نیه آراز هر بیر آزربایجانلی اوچون اوزلم و حسرت سیمگه سی دیر؟

Niyə ARAZ her bir azərbaycanlı üçün özləm və həsrət simgəsidir?

 

SORUMLU MÜDİR:Dr.HÜSEYN  ŞƏRQİDƏRƏCƏK SOYTÜRK  

مدیر مسئول : دکتر حسین شرقی دره جک (سوی تورک(

 

آزربایجان خالقی توپلوم اولاراق، مین ایللر بیر آرادا یاشامیشدیر.گئنیش بیر جغرافیا دا عین دیل وعین مدنیتی یاشاتمیش و یاشامیش، تورک لرین ایچینده ان ساغلام بیرلییه مالک اولان تورک خالقی، آزربایجان تورک خالقی دیر. و اونون فیزیکی ، جغرافی حدودلاری، قزوین دن  همداندان، ساوه دن، سونقوردان، کرکوکدان ، موصل دن ، ارضروما،ایرواندان تفلیسه، دمیر قاپی دربند دن ، انزلیه ، طاریما اوزانان ،بیر اوجو داغستان، بیر اوجو تورکیه ، بیر اوجو تهرانا اوزانان اراضی دیر .آنجاق اونون گونول اراضی سی داها گئنیش دیر. تاریخ بویو آزربایجان تورک کولتورو و مدنیتی اوزریندن قورولان همگون دولت لر اونون کولتور وارلیغینی اوجسوز بوجاقین جغرافیالارا داشیمیشدیر

قید ائتمک لازیمدیر کی،آزربایجان کولتورو الله ها اینام و اینسانلیغا خدمت اساسیندا اولموشدور، تاریخین مختلف دوورلرینده سئوگی و اینامین بئشیگی اولان بو دیار زردشت دونمینده مقدس مکان کیمی یاد دا قالمیشدیر. اودلارین گوزتچیسی و آتشین قورویوجوسی کیمی تانینمیشدیر. آلبانلارین حاکمیتی دورو تک الله لیقسیمگه سی اولاراق خزر دولتی کیمی تانینماقدادیر. تاریخ اوزایب گلرک آزربایجانین اونمی هر زامان اوز اهمیتینی قوروموشدور.سومر لر، هیتیت لر، اوراتولار دونمینده اکین و بیچین و یاشامین مرکزی کیمی تانینمیشدیر.دونیانین ان قدیم مسکن لریندن ساییلان آنا یوردوموز ، گوزل آزربایجانیمیز مختلف دونملرده مختلف اداره چیلیک سیستمی ایله وارلیغینی سوردورموشدور.

آنجاق باشی بلالاردان هئچ اسکیک اولمامیشدیر، وئریملی تورپاغی، زنگین یئر آلتی و یئر اوستو ثروتی، مساعد انسانی قوه سی و درست، اخلاقلی انسان کوتله سی اونو هر زامان آووجیلارین شکارینا چئویرمیشدیر.آنجاق بونا باخمایاراق اونون کوکلو مدنیتی و ساغلام دوروشو هر کسی و یا خود هر بیر ایشغالچینی زنگین مدنییتینین ایچینده اریتمه یی باشارمیشدیر.هند، عرب ، مغول ، روم و روس تعروضلرینی لایقینجه آتلاتمیشدیر و اوز دیرلری اساسیندا وار اولوشونا دوام ائتمک ده دیر.

اینسانلاری ساده گورونومه مالک اولسادا، ایلک نوبه ده دوشمانلاری شاشیردا بیلر.هرکس بو ساده و ایچی تمیز اینسانلاری آلدادیب یوخ ائده بیلمه سینی فرض ائتسه ده، تاریخ بویو بونا ناییل اولا بیلمه میشدیر لر . آزربایجانین انسانی ساده و دورو(تمیز) گورونومو ایله زنگین و کوکلو مدنیت صاحیبی اولدوغونو هر زامان هر بیر کسه اثباتلامیشدیر. هیچ زامان یولوندان ساپمامیشدیر‌.داغلاری تک وقارلی، دوزلری تک گئنیش اورک لی دیر آزربایجان انسانی،توپراغی تک برکتلی ، چشمه لری تک دوپ دورو دور. یایلاقلاری تک سرین،آرانلاری تک سیجاقدیر بو دیار. اسکندرلر، چارلار، چنگیز خان لار یولا سالمیش،قدیم و قوتسالدیر. اونلارین هئچ بیری هئچ نه بیزدن آلا بیلممیشدیر، آنجاق ستم لرینین آجیلارینین ایزلری حالا یاشاماقدادیر.

