اسماعیل شيخلي 100 مدريک عمر Ismayıl Şıxlı- 100 müdrik ömür Prof. Maarifə Haciyeva پروفسور معارفه حاجی اوا

«اسماعیل شيخلي هم يازيچي، هم عاليم، هم اجتماعی خاديم، هم ده اينسان و وطنداش کيمي خالقيميزين تاريخينده درين ايز، زنگين ادبي ايرث قويموشدور». 

 

  ح. علییو 

  سئويملي يازيچي، تدقيقاتچي عاليم اسماعیل شيخلي نين مارت آييني نين 22-ده 100 ايلي تامام اولدو. شرفلي بير عمر ياشايان اسماعیل قهرمان اوغلو شيخلي 22 مارت 1919-جو ايلده آذربايجانين قازاخ رايونونون شيخلي کندينده ضيالي عاييلهسينده آنادان اولموشدور.  

  آتاسي قهرمان شيخلي قوري سئميناريياسي نين مأذونو ايدي. اسماعیل شيخلي سونرالار اؤزو حاقيندا يازديغي بيوقرافيک خاراکتئرلي بير يازيدا کندي شيخلي حاقيندا ايفتيخارلا سؤز آچاراق يازيردي: «بيزيم کنددن چوخلو شاعيرلر، ضياليلار، حربي سرکرده لر چيخميشدير. 15 جیعصرين مشهور ليريک متفکر شاعيري ملا ولي ويدادي نين قبري ايندي ده  بيزيم کندده دير. اونون موعاصيري، بؤيوک شاعير ملا پناه واقيف ده شيخلي کنديندن 8-9 کيلومئتر آرالي سالاهلي کندينده آنادان اولموشدور. بونلاردان باشقا کاظم آغا صالح، چار زاماني سورگونده اؤلن شاعير مصطفی آغا عاريف بيزيم کنددندير. روس آرتيللئريياسي نين آتاسي، پورت-آرتور مودافيعه سي نين قهرماني، گئنئرال علي آغا شيخلينسکي، آذربايجان سووئت  نثري نين گؤرکملي نوماينده سي مهدي حسين، شاعير عثمان ساريوللي ده بيزيم کندين يئتيرمه لريدير». 

  اسماعیل قهرمان اوغلو اولجه قازاخ پئدقوژی مکتبينده اوخوموش، بير مدت کندده معليمليک ائتميش، 1937-جي جي ايلده آذربايجان پئداقوژي اينستيتوتونون ديل و ادبيات فاکولته سينه داخيل اولموش، مأذون اولدوقدان سونرا 1941-1942-جي ايللرده قازاخ رايونونون کوسالار کندينده معليمليک فعاليتينه باشلاميشدي. 

  1942-جي ايلده اوردويا چاغيريلميش، بؤيوک وطن موحاريبه سي نين ايشتيراکچيسي اولموشدور. موحاريبه دن سونرا باکييا گليب اوخودوغو پئداقوژي اينستيتوتون آسپيرانتوراسينا داخيل اولموش، اؤز علمي-پئداقوژي فعاليتيني داوام ائتديرميش، سونرالار همين اينستيتوتون روس و آوروپا ادبياتي نين کافئدرا موديري اولموشدور. 

  اسماعیل شيخلي هم ده اجتماعی خاديم ايدي. 1965-1968-جي ايللرده يازيچيلار ايتيفاقي نين کاتيبي، «آذربايجان» ژورنالي نين باش رئداکتورو (1978)، يازيچيلار ايتتيفاقي نين بيرينجي کاتيبي (1981-1985)، 1981-1987-جي ايللرده شوروی يازيچيلار ايتيفاقي نين کاتيبي وظيفه لرينده چاليشميشدير. 

  1990-جي ايلده آذربايجان رئسپوبليکاسي عالي سووئتي نين دئپوتاتي اولموشدور. اجتماعی فعاليتي قييمتلنديريلميش، 1984-جو ايلده «آذربایجان خالق يازيچيسي»، 1991-جي ايلده آخوندوو آدينا ادبي موکافاتين لاورئاتي، «شرف نيشاني» (1971)، «قيرميزي امک بايراغي» (1979)، «شؤهرت» (1994)، «بؤيوک وطن موحاريبه سي» (1985) اوردئنلري ايله تلطيف ائديلميشدير.  

