• خدآفرین کورپولری - خدآفرینده
    خدآفرین کورپولری - خدآفرینده
  • بابک قالاسی - کلیبرده
    بابک قالاسی - کلیبرده
  • شاعیرلر مزاری - تبریزده
    شاعیرلر مزاری - تبریزده
  • سلطانیه گنبذی - زنجان دا
    سلطانیه گنبذی - زنجان دا
  • شیخ صفی الدین مقبره سی - اردبیل
    شیخ صفی الدین مقبره سی - اردبیل
  • طغرولون مقبره سی - تهران - ری
    طغرولون مقبره سی - تهران - ری

گزیده مجلات

Previous Next
  • 1
  • 2
80         برای دریافت این نسخه اینجا کلیک کنید         Read more
77         برای دریافت این نسخه اینجا کلیک کنید         Read more
59         برای دریافت این نسخه اینجا کلیک کنید         Read more
74         برای دریافت این نسخه اینجا کلیک کنید         Read more
57         برای دریافت این نسخه اینجا کلیک کنید         Read more
75     برای دریافت این نسخه اینجا کلیک کنید         Read more

عربيستان حاکيمي اشرف خان

یازان: ميرزه آغا تبريزي  (رساله اخلاقیه کیتابی)

تاپان وترتیب ائدن:دکتر حسین محمد زاده صدیق(دوزگون)

چئویرن:دکتر حسین شرقی دره جک (سوی تورک)

 

 
   

 

«بو احوالات عربيستان حاکيمي اشرف خانا آيددير. او، 1889-جو ايلده تهرانا، يئم پايتاخات چاغيريلير. اوچ ايلليک ایالتين حسابيني اؤده ييب سونرا دؤنور. بو احوالات ایکی پرده ده درام اثري کيمي يازيلميشدير»

خاراکتئرلر:

اشرف خان: حاکيم

کريم آغا: باجي اوغلوسو

قوربان بي: اونون ناظري

حسن بي: اونون خلوتي فراشي

بيرينجي شخص رولوندا

ميرزه طرارخان: موستوفي

ميرزه عبالرحیم: موحرير

آلله داد: فراش

شاهين فراشلاري

کندخدانين نايبي

 

 
 

 

بيرينجي مجليس (بيرينجي سئانس)

  1889-جو ايلده اشرف خان دربارا چاغيريليب تئز بيرينجي شخصين حضورونا قبول اولونور و اورادان ائولرينه قاييدير. گئجه اوتوروب کريم آغا ايله صؤحبت ائدير.     اشرف خان (کريم آغايا): بو گون بيرينجي شخصين بويوروقلاري و ميرزه طرارخانين دئديدکلري پيس دئييلدي. خوش کئچدي.  

  کريم آغا: بو گون ايلک گليشين ايدي. فيکيرلر حديييه لرين و گتيريلن سووقاتلارين يانيندا ايدي. ايشين سونراسينا باخاريق.  

  ناظر قوربان بي: (ايچري داخيل اولوب و تعظیم ائده رک دئيير) آي خان! منيم اوچون امرينيز ندير؟ نه تداروک ائتمه لييم. بورا باش کنددير. هر شئي باهادير. چايخانانين، کارخانين، طؤوله نين، آرپا-سامانين حاق-حسابيني گرک حسابلاياق. بير آيليق عرضاغي بير يئرده آلاق. منيم سيزه تکليفيم بودور.  

  اشرف خان: بير آيين خرجيني حسابلا و منه گتير. بيز بير آيدان آرتيق بورادا قالمالي دئييليک. ايستر حاکيم اولاق، يا اولماياق. قوي من گئديم ديوانا. حساب کيتابي ائديم، نتيجه ني گؤزله يک.  

  قوربان بي: (ياواشجا) آي گئدنلره باخ ائئ! (برکدن) آي خان! بوراسي باش کنددير. هله بو ندير کي؟! بورادا روستم پهليوان اؤز غورورونو گيروو قويوب، هله سن نه دانيشيرسان کي؟ باخ گؤر هله دؤرد آيا ایالتين حسابيني اؤده يه بيله جکسينيزمي؟ اوندا بؤيوک ايش گؤرموسن. بير آي ندير کي؟  سيزين مکتوبلارينيزين جاوابي تهراندان ايکي آيا ده گلمز. او کي قالسين، ایالتين ماليييه ايشلري. او دا بو تئزلييه حل اولماز. 

  کريم آغا: ناظر دوز دئيير. هله-هله پروبلئم حل اولونماز.  

  اشرف خان: اولسون. ايندي گرک سووقاتلاري و حديييه لري وئرک. حضرتلر اوز-گؤزونو تورشوتماميش اونلارين آغزيني باغلاماق لازيمدير.  

  کريم آغا:  بئله ايسه سحر تئزدن هئچ کيم گؤرمه دن آپاريلسين و وئريلسين. 

  اشرف  خان: باخ بو توبادا اوچ مين اشرفي (قيزيل پول)، حضرتي هومايون اوچوندور. مين اشرفي بير ده ترلان و تاووز آت دؤرد کنيزله برابر، بير ده آلتي بارخانا سوقات دا بيرينجي شخصيندير. بئش يوز اشرفي و بير کنيزله برابر، ايکي بارخانا (باغلاما) ميرزه طرارخان موستوفينيندير: قوربان بي صاباح تئزدن آپارسين وئرسين، گلسين. 

  کريم آغا: خان دايي، بونلار دوز. آنجاق تحویلدارين آديني چکمه دينيز. اساس اودور. اونون پاييني وئرمه سه نيز سيزن مين قيزيل پولونوزو اوچ قارا پول کيمي تقديم ائده جک.  

  اشرف خان: دئه داا، بس، مني سوياجاق.  

  کريم آغا: نه دئييرسينيز؟ اگر اون مين تومنله قورتارا بيلسنيز تانرييا شوکور ائدين. ایالتده دئديم، ايکي-اوچ مين تومن بير نئچه باغلاما ايله گؤندرين باش کنده، تا کي حسابين اؤدنيلمه سي قبضيني آلاسينيز. قبول ائتمه دينيز. او واخت کيمسه وئرگي-زاد فيکرينده دئييلدي. بو موستوفيلر بير دسمال اوچون شاهين ساراييني اودلايارلار. سني کي، گؤروبلر آا، ال چکمزلر، نه خيال ائله ييرسن، هاي-هاي.  

