يرزه علي اکبر صابیر و گونئي آذربايجان MİRZƏ ƏLƏKBƏR SABİR VƏ GÜNEY AZƏRBAYCAN LƏTİFƏ MİRZƏYEVA

  ميرزه علي اکبر  صابیر و گونئي آذربايجان

MİRZƏ ƏLƏKBƏR SABİR VƏ GÜNEY AZƏRBAYCAN

LƏTİFƏ MİRZƏYEVA

 لطيفه  ميرزيئوا 

 

 

 

شرقين بؤيوک شاعيري، دونيا شؤهرتلي ساتيرا اوستاسي ميرزه علي اکبر   صابیرين (1862-1911) گونئي آذربايجانين بوتون خالقي، او جومله دن موباريزه جبهه لرينده ووروشان سيلاحلي آداملار، بوتون گونونو سنگرلرده کئچيرن عسگرلر آراسيندا دا چوخ بؤيوک حؤرمتي اولموشدور. تبريزين مشهور شخصلريندن اولان آغايي حاجي ميرزه شبوشتري بديعي سؤزو کسکين سيلاها چئويرن م.ه.صابیر حاقيندا يازديغي «آزادخاهلارين سئويمليسي» سرلؤوحه لي خاطيره سينده بو باره ده دئيير: 

  «…ياخشي ياديمدادير کي، ايرتيجا باش ناظيري ميرزه السکرخان اتابگين اؤلدورولمه سي موناسيبتيله موجاهيدلر، مکتبليلر بؤيوک شادليق و جسي توتموشدولار. نوماييشچيلر گونئي آذربايجانين بؤيوک آزادخواهي «خالقين آتاسي» لقبي قازانميش حاجي مئهدي کوزکناني نين تيجارتخاناسي قاباغيندان کئچرکن حاجي مئهدي يوخاري مرتبه دن خالقا موراجيعت ائديب اتابگين اؤلدورولمه سي موناسيبتيله صابیرين يازديغي شعیري اوخوماغا باشلادي:

 

  «قتل ائله ديز اتابگي، من کي، بو امري دانميرام، 

  وار يئنه مين اتابگيز، يوخسا عمللي قانميرام».

 

…تبريز موجاهيدلري و آزادخاهلاري هميشه سنگرده و موحاريبه  مئيدانيندا صابیرين ستارخان باره سينده يازديغي شعیرلري دؤنه-دؤنه اوخويوب روحلانيرديلار» (7، 85-86). 

  ايشته ستارخان، باخيز، بير نؤو ايقدامات ائديب، 

  بير وزير و شاهي يوخ، دونياني يئکسر مات ائديب، 

 عزتی ايسلامي، وطن ناموسونو يوز قات ائديب، 

  حؤرمتي-حيثيتي-ميلليتين ايثبات ائديب، 

  ايندي دونيانين توجه نؤقطه سي ايرانه دير، 

  آفرينيم هيممتي-والايي-ستارخانه دير (10، 163). 

  ايرانين، تبريزين مشهور ضياليلاري م.ع.صابیر حاقيندا چوخ ديرلي فيکيرلر سؤيله ميشلر. اونلاردان بيري اولان ر.ه.استاراي نين «ونودولماز شاعير» آدلي مقاله سيندن اولان آشاغيداکي سطيرلر ده بؤيوک ماراق دوغورور: 

  «آزربايجانين بؤيوک و مشهور شاعيري صابیر ايرانين آزادليق و مشروطه خواهليق حرکاتينا عالي و ياددان چيخمايان خيدمتلر ائتميشدير. ايران آزادخاهلاري صابیرين شعیرلري درج اولونان «موللا نصرالدين» مجموعه سيني بؤيوک ماراقلا اوخويوردولار. من دئيه بيلرم کي، مرحومون مشروطه و آزادليق حاقيندا يازديغي شعیرلر بيزيم ايرانا بير اوردودان آرتيق کؤمک ائتميشدير» (7، 86-87).  

  آذربايجان ادبياتيندا رومانتيزم جرياني نين گؤرکملي نوماينده سي عباس صحت ده (1874-1918) م.ع.صابیرين اؤز شعیرلري ايله «ايران اينقيلابينا بير اوردودان زياده کؤمک» (9، 112) ائتديگيني سؤيله ييردي. 

