Azərbaycan dilinin dünya dilləri içərisində yeri ; inkişaf imkanları və qloballaşma prosesinin tələblərinə reaksiyası.

 

 

آیسل قریبلی

Aysel Qəribli

برگردان : تانای شرقی دره جک

 

 

آذربايجانديلي دولت ديللري، ياخود ملی ديللر قروپونا آيد اولوب همين ديللر اوچون سعجييوي اولان علامتلره مالکدير. بو ديلده (و اونون ديالئکتلرينده) اللي ميليوندان آرتيق انسان دانيشير. کيفايت قدر قديم  (و زنگين) هم شفاهي، هم ده يازيلي مدنيتي اولان آذربايجان ديلي، ياخود آذربايجان تورکجه سي20-عصرين اوللريندن (1918- جي ايلدن) دولت ديلي اولسا دا، اونون ملی ديل و يا مستقل بير ملتين ديلي کيمي فورمالاشما تاريخي اورتا عصرلرين سونو يئني دؤورون اوللريندن باشلايير. ائله  همين دؤوردن اعتبارن بير سيرا قونشو  خالقلار ائرمنيلر، گورجولر، داغيستان خالقلاري و س. رئگيونون بين الخالق انسیت واسيطه سي اولاراق آذربايجان تورکجه سيندن استفاده ائتميشلر. لاکين اؤلکه نين مختلیف خانليقلارا پارچالانماسي، 19-عصرين اوللرينده شيمالي نين روسييا، جنوبونون ايسه ايرانين ترکيبينه داخيل ائديلمه سي نتيجه سينده شيمالدا روس، جنوبدا ايسه فارس ديلي ياييلماغا، ملتين ديلي سيخيشديريلماغا معروض قالميشدير، بير نئچه دفعه  اليفباسي دييشديريلميشدير. بونونلا بئله آذربايجان ديلي دولت ديلي اولاراق فورمالاشميش، دنیا آذربايجانليلاري نين عموم انسيت واسيطه سي کيمي انکشاف ائتميشدير. (بو باره ده اطرافلي معلومات اوچون باخ: 4)

قلوباللاشان معاصر دنیادا آذربايجان ديلي نين طالعيي، تاماميله  طبيعيدير کي، هر بير آذربايجانليني ملی تعصبکشليک باخيميندان دريندن دوشوندورن مسله دير. عمومیتله ايسه، يوخاريدا تقديم ائتديگيميز تصنيفات- «ييئرارخييا»نين 3- قروپونا، ياخود سوييه سينه آيد اولان ديللري آشاغي-يوخاري عئيني طالع گؤزله ديگيني نظره آلساق، اونلارين گله جگي نين  پروقنوزلاشديريلماسيندا تخمينن  عيني تصوور و يا قناعتلردن چيخيش ائتمک لازيم  گلير.

پروفسور فخرالدين وئيسللي اينگيليس ديلي نين دنیاداکي  هئگئمونلوغونو بو جور قييمتلنديرير: «… قلوباللاشما  شرايطينده اينگيليس ديلي نين حؤکمرانليغي بو ديلين آناسي ساييلان آمریکانين و بؤيوک بريتانييانين اقتصادی، سياسي و حربي واسيطه لردن استفاده ائتمکله همين ديلين قبول ائتديريلمه سينه گتيريب چيخاردير کي، بونونلا دا باشقا  خالقلارين ديللرينه و مدنيتلرينه اؤلدوروجو ضربه ديميش اولور» (10- ص. 14). گؤرکملي ديلچي «دنیا داهيلري نين بير نئچه سي نين يازيب ياراتديغي ديللرين»، او جمله دن آذربايجان ديلي نين گله جک طالعيي باره ده بدبين فيکيرده دير (10- ص. 15). او قئيد ائدير کي، «ايندي گنجلر قرامماتيکايا و تلفوظ قايدالارينا فيکير وئرميرلر. دانيشاندا ائله بيل ساققيز چئينه ييرلر.  اونلارين ديلينده س م س، تاپ، هوت، سوپئر، هندي، موبيل، چات، دونلود، پورتال، کيمي يوزلرله سؤز ايشلنير کي، هئچ اونلارين فرقينه وارميرلار. بو سؤزلر قلوبال ديلين هجومودور، اونلاري گؤتورن ديللرين ايسه فرياديدير» (10- ص. 15).

