صفی الدين اورموي

 

حاضیرلادی : دکتر حسین شرقی

 

صفی الدين اورموي منشاجه آذربايجان تورکلريندن اولان، شرق عالمينده ايستعدادلي موسيقيچي و ماهير خطات کيمي بؤيوک شؤهرت قازانميش عاليم. 

  حياتي

  شرق دونياسي نين ان مشهور موسيقيچي و موسيقيشوناسلاريندان ساييلان صفی الدين عبدالمومن بن يوسيف بن فاخير اورموي آذربايجانين قديم مدنيت مرکزي اورمييا شهرينده 1216-جي ايلده آنادان اولموشدور. 

  ایلک تحصيليني اؤز وطنينده آلميش، موسيقي ساوادي نين اليفباسيني و اوددا چالماغي دا بورادا اؤيرنميشدير. سونرادان عرب خيلافتي نين پايتاختينا، بوتون ياخين و اورتا شرقين علم و مدنيت مرکزي اولان افسانوي باغداد شهرينه گلرک، دورونون ان ياخشي اونيوئرسيتئتلريندن ساييلان  " مستنصريييه " ده تحصيليني داوام ائتديرميشدير. 

  او، بورادا فلسفه نين، منطيقين، طيببين، ريياضياتين، آسترونومييانين و ديللرين اساسلاري ايله تانيش اولور. موسيقي صنعتيني اؤيرنمکده داوام ائدن صفی الدين خطاتليقدا دا بؤيوک اوغور قازانير. تصادوفي دئييل کي، اولجه او، موسيقي ساحه سينده دئييل، خطات کيمي شؤهرت تاپير و عباسيلر سولاله سي نين سون نوماينده سي خليفه المعتصمين سارايينا دعوت اولونور. آز واختدا خليفه نين ياخين احاته سينه داخيل اولان صنعتکار بير مودتدن سونرا ساراي کيتابخاناسي نين رهبري و باش خطات تعيين اولونور. کيتابلارين اوزونو کؤچورمک و کيتابخانا رهبرليگي صفی الديني موسيقي تحصيليني داوام ائتديرمکدن يايينديرمير، عکسينه زنگين کيتاب خزينه سينده او، اؤز بيليگيني آرتيرير، ائلجه ده سارايداکي قبوللار زاماني عود چالماسي ايله هامي نين رغبتيني قازانير. 

  اونون عود چالغيسي باره ده بير نئچه افسانه وار. بير افسانه ده دئييلير کي، قيرخ گون سوسوز قالان دوه ني آرخا بوراخيرلار. بو زامان تصادوفن صفی الدين اورالاردا عود چاليرميش. دوه آرخا چات هاچاتدا عودون سسيني ائشيديب آياق ساخلايير. صفی الدين چالغيسينا آرا وئرديکجه، دوه سويا دوغرو دارتينير، او، چالغيسيني داوام ائدينجه، دايانير. آرتيق اوچونجو موسيقي پارچاسي چاليناندا دوه نين گؤزلريندن ياش آخيردي. 

  دانيشيلان باشقا بير احوالات صفی الدنين مشهور باغداد باغلاريندان بيرينده عود چالماغي حاقيندادير. او، چالديقجا باغدا اوچان بولبول قاناد ساخلايير. ياخينليقداکي بوداقلاردان بيرينه قونوب اودون باغريندان قوپان سِحرلي سسلره سانکي قولاق کسيلير. موسيقي بولبولو ائله تاثيرلنديرير کي، او داها دا ياخينلاشاراق اوخوماغا، قانادلاريني موسيقي نين هاواسينا اويغون چيرپماغا باشلايير. بير آز سونرا ايسه بولبول قورخوسوز-هورکوسوز آداملارين آراسيندا جه-جه وورماغا باشلايير. 

