ادبييات ايمپئرياسينين سولطاني ƏDƏBİYYAT İMPERİYASİNİN SULTANI

DRAMATORQ

  حسينبالا  ميراعلم اوو يازيچي-دراماتورق

 

بشر تاريخي نين اؤلمز سؤز سرکرده سي چينگيز آيتماتوو منيم قلبيمي نئچه اون ايللر اول - هله ائرکن گنجليک چاغلاريمدا  " جميله " ،  " الويداع گولساري " ،  " کؤشک گؤزو "  پووئستلري ايله فتح ائتميشدي. او واختلار تصوورومه گتيره بيلمزديم کي، ميليونلارين سئويمليسينه، قلب سيرداشينا، کؤنول دونياسينا چئوريلميش يازيچي ايله نه واختسا دوستلوق ائده جک، سئوينجيميزي، کدريميزي بؤلوشه جک، قلوباللاشان دونيانين پروبلئملريندن، بؤيوک ادبياتين دوننيندن، بو گونوندن دانيشاجاغيق... 

  اعتيراف ائديم کي، من چينگيز آيتماتووو هميشه افسانه لرده کي  قهرمانلار کيمي تصوور ائتميشم: الچاتماز، اونيئتمز و قودرتلي! 

  ائله بيلميشم کي، او، يئر اوزونده کي  بوتون قيرغيزلارين آتاسي، آغساققالي و خيلاصکاريدير. بلکه ائله بونا گؤره ده، سووئت ايمپئريياسي داغيلاندا، ايستر-ايسته مز، دوشوندوم کي، بو داهي صنعتکار قلمي يئره قوياجاق، خالقيني کابوسدان قوروماق اوچون موباريزه مئيدانينا آتيلاجاق سياسي ليدئره چئوريله جک. لاکين بئله اولمادي   "ادبيات ايمپئريياسي نين "  سولطاني قلمينه Üاديق قالدي و باشا دوشدوم کي، منيم 

اوجور فيکيرلشمگيمين سببي، اصلینده،  او دؤورون خاراکتئريک خوصوصيتلري ايله باغلي ايميش... 

  يوخاريدا قئيد ائتديگيم کيمي، عاغليما دا گلمزدي کي، من نه واختسا چينگيز آيتماتوولا اوزبوز اَيلشه جگم. اونونلا ياخين موصاحيب، دوست اولاجاغام. هر شئي تواضؤکارليقدان اوزاق اولسا دا، دئييم   " خجالت "  پووئستيندن باشلادي. بو اثر  " پوکايانيئ " آدي ايله روس ديلينده نشر اولونموشدو. کيتابين بير نوسخه سيني اصلا باکيلي اولان، آلمانييادا ياشاميش مرحوم دوستوم داويد کوستيوکووسکي، سن دئمه، او واخت قيرغيزيستانين بئلچيکاداکي سفيري چينگيز آيتماتووا چاتديريب. بوندان بير نئچه گون سونرا ايش اوتاغيمدا تئلئفون زنگ چالدي. دستگي گؤتوردوم. چينگيز آيتماتوو ايدي! 

  بلي، اثرلريني سئوه-سئوه اوخودوغوم، ياراديجيليغينا و شخصيتينه حؤرمت ائتديگيم، ساغليغيندا افسانلشن داهي چينگيز آيتماتوو بيردن-بيره، قفيلدن، گؤزلمه ديگيم حالدا منه زنگ ائتميشدي. دوغروسو، برک هيجانلانميشديم. 

  چينگيز آيتماتوو  " خجالت "  پووئستيني اوخودوغونو، قاراباغ مؤوزوسونون بو جور رئال جيزگيلرله ادبياتا گتيريلمه

 

سي نين ياخشي حال اولدوغونو قئيد ائتدي، آخيردا دا دئدي کي، نه واخت بئلچيکايا يولون دوشسه، گؤروشک. خوشبختليکدن 2005-جي ايلين يانوار آيي نين آخيرلاريندا ايش ائله گتيردي کي، بئلچيکايا ايشگوزار سفريم اولدو. 

  ...بروسسئلده، قيرغيزيستان سفيرليگينده داغ جوسسه لي، پئيغمبر سيمالي مودريک ادبيات آغساققالي، تورک دونياسي نين بؤيوک اوغلو مني صميميتله، عاصييا خالقلارينا مخصوص قوناقپرورليکله قارشيلادي. سونرا حيات يولداشي مارييا اورماتوونا آيتماتووا ايله بيرليکده شام سوفره سي اطرافيندا صؤحبت ائتديک. 