  26 اييول 1995-جي ايلده وفات ائتميش، بیرینجی فخري خياباندا دفن ائديلميشدير.  

  اونون وفاتيندان کدرلنن خالق شاعيري نريمان حسنزاده نين يازديغي شعرين بير پارچاسي بئله دير. 

 

  دونيا بير پنجره دي، اسماعیل باخيب گئتدي، 

  قيلينج کيمي پارلادي، گون کيمي شاخدي گئتدي. 

  «دلي کور» قويدو گئتدي، دلي کوره برابر، 

  بير عصرين آغريسييدي، يانغيسييدي بو اثر. 

 

  ياراديجيليغا شعرله باشلاسا دا، اسماعیل شيخلي بير ناثير کيمي يئتيشميشدي. اونون شعرلري اؤزونو تامين ائتمه ميشدي. اسماعیل موعليم اؤزو يازير کي، شعر يازماماغي قطعي قرار وئرديگيم آخشامين سحريسي طلبه يولداشلاريم مني حرارتله تبريک ائتديلر. «ادبيات» قزئتينده ايلک دفعه  شعريم چيخميشدي. «قوشلار» شعري نين اصيل آدي «شئهلر» ايدي، قزئتده بئله گئتميشدي. قونورار سنه دينده ايسه «داشلار» يازيلميشدي.  تبلي دوستلاريمدان بيري منه يئرينده ساتاشيردي: 

   اسماعیل بير شئه تاپدي، 

  شئه چئوريليب قوش اولدو. 

  بير اوخ آتدي محاسيب، 

  قوش وورولوب داش اولدو. 

 (باخ: «دبيات» قزئتي، 27 آوقوست، 1977) 

  او، ادبياتا بير ناثیر کيمي بؤيوک وطن موحاريبه سي حاقينداکي حکایه لريله گلميشدي. «بير عسگرين گونده ليگي». بو اثرده اسماعیل شيخلي اؤز گؤزو ايله گؤردويو، شاهيدي اولدوغو حاديثه لري قلمه آلير. «کئرچ سولاريندا» مينياتور پووئست، «ودلو چارپازلار» (کينو-سئناري)، «حکیم ناغيلي»، «سحرين گؤزلليگي»، «گؤيچک» حکایه لري، «داشکسن»، «آناجان»، «رايکوم کاتيبي» اوچئرکلري، «آيريلان يوللار» و «دلي کور» اثرلري نين اونون ياراديجيليغيندا آيريجا يئري وار. 

  «آيريلان يوللار»ين گنج قهرمانلاري نين معنوي عالميني آچيب گؤسترمک باخيميندان اثر ماراق دوغورور. مانقا باشچيسي زئينب ايله تراکتورچو ماحمودون، آقرونوم ايمرانلا موعليمه نرگيزين تميز محبتلري اثرده رئال جيزگيلرله تصوير ائديلير. 

  اسماعیل شيخلي نين شاه اثري اولان «دلي کور» اثرينده نثريميزين خلقيليک، ميلليليک کاتئقوريياسينا اساسلاناراق، معنوي ديرلره اوستونلوک وئريلميشدير. بو اثر ادبي تنقيدين و اوخوجو اجتماعیتي نين اساسن بيرمنالي قارشيلاشديغي اثردير. اثر ميللي-بديعي نثرين ان ياخشي نومونه لريندن بيريدير. 

  اديبين حاقيندا  واختيله نشر اولونموش بير دوستلوق شارژيندا «دلي کور» حاقيندا دوشونجه لر بئله دير: 

 

  سنين سيار خيالين گزير خيلي زاماندي، 

  اوچوب کئرچ سولاريندان داشکه سنده داياندي، 

  دوشدون «آيريلان يول»ا چوخ گزدين، چوخ دولاندين، 

  ايندي ده «دلي کور»له دوستلوغون مهريباندي. 

