خوشبخت او اينسانلاردير کي، اونلار ننه بابالاريني ساغييکن گؤروبلر.من يالنيز آنا ننم فاطماني حياتدا گؤرموشدوم. گؤزومو حياتا آچديغيمدان فاطما ننم بيزيمله قاليردي. اونون خوش سيماسي دايم خاطيريمده دير. آما بير خاطيره ده وار کي، هئچ زامان بئينيمدن سيلينن دئييل.
سککيز ياشيم واردي، ياي تعطيلي ايدي. محلله اوشاقلاري ايله دايم اويون اوينايير، ائوه گئتمه يه تلسميرديک. من ترله ييب برک سويوقلاميشديم. آخشاما حرارتيم قالخدي. واليدينلريم حکيم چاغيرديلار. " عادي سويوقديمه دير " -دئييب، حکيم حرارتدوشورن درمان وئريب گئتدي. منيم خستلنمگيمدن هامي ناراحات ايدي، آما ننم يانيمدان ال چکمير، تئز-تئز دوداقلاريني آلنيما توخوندوروب حرارتيم اولوب-اولماديغيني يوخلاييردي.
ننم انديشه سيني گيزله ده بيلميردي.هيجانلا آناما دئدي:
-منه ائله گلير کي، اوشاغا گؤز دييب.بالام گؤزوموزون اؤنونده ساراليب-سولور.مممد ايجازه وئرسيدي اونو صاباح صوبحدن احمديييه بابانين اوجاغينا آپارارديم.و اوجاق بالامي ساغالداجاق.
مممد آتامين آديدير. او، ننمين مني اوجاغا آپارماسينا قارشي چيخسا دا، سؤزونو يئره سالماماق اوچون راضيليق وئردي...جيبيندن اللي مانات چيخاريب ننمه اوزاتدي،- بونو دا بيزيم هاميميزين آديندان اوجاغا نذير وئررسن-دئدي.
ائرکن سحر آتامين سوروجوسو ايداره ائتديگي آوتوموبيلده، ننمله من احمديييه بابانين اوجاغي يئرلشديگي کريمبيلييه يولا دوشدوک. کله-کؤتور کند يولوندا آوتوموبيل ننم و مني هر دفعه آتيب توتسا دا، آرخا اوتوراجاقدا بيز بير بيريميزه ساريليب گولومسه ييرديک. سوروجو ايسه اوزانان اَيري کند يوللاريندان گؤزونو چکمه دن ائله هئي دئيينيردي.
سوروجو آوتوموبيلي حَيَط داروازاسي نين قارشيسيندا ساخلاياندا داروازانين اؤنونه، باشيندا بوخارا پاپاق اولان نوراني بير کيشي چيخدي. ننم منه دئدي کي،بو احمديييه بابادير. اصلینده اوجاق آدلانان بو يئر احمديييه بابانين ائوييدي.
-آي سيزين صاباحلارينيز خير.گؤر بير کيمي گتيرميسن بيزه آي فاتما.يقين مممه دين کيچيک اوغلودور بو؟
-هه باباسي، ناخوشداييب، گؤز دييب بالاما.
-نورلو اوشاقدير.پيس گؤزلره شيش باتسين...کئچين ايچري.
سحر تئزدن اولسا دا حَيَط تر-تميز سوپورگلنميش، خفيف سو چيلنميشدي. حصار بويو سيرا ايله اکيلميش داش پاليد آغاجلاري حَيَطه خوصوصي گؤزلليک وئريردي. کله کؤتور کند يوللاريندان سونرا بورداکي سليقه سهمان اينسانين روحونو اوخشاييردي...
حَيَطدن کئچيب ائوين پيلله لرينه چاتاندا، شوشبندين قاپيسيندا احمديييه بابانين گولروزلو آروادي گولدسته بيزي قارشيلادي.ن بؤيوک اوتاقدا باش طرفده کي ديوار بويو سريلميش دؤشکچه لرده بارداش قوروب اوتوردوق.
