روس ادبييياتيندا شرق و اسلام موتيولري RUS ƏDƏBİYYATINDA ŞƏRQ VƏ İSLAM MUTİVLƏRİ

 

DR. MƏTANƏT VAHİD

دکتر متانت واحيد 

 

ايسلام و شرق موتيولري، اونلارلا باغلي سوژئت و اوبرازلار روس ادبياتيندا بيردن-بيره دئييل، تدريجن مؤوجود اولماغا باشلاميشدير. قديم روس آبيده لرينده، دئمک اولار کي، شرق ائلئمئنتلرينه هئچ راست گلينمير، يا دا بو ائلئمئنتلر چوخ جوزي شکيلده تظاهور ائدير. روس صنعتکارلاري نين شرقه و قيسمن ده ايسلام دينينه ماراغي نين اون یئدئینجی عصرين سونلارينا دوغرو فورمالاشديغيني دئمک مومکوندور. محض بو دؤورده روس رومانتيکلري دوغما ادبياتدا شرق موتيولريندن ايستيفاده ائده رک، خوصوصي بير ايستيقامت   " شرق  اوسلوبو "  ياراتميشلار. بونا سبب رومانتيکلرين عوموميتله ديني کيتابلاري و او جومله دن،  " قرآن " اي ديني ماهيتي ايله ياناشي، هم ده يوکسک سوييه لي بديعي اثر حساب ائتمه سي ايله باغلي ايدي. بئله کي،  " قرآن "  اونلارا يئني صنعت اثرلري يارادا بيلمک اوچون بول ماتئريال وئرن عوضسيز منبع ايدي.

 " قرآن "  ايلک دفعه  روس ديلينه 1716-جي ايلده بؤيوک پيوترون گؤستريشي ايله پيوتر پوستنيکوو طرفيندن ترجومه اولونموشدور (اوريژينالدان دئييل، فرانسيز ديليندن).  " پوستنيکووون ترجومه سينده فرانسيز نشرينده کي  قوصورلار  بير سيرا ايفاده و حيصه لرين ايختيصاري ايزله نيلير. عئيني زاماندا، ترجومه يه وئريلميش باشليقدان ترجومه چي نين ايسلامين و قرآنين ماهيتيني آنلاماديغي گؤرونور. "  (ع.حاجيلي  " قرآني کريم روس ادبياتيندا " ) اوزون مودت همين ترجومه نين د.کانتئمير طرفيندن ائديلديگي فيکرينده اولموشلار. 

      17 عصرين سونلاريندا ايسه  " قرآن "  عرب ديليندن روس ديلينه ترجومه ائديله رک" محمدين يازديغي کيتاب "  کيمي اوخوجولارا تقديم ائديلدي. بو ترجومه نين مؤليفي روسييا علملر آکادئميسياسي نين موخبير عوضوو، دراماتورق م.ي.وئريووکين ايدي. بو ترجومه نين ده کئيفيتي نين يوکسک اولدوغونو دئمک اولماز. لاکين ايللر کئچديکجه  " قرآن "  ترجومه لري نين و روسييادا اونو کاميل صنعت نومونه سي کيمي ديرلنديرنلرين سايي آرتيردي.  