 

  اسماعیل شيخلي «دلي کور»و 1960-جي ايللرين اورتالاريندا «آذربایجان» ژورناليندا چاپ ائتديرميشدي. اثر اوخوجو رغبتيني قازاندي. بونون سببي اثرده جريان ائدن حاديثه لرين طبيعیليگي، اثرين  علمي طبيعيليگي، مؤليفين اؤزونون ايفاده طرزينده کي  طبيعيليک و خلقيليک ايدي. اسماعیل شيخلي بير کينودراماتورق کيمي «دلي کور»ون سئناريسيني ده يازميش، بو سئناري اساسيندا چکيلميش فيلم ماراقلا قارشيلانميشدي. 

  او، «ده لي کور»و يازماق اوچون اوزون ايللر آختاريش آپارميش، تاريخيميزين 19-عصر کيمي چوخ مرکب بير مرحله سينده خالقيميزين عادت و عنعنه لريني، حيات و معيشتيني، ميللي ديرلريميزين کؤکلريني، روس چاريزمي نين قافقازدا يئريتديگي موستملکه چيليک سياستي نين ماهيتيني دريندن اؤيرنميش و مکممل بير رومان عرصه يه گتيرميشدي. 

  رومانين باش قهرماني جاهاندار آغا بوتون ضيديتلر ايله تصوير اولونموش اوريژينال بير صورتدير. او، گوجلودور، ايگيددير، لازيم گلديکده سحره قدر آت بئلينده دولاشيب ايگيدليک گؤسترر. قوناقپروردير، غريبه  حؤرمت گؤسترر، عئيني زاماندا دليقانلي و زاليم بير مولکداردير. 

  جاهاندار آغانين تيمثاليندا يازيچي گوجلو کيشيليک ائهتيراسي نين منگنه سينه دوشه رک، اؤز عقيده سينه ضيد گئدن بير شخصين فاجيعه سيني اوخوجويا تقديم ائدير. اونون فاجيعه سي اؤز اخلاقي باخيشلارينا، دوشونجه سينه ضيد چيخديغي گوندن باشلايير. عؤمرونون آهيل چاغلاريندا اؤز مردليک و کيشيليک پرينسيپلريله ضيد چيخاراق تصادوفن گؤردويو گؤزل ملگي ارلي قاديني قاچيرديغي گوندن باشلايير. بو فاجيعه  بو حرکتي اونون اخلاق خيصلتينه بير قان-قادا، ايضطيراب، سارسينتي، عمرلوک پئشمانچيليق گتيرير. 

  يازيچي اي.شيخلي بونون سببيني اينسانين ميللي عادتلري، عنعنه  و ميللي اخلاقي پوزماسيندا گؤرور. اثرده جاهاندار آغانين رحمسيزليگي، قايغيکئشليگي، هسساسليغي و اؤتکمليگي  کيفايت قدر اوريژينالليقلا شرح ائديلير. 

  واختيله اسماعیل شيخلي ايله آپاريلان بير موصاحيبه-سوال بئله اولور: 

  -جاهاندار آغايا بيرطرفلي اوبراز کيمي باخانلارا نه دئيردينيز؟ اونا رغبتينيز «ده لي کور»ده قاباريق اوزه چيخير. 

  -دوغروسو، تام موثبت، تام منفي اوبرازلار بؤلگوسونو قبول ائده بيلميرم. اينسان جانليدير، اونون اؤز داخيلي ضيديتلري، حياتا اؤز موناسيبتلري وار. شابلون موثبت، شابلون منفي بئله قوندارما قهرمانين  صؤحبتيني سالماق دا ايستميرم. 

