باشین ساغ اولسون آذربایجان

مدیر مسئول : دکتر حسین شرقی دره جک سوی تورک

 

Description: 22

آذر آیینین 5 ده 1395 جی ایلده جمعه گونو ساعت 7:22 دقیقه ده تبریز مشهد(4802 نوعلو) قاتاریندا دهشتلی فاجیعه باش وئردی .سمنان مشهد قاتاری آرخاندان تبریز قاتارینا چارپاراق اونو رایلدان چیخاریب و چوخ دهشتلی هم ده قورخونج قضایا سبب اولدو.بو توققوشمانین نتیجه سینده چوخ سایدا آزربایجانلی یارالاندی 47  تورک اینسانی جانین ایتیردی.4 واگن رایلدان چیخدی.5 واگن دا اود توتاراق یاندی کوله دوندی.ایران دا وآزربایجان دا نیشابور ترن حادثه سیندن سونرا ان دهشتلی ترن حادثه سی اولاراق تاریخه گئچدی.

ترنین ترمز سورونو اوزوندن باش وئرن بو قانلی اولای بوتون اولکه نی ماتمه ساردی. تورکیه ، آزربایجان جمهوریتلریله یاناشی بیر چوخ تورکی جمهوریتلریندن ده آزربایجان تورکلرینه باش ساغلیغی ایسماریجلاری گلمه یه باشلادی.بو خصوص دا خدافرین درگیسینین رئداکسیاسینا آزربایجان و تورکیه دن تلفنلا باش ساغلیغی زنگلری اولدو.اونلاردا یئرلی سویداش و وطنداشلاریمیز کیمی بیزدن استه دیلر کی اونلارین حزون  وکدرلی اولدوقلارینی بوردا کی سویداشلارینا درگیمیز واسیطه سی ایله چاتدیراق.الله اولنلره رحمت و یارالیلارا شفا وئرسین قالانلارینین دا باشی ساغ اولسون . بیزده مطبوعاتچی اولاراق بو درین و سارسینتلی اولایی بوتون اولوسوموزا باش ساغلیغی دئیرک.اولو تانردان  اونلارا ان یوکسک اولوی درجه لر تمنی ائدیریک.

بو اولای آزربایجانین سوسیال مئدیاسیندا چوخ گئنیش ایشیقلاندیریلدی. مرثیه لر ، شعرلر و آغیلار قوشولدو. همده امام رضا (ع)زیارتچیلری اولاراق اونلارا خالق آراسیندا شهید آدی وئریلدی.بیر گونلوگ آزربایجاندا استاندار طرفیندن یاس اعلان ائدیلدی.act تکنیکی سورونون و بو سورونون دمیر یول ایشچیسی طرفیندن یول وئریلدی قضانین سببی کیمی بیان ائدیلدی.همچنین اداره ائتمه ده قصورلارین اولدوغو بیان ائدیلدی.

اولکه نین تیکینتی و یول وزیری باش وئرن حادثه یه گوره آزربایجان اولوسوندان و ایران خالقیندن عذر دیله دی.بیر چوخ میلت وکیللری ده باش ساغلیغی دئمک اوچون آزربایجانا یوللاندیلار.

دی آیی بو اوجا روحلو اینسانلاریمیزین 40-ی ایله مصادف اولدوغوندان درگیمیزین اوز قابیغینی بو حادثه یه حسر ائتمیشیک.اولو تانریدان دیله یمیز بودور کی اولسوموزو بیر داها بئله اوزگون فلاکتلرله قارش قارشییا قویماسین اینشالله.

قید ائتمک لازیمدیرکی حال حاضیردا دونیادا ترن داشیماجیلیغی سرعتله ایره لیله میشدیر.آنجاق بیزده بو مسئله اسکی دن اولدوغو کیمی دیر.قورخونج حادیثه لری اونلمک اوچون تکنولوژیه اوستونلوک وئرمک گره کیر.اونوتمایاق هر بیریمیز معصوم وطنداشین اولومونو اونلمک اوچون وجان بورجوموز واردیر.

 

بیزیم تاریخدن بیر صحفه

آذربايجان ميللي حوکومتي  و يا 21 آذر حرکاتي  1945-جي ايلين نويابر آييندان 1946-جي ايلين نويابر آيينا قدرآذربايجاندا فعاليت گؤسترميش موختار سوسياليست حوکومت. و پايتاختي تبريز شهري اولموشدور. جمعي بير ايل مؤوجود اولماسينا و بيلاواسيطه سووئت ايتتفاقي نين ايرانا قارشي سياسي، ايدئولوژي و حربي موداخيله سي نتيجه سينده يارانماسينا باخماياراق، آذربایجان میللی حوکومتی تاريخده ايلک دفعه  آذربايجاندا موستقيل موعاصير ميللي دؤولتچيليک جهدي اولموشدور. 

