محمدامين رسول زاده کیملیی

پروف.معاريفه حاجييوا

  

آذربايجانين تانينميش فيکير و دؤولت آداملاريندان اولان محمد امين آخوند حاجي علي اکبر اوغلو رسول زاده 1884-جو ايل يانوارين (ژانویه) 31-ده باکينين نووخاني کندينده آنادان اولموشدور.

محمد امين اؤنجه تانينميش موعليم سولطان مجيد غني زادنين (1866-1942) مودير اولدوغو ايکينجي روس- موسلمان مکتبينده تحصيل آلميش، سونرا باکي تئخنيکي مکتبينده تحصيليني داوام ائتديرميشدير.

هله 17 ياشيندا ايکن آذربايجاندا روس موستملکه اوصول-ايداره‌سينه قارشي گيزلي موباريزه آپاران «موسلمان گنجليک تشکيلاتي»ني ياراتميشدي. روسلارا قارشي قورولان بو تشکيلات سونرالار «موسلمان دئموکراتيک موساوات جمعيتي» آدي ايله تانينميشدير.

م.ا.رسولزاده 1905-1907-جي ايللرده باکيدا اينقيلابي فعاليت گؤسترن استالينله ده موناسيبتده اولموشدور. اونون استالينله (1870-1953) تانيشليغينين و ياخينليغينين اساس سببي «خالقلار

حبسخاناسي» آدلانديريلان چار روسيياسينا قارشي 1905-1917-جي ايللرده موباريزه اپاران موختليف قروپلارين زامان-زامان موشترک جبهه ده يئر آلماسي ايدي. م.ا.رسولزاده اوزون مودتدن سونرا استالينله علاقه لريني بو ديکتاتورون 1953-جو ايلده اؤلوموندن سونرا 1954-جو ايلده تورکيه‌ده «دونيا» قزئتينده يايينلانان «بير تورک ميلليتچيسينين استالين ايله ايحتيلال خاطيرالاري» آدلي يازيدا تفررواتي ايله آچيقلاميشدي.

هله 1905-جي ايلده بالاخاني نئفت معدنلرينده فهله‌لري تعطيله تحريک ائتديگي گون وارليلار ستالينين نئفت قويوسونا آتماق ايسته‌ميشلر. اؤزونو حاديثهيئرينه چاتديران م.ا.رسولزاده اونو اؤلومدن خيلاص ائتميشدير. او، استالينين باييل(باکی دا بیر زیندان) حبسخاناسيندان گيزلي صورتله قاچيريلماسينين داتشکيلاتچيسي اولدوغو سؤيله‌نيلمکده‌دير.

1905-1907-جي ايللرده فهله‌لر آراسيندا تبليغاتي و فعاليتي اوچون چارليق روسيياسي م.ا.رسول زاده نين حبس ائديلمه‌سي اوچون گؤستريش وئرير. تعقيب اولدوغو اوچون 1908-جي ايلين سونلاريندا م.ا.رسولزاده باکيني ترک ائتمک مجبوريتينده قالير و تبريزه گئدير. چارليق روسيياسي اونون ايراندان چيخارليماسيني طلب ائدير. م.ا.رسولزاده تعقيبلردن قورتارماق اوچون ايستانبولا گئدير و اورادا هميئرليلري علي بي حسينزاده و احمد بي آغايئوله گؤروشموش، يوسوف بي آکچورا، ضييا گؤک آلپ و باشقا گؤرکملي شخصلرله ياخينليق ائتميشدير.

1913-جو ايلده چار روسيياسيندا رومانوولار سولاله‌سينين 300 ايلليي ايله علاقه دار «عفو-عومومي»دن يارارلانان م.ا.رسولزاده وط‌نينه دؤنور و فعاليتيني داوام ائتديره‌رک «موساوات» پارتيياسينين يايين اورقاني اولان «آچيق سؤز» قزئتيني نشر ائتديرير.

1917-جي ايلده روسييادا فئورال بورژوا اينقيلابي باش وئردي. سيلاح و زور گوجونه خالقلارين توپراقلاريني ايشغال ائديب، دونيانين آلتيدا بير حيصه سينه چئوريلميش روسييا ايمپئريياسي داغيلماغا اوز قويدو.