  م.ع.صابیرين آدي يالنيز اينقيلابچيلار آراسيندا دئييل، بؤيوکدن کيچييه بوتون خالق کوتله لري آراسيندا دا گئنيش ووسعت تاپميشدير. شاعيرين «هوپ هوپ نامه»سي گونئي آذربايجان و ايران اوخوجولاري نين الدن دوشمه ين ان سئويملي کيتابي اولموشدور. بو اثر ايراندا دا دفعه لرله بؤيوک تيراژلا چاپ ائديلميشدير. دفعه لرله چاپ ائديليب سورعتله ياييلسا دا يئنه ده اهالي نين احتيياجيني تامين ائتمه ميشدير. م.ه.صابیرين، اونون اثرلري نين خالقا تاثيريني باشا دوشن مورتجئلر، باشدا رضا شاه اولماقلا او زامان «هوپ هوپ نامه» نين اوخونماسيني جيدي قاداغان ائتميشدير.  

  گونئي آذربايجاندا م.ع.صابیره توکنمز محبت يارانميشدي. بو محبتين نتيجه سيدير کي،  اونا حسر ائديلن شعیرلر، اثرلرينه يازيلان نذيره لر ده اوستونلوک تشکيل ائدير.  

م.ع.صابیرين اؤلمزليگيندن، اونودولمازليغيندان، اونون اينسانلار اوچون بير آينا اولماسيندان سؤز آچان گونئي آذربايجانين گؤرکملي ساتيرا اوستاسي ميرزه علي مؤجوز شبوستري (1873-1934) «دبي صابیر»، «گؤز ياشيندا قهقهه لر» شعیرلرينده بو دونيا شؤهرتلي صنعتکاري ترننوم ائدير. خالقي نين درديني، مؤحنتيني دريندن دويان، اونون اودونا اورکدن يانان، جاهاني اولدوغوتک دوزو-دوز، اَيريني-اَيري گؤرن صابیري مؤليف «گؤز ياشيندا قهقهه لر» شعیرينده «قارانليقدا يانان بير اولدوز»، «اوفوقده بيتن گول»، «دنيزده بير گؤور» آدلانديرير. لاکين بو «اولدوز»ون يالقيز يانماسيندان، ياشاديغي حياتدا گؤردويونون يالنيز مؤحنت، قم اولماسيندان بؤيوک کدر حيسسي کئچيرير. 

  م.ع.مؤجوز شبوستري «ادبي صابیر» شعیرينده ايسه بو اؤلمز صنعتکار حاقيندا فيکريني بئله تاماملايير: 

  حقير عؤمر سوروب، آخي اؤلسه صابیرلر 

  زامان اونوتماياجاق. 

  بير آينادير او، گلن نسل اونا باخيب گؤره جک 

  کئچن نسيللرين اوردا آغلاييب گوله جک (3، 94). 

  ميللي موستقيلليگي بوتون وارليغييلا ترننوم ائدن مير مئهدي اعتيماد (1900-1981) ايسه «صابیرين روحونا» شعیرينده گونئي آذربايجان خالقي نين م.ع.صابیره موناسيبتيني بئله تصوير ائدير: 

  سندن سني بو اؤلکه ده ياخشي تانيريق بيز، 

  کؤنلوم نئجه قان اولماسين هر دؤورده سنسيز: 

  عؤمرون بويو بو اؤلکه ميزه خيدمت ائديبسن، 

  هاق سؤزلر اوچون قورخولو يوللاردا گئديبسن.  

  بير قايدا وار بيزده، اگر سولسا گولوستان،  

  سولموش گولون عطري آلينار ائوده گولابدان. 

  بيز ده آليريق عطريني اؤلمز اثريندن، 

  هر گون اوخوروق دادلي، گؤزل شعیرلريندن (6، 117). 