 روس ادبياتي نين  " قيزيل دؤورو "  آدلانديريلان 19 عصرين 20-30-جو ايللرينده صنعتکارلارين اثرلرينده شرق و ايسلام موتيولريندن ايستيفاده داها گئنيش وسعت آلميشدي. بونون سببلري  " شرق رومانتيزمي "  ايله همين دؤور شاعيرلري نين سئوگي ليريکاسينداکي پسيخولوگيزمين درينليگي، شخصي حيسسلرين قاباريق ايفاده اولونماسي، ائموسيونالليغين يوکسک سويييه يه چاتماسي کيمي اورتاق جهتلرين مؤوجودلوغو ايدي. ايسلام فلسفه سينده کي  آللاهين و ياراديليشين بيرليگيني ايفاده ائدن  " توحيد "  آنلاييشي روس رومانتيکلريني وارليغين فلسفي درکينه يؤنلنديريردي. 19 عصرده روس صنعتکارلاري نين موسلمان شرقينه ماراغيني شرطلنديرن سببلردن بيري هم ده ايجتيماي ماراغين و علمي-نظري آراشديرمالارين آرتماسي ايله باغلي ايدي. بئله کي، بو دؤورده شرقشوناس-عاليملرين بو ساحه ده کي  آراشديرمالاري و شرق ديللريندن ترجومه لرين سايي دورمادان آرتماقدا ايدي. 17 عصرین سونلاريندان باشلاياراق، شرق دونياسي نين اينجيلري روسييادا کوتلوي شکيلده ترجومه ائديله رک درج اولونماغا باشلاميشدير. ائله تکجه روسلارين  " اَيلنديره رک دوشوندورن، دوشوندوره رک اَيلنديرن صنعتکار "  آدلانديرديقلاري سدي نين اثرلري دفعه لرله موختليف صنعتکارلار طرفيندن ترجومه ائديليب روس اوخوجوسونا تقديم ائديلميشدير. ديگر کلاسسيک شرق صنعتکارلاري دا ماراق دايره سيندن کناردا قالميردي. شرق مودريکليگيني ايفاده ائدن روايتلر و لطيفه لرين  ياييلماسي دا بو باخيمدان موعين اهميته ماليکدير.  

19 عصرین اوللرينده روس صنعتکارلاري نين شرق موتيولرينه کوتلوي شکيلده اوز توتماسي نين سببلريندن بيري ده قربين تاثيري ايدي. بئله کي، هؤتئنين  " شرق-قرب ديواني " نداکي  " شرق شعيرلري " ، بايرونون  " گاوور " ،  " آبيدوس گليني "  اثرلري، جونسونون  " راسسئلاس "  روماني و ديگر اثرلر روس صنعتکارلاري نين بؤيوک ماراغينا سبب اولموش و تبيي کي، بو ماراق اونلارين ياراديجيليغينا اؤز تاثيريني گؤسترميشدير. باشقا سؤزله، ايسته نيلن ساهه ده اولدوغو کيمي، ايسلامي دوشونجه نين روس ادبياتينا يول تاپماسي مثله سيني ده کومپلئکس شکيلده ديرلنديرمک لازيمدير. 

 روس ادبياتيندا مشهور اولان  " شرق حکايتلري "  سيلسيله سي تانينميش يازار و شرقشوناس او.ي.سئنکووسکي نين آدي ايله باغليدير. هجج زيارتينه گئدن او.سئنکووسکي عرب شرقيني اوچ ايل مودتينده سياهت ائتميش، سفر زاماني گؤروب-ائشيتديکلري ايله باغلي چوخلو يازيلار يازميش، ايسلام دونياسي حاقيندا بير چوخ علمي آراشديرمالار آپارميشدير. بئله مشهور شرقشوناسلار سيراسيندا ن.ن.بئرئزين، خ.د.فرئن، آ.و.بولديرئو و باشقا تدقيقاتچيلارين آدلاريني دا چکمک اولار. بو مؤليفلر حساب ائديرديلر کي،  " قرآن " ي اؤيرنديکدن سونرا شرق دونياسي نين مئنتال خوصوصيتلريني نظره آلاراق، حتّی  " اينجيل " اي ده فرقلي راکورسدان ديرلنديرمک اولار. بئله فيکيرلر روس رومانتيکلري نين ياراديجيليغيندا شرق موتيولري نين يئر آلماسيندا، اوسلوبي جهتدن فورمالاشماسيندا اهميتلي رول اويناميشدير.  

بير چوخ روس ضياليلاري موسلمان شرقيني يالنيز علمي ماتئرياللارين دئييل، عئيني زاماندا، بديعي اثرلرين کؤمگيله اؤيرنمه يه، تانيماغا باشلاميشلار. بئله کي، سدي، هافيز، نيظامي، فيردووسي، جامي کيمي کلاسسيکلرين اثرلري شرق دونياسينا و ايسلام تفککورونه بلد اولماق اوچون اسل خزينه ايدي. بعضي مؤليفلر حساب ائديرلر کي، روس ادبياتيندا  شرق و ايسلام مؤوزوسو سادجه اورنامئنت رولونو اويناميش، روس صنعتکارلارينا اؤزلرينه تنقيدي ياناشما اوچون ايستيفاده يه ايمکان ياراتميشدير.  

