آغابگيم آغا حاقيندا نه بيليريک AĞABƏYİM AĞA HAQQINDA NƏ BİLİRİK

پروفسور معارفعه حاجی اف

PROF.Dr.MARİFƏ HACIYEVA

 

 

ادبيات تاريخيميزين هله ده ايندييه قدر هئچ آچيلماميش و يا آچيلميش صحيفه لري واردير کي، اونلاري آرالاييب-آختارماق، تدقيق و تحليل ائديب خالقا چاتديرماق خيدمت، قايغي و خئرخواهليق ايفادهسي اولماقلا، اصيل وطنداشليق بورجو، ميللي-معنوي ديرلر، خالقين تاريخي وارليغينا احتيرام و سئوگينين ايفادهسيدير.

ادبياتيميز اؤز ياراديجيليقلاري ايله نه قدر زنگين و درين کؤکلره صاحيب اولسا دا، اونون ياراديجيلارينين موعين تاريخي سببلر اوزوندن ايتيب-باتميش، يازييا آلينميش و يا آلينماميش ادبي نومونهلريني يارادان شخصيتلرينه دؤنه-دؤنه موراجيعت ائديب اونلاري آراشديرماق، اؤيرتمک و تقديم ائتمک لازيم گلير.

بئله آراشديرمالار مدنيت، ادبيات تاريخيميزه قييمتلي هديه اولا بيلر.

اون سککيز عصر آذربايجانين خانليقلار دؤورو و اون دوققوز عصرده آذربايجانين ايستيلا ائديلمهسي دؤورونده چوخلو قارانليق مقاملار و بو قارانليقلار ايچينده ادبي سيمالار دا مؤوجوددور کي، بونلارين بير قيسمي ادبيات تاريخينه يا هئچ تقديم ائديلمهميش، يا آز و يا دوغرو-دوروست تقديم ائديلمهميشدير.

معلومدور کي، نادير شاه افشارين (1688-1747) اؤلدورولمهسيندن سونرا اونون قوردوغو ايمپئرييا داغيلماغا باشلادي و ايران، اورتا آسيا و آذربايجاندا موستقيل و ياريم موستقيل خانليقلار ياراندي. واحيد ايقتيصادي و سياسي مرکز اولماديغي اوچون داخيلي ايليشکيلري ده ضعيف اولان آذربايجان تورپاقلاري اون سککيز عصر بويونجا اون سککيز خانليق و بئش سولطانليغا بؤلونهرک موستقيلليگيني ايتيرميشدي. روسيا و ايران ساواشلارينين مئيدانينا چئوريلميش آذربايجان خانليقلاري بو سببدن ضعيف دوشموش، ايستيلايا معروض قالاراق آراز بويو ايکييه بؤلونموشدور.

جمعي 49 ايل عؤمور سورن (1782-1831)قاراباغ خاني ايبراهيم خليل خانين قيزي آغابگيم آغانين طالعيينه بو کئشمکئشلي بؤلونمهنين آجي نتيجهلري ده يازيلدي.

1782-جي ايلده قاراباغ خانليغينين پايتاختي شوشادا دونيايا گؤز آچان، 1831-جي ايلده ايرانين قوم شهرينده دونياسيني دييشن قاراباغ خاني ايبراهيم خليل خانين قيزي ايران شاهي فتحعلی شاه قاجارين قانوني زؤوجهسي اولموش و اون سککيز-اون دوققوز عصر آذربايجان و ايران ادبياتيندا يئتيشميش فيطري ايستعدادي، عاغلي، ذکاسي، گؤزلليگي و غئيرتي ايله ديللر ازبري اولان بير شاعيره خانيمين ايتيب-باتميش پوئزييا اينجيلريني آراييب اوزه چيخارماق، اونون حاقيندا بيلينن و بيلينمهين حقيقتلري شرح ائديب دؤورون تاريخي و ادبي سالنامهسينه نظر سالماق مقصديله يولا چيخاراق ايندييه قدر يازيلميش و دئييلميش فيکيرلري، اوخودوغوموز کيتابلاري بير داها ورقلهديک. بو قناعته گلديک کي، او، فيطرن ايستعداددير، اديبدير، ناطيقدير، هم ده بير وفا سيموولودور. بئله بير تاريخي شخصيتي اؤيرنمک، يئني نسله اونو بير داها تانيتماق ميللي-معنوي ديرلريميزه بير حؤرمت و احتيرامدير.

اون سککيز-اون دوققوز عصرلرده آذربايجانين باشقا خانليقلاري کيمي قاراباغ خانليغي دا ايران و روسيا آراسيندا ساواش مئيدانينا چئوريليردي. «آغابگيم آغا جاوانشير» اثرينين مؤليفي مهريبان وزيرين يازديغي کيمي «ايران شاهلاري قاراباغي قافقازين قاپيسي سايير و آزاجيق گوجلنن کيمي بو قاپيدان ايچري سوخولماق ايستهييرديلر».