  صفی الدين اؤزونو هم ده ايستعدادلي پئداقوق کيمي تانيتميشدي. بوتون شرق عالمينده اونلو صنعتچيلر کيمي آد چيخارميش بير چوخ موسيقيشوناسلار اونون شاگيردلري اولموشلار. مشهور آذربايجان موسيقيشوناسي عبد القادير ماراغايي اؤزونون  " مفایسه الحان "  اثرينده يازيردي کي، عبد المؤمين صفی الدين اورموي بير چوخ گؤرکملي شخصيتلرين موعليمي اولموشدور. بونلارين سيراسيندا شمس الدين سؤهروردي، علي صینان، حسن ظفر و حصام الدين قوتلوق بوغا کيمي تانينميش موسيقيشوناسلارين آدلاري چکيلير. 

  صفی الدين ايکي يئني موسيقي آلتي ياراتميشدي -  " نزهه "  و  " موغني " . نزهه موعاصير آرفا (چنگ) و کانونا بنزه ييردي. بو آلتين 81 سيمي واردي. سؤيود، سرو و يا شومشاددان دؤردبوجاق شکلينده دوزلديليردي. موغني نين 33 سيمي واردي و خاريجي اوخشارليق باخيميندان روبابا بنزه ييردي. سادجه چاناغي ايري ايدي. موغني اريک آغاجيندان دوزلديليردي. 

  بوندان باشقا صفی الدين هم ده ايستعدادلي بسته کار ايدي. اونون صنعتي نين بو جهتي حاقدا دا افسانه دولاشماقدادير. دئييرلر کي، باغداددا لذه خان آديندا بير موغنني ياشاييرميش. او، تئز-تئز صفی الدينله گؤروشر، بيرليکده چاليب-اوخويارميشلار. صفی الدين اونا موسيقي درسي کئچرميش. بير گون، ساراي قبوللاري نين بيرينده او گؤزل بير ماهني اوخويور. ماهني هامييا خوش گلير و خليفه اونون مؤليفي نين آديني سوروشور. بسته چي نين صفی الدين اولدوغونو بيلنده اونو قبولا دعوت ائدير و بوتون قوناقلار صنعتکارين عوددا چالديغي موسيقيلردن فيضي ياب اولورلار. 1258-جي ايلده چينگيز خانين نوه سي هولاکو خانين سرکرده ليک ائتديگي مغول قوشونلاري باغدادي توتور. خليفه ني عاييله سي ايله بيرليکده اعدام ائديرلر و بونونلا دا 600 ايلليک عرب خيلافتينه سون قويولور. خليفه نين ياخين آداملاري آختاريليردي و صفی الدينين ده آدي بونلارين سيراسيندا ايدي. اونو شخصن تانيميش تاريخچيلردن حسن عربله ني همين حاديثه لري بئله تصوير ائدير: صفی الدينين ياشاديغي محلله هولاکو خانين قوشونلاري ايله احاطه اولونموشدو. محلله جاماعاتي، خوصوصيله ده صفی الدين اؤلوم تهلوکه سي آلتيندا ايديلر. قوشون سرکرده لريندن بيري اوتوز نفرليک دسته ايله صفی الدینين ياشاديغي مولکون قاپيسيني سينديرماغا باشلادي. ائو يييه سي جسارتله دؤيوشچولرين قارشيسينا چيخاراق، اونلاري ادب-ارکانلا ائوه دعوت ائدير. سارايدا ياخشي ديپلوماتييا مکتبي کئچميش صفی الدين  " قوناقلار " لا عومومي ديل تاپا بيلير. چوخ سؤز-صؤحبتدن سونرا دسته باشچيسي محلله جاماعاتينا توخونمادان، صفی الديني گؤتوروب، هولاکو خانين حضوورونا گتيرير. صنعتکار عودونو کؤکله ييب، حزين بير مئلودييا چالير، ضيا آدلي موغنني ايسه اوخوماغا باشلايير. خانين يانينداکيلارين هاميسي صفی الدينين اوستاليغينا و عاغلينا احسن دئييرلر. هولاکو خان اونا اؤز ساراييندا ايش تکليف ائدير، محلله جاماعاتي ايسه تهلوکه دن قورتولور. 

