فارسجا دیل اویقولاماسی پروژه سی"طرح بسندگی زبان فارسی" فارسلاشمانین رسمی یونتمی کیمی آنا دیلی وارلیغینا نه کیمی ضربه لر وورا بیلر.؟

 

“Fars dili uygulaması” anadili varlığına nə kimi zərbələr vura bilər?

 


Sorumlu müdür :Dr.HÜSEYİN ŞƏRQİDƏRƏCƏK SOYTÜRK

مدیر مسئول : دکتر حسین شرقی دره جک سوی تورک

 

دیل جانلی وارلیق اولاراق انسان کیملیینین آنا بلگه سی دیر.هر بیر اینسانین یارادیلیشیندان اونجه اونون ذات و کوکونون ژنتیکی باغلیلیقلارینین محصولو اولان دیل آنا بتنین دن باشلایاراق اطراف داکی اینسانلارین دانیشیغی نتیجه سینده فورمالاشیر. کورپه نین گلجک عقلی اینکیشافینا یون وئریر.

البنه قید ائتمک لازیمدیرکی  بو طرحین هدفی تکجه دیل اولچوسو دئیل بلکه دیللری اولچرک سیرادان چیخارماغی پلانلاشدیریر. اونا گوره کی ایندیه کیمی بیر چوخ تورک فارسدیلینی ایلک اونجه بیلمیه رک آنجاق سونرا دان بو دیلده تحصیل آلاراق یوکسک علمی نایلیتلر قازانا بیلمیشدیر.

بیردکی تورکلر اوچون بو مسله تکجه دیل مسله سی دئییل بوردا وارلیق مسله سیندن صحبت گئدیر. بیزیم هامیمیز رسمی ائدیلن فارس دیلینی یار یاریمچیق دا اولسا بیلیریک حتی بیز تورکلر غیری ایراتی دیله منسوب اولساقدا چوخ جهتدن ایرانی دیل گروهلارینا عاید اولان وطنداشلاردان داها یاخشی بیلیریک بو دیلی. گیلک ؛ کورد؛ لر؛ فارس و... ایرانی قووملردن داها گوزل بیلیریک و دانیشیریق. آنجاق قصد دیل اویقولاما پروژه سیندن او دورکی؛ بیز فارسجانی بیلدیکجه اوز تورکجه میزی اونوداق. بودا میللی کیملیک وارلیغیمیزین کوک حجره لرینه ائندیریلن اولومجول ضربه دی .

سوروشماق لازیم دیر او کسلردن کی ؛ بو مسله نی مطرح ائدیبلر .

آیا بیر گون سنین دیلیندن اولمایان کیمسه لر سیزین اوشاقلارینیزا بو اویقولامانی روا گورسه لر سیز نه ائدرسیز .وجدانیز وارسا قضاوت ائدین.بیزی آسیمیلاسیونا اوغراتماقدان نه کیمی کیف آلیرسینیز .حال بو کی الله ین وئردیین هیچ بیر قول آلا بیلمز .بوشونا اوغراشیرسیز.

بیلمه یمیز لازیم کی ایران دا  اوچ دیل وار سامی (عرب ؛ یهود) ایرانی (لر؛ تالش ؛ کورد ؛ تات ؛ فارس )  تورک (آذربایجان ؛ تورکمن ؛ قاشقای ؛ خلج  و خراسان تورکلری).

سامی دیللرینده  او جمله دن عربجه ده هر بیر وطنداش تحصیل آلیر هم ده اجباری شکیل ده بونونلا یاناشی ایرانی دیللرین باشی اولان دا فارسجا اولکه نین دوولت دیلی دیر.بوتون تحصیل سیستمی بو دیلده آپاریلیر.قالیر تکجه غیر ایرانی دیل اولان "تورک دیلی "کی , بو دیلده هیچ بیر تحصیل موجود دئیل هئچ حتی یئنی فارسجانین اویقولاما طرحی بو دیلین سیرادان چیخما و اونو تدریجا اولو دیل حالینا گتیرمک مکانیزماسی دیر.آنجاق اونوتمایاق کی تورک دیلی یالنیز دیل اولاراق کیملیک فاکتورو دئییل او هم ده کولتورل و سوی (نژاد) گوسترگه ی دیر .