  اشرف خان: ياخچي. ايکي يوز اشرفي ده تحویلدارا آپارسينلار، قوي لال اولسون.  

  (ساباه تئزدن قوربان بي وئريلنلري آپاريب وئريب، گئري دؤنور.) 

  اشرف خان: قالخين گئدک ائوه، سونرا گه لريک.  

  ناظر: بلي هامي حاضيردير. 

  اشرف خان: (اياق اوست) بسم اللهي رحمانيررهيم. ايلاهي سنه تاپشيرديم اؤزومو. بيزي بو آداميئيه نين قوردلاري نين اليندن قورتار.  

  (گئدير ديوانخانانين ايچينه، بيرينجي شخصين سارايينا طرف) 

  کريم آغا: (تنگنفس گلير اشرف خانين يانينا، ياواشجادان دئيير) خان دايي دئه گؤروم شئيخ فتوللانين دوعا يازاني نين دوعالاريني قولووا باغلاميسان، يا يوخ؟  

  اشرف خان: بلي، بلي، باغلاميشام. مرحوم شرف شمس خانين دا اوزويونو بارماغيما تاخميشام.  

  کريم آغا: سيز ياسين سوره سيني اوخويوب پوفلگين بيرينجي شخصين اوزونه 

  (شرف خان گئدير کي، ديوانخانايا داخيل اولسون)  

  الله داد بي: (فراش خلوت آغاسي بير گوشه دن چيخي، اليني قويور اشرف خانين سينه سين) دئيير: گئتمگين. ايندي او خلوتده دير. 

  اشرف خان: سيز نه دئييرسينيز، آغا؟ اؤزو مني چاغيريب. (ميس کيمي قيزاريب فيکيرلشير کي، گئديب موحريرين اوتاغيندا اوتورار) 

  الله داد بي: (اوجا سسله ائله دئيير کي، خان ائشيدير) بئله-بئله اولموشلار گئديب اؤز حوکومتلرين ائديرلر، خالقي چاپيب تالاييرلار، گليرلر، بورالاردا دا گؤوده گؤسترمه يه. ائله بيل، من بونون آتاسي نين نؤکرييم.  

  بيرينجي شخص: (چاغيرير) اوشاقلار! 

  الله داد بي: (گيرير ايچري، باش اَيير) بلي 

  بيرينجي شخص: اوغلان، اشرف خاني ايسته ميشديم، گلمه ييب؟ 

  الله داد بي: يوخ، هله گلمه ييب. بويورسانيز، گؤندررم، گتيررلر. 

  بيرينجي شخص: تئز، تئز اول. ايشيم وار، گئدجم.  

  الله داد بي: (چيخير چؤله، ياريم ساعات هئچ نه دئمه دن سونرا اشرف خانا طرف گئدير و دئيير) بسم الله، گلين آغا چاغيرير. 

  اشرف خان: (دوروب اوتاغا داخيل اولور، عمللي باشلي اَييليب دوزه لير).  

  بيرينجي شخص: بسم الله، بويورون. حالينيز ياخچيدير؟ 

  اشرف خان: (يئنه ايکيقات اَييلير، دوزه لير): سيزين ساينيزده.  

  بيرينجي شخص: شاه عربيستانين وئرگيلري نين گئج گليب چاتماسيندان ديلخور اولموشدور. بويوردولار، مأمورلار گئتسين حل ائتسين. آنجاق من اونلارين قارشيسيني آلديم.  

  اشرف خان: البتته، سيزين بيزلره هر زامان لوطفونوز وار. آلله سيزين کؤلگنيزي بيز بنده لرين باشيندان اسکيک ائتمه سين. تانري سيزي ايران خالقينا! چوخ گؤرمه سين. 

  بيرينجي شخص: قزئتلردن بير آز   

  اشرف خان: سيزين ساينيزده قازئته لردن هئچ واخت حؤرمت اسکيک اولماييب.  

  بيرينجي شخص: اشرف خان، هر نه ايسه. تئز اول حسابيني اؤده. کاغيذيني دا گتير يازيم، اؤزون ده بورالاردا چوخ قالما. چيخ گئت ايشينله مشغول اول 

  اشرف خان: من، آللاه قولو دا، بونو ايسته ييرم. تئز حضورونوزدان ايزين آليب ایالته گئديم. آللاه ائلمه ميش، بير اولاي زاد باش وئرر.  

  بيرينجي شخص: (ميرزه طرار موستوفي) ميرزه طرار خان، بو گوندن اون گون عرضينده عربيستانين بوتون ماليه حساب-کيتاب ايشيني دوزوب-قوشورسان. چونکي اشرف خانين بورادا قالماسي ياخشي اولماز. شاه بويوروبلار، بئله اولسون. 

  ميرزه طرارخان: بلي، باش اوسته. من اشرف خانلا اوتوروب صؤحبت ائلرم، سيزين تاپشيريقلارينيزي يئرينه يئتيررم.  

  (شرف خان قالخيب تعظیم ائديب گئتمک ايسته يير) 

  بيرينجي شخص: هه، گئديرسن؟ گئت. صاباح آخشام گل سنينله ايشيم وار.  

  (اشرف خان چيخان کيمي حَيَطده اوچ نفر قاچا-قاچا آرخادان اونا ياخينلاشير و اونو ساخلاييرلار) 

  اي خان، بيزيم اناميميزي وئر.  

  اشرف خان: من دوزدو سيزي بيز آغانين چايچيلاري سيزه دفعه لرله قليان و چاي گتيرميشيک. 

  اشرف خان: هه، بلي. دئيرم، ناظر سيزه  بش  تومن وئرر. ايندي سيزي تانيديم.  

  (يولونا داوام ائدير. قاپيدا بوتون فراشلار، قاپيچيلار اونون قاباغيني کسيرلر) 

  فراشلار: آللاه سيزي بيزه چوخ گؤرمه سين. بيزه ده بير پلوو پولو چاتسين 

  اشرف خان: ياخشي، سيز ده صاباح گلين ائوه، ناظردن  بش تومن آلين.  

  (شرف خان داها قورخوسوندان ائوه طرف جلد يورودو) 

  اشرف خان: (کريم آغايا) گل سنه ناغيللار دانيشيم. بو نه حوکومتدير، بو نه آغا قاپيسيدير؟ حساب-کيتابسيز، گؤتور-قاچ، واللاه آدامي يئييرلر. بيلميرسن او کؤپيوغلو الله داد بي فراش منه بو گون نه لر ائديب؟ آداملارين ايچينده اوتانماقدان يئره گيرديم. واللاه، اگر مني زيندانا آپارسايديلار، اوندان داها ياخشييدي. 