«قافقازا آياق آچميش روسيا ايسه قاراباغي ايرانين قاپيسي سايير و اورتا شرقه مئيدان اوخوماق اوچون بو قاپيني اله کئچيرمک ايستهييردي» (باخ: مهريبان وزير. آغابگيم آغا جاوانشير. باکي، 2016، ص. 40).

ايراندا شاهليق ائدن قاجارلار اؤزلريني قاراباغلي ساييرديلار. ايراندا شاهليق تاجينا صاحيب اولاناغا محمد شاه قاجار قاراباغا 1975 و 1997-جي ايللرده ايکي دفعه يوروش ائدير. بيرينجيده قاراباغ خاني ايبراهيم خانين قارداشي اوغلو، جسور سرکرده محمدبي جاوانشير طرفيندن مغلوب اولوب، گئري دؤنمهيه مجبور اولور. 1997-جي ايلده ايسه قاراباغي اله کئچيرن محمد شاه قاجار شوشادا اؤلدورولور. منبعلرده يازيلير کي، «شوشا اهلي و بوتون کوللو قاراباغ قاجار شاهين قطعليني محمدبگين اياغينا يازميشدي» (باخ: مهريبان وزير. آغابگيم آغا جاوانشير. باکي، 2016، ص. 95).

آغا محمد شاه قاجار 1897-جي ايلده شوشادا قتله يئتيريلديکدن سونرا قارداشي اوغلو و واريثي فتحعلی شاه ايراندا سلطنت صاحيبي اولور. او، قاراباغ خاني ايبراهيم خانا مکتوب گؤندريب عميسينين قاتيللريني طلب ائديردي. بو مکتوبدا ايبراهيم خليل خانين قارداشي اوغلو محمدبي جاوانشيرين ده آدي واردي. فتحعلی شاه اونو قولوباغلي ايران شاهينا تحويل وئرمگي طلب ائديردي.

محمدبگين علئيه دارلاري ايبراهيم خاني اينانديرماغا چاليشيرديلار کي، يا محمد بيي شاها تحويل وئرمهليسن، يا دا شاهلا دوشمنچيلييه گئتمهليسن. ايبراهيم خليل خان اونو شاها تحويل وئرمگي ائل ايچينده بؤيوک تؤهمت ساييردي. اونون قاراباغدان اوزاقلاشماسيني ايستهدي و بونونلا دا نادير شاها محمدبگين فرار ائتديگيني دئيهجکدي. خانين بو تکليفي محمدبهيه چاتديريلير. او، قاراباغي ترک ائدير.

فتحعلی شاه و ايبراهيم خان آراسيندا سياسي سؤودشمهلر نتيجهسينده فتحعلی شاه قاجار قاراباج خاني ايبراهيم خليل خاندان قيزي آغابگيم آغانين حرمخاناسينا گؤندريلمهسيني طلب ائدير. ايبراهيم خان 1800-جو ايلده 200-دن آرتيق خيدمتچيسي ايله قيزيني تهران سارايينا گؤندرير. شعير يازماق سريشتهسي اولان شاعير طبيعتلي آغابگيم آغا عميسي اوغلو محمد بيي سئوسه ده، عؤمرونون سونراکي ايللريني فتحعلی شاهين ساراييندا شاهين سئويملي «شاه بانو»سو («شاهخانيم») اولاراق ياشايير. دئييلنه گؤر، شعيرلريني چوخ واخت «آغاباجي» ايمضاسي ايله ده يازير.

قاراباغين جاوانشير نسليندن اولان قاراباغ خاني ايبراهيم خليل جاوانشيرين قيزي، 1800-جو ايلدن ايران شاهي فتحعلی شاه قاجارين «شاه بانو»سو آغابگيم آغا جاوانشيرين ايندييه قدر يادداشلاردا ياشاييب و آفوريزمه دؤنن بير-ايکي ميصراعسي و ديگري ده باياتيدان اولان ايکي شعيري وار کي، بو شعرلري بوگون ده حافظهلرده ياشايير.

آغابگيم آغانين آفوريزمه دؤنموش مشهور

 

افسوس کي، ياريم گئجه گلدي، گئجه گئتدي،

هئچ بيلمهديم عؤمروم نئجه گلدي، نئجه گئتدي

 

بئيتينين گنجليگينده درين محبتله سئوديگي عميسي اوغلو محمدبي جاوانشير اوچون دئييلديگي سؤيلهنيلمکدهدير.

بير روايته گؤره گؤزل آغابگيم آغا گنج ياشلاريندا عمیسی اوغلو، ايگيدليگي و مردليگي ايله آد قازانميش، گؤزل قامتلي محمدبي جاوانشيره عاشيق اولور. محمدبي قاراباغ خانليغيندا قوشونا باشچيليق ائديرميش. او، بير گئجه واجيب بير مسله اوچون شوشاي عمیسی ايبراهيم خانلا گؤروشور، همين گئجه ده گئرييه - دؤيوشن قوشونون يانينا قاييدير. گؤزو يولدا اولان آغابگيم آغا همين بيتي سؤيلهيير.