26-31 يانوار 1917-جي ايلده باکيدا گئرچکلشن موساوات پارتيياسينين بير قورولتاييندا م.ا.رسولزاده موساوات پارتيياسي مرکزي کوميته‌سينين باشچيسي سئچيلير. بو قورولتايدان سونرا باکي باشدا اولماقلا آذربايجانين هر يئرينده «آذربايجانا موختاريت» شوعاري آلتيندا ميللي حرکات باشلادي. 1918-جي ايل 27 آپرئلده آذربايجان ميللي شوراسي توپلاندي.

سس چوخلوغو ايله م.ا.رسولزاده ميللي شورانين صدري سئچيلير. بي طرف فتحعليخان ايسگندر اوغلو خويسکينين (1875-1920) باشچيليغي ايله آذربايجان دئموکراتيک رئسپوبليکاسي حکومتي تشکيل اولوندو. بئله‌ليکله، آذربايجان خالقي نينکي تورکديللي خالقلار آراسيندا، همچنين بوتون ايسلام عالمينده ايلک دفعه اولاراق رئسپوبليکا اوصول-ايداره‌سينه قدم قويدو.

1920-جي ايلين 28 ماييندا اعلان ائديلن آذربايجان دئموکراتيک رئسپوبليکاسي ايسلام و تورک دونياسيندا ايلک دئموکراتيک رئسپوبليکا اولماقلا اونون رهبرلري -م.ا.رسولزاده، فتحعلي خان خويسکي، عليمردان بي توپچوباشوو، نصيب بي يوسيف بيلي ميللي و دؤولت ماراقلاريني اوستون توتان دؤولت خاديملري ايديلر. 34 ياشيندا حاکيميته گلن م.ا.رسولزاده ايسه آذربايجان خالقينين يئتيشديرديگي بؤيوک شخصيت ايدي.

حاکيميتده اولدوغو 23 آي مدتينده گؤردوکلري بير چوخ موترققي ايشلرله برابر باکي دؤولت اونيوئرسيتئتينين يارانماسي دا آدر حکومتي و اونون قوروجوسو م.ا.رسولزاده نين آدي ايله باغليدير. بو مسله ايله علاقه دار او، بير نئچه دفعه آذربايجان پارلامئنتينده چيخيش ائتميش و اونيوئرسيتئتين آچيلماسيني قطعي طلب ائتميشدير. 1919-جو ايلده آچيلان باکي دؤولت اونيوئرسيتئتينده م.ا.رسولزاده نين موحاضيره‌لر اوخوماسي دا منبعلرده يازيلميشدير.

28 آپرئل 1920-جي ايلده آذربايجان، بولشئويکلرين اون بير قيزيل اوردوسو طرفيندن 1920-جي ايلده آپرئل حاديثه لريندن سونرا م.ا.رسولزاده لاهيجدا (آذربایجان دا گوزل و اسکی بیر کند) حبسه آليندي. اونون توتولماسي خبري همين ايلين نويابرين اوللرينده ولاديقافقاز شهرينده اولان.استالينه چاتديريلدي. استالين هئچ کسه خبر وئرمه‌دن باکييا گله‌رک، 11-جي اوردونون خوصوصي شؤعبه سينين رئيسي پانکراتووا رس ف سر ميلت کوميسسارليغي آديندان گؤستريش وئردي و اؤزو شخصن حبسخانايا گئديب م.ا.رسولزاده ني آزاد ائتدي. استالين بونونلا دا 1905-جي ايلده اونو اؤلومدن قورتاران کئچميش دوستو م.ا.رسولزاده نين قارشيسيندا اؤز ويجدان بورجونو يئرينه يئتيردي. او، م.ا.رسولزاده ني اؤزو ايله بيرليکده موسکوايا آپاردي و ميلتلر کوميسسارليغيندا مطبوعات مووککيلي وظيفه‌سينه تعيين ائتدي. م.ا.رسولزاده کوميسسارليغا تابع اولان موسکوا شرقشوناسليق اينستيتوتوندا دا فارس ديليندن درس دئميشدير.