  کريم آغا: خان دايي، دئميشديم کي، بورا عربيستان دئييل، اؤلکه نين باش کنديدير. بئله ايشلردن ده چوخ اولار، حؤوصله لي اول. دئيرم آپاريب  اوچ تومن وئررلر الله دادا سن باخ گؤر کي، صاباح گئدنده نئجه قويروغونو بولاياجاق. 

  (و آن فراشي چاغيرير  اوچ تومن وئرير، دئيير کي، بونلاري آپار وئر الله دادا و اونا دئ کي، بونلار سيزين انامينيزدير، خان گؤندريب) 

  اشرف خان: (گونورتادان سونرا اوتورموشدو، بيردن فراش بير  آز شيرني، بير گول قابي ايله گلير اونون يانينا): بو ندير؟ هارادان گليب؟  

  فراش: فراشباشي سيزه گؤندريب. 

  اشرف خان: (تعجوبله) ياخشي، ائله اورالاردا اول. اوشاقلار، کريم آغاني چاغيرين (کرم آغا گلير) 

  اشرف خان: يئنه گؤر ندير؟ منيم بو فراشباشي ايله  نه ايشيم وار؟ منيمله اويون اوينايير. بو ندير؟ من هئچ حوکومت ايستميرم.  

  کريم آغا: سيز دوغرو دئييرسينيز. اونونلا بير علاقه نيز يوخ. آنجاق اونلارين سيزينله ايشلري وار. دؤزوملو اول، کئچيب گئدر. 10 تومن ده اونا گؤندر.  

(پرده چکيلير)

 

 
 

 

ايکينجي مجليس (ايکينجي سئانس)

  اوچونجو گون اشرف خان گئيينيب کريم آغا ايله بيرگه گئديرلر بيرينجي شخصين (باش ناظر) يانينا. پيلله لره چاتيرلار. لاپ ديوانخانانين يانينا. الله داد بي گلير و اونلارا تعظیم ائدير. 

  الله داد بي: خان باغيشلايين، سيزي دونن تانيماديم. آغا چوخ عصبي ايدي، اؤزومده دئييلديم. ايندي قوللوقدا حاضيرام. کيچيکلردن خطا، بؤيوکلردن اتا. (شرف خانين قاباغينا دوشوب و اونلار اوتاغا داخيل اولورلار) 

  بيرينجي شخص: گل، اشرف خان! دونن شاهين حضورونا گئتميشديم، سيزدن دانيشيليردي. دئديلر، اشرف خان حساب-کيتابيني تئز قورتارسين و چيخسين گئتسين. 

  اشرف خان: بلي، من ده بونو ايسته ييرم. ميرزه طرارخان  ايشي بيتيررسه، من ده چيخيب گئدرم.  

  بيرينجي شخص (ميرزه طرارخانا): يقين سيز اشرف خانلا گؤروشموسونوز.  

  ميرزه طرارخان: يوخ، هله گؤروشه بيلمه ميشيک.  

  بيرينجي شخص: ايندي دورون گئدين خانين ائوينه، هم گؤروشون، هه ده حساب-کيتابين واختيني موعينلشديرين. بير ده کي، الاهزرت شاهين بويوردوقلاريني خانا چاتديرين.  

  ميرزه طرارخان: باش اوسته. 

  (دوروب اشرف خانلا برابر اونون ائوينه گلير. اوتورماميش حیاط دا سس-کوي قوپور) 

  اشرف خان: اوشاقلار، گؤرون نه سس-کويدور؟ 

  حسن (قول آغاسي): فيللر و دوه لري گتيرديلر. بير شئي يوخ. 

  اشرف خان: نه دئييرسن؟  

  ميرزه طرارخان: تبريک دئمک اوچون  بئله ائدرلر.  

  اشرف خان (طرارخانين يانيندا بير شئي دئيه بيلمير، آما ايچينده نيفرت ائدير): حسن، اوچ تومن اونلارا وئر، گئتسينلر. 

  ميرزه طرارخان: اينشاللاه حساب مسله سي صاباح تئزدن باشلاناجاق. دئمک لازيمدير کي، خالاتين باهاسي و حوکومت حديييه سي اون بير مين تومندير. بونلاري حاضيرلايين و حوکومتين خالاتيني آلين گئدين. لاکين، اونوتمايين منيم ده ايستکلريمي نظره آلين. 

  اشرف خان: آغا بويوروب، چوخ ساغ اولسون. منيم ايشيمي حل ائدين، قورتارسين. سيزين حؤرمتينيز ده باش اوسته.  

  ميرزه طرارخان: راحات اولون، اينشاللاه صاباح سيزين حساب-کيتابا باشلاياريق و بورادان جانينيزي قورتارارسينيز. من اؤزوم ده ايسته ييرم کي، سيز دئين کيمي اولسون، اليمدن نه قوللوق گليرسه، سيزه ائلمک ايستيرم. دوغروسو، ائشيتميشم، سيزين او شريک، جان محمد خاني دئييرم ائئ! سيزين مولکونوزو ايجاره يه وئره رک سيزين ده حاقينيزا اليوزونلوق ائدير، اونو دا منه وئرسنيز، هئچ اولماسا راحات نفس آلا بيلرسينيز. 

  اشرف خان (ياواشجا):   هله ايشين اوليدير، منيم جانيم دا ماليم دا سيزيندير. نئجه امر ائديرسينيزسه، ائله دير. 

  ميرزه طرارخان (قالخير): هله ليک يئتر. 

  (اونون آرخاسينجا 15 نفر فراش و بير نايب ايچري گيرير) 

  فراشلار: سالام خان. نئچه گوندور گلميسينيز، فراشلارا هئچ انام وئرمميسينيز. بيز بورالارين نبکرلريگيک. آديميز دا باش کندين فراشلاريدير. 