  چينگيز آغا اونو آذربايجانلا، تورک دونياسي ايله باغلايان تئللردن دانيشدي. منيم  " خجالت "  پووئستيمين قيرغيز ديلينه ترجومه اولونماسيني قيرغيز يازيچيلارينا 

  تؤوصييه ائتديگيني سؤيله دي. و اؤزونون سون اثرلريندن بيريني - اليازما شکلينده منه وئرديگي  " اوبيت نئ اوبيت "  حکايه سيني آذربايجان اوخوجولارينا اؤز لهجه لرينده چاتديريلماسي آرزوسوندا اولدوغونو بيلديردي. 

  بوحکايه اصلینده چينگيز آيتماتووون  " ابدي گلين "  روماني نين قهرماني آرسئن سامانچي نين آديندان  " ائپيلوق يئرينه "  تقديم اولونور. 

باش بشريت، خالقلار، موحاريبه ، اينسانلارين موحاريبه يه موناسيبتي، اونلاردا موحاريبه  ايله باغلي يارانميش منفي آسسوسياسييالار، موحاريبه لرين اينسان داخيلينده تلاتوملر، ايکيلي حيسس و دوشونجه لر، موناسيبت و ديرلر ياراتماسي بونلارين هاميسي همين حکايه ده اؤز بديعي عکسيني تام دولغونلوغو ايله تاپيب. 

  ياخشي کي، اوستادين بو حکايه ني آذربايجان ديلينه ترجومه ايستگيني باکييا دؤنن کيمي يئرينه يئتيرديم و تانينميش ترجومه چي-شاعير سياووش مممدزادنين ديليميزه چئويرديگي همين اثري   " اؤلدورمه لي

 اؤلمه لي "

  حکايه سيني  " ادبيات قزئتي " نده چاپ ائتديرديم. 

  ائلجه ده اوستادين تؤوصيييه سي ايله چوخ چکمه دي کي، منيم " خجالت " پووئستيم قيرغيز اوخوجولارينا تقديم اولوندو. 

  من بير مقامي خوصوصيله خاطيرلاديم کي، بوروسسئلده ايلک گؤروشوموزده آذربايجانين گؤزل شاعيري، وطنپرور ضياليسي، اصلا قاراباغلي اولان شاهمار اکبرزادنين واختسيز اؤلومونو اورک يانگيسي ايله ديله گتيرنده دئميشدي:  "شاهمار قاراباغلا باغلي چوخ هيجان کئچيريردي. آخيردا اورگي وطن دردينه تاب گتيرمه دي و سوسدو " . 

  چينگيز آغانين حيات يولداشي مارييا خانيم دا شاهماري حدسيز آغرييلا، نيسگيلله يادا سالدي و من باشا دوشدوم کي، شاهمار، آيتماتوولار عاييله سي نين سئويمليسي اولوب! 

  *** 

  ...ايلک گؤروشوموزدن آراميزدا ائله صميمي موناسيبت يارانميشدي کي، سانکي بيز يوز ايللرين دوستو ايديک. همين گون بيز بئش ساعاتدان چوخ بير يئرده اولدوق. خوداهافيسلشيب آيريلاندا چينگيز آغا دئدي کي، صاباح يئنه گؤروشک. 

  سحري گون چينگيز آيتماتوولا ائله قالديغيم  " آميقو "  اوتئلي نين فويئسينده گؤروشدوک. بورادا بير خئيلي صؤحبت ائتديک. او، بوروسسئلده روس ديلينده يازيب-تاماملاديغي  -  " داغلار ييخيلاندا، ياخود دا  ابدي گلين "  رومانينين اليازماسيني  اؤز  دستي-خطي ايله آفتوقراف يازيب منه  وئردي    وه  دئدي:   " بو دونيادا چوخ نادير  حاديثه دير،  هله  هئچ  بير يازيچي  ايشيق اوزو گؤرمه يهن  اثري نين  اليازماسيني  افتوقرافلا اؤز قلم دوسدونا هديييه ائتمه ييب... "  

  اوستاد اليازمانين اوستونو بئله يازميشدي:  " بو اليازماني، اهتيزازلي دويغولارلا،  چوخ حؤرمتلي قلم قارداشيم حوسينبالا  ميراعلمووا باغيشلاييرام. 