ايکينجي دونيا موحاريبه سي نين باشلانيلماسي بؤيوک بريتانييا ايله ياناشي سووئتلر بيرليگي حربي حيصه لري نين ايران اراضيسينه داخيل اولماسي ايله يئکونلاشدي. بو ايسه، عئيني زاماندا، اؤلکه نين رضا شاهين باشچيليق ائتديگي ايستيبداد رئژيمي نين سوقوطونا گتيريب چيخاردي. بير طرفدن خاريجي موداخيله، ديگر طرفدن مؤوجود رئژيمين ييخيلماسي ايراندا موعين قدر دئموکراتيک موحيطين يارانماسينا سبب اولدو. دئموکراتيک پروسئس اؤلکه نين موختليف بؤلگه لرينده فرقلي فورمالاردا تظاهور ائديردي. بیزیم آذربايجاندا ايسه بو ميللي-آزادليق حرکاتي سيد جعفر پیشه وریي نين باشچيليغي ايله آذربايجان ميللي حوکومتي نين يارانماسي ايله نتيجه لندي. 

  آذربايجان ميللي حوکومتي آذربايجان تورکلري نين آپارديغي اوزون ايلليک ميللي-آزادليق حرکاتي نين طبيعي يئکونو کيمي قييمتلنديريلير. سيد جعفر پیشه وریي نين باشچيليغي ايله آپاريلان 21 آذر حرکاتي 12 دئکابر 1945-جي ايلده آذربايجان ميللي حوکومتي نين قورولماسي ايله نتيجه لندي. اونا گؤره ده تاريخي-سياسي ادبياتدا آذربايجان ميللي حوکومتي 21 آذر حرکاتي آدي ايله تانينماقدادير. 

آذربايجان ميللي حوکومتي خالقين بؤيوک دستگيله دؤولتين بير سيرا موهوم ايشلريني حياتا کئچيرمه يه باشلادي. تبريز دؤولت اونيوئرسيتئتي نين و چوخلو سايدا اورتا مکتبلرين آچيلماسي، ميللي تئاترين و ميلي فيلارمونييانين ياراديلماسي، ميللي کيتابخانالارين ايستيفاده يه وئريلمه سي، يوللارين چکيلمه سي و س. کيمي ايشلرله آذربايجان ميللي حوکومتي بير ايلده ايگيرمي ايلليک ايران حوکومتي دؤوروندن قات-قات آرتيق بير ايره ليلیيش الده ائتميشدي. 

  آمريکالي حوقوقشوناس اولييام دوقلاس 1950-جي ايلده آذربايجانا گئتميش و يئرلي جاماعاتين ميللي حوکومتين و اونون باش باخاني سيد جعفر پیشه وریي نين خيدمتلري کيمي خاطيرلاتديغي دييشيکليک و ايصلاحاتلارين سيياهيسيني ترتيب ائتميشدي. 

 1.آزربايجان ميللي حوکومتي تورپاق ايصلاحاتيني حياتا کئچيردي؛ 

  2.حوکومت ايري بانکلاري ميلليلشديردي؛ 

  3.دؤولت مأمورلاري نين روشوت آلماسيني انگلله ين جيدي قانونلار قبول اولوندو؛ 

  4.شهرلرله ياناشي، کندلرده خيدمت گؤسترن سييار خستخانالار و ساغلامليق کلينيکالاري ياراديلدي 

  5.اساس ماللارين قييمتلرينه جيدي شکيلده نظارت ائديليردي. ارزاق محصوللاري نين گيزله ديلمه سينه گؤره آغير جزا وئريليردي؛ 

6.سوسيال پروقرامين حياتا کئچيريلمه سينه باشلانيلدي، ايشسيزلر ايشله تامين اولوندو؛ 

7. گ. آذربايجان ميللي اوردوسو ياراديلدي. 

  آذربايجان ميللي حوکومتي نين فعاليت گؤسترديگي بير ايل عرضينده حياتا کئچيرميش اولدوغو ان موهوم ايصلاحاتلاري اساس اعتيباريله اوچ کاتئقورييايا بؤلمک مومکوندور: 

  1) سياسي ايصلاحاتلار؛ 

  2) مدني ايصلاحاتلار؛ 

  3) سوسيال-ايقتيصادي ايصلاحاتلار. 

  آذربايجان ميللي حوکومتي دؤورونده کؤنوللو خالق بيرليکلريندن عيبارت اولان فداي دسته لري ميللي اوردونون اساسيني تشکيل ائديردي. قيسا مودت عرضينده خالقين سئويمليسينه چئوريلن فدايلر ميللي حوکومتين مؤحکملنمه سينده، اونون حربي قودرتي نين گوجلنمه سينده، خالقدا اؤز دؤولتينه اولان اينامين، اعتيبارين فورمالاشماسيندا اهميتلي رول اويناميشلار. فداي دسته لري نين اؤزلريندن قات-قات گوجلو اولان ايران پهلوي رئژيمي قارشيسيندا دايانماسي، ميللي آذربايجان دؤولتيني مودافيعه  ائتمه سي يوکسک وطنپرورليک و قهرمانليغين تکرارسيز اؤرنگيدير. 