صبرین ، زحمتین ، امه یین خمیری ایله یوغورلموش آذربایجان انسانی،تاریخ بویو دوزوملولویو ایله ثابت قدم لیگی ایله هر کسین گرکن درسینی وئرمیشدیر.آتالار دئمیشکن: " یئل قایادان نه آپارار؟"گلن گلمیش و ایچیمیزده اریمیش یوخ اولوب گئتمیش آنجاق بیزه ائدیلن سیتم لر بیزی داها دا سرت قایالارا چئویرمیشدیر.

هر بیر تاریخی اولومسوزلوق گوجوموزه گوج قاتمیشدیر، معنوی یوکوموزو آغیرلاشدیرمیشدیر.

شیفاهی خالق ادبیاتیمیز ، بو اورنک لر له دولودور.

 آنالارین آغیتی،آتالارین هایقیرتیسی، نعره سی هله ده داغلاردا اینله ییر و قولاقلاریمیزدا دویولماقدادیر. هر بیر قاریش تورپاغی بیزه دده لریمیزین ، نه نه لریمیزین عزمکارلیغینی خاطیرلادیر.

باشیمیزدان اسن فیرتینالار چادیریمیزی ییخسادا دیواریمیزی داشدان یاپمیشدیر.آذربایجان مختلف قوم لارین اداره چیلیک سیستمینه گئچسه ده آنجاق زمان آخاریندا گئنه اوزونه دونموشدور. بیلیریک کی آزربایجان خانلیق ، بئیلیک، و شاهلیق اداره سیستم لرینده وارلیغینی دوام ائتدیرمیشدیر.

عرب لرین خلیفه لیک،مغوللارین خانلیق سیستمی ایله ایللر بویو یونتیلسه ده، اوز توره سینه صادق قالمیشدیر ، عرف و عادتینی یاشاتمیشدیر. آذربایجان تاریخ بویو ، ایشغالچیلار طرفیندن ایشغال اداره سیستمی ایله اداره اولونسا دا آنجاق خالق اوز آراسیندا تورک توره سی و عادت لری ایله حیاتینی و وارلیقینی سوردورموشدور

مغوللارین خانلیق اداره سیندن نوکرچیلیق، عربلرین اداره سیندن رعیت لیک،اوز ایزلرینی آذربایجاندا آشکار شکیل ده گوسترمیشدیر.ایللر بویو آغ ساققاللیق، آغ بیر چکلیک ، بویوک کیچیک کیمی اداره سیستم میزه صدمه وورسالاردا اونو کوکوندن یوخ ائده بیلمه میشلر. سون بو ایللر ده ایسه مدرن غرب سیستمی ایله، یعنی مامور و مردم سیستمی ایله ده بیزیم توره لریمیزی لاخلاتسالاردا گینه ده وارلیغیمیزی قوروماقداییق. چونکو بیزیم حایات فلسفه میز تانریا اطاعت،بنده یه مرحمت دیر.

بو حیات طرزی نوکرچیلیک(مغول)، رعیت لیک(هند، عرب ) اصولو ایله زده لنسه ده ژنلریمیز له یوغرولان توره لریمیز و دینی اینانجیمیز هر زامان اوست دوزیده حیات طرزیمیز اولموشدور. ائله بونا گوره ده آذربایجان انسانی ایشلک ، گوجلو, صبیرلی و ایناملی دیر. بویوک کیچیک فلسفه سی وار،دولت و دولت چیلیک فلسفه سی وار و هر کسین بو دونیاگوروشونه ایچدن سایقی و سئوگی سی وار

تورک انسانی اوزللیک له آزربایجان تورک انسانی طبیعته ، تورپاغا،داغا ، داشا و طبیعتین قانونلارینا باغلی اینساندیر او اوزدن بو تورپاقلارین اینسانیندا وطن و یورد سئوگی سی دانیلمازدیر

وطنه باغلیلیق و یورد سئورلیک قانیمیزدادیر. دوغانین(طبیعت) قانونو ایسه جانیمیزدا و روحوموزدا دیر.

دنیز ایسه قلبیمیزده دیر.یوردوموزون هر قاریشی بیزیم اوچون مقدس دیر.

