آد و آد قویولمانین فلسفه سینی احاطه ائتمیر.

اینسان اوغلو هر زامان کیم اولدوغو و یاخود هاردان گلدیی ونه اولدوغونون پئشینده اولموشدور. بو اوزدن یوخاریداکی عامیللرله یاناشی اینسان کیم اولدوغونودا اوز آدینین داوامینا علاوه ائتمیشدیر. بو علاوه یه مختلیف دیللرده چئشیدلی ترمینلر یارادیلمیش دیر. غرب ده فامیلیا ، سورنیم شرق ده عایله آدی و سایر کیمی سسلنمیشدیر. بیز تورک لرده ایسه بو علاوه یه سوی آدی دئیلمیشدیر.

اساس مسئله ده بوردان ایرلی گلمیشدیر. بونو ایفاده ائتمک اوچون  چئشیدلی بلیرگه لر قوللانمیشلر:

1-اوغلو

2-زاده

3-پور

4- لی

5-لو

6-بونلارین هئچ بیریسی اولمادان آتا ویا جد آدینین اولدوغو کیمی ایشله دیلمه سی.

7-قیزی

8- اوف / اوا

9-ی

10-چی

11-گیل / گیللر

وبو کیمی ایفاده لری فامیل ،فامیلیا،سوی آد،عایله وی آد ترمئنلریله ایشلتمیشلر.

حال حاضیردا بو اونملی کیملیک گوسترگه سی تورک لر آراسیندا سوی آدی بیلیرگه سیله استفاده اولماقدادی.

ایندیسه سوی آدی باغلارینین ایضاحی:

زاده : بو سوز تورک روحونا و ادبیاتینا ضید بیر سوی آدی علاوه سی دیر. اونا گوره کی اونون یرانما سببلری بیزیم منتالیتئتیمیزه هایقیری دیر. چونکی زاده دوغولموش دئمک دیر حال بو کی اینسان ارکک دن دوغولمور اونا گوره بو سوی آدی کوکوندن یانلیش اولماسیلا برابر هم ده یانلیش بیز ایزین وسویون گوسترگه سی دی. بو اصطلاح زردوشتلردن قالمادی و قدیم پرسلرین حیات طرزینین یانسیماسیدیر .اونا گوره کی اونلاردا عایله داخلی ائولنمه لر یایقین اولدوغوندان بئله بیر سویلوغون استفاده سی عمله گلمیشدیر. حال بو کی تورکلرده هئچ زامان عایله داخلی ازدواجلار اولمامیشدیر.خصوصیله ده اسلامی قبول ائدیکدن سونرا حارام مسئله سی چوخ اونم داشیدیغیندان زاده کیمی سوی آدلیقلاری تامیله یانلیش و اویقونسوز حساب ائدیلمیشدیر. اونون یئرینه تاخما آدلار و لقبلر یایقین حا آلمیشدیر.

زاده سوزو قدیم پرسلرین حیات طرزینه اویقون اولاراق اورتایا چیخمیش ویایقینلاشمیش . هم ده عایله ایچی ازدواجلارین گتیردیی بیر سویلوقدور.

اگر بیر تورک بو سویلوقدان استفاده ائدیرسه اوندا کیشی یئرینه قادین قویاراق کادیندان دوغولدوغون گوسترمه لیدی.مثلا :حسین زاده یئرینه شاماما زاده داها اویقوندور.بو سوی آدلیق تورکلرین هئچ بیر گله نه یینه اویقون دئییل و اونون دورو و چیپلاق روحونا یاراشمیر.بونونلا یاناشی هم ده دینی اینانجلا باغداشلاشمیان بیر یابانجی و آرخاییک سویلوقدور.

پور :بو سویلوق آذربایجانی گونئینده دا چوخ یایقیندیر . اونون دا سببی پهلوی رژیمی دونمینده تورکلری اوز کوک و وارلیغیندان قوپارماق اوچون بو کیمی یوخسون و اجنبی منشالی سویلوقلاردان استفاده ائدیلمیشدیر.

سوز اصلینده هیند منشالی دیر و اوغلو دئمک دیر.بونون دا سوی آدی کیمی استفاده سی تورکلره اویقون دئییل.اونا گوره کی تورکلرده اوغول و قیز سوزلری وارکن بیر قیزین سوی آدیندا بئله بیر سویلوغون یانلیش اولدوغو اورتادادی.