    آذربايجان ميللي حوکومتي نين آپارديغي ايصلاحاتلارين ايکينجي قيسمي اؤلکه ده حقيقي معنادا اينقيلابين حياتا کئچيريلمه سيني تامين ائتميش اولدو. بو اينقيلاب  پهلوي رئژيمي نين آسسيميلياسييا سيياستينه قارشي چيخماق و آذربايجان ميللي کيمليگيني تصديق ائتمک مقصدي داشيييردي. آذربايجان ديلي نين يوکسک توتولماسينا اساسلانان مدني دييشيکليکلر پروسئسي حتّی 1945-جي ايلين نويابريندان قاباق باشلاميشدي. لاکين اؤز رسمي خاراکتئريني 1946-جي ايلين يانوارين 6-دا  " ديل حاقيندا ميللي حوکومتين قراري "  ايله آلدي. بو سند ائلان ائتدي کي،" بو گوندن اعتيبارن، آذربايجاندا رسمي ديل تورک ديليدير " . بو واختادک تورک ديلي آرتيق بير چوخ مکتبلرده تدريس اولونوردو و آنا ديلي درسليکلرين گوجلو شکيلده نشرينه باشلانيلميشدي. قرارين قبول ائديلمه سي ايسه بو پروسئسين تئز بير زاماندا اوغورلو نتيجه لر وئرمه سينه سبب اولدو. همچينين بير نئچه ايجتيماعي آذربايجان اينجه صنعت و رسامليق مکتبي نين (9 دی 1946 )، دؤولت تئاتري نين (13 اردیبهشت 1946)، آذربايجان راديو وئريليشلري آگئنتليگي نين (4 اييول 1946) و تبريز دؤولت اونيوئرسيتئتي نين (6 اييون 1946) آچيلماسي بو پروسئسين ان اؤنملي حاديثه لري اولدو. 1946-جي ايل شهریور آييندان يئني تدريس ايليندن باشلاياراق، بوتون مکتبلرده درسلر آنا ديلي اولان آذربايجان تورکجه سينده آپاريلمالي ايدي و بو ايشين اوغورلو شکيلده حياتا کئچيريلمه سي ميللي حوکومتين مدني ايصلاحاتلاري ايچريسينده اؤنملي يئرلردن بيريني توتماقدادير. 

  سووئت حربي حيصه لري نين ترکيبينده آذربايجانا گلميش اولان سووئت آذربايجانين يازيچي، شاعير ادبياتشوناس و پوبليسيستلري سولئيمان رحيموو، سولئيمان روستم، مممد راحيم، عوثمان ساريوللي، عوض صاديق، جعفر خندان، عابباس زامانوو، قولام مممدلي، ايسرافيل نظرلي و باشلقالاري نين فعاليتي سايه سينده تبريز ادبي موحيطينده بؤيوک بير جانلانما ياراندي. آذربايجان بو دؤورده آپاريلان مدني ايصلاحاتلارين موهوم بير قاناديني آنا ديلي مطبوعاتين فورمالاشماسي سعجيييلنديرمکده دير. 1945-1946-جي ايللرده آذربايجانین موختليف مطبوعات اورقانلاري، او جومله دن  " وطن يولوندا ، " آذربايجان " ،  " فرياد " ،  " آزاد ميلت " ،  " غلبه " ،  " يئني شرق " ،  " معاريف " ،" دموکرات " ، " فلاحت "  (تبريز)،  " جؤودت "  (اردبيل)،  " اورميه " ،  " قيزيل عسگر "  (اورميه)،  " وطن "  (ميانا) قزئت، ژورنال و مجموعه لر نشر اولونموش، بو مطبوعاتين صحيفه لرينده اؤلکه نين ايجتيماعي-سياسي و ادبي-کولتورولوژي حياتي تجسسومو تاپميشدير. آذربايجان ميللي حوکومتي سوسيال و ايقتيصادي دييشيکليکلري حياتا کئچيرمک مقصديله بير سيرا جيدي ايصلاحاتلارا دا باشلادي. بو سيرادا تورپاقلارين کندليلره پايلانيلماسي، شهرلرده و کند يئرلرينده خسته خانالارين آچيلماسي، يوللارين چکيلمه سي، کند تصروفاتي نين اينکيشاف ائتديريلمه سي، ايشسيزليین آرادان قالديريلماسي و س. کيمي موهوم مسله لر قئيد اولونماليدير. 

  نهايت کي، سوسيال-ايقتيصادي ايصلاحاتلارين صورتلي بير شکيلده حياتا کئچيريلديگي بير دؤورده ميللي حوکومت شاه رژيمي نين اليله 2 آذر (12دئکابر) 1946-جي ايلده سوقوطا اوغراديلدي. 

  قئيد ائدک کي، بير قدر اؤنجه ايران مرکزي حوکومتي آذربايجان ميللي حوکومتي ايله ايمضالاديغي آنلاشمالارلا بو موختار دؤولتي رسما تانينميش اولسا بئله، عئيني ايل ايچريسينده پهلوي  دؤولتي اوردوسو آذربايجانا هوجوم ائتميش و ميللي حوکومتين مؤوجودلوغونا سون قويموشدور. آذربايجانين ايشغالي نين آرديندان مينلرجه آذربايجان تورکو يا قتل ائديلميش، يا دا سورگونه گؤندريلميشدير. 