  چينگيز آيتماتوو، بوروکسئل، 30 يانوار 2005 "  

  ...قيش دا اولسا، بئلچيکانين (بلژیک) طبيعتي ايله آذربايجانين طبيعتي آراسيندا بير اوخشارليق واردي. هاوا ائله ده سويوق دئييلدي. گونش نازيک تولو خاطيرلادان بولودلارين آراسيندان سوزولوب يئره ايشيق ساليردي. آنجاق من او گون طبيعتي اولدوغوندان دا ايشيقلي گؤروردوم. سانکي گؤي اوزونده جيلولنن گونشين ايشيغينا ادبيات گونشي نين چينگيز آيتماتووون ايشيغي دا قاريشميشدي. 

  او گون اوستاد منه اؤز ياراديچيليغيني اکس ائتديرن  " آيتماتوو ايمپئريياسي "  آدلي بير کيتاب دا باغيشلادي. روس ديلينده چاپ اولونموشدو. مؤليفي روستم رحمانه ليگئو ايدي. دونيا ادبياتي نين بو جانلي کلاسسيکي نين حيات و ياراديچيليغيني اؤيرنمک اوچون بوندان ديرلي نه اولا بيلردي؟ 

  بيز اوتئلدن چيخيب بير چين رئستورانينا گئتديک. بوراداکي ساکيتليک مني هئيران ائتدي. سانکي آداملار سسسيز، سوکوتدا بير-بيرلريني باشا دوشوردولر. بيز بير طرفده اَيلشديک. چينگيز آغا يئنه ده خانيمي ايله گلميشدي... 

  صؤحبت زاماني   چينگيز آغا اؤز حياتيندان  ئله ائپيزودلار دانيشيردي کي،  هر بيري اونون اثرلري قدر افسانوي   ايدي.   70-80-جي يللرده سووئت نوماينده هئيتي نين  ترکيبينده چينه سفر ائديبميش. بير گون آخشام    قالديغي اوتئلده  تئلئفونو زنگ چاليب. دستگي قالديراندا گنج  بير اوغلان  دئيير کي،"سالام منيم آتام، خوش گلميسينيز 

پکينه  "  گنجين صميميتله  " آتام "  دئمه سينه چينگيز آيتماتوو چاشيب قالير:  " آخي بوردا منيم اوغلوم يوخ ايدي. اوغلان سانکي منيم تعجوبومي هيسس ائتدي. او ساعاتجا دئدي کي، من سيزين «آغ گمي» پووئستينيزين قهرماني اولان اوشاغام. بلي، من او واخت همين افسانوي چايلارلا ايسسيک-کولدان کئچيب، اوزه رک بورايا گلميشم. ايندي پئکينده اوخويورام " . 

  صاباحي اوتئلين فويئسينده اللييه قدر طلبه گنجين آراسيندا همين اوغلانلا گؤروشنده حياجاندان آز قالا چيگيز آيتماتووون گؤزلري دولور. 

  او واختدان اوستاد هر ايلين ياييندا ايسسيک-کولا گئديب، ماراغي اولان تورکسويلو گنجلري اورا دعوت ائدير، بير آي اونلارين ايستيراحتيني تشکيل ائتمکله ياناشي اونلارا موحاضيره لر اوخويور. بئلجه او، تورک خالقلاري نين بير-بيرينه ياخينلاشماسي نين واجيبلييني گوندمه گتيريردي. 

  اونو دا قئيد ائديم کي، اونون  " بين الخالق آيتماتوو فوندو "  دا بوتون تورک دونياسي نين اينتئللئکتوال سويييه لي ائليتاسي نين لازيمينجا تظاهورونه چاليشماق ايستگيندن يارانميشدي. بؤيوک اينام هيسسييله دئييردي کي:  " بيز گرک معنوي، مدني عالميميزي دونيا آرئناسينا چيخاراق. بو اوسوللا سوبوت ائدک کي، بيز دونيا ادبياتي نين، عوموميتله، دونيا سويليزاسيياسي نين آيريلماز، هم ده بؤيوک بير حيصه سيگيک... "  

  ...چينگيز تورئکولوويچ دانيشديقجا، تورک دونياسيندان نئچه مين کيلومئتر اوزاقدا بير آوروپا شهرينده اؤز يازيچي طالعييني ياشايان صنعتکارين، بو اوزاقليغا باخماياراق تورک دونياسينا نئجه ياخين اولدوغونو چوخ آيدين هيسس ائديرتديم. 

  او، هردن منيمله قيرغيزجا دانيشيردي. من ده آذربايجانجا جاواب وئريرديم. سانکي هر ايکيميز دئمک ايسته ييرديک: بيز بير-بيريميزه نئجه ده ياخينيق، بيز بير-بيريميزي نئجه ده آيدين باشا دوشوروک... 