  هولاکو خانين وزيري شمس الدين جووئيني (تانينميش تاريخچي علاالدين جووئيني نين قارداشي) صفی الديني اؤز حيمايه سي آلتينا آلير. اوغلانلاري بها الدينله شرف الدنين تربييه سيني اونا حواله ائدير. صفی الدين اونلارا هرطرفلي تحصيل وئرمه يه چاليشير. لاکين طبعيي کي، موسيقي درسلرينه خوصوصي فيکير وئرير. شرف الدين تحصيلده کي  اوغورلاري ايله موعليمي نين حسن-رغبتيني قازانير و اورموي تبريزده قلمه آلديغي بئش حيصه ليک مشهور  " رساله شرفي "  آدلي موسيقي رساله سيني اونا ايتحاف ائدير. 

جووئينيلر عاييله سي حؤکمدارين نظريندن دوشدوکدن سونرا صفی الدين عؤمرونون سون ايللريني يوخسوللوق ايچينده کئچيرير و 1294 -جو ايلده باغدادداکي بورجلولار حبسخاناسيندا دونياسيني دييشير. 

صفی الدين هله باغداددا سارايدا ايکن 1252-جي ايلده  " کيتاب-ال ادوار "  آدي ايله مشهور اولان موسيقي رساله سيني تاماملايير. کيتاب عرب ديلينده يازيلميش و اون بئش فصيلدن عيبارت ايدي. ماراقليدير کي، بو اثرده قالديريلان موسيقي نظريييه سي مسله لري بو گون ده آکتوالليغيني ايتيرمه ييب. موغاملاردان بحث ائدن دوققوزونجو فصيل چاغداش اوخوجونو داها چوخ ماراقلانديرا بيلر. بورادا عوموميتله، 12 موغام دستگاهي نين آدي چکيلير کي، بونلارين دا چوخوسو بيزه معلومدور:

 اوششاق، نوا، ابو ساليک ("ابوساليک ")، راست، ايراق(عراق)، ايصفاهان، زيرافکند، بوزورق، زنگوله، رهاوي، حسيني و حجاز. اون بيرينجي و اون ايکينجي فصيللرده صفی الدين اؤز سئويملي اودونو تصوير ائدير. موسيقي نين نوت يازيسينا حصر ائديلن اون بئشينجي فصيل موسيقيچي و موسيقيشوناسلارين سونراکي نسيللري اوچون خوصوصيله ماراقليدير. 

  صفی الدي نين تکليف ائتديگي سيستئم اوزره، موسيقي حرفي-عددي اوسوللا يازيليردي. عربلره مخصوص  " ابجد "  سيستئمي نين حرفلري سسلرين شرطي يوکسکليگيني، رقملر ايسه اونلارين اوزونلوغونو بيلديريردي. ميثال اوچون، ياريم تونلاردان آز اينتئرواللارين ايشاره سي کيمي ت،ج،ب و س. حرفلردن ايستيفاده اولونوردو. لادلارين آدي، مئلودييانين قورولوشو و ريتمي اؤزل اولاراق رقملرله قئيده آلينيردي. ماراقليدير کي، " موعاصير قرب نوت سيستئمي ياريمتونلاردان کيچيک اينتئرواللارين يازييا آلينماسي اوچون ايمکان وئرمير و ائله بونا گؤره ده موغاملارين، ائلجه ده عومومن شرق موسيقيسي نين بوتون سس اينجه ليکلريني چاتديرماقدا چتينليک تؤره دير. بلکه ده ائله بونا گؤره شرقده  19-عصرين سونلارينا قدر اورموي سيستئميندن گئنيش ايستيفاده اولونموشدور. 

  آوروپانين ايکي مشهور موسيقي شوناسي ر. ائرلانژو و ج. فئرمئر بير -بيرلريندن خبرسيز اولاراق اورموي نين بير روباعي اوزرينده کي  نوت يازيسيني موعاصير نوت يازيسينا کؤچوره بيلميشلر. يئددي يوز ايلدن بري سوسان مئلودييالار يئنيدن سسلنميشدير. 