  م.ع.صابیرين اؤزو ايله برابر  بير چوخ اثرلري نين ده گونئي آذربايجاندا ياخيندان تانيديلديغي، اورکدن سئويلديگي، درک ائديلديگي، اونلاردان نتيجه چيخاريلديغي اوچوندور کي، اونون بير سيرا شعیرلري ايله برابر «وخوتمورام، ال چکين»، «اکينچي» («مظلوملوق ائديب باشلاما…») ساتيرالاري نين دا تاثيري آلتيندا سايسيز-حسابسيز اثرلر مئيدانا گلميشدير. اونلاردان بيري ده گونئي آذربايجاندا ميللي آزادليق هرکاتي نين عسگري کيمي اؤز شعیرلري ايله يورولماق بيلمه دن  ايرتيجا علئيه اينه  موباريزه آپارميش جعفر مممدزاده کاشيفين (1894-1947) «ال چکين» شعیريدير. اگر م.ع.صابیر «وخوتمورام، ال چکين» ساتيراسيني اؤولاديني اوخوتدورماق ايستمه ين بير ساوادسيز آتايا اونوانلاميشديسا، جعفر کاشيف ايسه ميللي دئموکراتيک دؤولتين يارانديغي گونو عؤمرونون ان خوشبخت گونو حساب ائده رک «ال چکين» شعیرينده آزادليغا قارشي حيله  تورو قورانلارا موراجيعت ائدير: 

  طوطی-تبيم گزير باغدا هراسان، ال چکين 

  قويماريق بايقوش ايله دولسون گولوستان، ال چکين 

  کعبه تک حؤرمتليدير خالقا آذربايجانيميز، 

  بو موقدس تورپاغا قوربان يازيلميش جانيميز.  

  قورتولوش فيکريندگيک، مؤحکملشيب ايمانيميز، 

  آذريلر بير داها اولماز پريشان، ال چکين 

  مؤحتکيرلر بيزلري ائتميشدي تالان، ال چکين 

  فيکريميز آزده ليکدير، ماليکيک خوش نيته، 

  يادلارين قييوملوغو لازيم دئييل بيز ميلته. 

  حاققدن ايلهام آليب قويدوق قدم هورريته، 

  اولموشوق هر فرديميز بير مردي-مئيدان، ال چکين

 

  ايستريک دايم قوراق عدل ايله ديوان، ال چکين (1، 47). 

  عؤمرونون سونونا کيمي قوزئی آذربايجانين حسرتي ايله قوورولان، هئچ بير آذربايجانلي نين هيجانسيز اوخويا بيلمه ديگي «امان، آيريليق» شعیري نين مؤليفي، اوستاد شاعيريميز محمدحسين شهريارين (1905-1984) «صابیرين خوروزو» («ؤيله بيليرديم کي، دخي صوبح اولوب» م.ه.س.)، صابیر مکتبي نين گؤرکملي داوامچيلاريندان بيري اولان علي اکبر  پاکزاد حددادين (1901-1966) ايسه «دميرچي.. («اکينچي» م.ع.ص.)، اوزون ايللر آذربايجان ادبياتي ساهه سينده بؤيوک بير متانت و عزمله فاصيله سيز چاليشان يحیی شئيدانين (1924-2011) «سن دئين اولدو، من دئين؟» (صابیره نذير) اثرلري ده م.ع.صابیر شخصيتينه و اونون زنگين ياراديجيليغينا بؤيوک ديقت و محبتين تظاهورودور.  

  م.ع.صابیرين شعیرلريندن بؤيوک ايلهام آلان م.م.اعتيماد شاعيرين «ايکي هپند» آدلي شعیريندن تاثيرلنه رک يازميشدي: 

  - نه خبر وار دئ گؤروم؟ 

  - هئچ 

  - دئ گؤروم، ائتمه نيهان 

  - قورخورام… 

  - قورخما، دانيش (7، 87). 

  م.ع.صابیرين يولونو داعوام ائتديرن گؤرکملي شاعيرلردن بيري ده آذربايجان معاريفي نين اينکيشافيندا بؤيوک رولو اولان، تانينميش شاعير محمد بيرييا(1914-1985)دير. اونون قلمه آلديغي شعیرلرده صابیرين تاثيري آيدين نظره چارپير: 

  گئت، هله گئت، آ کارگر، بوش يئره چيرپالانما چوخ، 

  اؤز-اؤزوو بئشيک کيمي اورتادا ييرغالانما چوخ. 