مقدس اولان وطن تورپاغینین هر گوشه سی و هر گوشه سینین آدی دا مقدس دیر.اونلاردان بیری ده آراز چایی دیر.

آراز چایی باشقالاری اوچون بیر چای و نهر آدی اولسادا، بیزلر اوچون ، حسرت، اوزلم، تاریخ،ساواش ، مغلوبیت،سئوگی، غیرت ، غرق اولماق، واراولماق، بولونمک و... کیمی دئیم لرین وار اولوش یوکودور. معنوی و پیسکولوژی آغیرلیق دیر, قالدیریم و کمپکس دیر. یا دا باسدیریلمیش ایگید نعره سی دیر.

سلطان محمد فاتح قسطنطنیه نی فتح ائدن دن سونرا اورتاچاغ اسارتینه سون قویدو.کلیسانین انسانلارین اوزونده قارانلیق و قورخولو حاکمیتی سون بولدو. غرب انسانی فکر و دوشونجه اوزگورلویونه قاوشدو. اسلامین اونلارا گتیردیگی اوزگورلوک ایشیتلیسی اونلاری کلیسانین تانری اولماسیندان قورتاردی. و غرب اینسانی ایجاد ائتمک و یاراتماق چرخینه دوشدو، ۵۵۰ایل عثمانلی حاکمیتی و غربین اسلام دوشمن چیلیگی اونلاردا نهایت صنعتی انقلاب حادثه سینی یاراتدی ، غرب صنایع اوزره ایره لیله دی.

ایکی مسلمان اولکه سی قاجار و عثمانلی هر گون بو قافیله دن گئری ده قالدی.سونرا صنایع اوچون یاناجاق یعنی نفت کشف اولدو.انگلیس بو ایشده اونجوللوک ائتدی.سونرا صنایعین گتیردیگی پارا زنگینلشمه سی اونلاری گوجلندیردی و غرب بازارلارینی گئنیشلندیرمک اوچون اورتا دوغونو (خاورمیانه) اوز بازارینا چئویردی.اونلار ایلک نوبه ده تورک خوفوندان قورتارمالی ایدیلر.یعنی هم عثمانلی و هم قاجار خوفوندان.اونا گوره ده بو ایکی گوج اسلاما باغلی اولاراق اونلارین قارشیندا دایاندیردی، غرب خصوصیله ده یهودی عایله لری پارا بارونلاری واسیطه سیله ایلک نوبه ده عثمانلی حاکمیتین ضعیف له دیب و اونو دئوردیلر و سلطان عبدالحمیدی مشروطه آدی ایله حاکمیت دن اوزاقلاشدیردیلار. بیر داها دونه بیلمدی و بئله لیک له امپراطورلوق چوکدو، عین اویونو قاجارلارین باشینا گتیردیلر و احمد شاهی یالان وعده لر له اولکه دن خارج ائدیب و مشروطه آدی ایله ایران دا یئنی غرب یانلیسی قوندارما حاکمیت قوردولار. بئله لیک له ایران دا ائتنیک اولاراق، تاجیک ، دری ، افغان کوکنلی و هندوستانا دایالی کولتورون یاقینلاشماسینا زمینه یاراتدیلار.تورک اصولو و تورک کولتورونو قاجارلا بیرلیکده سیلیب آتدیلار.

عثمانلی و قاجار دئوریلمه سی غرب دونیاسینین خیالینی راحاتلاشدیردی،ساختا عرب دولت جیک لر، و ایران دا دا کوکو و منشائی بللی اولمایان رضاشاه خاندانلیغی یاراتدیلار .بونلارین هامیسی اینگلیس و یهود مکانیزمینین محصولو ایدی. هامیسی دا نفت و انرژی اوچون ایدی.

اورتا دوغو او جمله دن قدس عثمانلی دئورلیدیکدن سونرا تمامیله غربین (انگلیسین)یونتمینه کئچدی.دئمک اولار کی اسلام تورپاقلاری غربدن شرقه و تا اوزاق شرقه (مالزی - اندونزی)یه قدر انگلیس اداره سینه گئچدی، و حالا دا ائله دی.صنایع لشمه و صنایع اوچون انرژی و صنایع اوچون یئنی بازارلار دونیا دا یئنی دوزن قوردو،اورتایا اسرائیل دولتی چیخدی. بو دولتجیک عثمانلی دان قوپاریلان و قبیله ای اداره اولان- ایندیسه دولت کیمی گورونن عرب لره خوف گلمک اوچون  تاسیس ائدیلدی.و گوره وینی حالا دوام ائتدیرمک ده دیر.