پروفسور فخرالدين وئيسللي نين  هيجانلاريني باشا دوشمک او قدر ده چتين دئييل… قلوباللاشان دنیانين عموم انسيت واسيطه سينه چئوريلن اينگيليس ديلي، دوغرودان دا، عرب، آلمان و يا فرانسيز ديلي قدر ديل- تفککور داهيلري يئتيرمميشدير. لاکين نظره آلماق لازيمدير کي، اينگيليس ديلي نين اولدوقجا چئويک، ايشگوذار، معاصر دنیانين نبضيني توتان «پوليفونييا»سي، «ديپلوماتييا»سي اونونلا کونکورئنسييايا گيره بيله جک هئچ بير بين الخالق ديلده يوخدور.

واختيله فئرديناند دئه سؤسسور ديلي دب- مودا ايله موقاييسه ائديردي.  و دوغرودان دا، ديل انسیت واسطه سي کيمي مختلیف ادالاردان (حتی ادابازليقلاردان!)، معاصرگؤرونمک «استيليزاسييالار»يندان محروم دئييل. اونا گؤره ده نه قدر «داغيديجي» اولورسا اولسون دنیانين ايکينجي، اوچونجو و س. درجه سوييه لي ديللرينه  معین «آنومالييالار»ين  آز و يا چوخ داخيل اولماسينا هر حالدا طبيعي باخماق لازيمدير. بير ده اونا گؤره کي، همين «آنومالييا»نئولوگيزملر ائله اينگيليس ديلي نين اؤزو اوچون  ده تاريخي حادثه دئييل، تاماميله يئنيدير… و باشقا ديللره «داغيديجي» تاثير ائدن نيطق خوصوصيتلري نين يالنيز  اينگيليس ديلي نين طبيعتيندن اوره لي گلديگيني گومان ائتمک ده دوزگون  اولمازدي، چونکي بين الخالق انسيت واسطه سينه چئوريلن هر هانسي ديل تدريجن، منسوب اولدوغو خالقين و يا ملتين مئنتال صلاحييتلري نين جغرافيياسيندان کنارا چيخماقلا ترانسملی علامتلر قازانير.

پروفئسسور فخرالدين وئيسللي تاماميله دوزگون مشاهده ائتميشدير کي، معاصر آذربايجان ديلينده سون ايللر ساده، حتّی مختصر جمله لرين  ايشله ديلمه سينه مئيل آرتميشدير (10- ص. 15)، لاکن بيز او فيکيرده دئييليک کي، «هر يئرده قيسا جمله ايشلتمک ساوادسيزليغين و ديل  سرشته سيزليگي نين علامتيدير». بوگونکو دنیادان م.فضولي نين اوزون  جمله لريني  نينکي دانيشيق ديليندن هئچ يازي ديليندن ده  طلب ائتمک اولماز؛  هر شئيدن اول اونا گؤره کي، ايستر اورتا عصرلرين، ايسترسه ده سونراکي دؤورلرين جمله پردازليغي حاديثه لرين سرعتله جريان ائتديگي، شعوورون درحال  رئاکسييا وئرمه لي اولدوغو و تفککورون تئمپي نين گؤرونمه ميش بير شکيلده يوکسلديگي  بوگونکو دنیا اوچون تاماميله غیری طبيعدير. بو  اونا اوخشاردي کي،  جراح عمليات پروسئسينده اؤز  آسسيستئنتلرينه، مثلا، «سکالپئل!»،  «قايچي!»، «بينت!» عوضينه «زحمت اولماسا، منه سکالپئل وئرين!»، ياخود «ايندي ايسه، لوطفا، قايچيني گتيرين!» دئيه مراجعت ائديدي.

