کريم مشروته چي سؤنمز و اونون شئه مونجوغو کيتابي حاقيندادوشونجه لر

Kərim Məşrütəçi Sönməz və onun Şeh muncuğu kitabı haqqında düşüncələr

 

Mahmizər MehdibəyovaDr.

 دکتر ماهميزر مهدي بي ووا

 

 

چاغداش گونئی آذربايجان پوئزيياسي نين او تايلي، بو تايلي بو گونکو آذربايجان ادبي فيکرينده اوريژينال سيماسي، دستخطتي ايله سئچيلن کريم مشروطه چي سؤنمزي ادبي ايجتيماعيت شاعيري، تنقيدچي، پوبليسيست و ترجومه چي کيمي تانييير. ايران ايسلام اينقيلابيندان سونرا بير شاعير کيمي شؤهرت قازانان

ک.م.سؤنمز 1928-جي ايلين باهاريندا آذربايجان شهرلري نين آناسي حساب ائديلن تبريزده آنادان اولموشدور. ماددي سيخينتيلار اوجباتيندان 14-15 ياشلاريندا ايکن امک فاليتينه باشلايان گله جک شاعير، سيستئملي تحصيل آلماغا، سؤزه و صنعته گوجلو مئيل گؤسترميش، تبريزده اورتا مکتبي بيتيرديکدن سونرا تهران اونيوئرسيتئتي نين حقوق فاکولته سينده اوخوموشدور.

جاوانليقدان ائلمه و معاريفه يوکسک قييمت وئرن، معاريف و مدنيتي هر بير ميلتين سويييه و اينکيشافي نين باشليجا آتريبوتلاريندان حساب ائدن ک.م.سؤنمز بير مودت مکتبدارليقلا مشغول اولموش، وطنينده ايکي صينيفلي بير مکتب آچاراق ميلتيميزين بالالارينا يازماق، اوخوماق و ميللي دوشونجه طرزيني اؤيرتمه يه چاليشميشدير.

ک.م.سؤنمزين بير شاعير کيمي اوزه چيخماسيندا، گئنيش اوخوجو کوتله سي نين رغبتيني قازانماسيندا ايرانداکي بهمن اينقيلابيندان سونرا دونيا شؤهرتلي دوکتور جاواد هئيتين شخصي تشببوسو ايله نشره باشلايان و ايندييه قدر ده فعاليتيني اوغورلا داوام ائتديرن وارليق ژورنالي نين اهميتلي درجه ده رولو اولموشدور. ژورنالين نشره باشلاديغي ايلک ايللردن اونونلا مونتظم امکداشليق ائدن شاعيرين درگي نين صحيفه لرينده چوخلو سايدا ادبي و علمي يازيلاري چاپ ائديلميشدير. ايراندا آذربايجان ادبياتي و مدنيتي نين تبليغي ساحه سينده موهوم خيدمتي اولموش سؤنمز داهي بسته کاريميز و قودرتلي پوبليسيستيميز اولان اوزئيير حاجيبيووون آذربايجان خالق موسيقيسي نين اساسلاري کيتابيني و خالق شاعيري بختييار واهابزاده نين آتيلميشلار پوئماسيني عرب اليفباسيندا نشر ائتديرميشدير.

اوستاد شهريارين حيدربابايا سالام پوئماسيني فارس ديلينه اوغورلا ترجومه ائدن سؤنمزين هم جنوبدا، هم ده شيمالدا کيتابلاري ايشيق اوزو گؤرموش، آغير ايللر  ، ايسانين سون شامي  ، قارانقوش يازي گؤزلر و س. بو کيمي کيتابلاريندا توپلانان پوئتيک نومونه لري گئنيش اوخوجو کوتله سي نين درين رغبتيني قازانميشدير. فيلولوگييا علملري دوکتوتو صابير اميروو سؤنمزين پوئزيياسي  ، حرارتي سنگيمه ين اوجاق  ، حسرت چلنگي آدلي سيلسيله يازيلارينا و شاعيرين پوئتيک ياراديجيليغينا يوکسک دير وئره رک يازير:سؤنمز جنوب پوئزيياسيندا يوکسک ادبي-بديعي شعرلرين، باياتيلارين، قزللرين صنعتکارليقلا يازيلميش پوئمالارين مؤليفيدير.