البته بونلارین هامیسینی حیاتا گئچیرمک اوچون ایلک نوبه ده هندوستانین فتحی سونرا اسلام دونیاسی ایله چین و چین مدنیتینین قارشینا سد چکمک ، پاکستان و ایران کیمی اولکه لرین مدرن دولت کیمی اورتایا چیخماسی افغانستانین اشغال و اورتا آسیا تورک لرینین آنا دولو تورک لری له آراسین کسمک اوچون ایلک نوبه ده پاکستان،ایکینجی نوبه ده ایسه فارس ائتنیک لی ایران یارادماق اولدو. اونا گوره کی خراسان و آنادولونون یاپیشیقلیغینی قطع ائتمک و تورک مدنیتین آرالارینا باشقا ائتنیک دوولت لر سوخماقلا بوتولویونو آرادان آپارماق، خراسانین (افغانستان- ترکمنستان- ازبکستان)نین اویغور (تورکستان) قرقیز ، قزاق،و سیبری دن باشلاییب تاتارستان و کریم یاریم آراسیندا قدر اوزانان تورک ائللرینین آراسینا پاز سوخاراق اونلارین متصللیگینی یوخ ائتمک.حال حاضردا دا ایرانین مرکزینده بویوک سلجوقلو تورکلرینون ایزلرینی اصفهان، کاشان ، ری و ساوه ده گورمک ممکن.بو اوزانتینین بیر اوجو آنادولو بیر اوجو افغانستان،خراسان ، بیر اوجو مرکزی آسیا ایدی.لکن غرب بونلاری بولمه یی باجاردی، ائتنیک بیرلییی تورک لری بیر بیریندن آییراراق بولمه یی باجاردی، دینی بیر لییی ایسه اسلامی عربی لشدیرمک له باجاردی ، آنجاق غربین ان بویوک مساله سی تورک لردن باشقا روسلار ایدی.روسلار ایسه تورک لردن فرقلی اولاراق اونلارلا عینی دیندن ایدی لکن منافع فرقلری واریدی.روسلار دا سیبری دن بالکانلارا قدر انگلیس تفکرونون قارشیسیندا یئر آلیردی.

انگلیس لر ، روس ( چار ) و ایران ( قاجار) بو ایکی دوولتی ضعیف لتمک اوچون بیر بیریله ساواشدیردی،البته غرب صفوی لر دونمینده عثمانلی و صفوی ساواشی چیخاراراق تورک لری بیر بیرینین الی له اولدورمک ایسته دی لکن باشا دوشدو کی تورک لر نهایت قارداش اولدوقلارینی ( هم دینی - هم عرقی) بیله جک لر و سونوندا قرارا گلدیلر تورک لری روسلارلا ساواشدیرسینلار. و بونو باجاردیلار اونا گوره کی دینی آیریلیق واریدی . بو ساواشین نتیجه سینده انگلیس بیر داشلا ایکی قوش ووردو. هم روسلاری محو ائتدی، هم روسلارین الی له تورک لری قیردیردی.قاجار ، چار ، ساواشی آزربایجان اراضی سینده گئدیردی اونون دا سببی بوندان عبارت ایدی کی خزرین شمالیندا تورک لرین واحد بیرلیینی ، جغرافی یاپیشیقلیغینی پوزسونلار و بونودا آذربایجان ساواشیندا قاجارلارین یئنیلمه سیله باجاردیلا.

آذربایجان بولوندو.داغستان(اسلام تورپاغی -تورک یوردو) اولاراق مسیحی روسلارا وئریلدی، بئله لیک له خزرین شیمالیندان یعنی هون و قیبچاق تورک لرینین مسیری اولان یئرلری ،یاراتدیقلاری مانع لر له تورک اراضی بیرلیگینی پوزا بیلدیلر.خزرین جنوبوندا  و هندوستان یونوندن (کشمیر،پاکستان، افغانستانین بیرحیصه سین) تورک لرین یولونو باغلادیلار.