بيز ائويميزده سحر يئمگي يئسک ده، گولدسته ستولون اوستونه بوشقابلاردا ياغ،پئندير دوزوب، ننم و منه چاي سوزدو.من ننمه باخيب باشيمي بولاسام دا ننم چؤرگين آراسينا ياغ پئندير قويوب منه اوزاتدي:
-يئ آي بالا.بورا اوجاقدي.يئمه سه ن ساغالمازسان.
من چوخ ايسته ييرديم کي، تئز ساغاليم. اؤزومو حالسيز حيسس ائديرديم. آما نه گلديگيميز بو ائوده، نه ده يئديگيم پئندير چؤرکده هئچ بير غئيري-عاديليک گؤرمه ديگيمدن ننمدن سوروشدوم:
-ننه بورا نييه اوجاق دئييرلر؟
ننم اوتاغين مرکزينده کي تاخچانين اوستونده اولان کوزه ني گؤستريب، باخ او کوزه دن کيم سو ايچسه، گئجه ده بو اوجاقدا ياتيب سحر اويانديقدا ساپساغلام اولور.همه ديييه بابا سئييد-اؤوليا اؤولاديدير.ونا دا بو سئهيرلي کوزه باباسيندان قاليب.سونرا ننم گولدسته يه کوزه دن منه بير ستکان سو وئرمه سيني دئدي.
کوزه نين اورتاسيندا ساخسي چيخينتيدان اولان دايره نين ايچريسينده دوققوز گوشه لي اولدوز، اولدوزون ختلري آراسيندا ايسه دوز و قيريق ختلي ناخيشلار واردي. من اؤزومو کوزه نين اوستونده کي ناخيشلارين سِحرينده حيسس ائدير، بو ناخيشلارين نه معنا کسب ائتديکلريني آنلاماسام دا اونلاردان نه ايللاه ائتسم ده گؤزلريمي آييرا بيلميرديم...اؤزومو اوزاق ياشيل وادي نين اورتاسيندا حيسس ائديرديم.تاخچانين آرخاسيندا ديوارا وورولموش کيليم ده عادي کيليم دئييلدي. کيليمين اورتاسينداکي رنگارنگ ناخيشلارين دا هر بيري ائلي بو جاذيبه دار، اينساني اؤزونون اسيري ائدن کوزه نين اؤزو بويدا ايديلر...
گولدسته تميز آرمودو استکانا کوزه دن سو دولدوروب قارشيما قويدو.
حَيَطده کي سس کويه گولدسته پنجره ني آچيب، باشيني چؤله اوزاتدي:
-نه يامان چوخسونوز؟ باکيدان واجيب قوناغيميز وار. دوعالاري حاضير اولانلارينکين ايندي گتيريرم. کوزه دن سو ايچمک، گئجه بوردا قالماق ايسته ينلر صاباح گلسينلر،-دئييب احمديييه بابانين اولدوغو اوتاغا کئچدي.وندان آلديغي دوعالاري صاحيبلرينه چاتديرماق اوچون، اوتاقدان چيخيب، پيلله لرله آشاغي دوشدو.
من گولدسته نين کوزه دن وئرديگي سويو ايچيب قورتارديقدان سونرا ننم دئدي:-آخشام ياتانا کيمي بو سودان سنه وئرجم ايچ. آلله راست گتيرسين، شفا وئرسين.
من ستکانيمي گؤتوروب کوزه يه ياخينلاشديم کي، اؤزومه بير ستکسن دا سو دولدوروم. ننم تئز اؤزونو يئتيريب، کوزه ني اليمدن آلدي،-احتياطلي اول آي بالا، ساليب سينديرارسان هر کس پئشمان اولار.يسته ينده دئ من اؤزوم سنه کوزه دن سو وئرجم،-دئدي.
-ننه سويو بو کوزه يه احمديييه بابا دولدوروب؟
-يوخ آي بالا، بو کوزه سحيرليدير.هر دفعه کوزه دن سو قورتارديقدا او اؤز-اؤزوندن يئنيدن دولور...
من تعجوب و حيرتيمي گيزله ده بيلمه ديم. کوزه ني بير قدر قالديريب آلتينا باخديم. تاخچانين اوستونه سريلميش آغ رنگلي سوفره دن باشقا هئچ نه يوخ ايدي. ننم يئنه ده تئز کوزه ني اليمدن آليب احتياطلا يئرينده دوزلتدي.