پروفسور فخرالدين وئيسللي نين «بو گون اؤزوموزده استحصال اولونان  محصوللارا و يا اؤز دوشونجه ميزه اويغون شئيلره خاريجي آدلارين وئريلمه سي هئچ  جور باشا دوشولن دئييل. «بوناقوا،  نيگهتبار، سوپئر-مارکئت، مئديکال کلوب، تالکسهوو؟ ژوب جئنتئر؟ سئرويجئ پوينت» کيمي بيلديريش خاراکتئرلي سؤزلره نه احتيياج  وار، گؤره سن؟» (10- ص. 15-16) سوال اعتيراضي دا ماراق دوغورمايا بيلمز. لاکين نظره آلساق کي، بوتون بونلار، نه قدر پارادوکسال اولسا دا،  قلوباللاشمانين طلبيندن (و طبیعی  اولاراق!) ايره لي گلير، اوندا پروفسورون بو  هيجان اعتيراضي دا، چتين کي، اؤزونو دوغرولتسون و يا آغريلي قبول ائديلسين.

آنجاق فاکت فاکتليغيندا قالير.

آذربايجان رئسپوبليکاسي نين مرکزدن (باکيدان، ناخچيواندان، گنجه دن و س.) اوزاق بير کندينده  معاصر تيپلي بؤيوک بير ماغازا آچيليب اوزرينه «سوپئرمارکئت» يازيليرسا، بونا تاماميله طبیعی باخماق لازيم گله جکدير. حتّی همين کندين خوصوصيله ياشلي اهاليسي اونو بير مدت کؤهنه عادت ايله «دوکان»  آدلانديرسا بئل… چونکي قلوباللاشما ملی ديللره و عمومن مدنيتلره، بيرينجي نؤوبه ده، پارادوکسلارلا داخيل اولور، ضيديتلر، گؤرونن و يا گؤرونمه ين  قارشيدورمالار يارادير. ماهيت  ايسه بوندان عيبارتدير کي، قلوبال (بوتون دنیا اوچون عمومي، اونيوئرسال) اولان حاديثه  ملی (رئگيونال) اولان قدر انسان اوچون ماراقلي و يا جلب ائديجيدير.  هله اورتا عصرلرده (ائلجه ده قديم دؤورلرده) اؤز  ميفولوگييالاري، ديني ايناملاري اولان مختليف خالقلار، ائتنوسلار (مثلا، تورکلر، ايرانليلار، قافقازليلار) ايسلام  دينيني، ياخود دنیاگؤروشونو، ياخود دا مدنيتيني  ممنوعنيتله قبول ائديب عمومي  بير سوپئرملی و يا سوپئرائتنيک  دنیا ياراتماديلارمي؟ بونونلا بئله تورک تورکلویونده، ايرانلي ايرانليليغيندا، قافقازلي قافقازليليغيندا قالماديمي؟.. اودور کي،  درحال اعلان ائتمک کي، «بئله ليکله، پلانئتيميزده  مونومدنيت فورمالاشير کي، بو دا   بوتون دنیاني محو دوغرو آپارير» (10- ص. 17)، هله چوخ تئزدير،  باشقا سؤزله، لازيمي قدر اساسلانديريلماميش  ملاحظه دير.

بيزيم فيکريميزجه، طبیعی تاريخي بير پروسئس اولان قلوباللاشمادان چکينمک، ياخود اونو درحال لعنتله مک چيخيش يولو دئييل.

بو باخيمدان «قلوباللاشان آذربايجان» سيويل انکشاف مرکزي نين موقعيي بيزه داها ماراقلي (و دوغرو) گؤرونور. مرکزين نشر ائتديگي «قلوباللاشمايا دوغرو» کيتابيندا گؤستريلير کي،  «قلوباللاشمانين دانيلماز فايدالاري بو پروسئسدن قورخمايان و بونو ان ياخشي شکلده ايداره ائتمگي باجاران اؤلکه لر اوچون مقبولدور. آذربايجانين قلوباللاشمانين خاريجينده  قالماماسي و بو پروسئسده ضرري نين مينيموم، فايداسي نين  ايسه ماکسيموم اولماسينا ديقت  يئتيرمه سي واجيبدير» (5- ص. 27). کيتابدا اؤز عکسيني تاپميش  بئله بير ملاحظه ده ديققتي چکير: «قلوباللاشمانين  ايراده ميز خاريجينده انکشاف ائدن و نظارت ائده  بيلميه جگيميز بير پروسئس اولدوغونو درک ائده رک بونا جيدي حاضيرلاشماميز طلب اولونور. بيزجه، اؤلکه ميز قلوباللاشما پروسئسينه حاضيرليغا محض تحصيلدن باشلاماليدير» (5-  ص. 25).