م.ا.رسولزاده استالينله بيرليکده باکيدان آيريلديغي گون ايکي ساعات بير مودت عاييله سي ايله گؤروشمه‌يه ايجازه وئريلميشدي. او، عميسي قيزي ايله ائولي ايدي. اونون ايکي اوغلو و بير قيزي دا واردي. کيچيک اوغلو آذر ايکي آيليق ايدي. بو گؤروش زاماني م.ا.رسولزاده اونو ايلک دفعه گؤروردو و بو گؤروش اونون اوغلو ايله ايلک و سون گؤروشو ايدي. سونرالار م.ا.رسولزاده نين بؤيوک اوغلو 1937-جي ايلده سووئت رئژيمي شراييطينده گولللنميش، ايکي آيليق قويوب گئتديگي کيچيک اوغلو آذر ايسه قازاخيستانا سورگونه گؤندريلميشدي. عميسي اوغلو ايله ائولي اولانقيزي لطيفه خانيم دا استالين تئرروروندان ياخا قورتارا بيلمه‌ميشدي. لطيفه خانيمين حيات يولداشي حبس ائديلميش، اؤزو ايسه قازاخيستانا سورگون ائديلميشدير.

استالين 1920-جي ايل نويابرين 1-ده باکييا گليب م.ا.رسولزاده ني محبسدن خيلاص ائتمگي واختيله م.ا.رسولزاده طرفيندن اونو اؤلومدن خيلاص ائتمه‌سي ايله باغلي اؤده‌ديگي معنوي بورج ايدي. فقط استالين رئپرئسسييا ماشيني اونونلا باريشماز عقيده صاحيبي اولان م.ا.رسولزاده ني ان آغير جزادان خيلاص ائتميه‌جکدي. م.ا.رسولزاده عاييله سينه تطبيق اولان بو جزا دا بونون بير اؤرنگيدير.

گله‌جک طالعييني سيبيره سورگون و يا اؤلوم گؤزله‌ين م.ا.رسولزاده عقيده دوستلاري طرفيندن موسکوادان قاچيريلير و بئله‌ليکله اونون حياتينين موهاجيرت دؤورو باشلايير. پروفسور توران يازقان «بايراق شخصيت محمد امين رسولزاده» آدلي مقاله‌سينده يازير: «تاريخده ميلتلر و چاغلار اوچون بايراق شخصلر واردير. تورک تاريخي بو بايراق شخصلر ايله دولودور. اونلارين شخصينده تورک ميلتي هر چاغدا آديني دونيادا دويورموش، وارليغيني اونلارين چاليشمالاري، فيکيرلري و سياسي حياتلاري ايله سوردورموشدور. م.ا.رسولزاده تورک دونياسينين پارام پارچا اولدوغو بير دؤورده آذربايجان تورکونون ميللي منليگيني قازانيب موستقيل بير دؤولت قورماسيندا بيرينجي درجه‌ده رولو اولان بايراق شخصيتدير» (باخ: تورک دونياسي تاريخ درگيسي، اييون 1990، سايي 42).

ماوي ايله تورکلوگو، قيرميزي ايله آزادليغي، ياشيل ايله ايسلامي، آي و سککيز گوشه‌لي اولدوزلا آذربايجاندا مسکون اولان 8 تورک بويونو تمثيل ائدن بايراقلا قوردوغو آذربايجان دؤولتي 23 آي ياشاسا دا، م.ا.رسولزادنين آذربايجاندا يوکسلتديگي بايراق شرق اؤلکه‌لرينده يوکسلن ايلک دئموکراتيک بايراق ايدي. 28 ماي 1918-جي ايلده قورولان آدر(آذربایجان جمهوریتی)، 28 آپرئل 1920-جي ايلده ايچينده ائرمنيلرين ده يئر آلديغي 11-جي قيزيل اوردو طرفيندن سوقوط ائتديريلدي. اون بيرينجي قيزيل اوردو آذربايجاني ايشغال ائده‌رک اهالييه وحشيجه‌سينه ايشگنجه‌لر وئردي. تکجه گنجه‌ده 13.000 دينج اهالي اؤلدورولدو. 12 ژنرال، 27 آلباي، 370 ظابيط گولللندي. بو آمانسيز حاديثه دن سونرا آذربايجانين وطنپرور اوغوللارينين چوخو باشقا اؤلکه‌لره موهاجيرت ائتمک مجبوريتينده قالديلار. اؤلکه‌ني ترک ائده بيلمه‌يهنلر ايسه ايشگنجه‌لره و گولللنمه‌يه معروض قالديلار.