-ننه، بو کوزه بوشالاندا اورايا سو اؤز-اؤزونه نئجه دولور آخي؟
-منيم بالام اورايا سويو گؤزگؤرونمز آلله بابا دولدورور.
-بيز ده بئله بير کوزه آلساق آلله بابا اونو دا سو ايله دولدورار؟
-يوخ جانيم ايمانيم، بو کوزه دن تکجه بوردا وار. اونا گؤره ده بورا اوجاقدير...سن بو سودان ايچ، گؤر سحر نئجه ساغلام اولاجاقسان.داها منيم بالام خستلنميه جک. هاميدان گوجلو اولاجاق. پيس گؤزلر يانيب ياخيلاجاق.
همين گون آخشام ساعاتلارينا کيمي ننمه تئز-تئز منه کوزه دن سو وئرمه سيني دئييرديم. مقصديم ايسه او ايدي کي، کوزه نين سويو قورتارديقدان سونرا مؤعجيزه نين شاهيدي اولوم، کوزه نين اؤز-اؤزونه سو ايله نئجه دولاجاغيني اؤز گؤزلريمله گؤروم...
...آخشامين گئج ساعاتلاري ايدي.يوخودان گؤزلريم يومولسا دا من ننمين قوللاري آراسيندا اوزانيب ياتماماغا چاليشيرديم. کوزه نين ايچينده سو آز قالميشدي.يقين بير-ايکي ستکان دا ايچسم سو قورتاراجاق و من مؤعجيزه يه شاهيد اولاجاقديم.
سحر ساعاتلاريندا گؤزلريمي ننمين يانيندا ياتاقدا آچديم. دونن آخشام ساعاتلاريندا نه زامان يوخويا گئتديگيمي بيلمه ميشديم. ننم ياتيردي. جلد ياتاقدان قالخيب کوزه يه ياخينلاشديم. گؤزلريمه اينانماديم. حيرتدن دونوب قالديم. کوزه آغزيناجان سو ايله دولو ايدي.
بس گؤره سن آخشام کوزه نين ديبينده قالان سويو کيم ايچيب. دونن اوياق قالا بيلمه ديگيم اوچون اؤزومو قيناديم.کوزه نين اؤز-اؤزونه نئجه دولدوغونو حيف کي گؤره بيلمه ديم.و مؤعجيزه ني گؤرمگي چوخ، لاپ چوخ ايسته ييرديم.حيف..
اگر بو کوزه ني سحر او باشداندان گولدسته گؤتوروب حَيَطده کي بولاغين سويوندان دولدورسايدي من اونون اوتاغا گيريب چيخماسيندان سس-کويو حيسس ائديب آييلارديم. بئله بير شئي باش وئرمه ميشدي.کوزه آغيزبااغيز اؤز-اؤزونه دولموشدو...
بير قدر کئچميش ننم ده يوخودان آييلدي.منيم آياق اوسته اولدوغومو گؤروب، ياخينلاشاراق دوداقلاريني آلنيما ياپيشديردي:-آي سنه قوربان اولوم. قيزديرمان يوخدور.وزون ده ماشالله، ساپساغلامسان.قوربان اولوم احمديييه نين جددينه.
سونرا ننم قوينوندان چيخارديغي، آتامين نذير اولاراق وئرميش اولدوغو اللي ماناتين بير اوجونو کوزه ني اهمالجا قالديريب آلتينا قويدو.
بير قدر سونرا احمديييه بابا ايله گولدسته گلدي.
ننم احمديييه بابايا ميننتدارليغيني بيلديريب گئتمه لي اولدوغوموزو دئدي.
احمديييه بابا ساچلاريمي اوخشاييب، -آللاه سني يوز ياشاتسين، هميشه ساغلام و گوجلو اولاسان.قارشينا چيخان پيس گؤزلو، پيس نفسليلري بيلگي نين گوجو، عاغلينين ايشيغييلا بير آندا محو ائدسن،-دئدي.