 آذربايجان ميللي حوکومتي نين قوروجولاري سيد جعفر پیشه وري باشدا اولماقلا بؤيوک ايشگنجه لره معروض قالميشلار. س.ج.پیشه وریي 1947-جي ايلين اييول آيي نين 11-ده  سووئت آذربایجانینین يئولاخ شهري ياخينليغيندا معمالي شکيلده ماشين تصادوفو نتیجه سینده  اولموشدور. حوکومتين باش یارقی باشچیسی فيرودين ايبراهيمي تبريزده اعدام اولونموش، معاريف باخاني محمد بي رييا سووئت سياسي  رژيمي طرفيندن 22 ايلدن آرتيق حبسده ساخلانيلميشدير. ميللي حوکومتين ديگر قوروجلاري دا حبس و سورگونلره گؤندريلميش، آغير موهاجيرت حياتي ياشاماغا مجبور اولموشلار. لاکين اونلارين آذربايجان خالقي نين آزادليغي  يولوندا آپارديغي موباريزه آدلاريني تاريخه ابدي اولاراق يازميشدير. آذربايجان ميللي حوکومتي نين عؤمرو اوزون اولماسا دا، بو حوکومتين يارانماسي و فعاليتي آذربايجانين  دا ميللي-آزادليق حرکاتي نين سونراکي مرحله ده اينکيشافينا جيدي تکان وئرميشدير. بو گون  دونيانين موختليف اؤلکه لرينده گئدن آزادليق حرکاتي نين اساس ايدئيا قايناقلاريندان بيري محض سید جعفر پیشه ورینين باشچيليغي ايله قورولموش آذربايجان ميللي حوکومتيدير. 

  حوکومت عوضوولري

1) باش باخان-سيد جعفر پیشه وریي؛ 

2) داخيلي ايشلر باخاني-سالام الله جاويد؛ 

3) خالق قوشونلاري باخاني-جعفر کاويان؛ 

4) کند تصروفاتي باخاني-دوکتور مهتاش؛ 

5) معاريف باخاني-محمد بي ريا؛ 

6) صحيه باخاني- دوکتور اورنگي؛ 

7) ماليييه باخاني- قولامرضا ايلهامي؛ 

8) عدلييه باخاني-يوسيف عظيما؛ 

9) پوچت-تئلئقراف باخاني-ميرزه ربيع کبيري؛ 

10) تيجارت و ايقتيصاد باخاني-رضا رسولي؛ 

11) عالي محکمه نين صدري-زین الدين قيامي؛ 

12) قوه قضاییه-فيرودين ايبراهيمي. 

آذربایجان ملی حکومتینین اعلامیه سی

آذربایجان ملی مجلیسینین انتخاب ائتدییی آذربایجان ملی دولتی ایرانین استقلال و تمامیتینی حفظ ائتمکله برابر، ایشه باشلادیغینی بو واسطه ایله بوتون خالقا اعلام ائدیر؛  بو اعلامیه منتشر اولان گوندن (۲۱ آذر ۱۳۲٤) اعتباراً، مالکیت خصوصی محفوظ اولماق شرطی ایله بوتون آذربایجاندا اولان دولت اداره لری ته زه حاکمیتین تحت اختیارینا کئچدییندن، عموم دولت مامورلارینا اوز وظیفه لرینی دوزگونلوک و صداقتله انجام وئرمه لری تاپشیریلیر٠ته زه دولتین امرلرینه اطاعت ائدیب، اونون دستوری ایله رفتار ائدن کارمندلر اوچون مناسب ایش شرایطی وجودا گتیریله جک، ایشله مکدن امتناع ائده نلر ایسه کمال احترام ایله ایسته دیکلری یئره گوندریله جکلر٠آذربایجان ملی حکومتی خالقین سعادت و خوشبخت لییندن اوتری قورولدوغو اوچون، عموم خالقی فعالیته، دوزلویه، آسایش و امنیتی حفظ ائتمه یه، بیر- بیری ایله قـارداشواری یاشـاماغا دعـوت ائدیر٠امینتی اخلال ائدن و خالقین مال، جان، ناموس و حیثیتینه تجاوز ائله ینلر، همچنین دولت مالینا خیانت الی اوزادیب دولت اداره لریندن سوء استفاده ائدنلر و یا دولت اداره لرینده خرابکارلیق، مسامحه و اوز وظیفه سینده کوتاهلیق ائتمک کیمی خائنانه تشبثلر بروزه وئرنلر ایسه خالقین دشمنی حساب اولونوب، ملت و دولت یانیندا نفرت و انزجار قازانماقدان علاوه، قانونی محکمه واسطه سی ایله مجازات ائدیله جکلر٠هامیدان خالقا و اولکه یه خدمت و آذربایجانین گله جه یی یولوندا جدیت گوزله نیر. دولت ایسه اونون شرایطینی وجودا گتیرمه یه چالیشاجاقدیر٠آذربایجان ملی وزیرلر هیأتی عین زاماندا آذربایجاندا ماموریتلری اولان خارجی دولتلرین دیپلوماسی نماینده لرینه اطلاع وئریر کی، کما فی السابق اونلارین بین الملل قانونلار شرایطینده اولان حق و اختیارلاری کمال دقت و احترام ایله مراعات اولوناجاقدیر. همچنین دموکراتیک دولتلرین اتباع ینین آسایش و امنیتینی حفظ ائتمک یولوندا ملی دولت هئچ بیر فداکارلیقدان خوددارلیق ائتمه یه جکدیر. بوگوندن اعتباراً دولته متعلق اولان منقول، غیر منقول اموال، همچنین نقد و جنس و اعتبار ملی، دولت اختیارینا کئچدییندن، اونلارین ساخلاماغینا موظف اولان دولت مامورلاری، کئچمیشده وئردیکلری تعهد و قبول ائتدیکلری مسئولیت اوزره، اونلاری حفظ و حراست ائتمه یه مجبوردورلار. بو اموالی حیف و میل ائدنلر آغیر جزالارلا مجازات گوره جکلر٠آرتیق آذربایجان ملی حکومتی تحقق تاپمیش، خالقین اراده سی ایله داخلی ملی دولتیمیز وجودا گلیب، رسمی صورتده خالقیمیزین آرزو و آمالینی اجرا ائتمه یه باشلامیشدیر. خالق ایسه اوز ملی حکومتینه، وار قوه سی ایله مساعدت گوستریب اونون فعالیتی اوچون مناسب شرایط وجوداگتیرمه لیدیر٠یوخاریدا قید ائدیلدییی کیمی دولت وار قوه سی ایله امنیتی حفظ ائتمه یه چالیشیر. اونا گوره خالق اوچون نگران اولماغا هئچ بیر دلیل یوخدور. هر کس اوز ایشینه مشغول اولمالی، اوز ایسته دییی کیمی یاشامالیدیر. بازار باغلاماق، مدرسه لری تعطیل ائدیب، وحشت و اضطراب یاراتماغین معناسی یوخدور. حکومت اوز برنامه سینی خالقین احتیاجاتی اوزه رینده قورموشدور. اونا گوره خالقی ناراحت ائدن حادثه لره یول وئرمییه جکدیر. تصادفی حادثه لره ایسه چوخ تئز بیر زاماندا خاتمه وئریله جک. ماجراجولار، آسایشی اخلال ائدنلر صالح محکمه طرفیندن محاکمه و شدید بیر صورتده مجازات اولوناجاقلار. هئچ بیر پیس اتفاق دوشمیه جکدیر. هئچ کسین حقوقونا تعرض اولمیاجاقدیر. ملی حکومت نظمییه اداره سینی ته زه قوه لر، وسیع اختیارات ایله گوجلندیرمیشدیر. هرج و مرج و ناامنلییه آرتیق میدان وئریلمییه جکدیر. مخصوصاً مدرسه لریمیز همان سابق پروگراملارینی تعقیب ائتمه لی محصللریمیز وار قوه لری ایله امتحانلارا حاضرلاشمالیدیرلار٠کندلرده و شهرستانلاردا ایسه جدی صورتده ایشه باشلانیب عادی حال وجودا گله جک و دولت مامورلاری، فدایی لرین و یا غیر مسئول اشخاصین دخالتی اولمادان اوز وظیفه لرینی انجام وئرمه یه قادر اولاجاقلار. فدایی دسته لری انتظام آلتینا آلینیب معین مرکزه تابع اولاجاق، بو واسطه ایله هر بیر سوء حادثه احتمالینین قاباغی آلیناجاقدیر٠گئدین چالیشین، آسوده اولون ملتیمیزین گله جه یی و سعادتینی تامین ائتمک اوچون قبول ائتدییمیز وظیفه نی صداقت و ایمانلا انجام وئرین. دولت عموم هموطنلردن بونو طلب ائدیر.                                   قایناق: اینترنت ویکیپدیی