اگر بو اویقولاما تورک دیلی اوچون بیر تله دیرسه او

(نقشه ده تورکلرین یاشادیغی یئرلرده فایز اورانی)

 

زامان پروسه نین سونو باش توتسا اوندا زامان سوره سی ایچریسینده تورکلرین تمامیله فارس اولماسی اون گورولمکده دیر. آنجاق تورکون مثلی وار دئییر "سن سایماغیندا اول گور فلک نه ساییر".

مسله نین علمی دایاغی اولماماسی آچیق آشکار بللی دیر.اونا گوره کی علم دئییر کی سیز باشقا دیللری کونوللو اولاراق اویره نین .زیرا هاردا زور و هده قورخو تطبیق اولورسا مطلقا منفی نتیجه سی ده اولور. هم ده باشقالارینا حورمت وسئوگی سبب اولار سیز اوزونوزده سئویله سیز. سئوگی منشایی اولمایان هئچ بیر پروژ مثبت نتیجه لنه بیلمز.آتالار نه دئمیش "سنین کی سن ده منیم کی من ده" ظاهرا تورکلر ضررلی چیخا بیلر آنجاق زامان ایچریسینده یالنیش اویقولامایا گوره سیز سوموک اریمسینه دچار اولا بیلرسیز.

بو آرادا وزیر معاونی اصغر بیات دئییر : زنجان کیمی استان دا کی ایکی دیللی استان دی(باخین زنجان 99 درصد تورک دور بو مسئول بئله استانینی یاخشی تانیمیر) گرک بو تحصیل ایلینده اویقولاما حیاتا گئچسین.هم ده معیار دیل اساسیندا. 200 ایلدن آرتیق دی مسیحی آوروپانین تورک و اسلاما فوبیا خسته لییندن دولایی بیز تورکلره اولمایان مدنی ستم لر روا گورولوب. چوخلوغوموزا رغما بیزی آنا دیللی تحصیلدن محروم و اوزاق توتموشلار .رژیملر فرق ائتمه دن بیزه کولتورل قتل عام یاپیلمیشدیر.کوکوموزدن و تاریخیمیزدن اوزاق توتاراق چوخلو سیاسی و فرهنگی باسقیلار ائتمیشلر. نئجه اولور ایراندا مسکون بوتون خالقلار اوز دیللرینده تحصیل آلا دبیلیرلر الا تورکلردن باشقا. تورک هئچ بیر شاعیرینی تانیمیر. تاریخینی بیلمیر. و اونا تاریخی اویرهدیرلر هم ده تورک انسانینی درس کتابلاریندا آشاغالیاراق بونو ائدیرلر.

من اوزوم تورک ائولادی اولاراق بو انگلیس توزاغینین بورلغانیندا وحشی و قان ایچن تورک دئیه  یازیلان او قدر درسلر ازبرله ییب 20 آلمیشام. شوکورلر اولسون تانرینین قولو اولاراق تورکلویوموزو زوردا اولسا دیری توتماغی باجارمیشیق. دیلیمیری یازیب اوخوماقدان محروم بیز تورکلره پان تورکیست دئینلر عجبا بوتون امکانلار اونلاردادیر دئیه گوره اوزلرینه نه دئییرلر؟ 

وطن سئوگیسی آنا دان آتادان ائودن محله دن یورتدان و یووادان باشلار .منیم بو سئوگیمه آجی قاتاجاقسان او زامان بویوک وطنین ده سئوگیسی سورو ایشاره سی آلتینا گئتمیش اولور.بیز سئوه سئوه بیر اولکه نی پایلاشیریق حتی اوغروندا اوله بیلریک .جان و قان وئریریک. اجباری اسیرلیک اوردوگاهلاریندا یاشامیریق کی یوخودا گوردوکلرینیزی سحر آچیلاندا بیزه تطبیق ائده سیز.

هئچ بیلیرسیز تطبیقاتا آلدیغینیز چوجوقلارین آنا دیلی نئچه مینلر شهیدین و جانبازین ؛ مفقودالاثرین یا خود تتیک ده گوزله ینلرین آنالارینین دیلی دیر.

سئودیکجه ازیلمک نه دئمکدیر.قووالایاراق دشمن ائتمه نین گوره سن کیمه خییری وار.

معنوی و پسیکولوژی جهتدن آغیر منفی تاثیره مالیک اولان بو طرح غیرتلی تورک اینسانین آناسینین دیلینه تعرض آنالامینا گله بیلر . غیرت و ناموس مدافعه چیسی اولان بو میللتین آناسینین دیلینه خور باخیلماسی منجه بویوک اجتماعی و سیاسی فسادلارا گتیریب چیخارا بیلر.