آدر قوروجوسو م.ه.رسولزاده ايسه بير تصادوف نتيجه‌سينده بير مودت موسکوادا ساخلانسا دا اورادان قاچيريلاراق تورکيي، آلمانييا، پولشا، فرانسا و رومينييا کيمي اؤلکه‌لرده ياشاميش، 1947-جي ايلده يئنيدن تورکيه‌يه دؤنوب عؤمرونون سونونا قدر آذربايجانين يئنيدن ايستيقلالي اوغروندا دورمادان چاليشميشدير.

1931-1947-جي ايللرده سووئت حؤکومتينين اعتيراض نوتاسينا گؤره آذربايجان موهاجيرتينين تورکيه‌ده‌کي سياسي فعاليتي دايانديريلدي. بو فعاليتي آوروپادا داوام ائتديرمک اوچون م.ا.رسولزاده 1931-جي ايلده بئرلينه گئده‌رک، اورادا «آذربايجان رئسپوبليکاسي حاقيندا بعضي قايه‌لر» آدلي کيتابيني نشر ائتديرير، 1932-جي ايلده ايسه «ايستيقلال» قزئتيني يايينلادير. 1934-جو ايلده ايسه وارشاوايا (ورشو)گئده‌رک سياسي فعاليتيني اورادا داوام ائتديرير. وارشاوادا 1936-جي ايلده «چاغداش آذربايجان ادبياتي» (روس ديلينده)، «پانتورانيزم حاقيندا» (روس و آلمان ديلللرينده)، 1938-جي ايلده «آذربايجان مسله سي» (المان ديلينده)، «آذربايجان» (فرانسيز ديلينده) اثرلريني نشر ائتديرير. 1938-1940-جي ايللرده ايسه پولشا حکومتينده سياسي مصلحتچي کيمي فعاليت گؤسترير.

 م.ا.رسولزاده آوروپادا اولدوغو زامان سووئت گيزلي کشفياتينين تعقيبلرينه معروض قالير. اودور کي، «فيتنه‌دن قوروناق»، «قپو-يا ديقت» مقاله‌لريني يازاراق ديقتلي اولماغي تؤوصييه ائدير. حقيقتن ده ، 1941-جي ايلده سووئت اوردوسو ايرانا داخيل اولدوقدان سونرا داها اوللر بورادا موهاجيرت ائدن آذربايجان دئموکراتيک رئسپوبليکاسي عوضولري اؤلدورولدو و حتّي 1954-جو ايلده روس کشفياتي آب و(ABO)فتحعلي به‌يه بئرلينده سوي-قصد ائتدي. م.ا.رسولزاده آوروپادا دا آذربايجانين حاق سسيني مودافيعه ائتمکده ايدي. 1943-جو ايله قدر بئرلينده ياشايان م.ا.رسولزاده، 1943-جو ايلده بئرليندن رومينييانين پايتاختي بوخارئسته گئدير. سووئت اوردوسو بو شهري ده ايشغال ائدينجه، ايسوئچره‌يه گئتمک اوچون ويزا آلماق ايسته‌يير، آما آلا بيلمير. اودور کي، بوخارئسته ياخين فرئنبورق شهرينده يئرلشمک ايسته‌يير، آما 1944-جو ايلده بو شهرين ده هاوا هوجومونا معروض قالماسي نتيجه‌سينده آلمانيياداکي آمئريکان ايشغال اراضيسينه سيغينير. 1947-جي ايلده آنکارايا دؤنن م.ا.رسولزاده عؤمرونون سونونا قدر بورادا ياشايير.

م.ا.رسولزاده 1949-جو ايلده آنکارادا «آذربايجان کولتور درنگي»ني قورور. 1952-جي ايلين 1 آپرئليندن «آذربايجان» آدلي ژورنال نشر ائتديرير. آنکارادا تحصيل ناظيرليگينين مطبوعات موديرليگينده، داها سونرا ايسه ميللي کيتابخانادا ايشلمکله برابر علمي-تدقيقات ايشلري ايله مشغول اولور، آذربايجان حاقيندا مقاله و کيتابلار يازير، کونفرانسلار وئرير. «چاغداش آذربايدان ادبياتي» (1950)، «چاغداش آذربايجان تاريخي»، «آذربايجان شاعيري نيظامي» (1951)، «ادبي بير حاديثه » کيمي کيتاب و مقاله‌لر اونون حياتينين بو دؤورونه تصادوف ائدير.