  19 عصر صنعتکارلاري ايچريسينده آ.قريبويئدوو، پ.ويازئمسکي، س.قلينکا، پ.چاادايئو، خوصوصيله، م.لئرمونتوو و آ.پوشکي نين اثرلرينده ايسلام کومپونئنتلري مؤوجود ايدي. بؤيوک روس فيلوسوفو و.سولوويووون  " محمدين حياتي " ، قوقولون  " المامون. تاريخي سعجيييه "  کيمي اثرلري روسييادا شرقه اولان ماراغين يالنيز ائتنوقرافيک دئييل، عئيني زاماندا، معنوي-پوئتيک سجيييه داشيديغينا ايشاره دير. اينسانلارين برابرليگي ايدئياسي نين ساديق طرفداري اولان فيلوسوف و شاعير و.سولوويوو 1896-جي ايلده  " محمد. حياتي و ديني تعليمي "  آدلي اوچئرکينده يازيردي کي، ايسلام پئيغمبري حقيقي دي نين مضمون و ماهيتيني توحيدده گؤرموشدور. سولوويوو ايسلامين ان موهوم اؤزلليکلري آراسيندا نيت و عمللرين گؤزلليگيني گؤروردو. عاليم ايسلام دينينه شاميل اولونان  " جهالتي و فاناتيزمي يايان، زور و گوج حسابينا ياييلميش دين "  آنلاييشلاري نين اصلینده بو دينه و محمد پئيغمبره (ص.) قارشي حاقسيزليق اولدوغونو جسارتله وورغولاييردي. او يازيردي:  " مهممه دين ديني بوندان سونرا اينکيشاف ائتمه سه  ده، گئنيش اهاته ده ياييلاجاق؛ چونکي  " قرآن " اين معنوي قيداسي بوتون بشريت اوچون گرکليدير. "   

 روس ادبياتيندا ايسلامي متنلرين يارانماسي نين سببلريندن بيري ده قافقاز فاکتورو ايدي. چار روسيياسي سياسي فعاليتينه گؤره نارازي اولدوغو صنعتکارلاري، عادتن، قافقازا سورگون ائتديريردي و بو فاکت همين سؤز آداملاري نين ياراديجيليغينا تاثيرسيز اؤتوشموردو. آ.س.پوشکين ده جنوبا سورگون اولوندوغو زامان چرکزلر، آرناوتلار، کريم تاتارلاري کيمي موسلمان اهالي ايله سيخ اونسيتده اولموش، اونلارين ميشتي و مدنيتي ايله ياخيندان تانيش اولموشدور. شاعيرين ياراديجيليغينا نظر سالساق، گؤرريک کي، اونون اثرلرينده شرق آنلاييشي ايسلام مدنيتي کونتئکستينده مئيدانا چيخير. پوشکي نين بوتون ياراديجيليغي بويو شرق اونو جلب ائتميشدير: او، مشهور شرقشوناس ن.بيچورين ايله دوستلوق ائتميش، کيتابخاناسيندا ايسلام فلسفه سيني و ادبياتيني اکس ائتديرن چوخلو سايدا کيتابلاري اولموشدور. شاعيرين اولو باباسي نين عرب اولماسي دا اونون ايسلاما ماراغيني آرتيران سببلردن اولموشدور. پوشکين  " بؤيوک پيوترون عربي "  پووئستينده باباسي ايبراهيم هاننيبالين اوبرازيني ياراتميشدير. 9 شعيردن عيبارت اولان   " قرآنا نذيره لر "  سيلسيله سي،  " تاليسمان "،  " قافقاز اسيري " ،  " باخچاساراي فونتاني " ،  "ايبليس"  و س. اثرلرينده پوشکين شرق موتيولريندن ايستيفاده ائتميشدير. او،  " قرآن " آ موراجيعت ائدن ايلک روس يازاري اولموشدور. تدقيقاتچي ک.قوردئيئو قئيد ائدير کي،  " قرآنا نذيره لر "  آدي ايله يازديغي شعيرلرده مؤليفين مقصدي هئچ ده روس اوخوجوسونو موقدس کيتابدا يئر آلميش ديني-حوقوقي مثله لرله تانيش ائتمک اولماميش، بو اثرلر صيرف  ليريک پوئزييا نومونه لري اولاراق مئيدانا چيخميشدير.  