فيلولوگييا علملري دوکتورو، پروف. ووقار احمد ده، کريم مشروطه چي سؤنمزين پوئزيياسي حاقيندا اؤزونونگونئی آذربايجان پوئزيياسي آدلي مونوقرافيياسيندا يازير:سؤنمز ده خالق شعيري فورمالارينا اولدوقجا اينجه ليکله ياناشير و قليبلرين آهنگيني هئچ واخت پوزمور. اونون ايستر قوشما، ايستر ده باياتي فورمالاريندا قلمه آلديغي شعيرلر حئيرتاميزدير.  فيلولوگييا اوزره فلسفه دوکتورو ائسميرا فواد (شوکورووا) کريم مشروطه چي سؤنمز آدلي مقاله سينده : آيريليق، حسرت، وطنده وطنسيزليک دردي نيسگيللي قلم صاحيبلري نين ان کؤورک، حساس مؤوضولارينداندير. سؤنمز ده وطنين، خالقين منليگيني، لياقتيني اؤز منليگي، درديني شخصي دردي المي سايان، فرياد قوپاران، دويغولاري عوصيان ائدن وطنپرور سؤز اوستاديدير.  خ. هومبت اووانين عيسانين سون شامي و قارانقوش يازي گؤزلر مقاله سينده، شاعيرين پوئتيک خوصوصيتلريني، گونئي آذربايجانين کئچميشيني، بو گونونو عکس ائتديرميشدير.آکادئميک ميرزه ايبراهيموو سؤنمزين منسيزله ميشم شعريني ده تحليل ائتميشدير. اونون قلم يولداشلاري کيمي اورک سؤزلريني دويماق چتين دئييل:

درد مني يانديرير، آما اودو يوخ،

اودو آغزيمدا حياتين دادي يوخ.

دئميرم دردلر ايچينده آدي يوخ،

دئييرم من بئله منسيزله ميشم...

کريم مشروطه چي سؤنمزين ايراندا ليريک شعرلري توپلانميش بير نئچه کيتابي چاپ اولونموشدور کي، اونلاردان بيري  شئه مونجوغو  « آدلانير. 1995-جي ايلده تبريزين ارک  « نشرياتي نين نشر ائتديگي بو کيتاب شاعيرين بير نئچه اورک سؤزو آدلي قئيدلري ايله باشلايير.

  ... بو کيچيک دفتره، آديندان بللي اولدوغو کيمي، بير چوخ قيسا و کيچيک شعرلريم داخيلدير. بو کيچيک شعرلر سيزين بؤيوک لوتفونوزه و يوکسک ائستئتيک ذؤوقونوزه لاييق اولماسا دا، مؤليف طرفيندن سونولموش بير ياشيل يارپاق کيمي قبول ائده جگينيزه اينانيرام .

بو جومله لر ده همين بير نئچه اورک سؤزو آدلي موقدديمه دن گؤتورولموشدور. سؤنمز کيمي ايلهاملي فيلوسوف شاعيرين تواضؤکارليقلا سؤيله ديگي نين عکسينه اولاراق، بيز بئله دوشونوروک کي، شئه مونجوغو کيتابيندا توپلانان بو اثرلر سارالميش يارپاق دئييل، اصيل صنعت نومونه سي، چيچکلري تز-تر قالاجاق گولوستاندير.شعرلرين بيرينده اوخويوروق:

اليم گلمير کاغيذ يازيم ياريمچون،

 اونا کاغيذ يازا-يازا آغلارام،

بيردن-بيره سؤنن آرزولاريمچون،

اؤزوم مزار قازا-قازا آغلارام.

سيناماميش هر مجليسه توي دئييم

کيم گؤروب کي، من اؤزومدن بوي دئييم؟                     

اورمو گؤلو ندن شوردور؟ قوي دئييم!

من او گؤلده اوزه-اوزه آغلارام.

ايضاحا احتيياج گؤرموروک. بيزجه، بو کيمي ايلک باخيشدا عادي، اصلینده چوخ غئيري-عادي پوئتيک کشفلري گئنيش شرحه لوزوم يوخدور.شاعيرين حجمجه بؤيوک اولمايان کيتابيندا ائله شعرلر تاپماق مومکون دئييلدير کي، اورادا شاعير قلبي نين چيرپينتيلاري ايله ياناشي اوخوجولاري درين-درين دوشوندورن فيکير و ايفاده لره تسادوف اولونماسين.