1955-جي ايلده شکر خسته‌ليگينه توتولان م.ا.رسولزاده همين ايل مارت آيينين 6-دا خسته خانادا اوچ دفعه«آذربايجان آذربايجان آذربايجان» دئیرک وفات ائدير. قبري آنکارادا جئلئبي آسري مزارليغيندادير.

آذربايجان ميللي ايستيقلال حرکاتينين ليدئري، آذربايجان دئموکراتيک رئسپوبليکاسينين (1918-1920) قوروجولاريندان بيري اولان محمد امين رسولزاده عئيني زاماندا بير ادبيات تاريخچيسي اولماقلا، بير چوخ ادبي و تاريخي اثرلرين ده موللليفيدير. بير دؤولت آدامي اولان م.ا.رسولزاده موکممل قلم اوستاسي ايدي. او، ادبي-بديعي، ميللي-تاريخي اثرلريني «م.ا.رسولزاده»، «يالوار اوغلو»، «محمد امين» ايمضالاري ايله يازميشدير.

م.ا.رسولزاده ادبي ياراديجيليغا 1903-جو ايلده باشلاميش، اونون «موخممس» آدلي ايلک شعري همين ايلده «شرقي-روس» قزئتينده نشر ائديلميشدير. داهي آذربايجان بسته کاري و معاريفچيسي اوزئيير حاجيبيلينين (1885-1948) 1907-جي ايلده نشر اولونان «روس-تورک و تورک-روس لوغتي» کيتابينين رئداکتورو دام.ا.رسولزاده اولموشدور. او، «بير خانين حکايه‌سي» نثر اثرينين، «قارانليقدا ايشيقلار»، «ناگاهان بلا» (1908) تئاتر اثرلرينين مؤليفيدير. ايراندا ياشاديغي ايللرده فارس ديلينده بير چوخ يازيلاري يايينلانسا دا، اونون ادبي و علمي فعاليتي 1920-جي ايلدن سونرا ياشاديغي موهاجيرات ايللرينه تصادوف ائتديگي منبعلرده يازيلميشدير.

بولشئويک ايستيلاسي آذربايجان دئموکراتيک رئسپوبليکاسيني سوقوط ائتديرديکدن (1920-جي ايل، 28 آپرئل) سونرا حبس حياتيندا و موهاجيرتده ياشاماغا محکوم اولان م.ا.رسولزادنين 1922-جي ايلده ايستانبولدا «آذربايجان رئسپوبلکاسينين کئچميشي، تشککولو و اينديکي وضعيتي»، 1923-جو ايلده «عصريميزين سياووشو»، «ايستيقلال مفکوره‌سي و گنجليک» کيتابلاري، 1928-جي ايلده «اينقيلابچي سوسياليزمين ايفلاسي و دئموکراتييانين گله‌جگي»، «ميلت و بولشئويزم»، «قافقاز تورکلري» آدلي کيتابلاري (تورکيه تورکجه‌سي ايله) يايينلانميشدير. 1930-جو ايلده پاريسده «آذربايجان و ايستيقلاليت» (فرانسيز ديلينده) و «قافقاز پروبلئمي ايله علاقه دار پانتورانيزم» (روس ديلينده) کيتابلاري چاپ اولونور. 1938-جي ايلده ايسه بئرلينده «آذربايجان رئسپوبليکاسي حاقيندا بعضي قئيدلر» (آلمان ديلينده) کيتابي يايينلانير.

دونيانين موختليف اؤلکه‌لرينده اونون علمي، تاريخي و سياسي مقاله‌لري يايينلانير. م.ا.رسولزاده نين 1936-جي ايلده بئرلينده «چاغداش آذربايجان ادبياتي» (المان ديلينده) و وارشاوادا «آذربايجان ادبياتي» (پولياک ديلينده) مقاله‌لري و 1943-جو ايلده ايستانبولدا نشر اولونان «ايسلام-تورک ائنسيکلوپئديياسي»نين بير جيلدينده «آذربايجان لهجه‌سي» آدلي مقاله‌سي يايينلانير.

