شاعیر اماموئردی سامانی (ایمان) و اونون شعر دوشونجه سی

 

قید ائتمک ایسته ییرم بو یازینی من دیرلی شاعیرمیزین  کتابینا اون سوز اولاراق یازمیشدیم. اما بئله بیر قناعته گلدیم کی, اونو خدافرینین دیرلی  و داییمی اوخوجولاریلا دا پایلاشیم.

تملی ساغلام اولان ادبیات و یارادیجیلیق همیشه یاشاردیر . یارادیجیلیغین روحوهرزامان دوغرو و میللی اولان ادبیاتین سایریشان اولدوزلارینین گؤی سماسی دیر . ادبیاتین قان دامارینین چیرپان اوره یی دیر. اونودمایاق کی آسیلا سیونا آزمعروض قالمیش یوره سل ادبیاتیمیز اونون گوجلو یارادیجی لاری طرفیندن هرزامان قورونما قدادیر.

امامویردی سامانی ده آذربایجان خالق یارادیجیلیغین و شیفاهی خالق ادبیاتینین اونجوللریندن دیر.

اونون شعر دیلی وطن هاواسی ایله قاریشمیش و یوغرولمو شدور. اونون تفکور و دوشونجه سی ساغلام اساسلارا دایاناراق هرگون تؤره مک ده دیر. قهرمان یوردونون ایگید اوغلو اولما غاجان آتان شاعیر سامانی ایلک نووبه ده ساغلام کاراکتره و کاریئرایا صاحیب دیر.

اونون دویغو و حسییاتی همیشه وطن و اونون جان داماری اولان آنا دیلیندن یانادیر . سامانی اوزشعرلریندن خالق دئیملرین میزان ترازی بیلمیش و بویولون یولچوسو اولموشدور. او ایچ دویغو و حیسلری ایله ائلینین یوردونون و جاندان چوخ سئودییی قاراداغین ، آذربایجانین غمینی چکیر . فضولی دئمیشکن " بدبخت اودورکی ، غم چکه بیلمیر". امامویردی سامانی بو جهت دن چوخ خوش بخت دیر . یوردون بوللور هاواسیندا آی ایشیغی آلتیندا کلمه لری بولمه یه چالیشیر. یوز ایله یاخیندیر کی، یوردو کوچ و مدنی آیری سئچگیلیلره، معروض قالان سامانی اوزون ایللر عؤمرونو سوروجولوکله گئیچر میش، اؤلکه نین دئمک اولار بوتون دیارلارینی گزیب دولانمیشدیر . آنجاق اونون ایچینده اولان وطن سئوگیسی ، آنا دیل محبتی یانارداغ کیمی سونمک بیلمه میشیدیر. آتالار دئمیشکن . "چوخ یاشایان یوخ ، چوخ گزن چوخ بیلر" ، بلی امامویردی سامانی (ایمان) ده بوتون بیلیک و باجاردیغینی امکلی اولدوقدان سونرا اوز  مدنیت و ادبیاتینین چیچک لنمه سینه صرف ائتمیشدیر. صمد بهرنگی روحونو اؤز دوشونجه سینده حیس ائدن شاعیرمیز ایلک آددیم لارینی دونیا شهرتلی صمدین "خیرداجا قارابالیق " حیکایه سینی  ترجمه ائدرک و اونو شعره چئویره رک آتمیشدیر .

 ساغلام باساماقلارا ( پله ) باسان شاعیریمیز دورمادان اوز اوزه رینده چالیشاراق آغ ساچلارینین تئللرینده نباتی روحونو اوجا زیروه لره داشیاراق قوجامان بابکین غیرتیله یوغورموش و هر گئچن گون داها سامباللی اثرلر اورتایا چیخارمیشدیر ...

کلیبر شهرینده مسکن سالمیش شاعیر گولر اوزللولویو و صمیمیتی ایله اورکلر فتح ائتمه یی باجار میشدیر.

شاعیر امامویردی نین عشق فلسفه سی وطن دیر، آنا دیلی دیر ، اونون شعرلری یوکسک روح یوکو ایله یوکلنمیشدی آخیجی ، سلیس و روان شعرلری هرکسین قلبینی قازانماغا و فتح ائتمه یه یئترلی دیر. وطن سئوداسینی سؤزلری ایله باریندیران شاعیر سوسیال ، فلسفی ماهیتلی یارادیجیلیغادا یئر آیرمیشدیر.زامانین نبضینی توتان شاعیر هم ده شعرلرینی اوزاق گله جک لراوچون یازمیشدیر. اینجه روحلا بسته له دییی وطن هاواسینداکی شعرلری هم ده درین بیر تاریخین نفسینی حیس ائتدیرمک ده دیر. شاعیرین بوئتیک ادراکیندا شعریت روح و جانلا قالیبله شیر و اورتایا بیرجان چیخاریر. اونون شعر یارادیجیلیغی آلترناتیوی اولمایان بیر سئچمیدن ، بیر اینامدان ایره لی گلیر . پامبیق کیمی یوموشاق اوره ییندن صاف و دورو اولان وجدانیندان اوزگورلوک هایقیر تیسی تک زامانا باغیریر و زامانین حاصارلارینی دلیب دئشیر.

او عدالتلی دیر و حاقسیز لیغا قارشی باغیریر. لو باباسی نباتی دن آلدیغی معنوی گوجله مثبت تئما ایله بدبین لییه و قارانلیقلارا قارشی دورور چونکو او آشیق روحلو قاراداغ ادبیاتینین نوماینده سی دیر.آشیق علی کلیبرلی دن الهاملاناراق آرازین سرین مئهی ایله اوتایا بویلانیر . قاراباغدان- قاراداغا اوزانان سئوگی تئللرینی اوج- اوجه دویونله ییر. اونون ساده و درین آنلاملی شعرلری, شیت شعرلری وحیسلری زاول مزارینا «باسدیریر» بعضاًده شاعرین شعرلرینده آغیلا سیغمایاجاق درجه ده حرارتلی بوئتیک حیسلر آلوولانماغا باشلاییر.

جانلانیر و بؤیویور.اوزون بیریولون ایشیق دیره یینه چئویریلر.وطن، آنایورد و آنادیلی هارمونیک لییی شاعیری ابدی یاشار ائتمیشدیر.

امامویردی سامانی نتیجه اعتباریله اینسان و اونون طالعینین بخش ائتدییی آلین یازیسی نین داورانیش، پیسکولوژی هم ده اخلاقی مسطویسین تام ریاسیز شاعیری دیر. مقام، شهرت و مدال آختارمایان شاعیر یئرلی ،یوره سل, میللی اولماغیلا ادبیات تاریخیمیزین وار اورلان و ابدیلشن سیمالاریندادیر.