من حَيَطه قاچيب تئز بير زاماندا تانيش اولوب، قايناييب قاريشديغيم کند اوشاقلاري ايله گيزلنپاچ اويناييرديم.ؤزومو قوش کيمي يونگول و ساغلام حيسس ائديرديم.
بير قدر کئچميش آتامين ماشيني کوچه نين باشيندا گؤروندو، آز کئچميش سوروجو ماشيني دوردوردو.
-گل عؤمروم گونوم، گل گئدک ائويميزه.گئجيکسک آتان حيرصلنر.
ماشينا اَيلشنده ننم اللريني گؤيه قالديريب،-آللاهيم سنه مين شوکور.ساينده احمديييه اوجاغي، کوزه نين سويو بالاما شفا اولدو،-دئيه رک دوعا ائتدي.
ائوه چاتيب آنامين اوستونه آتيليب بوينونو قوجاقلاديم.
-ماشالله، بالام ساغاليب.قوربان اولوم احمديا بابانين جددينه.
دونندن آتامي گؤرمه ديگيمدن چوخ داريخميشديم.امما آرتيق گئج اولسا دا آتام هله ايشدن گلمه ميشدي. آنام منه و ننمه،- ييخيلين ياتين.يقين ايشي چيخيب، گئج گله جک،- دئدي.
من يئنه ده ننمين قوللاري آراسيندا يوخويا گئتمه يه حاضيرلاشيرديم کي، ائشيک قاپيسي جيريلدادي.گلن آتام ايدي. آنام قاپييا دوغرو آدديملاييب،-نييه گئج گلدين.هاردا ايدين بو واختاجان؟-دئيه آتامدان سوروشدو و -واصيف ساغاليب،-دئيه علاوه ائتدي.
آتام، -مين شوکور دئييب- سئوينجيني گيزلتمه دي. آما سونرا آه چکدي:
-ايشدن چيخماغا آز قالميش، منه زنگ گلدي کي، احمديييه بابانين وضعيتي آغيرلاشيب، باکييا خستخانايا گتيريرلر.من ده گئتميشديم اونو قارشيلاييب خستخانايا يئرلشديريم.هه کي ملر دئديلر کي،وزيتي کريتيکدير.شوکور بير قدر يونگوللشدي. حکيملر دئديلر کي، گئدين آز دا اولسا دينجه لين. گؤرک صاباح باشيميزا نه گلير. سحره کيمي اللريندن گله ني ائده جکلر.
من نور اوزلو ننمين قوللاري آراسيندان يئريمدن قالخديم.ياتاق اوتاغي نين قاپيسيني آچيب آتامين قوجاغينا آتيلديم. سونرا آناما ياخينلاشيب خيسين-خيسين آناما دئديم:-آنا،اتام دئديکلري نين هاميسيني ائشيتديم. احمديييه بابايا نه اولوب؟
آنام سوسوردو.گؤزلريني بير نؤقطه يه زيلله ييب، منيم سواللاريما جاواب وئرميردي. من حئيرتله آنامين اوزونه باخاراق اؤزومو توپارلاييب، ان نهايت دئديم:
-آناجان من خسته لننده احمديييه بابانين کوزه سيندن ايچديگيم سو مني بير گونده تام ساغالتدي. ندن او اؤزو ده کوزه ده کي سودان ايچيب ساغالمير؟
آنام خيلي فيکره گئديب بير خيلي سوسدوقدان سونرا هاندان-هانا دئدي:
-احمديييه بابانين کوزه سيندن سو ايچنلرين هاميسي شفا تاپاردي. آما هر کس بو سودان او قدر ايچدي کي، کوزه نين سويو قورودو... احمديييه نين اؤزونه سو قالماييب. سحره کيمي دوعا ائدک کي، آلله اؤزو احمديييه بابايا کؤمي اولسون...
آنام بو سؤزلري دئديکدن سونرا من کور-پئشمان ياتاغيما قاييديب، ننمين قوللاري آراسيندا يوخويا دالديم...
او حاديثه دن خئيلي واخت کئچسه ده، ان ايستي هاوالاردا بئله من سويو قورتوم-قورتوم ايچيرم ...