باشقا بير منبعده - يازيچي-ژورناليست صابير گنجهلينين «هر سطيرده بير تاريخ» کيتابيندا ايسه اوخويوروق: «دئييلنه گؤره زفاف گئجهسينده فتحعلی شاه آغا بييم آغا ايله قيسا صؤحبتدن سونرا اوتاقدان چيخيب گئتميشدير. گويا آغابگيم آغا دا بو حاديثه دن عصبلشهرک قاراباغدان اؤزو ايله گلميش دستهنين باشچيسينا گؤستريش وئرير کي، آتاسينين ائوينه قاييتماق اوچون حاضيرليق گؤرسون. شاه بو خبري ائشيتديکده چوخ حيددتلهنير و اونون قاراباغا گئتمهسينه ايجازه وئرمير. آغابگيم آغا سحريسي گون فتحعلی شاها شيکايتله دولو مکتوب يازير و مکتوبون يوخاريسينا بير قزليني علاوه ائدير. همين قزلدن آنجاق آشاغيداکي ميصراع يادداشلاردا قالير:

افسوس کي، ياريم گئجه گلدي، گئجه گئتدي،

هئچ بيلمهديم نئجه گلدي، نئجه گئتدي. (ص. 36).

آغابگيم آغانين ايندي ده ديللر ازبري اولان ايکينجي شعري ايسه آشاغيداکي باياتيدير:

عزيزيم قاراباغ،

شکي، شيروان، قاراباغ،

تهران جنّته دؤنسه،

ياددان چيخماز قاراباغ.

بو مشهور باياتيدا قاراباغ، تهران، شکي، شيروان آدلارينين بير باياتيدايفاده ائديلمهسي چوخ دوشوندوروجودور.

وطنی قاراباغدان ايستگي اولمادان سياست نامينه زورلا تهرانا - شاه سارايينا گؤندريلن آغابگيم آغا اوچون فتحعلی شاه تهراندا جنّت ميثاللي بير گؤزلليک ياراتسا دا، او، يئنه عزيز وطن اولان قاراباغي دوشونور، شکي و شيرواني دا خاطيرلاماغي اونوتمور. چونکي اونون ناکام محبتي عمیسی اوغلو محمد جاوانشيري ايبراهيم خليل خان تاخت-تاج حريصليگيندن يارانان قيسقانجليغي نتيجهسينده سیاستله قاراباغدان شکي خانليغينا فرار ائتديريلميشدي. شکي خاني کور محمدحسن خانين خيانتي ايله محمد جاوانشيرين شيروان خاني موصطافا خانا گؤندريلمهسي و موصطافا خانين اينتيقامچي جينايتي نتيجهسينده اونون قتله يئتيريلمهسي آغابگيمين هله قاراباغدا اولدوغو گونلرده باش وئرميشدي. بو، آمانسيز حاديثه شاعير طبيعتلي آغابگيم خانيمين هئچ ياديندان سيلينرديمي؟ بيزجه، باياتيدا آذربايجان خانليقلاريندان ايکيسينين - شکي و شيروانين آدينين چکيلمهسي ده تصادوفي دئييل. ائله «قاراباغ شيکستهسي» ده بلکه ائله بو مشهور باياتينين اووقاتيندان يارانيب يانيقلي بير سيمفونييايا دؤنوب.

زمانهسينين ذکالي و عاغيللي خانيمي، مودريک کلاملاري ايله ديقتچکن آغابگيم آغا حاقيندا بير چوخ منبعلرده معلوماتلارا راست گلينير. بونلاردان بيري روس سياحي پ.کووالئوسکينين «зاписки او грузии» («گورجوستان حاقيندا قئيدلر») اثريندهدير. اثرين «قاراباغ» باشليغي حاقيندا اولان فصلينده کووالئوسکي آغابگيمين چوخ عاغيللي اولدوغونو، ايراندا آدينين حؤرمتله «آغابگيم» دئيه چاغيريلديغيني، اينگيليس کرالي بير گئورقون ايرانا گلديگي زامان اونونلا گؤروشدويونو قئيد ائدير.

باشقا بير معلومات خان قاراداغينين تذکيرهسينده وئريلميشدير. قاراباغي اؤز تذکيرهسينده آغابگيم آغانين شوشادا آنادان اولدوغونو، ايراندا قريبليک حياتي کئچيرديگيني و تخمينن 50 ياشيندا وفات ائتديگيني قئيد ائدير و آذربايجان ديليندهکي شعرلريندن قاراباغ حاقيندا دئديگي آشاغيداکي جيناس باياتيسيني ميثال چکير:

من عاشيقم قاراباغ،

قارا سالخيم، قارا باغ.

تهران جنّته دؤنسه،

ياددان چيخماز قاراباغ.