  ميلتي مملکت بيزيم، مرکزو پارلامان بيزيم، 

  دؤولتي جامي جم بيزيم، سلطنتي  کيان بيزيم، 

  شاه ووزرا، وکيل بيزيم، دؤورييه کاميران بيزيم، 

  ايشلري تهره سالميشيق،سن بيزه لووغالانما چوخ(8، 183).  

  بو شاعيرلردن باشقا، ايبراهيم ذاکير (1891-1971)، فخرالدين محزون (1899-1986)، مير مئهدي چاووشي (1909-1967)، بالاش آذروغلو (1921-2011)، موظفر درفشي (1924)، ميرزه هوسئين کريمي (1932) و اونلارجا باشقا شاعيرلر ده صابیري اؤز اوستادلاري حساب  ائديبلر. اونلار دا صابیر کيمي حياتين عئيبجرليکلرينه، فاناتيزمه، حاقسيزليغا قارشي اعتيراض سسي اوجالتميش، هموطنلريني ائلمه، معاريفه، مدنيته شؤوق ائتمگي اؤزلرينه موقدس وظيفه  بيلميش، اونا گؤره ده گئريلييه سبب اولان نادانليغا، مال-دؤولت حريصليگينه، زوراکيليغا قارشي باريشماز اولموشلار. 

  گونئي آذربايجاندا م.ع.صابیرين ساتيرا عنعنه لري نين داعوام ائتديريلمه سي، ساتيريک ادبياتا يئني ايفشا اوسوللاري نين گتيريلمه سي اونو داها دا زنگينلشديرميشدير. 

  م.م.چاووشي نين آشاغيداکي ميصراعلاريني يادا سالاق: 

  ائي سئوگيلي صابیر دئمه ظاهيرده دئييلسن،  

  هر عصرده بير قرنده وارسان اونو بيل سن 

  سندن آليب ايلهام يازيرام مدحيني اوستاد، 

  شاگيردينه لوطفون چوخ اولوبدور ائوين آباد (7، 87). 

  ديرلي قزل و شعیرلري ايله شؤهرت تاپميش علي فيطرت (1890-1945) ايسه «بؤيوک صابیر» آدلي شعیرينده خالقي قفلت يوخوسوندان اويادان شاعيره احسن سؤيله يير: 

  ياتان خالقي اوياتدين دهرده سن، 

  سنين افکارينا، احسنتو احسن 

  توتوبدو عالمي گون تک مرامين، 

  ائل ايچره واردير سايسيز احتيرامين (5، 281). 

  گؤرکملي ايجتيماعي و سياسي خاديم، عاليم، يازيچي، پوبليسيست سید جعفر پيشوري (1893-1947) يازيردي: «صابیرين شعیرلري ايچريسينده ائله پارچالارا راست گليريک کي، اونلار بيزيم ويجدانيميزا نوفوذ ائدير» (11، 126). 

  ميرزه علي مؤجوز شبوستري اکثر شعیرلري صابیر طرزينده يازاراق بؤيوک بير ديوان ياراتميشدير. هئچ تسادوفي دئييل کي، اونو «گونئي آذربايجانين صابیري» آدلانديريرلار. او، اؤز ترجومه حاليندا يازميشدير کي، «من ده خالقيمي صابیر کيمي آييلتماق ايسته ييرم» (7، 87).  

  م.ه.صابیر ياراديجيليغي نين ايران پوئزيياسي نين اينکيشافينا دا  چوخ بؤيوک تاثيري اولموشدور. بونون نتيجه سينده يئني فارس پوئزيياسي نين ياراديجيلاري دا م.ع.صابیرين توخوندوغو بير سيرا مؤوضولارا موراجيعت ائتميشلر.