  اشرف خان:الله و اکبر! تانريم نه غلط ائله ديم؟ نه حسابي، نه حوکومتي؟ (سسي نين تونو دييشير): اوشاقلار  

  (اشرف خان بو خياللا گئجه ياتير، يوخدا گؤرور کي، حَيَطين اورتاسيندا 7-8 قارا ايلان اونون آياغي نين آلتيندا ياتيبلار، اونا هوجوم ائلمک ايسته ييرلر. سحر يوخدان دوروب، فيکيرلشير: گؤره سن بو يوخونون يوخومو ندير؟ بير آن کريم آغا گؤزونه ساتاشير و اونو چاغيرير، يوخوسونو اونا دانيشير. ائله او آندا 15 قيرميزي گئييملي آدام ايچري داخيل اولورلار و دئييرلر،   هاميليقجا گلين خانين خيدمتينه. بيچاره خان ميرقضبي گؤرن کيمي ايضطيرابدان قارين آغريسي توتور. سويوق تر اونو باسير. قارين آغريسيندان اوز توتور توالئته) 

  حسن (فراش): آفتافا وار؟  

  اشرف خان (ورادان): هه، هه، حسن! 

  حسن (چؤلدن): بلي. 

  اشرف خان: حسن، دئه تئز بير آت يهرله سينلر. خلوتي قاپيدان گتيرسينلر، من اؤزومو شاه عبدالعظيمه (زيارتگاه) چاتديرماق ايسته ييرم. آرخامجا بير تومان گتيرين. تومانيم باتيبدي، دئيه سن. آنجاق دييشمه يه هله ماجاليم يوخدور. 

  حسن (فراش): (بير نئچه دقيقه دن سونرا) خان، آت حاضيردير، بويورون مي نين.  

  (اشرف خان گيزلي قاپيدان چيخير چؤله، اؤزوندن گئديب يئره ييخيلير) 

  حسن (فراش): قاچيب کريم آغايا دئيير: گل، آغا ائويم ييخيلدي. خان اؤزوندن گئديب.  

  کريم آغا: نييه اؤزوندن گئدي؟ 

  حسن:و قيرميزي  گئييمليلري گؤردو، جلد اؤزونو آتدي گيزلي يئره. مندن آت ايسته دي، دئدي، گئديرم حضرتي عبدالعظيمه.  

  کريم آغا: په، يقين ميرقضبلردن قورخوب. اونلار گليب انام آلماغا، خان بونو باشا دوشمه ييب. اششي، بو اولدو، ميرقضب؟! اونون انام ايستمه يه حاقي يوخدور کي! 

  (کريم آغا اشرف خاني اووخالاييب ياخشيلاشديرير) 

  اشرف خان (گؤزون آچار-آچماز اونلارا ايشاره ائديب دئيير): ميرقضبلر بو حَيَطه گلميشديلر.  

  کريم آغا: خان دايي، سن لاپ سرچورکسن. بو کؤپيوشاغي ائشيديب کي، فراشلار انام آلي، اونلار دا پول يگيسينه گليبلر. قالخ، قالخ، بونلار کيم، بيز کيم؟ مير سنين گوناهين ندير، نه ايش گؤرموسن؟ 

  اشرف خان (ککليه رک): آخي ايلانلارين يوخوسو! 

  (کريم آغا اشرف خاني ياخشيلاشديرير، ميرقضبلر ياخينلاشمادان اونلارا اون تومن وئرير. اونلار گئتمه ميش ايکي هوندور آدام الي چوماقلي ايچري داخيل اولور) 

  سالام! قاپيچيلارين ميرقضبدن نيي اسکيکدير؟ بو نه نؤکرچيليکدير؟ سيز مگر صاباح حضرتي هومايونلا گؤروشميه جکسينيز؟ اورادان کئچميه جکسينيز؟  

  اشرف خان: من بيچاره کيمه جاوابدئه اولوم، کيمين قارنيني دويوروم؟ منيم خزينم يوخدور کي! دؤرد شاهي پولوم وار ايدي، اونو دا آلديلار، قورتاردي. آلله رحم ائله ييب کي، انام ايسته ييرسينيز. آلاجاغينيز اولسايدي، گؤر آدامي نئيلردينيز؟ 

  قاپيچيلار: خان نه اولورسا، اولسون بيزيم تسسوبوموز سيزينکيدير. نه اولسون، سيزين دؤولتينيزدن مين آدام چؤرک يئيير، بيري ده بيز.  

  اشرف خان (الله ائوينيزي ييخسين): او بؤيوک بو کيچيک، او ميرقضب، بو قاپيچي. باشيم نه کول الگيم. گئديم 5 تومن ده بونلارا گتيريم وئريم.  

  (قاپيچيلار گئدير. اشرف خان ناهار يئيير. بيردن 30-40 الي آغاجلي عجايب-قرايب آداملار ايچري داخيل اولورلار) 

  ريقالار (درويشلر): آلله خانيميزين جانين بلالاردان قوروسون! سيزين ده بير فيضينيز ريقالارا چاتسين. مؤولانين عشقينه بيز نؤکرلريک. سحردن آخشاما خيدمت گؤستريريک. شهرين کوچه لرينده توز-تورپاق يئييريک. 

  اشرف خان (کريم آغايا): سن آتاوين روحو، دئه گؤروم بونلار کيمدير؟  

  کريم آغا: واللاه بيلميرم. بونلارا ريقا دئييرلر. بونلار شهرين کوچه لرينده بوش-بوشونا دولاشيرلار.  

  اشرف خان (ناهار يئمگيني کوسه رک ترک ائده رک باشقا اوتاغا گئدير): کريم آغا، والله، داها صبريم قالمادي. آند اولا پيريمه، من حوکومت ايستميرم. حوکومت بو شکيلده هارامدير. صاباح گئدجم. بلکه، بير قورومساق تاپيلار. نه اولورسا، اولسون، دئيجم کي، آلله، آللاه نه حوکومتينيزي، نه ایالتينيزي ايستميرم.  

  (کريم آغا ائودن چيخير ائشييه، خاندان خبرسيز  اوچ تومن وئرير ريقالارا) 

(پرده چکيلير).

 

 

 
 

 

اوچونجو مجليس (اوچونجو سئانس)

 

  (ميرزه طرارخان اشرف خانين حساب-کيتابيني ائلميش، اونون آياغينا 32 مين تومن قاليق يازميشدير و آغانين حضورونا گئدنده اشرف خاني 2 مين تومندن آرتيق پولو وار ايدي. ميرزه طرارخان   والله، خان، حسابي ائله فيرلاتميشام کي، سيزه اؤز خيدمتيمي گؤسترميش اولوم.) 

  بيرينجي شخص: بلليدير. سيزين دؤولته صداقتينيز دانيلمازدير. کئشکه پادشاهين سيزين کيمي دؤرد نؤکري اولايدي. (چاغيرير: آي اوشاقلار، بير قوللوقچو گلسين) 

  فراش (گلير): بلي. 