  بلي، بوتون تورک دونياسي نين قلبينه حاکيم کسيلن بو داهي صنعتکار بيزه، بيزيم قدر ياخيندير و هيسس ائديرم کي، روحوموزا ابدي هوپوب... 

  ***                       

  چينگيز  تورئکولوويچله  نؤوبتي  گؤروشلريمين  بيري  2006-جي  يلين  مارت  آيي نين اوللرينده اولدو. او،  بورسسئلدن  موسکوايا  تزجه  گلميشدي. زنگلشديک. آغساققالين گؤروشون   " قاراباغا آپاران يول "  قزئتي نين باش رئداکتورو،  شاعير علي ماحمودلا بيرليکده يوللانديق. تئلئفوندا سفر  يولداشيمين موصاحيبه آلماق ايستگيني چينگيز  تورئکولوويچ بيلديرنده  اعتيراض ائتمه ميشدي.  اودور کي،   گؤروشنده علي  ماحمودا  خيطابن  دئدي:   " دوغرودور،آخيرينجي  دفعه هاچان موصاحيبه وئرديگيمي ياديما سالا بيلميرم. آنجاق    هوسئينين خواهيشيني موطلق يئرينه  يئتيره جگم"           

  دونيانين ان آزمان سؤز اوستالاريندان بيري ايله موصاحيبه آپاران باش رئداکتور هيجانيني هئچ جور گيزله ده بيلميردي. قيرغيز شيرنياتي اولان  " چاخ-چاخ "  ايله چاي ايچه-ايچه بير خئيلي سواللارا اطرافلي جاواب وئردي. 

  قئيد ائديم کي، آز سونرا اوستادين  " آذربايجان "  قزئتينده  " ايلهام الييئو قلوباللاشان دونيانين ليدئر ائتالونودور " ،  "قاراباغا آپاران يول "  قزئتينده ايسه  " بيز نهنگ تورک آغاجي نين قوللاري، بوداقلاريييق " آدلي همين موصاحيبه لري اوخوجولار طرفيندن چوخ ماراقلا قارشيلاندي. 

  بو موصاحيبه لرينده بؤيوک يازيچي نين دوستلوغوموزو يوکسک قييمتلنديرمه سي منه روحي قيدا وئرير، منن راحاتليق بخش ائديردي. آدي چکيلن موصاحيبه لري نين سونونجوسوندا اؤلمز اوستادين دئديکلريني خاطيرلاييرام:  " من دوستلوقدا دقيقلييه، هسساسليغا و تمنناسيز موناسيبتلره خوصوصي قييمت وئرن آدامام. بو معنادا حسینبالا ميراعلموولا اوخشارليغيميز چوخدو. همفيکير اولدوغوموزا گؤره طالع بيزي قوووشدوروب. بيز هر بير مؤوزودا فيکير موباديله سي آپاراندا عئيني مخرجه گله بيليريک. يئني يازديغيم روماني تاماملاميشام. ايلک واريانتيني حسینبالا اوخوموشدو، ايرادلاريني، تکليفلريني دئميشدي. ايندي 300 صحيفه ليک سونونجو واريانتيني بو گون وئره جگم کي، صبرله گؤزدن کئچيرسين. اينانيرام کي، بويون قاچيرماياجاق. عوموميتله، معلومات اوچون دئييم کي، هوسئينله هر گؤروشنده اوندان موثبت ائنئرژي قبول ائديرم، منن بهرله نيرم " . 

  سونرا سؤزونه داعوام ائديب " بيز نهنگ تورک آغاجي نين قوللاري، بوداقلاريييق "  آدلي موصاحيبه سينه علاوه  ائدتديگي بو فيکري خوصوصي وورغولادي:  " بيزيم معنوي ياخينليغيميزين نتيجه سيدير کي، سون رومانلاريميزين آدلاريندا دا اويغونلوق وار. حسینبالا  " گلينليک پالتاري " ني يازيب. منيم رومانيم ايسه  " ابدي گلين "  آدلانير، قيرغيز ديلينده  " سارادار کيز "  دئمکدير. اثر موعاصير حياتدان، يئني نسيلدن، سوسيال-مدني، شخصي و عومومي پروبلئملردن بحث ائدير. بورادا هم ده بؤيوک محبتدن، سئوگيدن صؤحبت آچيلير... "  

  آيتماتوو ياراديجيليغي نين منطيقي يئکونو - اؤز اوخوجولاري ايله ويدا اثري حساب اولونا بيله جک بو گؤزل رومان 2006-جي ايلده  "  دروژبا نارودوو "  ژورنالي نين يئددينجي ساييندا درج اولوندو. و ائله همين ايلين نويابريندا، سونرا 2007-جي و 2008-جي ايلده موسکوانين  " آزبوکا "  نشرياتيندا دالبادال بؤيوک تيراژلا ايشيق اوزو گؤردو . 