 لاکين همين مؤوضولاردا يازيلان اثرلرين ايدئيا و مضمونو، ايره لي سورولن پروبلئملره باخيش ايرانداکي ايجتيماعي-سياسي شرايطين طلبلرينه اويغونلاش ديريلميشدير.  بو حاقدا بير سيرا مقاله لر يازان محمد لواي عباسي دئيير: 

«صابیرين آثاري فارس ادبياتينا دا تاثير ائتميشدير. تهراندا نشر اولونان «پئيمان» و «اوميد» مجموعه لرينده بو ايديعايا آيد بير چوخ ميثاللار گؤسترمک اولار. مشهور ساتيريک «بابا شمله» مجموعه سي صابیردن ايلهام آلير. تهرانين ان مشهور قزئتلريندن «دماوند» و «شؤله لر» صابیرين اثرلريندن  چوخ نومونه لر نشر ائتميشدير. صابیره تقليدن فارس ديلينده بير چوخ شعیرلر و قيطه لر يازيلميش و ايندي ده يازيلماقدادير (7، 86-87). 

  آغايي علسگر هيلالي نين «صابیر» آدلي مقاله سينده شاعيرين ايران ايجتيماعي ادبي دايره لرينه تاثيريندن بحث ائديلير. مقاله مؤليفي عئيني زاماندا صابیرين ايرانا خيدمتلريندن سؤز آچاراق دئيير: 

  «مشروطيت و ايران آزادليغينا چوخلو کؤمک ائدن شخصلردن بيريسي ده صابیردير…

 بو شخص دئمک اولار کي، اؤزونو ايران آزادليغينا فدا ائتميشدير» (7، 87). 

  يحیی شئيدا ايسه يازير کي، نيظامي، نسيمي، فوضولي واقيف، سئييد عظيم، صابیر آذربايجان ادبياتي نين پارلاق کؤکونون ان ديرخشان اولدوزلارينداندير. اونلارين اثرلري آوروپا آرييانتاليستلري نين (شرقشوناسلارينين) آغزيني تحسين و تعجوبله آچميشدير» (12، 221). 

  م.ع.صابیر يالنيز شيماللي، گونئلو آذربايجان خالقي نين دئييل، بوتون شرق خالقلاري نين قلبينده اؤز هئيکليني اوجالتميشدير. 

  ادبيات 

  1. گونئي آذربايجان ادبياتي آنتولوگيياسي، دؤرد جيلدده، 2 جيلد / ترت. ائد. ز.کبروو، ت.همدوو، ب.ابدوللايئو و ب. ب.، ائلم، 1988، ص. 47. 

  2. گونئي آذربايجان ادبياتي تاريخي، ايکي جيلدده، ايي جيلد. ب.، قانون، 2013، 680 ص. 

  3. گونئدان سسلر / موعاصير گونئي آذربايجان شاعيرلري نين سئچيلميش اثرلري/ /ترت. ائد. ک.مممدزاده، ب.، يازيچي، 1987، ص. 94. 

  4. امدوو ت. سئچيلميش اثرلري بئش جيلدده، و جيلد. ب.، نورلار، 2015، ص. 457-461. 

  5. فيطرت ع. بؤيوک صابیره (شعیر). موعاصيرلري صابیر حاقيندا / ترت. ائد. آ.زامانوو. ب.، اوشاقگنجنشر، 1962، ص. 281-282. 

  6. خندان ج. ادبياتيميزين دونه ني و بو گونو. ب.، يازيچي، 1980، ص. 117. 

  7. خندان ج. صابیر و شرق. اينقيلاب و مدنيت، 1946، ساي 7، ص. 79-89. 

  8. محمد بيرييا. اثرلري / ترت. ائد. اي.قريبلي. ب.، علم، 2010، ص. 183. 

  9. ميراحمدوو ع. صابیري اوخويارکن… آذربايجان، 1987، ساي 5، ص. 103-113. 

  10. ميرزه علي اکبر  صابیر. هوپ هوپ نامه / ترت. ائد. آ.بايراموغلو. ب.، تحصيل، 2012، ص. 163. 

  11. پيشوري س.ج. صابیر حاقيندا. موعاصيرلري صابیر حاقيندا / ترت. ائد. آ.زامانوو. ب.وشاقگنجنشر، 1962، ص. 126-127. 

  12.روستم س. تبريزيم. ب.، گنجليک، 1986، ص. 221.