آغابگيم آغا جاوانشير حاقيندا باشقا بير معلوماتا دا پروف. فيض الله قاسيمزاده نين اثرينده راست گليريک. ف.قاسيمزاده منبع اولاراق پ.کووالئوسکينين اثرينه ايستيناد ائدير و آغابگيم آغانين حياتينا عاييد معلوماتين همين اثرده يئر آلديغيني ديقته چاتديرير. پروف. ف.قاسيمزاده آغابگيمين مشهور باياتيسيني دا ميثال گتيرهرک، اونون اوستاد قلمينه ايشاره اولاراق يازير کي، بو باياتيدان آغابگيمين اؤز موعاصيرلري آشيق پري، محمدبي عاشيق کيمي شيفاهي خالق ياراديجيليغيندان ايستيفاده ائدهرک آشيق شعري سپگيسينده يازديغي معلوم اولور.

آذربايجاندا آغابگيم آغا حاقيندا آراشديرمالار آپارميش عاليملردن بيلر محمدوو 1989-جو ايلده يازديغي «ناتوانين شاعير قوهوملاري» کيتابيندا اون دوققوز عصرده ياشاميش شوشا خاني مئهريبان خانيم قيزي و «خان قيزي» آدي ايله مشهور اولان خورشودبانو ناتوان (1832-1987) حاقيندا معلومات وئرمکله، ناتوانين بيبيسي آغابگيم آغانين آنا ديلينده و فارس ديلينده شعرلرينين اولدوغونو يازير.

آغابگيم آغا حاقيندا آراشديرما آپاران بيلر محمدوو بو کيتابيندا 18 ياشلي آغابگيم آغانين وطنيله ويدالاشيب تهرانا يولا دوشمزدن اول وطني شوشايا يازديغي فارس ديليندهکي آشاغيداکي روباعيسينين اولدوغونو يازير. بيلر محمدوو همين روباعينين فارسجاسيني و آذربايجان ديلينه ترجومهسيني ده وئرميشدير. روباعينين فارسجاسيني بيلر محمدوو کيتابيندا بئله تقديم ائدير:

 خرم اون که به سر کوی تو جاي دارد،

که سر کوي تو خوش آب و هوای دارد.

 

به صفر رفت دلم شد جرهسي نافله او،

رسم اينست که هر آنچه دارای دارد.

 روباعينين ترجومهسيني ايسه بيلر محمدوو بئله تقديم ائدير:

سنده مسکن سالان نه بختيياردير،

صفالي قوينون، خوش آب-هاوان واردير.

دوهنين بوينوندا صفره چيخان،

زنگ کيمي کؤنول ده سنه باغليدير.

 (باخ: آدي کئچن کيتاب، ص. 14)

بيلر محمدوو همين کيتابيندا شيرين صؤحبتلري يوکسک اينتئللئکتي، ظريف رفتاري ايله آغابگيم آغانين ايران شاهي فتحعلی شاه قاجاري اؤزونه رام ائتمهسيندن، 1814-جو ايلده اينگيلتره کرالي بير گئورقو يوکسک سليقه و ادب قايدالاري ايله قارشيلاماسينا گؤره اونو کرال موکافاتينا لاييق گؤرمهسيندن صؤحبت آچير. اونون کدرلي ميصراعلارينين شخصي فاجيعه سي ايله علاقه دار اولدوغونو يازير.

بيلر محمدوو آغابگيم آغانين فارسجا يازديغي بير نئچه ميصراعني آذربايجان ديلينه ترجومه ائتميش و بو ميصراعلاري محمد حسن آغانين «خیرات الحجان» کيتابيندان گؤتوردويونو يازير. همين ميصراعلار بئلهدير:

 چوختم از آتشين قم، نصیحتا کي ز مني،

ميزني بر آتشم دامن برو، خاموش باش.

تا حشر نويسند اگر مي نشوند کي،

نه دفتري حسن تو، نه طومار فراقت.

بيلر محمدوو همين ميصراعلارين آذربايجان ديلينه سطري ترجومهسيني ده وئرميشدير:

 يانيرام قم اودونا، نصيحت بونجا يئتر،

سن اتگينله بو اودو آليشديريب گئت، ساکيت اول.

تا قييامته قدر يازيلسا قورتارماز،

نه سنين گؤزلليگينين دفتري، نه منيم آيريليغيمين حکايتي. (باخ: بيلر محمدوو.«ناتوانين شاعير قوهوملاري».باکي: يازيچي، 1989، ص. 16).

