یاشام اوچون پسیکولوژی بیلگیلر

دکتر حسین شرقی دره جک سوی تورک

Yaşam üçün psikologi bilgilər

Dr.HÜSEYN ŞƏRQİDƏRƏCƏK SOYTÜRK

 

چوخ دا غيري-عادي اولمايان ايشلرينيزي تعريفله‌مکدن چکينمگين.

هر ايشي گؤرمک ايسته‌ييرسينيز، بيرينجي نؤوبه‌ده اونو ياخشي بيلمگينيزي لازيمدير. بو بيليک سيزه ياخشي حيس لر وئره بيلر. گؤردويونوز ايشلرده اونو اينجه‌ليکلرينه قدر بيلديکده سيزده داخيلي راحاتليق يارادا بيلر.

 

 سودون فايدالاريني ياخشي بيلين.

آنالاردئيير کي، سود دينجليک و راحاتليق منبعييدير. سودده کالسيوم مادده‌سي اولدوغونا گؤره او عضله‌لره راحاتليق بخش ائدير. همچنين سودده آمين تورشولاري اولدوغونا گؤره تريپتوفان مادده‌سي ياراداراق ساکيتليک منبعيينه چئوريلير.

 

بربزکلي پالتارلار گئيينين!

باجارديقجا اوشاقلارينيز کيمي رنگارنگ و بربزکلي پالتار گئيينين. چونکي بو طرز گئييم سيزي قاپاليليقدان سربستلييه گؤتوره‌جکدير و حياتينيزا اوشاق حياتي قدر سئوينجلي آنلار و رنگلر قاتاجاقدير.

اؤزونوزه تلقين ائدين کي، سيز اينانيرسينيز.

بوتون چتينليکلره رغمن اؤزونوزو ائله گؤسترين کي، سيز راحات و دينجسينيز. بئله‌ليکله، اؤز داخيلي «من»ينيزي (ائگو) آلداداراق اؤزونوزده راحاتليق ياراداجاقسينيز.

 

ککليک اوتو چايي ايچين.

بو چايين ايچيلمه‌سي سيزده مؤعجيزه وي دينجلمه حيسي ياراداجاق و بو حيسي اوزون ساعاتلار ياشاماغي اؤزونوزه مشق ائدین و «من چوخ راحاتام» دئيين.

 

گؤردويونوز ايشلري چوخ اهميتلي حساب ائدين.

گؤردويونوز هر ايشي اهميتلي حساب ائده‌رک اؤزونوزو بؤيوتمگي باجارين. باشقالارينين اهميييتسيز ايشلريني بؤيوتدويونوز زامان اؤز اهميتلي ايشلرينيزي کيچيلتميش اولورسونوز. اونا گؤره ده بيرينجي نؤوبه‌ده اؤز ايشينيزي اهميتلي بيلين و اونون دوزگون باشا چاتديريلماسيندان ذؤوق آلين.

 

داوا-دالاشدان چکينين.

گونده‌ليک حياتدا ديلده اولسا دا بئله باشقالاري ايله داوا-دالاش باش وئرير. آنجاق بو فيکيردن اؤزونوزو يايينديرماق اوچون ديقتينيزي باشقا يؤنه سؤوق ائتمگينيز لازيمدير. مثلا، داوا-دالاش اولان يئرده قارشي طرفه ديقتي يؤنلتمک عوضينه اولدوغونوز يئرده بير گول دوکانينيا، ياخود باشقا صنعت اثرينه فيکرينيزي يؤنلدين.

ساچلارينيزي يوماقدان ذؤوق آلين.

باجارديقجا ساچلارينيزي طبيعي مادده‌لر واسيطه‌سيله يويون و سونرا اونلاري بارماقلارينيزلا سيغاللاياراق قو­رودون. بو ايش سيزه اينانيلماز درجه‌ده راحاتليق بخش ائده‌جک.

 

ماوي رنگلي اشيالارا باخماغي اونوتمايين.

ايشله‌ديگينيز يئرد، سفره گئتديگينيز يولدا و ياخود هر هانسي بير يئرده اولدوغونوز زامان ماوي گؤرونتولو اشيا و منظره‌لره باخين. چونکي بو رنگده اولان اعجازکار راحاتليق قايناغي سيزي تاماميله راحاتلادا بيلر.

 

سودا ايستيراحتدن ذؤوق آلين.

ايليق سو، راحات حامام، آز ايشيق و بؤيوک واننا، بير آز دا بيتکي ترکيبلي عطيرلي مادده‌لر، او جومله‌دن گولاب، نعناع قوخوسو سيزه دوش آلديينيز زامان فراح و راحاتليق حيسي ياشاداجاقدير.