آذربايجان، تورکيه، فرانسا، آلمانييا، اينگيلتره، آمریکا و کانادادا تحصيل آلميش 50- دن چوخ متخصيصين  چاليشديغي «قلوباللاشان آذربايجان» سيويل انکشاف مرکزي نين عمومي موقعيي بئلدير کي، «قلوباللاشما، پوزيتيو و نئقاتيو دير وئريلمدن، آناليتيک اولاراق دوشونولمه سي و حل ائديلمسي و جدييه آلينماسي لازيم گلن بير فئنومئندير» (5-  ص. 22).

بيز هر هانسي ملی موقعدن، او جمله دن ده ملی  ديل موقعييندن  قلوباللاشماني تقدير ائتمسک،  حتّی اونا محاريبه  اعلان ائلمه يه قالخساق بئله، بو طبیعی-تاريخي پروسئس-حرکات قارشيسينا چيخان بوتون مانعه لري ووروب داغيداجاق و بشريتين چوخدان آرزوسوندا اولدوغو و آرتيق کيفايت قدر پوپوليار ايفاده ايله دئسک، «سرحدسيز دنیا»ني رئاللاشديراجاقدير.  کاپيتاليزم ده بونا جان آتيردي، کوممونيزمده … مودئرنيزمله،  نئجه دئيرلر، پوستمودئرنيزمين ده ايدئالي بوندان عيبارتدير

 اودور کي، «آذربایجان ديلي نين قلوباللاشما شرايطينده زامانين طلبلرينه اويغون استفاده سينه و اؤلکه ده ديلچيلييين انکشافينا داير دولت پروقرامي»نين حاضرلانيب آذربايجان  پرئزيدئنتي نين 2013- جو ايل 9 آپرئل تاريخلي سرانجامي ايله تصديق ائديلمه سي چوخ مهم تاريخي حادثه دير. معاصر دؤورون طلبلريني، کونکرئت اولاراق،  قلوباللاشما پروسئسي نين فلسفه سيني نظره آلان دولت پروقرامي نين مقصدي «آذربايجان ديلي نين استفاده سي و تدقيقينه دولت قايغيسي نين آرتيريلما-سيني،  آذربايجان ديلي نين قلوباللاشما شرایطينده زامانين  طلبلرينه اويغون استفاده سيني، اؤلکده ديلچيليک آراشديرمالاري نين اساسلي صورتده ياخشيلاشديريلماسيني، ديلچيليگين آپاريجي ايستيقامتلرينده فوندامئنتال و تطبیقي تدقيقاتلارين  انکشافينا يؤنلديلميش ياراديجيليق سعيلري نين بيرلشديريلمه سيني و ديلچيليگين معاصر جمعيتين آکتوال پروبلئملري ايله علاقه لنديريلمه سيني تامين ائتمکدير» (1).

دولت پروقراميندا «قلوباللاشما» آنلاييشينين، تماميله دوغرو اولاراق، گئنيش ايضاحي، بو باردکي بيري ديگرينه چوخ  زامان  ضد اولان ملاحظه لرين اجمالي وئريلمه ميشدير، لاکين بو مهم دولت (و ملت!) اهميتلي سندين ميدانا چيخماسينين تاريخي سببي نين محض قلوباللاشما (اونون قاچيلمازليغي) اولماسي پروقرامين، دئمک اولار کي، هر  بير مدعاسيندا اؤز عکسيني تاپميش، نتيجه اعتباريله، عمومدنیا ميقياسلي بوتون بشريتي دوشوندورن پروسئس حاديثه يه کيفايت  قدر دريندن  (آناليتيک) مناسبت بيلديرميشدير:

