بیر عصری ده باشا ووردوق ! دونیانین سونونا نه قالدی کی...

 

BİR ƏSRİ DƏ BAŞA VURDUQ !DÜNYANIN SONUNA NƏ QALDI KI...

SORUMLU MÜDÜR : DR.HÜSEYN ŞƏRQİDƏRƏECƏK SOYTÜRK

مدیر مسئول دکتر حسین شرقی دره جک

ایللر اوتدو آی دولاندی گونش ایلی ایله بیر عصر سونلاندی و یئنی بیر یوز ایل یعنی 1400 جی یوز ایل باشلادی. حساب سورماغا آلیشمیش مغرور اینسان بیر باخدی کی چوخ شئیلری ایتیرمیش و اوزو اوچون دوزنله دیی بو دوزنک ده دوردوغو یئرده چالماقدادیر.

گوز آلیجی چوخ کشفلرین و ایره لیلیشلرین شاهیدی اولساقدا عصریمیزین سون ایلینی چوخ تاسف کی بیر گرم ویروس قورخوسوندان ماسک آرخاسیندا گئچیرمه لی اولدوق . نه یاخشی کی دورد دیوار واریمیش یوخسا هلاک اولوب گئدردیک. لافین قیصاسی انسان اوغلو نه قدر گویوس قابارتسادا اوز کوتو عمللرینین نتیجه سینده علاجسیز و چاره سیز قالدیغی آشیکاردیر.

سئوگی و اینامین یئرینی قارامساللیق و شبهه لر آلمیش بیر یوز ایلی گئریه بوراخساقدا اونون منفی توکونتولرینی ژنتیک کدلاریمیزدا ابدی داشیمالی اولاجاییق. حتی او کدلاری نسیللره اوتوره رک اونلارین دا ال قولونو باغلامیش اولاجاغیق. یئدییمیز دن ایچدییمیزه قدر , دوشوندویوموز دن ائتدیکلریمیزه قدر هامیسی DNA میزده ذخیره اولاراق بیزیم کیملیک کدلاریمیزی اوتکی انسانلارا داشیمیش اولاجاقدیر.

بیز اوزوموزه نه کیمی اییلیک و کوتولوکلر یاپدیقسا اونو ائولادلاریمیزا وئرمیش اولاجاییق.ساواش و قورخو دولو بیر عصری گئریده قویدوق . باشاریلاریمیزدا اولدو. اوزایا چیخدیق.اولاشیم دا سرعتله قاباغا گئتدیک.چوخ بیلمه دیکلریمیزی بیلدیک آنجاق بیلدیکجه ده اوز باشیمیزا بلا اولدوق. هیروشیما اورنه یی عمللر تورتدیک.گوجلو گوجسوزلری قانون نامینه سوموردو و حاقلاریندان محروم ائتدی. اورنه یی آفریقا و آسیا  دا انسانی فاجعه لرین یاشانماسی و گوجسوزلرین ان تمل حاقلاردان او جومله دن آنا دیللرینین اویره نیلمه سیندن آلیی قویولماسی و س. بو آجینی بیز آذربایجان تورکلری 100 ایلدیر یاشاییریق. اما ائله بیل بیر یوز ایلده هله یاشامالی اولاجاغیق. کیم بیلیر بیریسینین مالی و معدنی چالینیر دمکراسی و استقرار نامینه او بیرسینه گونش دوغور و دولت اولمانین غرورونو وکیفینی یاشاییر. آتالاریمیزین بیز تورکلره بوراخدیغی اسارت زنجیری بوینوموزدان آچیلمادی هئج دیلمیزه و اوکوللاریمیزا دا قیفیل وئریلدیی.

سالقین (پاندمی) قورخونج رویا اولسادا آنجاق بیزیم ان قورخونج رویامیز شو آن کیملیکسیز و دیلسیزلیک دیر. انسانلیق نامینه یوخ اولماقدان و اوزگلشمک ویروسوندان قوروناق و باشقا کولتور و مدنیت ماسک لاری ایله وارلیغیمیزی قبوللانمایاق و یاشامایاق. اوزون اول اوز اول اوزل اول. اوزگه اولوب اولو ÖLÜ اولما. قونشونو منتلی پیلاویندان اوز یاوان چوره یین یئی دیر . اینان و یولا چیخ .یو اوزون اولسادا تانری صابرلرله دیر. گوزل و ایناملی بیر عصرین باشلانقیجی قوتلو اولسون...