 

هر زامان دينج مکاني سئچين.

يولا چيخمادان اؤنجه عاغلينيزا قويدوغونوز گؤزل بير مکاني اؤزونوز اوچون جنّت ساياغي تعريفله ين و بو جنّته چاتماق اوچون اؤز داخيلي منينيزي آلدادين. بو آلداتما حقيقتن ده سيزي عاغلينيزداکي توتدوغونوز يئره چاتديغينيز زامان سون درجه راحاتلاشديراجاق و جنّت منظره‌سيني روحونوزدا ياراداجاق.

 

ايشدن نه واخت ال چکه‌جگينيزي بيلين.

صبر، دؤزوم و پروبلئملري حلل ائتمک چوخ ياخشي شئيدير. آما هر شئيين بير ديري واردير. اگر بير ايشي، ياخود بير پروبلئمي حلل ائتمک سيزين روحي تارازليغينيزي پوزاجاقسا، درحال اوندانل چکمگينيز مصلحتدير. باشقا ايشه باشلاماق داها ياخشي اولار.

 

اولدوغونوز هر يئرده گؤزلليک يايين.

هر بير اينسان ايستر و ايستميه‌رکدن موختليف يئرلرده اولماق مجبوريتينده‌دير. آنجاق هارادا اولوروقسا اولاق اورادا گؤزلليکلر موطلق واردير. اوراداکي اولان گؤزلليکلري روحوموزا هوپدوراراق اؤزوموزو گؤزلليک منبعيينه چئويرمه‌لييک.

 

باشقالاريني تعريفله ين.

باشقالاريني تعريفله‌ديکجه سيزده اؤزونوزه اعتيماد حيسي ياراناجاق. بو ايش سيزي راحاتلاداجاق. بئله‌ليکله، قارشينيزداکي اينسانين موثبت انرژيسيني آلميش اولاجاقسينيز.

 

آنلاري قييمتلنديرين و اونلاري سئوه‌رک ياشايين.

اولدوغونوز هر يئرده داها جوزي شئيلره ديقت يؤنلدين. مثلا، مئيوه‌لري داداراق حظ آلين، حزين و اينجه سسلري ائشيتمکدن ذؤوق آلين و بيلين کي، بو ايشلر سيزي راحاتلاداجاق.

بوتون ايشلري بيردن عؤهده نيزه گؤتورمه ين.

بيليريک کي، ايشلريميزي باشقالاري ايله بؤلوشدوکده بيزيم راحات و بوش واختيميز چوخ اولاجاق. بو ايش ايسه بيزيم گوجوموزو آرتيراجاقدير و نتيجه اعتيباريله ايشدن باشقا اؤزوموزه فيکيرلشمه‌يه شرايط ياراداجاقدير. اؤزوموزه فيکيرلشمک ايسه اؤزوزده راحاتليق حيسيني گوجلنديره‌جک.

 

بامزه اولماغا چاليشين.

ان آزي اؤزونوزله باريشيق وضعيتينده ياشايين. کدرلي شئيلري فيکيرلشمکدن چکينين. باشقالاريني دا اينجه و مزه‌لي سؤزلرينيزله تبسسومه وادار ائدين.

 

قاشلارينيزي طومارلايين.

خوصوسيله استرسلي آنلارينيزدا قاشلارينيزي طومارلايين. آلين ناحيه نيزي ساچلارينيزا دوغرو سيغاللايين.

 

هله ده واختيم وار.

هميشه اؤزونوزه دئيين کي، منيم لازيم اولان قدر واختيم وار. گونده‌ليک حياتدا گؤرمه‌يه ايمکان تاپماديغينيز ايشلري اونوتماقلا اؤزونوزه چوخلو واخت قازانا بيلرسينيز.

 

دييشيکلييه مئيللي اولون.

قبول ائتسک کي، دييشيکليک چتيندير، او قدر ده راحاتلاديجيدير. چونکي دييشيکليک خياليميزين و روحوموزون گله‌جکده‌کي راحاتلييميزدير.

باشينيزي قويوب ياتديغينيز ياستيغي ديقتله سئچين.

بوينونوزا (اوزون، قيسا) و چکينيزه گؤره ياستيق سئچين. هفته‌ده بير-ايکي دفعه ياستيغينيزا قيزيل گول و نانه عطيري چيلگين. او سيزه راحات يوخو بخش ائده‌جک.

