مدنی کیملیک نه دیر؟اونون قورونماسی نییه اونملیدیر؟

)

 

 

 

اویقارسال کیملیک انسان و توپلومون واز گئچیلمز عامیلی دیر.اونسوز هئچ بیر بیریسل (فرد) وتوپلوم وار اولا بیلمز. اما بیلمه لییک بو تور کیملیک نئجه یارانمالی دیر؟ نئجه داواملیلیغینی قورومالیدی؟ سوزسوز مدنی کیملیک واحد بیر بوتولویون بیرلیک گوسترگه سی اولماقلا یاناشی سوسیال , سیاسی و اجتماعی ایچریلیلین ده اونده گلن فاکتورلارینداندیر. هئچ بیر فرد ادعا ائده بیلمز کی اونون کولتورو و مدنییت یا خود فرهنگ باغلیلیغی یوخدور. اونا گوره کی فردین دوغولدوغو توپلوم اونون ایلک یارادیجی و کیملیک وئریجی آنا عاملی دیر. بونونلا یاناشی جغرافی فاکتور و همچنین دیل- دین فاکتورو دا بویوک اهمیت داشییر. کولتورل کیملیک ایستر- ایستمز هر بیر فردین و توپلومونون تانیتیم آراجی گوره وینی یئرینه یئتیرمک ده دیر.

هر بیر کیملیک نووعونون اوز قوروجو و یارادیجی عامیللری واردیر. نظره آلساق کی کیملیکلرین فرقلی فرقلی سرچشمه لردن ووجودا گلمه سی هم دوغال هم ده دوغرودور . او زامان آیری - آیری کیملیکلرین بوتون فرقلیلیکلرله یاناشی اورتاق بیرله شیم نقطه سی ده واردیر. بو اورتاق نقطه هامیمیزین بشر ائولادی اولماسی و عینی یئر کوره سینی پایلاشمامیزدی.

اویقارسال کیملیک اصلینده بیر چوخ فاکتورلارین بیرلشمه سیندن یاراناراق اینسانلارین اجتماعی تانیتیمی وشخصیت فورماسینی  بیلدیرمک ده دیر.گروهلارین , توپلوملارین , فردلرین بیر -بیرلریله تمایز نقطه سی اونلارین قاورادیغی و صاحیب اولدوغو فرهنگی ( مدنی)  کیملیکدن ایره لی گلیر. ایچ کولتور کیملیینه  مالیک اولان فرد و توپلوملار باشقا مدنی کیملیک صاحیبلاریله هر زامان کونتاکت و تضاد دا اولا بیلرلر. امپریال یونتیمه صاحیب اولکه لرده بیر کولتور کیملییی قاباردیلاراق باشقا کولتور کیملیکلری گورمزلیکدن گلینیر.بیر چوخ مکانیمزلردن او جومله دن : تک دیللی تحصیل سیستمی , تک دیللی مطبوعات ارگانی , رسمی دیل آدی آلتیندا بوتون دولت یازیشمالارینین یالنیز بیر دیلدن مجبوری استفاده سی, دولتین فیزکی و ذهنی باسقیسی ایله یاناشی باشقا وار اولان مدنی کیملیکلره سوسیال , اقتصادی , سیاسی آماجلی آمانسیز اولومجول ضربه لرین وورولماسی هم ده اجتماعی قیناق و تحقیره معروض ائدیلمه سی ایله اونلارین اونو کسیلمیش اولور.

مدنی کیملیین قورونما سببی ده بو اوزدن اورتایا چیخمیش اولور. زیرا بو کیملیک کئچیجی و موققتی کیملیک دئییل. انسانین وار اولوشوم عاملی دیر. خسته سیاسی و کولتورل شرایط لر بو تور کیملیکلره تهلوکه یاراداراق فردین فردیتینده اونجه ضدیت سونرا ایسه ساغالماز بوشلوقلار و خسته لیکلری عمله گتیرمیش اولور.

بودا زامان سوره سینده فرد و توپلوم اوچون فسادلارا یول آچیر. کیملیک بیر قورولوش ملزمه سی دیر.اونون اوز استروکتورو وار حتی باشقالاریلا هئچ اویوشمویان بعضی وقتلر بیر بیرینی یوخ ائدن اجزا لارا مالیک دیرلر.

بونا گوره کولتور کیملیک تقابولوندا قارشیلیقلی سایقی و حورمت دن باشقا , آشاغالاما , باسقی وستم عکس حال یارادا بیلر.اونون دا سونوجو بحران و قاشیدورمادی.

هر بیر کولتورل کیملیین اوز ساختارینا او قون اونون داشیجیلاریلا داورانماق گره کیر. چونکی کولتور ی جانلی وارلیق دیر و اونون اوزونه مخصوص طلباتی واردیر. کولتور سوسیال پسیکولوژینین آلانی اولدوغوندان بو ساحه نی اونلارین ایزله مینده گلیشدیرمک لازیم دیر.

کیملیک لر بوتونلوکده ایله تیشیمین ساغلاییجی عاملی دیرلر. آنجاق مدنی کیملیک ایسه کوکسل باغملیلیغیلا یاناشی گونجل ایله تیشیم واسطه سیدیر. بو کیملیک ایچ فاکتورون و دیش فاکتورون سیخ و جانلی باغلیلیغی ایله بیزیم هارایا , کیمه آیید اولدوغوموزون گوستریجیسیدیر. اونا گوره ده دیلینیزی ,گلنکلرینیزی ,دده بابا عادتلرینیزی قورویون و اونو گونجلشدیررک دیری ساخلایین. چونکو سیز اوندان عبارتسینیز . اوزونوز اونوزه سایقسیزلیق ائتمه یین.