 بيلر محمدوو آراشديرما نتيجهسينده موعين ائتميشدير کي، آغابگيم آغانين فارسجا يازديغي بير فخريييهسي سحو اولاراق آغابگيم آغانين موعاصيري اولان گؤوهر آغانين (1796-1888) آدينا يازيلميشدير. حالبوکي همين فخريييه آذربايجان اليازمالاري فونوندارفده آغابگيم آغانين آدينا ايستينادن ساخلانيلير. تدقيقاتچي همين فخريييهني آذربايجان ديلينه ترجومه ائديب 12 يانوار 1977-جي ايلده «باکي» قزئتينده نشر ائتديرميشدير. همين فخريييه بئلهدير:

اگر کولهيه وئرسم زولفي-عنبرفيشاني،

سالار تورونا بير-بيري صحرا آهولاريني

 

 ايستسم سيرنه چيخان گونون خوش بير چاغيندا،

بوتون عاشيقلرينين گؤيه چيخار افقاني.

بو نرگيز گؤزلريمه سورمه چکهسي اولسام،

باتيرارام توزونا تامام جومله-جاهاني.

 

کيفايتدير بير شيوم، مين اؤلويه جان وئر،

اعجازيملا سالام حئيرته مسيحاني.

 اگر دوشسه گوزاريم بير زامان کليساي،

ايمانه گتيررم او کافر قيزلاريني.

 

يئريشده ککلييم من، اوچاندا دا شاهبازام،

بير قارنيمدا اوولارام پاديشاهي-اونقاني.

(باخ: بيلر محمدوو، ص. 17-18).

 گؤرکملي تدقيقاتچي-عاليم، پروفسور عزيزه جعفرزاده «آذربايجانين آشيق و شاعير قادينلاري» آدلي کيتابينين بير جيلدينده و «آذربايجان قادين شاعيرلري آنتولوگيياسي» (باکي، آوراسیا پرئس، 2005) کيتابيندا آغابگيم آغانين فارس ديلينده شعرلرينين اولدوغونو و آذربايجان ديلينده هلهليک بير باياتي و بير قزليندنمتله بيتينين علم عالمينه بللي اولدوغونو ايفاده ائدهرک يازير کي، «آذربايجانجا بير باياتيسي و بير قزليندن مطلع بيتي قالميشسا دا، فارسجا شعرلريندهکيروانليق، يوکسک بديعي کيفيت اوندان قابيليتلي بير شاعيره کيمي بحث ائتمهيه ايمکان وئرير» (باخ: «آذربايجان آشيق و شاعير قادينلاري». باکي، 1974، ص. 20-21).

عزيزه جعفرزادنين آغابگيم آغايا ايستيناد ائتديگي باياتي و ايکي ميصراع يوخاريدا وئرديگيميز نومونهلرده قئيد اولونان شعرلردير.

عزيزه جعفرزاده نين «آذربايجان آشيق و شاعير قادينلاري» کيتابيندا آغابگيم آغانين آذربايجان ديلينه ترجومه ائديلن آشاغيداکي شعري ده وئريلميشدير.

او کس بختوردير کي، خوشبختدير کي، اي جانان،

اؤزونه منزيل ائديب ياخين يئرده باغيندان.

 

سنين او گول باجچانين عطيرليدير هاواسي،

منيم ده بو کؤنلومون يالنيز اودور داواسي.

او صفره چيخاندا من غوصه يه دالارام،

دوهسينين بوينوندا اؤزوم بير زنگ اولارام.

2008-جي ايلده باکيدا نشر اولونان، مؤليفلري ميلت وکيلي ملاحت حسنووا و شرف جليلي، اؤن سؤز مؤليفي آکادئميک راميز مهدييئو اولان «آذربايجان ميللي دؤولتچيليک تاريخينده قادينلار» آدلي فوتو-آلبومدا دا آغابگيم آغايا خيلي يئر وئريلميش، آغابگيمين فتحعلی شاه قاجارين سارايينا گؤندريلمهسينين سببي آشاغيداکي شکيلده آچيقلانميشدير: «شاه ايسماعيل ختایي، قوبالي فتحعلی خاندان سونرا بوتؤو آذربايجان ايدئياسي ايله چيخيش ائدن آغا محمد شاه قاجار ايدي. اونون اؤلوموندن سونرا قاراباغي ايشغال ائدن فتحعلی شاه قاجار بوتؤو آذربايجان سیاستيني ياريمچيق قويدو. فتحعلی شاه قاجار قاراباغ خاني ايبراهيم خليل خاندان هر ايکي طرفين خاطيرجمليگي اوچون قيزي شاعيره آغابگيم آغانين شاهين حرمخاناسينا گؤندريلمهسيني طلب ائدير. آغابگيم آغا 200-دن آرتيق خيدمتچيسي ايله تهران سارايينا گؤندريلير» (ص. 123).

يئنه همين کيتابدا اوخويوروق: «دئييلنه گؤر، آغابگيمين فيطري ايستعدادي، قنيرسيز گؤزلليگي، سه گاهي، قاراباغ شيکستهسيني يانيقلي-يانيقلي اوخوماسي، خالق ماهنيلارينا اؤزونمخصوص خاللار علاوه ائتمهسي فتحعلی شاهي قاراباغ گؤزهلينين اؤنونده قولوباغلي قولا چئويرير» (ص. 124).