" ابدي گلين "رومانيندا اوستاد باشدان-باشا طالعيين اويونونو تصوير ائدير. و اثرين اولينده بئله بير سيتات وئرير:  " طالعيين سيرر اولماسي اؤزو بير طالعدير " . 

  روماندا اساس قهرمانلار قار ببيري جابارس و اصلا داغ آولوندان اولان موستقيل ژورناليست آرسئن سامانچيندير. 

  آيتماتوو بورادا جمعيتله طبيعتين، اينسانلا هئيوان حياتي نين، طالعيي نين بنزر پارالئليني آپارير و سوندا دوغما تيان-شان داغلاريندا بو ايکي عذابکئش وارليغين فاجيعه وي يوللاريني بير-بيرينه قوووشدورور. اصلینده داغ اوبرازي روماندا طالعيين رمزي کيمي تصوير اولونور: بورا ايکي حياتي، ايکي اؤلومو بير-بيرينه باغلان موقدس مکاندير. ببيرين آرزوسو داغين زيروه سينه قالخماق، ژورناليستين نيتي اوجا داغلار قوينوندا اؤز سئوگيليسينه قوووشماقدي. بوردا زيروه ابديليگين، اوجاليغين، ابدي گلين حاقيندا افسانه صافليغين، صداقتين سيموولودور. لاکين اينسانلارين پول ائهتيراسي معنوي ديرلري هئچه ائنديريب. 

  ژورناليستين اجنبي اووچولارا - عرب شاهزاده لرينه سسله نيب:  " قار ببيرلريندن ال چکين! درحال بوردان ردد اولون. من سيزه بيزيم حيوانلاري محو ائتمه يه ايمکان وئرمرم. ترپه نين اؤز دوبايلارينيزا و کووئيتلرينيزه، بيزيم موقدس داغلاريميزدان ايتيلين! "  دئمه سي اونو اؤلومه محکوم ائدير... قان تؤکولمه سي نين، تئررورون علئيه اينه اولان بو شخص زامانين - کاپيتاليست جمعيتي نين اؤلومه محکوم ائتديگي اينساندي... او، عرب شاهزاده لري نين اوولاماق ايسته ديگي ببيرله عئيني ماغارادا جان وئرير. 

  ميليونلارلا دوللار قارشيليغيندا عرب شاهزاده لريني ببير اووونا گتيرن سويداشلاري اونو هئيوانين حياتيني اينسان حياتيندان اوستون توتدوغونا گؤره قيناييرلار. 

  بازار موناسيبتلري نين حتّی سئوگييه، اينساني موناسيبتلره تاثير ائديگيني ائپيک ديلده قلمه آلان اديب هارداسا باش قهرمانين خاراکتئري ايله ائله اؤزودور. چينگيز آيتماتووون ديگر اثرلرينده اولدوغو کيمي، بو روماندا دا حيات حاقيقتلري بوتون رنگلري ايله تقديم اولونور. 

  1961-جي ايلدن باشلاياراق رئژيسسورلار آيتماتووون سسئناريلري اساسيندا ماراقلي، يادداقالان بديعي ائکران اثرلري ياراديبلار. شوبهه ائتميرم کي، بير چوخ اثرلري کيمي، اوستادين  " ابدي گلين "  روماني دا چاغداش کينومئتاقرافچيلارين ديقتيندن کنار قالماياجاق! هومانيست ايدئاللار، اينسانلارين طبيعت و جمعيته سئوگيسي چينگيز آيتماتووون قلمه آلديغي ديگر اثرلرينده اولدوغو کيمي  "ابدي گلين " اي نين ده اساس قايه سيني تشکيل ائدير. 

