خدافرین بولگه سینده فولکلوریک شعرلر

 

 

تویوغ

منیم تویوغوم آغدی بالا

دریسی  دولو یاغدی بالا

دونن بو زامان ساغدی بالا

سنی یاناسان تویوغ آپاران

اودلاناسان تویوغ آپاران

 

منیم تویوغوم هاوادا

ایییسی گلیر تاوادا

 گئدین دئیین مش جاوادا

یاندم یاناسان تویوغ آپاران

اودلاناسان تویوغ آپاران

 

 منیم تویوغوم چیل چیلیدی

قانادلاری میل میلیدی

تویوغ دئیلدی بولولیدی

 یاندم یاناسان تویوغ آپاران

اودلاناسان تویوغ آپاران

  منیم تویوغوم ککیللیدی

آیاغلاری سکیللیدی

اون کسن ای نه کینلیدی

یاندم یاناسان تویوغ آپاران

اودلاناسان تویوغ آپاران

 

کئچل کئچل یامیه

كئچل كئچل بامیه

گئتدی مریض خانیه

مریض خانا باغلئدی

كئچلین باشی یاغلئدی

 

كئچل دئیر وای باشیم

قازان دا قاینار آشیم

آشیمی ایچن اولایدی

باشیما سیچان اولایدی

لای لای

لای لای دئدیم یاتاسان

قیزل گوله باتاسان

قیزل گول سنین اولسون

کؤلگه سینده یاتاسان

 

لای لای دئدیم اوجادان

سسین چخماز باجادان

تانری سنی ساخلاسن

 چیچگدن قیزلجادان

 

لای لای دئدیم گولونجه

دانشنجا گولونجه

بالاما لای لای دئدیم

 

 

ائللرینین دیلینجه

 

لای لاینام چیمنده

یئل اوینایب اسنده

محبتدن داشیرام

سن سوتومو امنده

 

لای لای بالام بئشیکده

بولبول اوخور ائشیکده

 سن یات یوخون آلگینن

من دورموشام کئشیکده

 

لای لاین اؤز دیلینده

چالارام اؤز دیلینده

روزیسی بول اولارمش

 اولان قوزو ایلینده

 

لای لای چاللام یاتارسان

قیزل گوله باتارسان

قیزل گولون ایچینده

شیرین یوخو تاپارسان

 

لای لای دئدیم گونده من

کؤلگده سن گونده من

ایلده قوربان بیر اولار

سنه قوربان گونده من

 

لای لای بئشیگیم لای لای

ائویم ائشیگیم لای لای

سن یات من اویاخ قالم

چکیم کِشیگین لای لای

 

 لای لای دئدیم قاداسی

آیئن گونون پاراسی

من سنه قوربان اولوم

گوزومون آغی قاراسی

 

لای لای چالدم گول گوزل

قونوش گوزل گول گوزل

بیرده دونیا یئتیرمز

بئله شیرین دیل گوزل

 

یاتمارام اویاق اوللام

جوشارام بولاق اوللام

نه قدر کی جانم وار

من سنه قوربان اوللام

 

 لای لای قولوم قانادم

لای لای شؤهرتیم شانم

سن قول قاناد اول

منده سنین آرخانام

یار

لای لای عشقیم ویقاریم

لای لای یاریم نیگاریم

بو بئش گونلوک دونیادا

دایاغیم اعتیباریم

قیزل اوزوک

هالای هالای ساتئلار

ایچینه موخای قاتئلار

قارداش منه پول گؤندر

قیزل اوزوک ساتئلار

 

قیزل اوزوگوم لاخلادی

وئردیم آنام ساخلادی

آناما قوربان اولوم

یاریمی قوناق  ساخلادی

 

 

قیزل اوزوگوم فیروزه

گئدین دئیین خوروزه

بو گئجه بانلاماسن

یاریم گلجک بیزه  

 اوشاخ سئومک:

