آذر دیرچلیش و اوزونو درکین یاددا قالان آیلارینداندی

 

AZƏR  DİRÇƏLİŞ VƏ ÖZÜNÜDƏRKİN YADDAQALAN AYLARİNDANDİR

 

SORUMLU MÜDİR :Dr.HÜSEYN ŞƏRQİDƏRƏCƏK SOYTÜRK

 مدیر مسئول :دکتر حسین شرقی دره جک سوی تورک

 

بشریت تاریخ بویو الده ائتدیکلری نایلیتلری هر زامان اونمسه ییرک اونو اوز اولوسونون یادداشیندا ابدیلشدیرمیشدیر. بیزیم ده دده لریمیز بیزه چوخ گووه نیلیر و اویونولور تاریخ یاراتمیشلار.

 آنجاق غرب و خصوصیله ده انگلیس منشالی  آنتی  شرق ( اوزللیکله آنتی تورک) سیاستی 300 ایلدن چوخدور کی یاشادیغیمیز بو گوزل یوردلاری مدنی سیاسی ایدئولوژیکی و اقتصادی  هم ده ائتنیکی (قومی) سارسینتی و بونالیم (بحران) اوجاغینا چئویرمیشدیر.

اونون دا سببی بورالارین نفت گاز و دیگر ثروتلره مالیک اولماسی دیر. صنعی قوومی اختلافلار یارادیلاراق  بیزلری بیر بیریمیزه دشمن گوسترمیشلر. حتی بونو باشارمیشلار. ایدئولوژی آیری سئچگیلیک اورتایا آتماقلا بولگه خالقلارینی بوتوولشمه یه قویمامیشلار.

بولگه نین یئر آلتی و یئر اوستو ثروتینی چاپیب آپارماق اوچون ائتنیک دایالی دوولتلر  ایجاد ائتمیشلر. حتی یئری گلنده اونلاردان واز گئچمه نی ده نظره آلمیشلار.

داها دوغروسو بوراداکی اولکه لرین یونتیجیلری همیشه اونلار طرفیندن سئچیلیر و حمایه اولونور . ظاهیرده بیزدن گورونسه لرده باطن ده اونلارین قوللوقچولاریدیرلار.

بو تور  یئرلی اولمایان حاکمیت لردن بیریده پهلوی حاکیمیتی دیر.

بو قولچاق حاکمیت وار گوجو ایله نوکرلیک وظیفه سینی یئرینه یئتیرمیشدیر. اولکه ده انسان حاقلارینا مرکزی صنعی کولتور آدینا اولومجول ضربه لر وورموشدور. او جومله دن بیز تورکلری انگلیسین امری ایله آشاغالایاراق تحقیره معروض قویموشدور .

البته چوخ آشکار مسئله دیر . تورکیه نین آرخاسیندا تورک و تورکچولویو یوخ ائتمک و اورتا اسیا ایله آسیای صغیر آراسیندا یارقان یاراتماق و میلی دینی هم ده کولتورل باغلاری قوپارماق آماجیلا.

آنجاق آذربایجان تورکلری 1945 جی ایلده بو شیطانی دسیسه لره سون قویاراق میللی گلنک لره دایالی یئرل حکومت قورماغی باجارا بیلمیشدیر. اما روس و غرب آنتی تورک مسلمان هدفینه معروض قالاراق 1946 جی ایلده اوتوریته سینی مرکزی  (نوکر) حوکمومتینین امانسیز و دوشمنجه تجاووزو نتیجه سینده ایتیرمیشدیر.

یوزلرله وطن اوغلو جانیندان گئچرک بو تاریخی اولایی آذربایجان تورکونون تاریخی یادداشیندا حک ائتمه یی باجارمیشدیر.مینلرجه ساوادلی و آیدین اینسانلاریمیز سورگون ائدیلرک یورتدان دیدرگین ائدیلمیشدیر. یئرلی اهالی گولله لنمیه و اعداما معروض توتولموشدور. تبریزین , اورمیه نین , زنجانین , اردبیلین , میانانین , اهر و قره داغین اهالیسی یا اولدورولموش یاداکی تعقیبه معروض قالاراق یورد  یووالاریندان قوولموشدور.

مرکزی حاکیمیتین مزدور اولماسی سببیندن اولکه یه مدنی یوندنده چوخلو زیانلار وورموشدور.

اونلاردان ان اونملیسی تورکجه کتابلارین شاه رژیمی مامورلاری طرفیندن یاندیریلماسی دیر. اونلار آجیماسیزجا مکتوب مدنیتیمیزه اولومجول ضربه ووردولار. میلیونلارجا تورکجه کتابلاری اولکه نین بوتون شهر و کندلرینه یاندیراراق تاریخین ان سیاه صفحه سینی یازدیلار. البته معنوی زنگینلیی ایله  تانینان تورکلر یئنه ده دولت دسته یی اولمادان تاریخی یادداشلارینی برپا ائتمه یی باجاردیلر.

گونوموزدده مینلرجه نسخه کتاب دیرلی شاعر و ادیبلریمیز طرفیندن تالیف ائدیلمکده دیر.

تاریخدن آلدیغیمیز شرفلی و اونور وئریجی مئساژلاری  بیر آند اولارق بویوک طغرولون روحونا و عظمتلی سلطانیه و دیگر تاریخسل وارلیقلاریمیز آدینا ادامه ائتدیرمکده ییک.

وارلیق مجادله سی مئته خاندان بو گونه داوام ائتمکده دیر.و ائده جکدیر . یئترکی باتینین (غرب) آلدادیجی فعللرینه اویمایالیم. اونلارین قورخوسو بیزیم بیرلییمیز و بیلگیمیزدیر. بیز تاریخیمیزی بیلدیکجه بو تاریخسیزلر گئری اوتوراجاق. یئترکی سن اولو خاقان بابالارینی تانی و اونو مقدس اسلام روحو ایله باغداشلاشدیر.