  موتفککير، اينسانپرور چينگيز تورئکولوويچ دوستلوقدا چوخ صداقتلي ايدي. من اونون بوروسسئلده گؤرکملي يازيچي قابريئل قارسيا مارکئسله تئلئفونلا صؤحبتي نين شاهيدي اولموشدوم. قابريئل قارسيا مارکئسله دوستلوق موناسيبتلريني خئيلي دانيشميشدي. بير ايل سونرا قلم دوستونون آغير خسته اولدوغونو بيلنده، من تأسوف هيسسي ايل:  " يقين کي، او، داها هئچ نه يازمير "  دئديم. چينگيز آيتماتوو دئدي: 

" منجه او، ادبياتدا يئترينجه ايشلر گؤروب... "  

  صؤحبت اسناسيندا چينگيز تورئکولوويچ رحمتليک رسول رزا ايله، اونون اوغلو آنارلا، بختييار باهابزاده، شاهمار اکبرزاده و باشقا آذربايجان يازيچي و شاعيرلري ايله دوسلوق موناسيبتلريندن دانيشدي. من اونو آذربايجانا گلمه يه دعوت ائتديم. دئدي:  " گلنده موطلق دوستوم، سيرداشيم، مرحوم شاهمار اکبرزادنين قبريني زيارت ائده جگم. سووئت دؤنمينده بيز تئز-تئز گؤروشرديک... "  

  *** 

   " هر بير ديل اؤز خالقي اوچون بؤيوکدور. و هر کسين اؤز ديلي قارشيسيندا بير اؤولادليق بورجو وار... "  دئين بؤيوک اوستاد قيرغيز و آذربايجان تورکجه سينده  " يورد "  ،  " اوجاق "  مفهوملاري نين بؤيوک معنا توتومو اولدوغوندان دانيشاندا  دئييردي:  " منيم اوجاغيم، يوردوم دونيانين اوچ موختليف ايستيقامتينده دي. دوغما قيرغيزيستانيم، دوغولوب بويا-باشا چاتديغيم، نييم وارسا، هاميسينا گؤره بورجلو اولدوغوم قيشلاغيم او اوجاقلاردان، يوردلاردان عصاسيدي. سونرا موسکوا و ايستانبول گلير. آذربايجاني، باکيني دا اونلاردان آييرماق چتيندير... "  

  تورک دونياسي نين، ائلجه ده آذربايجانين بؤيوک دوستو و تسسوبکئشي اولان چينگيز آيتماتوو، موصاحيبه لري نين بيرينده (5 فئورال 2007) قاراباغ پروبلئمي نين هلليني سوروندورمه چيلييه سالان قرب اؤلکهلري نين ايشغالچي طرفه کؤمک ائتديکلريني وورغولاياراق، پروبلئمين هلل ائديلمه سينده روسييانين دا ماراقلي اولماديغيني ديله گتيرميش، همين پروبلئمين ياراديجيلاريندان بيري نين محض موسکوا اولدوغونو دئمکدن چکينمه ميشدي:  " مثله ني قصدن سوروندورمه لري مني ناراحات ائدير. من قاتارين گئتمه سيندن قورخورام " - دئميشدي. 

  قاراباغدان قاچقين و کؤچکون دوشموش اينسانلارين دوغما يورد-يووالارينا قاييداجاغي گونو اينتيظارلا گؤزله ين آغساققال يازيچي ايشغالا دا، دوشمنچيلييه ده يئگانه سون قوياجاق واسيطه نين صولح اولدوغونو بيان ائديرک هيجان طبيلي دؤيوردو:  " دونيانين قافقاز آدلي جنّتيني تؤکولن ناهاق قانلاردان يوماغين واختيدي... "  

  قيرغيزيستان کئچميش پرئزيدئنتي کورمانبئک باکييئوين فرماني ايله 2008-جي ايلده چينگيز آيتماتووون 80 ايلليک يوبيلئي تدبيرلري نين حاضيرلانماسي و کئچيريلمه سي ايله علاقه دار تشکيلات کوميته سي ياراديلدي، 2008-جي ايل قيرغيزيستاندا  " چينگيز آيتماتوو ايلي "  ائلان ائديلميشدي. بو فرمانلا يازيچي نين يوبيلئيي نين قيرغيزيستاندان خاريجده قئيد ائديلمه سي ده نظرده توتولوردو. 

  اونو دا قئيد ائديم کي، دونياجا مشهور يازيچي نين 80 ايلليگي ايله باغلي وطنيندن کناردا کئچيريلن ايلک يوبيلئي تدبيري آذربايجاندا کئچيريلدي. 

  بو هم ده چينگيز آيتماتووون باکييا سونينجو سفري ايدي. آذربايجانين دوستو اولان چينگيز آيتماتوو وورغونو اولدوغو و چوخ سئوديگي باکييا سونونجو سفري اولدوغونو هئچ کيم او زامان دوشونموردو. اوستادين باکييا همين سفري 2008-ده فئورالين 24-دن مارتين 1-دک داوام ائتدي. 

