آنا دیلینین اینسان شخصیتینین اولوشوموندا ائتگیسی


SORUMLU MÜDİR:Dr.HÜSEYN ŞƏRQİDƏRƏCƏK(SOYTÜRK)


مدیر مسئول :دکتر حسین شرقی دره جک (سوی تورک)


Anadilinin insan şəxsiyətinin oluşumunda etgisi

 

اینسان اوغلو یارادیلیشیندان اوزو بری ایلیشگی و علاقه یاراتماق اوچون هر آن جهد ائتمیشدیر ، ائتمه یه ده داوام ائده جکدیر.اونا گوره کی اینسانین گوندلیک احتیاجی بونو طلب ائدیر. ایلیشگینین بیریسل (فردی)  و توپلومسال آماجی ایسه  بوگونو آنلاماق ویارینلاری پلانلاماقدیر. بو او دئمکدیر کی هر بیر ایجاد ائدیلن ارتباط ، دانیشیق ، گورسل ، یازیلی و ایشتمه کیمی آنلاشما مکانیزملری اوز  اوزلویوندا اینسانین بیین سلوللارینا چوکرک اونلاری آداپتاسیا یولو ایله باغلی اولدوغو کولتورون عونصورونه چئویریر.

دیل بو قورولان آنلاشیمین آنا اوزه ییدیر. اگر دیل فاکتورونو اینسانین یاشامیندان گوتورسک ، اوندا یارانان آخساقلیقلارین  دوغرولوغونوا وارمیش اولا بیلریک.

آنا دیلی هر بیر اینسان اوچون گونده لیک ماراق دایره سیندن  باشقا مین ایللر بویو داشیدیغی DNA وهوجیرلرینده  بیریکرک نسلدن نسله اوزادیلاراق نژاد یا همان سویکوکو دئدیمیز آلت یاپینی اولوشدورور. بونونلا بئله اونا وارلیق و کیملیک وئریر. باشقالاریلا بیزی فرقلندیرن ، سوموک و اتیمیزه اندیشه دونو گئیندیرن دیل دیر. او دیل کی ایلیک (مغز استخوان) و سودله بیزیم خمیریمیزین یوغورولماسینی ساغلامیش اولور. او دیلده میللی کولتور و عنعنه لریمیزین درین ایزلری یاتیر.

آنا دیلینده تحصیل آلماماق تکجه دیلین دانیشیق فورماسینی اینساندا یوخ ائتمیر . بلکه ده اونو باغلی اولدوغو درین معنوی کوکلردن قوپارمیش اولور.بو فساد اوز نوبه سینده ستمه معروض قالمیش شخصی و قومی حتی ملتی ایلک اونجه اوزاق گئچمیشیندن قوپاریب معنوی یوخلوغا سوق ائدیر.

چوخ ساده دیر، میثال اوچون گوتورک پاکستانلیلاری ، بونلار بیر عصره یاخیندی انگلیس دیلینده تحصیل آلیرلار . یازیب اوخویورلار.آنجاق بیز اونلارا اینگلیس دئمیریک.ایکینجی میثال ائله گوتورک اوزوموزدن ،ایللردیر فارسجا اوخویوروق و یازیریق آنجاق بیزه فارس دئمک مومکون اولمور.سبب اودور کی ، هر بیر میلتین اولوشوموندا بیر چوخ سبب اولدوغو کیمی دیل ده  ان مهم لریندندیر. بیر شخص فارس یا عرب اولاراق گوزل تورکجه دانیشا بیلر آما او شخص تورک دئییل . حتی سیز او شخصه تورکه فون دا دئیه بیلرسیز .

تورکه فون او زامان دئیه بیلرسیز کی او فرد اوز آنا دیلینی بیلمیر یالنیز اویرندیی تورکجه ایله ایلیشگی قورا بیلیر. بیلیریک کی اوز سوی و نژادینین دیلینی بیلمه ینلره فون سوزو ایشله دیلیر.حتی بئله اوز وارلیغینین نه اولدوغونو بیلمه سه ده او تام اولاراق اوز کوکوندن قوپمامیش دئمکدیر.

 هر بیر اینسانا آنا دیلینده  تحصیل  آلماق اونا گوره گرکلی وضروریدیر کی همن اینسان اوز وارلیغینی ایتیرمه سین.دئمک اولار کی ایران دا  یوزده 50 سی اینسانلارین تورکجه دانیشا بیلر . خصوصا ده تورکیه تورکجه سینی یاخشی بیلیرلر .اوندا نه گرک واردیر بیز تورکجه تحصیل آلاق. یوخ بو دوغرو دئییل بیز آنا دیلیمیز اولان تورکجه ده تحصیل آلماق ایسته ییریک اونون دا سببی داخلی کدلاریمیزین ومعنوی ایسته کلریمیزین طلبی دیر.