 

آغلاماغي باجارين.

گونده بئش-آلتي داملا آغلاماق سيزي هم فيزيکي، هم ده فيکري اولاراق راحاتلادا بيلر. آغلاماغينيز گليرسه، اونون قارشيسيني هئچ واخت آلمايين. کيمسه‌نين سيزه نه دئيه‌جگيندن ناراحات اولمايين.

گونشين چيخماسيني و باتماسيني سئير ائدين، ياخود فيکرينيزده جانلانديرين.

گونشين باتماسيني سئير ائتمک بيزي قمگين ائتسه د، او بيزي راحتلاشديرا بيلر. اونا گؤره کي، گونشين باتديي زامان بيزيم گؤردويوموز رنگ چالارلاري دويغولاريميزي اويانديراراق حياتيميزا معنا قاتير، عيني زاماندا گونشين چيخماسيني سئير ائتمک اوندان ياييلان انرژي دولو رنگلي ايشيقلار بيزي بير گون داها ياشاماغا اوميديميزي آرتيرير. گونشين چيخماسي ايله اوميدله‌نيب و باتماسي ايله ايچيميزده ان گؤزل دويغو آنلاريني ياشاماغي باجارماغيميز لازيمدير.

 

رفتارينيزي دييشديرمگي باجارين.

عصبي باسقي آلتيندا اولدوغونوز زامان باشقا ايشلري گؤرمه‌يه جهد ائدين. گونده‌ليک اوتوردوغونوز يئرده اوتورمايين، گونده‌ليک گؤردويونوز ايشلري ده گؤرمگين و بئله عادت ائتديگينيز فيکيرلري ده فيکيرلشمه ين.

 

دوعا ائدين.

يارادانا اينانين و اونا ايناناراق راحاتليغا چاتماغي اونوتمايين. يارادانلا سيزين آرانيزدا دوعا ائتمک ان گؤزل واسيطه‌دير. دوعا سيزي راحاتلاداجاق، اؤزونوزه اينامينيزي آرتيراجاق، باشقالارينا قارشي ايسه سيزده موثبت دوشونجه طرزي ياراداجاق. حساب ائتسک کي، هاميميز يارادانين گؤزونده برابريک، اوندا کيمسه‌دن اوستون اولماديغيميزي يالنيز خيرخواه عمللريميزله فرقلنديگيميزي بيلديکده دوعانين نه قدر بيزه وئرديگي معنوي روح يوکسکليگيني ياشامين ذؤوقونو چيخارا بيله‌جه يک.

 

 

ايشيقلاري يانديرين، سؤندورون.

بيلديگينيز کيمي، ائو و ايش يئرلرينده ايستيفاده اولونان ائلئکتريک و ائلئکترون آوادانليقلاري اينساندا استرس ياراتديراراق روحي گرگينلييه گتيريب چيخارير. اونا گؤره ده اونلاري آرا بير يانديريب سؤندورمگينيز سيزده راحاتليق حيسي ياراداجاق.

 

 

گونش دوغمادان يوخودان قالخين.

دونيادا روحن بؤيوک اينسانلار، يوقا ايشچيلري، ايدمانلار و بير چوخ ساحه نين عاليملري گونش دوغمادان يوخودان دورماغي ترجيح ائدرلر. اونون ايکي سببي وار: 1) قارانليق گئجه‌نين بيزه يوکله‌ديگي منفي انرژينين دان يئري آغارارکن روحوموزدان چکيليب گئتمه‌سي، 2) گونشدن دوغان موثبت انرژيني روحوموز و جانيميز واسيطه‌سيله قبول ائتمه‌ميز.

 

دنيز کنارينا گئتمگي و دالغالاري سئير ائتمگي اونوتمايين

دنيزي سئير ائدرکن اونون لپلرينين موسيقيلي سسلريني دينلیين. بير داها دينلیين و گؤزونوزو سونسوزا قدر دنيزي گؤرمه‌يه ديکين. ماوي رنگ و دالغالارين موسيقيلي سسي امين اولون کي، سيزين راحاتلاماينيزا سبب اولاجاقدير.

 

اورک سؤزلرينيزي دئمگي باجارين!

چوخ واخت بير چوخ پروبلئملريميزي حلل ائده بيلميريک. اونلاري اورگيميزده درد ائده‌رک ياشاماقدانسا، بيزي ائشيدن بير ياخشي قولاق وارسا، اونا دئيه‌رک دردلريميزي حلل ائتميش کيمي ياشاماغي بيلمه‌لييک.