اولکه نین بیرلیه و برابرلیه هم ده عدالته احتیاجی اولدوغو بو دار مقامدا هانسی قارا قووه لرینه خیرینه اولان طرحلر اوغورسوزلوقلا نتیجه لنجک.

بو طرحین ان قورخولو جهتی اوندان عیبارت دیر کی آنا دیللی اوشاق و یئنی یئتمه لری روحی سارسینتیا اوغرادا بیلر. اوشاغین ان سئودییی و گووندیی آناسی دیر.حال بو کی طرحین مجریلری اونو  سببینین نه اولدوغون بیلمه دن باشقا آنلامادیغی دیلده سوال و سورغویا چکمه سی  اوشاق دا روح دوشگونلویو ایله یاناشی گله جک ده شخصییت چاتیشمامازلیغینا قدر گتیریب چیخارا بیلر. سورغولارین مهارتلی شخصلر طرفین ده آپاریلماماسی اوشاق دا مکتب قورخوسو توره ده بیلر کی بونون دا نتیجه سی مکتبه فوبی دیر.

علمی جهت دن بو طرح آسیملاسیون و اوزگه لشدیمه مکانیمزماسیدیر.اخلاقی و انسانی دیرلره ضیدیر. فرهنگی دیرلره قارشی دیر.چاغداش دونیا انسانلار بیرلشمه یه بهانه آختارارکن قرون وسطی یی طرحلرله بیرلیی ضده له ییریک.معاصر دونیا دوولت دیللرینی سوسیال مئدییانین گوجلنمسیله اهمیتینی ایتیرمکده اولدوغو زامان بیز هانسی دیلین هانسی مقصدلرله اویرتمه ییمیز بئله سوال دوغورماقدادیر.

 ایندی فرهنگی سرحدلر چوخدان سیاسی سرحدلری آشمیش دورومدادی. الیمیزده اولان سیاسی و اقتصادی گوجله باشقالاریندا وطن سئوگیسی یاراتمالییق. وطنه قارشی اولماق اوچون یئتری قدر خارجی عامیل و دوشمن واردیر.

آنا دیلینده تحصیلی رواج وئرمکدنسه اونا مانع تورتمک بیگیلی توپلوملار اوچون اوتان وئریجی دیر.

ایسته ییرسن سنین دیلین سئویلسین ؟اوندا سئوگی و یاییم مکانیزملرینی ایره لی سور .حال بو کی اولکه نین خصوصیله ده تورکلرین یاشادیغی جغرافیانین اطرافیندا اقربا توپلوم دوولتلری مووجودور کی اونلاری کولتورل برنامه لری رنگارنگ و گونجلدی هم ده مولتی کولتورالدی. پولسوز اینترنت برنامه لری او جومله دن جاذیب سریال و فیلم لرله یاناشی سسلی کتابلار غ ماراخلی جیزگی فیلیملری واردیر. گئنه آتالار دئمیش" زور گلسه توستو باجادان چیخار"

آنا دیللی اوشاقلاری سورقولاماق هم ده اونا گوره کی سن نیه آنا دیلینی بیلیرسن و اونا هئچ تانیش اولمایان یابنجی دیلی نیه بیلمیرسن ؟

 والدینه تحقیر ساییلان بو طرح سوسیال پسیکولوژی باخیمیندان آشاغالاما کیمی ایکنجی درجه لی وطنداش آلقیسینی اولوشدورا بیلر.

یاخین گله جک ده تحصیله مئیلین آزالماسی ؛ فارس دیلینه نیفرت و اولکه دیرلرینه بیگانه لیک کیمی سوسیال خسته لیک لر توره نه بیلر .ساوادسیزلیق لا یاناشی اجتماعی ناهنجاریلرین آرتماسینا سبب اولا بیلر.

اونوتمایاق کی حال حاضیردا توپلوم سوسیال مئیا پایلاشیم یولو ایله اوز کیملیی حاقیندا بیگیلنمیش دیر. بو توپلوم 20 ایل اونجه کی توپلوم دئییل. شاید طرحی وئرنلر 20 ایل گئریه دیرلر.

خلق معاریفلنمیش آغی قارادان سئچیر...