اوغلو :بو تامامیله تورک منشالی سویلوقدور آنجاق جنسی فرقی نظره آلمادیغینان پک اویقون گورولمور.سادجه کیشی جنسینین سویلوق علاوه سی کیمی استفاده سی ممکن سایلا بیلر.

لی / لو بو سویلوق اکی دوغرو گورونسه ده اونون لو شکیلی یابانجی سسلنیشدیر.دوغرو شکیلی لی   دوغرودور.لیli یانلیشدیر.آنجاق اسکی الیفبا ایله یازدیقدا بو فرقی آییرد ائتمک ممکن دئییل.

بو سوی اکی ده تام یئترلی دئییل ، اونا گوره کی بونون دا ایشلنمه آلانی واردیر. مثلا دئیه بیلریک حسن خوجالی .دئیه بیلمریک حسن حسنلی.اونا گوره کی لی اکی یالنیز طایفا و یئر ایله باغلی منسوبیتی گوستره بیلیر. آنجاق بیزیم سوی آدلاریمیزا اویقوندور، چونکی بوی آدلاریمیزین گوسترگه سی دیر.

ی : بو سویلوق اکی عربجه دن آلینمیش منسوبیت شکیلچیسی دیر .لی شکیلچیسینی عوض ائدیر.مثلا شرقی- شرقلی کیمی استفاده آلانی واردیر.

هئچ نه دن استفاده ائتمه مک : بو بیر چوخ حال دا خصوصیله ده اصیل تورک سوزلو سوی آدلاریندا گئچرلی دی.مثلا یاشار قاراخان//آنجاق بو تور سوی آدی آلیمنا آدلاردا گئچرسیزدیر.مثلا : محمد محمد. بو تور سوی آدلاری عرب منشالی دیر و تورک دیل و وارلیغینا اویقون دئیلدیر.

قیزی : بو سوی آدی اکی تورکجه یه اویقوندور. یالنیز جنس بیلدیرمه سی کیمی استفاده ائدیله بیلر.

چی :بو سوی آدلیغی اکی اینسانین پئشه باغلیلیغیندان توره میشدیر . تورک سوی آدینا اویقوندور. مثلا : طوغرول دمیرچی.

بوتون بونلارلا یاناشی بیر چوخ ساختا و قوندارما اجنبی سوی آدلاری ایله ده قارشی قارشییاییق.

اوف / اووا : بو تور سوی آد اکلری ساختا اولدوغوکیمی آسیمیلاسیون آماجلی امپریالیستی دوشونجه نین وئریمی دی.سون ایللر روس- اسلاو ایشغالینین نتیجه سیدیر.تورکلویون روحونا و وارلیغینا یابانجی وضید دیر.

سوی آدلارینی آراشدیردیقجا اولوسوموزون نه کیمی اجنبی ایشغاللارینا معروض قالدیغینی آیدین گوروروک.

آدلاریمیز و سوی آدلاریمیز اولوسال وارلیغیمیزین گوسترگه سیدیر. تورکلویوموزو قوروماق اوچون اجنبی و قوندارما هم ده آسیمیلاسیون هدفلی و مقصد یونلونو بیزی یوخ ائتمه اویقولامالارا یوخ دئییک و ان آزی آدیمیزی و سوی آدیمیز تورک اولاراق سئچک و قورویاق. چونکو سنی باشقالاریندان فرقلندیرن ایلک اونجه سنین آدیندی.

تورکلرده ان اویقون سوی آدی ، بوی آدی دیر. تورکلر دوغایا (طبیعته) باغلی بیر یاراتیق اولدوغوندان دولایی اونلاردا دوغا باغلیلیغی چوخ گوجلودور. گلین داغلاریمیزدان ، چایلاریمیزدان ، اوبا و یئرلشیم یئرلریمیزدان آلدیغیمیز آدلاری ، زاده ، ی ، اوف / اووا ،پور و سایرلرین یئرینه استفاده ائدک. مثلا ابراهیم غنی زاده یئرینه ابراهیم قوشاچایلی ،قوشا داغلی ، قوشقارلی، قاراداغلی ،اولو دره ،اولو سوی ، اویقار و... استفاده ائدک.

منمدلی  ، حسنلی یئرینه ایسه : قارخان ، بیرک گنجه لی ،دومان خان و...

گیل / گیللر : حسنی-حسنلی، احمد-احمدلی کیمی سوی آدلاردا استفاده ائتمک اولار.حسن گیل//گیللر.

ائل ایله باغلی مینلر سوی آدیمیز وار.طایفا و عشیره سوی آدلاریمیز هامیدان زنگین دیر .مثلا : بشیراف یا اوا یئرینه ائل بیلی ،ائل جانلی و... استفاده ائدک.