«بو گون آذربايجان ديلي نين  ملی دولتچيلييين باشليجا رمزلريندن اولاراق استفاده سي و اساسلي تدقيقي، اؤلکه ده ديلچيليک علمي ساحه سينده وضعييتين  ياخشيلاشديريلماسي اوچون الوئريشلي زمين ياراديلميشدير.  عئيني زاماندا علم و تئخنيکانين سرعتله انکشاف ائتديگي  حاضيرکي قلوباللاشما دؤورو آذربايجان ديلي نين زنگينلشمه سي و تطبیقي امکانلاري نين  گئنيشلنديريلمه سي ايستيقامتينده آپاريلان ايشلرين يئني سويييه يه يوکسلديلمه سيني طلب ائدير» (1).

بورادا بيري ديگري ايله  ان مختلیف باخيملاردان هم سيخ باغلي اولان، بيري ديگري نين آردينجا گلن، هم ده قارشي- قارشييا دايانان  ايکي مسله ديقتي چکير:

1) دولت مستقلليگي الده ائتديکدن سونرا (و همين مستقلليگي آرديجيل بير شکيلده  محکملنديره رک)  آذربايجان رئسپوبليکاسي دولت ديلينين هم اؤلکه ده، هم ده اؤلکه دن کناردا استفادسي ميقياسي نين  گئنيشلنديريلمه سي و ديلچيليک علمينين انکشاف ائتديريلمه سي اوچون هر جور سياسي- ايدئولوژي شرایط امکانلار ياراتميشدير؛

2) معاصر دؤور، يعني   قلوباللاشما پروسئسي طلب ائدير کي، همين شرایط امکانلاردان فايدالانماقلا آذربايجان ديليندن هم اؤلکه ده، هم ده اؤلکه دن کناردا داها گئنيش استفاده، اونون اجتماعی، سيياسي و مدني اينتئللئکتوال نفوذونون تامين ائديلمه سي استقامتينده  تدبيرلر گؤرولسون.

بو ايسه او دئمکدير کي، آذربايجان ديلي آذربايجان رئسپوبليکاسي نين (دولتين!) و دنیا آذربايجانليلاري نين (ميللتين!) تاريخي ثروت ديري اولاراق معاصر دنیادا گئدن قلوبال پروسئسلر، کونکرئت اولاراق، قلوباللاشما قارشيسيندا دايانميشدير. و او، کيفايت قدر گوجلو مودافعه  امکانلارينا مالک اولماسي ايله ياناشي زامانين طلبلرينه، چاغيريشلارينا دا جاواب وئرمه ليدير.

پروفسور ف.وئيسللي يازير: «آذربایجان ديلينين صاباحي قلوباللاشمانين وسعتيندن آسيليدير. بيز نه قدر چاليشساق دا، دنیادا گئدن اقتصادی، مدني، گئوسيياسي تمرکزلشمه نين ديله تاثيري نين قارشيسيني آلماقدا عاجيزيک. بو گون دنیادا غیری آذربايجانليلار ديليميزي  اؤيرنمه يه، اوندان هر يئرده استفاده ائتمه يه او قدر  ده ماراق گؤسترميرلر. هئچ آذربايجانليلارين اؤزلري بونا او قدر سعي گؤسترميرلر» (10-  ص. 18).