سؤنمز او قبيل شاعيرلردندير کي، اونلار اورکلري نين حؤکمونه خيلاف هئچ نه يازماز، دوشوندوکلريني شعره گتيرمک اوچون يوز اؤلچوب، بير بيچرلر.سؤز يازسان اگر حقيقته خاطير ياز.بير کلمه ده سؤز يازما فقط آلقيش اوچون -تئزيسي ايله صنعت کرئدوسونو ائلان ائدن شاعير شعرلري نين بيرينده يازير: درديمين يوخ آدي، اونواني دئسم. حئيرته دالديرار اينساني دئسم. باشقا بير سؤزله بو معناني دئسم: اؤز ديياريمدا وطنسيزله ميشم!

نومونه گتيرديگيميز بو دؤرد ميصراعنين شرحي آز قالا کيتاب حجمينده اولان معنا يوکونه ماليکدير. دوشونورسن: آدام اؤز ديياريندا نئجه وطنسيز اولا بيلر؟ بو واخت دونيانين موختليف گوشه لرينه سپلنن، ايراندا اؤز ديللرينده مکتبلري، ائلم و تحصيل اوجاقلاري اولمايان قان-قارداشلاريميز، غصبکار و اوزدنيراق قونشولاريميزين ايديعاسي اوجباتيندان ائو-ائشيکلريندن، يورد-يووالاريندان ديدرگين دوشن سويداشلاريميز گؤزوموزون اؤنونده جانلانير.

سؤنمز بؤيوک ليريکدير. او، آز سؤزله، حجمجه کيچيک اولان شعرلرله، دؤردلوک و باياتيلارلا بؤيوک معنالاري عکس ائتديرن اينجه قلبلي و موتفککير بير شاعيردير. فيکريميزي تصديق اوچون دؤرد ميصراعليق وارليغيم شعرينه ديقت ائدک: ديليم-ديليم دوغرا قيزيل آلماني، وئر هر گلن يئسين اوندان بير ديليم. اوچ کلمه دير وارليغيمي بيلديرن، بير وطنيم، بير منليگيم، بير ديليم.

بشر اؤولادي نين وارليغيني بيلديرمک اوچون باشليجا شرطلر محض شاعيرين سؤيله ديکلريدير.

موکممل جيناسلارا ماليک سيلسيله شعرلر يازماق هر شاعيره نصيب اولمور. بونون اوچون شاعيردن يوکسک ايستعداد و ذؤوقله ياناشي، منسوب اولدوغو خالقين ديليني و معنوياتيني دا دريندن بيلمه سي طلب اولونور. سؤنمزين ليريکاسيندا ديقتي جلب ائدن مثله لردن بيري ده اونون جيناسلاردان اوستاليقلا و يئرينده ايستيفاده ائتمه سيدير. سؤنمز کلاسسيک ادبياتيميزداکي و فولکلوروموزداکي معلوم جيناسلاردان مومکون قدر اوزاقلاشير و تاماميله اوريژينال، اؤزونمخصوص جيناسلي شعرلر يازير. کيچيک بير نومونه ني نظردن کئچيرک:قورخورام کي، بير سؤز دئيم يار گوله،من مثلده گؤز کيمييم، يار گيله.حئيرتديم، يار باغريمدا ياشارکن،اؤزوم نئجه سيغيشميشام-يار گيله؟!

ايضاحا احتيياج دويموروق. شاعيرين دؤردلوکلري نين و باياتيلاري نين اکثريتي، محض بو جور اوغورلو جيناسلارلا ياراديلميشدير. سؤنمز ليريکاسي نين بير جهتيني ده قئيد ائتمه دن کئچينمک اولماز. ليريک نؤوون باياتي ژانري سؤنمزين پوئتيک ايرسينه خاص اولان ان عومده کئيفيتلردن بيري اولدوغوندان، بو باره ده بير نئچه کلمه سؤيله مگي واجيب حساب ائديريک. باياتي ادبياتيميزين ان ايشلک، چئويک، ايلک باخيشدا ساده گؤرونن ژانرلاريندان بيريدير. بو ليريک نؤوون ساري آشيق کيمي قودرتلي نوماينده سي، خالق و يازيلي شعرلريميزده چوخ دیرلي و حيکمت آميز نومونه لري نين اولماسي بلليدير. جسارتله دئمک اولار کي، سؤنمز اولو صنعتکارلاريميزين خوفوندان چکينميه رک بو نؤوده ده اسل صنعت نومونه لري ياراتميش، خالقيميزين قان يادداشي نين ترجوماني اولان باياتي خزينه ميزي اوريژينال، لاکونيک و درين معنالي اثرلري ايله زنگينلشديرميشدير.