  صفی الدين اورموي  " کيتاب ال ادوار "  ريساله سي نين اولينده يازيردي کي، عمللرينه تابع اولدوغو و قلبلري نين ايستکلرينه عمل ائتمکده خوش علامت گؤردويو، اونا تاپشيردي کي،  " نغامه "  نين تعريفي،  " بود "  و  " داور " لارين نيسبتلري،  " ايقا "  و اونلارين نؤولري حاقيندا قيسا معلومات يازسين کي، بو علمه و تجروبه يه بير خير وئرسين. بو تاپشيريغا ايطاعتکارليقلا عمل ائده رک، اورموي حافظه سينده اولانلاري يازدي و قئيد ائتدي کي،  " بو صنعتي ديقتله اؤيرنن، اوللر بيلمه ديگي و چوخسونو زامانين محو ائتديگي بير سيرا شئيلره واقيف اولار " . 

آرتيق 7-8 عصردير کي، شرقين و قربين بير سيرا عاليملري بؤيوک موسيقيشوناس صفی الدين اورموي نين  " کيتاب ال ادوار " ، ائلجه ده  " شرفيييه "  ريساله سينده وئريلن چوخ قييمتلي، عاليمين اؤزونون بؤيوک تواضؤکارليقلا قئيد ائتديگي  " بير سيرا شئيلره واقيف اولورلار "  و اورموي نين اؤلمز عنعنه لريني داوام ائتديريرلر. 

  اينگيليس عاليمي جورج فارمئرين دئديگينه گؤره، صفی الديندن سونرا گلن بوتون عرب، فارس، تورک ديللي مؤليفلرين هاميسي اونون نظريييه سي نين داوامچيلاري اولموشلار. بو عاليملردن بيز محمد جورجانيني، عب القادير ماراغايني، قطب الدين شيرازيني، محمود عاموليني، عبدالرحمان جاميني، زئين العابدين حسينيني، کاوکابي بوخاريني، درويش عليني، ميرزه بيي، مير محسون نووابي و 20 عصرده بؤيوک عاليم و بسته کار اوزئيير حاجيبيووو گؤستره بيلريک. 

  اورموي نين ريساله لري اورتا عصرين قارانليقلاريني ياراراق، اونيکال علمي اثرلر کيمي بو گون ده ياشايير و دونيانين بير سيرا شهرلري نين کيتابخانالاريندا قييمتلي اليازمالار کيمي ساخلانيلير: نيويورکون، پاريسين، بئرلي نين، ويانانين، قاهيره نين، ايستانبولون، سن پترزربورقون، تهرانين، باکي نين و ساير. 

  مشهور آوروپا عاليمي رافائل گئورق کيزئوئتتئر اورمويني  " شرقين زارلينوسو "  آدلانديرميشدير. بؤيوک اينگيليس عاليمي چارلز پارري صفی الدينين جدوليني او واختا قدر يارانميش جدوللرين ان موکمملي حساب ائديردي. جورج فارمئر ايسه صفی الديني پارلايان اولدوزلا موقاييسه ائديب، اونو  "سيستئمچيليک مکتبي نين "  بانيسي آدلانديرميشدير. 

 صفی الدين اورموي نين اثرلري شرق موسيقي نظريييه سي نين، علمي نين اينکيشافيندا يئني دؤوردور. او، موسيقي علمينه  " سيستئمچيليک "  مکتبي نين ياراديجيسي کيمي، تابولاتورانين بانيسي کيمي داخيل اولموشدور. اورموي نين بؤيوک نايليتي، عومومن شرقين سس سيستئمي نين قايدايا سالينماسيندان عيبارت ايدي. اونون سيستئمي نين اساسيني تشکيل ائدن اون يئددي پيلله لي قامما ال کيندي نين 12 تونلو خروماتيک قامماسيندان، هم ده ال فارابي نين 22 تونلو قامماسيندان فرقله نير. او، شرق موسيقيسي نين 12 موغام دايره سي نين و 6 آوازي نين سس قاتاريني دياتونيک قاممانين چرچيوه سينده وئرميشدير. 