  آذربايجان رئسپوبليکاسي نين پرئزيدئنتي ايلهام الييئوين 25 فئورال 2008-جي ايل تاريخده چينگيز آيتماتووا باکيدا  " دوستلوق "  اوردئنيني تقديم ائتدي. دؤولت 

  باشچيسي نين تقديمئتمه مراسيمينده کي  فيکيرلري چينگيز آيتماتووون آذربايجانا موناسيبتي نين درين ماهيتيني آيدين صورتده معنالانديرير:  " سيز هميشه، بوتون دؤورلرده آذربايجانين دوستو اولموشسونوز. بو سووئت دؤورونده ده بئله اولوب،...

موستقيلليک دؤورونده ده... چتين آنلاردا سيز هميشه عدالتين، صولحون، امکداشليغين طرفداري کيمي اؤز قطعيتلي سؤزونوزو دئميسينيز " . 

  چينگيز آيتماتوو آذربايجاندا " دوستلوق "  اوردئنينه لاييق گؤرولن ايلک شخص اولدو. آذربايجان رئسپوبليکاسي نين پرئزيدئنتي ايلهام الييئوين دونيا شؤهرتلي يازيچي چينگيز آيتماتووو بو اوردئنل تلطيف ائتمه سي بوتؤولوکده بو بؤيوک سؤز اوستادينا، اونون اؤلمز صنعتينه آذربايجاندا وئريلميش يوکسک قييمتله ياناشي، هم ده بسله نيلن عومومخالق احتيراميني عياني شکيلده ايفاده ائدير. 

  عئيني زاماندا، اوستادا آذربايجانين ايلک عالي تحصيل اوجاغي اولان باکي دؤولت اونيوئرسيتئتينده تورکديللي اؤلکهلرين سياستينه دستک فوندونون قيزيل مئدالي تقديم ائديلدي.باکيدا اولارتکن يازيچي بير سيرا گؤروشلر کئچيريب، آذربايجان يازيچيلار بيرليگي نين، حيدر علييئو فوندونون، باکي شهر ايجرا حاکيميتي نين، صبايل بله ديييه سي نين،  " ليدئر "  تئلئکانالي نين قوناغي اولدو. 

  چينگيز آيتماتوو باکي نين شهيدلر خيابانيندا دا اولموش، آذربايجانين آزادليغي، موستقيلليگي و اراضي بوتؤولوگو اوغروندا جانلاريندان کئچميش وطن اؤولادلاري نين مزارلاري اوزرينه تر قرنفيللر دوزموش،  " ابدي مشعل "  آبيده سي اؤنونه گول قويموشدور. سونرا چينگيز آيتماتوو تورک عسگرلري نين شرفينه اوجالديلميش آبيدني ده زيارت ائتميشدير. 

  آکادئميک ميللي درام تئتاري نين صحنه سينده منيم  "خجالت " پيئسيمين تاماشاسينا باخدي. سونرا تئلئويزييايا موصاحيبه سينده  " حسینبالا ايله روحن او قدر ياخينيق کي، بو تاماشايا باخاندا ائله بيلديم اؤزوم يازميشام " -دئدي.

  سون    گؤروشوموز ائرته سي گون صبايئل  ايجرا حاکيميتي نين  باشچيسي    صاحيب علي اکبر اووون  کابينئتينده اولدو.

چينگيز آغا   دئدي کي، حيدر علييئو فوندونون پرئزيدئنتي، آذربايجانين بيرينجي  خانيمي  مهريبان علييئواگؤروشونده   " خجالت "  تاماشا  حاقيندا دانيشيب.  و   مصلحت گؤروب کي،     مهريبان      خانيم     دا همين تاماشاياباخسين!   بوسؤزلري دئيندن     سونرا    ظارافاتلا قئيد ائتدي کي، اؤز يوبيلئييمه دعوت  اولونسام   دا    سنين تبليغاتينلا مشغولام...                  

  باکييا سون سفريندهچينگيز آيتماتوو  اؤز  موصاحيبه لري نين بيرينده بيلديردي کي، ديپلومات کيمي فعاليتيمي تئزليکله باشا ووراجاغام و اؤلکه مه قاييداجاغام. آذربايجانلا علاقه لريمي بوندان سونرا دا داوام ائتديره جگم. منيم بورادا تکجه اوخوجولاريم يوخ، هم ده ياخين دوستلاريم ياشاييب فعاليت گؤستريرلر. 