يئنه همين کيتابدا 1811-جي ايلده اينگيلترهنين ايرانا تعيين ائتديگي سفير سر اوزئرلينين واسيطهسيله اينگيلتره کرالي و کراليچاسي آديندان آغابگيم آغايا آلمازلا ايشلنميش آرخاليق باغيشلانيلديغي قئيد اولونموشدو.

بو فوتو آلبومدا آغابگيم آغانين حاقيندا معلوماتلارا رغمن اونون شعرلريندن نومونهلره راست گليريک.

يازيچي-ژورناليست عاليم سابير گنجهلي «هر سطيرده بير تاريخ» آدلي کيتابيندا يازير: «اوشاقليق و گنجليک ايللريني قاراباغدا کئچيرن آغابگيم آغا آتاسينين وزيري، گؤرکملي شاعير موللا پناه واقيفين يئتيشديرمهلريندندير. آذربايجان و فارس ديللريني موکممل بيلن بو خان قيزي هر ايکي ديلده گؤزل شعرلر يازميشدير» (باخ: «هر سطيرده بير تاريخ». باکي، 1994، ص. 36).

همين کيتابدا دا يوخاريدا دفعه لرله قئيد ائديلن بير مشهور باياتي و ايکي ميصراع شعر نومونهسيندن باشقا آغابگيم آغانين باشقا شعرلرينه راست گلمهديک.

آذربايجاندا يازيلان ايکي روماندا - يوسيف وزير چمنزمينلينين1936-جيلده يازديغي «قان ايچينده» رومانيندا (باخ: ي.چمنزمينلي. اثرلري. ايکي جيلد، ص. 485-648) اون دوققوز عصر آذربايجان خانليقلارينين، خوصوصن قاراباغ خانليغينين تاريخي فاجيعه سي عکس اولونموشدور. روماندا آغابگيم آغا، سرکرده محمد بي جاوانشير و ايران شاهي فتحعلی شاه قاجار حاقيندا ائپيزودلار مؤوجوددور. بو ائپيزودلاردان بيري بئلهدير: «آغابگيم آغا فتحعلی شاهين او قدر خوشونا گلميشدي کي، اونا باش حرمليک وئرميش و اؤزونه ده باشدان-آياغا اينجي ايله ايشلنميش بير دون باغيشلاميشدي. لاکين آغابگيم هميشه اؤز وطنيني آرزولايير و اؤزونون يازديغي بو باياتيني اوخويوردو:

من عاشيقم قاراباغ،

شکي، شيروان، قاراباغ.

تهران جنّته دؤنسه،

ياددان چيخماز قاراباغ!

 

فتحعلی شاه بونو ائشيديب، آغابگيمدن اينجيميشدي. آغابگيم ايسه اونون فيکريني يايينديرماق اوچون دئميشدي: «من ائله يازماميشديم. من يازميشديم کي، «تهران جنّته دؤندو، ياددان چيخدي قاراباغ» (باخ: ي.بش.چمن­زمينلي. اثرلري. ايکي جيلد. باکي: علم نشرياتي، 1976، ص. 705-706).

بو روماندا دا آغابگيم آغانين يوخاريدا آدي چکيلن باياتي نومونهسيندن باشقا شعرينه راست گلمهديک.

سون ايللرده مهريبان وزيرين يازديغي «آغابگيم آغا جاوانشير» (باکي، 2016) اثرينده تاريخي معلوماتلار و آغابگيم آغانين ياشاييب-ياراتديغي موحيط حاقيندا داها زنگين بيليکلر مؤوجوددور.

مؤليف آغابگيم آغانين و قاراباغين طالعييندن بحث ائدن بئله بير اثري يازماقلا ايکي هدفدن بيرينين آغابگيم آغاني تانيديغيميز قدر تانيتماق اولدوغونو، ديگرينين ايسه آغابگيم آغانين فعاليتيندهکي قاراباغ يانغيسيني دريندن اؤيرنمگين گرکليگيني قاراباغشوناسليقدا اولان بوشلوق کيمي آذربايجان تاريخچيلرينين ديقتينه چکمک اولدوغونو قئيد ائدير. مؤليف آشاغيداکيلاري يازير: «خانقيزي دونيايا آغا اولاراق گلدي، چونکي دوغولوشدان ايري مولکيت صاحيبي ايدي. آتاسينين ثروتيندن، آناسينين جئهيزيندن پايي واردي. قاراباغدا مولکيت صاحيبي اولان خانيملار «آغا» عونواني داشيييردي» (ص. 14).

«او، فيطرن ايستعدادليدير، شاعيردير، اديبدير، بستهچيدير. اؤزو ده بير وفا سيمگهسيدير» (ص. 6).

«آغابگيم آغا ميللي گوونج کيمي اؤيرنمهلي، ميللي دير کيمي اؤيرهديلمهليدير» (ص. 6).