1951-جي ايلده نيويورکدا «اوکراينا» توپلوسونون يئددي جيلدينده «آذربايجان رئسپوبليکاسي» مقاله‌سي»، لندنده چيخان بريتانييا ائنسيکلوپئديياسيندا «موساوات پارتيياسينين يارانماسي تاريخي و آذربايجان دئموکراتيک رئسپوبليکاسينين تشککوللو» مقاله‌سي اينگيليس ديلينده يايينلانميشدير.

 1985-جي ايلده اوکسفورد اونيوئرسيتئتينده «قافقاز پروبلئمي ايله علاقه دار اولاراق پانتورکيزم» مقاله‌سي اينگيليسجه و روسجا يايينلانميشدير.

م.ا.رسولزاده نين علمي، بديعي و پوبليسيست-تاريخي کيتابلارينين بير قيسمي ساغليغيندا، بير قيسمي ده وفاتيندان سونرا يايينلانميشدير. اونون «آذربايجان شاعيري نيظامي» آدلي علمي آراشديرما کيتابي 1951-جي ايلده آنکارادا، «آذربايجان کولتور گلنکلري» 1949-جو ايلده آنکارادا، «چاغداش آذربايجان ادبياتي»1984-جو ايلده آنکارادا، «ميللي تئناسوده» 1984-جو ايلده آنکارادا، «آذربايجان جومهوريتي (کيفييتي تشککولو و اينديکي وضعيتي» 1990-جي ايلده ايستانبولدا يايينلانميشدير.

م.ا.رسولزادنين ايجتيماعي-سياسي فعاليتي و ادبي ايرثي حاقيندا سووئت ايمپئريياسينين چؤکدويو 1990-جي ايللره قدر دوغرو-دوروست معلومات وئريلمه‌ميشدير. ايمپئرييانين 70 ايلليک تاريخينده 1918-1920-جي ايللرده آذربايجان دئموکراتيک رئسپوبليکاسينين قوروجو ليدئري م.ا.رسولزاده و 1918-1920-جي ايللرده‌کي موستقيل آذربايجان دؤولتي آذربايجان خالقينين حافيظه‌سيندن سيلينمه‌يه چاليشيلديغي اوچون بو دؤورون تاريخي و تاريخي ليدئرلري تحريف ائديلميش، م.ا.رسولزادنين آدي ايسه تاريخ کيتابلاريندان سيلينميش، آرا-سيرا «عکس اينقيلابچي»، «موساواتچي»، «خالق دوشمني» کيمي ايفاده‌لرله آدي کؤلگلنميشدير.

دونيايا گلديگي آذربايجان دياريندا «عصريميزين سياووشو»، «چاغداش آذربايجان تاريخي»، «چاغداش آذربايجان ادبياتي»، «بؤيوک آذربايجان شاعيري نيظامي» آدلي اثرلري يالنيز 1991-جي ايلده آذربايجان روسييا ايمپئريياسيندان قوپدوقدان سونرا يايينلانميشدير.

گؤرکملي موتفککير، آذربايجان خالقينين لياقتلي اوغلو م.ا.رسولزاده نين آذربايجانين ايستيقلاليتي موناسيبتي ايله گله‌جک نسيللره دئديگي تاريخي کلاملاري وار. بونلاردان بيري گنجلييه موراجيعتدير: «اي گنجليک. سنين عوهده نده بؤيوک بير وظيفه وار. سندن اولکي نسيل يوخدان بير بايراق، موقدس بير ايدئال رمزي ياراتدي. اونو مين مشکلاتلا اوجالداراق دئدي کي، بير کره يوکسلن بايراق بير داها ائنمز».

28 ماي 1918-جي ايلده آذربايجاندا قورولان موستقيل آذربايجان دؤولتينين 2018-جي ايلده 100 ايلليگي ياخينلاشير. هله کئچن عصرده م.ا.رسولزاده دئميشدي: «28 مايدا آذربايجان اوفوقلرينده آچيلان ميللي بايراق تکرار او دوغما يورد اوزرينده آچيلاجاق شهيدلريميزين قاني يئرده قالماياجاق، حرريته قوووشاجاغيق».

1992-جي ايلدن موستقيلليگيني ياشايان آذربايجان دؤولتي «اينسانلارا حرريت، ميلتلر ايستيقلالي» دئين م.ا.رسولزاده نين سؤيله‌ديگي گئرچکليگين عياني ثوبوتودور.