یاغش گلیر آی هانی

قاشن کیمی یای هانی

گزدیم دوزو دونیانی

یوخدو سنه تای هانی

 

جورو جورولر یاپراغی

آستانالار توپراغی

سنی ایسته می ینین

گؤزونه  زهر یاپراغی

 

منیم قیزم تلسمه سه

تئللرین اسدیرمه سه

یوز آغ ساققال گلمه سه

دیل وئرمز هئچ بیر کسه

 

بالام بالام بالاسی

بالام داغلار لالاسی

یاریسی بالام بالاسی

یاریسی ایلان بالاسی

 

 تانری آدام یارادب

باغینا بادام یارادب

هامینی کولدن یاراتسا

بالامی گولدن یارادب

 

بالاما قوربان اینکلر

گورن هاچان ایمکلر

بالاما قوربان جونگه لر

هاچان سوزون دونگه لر

 

 آلنین آت مئیدانی    

 مینیب چاپباغیم گلیر

قاشلارین قلمدی       

سورمه چکماغیم گلیر

گوزلرین پیالا           

گؤتوروب ایچماغم گلیر

یاناقلارین آلمادی      

کسیب ییماغم گلیر

دوداقلارین قایماقدی   

سیویرب ییماغم گلیر

بورونون فندقدی       

 سیندریب ییماغیم گلیر  

 

حامام

گئتدیم حاماما  لیفلندیم

چیخدم ئشیگه لوتلندیم

قفه چی منه چای گتیر

من بو چایی ایشمه رم

بو قاپدان کئچمرم

بو قاپی منیم اولسون

قرمزی دونوم اولسون

گئییم گئدیم تبریزه

تبریزده تویوم اولسون

قیزلار گلسین تویوما

چپی چالسن بویوما

 حامام

حامام حامام ایچینده

خلبیر سامان ایچینده

دَوَه دللَک لیک ائیلر

کؤهنه حامام ایچینده

 

چای قوی

چیققلی  چیققلی دور چای قو

ائوی سوپوروب ناهار قو

منیم آدیم حلمه دی  

قاراباغدان گلمه دی

قاراباغ منیم اولسون

قئرمئزی دونوم اولسون

گئییم گئدیم تربیزه( تبریز )  

تربیزده تویوم اولسون

قیزلار  گلسین تویوما

قوربان اولسون بویوما

چیققلی قیزم

جیققلی قیزیم دو چای قوی

ائوی سوپور ناهای قوی

بیر استکان وئر منه

من گئدیره م خرمنه

خرمنیمیز اوزاخدی

هوققوشوموز چولاخدی

 

آتام

منیم آتام گؤزلدی

گؤزللیکده مثلدی

گوزگو کیمی قلبی وار

دنیز کیمی صبری وار

سحر ایشه گئدنده

باشماقلارئن جوتله رم

خشلغیمی آلارام

سوسپرم دالنجا

یول گودرم گلینجه

 بایرام

بوگون آیراندی

سابا بایرامدی

گئچی شیطاندی

قویون قورباندی

 

اوُشوُدوم -  اوُشوُدوم

اوُشوُدوم  اوُشوُدوم                  

داغدان آلما داشئدیم

آلمالارم آلدئلار                     

منی یولا سالدئلار

من یولومدان بئزارام              

درین قویو قازارام

درین قویو بئش کئچی             

هانی مونون ائرکجی

ائرکجی داغ باشندا

هئی هالادم گلمه دی             

چیییت وئردیم ییمه دی

چیییت قازاندا قاینار              

قمبر بوجاخدا اوینار

قمبر گئتدی اُدونا                

 قارغی باتدی  بودونا

قارغی دئییل قامئشدی           

بئش بارماغم گوموشدی

گوموشو وئردیم تات آلدم        

تات منه  داری وئردی

دارئنی سپدیم قوشا               

 قوش منه قاناد وئردی

قانادلاندم اوچماغا               

 حاق قاپیسین آچماغا

حاق قاپیسی کیلیدلی

کیلید دوه بوینوندا                

دوه خان خان یولوندا

خان  خان یولو بوز باغلار

     