بو یازی اوزونه دونوشومون بیر باشلانقیجی دیر .اساس او دور کی ، اوزوموز اوز وارلیغیمیزی دریندن باشا دوشک.ایشغالچی  آدلاردان اوزاق دوراق. بعضا ایشغالچی آدلار او قدر آشاغالیق اجتماعی مضمونلار داشییرکی ، اونون اصیل صاحیبلری اونو استفاده ائتمکدن چکیلیر.اما بیز بیلمه دن سئوه سئوه استفاده ائدیریک.

رمضان روح ایله جیسمین باغداشلاشان حسرتینین چلنگی دیر

الله قرآن کریمده بویورور:ای او کسلر کی، ایمان گتیرمیسینیز.سیزه واجیب دیر  ائله گئچمیشده کیلره واجیب اولموشدور کی ،همیشه دوروست وپاک اولاسیز.

دوغرولوق و تمیزلیک ان یوکسک اینسانی اوزللیکلردندیر. رمضانین روحوموزا هوپاراق بیزی دوروستلویه سووق ائتمه سیده ایچ دویقو و ایستکلریمیزین تمل اساسی دیر.

هر گون تانرییا یاخینلاشمانین یولو اوباشداننان باشلایان بیر قووشما حسرتینین چلنگی دیر .دونیانی زاواللی بیلن هر کس بو اویانیشدا ایچینده بیریکدیردیی حسرتین قاپیلارینی آرالاماغا باشلایاراق ایناملا ایناندیغی ایمانین کوکوسو ایله فرحله نیب و اوچماغا باشلار. بو حیسلرین آدی دوغرولوق و مومینلیکدیر.

اوروج برابرلیین ،اوزگورلویون و سئومه یین تمل داشی دیر.آج قالاراق ایچینده کی توغلوغون فرقینه واراجاغینی بیله جکسن.11 آی نه قدر دونیا دوشگونو اولدوغو آدامین ایچندن دوشونجه لرینه چیخاجاق و اطرافیبنی یئنی دن آنلاماق گوجو اولوشماغا باشلامیش اولاجاق.

یوخسوللوغون دردینی اولمامانین فلسفه سینی حتی سوسوزلوغون نه قدر آجی اولدوغونو بیر زاد اینسان اوز جیسمی و روحو ایله درک ائتمه یه باشلامیش اولور.بو حیسلر قیامتین و فلاکتین خاطیرلاتماسی کیمی دیر . اون گوره ده اویاندیریجی واویاریجی دیر. رمضان یاخود اورجلوق حیکمتلرین آیدینلانان آیی دیر. بو آی سیناو (امتحان)،قیام ودوغرولوق آیی دیر.گرچی رمضانین معناسی بئله :یوکسک ایستیلیک،چوخ ایستی داش دئمکدیر.آنجاق اونون اساس غایه سی حرییت و اوزگورلوکدور.هر کس اوز ایراده سینه تابع اولاراق داخیلی ایستک وتانریسل سئوگینی روحسال بیرلشیملرله بیرلیمده ان قوتسال اینسان سئوگیسیله بوتولشمه سیدیر.

نه گوزل کی بو آی قرآن ،بو مقدس کیتابیمیزین نازل ائلان آیدیر.اصلینده هدایت و رهبرلیک آیی دیر.حقین باطلدن سئچیلمه آیی دیر. متزلزل دونیا دا حققه تاپینما و اوردان یولا چیخماقدیر.اوزوموزدن الله ا دوغرو یوکسه لیشین نردبانی اولان اوروجلوق هم ده پیس و قورخونج غیر اینسانی دویقو و دوشونجه لریمیزله حسابلاشمانین مکتبی دیر. نتیجه چیخاریب عمللریمیزی دوزلویه و ثاوابا همده خیرخواهلیغا یونلندیرمه ییمیزین فرصت زامانیدیر. بیر معنالی اولاراق سئوگی ومحبتین نیفرت وقددارلیغا غالیب اولان معنوی دیرچلیش دیر اوروجلوق آیی.الله اوروج و عیبادتلرینیزی قبول ائتسین.

بو آی هم ده ایناجیمیزین ان بویوک و اولوی اینسانی علی (ع) شهادت آیی دیر .موولامیزین قانیلا سوواریلن رمضانی دا بوتون سئونلرینه تسلیت دیله یینده بولوناراق.حاقین یولجوسو اولماقدان الله بیزی اوزاق توتماسین.