  بيرينجي شخص: گئت اشرف خاني عربيستان حاکيميني گؤتور، بورا گل. 

  فراش (اؤز-اؤزونه دئيير: ياخشي اولدو. شانس گتيرديم، منيم ده پاييم بوردان چاتار) خان، سيزي آغا چاغيريب. دورون گئدک. 

  اشرف خان: نه خبر وار؟ بير شئي بيليرسيزمي؟  

  فراش: من هاردان بيليم؟ آغانين اورگينده دئييلم کي. 

  اشرف خان: سيز ياخشي اينسانسينيز. من او دؤنه تهرانا گلندن سيزي تانيييرام. اينشاللاه آخيرگل گؤرک. آغانين نه ايشي وار ايميش؟ 

  فراش (تربييه لي): اونون يانيندا ميرزه طرارخاندان باشقا هئچ کيمي يوخ ايدي. 

  اشرف خان (اورگينده- کؤپيوغلو، گؤر نه يومشاليب، ائئ!) هه، بيلديم، حساب مسله سي. 

  (فراش ايله برابر گئديرلر) 

  فراش (يولدا): من گلنده آغاني ناهار يئمگينه آپاريرديلار. بو گون من سيزين اوچون گلديگيمه گؤره اليم ناهاردان چيخدي. منيم ناهار پولومو وئررسينيز.  

  اشرف خان (اليني جيبينه ساليب، بير تومن چيخاريب اونا وئرير): بو دا سنين ناهار پولون. 

  (گلير کي، اوتاغا گيرسين. بيرينجي شخص حساب کاغيذلاري الينده دوشونجه لي و فيکيرلي اونلارا باخير. اشرف خان دا آياق اوستونده دوروب) 

  ميرزه طرارخان (آغايا دئيير): اشرف خاندير. 

  بيرينجي شخص (باشيني قالديرير): اوتور اشرف خان، گل ياخينا، بونلارا بااخ، من ائلييه بيلميرم، اينسانسئورليک اوجباتيندان دؤولته زيان وورام. 

  (اشرف خانين گؤزو 32 مين تومنه دوشن کيمي باشي فيرلانير) 

  اشرف خان: بلي من بيلميرم نييه بئله اولوب. حساب ائديرم آرتيقلاماسي ايله وئرميشم. 

  بيرينجي شخص: بيلميرم يوخدور. ترراخانين کي، قصدي-غرضي يوخدور سيزينله. سيزه ده حؤرمتي وار. اونا گؤره ده يانليش يازماز. بو آيدينليقدا حسابين گرک آرتيق-اسکيگي اولماسين.  

  اشرف خان (ل-آياغي اسه-اسه گلير آغانين قوللوغونا): واللاه، من بيرينجي آللاها، ايکينجي سيزه پناه گتيرميشم. سيزدن باشقا هئچ اوميديم يوخدور. آللاها گؤره مني باغيشلايين. منيم 32 مين تومن جريمه يه گوجوم چاتماز. هئچ بوردان دا چؤله چيخمارام قوللوغونوزدا اوتورموشام.  

  بيرينجي شخص: منه گؤره حسابدا يانليشليق يوخدور. سيز ميرزه طرارخانلا يولا گلسنيز ياخشي اولار. من تاپشيرميشام، گئدين ايکينيز آنلاشين. (اوزونو چئويرير طرارخانا) گئت اشرف خانا آنلات کي. من شاهين يانيندان چيخار-چيخماز پوللاري حاضيرلاسين 

  (اشرف خانلا ميرزه طرارخان ائوه يوللانيرلار) 

  اشرف خان: آي آغا بو حساب نييه بئله اولدو؟ من کي آرتيقلاماسي ايله وئرميشديم.  

  ميرزه طرارخان: قاليق!؟ هانسي قاليق، هانسي آرتيقلاما؟! حسابينيز بو دئييلمي؟ 

  اشرف خان (زييانا دوشموش، ديل-دوداغي قوروموشدو): خان بيليرسينيز ندير؟ من داها حساب-کيتاب بيلمرم. بوندان سونرا نه ائلسنيز اؤز لوطفونوزدور. نئجه مصلحت بيليرسينيز، من سيزين قوللوغونوزدا حاضيرام بلي.. 

  ميرزه طرارخان: خان، سيزلر کي، ایالتلرده حاکيمسينيز، ائله بونا گؤره ده هر شئيي اونودورسونوز و بو حساب-کيتاب گونلريندن بيخبر قاليرسينيز. يادينيزدادير، کئچن ايل سيزه ايکي مکتوب يازديم و سيزدن ايکي عدد شوشتر خالچاسي ايسته ديم. هئچ اعتينا ائلمه دينيز. باخ اونا گؤره ده ايندي بئله اولور. باخيم گؤروم نه ائده بيلرم. 

  اشرف خان: من کي دئميرم اولماز، هله کي، اؤلمه ميشم، نه دئييرسينيز، ائله اولسون.  

  ميرزه طرارخان: اولمازسا، اولماز، بو گئجه ايکي مين اشرفي آغا اوچون گؤندررسينيز. بير ده او اشرفاباد کندي نين ياريسيني منه وئررسيز.  

  اشرف خان: آي آغا، من فيکير ايچينديم. گؤر سيخ نه خيالداسينيز. اشرف آباد کندي ده سيزه قورباندير. قباله سيني گؤندررم قوللوغونوزا. لاکين ايکي مين آغا اوچون چوخدور. خواهيش ائديرم، اونو بير آز آزالتسين.  

  ميرزه ترارخان: بيليرسيز، نه وار؟ بئله واختلاردا آغا آز قالير قاناد چيخارتسين اوچسون. او ائو تيکير، پولا چوخ احتيياجي وار. سيزجه 1500 ياخشيدير؟ 

  اشرف خان: ياخشي، دور گئت ايشلري يولونا قوي.  

  اشرف خان: بااخ، 1500 اشرفي ايله کندين قباله سيني سيزه گؤندرجم، بو شرطله کي، منيم اؤدنيش کاغيذيمي مؤهورله ييب، تصديقله ييب، اليمه وئره سينيز.  

  ميرزه طرارخان: گئت، ايچين راحات اولسون. اگر طرارين قلمي ايشله ييبسه، ايشلر يولوندا اولاجاق. 

  اشرف خان: سن بيل، ويجدانين بيلسين. 

  ميرزه طرارخان: قورخما، راحات اول. دوستلوغوموزا آند اولسون، منيم سنينله دوشمنچيليگيم يوخدور. 