یانلاری یاپرئز باغلار

خان خان یولو مین بازار       

 ایچینده میمون گزر

میمونون بالالاری               

منی گرروب آغلادی

توماننا قئغلادی

تومانی دلیک دلیک           

 قورباغا بؤلوک بؤلوک

قورباغانی حاخلادیم          

حسن بیه ساخلادیم

حسن بیین نییی وار         

 شاققر شوققور چایی وار

ائوینده بیر لوتو وار         

 ا للی باتمان گؤتو وار

یاغیش ایستمک

اوچ قارداشن  بولودو

یئتیملرین اومودو

تانری  بیر یاغئش گوندر

آرپا بوغدا قورودو

 

آنا خانم  نه ایسته ر ؟

تانرئدان یاغش ایسته ر

الی قولو خمیرده

بیر جه قاشئق سو ایسته ر

 

چاخ داشی ؛ چاخماخ داشی

یاندی اوره گیم باشی

تانری  بیر یاغئش گوندر

گویه ر تسین داغی, داشی

یاغدی یاغیشلار

بانلادی قوشلار

حیوان گامئشلار

هارادا یاتارلار؟

 

یاغدی یاغئشلار

بانلادی قوشلار

بیتتدی قامئشلار

یئسین جامشلار

جارلادی  سس سالدی

بیزیم چاووشلار 

گلین گئداخ اوس باغا

قورباغایلا توسباغا

گئتدی کبین کسماغا

جامئش باشنا پالاز بورودو

گئتدی قولاغ آسماغا

قورباغا شللاغ آتدی

توسباغنن گوزونه باتدی

گئتدیلر شکایته

گؤندَرَسن

آی قارا چوخا ممت حسن                  

 اَینیندن چخا ممت حسن

بیرایپک یایلئلق نَمَنه دی                   

عمی قیزئنا گوندره سن

 

عمی قیزی جان عمی قیزی                

گؤزلری مرجان عمی قیزی

بیرجه جوت جوراب نمنه دی              

عمی اوغلونا گؤندرسن

 

آی قارا چوخا ممت حسن                  

 سنی گؤروم قان اَمدرسن

بیر قیزل اوزوک نمنه دی                   

عمین  قیزنا گؤندرسن

 

عمی قیزی جان عمی قیزی               

 من سنه قوربان عمی قیزی

بیرجه جوت اؤپوش نمنه دی              

 عمین اوغلونا گؤندرسن

 

آی گئتدی باتان یئره                          

ملکلر یاتان یئره

عمی قیزی قوربان اولسون                   

عمی اوغلو یاتان یئره

 

گون چئخدی لالا چئخدی                   

 عمی قیزی چؤله چئخدی

عمی اوغلو قوربان اولسون         

عمی قیزی گلن یئره

دومان

دومان قاچ قاچ قاچ         

دالنجا آتلی گَلئر

اَلی پولاتلی گَلئر

یورغانی بیتلی گَلئر

سنی بوردا توتارلار

درینه سامان تپرلر

گؤیدن آسللار

( سنی گویدن آساللار دالینا قامچی سوخللار)

تولوخ (ق)

تولوغوم اول  اول

آیران گؤز یاشنجا

یاغ اینه باشنجا

اِویمه قوناغ گلیبدی

آشم یاوان قالئبدی

قویون

قویون وار کره گزر

قویون وار کوره گزر

گئدر داغلاری گزر

گلر ایولری بزر

آغ قویون  شیشک قویون

یونو بیر دؤشک قویون

بئلامانی تئز گتیر

آغلاشئر اوشاق قویون

جهره

 آی فندی فندی جهره

اَیغیمئن  بندی جهره

وئرئیدیم سئدئرئیدیم

گَزئیدیم کندی جهره

جهره جغم پالتدی

اَییرمه دیم قالبدی

کیشیم پانبغ آلبدی

منی درده سالبدی  

اندازا(بیر نوع خالچا)