  اورموي  " ابجد نوتويلا "  موسيقي نين ان قديم مئلودييالاريني ريساله لرينده يازيب ياشادا بيلميشدير. اوندان سونرا گلن عاليملر، تا 10عصره قدر بو نوت يازي سيستئميندن گئنيش ايستيفاده ائتميشلر. اورموي هم ده  " موغني "  و  " نزهه "کيمي موسيقي آلتلري نين ايختيراعچيسي و اودون ماهير ايفاچيسي اولموشدور. اونون اعجازکار ايفاسي و همچي نين خطاتليق، نقاشليق باجاريغي و مهارتي حاقيندا شرقده موختليف روايتلر گزيردي. 

  يئددي عصر سونرا، يني20 عصرين اورتالاريندا اوزئيير حاجيبيوو اؤزونون  " آذربايجان خالق موسيقيسي نين اساسلاري "  کيتابيندا يازيردي:  " ياخين شرق خالقلاري موسيقيسي نين نظري و عملي اينکيشافي تاريخينده باشليجا يئري دونيادا مشهور اولان ايکي نفر آذربايجان عاليمي، نظريييه چي، موسيقيشوناس توتور: صفی الدين عبدالمؤمين بن يوسيف ال اورموي و عبد القادير ماراغاي " . 

او.حاجيبيوو اؤز اثري اوزرينده ايشلرکن بؤيوک ميقداردا کيتابلار آراسيندا محض  " کيتاب ال ادوار " ين خوصوصي اهميت کسب ائتديگيني آنلاياراق، اونون فوتو صورتيني نوروسمانييه کيتابخاناسيندان گتيرديب بو اثري آراشديرميشدير.

 حاجيبيووون يازديغي" آذربايجان خالق موسيقيسي نين اساسلاري "  اثري اوندا قالديريلان و حلل ائديلن مثله لره، هم ده قورولوشونا، اوسلوبونا گؤره  " کيتاب ال ادوارا "  چوخ ياخيندير. خوصوصيله ده لاد سيستئمي نظريييه سينده  " کيتاب الادوار " ين اونا تاثيري بؤيوکدور. بو اثر اورموي نين ريساله سي نين علمي مودعالاريني موعاصير آذربايجان موسيقي علمي نين طلبلرينه جاواب وئرن سويييه ده داوام ائتديرميشدير. اونا گؤره ده  " آذربايجان خالق موسيقيسي نين اساسلاري " ني يئني دؤورون ريساله سي آدلانديرماق اولار. 

  عوموميتله، بو علمي اثرلري تدقيق و تحليل ائتديکجه اونلار آراسيندا اوخشارليقلارين، عوموميليکلرين چوخ اولدوغونو گؤرورسن. دئمه لي، 20 عصرده آذربايجاندا صفی الدين اورموي نين عنعنه لري ياشاييردي و اونون بو ساهه ده خلفي، داوامچيسي اوزئيير حاجيبيوو اولموشدور. او، اثري نين  " تاريخي معلومات "  حيصه سينده يازيردي:  " ياخين شرق خالقلاري نين موسيقي مدنيتي 14-عصره دوغرو اؤزونون يوکسک سويييه سينه چاتميش و اون ايکي سوتونلو، آلتي بورجلو  " بينا "  (دستگاه) شکلينده ايفتيخارلا اوجالميش و اونون زيروه سيندن دونيانين بوتون دؤرد طرفي: اندلسدن چينه و اورتا آفريکادان قافقازا قدر گئنيش بير منظره گؤرونموشدور موسيقي بيناسي نين مؤحکم تمليني تشکيل ائدن 12 سوتون 12 اساس موغامي و 6 بورج ايسه 6 آوازاتي تمثيل ائديردي " . 

  حاجيبيووا گؤره آذربايجان خالقي نين موسيقي صنعتي ده چوخ موتناسيب و جيدي بير سيستئمه اساسلانير. آذربايجان خالق موسيقيسي نين بوتون علمي نظري مسله لري ده اؤز اساسيني بو سيستئمدن آلير. حاجيبيوو 20 عصرده نينکي خالق موسيقيميزين اساسلاريني موعين ائتميش، اونون جيدي قانونلارا تابع اولدوغونو گؤسترميش، هم ده شرقده ايلک موغام اوپئراسي  " لئيلي و مجنون " اون ياراديجيسي اولموشدور. حال-حاضيردا آذربايجاندا ائله موسيقي ژانري و موسيقي فورماسي تاپماق چتيندير کي، بو و يا ديگر شکيلده موسيقيميزين کلاسسيکي اوزئيير حاجيبيووون  ایله باغلي اولماسين.