  بعضن يازيچي بير اينسانين آغ گؤرونمه سي نامينه بوتون ورقي قاپقارا رنگه بويايير. بير مثبت خاطيرينه نئچه سينه اولمازين منفيليکلريني ياپيشديرير. ادبيات اينسانشوناسليق علميدير. بس سنين کيرلتديگين بو «قوشون-قوشون» اينساني هارا آتاق؟ اونو کيم تربييه ائتسين؟ اونلارين عاقيبتيني نئجه دوشونک؟ فوضولي اينسان اوغلونا بئله موناسيبت بسله ييب. «لئيلي و مجنون»و ياديميزا گتيرک. لئيلي موثبت، مجنون موثبت، هر ايکيسي نين واليدئينلري موثبت، نوفل موثبت، ايبن سالام مثبت هامي، هامي موثبت. آما بو موثبتلرين جمعينده يئنه او بويدا فاجيعه  تؤره ييب. اونا سببکاري اولان «منفي قهرمان» زامانين اؤزو ايدي.  

  گؤسترمکدي صنعتين يولو جاهاندار آغاني فئودال دونياسي نين تيمثالي کيمي وئرميشم. بوتون ضيديتلري ايله برابر همين اجتماعی فورماسييانين اؤزونمخصوص ياخشي جهتلري بو کيشيده جمع شکلينده گؤتوروب قلمه آلميشام (باخ: «ادبيات» قزئتي، 1977، 27 آوقوست). 

  «دلي کور»دن سونرا «قانلي تن»، «منيم رقيبيم، «ضرب»، «چيسکين، «حکيمين ناغيلي»، «سحري گؤزله ييريک»، «قارا آت»، «قيزيل ايلان»، «ملئيکه خالا»، «اؤلولري قبريستاندا باسديرين»، «اؤلن دونيام» سيلسيله اثرلر اونون قلميندن چيخيب. 

   «اؤلن دونيام». بو اثر اونون سون اثريدير. خسته ليک رومانيني اؤز الي ايله يازماغا ايمکان وئرمه ديگي اوچون او، روماني ديکته ايله حيات يولداشي اوميده خانيما يازديرميشدي. 

  معنوي تميزليک، دوزلوک، غئيرت، ناموس، عدالت، لياقت اثرين  ايدئيا مرکزينده دايانير. نثر اثرلري اونو «20-جی عصر آذربايجان ادبياتي نين اسماعیل شيخلي زيروه سي» آدلانديرماق ايمکان وئرير. اديب ا.شيخلي اصيل معليم، سئويملي  پئداقوق ايدي. بو سطيرلرين مؤليفي نين بير خوشبختليگي ده اونون اسماعیل شيخلي کيمي مقدس موعليملردن درس آلماسيدير. 

  او، اوزون مودت آذربايجان پئداقوژي اينستيتوتوندا (اينديکي آذربايجان دؤولت پئداقوژي اونيوئرسيتئتي)  " خاريجي اؤلکه لر ادبياتي " ندان درس دئييب. بالزاکي، ويکتور هوقونو، شاندور پئتئري، موپاسان کيمي نئچه-نئچه دونيا شؤهرتلي قلم اوستاسيني سئوه-سئوه تدريس ائديب. آشاغيدا اؤرنک وئرديگيم شعري سانکي بو گون ده اسماعیل موعليم تريبونادان اوخويور:  

  منيم سئوديگيمين اوزو گول-چيچک، 

  گؤزلري گؤمگؤيدو، مينا گولوتک، 

  خيرداجا اللري يومشاقدير، آغدير، 

  ال دئييل، ائله بيل بير جوت زامباقدير، 

  بيرجه اورکجيگي يوخدور، نئيلگيم

 

  غرب ادبياتيندان بيزه اوخودوغو شعرلرين چوخونو اؤزو ترجومه ائديردي.  