  (اشرف خان اوردان چيخيب آشا-آشا، قورخا-قورخا ائوه گلير،

- آي آلله، بو نه ايشدير من دوشموشم. بو پوللاري حوکومتسيز-زادسيز اؤزوم يئسيديم، نه اولاردي؟) 

  اشرف خان: آخخ، آخخ، کريم آغا. گلديک ساققال قوياق، بيغي دا الدن وئرديک. اشرفاباد کنديني اليمدن چيخارتديلار. آلله سيز آدام بوش يئره منه 32 مين تومن بورج چيخارديب. اشرفابادي طرارخانا، 1500-و ده آغايا وئرديم. تا کي اؤدنيش سنه ديني مؤهورله سينلر. هله بيلميرم حوکومت خلتي اوچون  نه بلالار باشيما گله جکدير؟ 

  کريم آغا: بلي، بوش يئره دئمه ميشلر: فيل ساخلايانلا دوستلوق ائلسن، فيل بويدا ائوين اولماليدير.  

  اشرف خان: کريم، دور قباله ايله پولو گؤتور، آپار وئر طرارخانا. اونا دئ کي، ايندي بير سن بيلرسن، بير ده آللاهين.  

  (کريم آغا قباله ايله پولو گؤتورور، آپارير وئرير طرارخانا. طرارخان دا گئجه ايله پولو آپارير وئرير آغايا.اؤدنيش کاغيذيني مؤهورله ديب، آليب گتيرير. امير وئريلير کي، اشرف خانين حوکومت خلعتيني وئرين، گئتسين. اشرف خان 3 گوندور اينتيظار چکير. اؤدنيش کاغيذي گليب چيخمير کي، چيخمير.  طرارخان اونا يازي گؤندرير و گؤروشمک ايسته يير) 

  اشرف خان: اوشاقلار، گلين بونو آپارين ميرزه طرارخانا، هر کيم ياخشي جاواب گتيرسه، مندن حديييه قازاناجاقدير. 

  فراش: باش اوسته.  

  (فراش ايچري گيرمک ايسته يير. ائله او آندا شاگيرد ده ايچري گيرير. ايچريده او شاگيرده دئيير) 

  فراش: قارداش، آي خان بالاسي، گل بو کاغيذي دا آپار وئر خانين اؤزونه، جاوابيني دا آل گتير منه. 

  ائو آغاسي (شاگيرده): گئدين ايشي نين داليسينجا، منيم مين دنه ايشيم وار. گؤزله، خان چيخاندا وئررسن. 

  فراش: خان بالاسي، بورا گل. (بير قران پول قويور اونون اووجونا) گئت تئخ جاواب آل، گتير. 

  (ميرزه طرارخان اشرف خانين يازيسي نين جاوابيندا دئيير: اؤدنيش کاغيذي حاضيردير، وئرميشم عبالرحیمه. دئميشم، گتيريب سيزه وئره جک. ميرزه عبالرحیم ادب-ارکانلا اؤدنيش قبضيني گتيريب اشرف خانا تقديم ائدير.) 

  ميرزه عبالرحیم: بيز اؤز ايشيميزي گؤردوک. ايندي قالدي سيزين بيزه ايلتيفاتينيز. آللاها آند اولسون، 18 گوندور کي، باشيمي آشاغي سالميشام، سنين حساب-کيتابيني تنزيمله مکله مشغولام. گؤزومون ده نورو هئچ قالماييب. 

  اشرف خان: البتته، هر بير زحمتين بير ماعاشي اولماليدير. 

  ميرزه عبدالرحیم: بلي، دوزدور. 80 مئترليک شال پارچاسي بونون امک حاقيدير. 

  اشرف خان: آي ميرزه، بيليرسيز، من بو سفرده نه قدر ضيانا دوشدوم؟. آلين بو 15 اشرفيني، اينشاللاه گئدنه کيمي ده گؤروشريک. 

  ميرزه عبدالرحيم: خئير، منه لازيم دئييل! سيزين ساغليغينيز منه يئتر. آلين بو کيتابچانيز، بو دا پولونوز. سيزين اولسون. 

  (يولا دوشور کي، گئتسين) 

  اشرف خان: ميرزه عبد الرحیم. بير دايانين، نييه اينجييرسينيز؟ آلين بو دا 5 اشرفي، قوي اولسون 20.  

)پرده چکيلير(

 

 

 

دؤردونجو مجليس (دؤردونجو سئانس)

 

  (اشرف خان اؤدنيش قبضيني آليب بير آز ايچي راحاتلايير. ميرزه طرارخان سئوينج ايچينله ايچري گيرير) 

  ميرزه طرارخان: خان، موشتولوق وئرين، دونن آغا شاهين حضوروندا ايدي. سيزي ده چوخ تعريفله ميشدي. شاه بويورموشلار، سيزين خلعتينيز وئريلسين، بير هفته يه دک بوراني ترک ائدسينيز. 

  اشرف خان: (يئنه مندن نه ايسته ييرسيز؟) بورادا قالماغيمي ايسته ييرسينيزمي؟ (البتته، سيزلرين منه چوخ لوطفو وار. آنجاق من گئتمه لييم).  

  ميرزه طرارخان: آدام گؤندرين، امري گتيرسينلر. فرمان حاضيرلانانا کيمي سيز ده شاهين پئشکئشيني حاضيرلايين. تئز دؤولت قايدالاري يئرينه يئتيريلسين، سيز ده چيخين گئدين حوکومتينيزين باشينا. 

  اشرف خان (ياواشجا): آلله ائويني خاراب قويسون. بو شاه پولو داها نه دئمکدير؟ (اوجا سسل) بو سفرده من هر زاديمي الدن وئرديم. هئچ اولماسا سيز ده منه گوزشته گئدين. فرمان و روسوم پولو نه گرکدير؟ ياخشي، نه لازيمدير  ائدين، من بير يئرده اؤديرم. 

  ميرزه طرارخان: يوخ، بئله اولماز. اؤنجه لازيم اولان پولو منه وئرين. سونرا من سيياهيني حاضيرلايارام، پولونوزون قاليغي اولسا، گئري قايتارارام. 