  م.لئرمونتووون دا ياراديجيليغيندا شرق موتيولري اؤزونمخصوص يئر توتور. گنج شاعيرين  " آشيق قريب"،  " ايبليس " ،  " متسيري "  کيمي اثرلرينده بو موتيولر داها گئنيش عکس اولونور. سون ايللرده بعضي تدقيقاتچيلار اونون شرقه ماراغي نين آتا-بابالاري نين موسلمان اولماسي ايله علاقه لنديريرلر. م.سينئلنيکوو م.لئرمونتوو حاقيندا دئييردي:  " بيرباشا حاقيقتي سونا قدر دئمک لازيم گه لرسه، اعتيراف ائتمه ليگيک کي، خاليص پروواسلاو شئيرلري يازان مؤليف هم ده موعين درجه ده موسلمان اولموشدور. "  تدقيقاتچي مريم واحيدووا ايديعا ائدير کي، م. لئرمونتوو و ل.تولستويون قافقازي اورکدن سئومه سي نين سببي يالنيز بو مکانين قنيرسيز گؤزلليگي دئييل، هم ده اونلارين اصلا چئچئن اولماسي ايدي. مؤليف يازير کي، لئرمونتوو م.سينئلنيکووون دئديگي کيمي،  " موعين درجه ده "  دئييل، ايلک نؤوبه ده موسلمان اولموش و اؤزونو درک ائدندن خريستيانليقدان اوزاقلاشميشدير. بس بو فيکير اونون موسلمانليغي قبول ائتديگي فيکريني ايديعا ائتمک اوچون يئترليديرمي؟ تدقيقاتچي خانيم ميخايل يورييئويچ لئرمونتووون، اصلینده، روسييانين ان قاتي دوشمنلريندن اولان بئيبولات تايمييئوين اوغلو اولدوغونو يازير. لاکين بو فيکير يالنيز فرضيييه اولاراق قالير و دليللرله ايثباتيني تاپمير. اودور کي، بو ايديعالارين حاقيقتي نه درجه ده عکس ائتديرمه سي ايله باغلي هله کي، دقيق فيکير يوروتمک اولمور. شاعيرين اثرلرينده ايسلام موتيولرينه گئنيش يئر آييرماسي ايسه گؤز اؤنونده دير. 

  روس شاعيرلري نين  " ايسلام آنتولوگيياسي " ندان بحث ائدرکن اثرلرينده م.لئرمونتووون تاثيري آچيق دويولان آ.پولئژايئوين  " حرمخانا " ،  " قارا هؤروک " ،  " سولطان " ، و. بئنئديکتووون  " ابدولقاديرين مکتوبو ،  " خليفه و قول "  شعيرلريني ده اونوتماق اولماز.  

ايسلام تفککورونون روس ادبياتينا گوجلو تاثيري نين ايکينجي مرحله سيني 19-خخ اسرلره آيد ائتمک اولار. اي.بوني نين ياراديجيليغينداکي   " قرآن "  موتيولري، ن.قوميليوو و ب.لاپي نين صوفي پوئتيکاسيندان يارارلانماسي فاکتلاري فيکريميزي تصديقله يير. حيات و ياراديجيليغيندا جيدي پروبلئملرله اوزلشن اي.بو نين چيخيش يولونو ديني کيتابلارين موطاليه سينده گؤرموش، باشقا ديني کيتابلارلا ياناشي،  " اينجيل "  و  " قرآن " ي داها جيدي شکيلده اوخوماغا باشلاميشدير. حياتي نين بو مرحله سينده قلمه آلديغي  " ايبراهيم " ،  " کؤثر " ،  " قدير گئجه سي " ،  " سيرر "  و س. اثرلرين سوژئتي  " قرآن " دان گؤتورولموشدور.  