 

بير پسيکولوق، بير گؤزلليک موتخصيصي ايله تانيش اولسانيز سيزين اوچون فايدالي اولار.

 

سئچيمينيزي بيلرکدن ائدين.

بير ايشي گؤرمک اوچون موختليف سئچيم قارشيسيندا قالماينيز سيزي منفي انرژي ايله يوکله‌يه بيلر. اونا گؤره ده ايشينيزي اؤنجه‌دن هانسي يولا حلل ائده‌جگينيزي اؤزونوز اوچون تثبيت ائتميش اولون.

 

ترله یين.

فيزيکي ايشلري گؤرمکدن چکينمیين. چونکي او سيزده منفي عصب گرگينليکلريني آرادان قالديرار. ترله‌ديکجه اؤزونوزده خوش حيسلر ياشاياجاقسينيز. چاليشين آلين حيصه نيز ترله‌سين و اوندان سونرا 20 دقيقه بوتون ترله‌مه‌سي اوچون فعاليت گؤسترمگينيز لازيم و سونرا دريندن نفس آلين و راحاتلايين.

 

کلمه‌لري آچيق-آيدين دئيين.

عصبلشديگينيز زامان سؤزلرينيزين ريتميني قاريشديريب تئز-تئز دانيشماقدان اوزاق دورون. چونکي تئز-تئز دانيشماق سيزده تنفس پروبلئمي ياراداراق داها گرگينلشديرر. اونا گؤره ده سؤزلرينيزي بير-بير و راحاتجا آنلاتماغي اونوتمايين.

 

آليش-وئريشه گئتمه‌دن اؤنجه فيکيرلشين.

اؤزونوزو بورجا سالمايين و اونون نتيجه‌سي اولاراق عصبي گرگينليک ياشاماياسينيز دئيه آليش-وئريشه گئتديگينيز زامان نه آلاجاغينيزي اولجه‌دن بيلمگينيز مصلحتدير.

يونگول يئمکلر يئيين.

ايسته‌ييرسينيز کي، راحات ياشاياسينيز، ميوه، تره وز، قاتيق، سود، يومورتا، آرپا و بوغدا، لوبيا، بادام فينديق، قوز، پوسته و ديگر بيتکي منشالي محصوللاري ايستيفاده ائدين.

 باشينيزدان موغايات اولون.

بوتون عصبي تضيقلر باشيميزين ايچينده گئدن عصبي پروسئسلرله باغليدير. اونا گؤره ده دوشونجه و تصوورلرينيزي ياخشي و موثبته دوغرو باشينيزين ايچريسينده تنظيمله‌يه بيلمه‌سه نيز راحاتليغا چاتا بيلمزسينيز.

 

گوللري و چيچکلري قوخولايين.

بعضي اييلر هورمونلارين آرتماسينا سبب اولور و بو دا بئيينده سئروتينين چوخالماسينا گتيريب چيخارير. بو ماددنين چوخلوغو بيزده راحاتليق حيسي يارادير.

 

موقدس مکانلاردا اوتورون.

اينانسانيز دا، اينانماسانيز دا موقدس مکانلارا گئدين (مسجيد، کيلسه و ب.) و اورادا بير گوشه‌ني سئچين و راحاتجا دينجه‌لين. امين اولون کي، بو سيزه چوخ گؤزل حيس لر وئره‌جک.

 

آرابير داماغينيزا باسين.

هر بيريميز هيجانلانماغي بيليريک. اونا گؤره ده آغيز و داماق عضله‌لريميز ييغيشا بيلر. بو عضله ييغيشمالاريني آرادان قالديرماق اوچون ديشلرينيزين آرخاسينا و داماينيزا ديلينيزله باسين.

 

باجارديغينيز قدر شهري ترک ائدين.

بير اوجقار کندين طبيعتينده گزمگينيز شهرينيزين ان گؤزل بولوارلاريندان داها لذتليدير. گؤرمه مسافه نيزين شهر خاريجينده داها چوخ اولماسي سيزه روحي راحاتليق گتيره‌جک. داغلاري و تپه‌لري سئير ائتمک ماشينلاري و هوندور بينالاري سئير ائتمکدن داها گؤزلدير.

 دنيز کناريني سئچين.

قوملارين اوزرينده اولان داشلاري گؤتورون و وار گوجونوزله دنيزه آتين. قوملارين اوزرينده يئرييرکن قوما باتين. هردن بير آياغينيزي يارغانلارين اوستونه قوياراق اوچوب-دوشمه هيجاني ياشايين.