  اشرف خان: بويورون، خرجلر نه قدر اولاجاق؟ اؤنملي خرجلر هانسيدير؟ 

  ميرزه طرارخان: بلليدير، 6 مين تومن خزينه يه تؤکوله جک، 3 مين تومن آغانينکيدير. اونو دئييم، آاا، آغا سيزه چوخ حؤرمت گؤستردي. تاي من ده کي، بير شئي دئميرم. آند اولا جدديميزه، اؤزونوز نه مصلحت گؤرورسونوز. جيبيميزين فرقي يوخدور. 

  اشرف خان (ياواشجا):گورباگور اولاسان، اينشاللاه. بوتون بو بلالاري سن منيم باشيا آچدين. ياخشي، پوللاري آخشام گؤندررم گتيررلر. باشقا چارم يوخدور. بس، الاحضرتين امريني نه واخت منه چاتديراجاقسينيز؟ 

  ميرزه طرارخان: امر اؤنملي دئييل. من 50 تومن وئريب، امرين کاغيذيني آلاجام. وئررم، خوش خطله يازارلار، اونوتما کي، 100 تومن ده امرين روسومودور. 200 تومن ده مؤهور وورانين حاقيدير. ايچين راهاغ اولسون. منيم کيمي دوستون وار، اوزولمه. امري دوزلديب، گتيرجم. سيزين قوللوغونوزدا حاضيرام. 

  اشرف خان (اؤز-اؤزون): اينشاالله اوشاقلارين تنديره دوشسون، ائوين اود توتسون، يانسين. اينصافسيز، 200 تومن اوسته گل 150 تومن ائله بيل بونلار پول دئييل. ياخشي، عئيبي يوخ. ايندي آتين جيلووو سيزين الينيزده دير، هارا چکيرسينيز، چکين. 

  ميرزه طرارخان (قولونو اشرف خانين بوينونا ساليب): سن اؤل من بو سفرينيزده سيزه چوخ خئيير وئرديم. خيدمتيمين حددي هودودو يوخدور. اؤزو ده کي، سنه اؤيرنميشديم. هئچ بيلميرم سن گئدندن سونرا نه ائدجم؟ 

  اشرف خان (ياواشجا): هه، اينانديم، سن اؤلسن. سن منه يوخ، پوللارين جينگيلتيسينه وورولموسان. (اوجا سسله) البتته، بلليدير. يئنه ده سفرين سونوندا گؤروشه جگيک. (بو آرادا بير فراش گليب، تعظیم ائدير) 

  خان، بسم الله، بويورون گلين شاهليق خلعتي نين ايستيقبالينا. 

  (اشرف خان گئدير حَيَطين اورتاسينا، ايکي الي ايله خلتي توتور، اؤپور، قويور باشي اوست) 

  ميرزه طرارخان: به-به، موبارکدير، اينشاللاه. ايندي گئيي نين، يقين سيزه چوخ ياخشي ياراشاجاق.  

  (اشرف خان پالتاري گئيينير. نه پالتاري، نه خلتي، ديزدن يوخاري بدن دار، لاپ الله داد بيين گؤزلري کيمي. قوللاري دا هوممت ناظر کيمي قيسا. اشرف خانين بؤيوک جوسسه سي پالتارين دارليغيندا سيخيلير. يوخ، آ کيشي، بير کيشي يوخدور کي، بو گؤزلليگين، بو گؤرونتونون شاهيدي اولا). 

  اشرف خان: حضرات، بو پالتار موبارک صانديقخانادان دئييل، بلکه تعزيه خانالاردان چالينميشدير. بو تهر خلعتي کيمسه ايندييه کيمي گؤرمه ميشدير. 

  ميرزه طرارخان: خان، نه دانيشيرسينيز؟! سيز اؤلسينيز، من اؤزوم دونن گئجه قبضي مؤهورلتديم و 80 تومن ده بو خلعتين پولونو وئرديم.  

  اشرف خان: دوغرودور. باشقا سؤزوم يوخ. آنجاق من بو خلعتي ايستميرم. من بير تومان باغي وئرسنيز بوندان داها ياخشيدير. 

  ميرزه طرارخان: اولسون، ناراحات اولما. گئديب ايکي خط يازي يازارام صانديقخانايا، بونو دييشديررلر. لاکين او صانديقدارا بير شئي وئرمگينيز لازيم. هله ليک. من گئتديم. 

  (دورور گئدير) 

  اشرف خان: خوش گلدينيز.  

  (کريم آغايا دئيير) بيزيم ناظرليگين اويونلاريني گؤردونوز داا. او هديه لر، او حؤرمتلر، بو دا کؤپيوغلو طرارين خلعتي. آلله و اکبر!  هارا گئديم، نه ائديم؟ 

  کريم آغا: خان عربيستانا گئدين و اورادا حوکومت ائدين. 

  اشرف خان: منيمله مزله نيرسينيز، ائله بيل، کريم آغا! 

  کريم آغا: يووخ، نه مزلنمه سي. بونلارين هاميسي درسدير. بونلار بيزه وئريلير. بيز ده صاباح گئدک رعيتين جانيني آلاق. (ائله بو آندا بير آدام سورعتله اشرف خانا ياخينلاشير) 

  خان، موشتولوق وئرين، آغانين خانيمي اوغلان دوغوب.  

  اشرف خان: الله و اکبر! آي موسلمان، آخي منه نه کي، آغانين آروادي اوغلان دوغوب. بونلارين دونيادا پول آلماقدان باشقا ايشلري، گوجلري يوخدور. واي-واي-واي. 

  فراش: خان، مير سيز بيلميرسينيز، بئله موناسيبتلرده بؤيوک آداملار مين تومن انام وئررلر. بو حاکيميتين رسميدير.  

  اشرف خان: حاکيميتينيزه ده، اونون رسمينه ده لعنت! (بير تومن چيخاريب توللايير فراشين قاباغينا) 

  فراش: ائله بير تومن؟  من ائودن بورا قدر قاچيب تنگنفس اولموشام.  

  اشرف خان: اينشاالله، نفه سين توتولسون. ايتيل بوردان، آوارا. گئت! سيز مني دين-ايماندان چيخارتدينيز. 

  فراش: خان، والله، دوز دئييرم. منيم يولداشيم وضعيري موختارا موشتولوق آپاردي، 5 تومن آلدي. هئچ اولماسا، سيز ده اوچ تومن وئرين. 

  (ائله بو آندا ميرزه طرارخان خلعت و امري بير يئرده گتيردي) 

  ميرزه طرارخان: اشرف خان! بو خلت، بو امر. شاه بويوروبلار ، ايکي گوندن سونرا بورادان چيخيب گئده سينيز. 

