خدافرین بیر سئوگی درگیسی ایدی ؛ چیچک آچدی کونلومده

دسته: سر مقاله
منتشر شده در پنج شنبه, 17 بهمن 1398 18:45
نوشته شده توسط Super User

مدیر مسئول : دکتر حسین شرقی دره جک (سوی تورک)

SORUMLUMÜDÜR:DR.HÜSEYN ŞƏRQİDƏRƏCƏK (SOYTÜRK)

 

هر بیر خالقین مدنیتی اونون تاریخدن آلدیغی سیرلی کدلارین چاغداش یانسیمالاریدیر. مدنیتی داشیان اولوسون هر بیر فردینین او مدنیتی انکشاف ائتدیرمک بورجو و وظیفه سیدیر. چاره سیز دوروملاردا بئله مللتلر ان بویوک دایاغی اولان کولتوروندن واز گئچمه میشدیر. اصلینده ساواشلار بیر چوخ مدنیتلرین چاتیشماسیندان توره میشدیر. هئچ بیر مدنیت یالنیز باشینا قوروجو و توره دیجی دئییل دیر.

آنجاق مدنیتلر او زامان گوجلو اولور کی ؛ قاپیلاری دیگر مدنی دیرلره آچیقدیر. اونوتماماق لازیم دیر کی عینی حوضه نین مدنیتلری بیر چوخ جهت دن فرقلی اولسالاردا بیر چوخ اورتاق دیرلره ده صاحیب دیرلر.

ان چتین او دور کی؛ حاکم مدنیتلر اقتدارلارا سیغیناراق اوزلرینی گوجلو حساب ائدیرلر . گوج او مدنیتین اوزریندن آلیندیغی زامان ان دوشگون و اولومجول اولورلار. بو کولتورلر بسلنمیش کولتورلر ساییلیر. اونلار اورتاقلاشا یاشادیقلاری و پایلاشدیقلاری دیگر کولتورلرین قانیلا بسلنیرلر و اوزلرینی فربه و قوی حیس ائدیرلر حال بو کی اونلار دیگرلرینین دیرلرینی منیمسه یرک و حتی چالاراق اوزلرینی گوجلو حیس ائدیرلر. زامانی گلینجه و باشقالاری اوز حاقلارینا ییلندیکلری واخت اونلار ایچی بوش شار کیمین پاتلاییب یوخ اولورلار.

سومورگه چی مدنیت سونوندا یوخ اولمالی دیر. چاغداش مدنیتلر تکنولوژی قوللانیم یاریشلاریلا دا بیر بیرینی سیرادان چیخارماغ چالیشیرلار. اونوتمایاق کی گوجلو مدنیت یوخدور لاکن زنگین مدنیت واردیر.

یئنی گون (نوروز) گلنه ییده بو زنگین مدنیتلردن بیریدیر. چونکو نوروز باریشین و سئوگینین جارچیسی دیر. بو گونگو هگمون مدنیتلر کیمی حربی سلاح گوجو ایله و یا باشقا سایبری تکنولوژی گوجو ایله اوز وارلیغینی دیکته ائتمیر.

نوروز پایلاشماغین ؛ گولومسمه یین و یاردیمین اولوسلار آراراسی بایرام و سئوینج دیلی دیر. اونا گوره ده او دوغانین و طبیعتین انسانلارا گرچک ارمغانی دیر. من اینانیرام معاصر غرب مدنیتی بئله بیر مدنیته صاحیب اولسایدی ایندی بوتون خالقلاری دیوارا دیره میشدیرلرکی بیز مدنی خالقلاریق و سیزلر ایسه گئری قالمیش و یوخسون انسانلارسیز. آنجاق شرقین زنگین کونولو کوتولوک ائتمز .

دیرلی خدافرین سئودالیلاری بایرامینیزی تبریک ائدیر و یئنی ایلینیزی قوتلیرام. 

بو آرادا بیر آجی خبری ده پایلاشماق مجبوریتیندیم. اودا اودورکی ؛ قاباقدان گلن 1399 جو ایلده خدافرین درگیسی دوزنلی چیخمایاجاق. بونودا سببی مادی امکانین اولماماسی دیر. باهالیق آرتیق آمانسیز درجه ده مکتوب مطبوعاتین نشرینه مانع اولور. بئله دوام ائتسه سیزلرله وداعلاشمالی اولاجاییق... خوشجا قالین