اندازانی چکدیم دارا

بارماغلاریم اولدو یارا

گئدین دئیین چشنی کار

گلسین یئله نی چوندرسین

گلمه سه آتی گوندرسین

 

تشتی  تشتی 1

آ تشتی  تشتی  تشتی                  

ووردوم گلانی کئچدی

ایکی خوروز اَل لَشدی               

 بیری قانا بلشدی

قان گئتدی چایدا دؤشدو              

 چایدان گووَرچین اوشدو

گووَرچین آلا پاختا                    

 یو واسی قلبی تاختا

یو واسین گرتوُرللر                   

منزیله یئتیرللر

منزیل بیزیم اولئیدی                 

چیت کؤینه ییم اولئیدی

چیت کؤینه ییم فلفلی                  

گل اوخو بیزیم دیلی

بیزیم دیل اوروم دیلی                 

اورومدان کئچن آتلی

قلنجی قانا باتدی                       

 قلنجی قان ایچینده

اورکلر داغ ایچینده                    

گولو بادام ایچینده

او گولون بیرین اؤزئیدیم              

ساچ باغما دوزئیدیم 

ایگید لرین تویوندا                    

 بیرجه دابان سوزئیدیم

تشتی تشتی 2

آ تشتی  تشتی  تشتی                 

ووردوم گلانی کئچدی

ایکی خوروز اَل لَشدی              

 بیری قانا بلشدی

قان گئتدی چایدا دؤشدو             

چایدان گووَرچین اوشدو

گووَرچین آلا پاختا                   

یو واسی قلبی تاختا

گئدیلر اوچورتماغا                  

 مئیداندان کئچیرتماغا

مئیدانن اغاجلاری                   

 بار گتیرمز باشلاری

خان داییمین قوشلاری              

 بیری قارا بیری آغ

میندیم آغن بوینونا                   

سوردوم خان خان یولونا

خان خان یولو داشلیدی             

کئچلین باشی یاغلیدی

بابامن باشی ساشلیدی

آنا و قیز دئییشمه سی

آنا : گئتمه بولاق باشنا قیزیم

چشمه چراخ باشنا قیزم

بیر قارا قاش گؤز اوغلان

یایلیغن آلیب  قاچار قیزم

قیز : گئتدیم بولاق باشنا آنا

چشمه چراخ باشنا آنا

اوقارا قاش گؤز اوغلانن

قوی باخم گؤز قاشنا آنا

آنا : گئتمه بولاق باشنا قیزیم

 چشمه چراخ باشنا قیزم

یایلغن قاچران اوغلان

قاچیریب سنی یاشنا قیزم

قیز: گئتمم بولاق باشنا آنا

چشمه چراق باشنا آنا

قیز اؤز ایستگینده ن

نئجه قاچب یاشنا آنا

قیز و اوغلان دئییشمه سی

قیز : دؤنگه میزده دوران اوغلاان

بیغلارینی بوران اوغلان

منه کیپریک ووران اوغلان

وئر منیم گوللو باشماغم

دابانی پوللو باشماغم

اوغلان : دؤنگه نیزده دورمامشام

بوغلاریمی بورمامشام

سنه کیپریک وورمامشام

منده یوخ گوللو باشماغن

دابانی پوللو باشماغن

قیز: گول باغچادا بارن اوللام

شیرین هیوا نارین اوللام

بیر دونه لیک یارن اوللام

گتیر میشم گول باشماغم

ایچی دولا پول باشماغم

اوغلان : گول باغچادا باریم اولسان

شیرین هیوا ناریم اولسان

بیر دؤنه لیک یاریم اولسان

وئررَم سنه گول باشماغی

 

ایچی دولو پول باشماغی