زادگان اصيللي ل.تولستوي گنجليگي نين موعين بير حيصه سيني قافقازدا حربي خيدمتده کئچيرميشدير. آوتوبيوقرافيک سعجيييه لي  " کازاکلار "  اثري و  صنعتکارين اؤز ساغليغيندا نه قدر جهد گؤسترسه ده، درج ائتديره بيلمه ديگي  " حاجي موراد "  پووئستي نين اساس قهرمانلاري دا ائله اونون بورادا تانيديغي رئال شخصلرين پروتوتيپلريدير. بو اثر و عوموميتله، يازيچي نين بوتون ياراديجيليغي سوبوت ائدير کي، اونون شرقه ماراغي يالنيز ائتنوقرافيک دئييل، داها چوخ معنوي-پوئتيک خاراکتئرلي اولموشدور. عوموميتله، شرق مدنيتي و ادبياتي ايله ياخيندان ماراقلانان ل.تولستوي، خوصوصيله، عؤمرونون سونلارينا ياخين  " قرآن " اي و ديني کيتابلاري چوخ موتاليه ائتميشدير. سونراکي ايللرده او، ميصيرين موفتيسي ابدو موهممدله و بير چوخ کريم تاتارلاري ايله يازيشميش و بو يازيشمالار دا اونون ايسلام حاقيندا تصوورلري نين داها دا آرتماسينا کؤمک ائتميشدير. تولستويون 1895-1910-جو ايللري اهاته ائدن گونده ليکلرينده دؤنه-دؤنه محمد پئيغمبرين (س.) آدي چکيلير، اونون يايديغي دي نين ان اوستون دين اولدوغو بيلديريلير. صنعتکارين ديني دونياگؤروشو، آللاه، روح، اخلاق و س. مسله لر حاقينداکي غئيري-اورجينار فيکيرلري ياشاديغي جمعيت اوچون قبولئديلمز اولموش، حتّی 1901-جي ايلده او، پراووسلاو کيلسه سيندن قووولموشدور. گونده ليکلريندن بيرينده او يازيردي کي، کيلسه عیسی مسيحين تعليمينه ضيد بير تعليم فورمالاشديريب و اينسانلاري محض بو يولون دوغرولوغونا اينانديرماغا نايل اولوب. ل.تولستوي اينانيردي کي، خريستيان ديني ده ايلکين فورمادا محض ايسلامين پرينسيپلري ايله سسلشن بير ديني تعليم اولموش و دييشيکليکلره معروض قالميشدير. او، پروواسلاو کيلسه سي نين تقديم و تبليغ ائتديگي  "ايلاهي اوچلوک "  تعليميني قبول ائده بيلمير و بونون عوضينده تک آللاها سيتاييشي تبليغ ائدن ايسلاما اوستونلوک وئريردي. 1884-جو ايلده يازديغي بير مکتوبدا او بئله دئيير:  " ... حاکيميت نوماينده لري مني ضررلي اينقيلابچي، پراووسلاولار ايسه شئيتان کيمي گؤرورلر. اعتيراف ائديرم کي، بو منه آغيردير... و بونا گؤره ده خواهيش ائديرم، منه سادجه خيرخواه بير محمد طرفداري کيمي باخين، اوندا هر شئي ياخشي اولاجاق."        بو و بونا بنزر فيکيرلرينه گؤره، سون ايللر مطبواتدا بئله بير فيکير يئر آلميشدير کي، گويا لئو تولستوي عؤمرونون سونلاريندا ايسلام دينيني قبول ائتميشدير. لاکين فيکريميزجه، بو، سئنساسسييا ياراتماق خاطيرينه ياييلميش بير خبردير. چونکي اولا، تولستويون گونده ليکلريني اوخويارکن امين اولماق مومکوندور کي، او، عوموميتله يارادان، روح، اؤلومدن سونراکي حياتلا باغلي چوخ دوشونموشدور. لاکين بو دوشونجه لري بيرباشا ايسلاما باغلاماق دوزگون اولمازدي. دونيا شؤهرتلي صنعتکار ايسلام ديني و اونون پئيغمبري ايله ماراقلانديغي قدر بوددايا، کونفوتسي نين فلسفه سينه ده ماراق گؤسترميش، موسلمانلارلا اولدوغو کيمي، بودديستلرله ده يازيشميشدير. حاقيقت آختاريشيندا اولان تولستويون خريستيانليغي ترک ائتديگي و يا ايسلامي قبول ائتديگي باره ده هئچ يئرده کونکرئت فاکتا راست گلينمير. محمد طرفداري اولماغي ايسه سونرادان يئنيلنميش، اصل ماهيتيندن اوزاقلاشديريلميش خريستيانليقدان اوستون توتموشدور. مثله يه باشقا بير يؤندن ياناشديقدا ايسه هر کسين ديني منسوبيتي آللاهلا بنده آراسيندا اولان بير مثله دير، بيزي ايشين بو طرفيندن داها چوخ صنعتکارين ياراديجيليغي نين ايسلاملا باغلي اولان ايستيقامتي ماراقلانديرير. قئيد ائدک کي، بير نئچه ايل اؤنجه تورکيه ده گويا لئو تولستويون مؤليفي اولدوغو  " محمد "  آدلي کيتاب ساتيشا چيخاريلميشدير. حالبوکي بو اثرين مضمونونو محمد پئيغمبرين (س.) حديثلري تشکيل ائدير. ل.تولستوي بو کيتابي 1910-جو ايلده اؤزونون يايين ائوينده  " محمدين قرآنا داخيل اولمايان حديثلري "آدي آلتيندا چاپ ائتميش و باشليغين آلتيندا   "توپلايان: ل.تولستوي "  سؤزلري يازيلميشدير. لاکين ناشيرلر، اصلینده، بو اثرين سادجه حديث توپلوسو اولدوغونو بيلسه لر ده، صنعتکارين دونياميقياسلي شؤهرتيني نظره  آلاراق، بئله بير حيله يه ال آتميش و کيتاب چوخ بؤيوک تيراژلا ساتيلاراق اونلارا خيير گتيرميشدير. تولستويون آيريجا کيتاب حاليندا چاپ ائتديرديگي  " حديسلر "  يازيچي نين 90 جيلدليک ايرثي نين 40-جي جيلدينده يئر آلميشدير. بئله ليکله، تولستويون ايسلام دينينه موناسيبتي مسله سيني عوموميلشديررکن بئله بير قناعته گليريک کي، او، بو دينين ماهيتينه دريندن بلد اولموش و اثرلرينده اوندان فايدالانماغي باجارميشدير.                                                                                                                                                                                                                                                                                                                                                                                                                    