حال حاضر دا سیز هندوستانا، پاکستانا،کشمیره باش وورسانیز اوردا تورک لرین وارلیغینی گوره بیلرسیز. بابر دولتینین شرقدن غربه اوزانتیسی محدودلاشدیردیلار،اورتا آسیا، افغانستان،و خراسان ، آنادولو مسیرینی ایسه ایراندا صنعی شاهلیق رژیمی له محدودلاشدیردیلار.خزرین شمالیندا ایسه، قرقیز، قزاق،قوموق ، نوغار، تاتارلاری آنادولویا اولاشماسینا مانع اولا بیلدیلر، داغستان ، چچن،اینگوش کیمی مسلمان و تورک اراضیلرینی مسیحی لشدیردیلر. پاز کیمی شمال تورک مسیرینین اورتاسینا سوخدولار بو اثنادا قاجارلارین چار روسیه سینه یئنیلمه سی ایله یاناشی آذربایجان ایکی دفعه بولوندو. بیری گلستان مقاوله سی بیری ده تورکمن چای آنلاشماسی ایله اوندان سونرا ایکی تای دا دا آذربایجانلیلار بیر بیرلرینه حسرت قالدیلار. و بو حسرتی خفیف لتمک اوچون حسرت ادبیاتی یاراندی، من مقاله نین سونوندا، یارانمیش ادبیات دان نمونه لر وئره جه یم. چار روسیه سی اروپالیلارین الی له دئوریلرک یئرینه سوسیالیستی حکومت( شوروی) قورولدو.ایلک نوبه ده لنین بیر کاریزماتیک رهبر کیمی اونون باشینا گتیریلدی.آنجاق سونرادان ماسون استالین اونو اربابلاری ماسونلارین تعلیماتی ایله یونتیمین باشینا گئچدی.اونون دا وظیفه سی ایلک نوبه ده روس گنجلیینی یوخ ائتمک و اورتا آسیا ایله قفقازلاری واحد بیرلیک مدنییتیندن اوزاقلاشدیرماق ایدی. بونو دا باشاردی،۲۰میلیون گنج ایکینجی دونیا ساواشیندا استالینین مدیریتی ایله یوخ ائدیلدی و شوروی کیمی بویوک جغرافیا دا دینی اینانج بوشلوغو زمینه سی یارادیلدی. اونا گوره کی روس مسیحی و اورتا آسیا( بخارا – سمرقند- خراسان) اسلامی دوشونجه سینی یوخ ائتسین.ماسونلار بو پلانلاری عثمانلی نی ییخاراق دونیادا حیاتا گئچیردیلر. و سونرا اورتا آسیا ایله آنادولو آراسیندا صنعی دولتجیک لر یاراداراق( گرجستان-ارمنستان) تورکیه ده یاشایان تورک لری اوز اقربالاریندان اوزاقلاشدیردیلار. سونرا تورکیه ده دیل اصلاحاتی آدی ایله اورتا آسیا، بالکان ، قفقاز،خراسان، ایران ، هندوستان،کشمیر پاکستان ، چین ترکستان آراسیندا دیل فرقلیلیگی یاراداراق مدنی کوک لری و کورپولری یوخ ائتدیلر.مسلمان تورک بویوک یوخلوقا معروض قالدی، مین ایل لر قوروب یاراتدیغی وارلیقلار بیر بیر یوخ اولدو، بونو ایسه ماسونلار حیاتا گئچیردی و حالا گئچیرمک ده دیرلر.حال حاضر دا ایران تورک لری ایله آنادولو تورک لرینین باغلارینی (اتصال)کسمک اوچون کوردستان دولتجیی یاراتماق تشببوثونده دیرلر. بو کوردیستانین بیر اوجو کرمانشاه بیر اوجو مدیترانه دی. یعنی بو ائله بیر پاز دیر کی بو دفعه گئچمک ممکن دئیل ، و بوتون امکانلاری ایله ماسونلار (امپریالیزم ) قومی اوزگورلوک آدی ایله بونو حیاتا گئچیرمک ده دیر، عراق سوریه ساواشلاری بونون ایلکین سانجی علامت لری دیر.آنادولوداکی (تورکیه) تورک لرینی(کایی) لاری، خراسان تورک لری (قینیق لاردان) و افغانستان تورک لری، ایران تورک لری افشارلاردان ، و بیر اوجو اویغورلاردان آیری سالماق تبعید ائدیب سونرا اونلاری دا بولغار و مجار تورک لری کیمی تورکلوک و اسلامچیلیقدان یوخسون ائتمکدیر.

آرازین دردی تورک دردی دیر.ماسون سانجی سی دیر.اسلام دوشمنچیلیگی و تورک بیرلیگی دوشمنچیلیگی دیر .اونا گوره آراز ماسونلار اوچون قورخولودور.چونکو تورک لری آییلدیر و وارلیق فلسفه سینی دیری توتور.