  اوستادلا باغلي خاطيره لرين بير قيسمينه چيراق توتماغيم يقين کي، مني تانييانلارا غريبه  گلمز. مقصديم دوستلوغوموزون هانسي تمللر اوستونده قورولماسيني خاطيرلاتماق اولدو. 

  دوز سکسن ايل اول قيرغيزيستانين شکر کندينده، تورئکولون عاييلهسينده ناظيمه آدلي خانيم-خاتين تاتار قيزي دونيايا بير اوغول بخش ائتدي.

 بخش ائتدي کي، سؤزون قودرتي ايله دونياني شر-بؤهتاندان قوروسون، اينسانلاري معنوي پاکليغا، دوستلوغا، قارداشليغا چاغيرسين. بشريتين معنوي دونياسينا، ادبيات خزينه سينه  " جميله " ،  " عصره برابر گون " ،  "اعدام کؤتويو " ،  "دنيز کناري ايله قاچان آلاباش " ،  " آنا تارلا "  ،  " آغ گمي "،  " ابدي گلين "  کيمي شئدئور اثرلريني بخش ائتسين. ائتدي ده! دونيايا گلدي کي، اؤزونون دئديگي کيمي، تاتارلي، قيرغيزلي، اؤزبکلي، قازاخلي، تورکمنلي، آذرتورکلو، قاراقالپاقلي، باشقيردلي نهنگ تورک آغاجي نين کؤکونو داها مؤحکم، قول-بوداقلاريني داها شاخه لي ائتسين. و ائتدي ده! 

  دونياني قاريش-قاريش گزن، دئمک اولار کي، بوتون خالقلارلا اؤز آنا ديللرينده اونسيتده اولان سؤز سرکرده سي چينگيز تئرئکول اوغلو آيتماتوو گؤز ببگي کيمي قوروماغا چاليشديغي و جانيندان چوخ سئوديگي دونيا ايله ويدالاشدي. بئلجه دونيا سؤز آتاسيني ايتيرمکله چينگيزسيز قالدي. 

  چينگيز آيتماتوو بيزيم ياشيدلاريميزن اوشاقليق و گنجليک دؤوروموزون يازيچيسيدير. او، قيرغيزيستانين دونيا مدنيتينه بخش ائتديگي ميسيلسيز بير تؤهفه دي. اونون آدي دونيا ادبياتيندا يئني نسرين ابديياشار ياراديجيلاري سيراسينا داخيل اولموشدور. 

  تورک خالقلاريندان هر بيري چينگيز آيتماتووو اؤز خالقي نين دوغما يازيچيسي اولاراق قبول ائدير. چينگيز آيتماتوو دونيادا اوخشار طالعلري ياشايان، اينسان، زامان، جمعيت و گله جک حاقيندا عئيني دوشونجه ده اولان خالقلارين هاميسي نين يازيچيسيدير. 

  آکادئميک عيسی حبيبلي يازديغي کيمي، چينگيز آيتماتووون 20 ايل اول مئيدانا چيخميش  " موحاريبه  کولتونون يئرينه موطلق مدنيت گلمه ليدير "  چاغيريشي بو گون دوننکيندن ده آکتوال سسله نير. ميلليليک و بشريليگين چينگيز آيتماتوو مودئلي اينسانليغا عدالت، صولح، بيرليک ود ائدير. 

  چينگيز آيتماتوو دئييردي :

 " اينجه سنت اينسانلاري نيکبينلييه، خوشبختلييه، حيات وئريجي قوووه يه چاغيرماغا بورجلودور. لاکين او دا بير حاقيقتدير کي، اينجه صنعت اينساني درين دوشونجه لره غرق ائتمه لي، اوندا گوجلو مرحمت حيسسي اوياتمالي، شر قوووه لره اعتيراض ائتمگي، حاقين تاپدالانديغي زامان کدرلنمگي، سارسيلماغي و عدالتين برقرار اولماسي اوچون هر آن موباريزه يه آتيلماغا حاضير اولماغي باشا سالير و يولونو گؤسترير " . 

  اون اوچ ايل اؤنجه، " روحونو گؤزلرينده گؤردويوم صنعتکار "  آدلي ائسسه- خاطيرمده يازميشديم:  " ...بيلميرم، روحلاري گؤرن اولوبمو؟ آنجاق من چينگيز آيتماتوو اون- دونيانين فخر ائتديگي بو داهي اينسانين روحونو گؤزلرينده گؤردوم... "