محرم ایمان و اوزگورلویون ابدی یئنیلمزلیی دیر

Məhərrəm iman vəözgürlüyün əbədi yenilməzliyidir.


Sorumlu müdir:Dr.hüseyin şərqidərəcək (soytürk)

مدیرمسئول:دکتر حسین شرقی دره جک (سوی تورک)

بشر اوغلونون اوزون گئچمیشینه نظر سالاندا گورورسن کی، بو چوخ اوزون و ائنیشلی یوخوشلو یولدا هیچ ده یاددا قالان اولایلار آز دئییل.آنجاق اینسانین اوزونو شعورلو ایداره ائتمه تاریخیندن بو طرفه گوزه چارپان ساغلام عدالتلی حرکتلر او قدر ده چوخ دئییل.بو نادیر و یاددا قالان دینی- تاریخی حادیثه لرین ان اونملیسی شوبهه سیز محرم آیینین تاسوعا وعاشورا واقعه لری دی.

اونودولماز وابدی یاشار هم ده اینسانلیغا یون وئرن امام حسین (ع) حرکاتی تکجه بو حرکاتین مظلومیتی ایله یوخ هم ده بشریته اوزگورلوک واینسانلیق درسی وئره بیله جک نامیندان دا چوخ اونملی دیر."دینینیز یوخدورسا هیچ اولماسا کیشیلینیز اولسون" سوز بویوک اینسان رسول الله ین تورونو واماممیز اولان حسینین موبارک آغزیندان هیچ بیر اینانجا صاحیب اولمایان اینسان دونوندا اولان کفارا بیر هایقیری اولاراق اوجا سسله سسلندیریلمیشدیر کی،حالا او سس تاریخ بویونجا قولاقلاردا جینگیلده مک ده دیر.

کربلا واقعه سی هم ده اورک سیزلادان اینسانی روحا درین حزن و ماتمه سوخان آزیاشلیلارین شهید ائدیلمه سی آجیسیدیر.گوناهسیز و ملکلر قدر تمیز گوزل روحلو علی اصغر و علی اکبرلرین شانلی تاریخ یازما صحنه سی دیر.