  اسماعیل شيخلي بير نئچه درسليک ده يازيب «12 عصر خاريجي اؤلکه لر ادبياتي»، «20-جی عصر خاريجي اؤلکه لر ادبياتي تاريخي» اثرلري طلبه لر اوچون قييمتلي درس وسايطي اولموش، بو گون ده تدريسده ايستيفاده ائديلير.  بير تدقيقاتچي-عاليم، پوبليجيست ايدي اسماعیل موعليم. «مهدي حسینين نثري» آدلي علمي مونوقرافييا بو گون ده اؤز علمي سانباليني ساخلايير. ا.شيخلي هم ده بير چوخ کينوسئناريلرين مؤليفيدير. او جومله دن صمد وورغون حاقيندا چکيلميش سئناري نين.   اسماعیل شيخلي نين صمد وورغونلا تانيشليغي 1937-جي ايلده تصادوف ائدير. او زامان ص.وورغون پوشکي نين 100 ايلليک يوبيلئيي اوچون قازاخ پئداقوژي تئخنيکومونا گلير و اسماعیل معليم  تئخنيکوم ديرئکتوروندان خواهيش ائدير کي، اونو صمد وورغونلا تانيش ائتسين. سونرالار اسماعیل معليمص.وورغون حاقيندا چکيلميش «نه ياخشي کي، دونيادا صمد وورغون وار» فيلمي نين سئناريسيني يازير.  " دلي کور "  اثري نين ده سئناريسيني دها.شيخلي يازيب. 

  اي.شيخلي اجتماعی خاديم ايدي. بير چوخ موکافاتلارا لاييق گؤرولموش اديب آذربايجان ميللي مجليسي نين دئپوتاتي ميلت وکيلي ايدي. ميللي مجليسين طالع يوکلو مسله لرينده سانباللي سؤزو، مولاحيظه لري ايله سئچيليردي. 

  خالقيميزين فولکلوروندا «ساپي اؤزوموزدن اولان بالتالار» ايفاده سي وار. آما بو ايفاده اي.شيخلي نين بير شرحيندن سونرا داها گئنيش آنلامدا ايفاده ائديليب، خالق آراسيندا ياييلدي.  

  1990-جي ايللرده ايچريميزدن چيخان سياسي  ساوادسيزلار اوزوندن خالقيميزين نه لر چکديگي هامييا معلومدور. بئله لريني اي.شيخلي «ساپي اؤزوموزدن  بالتالار» آدلانديريردي. 

  اي.شيخلي «هاميميز بير اولماليييق» آدلي مقاله سينده مودريک خالق روايتيني بئله خاطيرلادير: «بير گون مئشه يه سس ياييلير کي، «بالتا» آدلي  بير آلت پئيدا اولوب، مئشه ني قيرير، آغاجلاري دوغرايير. اورمانلارين سولطاني پاليد آغاجي سرنجام گؤندرير کي، اؤيره نين، گؤرون بالتا دئييلن شئي ندير؟ خبر گتيريرلر کي، بالتا ال بويدا بير دمير پارچاسيدير، آغاجلاري دوغرايير. پاليد سوروشور کي، ال بويدا دمير دمير پارچاسي آغاجلاري نئجه دوغرايا بيلير؟  جاواب وئريرلر کي، اونون اوزون ساپي وار، همين ساپدان ياپيشيرلار و آغاجلاري دوغراييرلار. قاشلاري چاتيلان پاليد يئنيدن سوروشور: بالتانين ساپي ندندير؟ جاواب وئريرلر کي، آغاجداندير. پاليد هؤنکور-هؤنکور آغلايير و بئله جاواب وئرير: بالتا بيزي قيراجاق. چونکي ساپي اؤزوموزدندير». 

  بلي، خالقيميزين ان دهشتلي دوشمنلريندن بيري ساپي اؤزوموزدن اولان بالتالاردير (باخ: اي.شيخلي. «ؤلولري قبريستاندا باسديرين». باکي، «گنجليک»، 1992، ص. 235-236). 

  اي.شيخلي هم ده مشهورلارين آغزيندان چيخيب خالقين آراسيندا ياييلان ايفاده لري و لطيفه لري ده توپلاييب چاپ ائتديرميشدي. بو اوسول اي.شيخلي ياراديجيليغيندا و ادبياتيميزدا تزه ادبي نؤوع حساب ائديلير. اي.شيخلي نين توپلاديغي «دوستوم حسين

عاريفين لطيفه لري» و «دوستوم قاليبين غريبه  احوالاتلاري» سيلسيله حکایه لر کونکرئت  شخصلر و اونلارلا علاقه دار حاديثه لردير.