  هر ايکي اثرين  " کيتاب الادوار "  و"آذربايجان خالق موسيقيسي نين اساسلاري " نين بيرينجي فصلي سسه، اونون اساس خوصوصيتلرينه حصر ائديلير. قئيد ائدک کي، اورموي نين ائله  " شرفيييه "  ريساله سي نين ده ايلک فسلي سسه حصر ائديلميشدير. عاليم  " کيتاب الادوار " دا  " نغامه "  تئرمينيني سس و تون معناسيندا ايشلده رک اونون موعين واخت عرضينده هانسيسا زيلليک و بمليک سويييه سينده داوام ائدن سس اولدوغونو و اونا تبيي مئيل دويولدوغونو گؤسترميشدير. هر تونون زيلليک و بمليک جهتدن اؤز نذيره سي، ائکويوالئنتي واردير. اورموي گؤستريردي کي،  " نغامه " ني يالنيز باشقاسييلا موقاييسه ائتديکده اونون يوکسکليگي و آشاغي اولماسي باره ده دانيشماق اولار. هم ده زيل و بم سسلرين سببلريني عاليم گريلميش و يا گريلمه ميش اوزون، يوغون و يا قيسا، نازيک سيملرله باغلاييردي. اورموي سسين موسيقي و فيزيکي خوصوصيتلريني شرح ائتميش و بو باره ده داها گئنيش " شرفيييه "ريساله سينده دانيشميشدير. 

  حاجيبيوو ايسه کيتابي نين  " سس سيستئمي " حيصه سينده يازيردي کي، موسيقيشوناسلارين ريينه گؤره  " شرق موسيقيسينده ( " آذربايجان موسيقيسي ده بورايا داخيلدير) بوتؤو و ياريم توندان باشقا 1/3 و 1/4 تون دا واردير. لاکين او، قئيد ائديردي کي، بو ايديعا ان کيچيک اينتئروالي ياريم تون اولان آذربايجان خالق موسيقيسينه آيد اولا بيلمز. آوروپا موسيقيسينده اولدوغو کيمي، آذربايجان موسيقيسينده ده اوکتاوا 7 دياتونيک و 12 خروماتيک پرده دن عيبارتدير. فرق آنجاق تئمپئراسييا مسله سينده دير کي، او دا بير کومما قدردير. 

  ايستعدادلي عاليم، هم ده ماهير اود چالان سفيددين اورموي  " کيتاب ال ادوار "  اثري نين چوخ اهميتلي ايکينجي فصلينده اوخوجولاري اود آلتي نين پرده لري ايله، دؤورون تئرمينولوگيياسي ايله دئسک، اودون سيمي نين  " دستان " لارا بؤلونمه سي ايله تانيش ائدير. بو فصيلده عاليم شرق تونلار سيستئمي نين اساس سس قاتاري اولان اون يئددي پرده لي قامماسيني اوخوجولارا تقديم ائدير. اورموي اونون ائکويوالئنتليگيني گؤسترير و يازير کي، بو قامماني او بيري اوکتاوالاردا دا، ديگر يوکسکليکده عئينيله سسلنديرمک مومکوندور.

  اونلو تورک موسيقيچيسي شکر الله احمد اوغلو 10 عصرده اونون  " کيتاب الادوار "  اثريني تورک ديلينه چئويرميشدير. سونرا بو کيتاب فرانسيز ديلينه ده چئوريلميشدير. صفی الدين اورموي نين ياراديجيليغي آذربايجانداکي تدقيقاتچيلاريندان ح. بدلبيلي نين، ق. بئقدئلي نين، ت. بونيادووون و ب. آدلاريني چکمک اولار.