سوسوزلوغون و دیره نیشین هم ده اینسان اراده سینین تایسیز گوستریسیدیر.او اراده کی اولوم بئله ظفر دیر اوردا.مادی دونیانین معنوییات قارشیسیندا نه قدر جیلیز و اوجوز اولدوغو آچیق آشکار گورونمک ده دیر.کربلا دا تاسوعا وعاشورا اولایی عدالتین ظالیمله ساواشی وغلبه سی دیر.تاریخدن آلیناجاق درس دیر.ایمانین و حقیقتین قارانلیقلارا غالیب گلمه سیدیر. کربلا دا اوجالان سس تک کیشی سسی دییل هم ده قادینین سسی وحیاسی دیر .بلی قانین قیلینجا غلبه سینی بوتون عالمه دویوران خانیم زینبین کسرلی سسیدی.اونوتمایاق کی او گونون شرطلرینی نظره آلاندا بو بیر الهی حادیثه وبشری رفورم دیر.

بوتون ستمه قارشی دیره نن هم ده اولایلرین گرچک اوزونو آنلادان بیر قادین وار .کیشیلرینی  اوشاقدان بویویه شهید وئرن وتک باشینا بوتون یتیم یسیرلره ییه دوران بو شانلی قادین اوز دیک دوروشو ایله تاریخ یازمیش و قارانلیقلری آیدینلاتمیشدیر.

 

محرم اوزگورلوکچو روحون تارییا اوچوش رمزی دیر.وار اولمانین جسدله فیزیکله یوخ بلکه اوتایا قویولان پولاتدان دا برک ادراده نین اولماسی دیر.گوز یاشلاریمیزلا سیزلری هر آن آناراق یولونوزدا یولجو اولماغا و او شانلی اوزگورلوک بایراغینی دالقلاندیرماغا یورویرک هله چوخ اویره نه جییمیز وار.

کور گوزلره گوزگو ساتمیریق

مدیر مسئول:دکتر حسین شرقی دره جک سوی تورک

 

Kor gözlerə güzgü satmıriq

 

Sorumlu müdür:Dr. HÜSEYN ŞƏRQİDƏRƏCƏK SOYTÜRK

 

 

 

 

 

مین ایللردیر دده لریمیز بو گوزل یوردو وطن قیلمیش هم ده اوغروندا جانیندان مالیندان گئچمیشدیر.زامان گلیب اوغرونا ناموس وشرفینه آند ایچرک دونیایا آرخا چئویره رک اولومون شهیدلیک شربتینی ده ایچمیشلر.

عدالت و اوزگورلوک آدینا گوز قیرپمادان دیک دوروش سرگیله میشلر آنجاق گل گورکی بو صافلیغی و دوغرولوغو گوره بیلمه ین کیرلی صیفتلیلر کور گوزلریله تاریخین گوزگوسونه باخمیشلار و باخماغادا داوام ائتمکده دیرلر.

آنجاق اینانیرام منیم اوجا اولوسوم داها کور گوزلره گوزگو ساتمایاجاق.اوزونو گوره بیلمه ینلر باشقالارینین دستور و بویروغو ایله میلیونلارجا تورک اینسانینی ان تمل حاقلاردان بئله محروم قویان و اونون اوولادلارینین اوز کوک وتاریخیندان اوزاق توتان پلانلارین حیاتا گئچیریلمه سینده اربابلارین چیراغینا یاغ اولانلار یقین بیلیرلر کی وطن ایچینده وطن داشینی جیدیه سایمایاندا دونیا دوزیینده ده اونون باخیش اولچوسونده اونا ده یر وئره جکلر.

سوندا کور گوزلرله گوزگویه باخانلار اوز عیبه جرلیکلرینی گوره بیلمه دیکلرینه گوره درین درین قازدیقلاری قویلارا دوشوب و گوموله جکلر.هرکسین بیلگی ودونیا گوروشونا نسبی ده اولسا مالیک اولدوغو زاماندا گوزگوده اوزونو گوره بیلمه ینلر منجه ناچار قالاجاقلار.

کیرلی عمللرینه گوره اوزلری ده گورمه سه لر اونلارین اولادلاری جاواب وئرمک مجبوریتینه قالاجاقلار.زیرا گونشین دوغوشونو وائرته له مک کیمسه نین گوجو قاپسامیندا دئییل.قلبا و روحا بویوک اولماق ، قارداشلیق روحونو ایچینده منیمسه یه بیلن هرکس گونشین دوغوشونو قوجاقلایا بیله جکدیر.ایرقچیلیق، گوجسوزه باسقی ، فرصتدن دولاییسی یوللا استفاده هرگون مسافه نی گئنیشلندیره جکدیر.

اورتایا چیخان نیفرت وکین یارغانینی بیرداها سئوگی و باریش گول چیچه یی دولدوراماز اولاجاقدیر.تدبیرلی وانصافلی اولماق گره کیر.وطن اوولادی وطن ده غریب اولمامالی دیر.وطن باشا تاج اولمالیدیر. نه اینکی جانا قنیم فیکره زهر، او زامان آتالار دئمیشکن بیزده کورا گوزگو ساتماریق.