  آرازين   باياتيلاريندان سئچملر 

  آخما آراز، آخما آراز، 

  اينصاف ائيله بيزه بير آز، 

  بير اورگي ايکي يئره، 

  جللاد کيمي بؤلمک اولماز

   

  آرازي آييرديلار، 

  قوم ايله دويوردولار، 

  من سندن آيريلمازديم، 

  زور ايله آييرديلار

   

  آراز، آراز، داش، آراز، 

  چالخان آراز، داش، آراز، 

  تن بؤلونجه وطني، 

  قورويايدين کاش آراز

 

  آراز، آراز، خان آراز، 

  داغلاردان آشان آراز، 

  قارداشدان آيري سالدين، 

  ائويمي ييخان آراز

   

  آرازا گه مي گلدي، 

  سانديم کي، هامي گلدي، 

  ائوين ييخيلسين، آراز، 

  آيريليق دمي گلدي

   

  آراز، آراز، خان آراز، 

  گل ائيله مه قان آراز، 

  قوي گئديم، يار گؤزله يير، 

  ندير بو طغيان، آراز؟ 

   

  آرازي بوز باغلادي، 

  ديبي يارپيز باغلادي، 

  بير ائوه قوناق اولدوم، 

  حسرت دئييب آغلادي

   

  آراز قيراغيندايام، 

  چئشمه ين چيراغيندايام، 

  قارداشيم او تايدادير، 

  اونون سوراغيندايام

  آراز آخدي، يان آخدي، 

  ديبينده مين جان آخدي، 

  وطن ساري باخاندا، 

  اورگيمدن قان آخدي

   

  آراز قالماز آخماقدان، 

  شيمشک دويماز چاخماقدان، 

  گؤزلريمه قان گلدي، 

  او تايلارا باخماقدان

   

  آرازين سولاري غضبلي، داشقين، 

  شيرين نغمه لري آهدير، هارايدير، 

  وطن قوشا بنزر قانادلاري نين، 

  بير او تايديرسا، بيري بو تايدير

   

  آرازدير غم بيچيبدير، 

  درد اکيب، غم بيچيبدير، 

  دينديرمگين قان آغلار، 

  آراز حسرت بيچيبدير

   

  اليمي اليندن اوزمه، آراز، 

  آيريليغا دؤزمه، آراز، 

  گؤز ياشيني ميرواري تک، 

  بوينوموزا دوزمه، آراز

   

  ائله مي آراز آغلار، 

  کور گه لر، آراز آغلار، 

  قارداشلار آيري دوشوب، 

  دؤزمه ييب آراز آغلار

   

  آراز گلير داشيننان، 

  سويو قالخار باشيننان، 

  اؤنجه لر دومدرويدو، 

  بولاندي گؤز ياشيننان

   

  آراز، آراز، جان آراز، 

  سولطان آراز، خان آراز،

 

  چايين، چئشمن قوروسون، 

  منيم کيمي يان، آراز

   

  آراز، آراز، جان آراز، 

  سولطان آراز، خان آراز، 

  قارداشدان آيري ساليب، 

  نه ائديرسن قان آراز

   

  او گؤرونن آرازدي، 

  باخماق دا بير مورازدي، 

  اوستونده کؤرپوسو وار، 

  گلن-گئدن نه آزدي؟ 

   

  آراز قالماز آخماقدان، 

  شيمشک دويماز آخماقدان، 

  گؤزلريمه قان گلدي، 

  او تايلارا باخماقدان

   

  بير اوجا داغ، چک مني، 

  زيروه سي آغ، چک مني، 

  گؤزومده قانلي آراز، 

  سينمده داغ، چک مني

   

  آرازدي، بوي وئرندي، 

  بويلاسان بوي وئرندي، 

  حسرتدي دوغما سسه، 

  چاغيرسان هاي وئرندي

   

  آرازدا بوز آغلادي، 

  ياندي يارپيز آغلادي،

 

  اوغلان او تايدا قالدي، 

  بو تايدا قيز آغلادي

   

  خان آراز جوشان يئرده، 

  داغ-داشي آشان يئرده، 

  تورپاغي چيچک آچار، 

  کوره قوووشان يئرده

   

  سولاريندا داملانام، 

  باشينا من دولاننام، 

  حسرت چکميش بالانام، 

  چاغلا آرازيم، چاغلا