آنا دیلیمیزده تحصیل آلمادیقجا اوزوموزو تحقیر اولونموش و باسیلمیش حس ائدیریک. بو لزوم اوردان یارانیر کی ، آنا دیلی تکجه دانیشیق و ارتباط دیلی دئییل بلکه ده او بوتون بیزی و شخصیتیمیزی شکیللندیرن چوخ اوزاق گئچمیشیمیزه کورپو اولان حیاتی واسیطه دیر. هم ده روحسال اولاراق آلیشیقلیغین تابع توتولدوغو وارلیغا آداپتاسیانین پسیکولوژیک عملی دیر.

آنا دیلینین اویرنیلمه سی یاساق ائدیلدیکده او اینسانلارین گولوشلرینین رنگی بئله سولاجاق و قورویوب گوللری توکوله جک.

هم ده آنا دیلینین اوخونماسیلا برابر سن اوز دیل تاریخینی، مدنیت و معرفت امکانلارینلا تانیش اولاجاقسان. میثال اوچون بیر تورک درسی فارسیدا هئچ واخت کوراوغلونو یا ده ده قورقودو اوخویا بیلمز اونا گوره کی او درسی فارسیدی ، اوردا فردوسی ومولوی اوخونار. بو اوخونا بیلمه مکلرین نتیجه سی اودور کی  تورک اوشاغینی اوز وارلیغیندان یوخسون توتاراق مغرورلانماق حاققینی اوندان آلمیش اولور. بوتون اویرنیملر یالنیز ایلک نوبه ده آنا دیلی اساسیندا اولمالی دیر کی، اوشاغین وجودونو و روحونو شکیللندیرن یارادیلیش کدلاری آکتیولشسین .

بیز باشقالارینی ادبیات تاریخینده یا باشقا درس فنلرینده اوخویوب اویرنه بیلریک. بو سادجه اویرنمکدی و اونا گوره دیر کی سن اویرندیینی  یارادیلدیغین قاوراما کدلاریلا تطبیق ائدیب چئوره ده یاشام طرزینی آیارلایاسان.

منجه بوتون اینسانلار باغلی اولدوغو آنا کیملیینه ییه لنمه لیدیر و بوتون اویرنیملر اونون مجراسی اساسیندا آخیب گئتمه لیدیر. بو مهم مسئله دیقته آلینارسا ایتمین وئریلری یوکسک اولار.

سیاسی و ایدئولوژی آماجلارلا آنا دیلی ایتیم و اویرتیمی سورونا چئویریک ومنسوب اولانلاری آموزشین کناریندا توتماق اصل معنا دا نظرده توتلان ال ده اتمه لره ضربه دیر.

آنا دیلی هم ده فرقلیلیک دیر.بیر اولکه ده مختلیف بهانه لره فرقلیکلری آرادان قالدیرماق اصلینده یارادیلیشین دوغال وطبیعی گوزللیکلرینه صنعی یوللا مداخله ائتمک دئمکدیر. بودا اوزون مدت ده اینسانلارین منسوبیتینه وار اولوشان شخصیتینه خلل گتیره جکدیر.

آنا دیلی فیکریمیزین اساس قایناغی و تمل اولوشومون انرژی تامیناتچیسی دیر.او اوزون زامان ایچینده مکمل بیر شکیل ده شخصی وارلیغین فوندامنتی دیر.آنا اویرنیملر شرطسیز آنا دیلی اوزرینده اولمالی دیر .چونکو او غرورموزون و روحوموزون  بیتیشیک پارچاسی دیر. اوزولوموزون اوزه یی اولان دیلمیز هم کاراکتریمیز و میللی منسوبیتیمیزدیر. آنا دیلینه تحصیل یاسقلیغی هم ده گئنیش معنادا میللی کیملیک و منسوبیته وورولان ضربه دیر. اونون اینکار مکانیزماسیدی.بونو ائدنلر  ائدیلنه قارشی کولتورل ومعنوی سایقیسیزلیقلا یاناشی وارلیق سویقیریمی ائتمکده دیرلر. بو ائدیلنلر دوستلوق و قارداشیلق آنلاملارینا ضددیر.

"کول دیبیندن چیخماییب " آتا سوزو بونو تصدیق ائدیرکی ،آنا دیلی تاریخی ،روحی ،فیزیکی ،اجتماعی ،سیاسی، اویقارسال (فرهنگی)  هم ده میللی منسوبییت و وارلیق آنلامیندادیر. ایستردیک کوکوموزون اوستونده بیتک. زیرا کوکونده قوپانی یئل تز آپارار.