آذربایجان تورکجه سینده تحصیل مسله سی

 

عوموم خالق تحصیل سیتمینده بوتون کوتله نظره آلینمالیدی.بودا او دئمک دیرکی، اینسانلارین تومونون آنلادیغی و دانیشدیغی بیر دیلده ایتیم و اویرتیم حیاتا گئچیریلمه لیدی.مسئله یه سیاسی دوزیدن کنار یاناشماق لازیم دیر.قاجار دونمیندن بو طرفه اولکه ده حیاتا گئچیریلن غرب یونوملو تحصیل سیتمینده بیز تورکلری آنا دیلمیزده اوخوما یازمادان محروم قیلان قدار شاهلیق سیستمی بوتون وار گوجو ایله تورکلری آسیمیلاسیونا اوغراماسینا چالیشمیشدی.

بونون دا نتیجه سی تورکه فوبیه وآنتی آذربایجانچیلیق اولموشدور.حتی داها ایرلی گئدیلرک تورکه اهانت و آشاغالاما و قارالاما سیاستی یورودولموشدور. تورکجه میزین یعنی آنا دیلیمیزین تحقیرینی هدف آلان شوونیستی و ارتجاعی یاناشما طرزی سبب اولموشدور کی، بو دیلی دانیشانلاردا آشاغالیق کمپلکسی اورتایا چیخسین.بونا گورده تورک اینسانی اوزونو ایفاده دن چکینمیش و حتی اوزونو اینکار سویه سینه قدر ایره لیله میشدیر. پسیکولوژی آشاغالامالار نتیجه سینده اینسانلاردا اوزونو تحقیر ویا اوزوندن اوتانما کیمی شخصیت حادیثه لری اورتایا چیخمیشدی.

بونولا یاناشی بویوک مالی دستکلری اولان قوروم وقورولوشلار ودولت حمایه وتشویقی ایله اینانیلماز اولدوروجو و یوخ ائدیجی تئوری وتئوریسینلر قوشونو اورتایا چیخمیشدی.اوز هموطنلرینی دوشمن کیمی گورن سیاست اورتایا چیخمیشدی. بو گونه قدر ده داوام ائتمکده دیر. و ایللر بویودا داوام ائده جکدیر.اونا گوره کی بو غیر برابر وار اولما مجادیله سینده تورکلرین اوزونو قوروما و یاشاما مکانیزمی ژنتیکی شکیل ده ایشله مه یه باشلامیشدیر. او زاماندا بو واراولوش مجادله سی تجزیه طلب کیمی آدلارلا مرجک آلتینا آلینمیشدی و اونا قارشی سرت تدبیرلر مرکز طرفیندن حیاتا گئچیریلمیشدی. اصلینده تورکلرین هر بیر مدنی وکولتورل حرکاتلاری وطنه قارشی آنلایش ملزمه سینه چئویریلرک مرکز عرقچیلار طرفیندن باسدیریلمیشدیر.اجتماعیته تورکلرین بولوجو اولدوغو تبلیغاتی باشلادیلمیشدیر.اونون قارشیسیندا ایسه عادی تورک اینسانی وهیچ بیر مادی امکانا صاحیب اولمایان مظلوم میلتیمیز یانلیز اوزلرینین وطنه صداقتلرینی ساوشلاردا ایگیتجه ساواشارق گوسترسه لر ده قارشی طرف غرب اربابلاریندان آلدیغی تام نوت اساسیندا تورکلری یوخ ائتمه سیاستلرینی تحصیل آغیرلیقلی مجرالاردان داوام ائتدیرمیشلر. باسقی او قدر شدتلی وظالمانه اولموشدور کی حتی تورکلرین آدلاریندا دا بئله اینکار سیستمی حیاتا گئچیریلمیش واونلاری ایچریدن تهی قیلماق اوچون تورکه تحقیرله یاناشی مختلف ساختا آدلارین ایجادیله قرارلی شکیلده یوخ ائتمه سیاستی یورودولموش. دونیادا نادر درس کیتابلاریندا گورونن آشاغالاما ایفاده لریله گرچک دن تحصیل سیستمینده تورک اوونا چیخیلمیش . تورکلره اولمایان حقارتلر یاغدیریلمیش و تورک اوشاقلارینا اوخوتدورولموش. فارس تحصیل سیتمی تورکلرین دوشونجه و گیزلی ژنتیک کدلاریندا ابدی اولاراق دوشمن کیمی قالاراق غربین تورکه فوبی سیاستی ایران دا  قوندارما حاکمیتلرین اللری ایله حیاتا گئچیریلمیشدیر.اصلینده تورک عیرقینی هدف آلان آوروپالیلارین تورکلری آرخادان وورما سیاستلرینین نیجه سیدی. ایران سیاسی وتحصیل سیتمینین معمارلارینین هامیسی غرب پرست قووه لر اولماسی و یا خود اورالاردا اونلارین وئردیی بورسلارلا تحصیل آلمالاریدی. بوایش اصلینده اولکه نی سون نتیجه ده داخلی قوومی کین ونفرت اساسیندا پارچالاما سیاستی دیر. قوندارما پهلوی رژیمی غرب دسته یینی اوزرینده حیس ائدرک تورکجه یازیب اوخومایا قاداغلار گتیرمیش و ظن ائتمیش کی بو شکیلده تورک وارلیغینا سون وئریب اربابلارینین تورک قورخوسونو گیدرمیش اولاجاقدیر.