  اشرف خان: سيز مني ساخلاماسانيز، منيم بورادا هئچ ايشيم يوخدور. لاپ گونو بو گون گئدرم.  

  ميرزه طرارخان: ايستکلريميزي يئرينه يئتيرين، نه واخت ايسته ييرسينيز، گئدين. 

  اشرف خان: آللاه بو ايستکلرينيزين ائويني ييخسين، نه واخت بيته جک. 

  ميرزه طرارخان: خان، گئده جکسن عربيستانا، 10 قات گلير الده ائده جکسن. نييه ناراحاتسان؟  

  اشرف خان: بويورون آغا. منيمکي کي منه دييب، نه ايسته ييرسينيز؟ 

  ميرزه طرارخان: بير شئي دئييل. زحمت اولماسا، قلم گؤتورون، يازين.  

  (اشرف خان قلمي گؤتورور، طرارخان دئيير، او يازير) 

  ميرزه طرارخان: آغانين قوللوقچولاري 5 تومن، خلوتي فراشلار 25 تومن، فراشلار 15 تومن، ناظر 10 تومن، تؤوله خرجي 10 تومن، ماماخانيمين اري 10 تومن، چايچيلار 5 تومن، ميرزه عبدالرحیم 40 تومن، منيم ايشچيلريم 30 تومن، درويش آغا 5 تومن، کيتابچانين روسومو 5 تومن، امرين يازيليشي و گؤزللشديريلمه سي 5 تومن، دفترخانا 5 تومن، قاپيچي 5 تومن، صانديقخانا 5 تومن. 

  اشرف خان (قضبدن): فهله لر و ناغاراچالانلار قالدي.  

  ميرزه طرارخان: لاپ يئرينده دئدينيز، صاباح ياخامدان ياپيشاجاقديلار. بير شئي ده  اونلارا وئرين. 

  اشرف خان: اوندا سياهي سيزده قالسين. بلکه اونوتدوقلارينيز اولار. 

  ميرزه طرارخان: واخت دارالير، من گئتمه لييم. آغا ايله ايشيم وار. 

  اشرف خان: ساغليقلا، گئدنده گؤروشريک، اينشاالله. 

  (ميرزه طرارخان گئدير. اشرف خان شهردن قاچماغا فيکيرلشير. بيردن کندخدانين نايبي تقي ميرزه حاجي نين حسن آدلي اوغلو ايچري گيرير.) 

  خان سالام علئيکم. 

  اشرف خان: علئيک اسلام. من سيزي تانييا بيلمه ديم.  

  کندخدانين نايبي: من نايبم. آغا ميرزه حسن مني گؤندريب، سيزه تبريک دئييم. 

  اشرف خان: نه خبردير، هردن بيرينيز گليرسينيز؟ 

  نايب: سونرا بيرسؤزوم ده وار ايدي 

  اشرف خان (اؤز-اؤزون: آلله، گؤره سن، بو کندخدا بازليق داها ندير؟) نايب بي، بويورون دئيين. 

  نايب (ايره لي گلير):  اينشاالله کي، بيزيم محله ده خان حضرتلرينه خوش کئچميشدير. هم حوکومتده، هم ده کئچيرديگينيز و سوردويونوز کئيفلرده بيز ده کي، قوللوقدان آز قويماديق. 

  اشرف خان: هر حالدا لوطف ائتميسينيز. آنجاق  نه دئمک ايسته ييرسينيز؟ 

  نايب: او گئجه ساغ-سالامات کئچدي. بيز هميشه ائوين کئشيگينده ايديک، آللاه ائلمه سين، کيمسه سيزه زيان يئتيرمه سين. 

  اشرف خان (اي، تانريم، بو نه اويوندور؟): تئز اول، سؤزونو دئه. 

  نايب: هه، او گئجه کي، سکينه خانيم سيزينله ايدي، چيخاندا ناظرين آداملاري اونو توتموشدو. آنجاق کندخدانين سيزه اولان حؤرمتينه گؤره قويمادي بو مسله بؤيويه و سيزن شؤهرتينيزه خلل گتيره. بير کلله قند وئردي و اونو مأمورلارين اليندن آليب بوشلادي. 

  اشرف خان: نايب، ائله بيل سحو گلميسينيز.  

  نايب: يوخ، خان. دوز گلميشم. 

  اشرف خان: تئز اول فيکريني سؤيله. 

  نايب: کندخدا سيزدن انام گؤزله يير.  

  اشرف خان: نه ايستک، نه انام؟ من بيلميرم، بورا شهردير، يا دره بيليکدير. آللاها آند اولسون، داغ-دره بورادان ياخشيدير. بير سورو يولکه سنلر توپلاشيب، بيري ناظر، بيري باش ناظر، بيري ده کندخدا، اويونبازليق ائديرلر. 

  نايب: ايسته ييرسينيز، گئديم. خان، نييه عصباني اولورسونوز؟ 

  اشرف خان: اوشاقلار، دئيين، ناظر ايکي تومن اونا وئرسين.  

  (بيري کريم آغاني چاغيرير و کريم آغا گلير) 

  اشرف خان: کريم آغا، گؤرورسونوز نه خبردير؟ کندخدانين نايبي گليب اونون ديليندن دئيير کي، سيز بورادا نئچه گون عياشليق ائتميسينيز. بيز ده ديوارين آرخاسيندا سيزه گؤزتچيليک ائتميشيک. لاپ آغ ائله ييبلر. گؤز گؤره-گؤره مندن ايکي تومن قوپارتديلار. 

  کريم آغا: خان دايي، لاپ شورون-شورباسين چيخارتديلار. دادي-دوزو قاچدي. گل، بو خارابادان تئز چيخيب گئدک.  

  اشرف خان: سن اؤل، نه قدر پول وئرميشديم، مني يانديرماميشدي. آنجاق آغانين آروادي نين اوغلان دوغماسينا وئرديگيم موشتولوق پولو لاپ ايچيمي سؤکدو. بير ده کندخدايا وئرديگيم پول. بوراسي قالمالي يئر دئييل. يوکوموزو توتاق، سورک  روباط کريم شهرينه (تهرانين 50 کيلومئترليگينده).  هر کيم سوروشسا، دئيين، کؤچدولر، ايمامزاده حسنه. 4 گون اورادا قاليب سونرا گئده جيک.  

  (بئله ليکله، اشرف خان جانيني قورتاردي و تهراندان چيخيب گئتدي. بو حکايه 1920-جي ايلده يازييا آليندي).