مهريبان وزير آغابگيم آغايا ايستيناد ائديلن

 حسنون تعريفيني حشره قدر يازسالار،

نه تعريفين قورتارار، نه حسرتين آزالار»

بيتينين يازيلما تاريخينين محمد بي جاوانشيري يارانماسي ايله باغلي اولدوغونو يازير: «هيجران ياراسينين قيلينج يارالانماسي داها بئتر اولدوغونو توتيه کيمي نغمهلرينده ديللنديرميشدي. تعريفي ائللرده گزن ايگيدين ياراسينين ساغاليب آياغا قالخاجاغي او موبارک گونو حسرتله گؤزلهديگيني زررين بير ديلله قلمه آلميشدي» (ص. 66).

مهريبان وزير آشاغيداکي باياتيني دا آغابگيم آغايا ايستيناد ائدير:

 گؤز اليننن، داد آمان گؤزه ليننن،

ياريمي اؤزگهلره وئرديم، اؤزوم اؤز اليمنن (ص. 81)

 آغابگيم آغانين حياتي، ديللرده ياشايان ايکي شعري حاقيندا عالي و اورتا مکتب درسليکلرينده، درس وسايتطينده ترتيب اولونموش آنتالوگييالاردا قيسا، ييغجام معلوماتلار دا مؤوجوددور.

بو سطيرلرين مؤليفينين پئداقوژي فعاليت گؤسترديگي آذربايجان دؤولت ايقتيصاد اونيوئرسيتتينده 2000-جي ايلده اونيوئرسيتتده يايينلانان «آذربايجان ديليندن پراکتيکوم» آدلي درس وسايطينده ده طلبهلر اوچون اوخو ماتئريالي کيمي «آغابگيم آغا» متني ترتيب ائديلميشدير  (ص. 59-61).

 

عاغيلي و ذکاسي ايله تانينان آغابگيم آغا حاقيندا يادداشلاردا ياشايان خاطيرهلر واردير.

«آغابگيم آغا ايرانداکي شعرلريني «آغاباجي» لقبي ايله يازيردي. اونا «آغاباجي» لقبيني فتحعلی شاهين وئرديگي سؤيلهنيلير».

 «آغابگيم آغا فتحعلی شاهي گؤزلليگي و عاغلي ايله رام ائديب، شاهين ياتاغينا دئييل، کؤنلونه گيرميشدي».

«منبعلرده فتحعلی شاهين کبينلي و صيغه آروادلارينين سايي 200-دن آرتيق ايدي. اونلارين آراسيندا آغابگيم آغانين آيريجا يئري وارميش».

«30 ياشلي فتحعلی شاها آغابگيم آغا اون ايکينجي آروادي اولاراق گلين گلميشدي. بير مودت سونرا محمدخان قاجارين قيزي آسيا خانيم مازانداراندا وفات ائدير. آغابگيم آغا شاهين دايمي کبينينه آلينير».

«آغاباجي گؤزل و فوسونکار قيز ايدي. دئييرلر، هوندور بويلو، گؤزل قامتلي، خورمايي ساچلي و ياراشيقلي اوزو واردي. اونون طبيعي گؤزلليگيندن علاوه لطيف دانيشيغي، ياخشي شعر يازماغي وار ايدي. اؤزو ده ياخشي شعرشوناس ايدي. ادبي مجليسلرده پرده آرخاسيندا اَيلشيب موذاکيرهلرده ايشتيراک ائدردي».

«بير دفعه قاراباغ شيکستهسيني اوخويان آغابگيمدن شاه سوروشور کي، بستهنين آدينا «قاراباغ شيکستهسي» دئينده نه دئمک ايستميسن؟

آغابگيم: - «شاه ساغ اولسون، ائله هاميميزي دئميشم. ائله سني ده، اؤزومو ده. سنين ده اصلين-نسلين قاراباغلي دئييلمي؟»

دئييرلر کي، آغابگيم هئي:

عزيزيم قاراباغ،

قارا سالخيم، قارا باغ.

تهران جنّته دؤنسه،

ياددان چيخماز قاراباغ.

-اوخودوغونو شاه سوروشدوقدا حاضيرجاواب آغابگيم آغا دئيير کي، شاه ساغ اولسون، سنه سحو چاتديريبلار. من دئميشم کي،

تهران جنّته دؤندو،

ياددان چيخدي قاراباغ». 

«آغاباجي گنج اولماسينا باخماياراق، فتحعلی شاهين يانيندا او قدر احتيرامي وار ايدي کي، شاهدان هر نه ايستسه ايدي، او قبول اولاردي. هردنبير اؤلومه محکوم اولانلار اونون واسيطهسي ايله باغيشلاناردي».

«قلبينده محمد بيين عشقيني ياشادان، ياستيغين آلتيندا محمد بي جاوانشيرين خاطيره دفتريني ساخلايان آغابگيمين ديليندهکي آد قاراباغ، قلبيندهکي آد محمد ايدي».