مثلن:

بو قاصيد هارادان گليب، هانسي ديياردان گليب.

مکتوبلاري اييله، گؤر، هانسيدي يارادان، گليب؟

و ياخود:ياز گله، گوله باغلار،سارينا گوله باغلار.

شهيدين قبري اوسته،سپيلن گولاب آغلار.

سؤنمز ايستک و آرزولاريني يوکسک پافوس و هاي-هارايلا دئييل، اينجه، تمکينلي، هم ده چوخ عاريفانه بير شکيلده دونيايا بيان ائدير. او، بوغازدان يوخاري بيرليک-بيرليک دئينلردن فرقلي اولاراق:

هر قايچي نين قاداغيني آچاندا،

آيريليقدا تييه لري کوت گؤردوم.

کئچن قوشلار دسته-دسته اوچارلار،

 اونلارين دا ان آزيني جوت گؤردوم

 دئمکله آييق اوخوجوسونون دوشونمه يه، آذربايجان حاقيقتلريني دونيايا بيان ائتمه يه چاغيرير.

سؤنمزين ليريک قهرماني کاميل اينسان، يئتکينلشميش شخصيتدير. او، اؤز تاريخي کئچميشي ايله اؤيونن، گله جگينه اومودلرله باخان وطنداشدير. اييلمزليک خاراکتئري نين ان باشليجا کئيفيتي و مئياريدير. آرزوسو ايسه بوتون اينسانلارا صولح و سعادت، بشريته امين-آمانليقدير. اونون قهرماني شخصي سعادتدن چوخ ايجتيماي منافعيي دوشونور.

سؤنمز موتفککير شاعير اولماقلا ياناشي، گؤزلليک نغمکاري، محبت شاعيريدير. داياندي قارشيمدا بير چينار کيمي ميصراعسي ايله باشلانان قوشماسيندا شاعير چوخ گؤزل صحنه يارادير. ساحيلده قاچيشان دالغالار کيمي سئوگيليسي نين بيرجه آن اوزونه گولوب گئتمگيني اوستاليقلا تصوير ائدير. شاعير سينه سينده بوي آتان، اونولا اؤيونن، فقط الي-الينه چاتماق عرفه سينده ايکن اوندان قاچان، اوزاقلاشان سئوگيليسي باره ده بئله دئيير:

يالوارديم، دانيشسين من قولاق آسيم،

قملريم داغيلسين، توي اولسون ياسيم.

دينمه دي، ايسته ديم باغريما باسيم،

اليم کؤلگه سينه يئتيشدي گئتدي.

شاعيرين اوخودوم جيناس ايندي...  ،

يانماسام اريمرم  ، اريمه سه م يانمارام  ،

بو داغلار ارن داغلار،

اوزاغي گؤرن داغلار.

خويدا بير ايگيد اؤلسه،

 ياسيندا مرند آغلار.

شئه مونجوغو باشليقلاري آلتيندا توپلانان شعرلري ادبياتيميزين زنگين خاطيره سينه لاييقلي تحفه لردير و بو شعرلر شاعيرين تخلوصو کيمي سؤنمز، ابدی ياشاردير.

 

ايستيفاده اولونموش کيتابلار:

1.صابير اميروو. بو کاروانين يولو گونئيه دير، باکي، نورلان  ، 2007، ص، 22

2.و. احمد. گونئی آذربايجان پوئزيياسي، باکي، 2004، ص. 274

3. ائ.فواد (شوکورووا). ک.م. سؤنمز، گونئی آذربايجان ادبياتي تاريخي، 2 جيلد، قانون نشرياتي، 2013، ص.477

4. خ. هوممتووا. عيسانين سون شامي، يئني فيکير قزئتي، ن 15، 13 آپرئل 1990

5. ميرزه ايبراهيموو. اوميد و کدر پوئزيياسي، آذربايجان  ، 1988، ن 4، ص. 136

6. کريم مشروطه چي سؤنمز. شئه مونجوغو، تبريز، ارک نشرياتي، 1996، ص.3

7.ک.م. سؤنمز. شئه مونجوغو، ( م. مئهديبيووا، اؤن سؤز، ترانسيتئراسييا و ترتيب)، باکي، علم  ، 2003، ص.78