نظره آلساق کی همن همن اولکه نین هر یئرینده یاشایان تک عیرق تورک عیرقی دیر اوندا انگلیسین، اسرایلین و بوتون آوروپانین تورکیه تورکلرینین آرخاسیندا بیر بئله تورکون اولماسی و زامانی گلینجه اولارین بیرلشمه لری همچنین اورتا آسیا تورک بیرلیینین یارانماسی تاریخده اولدوغو کیمی اوروپانین تورکلر طرفیندن توتولما قورخوسو اونلاری همیشه وادار ائتمیشدیرکی،تورکیه اطرافیندا بوتون تورکلری آسیمیلاسییا اوغراتسین . نه یازیق کی بو اویدورما پلانی آنلامایان بعضی قووملرده اونلارا آلت اولموش و باجاردیقلاری قدر عین قدری و عین دینی پایلاشدیقلاری هموطنلرینه ظالمجه سیاستلر اویقولامیشلار.بویوک امپراتورلوقلارین قالان واریثلری اولان تورکلر تاریخ ده دوست و دوشمنلریندن سون ضربه لری آلماقدادیرلار.

بو یوخ ائتمه سیاستی اسلاو وروسلاریندا ایشینه یارامیش اونلاردا باتی (غرب) قدر ده اولماسا بئله تورکو ازمه سیاستی یوروتموشلر.

بو گیرشدن سونرا دونک اساس مسله یه ،ایراندا تاریخی کوکلره صاحیب اولان تورکلر و بورادن باشقادا بیر اولکه لری اولمایان بونلار نیه بو قدر دوغوب بویودوکلری و زامان زامان اوغروندا اولدوکلری و یارالاندیقلاری حتی یاشاملارینی بوتون مادی و معنوی بویوتدا وئردیکلری اولکه لری طرفیندن سیخنتیا معروض قالیرلار؟.

وارلیغیمیز چوخ مشهود وملموسدور گیزله دیله سی و یا باسدیریلاسی بیر شئی دئییل. آنجاق بللی سببلردن دولایی عیرقی رقابت نتیجه سینده اورتایا چیخان بو ناطرازلیق بللی زامان کسیینده مسکن درمان کیمی حل ائدیجی گوروله بیلر .آنجاق اوزون زامان بیچیمینده و نسیللرین دییشیب یئنی یئنی معلوماتلارا صاحیبلندینده بو گونکو اویقولانان سیاست اویقولایانلار اوچون هیچ ده خوش تاثرات اولوشدورمویاجاق.

تصور ائدین سیز ائوده بیر عایله ده ایکی فردسینیز بیرینیزه خرج چکیلیر اوخویوب حکیم اولورسوز او بیریسی ایسه  خرجسیز فلانسیز بویویور حتی زامان زامان اوزرینه گئدرک اونو سیخیشدیریرسیز.سونرا اورتایا چیخان فرقی شیشیردیب و باشلایب یوخسون قالان آدامی تحقیر ائدیرسیز و دئییر سیزکی : باخ سیروسا ادبلی کاماللی ، یوکسک مدنیتلی و ساییر.سونرا اونو یاشارلا مقایسه ائدیب دئییرسی باخ  بونون دونیا گوروشنه و اونو آشاغالاییرسیز.اوزیندن گئچن زامانی و اورتامی سیروسون یتیشدیریلمله هزینه لرینی ده یوخدان ساییب ومقایسه یه باشلاییرسیز.اورتایا چیخان تابلو بللی دیر.

گلین عادیل اولاق, باخاق گورک کی تریلیونلار هزینه سی اولان سیروس نیه اوزونو بو یوخسول ساخلانیلمیش یاشارلا مقایس ائدیر. بیزیم آنا دیلمیز ده تحصیلین اولماماسینین سببینین بیری بودور.

اکینجیسی ایشچی قووه سی کیمی اوندان بهره لنمه وماهیت اعتباریله آشاغا کولتور طبقه سینده ساخلاماق و ایستنیلن آن تحقیره معروض قویماق و کوچومسه ییب استفاده ایله مک.

اوچونجوسو میللی وارلیقلاریندن اوزاق توتماق و بو وسیله ایله فرد وتوپلومدا بیلینجسیزلیک اولوشدوروب سوز و ادبی مدنی قابلیتسیزلیک یاراتماق. سن نه قدر اوز میللی شخصیتلرینی تانیماسان او قدر کیچیله جکسن و قارشی طرفه تابع وامر بر اولاجاقسان.

دورونجوسو ایسه سیاسی آماجلی سیاست ملزمه سی چونکی اینسان اوزوملشدیکجه جهانیله شیر. میثال اوچون بیر فرد اوزوملشدیکجه سوسیال مئدیا دا دا بیر دونیا اینسانی کیمی اوز وارلیغیندان یولا چیخیر و عاید اولدوغو توپلومون منافع لریندن چیخیش ائدیر.

هرکسه معلومدور کی آنا دیللی تحصیل همیش وهر یئرده آنا اوخوللاردان یعنی ابتدایی مکتبلردن باشلاماق مجبوریتینده دیر اونا گوره کی، اوشاق عایله ده اویرندیکلرینی داها دقیق و گئنیش آلاندا تطبیق اتئمه یه باشلاسین.آنجاق بیزم یا خود دا بیزه وعد ائدیلیب و منتله وئریلن آنا یاسال حاقلاریمیز کیملرین سه طرفیندن انتخابات ملزمه سینه چئوریلیب وسونرادا  اونو من وئردیم دییه میلیونلارجا تورکه 24 نفرلیک درس اوخوما شانسی