«آغابگيم آغا فتحعلی شاهدان 6 ايل قاباق وفات ائتدي. شاه اونون خاطيرهسينه بير آي ماتم ساخلادي».

«آغابگيم آغانين ادب-ارکان، سؤز اوستاسي و ناطيق اولماسي، بير نئچه ديل بيلمهسي، دونيا ايشلريندن باش چيخارماسي فتحعلی شاهي حيران ائدير. ديواندا چيخارديغي فرمانلا اونو «شاه بانو» ائلان ائدير.

«دئييلنه گؤره آغابگيمين فيطري ايستعدادي، قنيرسيز گؤزلليگي، سه گاهي، قاراباغ شيکستهسيني يانيقلي-يانيقلي اوخوماسي، خالق ماهنيلارينا اؤزونمخصوص خاللار علاوه ائتمهسي فتحعلی شاهي قاراباغ گؤزهلينين اؤنونده قولوباغلي قولاچئويرميشدي. فتحعلی شاهين عؤمرو بويو اونون بير سؤزونو ايکي ائتمهديگي سؤيلهنيلير».

«فتحعلی شاه قاراباغ گؤزهلينه اولان بؤيوک سئوگيسينه رغمن قم شهرينده اونا ساراي تيکديرير و دئييلنلره گؤر، بو سارايين قاپي-پنجرهسيني، هيجرلريني گونچيخانا - قيبلهيه دئييل، قاراباغا ساري قودورور، مؤحتشم بير باغ سال­ديرير و اورادا آغابگيم آغا قاراباغين مشهور«خاري بولبول»ونو اکديرير».

آذربايجانداکي آراشديرمالاردان آيدين اولور کي، آغابگيم آغانين بديعي ياراديجيليغيندان يالنيز بير فخريه، فارسجا سؤيلهديگي بير روباعي، ديللر ازبري اولان بيرجيناسلي باياتيسي و آفوريزمه دؤنن بير بيت وار. فتحعلی شاها سیاست نامينه هديه گلين کيمي گؤندريلن آغابگيم آغانين عؤمرو و ياراديجيليغي تهران و قم دا کئچميشدير. اونون بديعي ياراديجيليغي اساسن ايران موحيطينده ياييلميشدير. طبيعي کي، عؤمرونون تخمينن 31 ايليني ايران شاه ساراييندا کئچيرن، وطني قاراباغ و ناکام محبت نيسگيلي ايله ياشايان يوکسک ايستعداد و مؤحتشم ذکا صاحيبي اولان آغابگيم آغا بو ايللردهکي دوشونجه و نيسگيللريني سئوينج و کدريني يازيلاريندا ايفاده ائتميشدير.

شاه ساراييندا دا بؤيوک حؤرمت و عزت صاحيبي، شاهين «شاه بانو»سو اولان منبعلرده ايستعدادلي شاعير کيمي ده آدي کئچن يوکسک اينتئللئکت، نجيب اخلاق صاحيبي آغابگيم آغا آغاباجينين بديعي ياراديجيليغي اوتايلي، بوتايلي آذربايجاندا بيلديگيم قدر هله ده لازيمينجا آراشديريلماييب. اونون ادبي اينجيلري تام اولاراق سو اوستونه چيخماييب. اوتايلي، بوتايلي آذربايجانين هم شاعيره قيزي، هم گليني، هم ده درد اورتاغي اولان آغابگيم آغا حاقيندا ايراندا يايينلانان يازيلانلاردان معلوم اولور کي، آغابگيم آغانين آشيق شعري اوسلوبوندا يازديغي بير اليازماسي اوزون ايللردير کي، شاه سارايي کيتابخاناسيندا موحافيظه ائديلير.

م.ر.ويلايينين 1946-جي ايلده تبريزده يايينلانان «آذربايجانين سسي» (تبريز، 1946،   ص. 32-37) مجموعهسينده «شاه دفترخاناسيندان اينجيلر» ايستيناد ائدهرک آغابگيم آغانين يئددي قوشماسيني، اوچ گرايليسيني و آلتي باياتيسيني چاپ ائتديرديگي منبعلرده يازيلماقدادير. بو قزئتين همين نوسخهلريني قوزیی آذربايجينين کيتابخانالاريندا تاپماق هلهليک مومکون اولمادي. اينانيريق کي، ايران آذربايجانيندا ياشايان سويداشلاريميز، علم آداملاري آغابگيم آغانين مجموعهده يايينلانان و بيزه معلوم اولمايان شعرلرينين «خدافرين» درگيسينده يايينلانماسينا جهد گؤسترهجکلر.

ايران منبعلرينده علي اکبرمشيري سليمينين «زنان سخنور»، «تذکره خواتين»ده آغابگيم آغا حاقيندا معلوماتلارين يئر آلديغي دا يازيلماقدادير. بو معلوماتلارين دا «خدافرين» درگيسينده يايينلانيب علم