سووئت دؤورونده شرق ادبياتينا ماراق بو زامانا قدر گؤرونمه ميش بير سويييه يه چاتميشدي. همين دؤورده ايسلامي، تصوووفو عکس ائتديرن چوخلو سايدا علمي و بديعي اثرلر عرب ديليندن روس ديلينه ترجومه اولونموشدور. ائله تکجه بو فاکتي خاطيرلاماق يئتر کي، الجزايرلي مؤليف الطاهير والطاهرين  " ال عز "  روماني روس ديلينه ترجومه ائديله رک آلتي ايل عرضينده يئددي دفعه  چاپ اولونموش و تيراژي اوچ يوز اللي ميني کئچميشدير. 1987-جي ايلده  " آسيا و آفريقا يازيچيلاري نين سئچيلميش اثرلري "  آدلي 12 جيلدليک سرييا تاماملانميش و هر جيلد 50 مين نوسخه ني احاطه ائتميشدير. بو رقملر عرب ادبياتينا، شرق و ايسلام موتيولرينه روس اوخوجوسونون بؤيوک ماراغي نين گؤستريجيسيدير.    

تأسوف کي، 90-جي ايللرين سونلاريندان اعتيبارن بو ماراق آزالميش، موسلمان يازارلارين اثرلري نين ترجومه سي و شرق ادبياتي نين آراشديريلماسي ساحه سينده ايشلر  آشاغي سويييه يه ائنميشدير. بونونلا بئله، دئمک اولار کي، 20 عصرین سونلاري، 21 عصرین اوللرينده روس مدنيتي و ادبياتيندا ايسلام تفککورونه يئني بير ماراق مرحله سي باشلادي. اوسته ليک، موعاصير دؤورده بو ماراغين اساسيندا هم ده ايجتيماعي-سياسي پروسسئسلر دورور.