عمومي ديلچيليک و يا ديل نظريه سي اوزره  گؤرکملي متخصصين موقعييني، البته، درحال شوبهه آلتينا سالماق فيکريندن اوزاغيق، بونونلا بئله بير سيرا مسله لره آيدينليق گتيرمک ايسترديک…  هر شئيدن اول، «قلوباللاشمانين وسعتي» يالنيز «آذربایجان ديلي نين صاباحي»نا يوخ معاصر دنیانين آذربايجان ديليندن داها  گئنيش ياييلميش، داها نفوذلو،  مثلا، آلمان، فرانسيز، روس، عرب و س. ديللري نين، حتّی انگيليس ديلي نين صاباحينا دا اهمييتلي تاثير ائده جکدير.  اونا گؤره ده آذربايجان  ديلينين طالعيي باره ده «واختيندان اول» ناراحت  اولماغا، بدبينلييه قاپيلماغا ائله بير جيدي اساس  يوخدور. «غیری آذربايجانليلار»ين «ديليميزي اؤيرنميه، اوندان هر يئرده استفاده ائتمه يه او قدر ده ماراق گؤسترممه لري» مسله سينه گلديکده ايسه،  بورادا، فيکريميزجه، بير قدر رئاليست اولماق، ياخود موجود رئالليقدان چيخيش ائتمک لازيمدير. بئله کي،  هر حالدي ایيرمي- ایيرمي بئش ايل بوندان اول  دنیادا آذربايجان ديلينه  بو قدر ماراق تصوره بئله گلمزدي کي، ايندي واردير… بيز دئميريک کي، هامي «هر يئرده» آذربايجان ديليني آذربايجانا (و آذربايجان خالقينا) محبتيندن اؤيرنمک ايسته يير، طبیعی کي، بورادا کونيوکتور ماراقلار دا آز دئييل و هئچ واخت آز اولماياجاقدير؛ آنجاق اؤيرنيرلر و گئت- گئده  داها چوخ اؤيرنه جکلر… واختيله بوتون هينديستان (قديم دنیا مدنييتي نين  بئشيکلريندن اولان نهنگ بير اؤلکه) بؤيوک بريتانيانين موستملکه سي اولدوغوندان اينگيليس ديليني اؤيرندي. و حاقيقت نامينه  اعتيراف ائتمک لازيمدير کي، بو، اؤلکه نين يوکسه ليشينه اهميتلي تاثير گؤستردي. بوگون ده گؤسترمکده دير… لاکين مشهور ظارافاتدا دئييلديگي کيمي، بير اينگيليس بير هيندلييه لاغ ائدنده کي، سيز بيزيم موستملکه ميز اولموسوز، هيندلي  غورورلا جاواب وئرير: بيز ده سيزين ديلينيزي اؤز موستملکه ميزه چئويرديک، اونونلا نئجه ايستديکسه او جور ده داورانديق.

بوگون  فرانسادا رستوراندا اينگيليسجه ياخشي بيلن ايديعالي بير فرانسيز قارسونونا اينگيليس ديلينده يئمک سيفاريش وئرنده  بير نئچه دفعه  اؤزونو ائشيتمه مزلييه وورورسا، بونا دا طبیعی باخماق لازيمدير.

و دوشونمک اولماز کي، بو جور ايديعا (قورور!) آذربايجانليلار اوچون سجيييوي دئييل. هله مين ايل بوندان اول بؤيوک  تورک فيلولوق متفکري عربلره (و عرب ديليني بيلن بوتون خالقلارا) تورک ديليني اؤيرتمک اوچون مشهور «ديواني الغت التورک»ونو ياراتميشدي. «ديوان»ين گيريشينده ايسه گؤسترميشدي کي، تورکلرين اوریينه ياخين اولماقدان اؤترو اونلارين ديليني اؤيره نين… اودور کي،  پروفسور ف.وئيسللي نين هئچ آذربايجانليلار اؤزلري ده آذربايجان ديليني اؤيرنمه يه سعي گؤسترميرلر قناعتي دوغرو ساييلا بيلمز. اگر آذربايجان  گنجلري بوگون دنیانين مختلیف انکشاف ائتميش ديللرينه، خوصوصيله اينگيليس ديلينه گئنيش ماراق گؤستريب، حياتدا اؤز  يئرلريني توتماق، يوکسک موقعلر  قازانماق اوچون همين ديللري اؤيره نيرلرسه، بونو آذربايجان  ديليندن امتناع  کيمي اينتئرپرئتاسييا ائتمک اولماز.

آذربايجان ديلي نين خوصوصيله بين الخالق نفوذونون گوجلنمه سينده «نفت عاميلي» نين رولو ديقتي جلب ائدير. لاکين بو رول ف.وئيسللي نين حدديندن آرتيق ملی وطنپرورليک موقعييندن گومان ائتديگي قدر ده بيرباشا دئييل. اونا گؤره ده  عاليمين «هئچ نفت صنايعسي نين اؤزونده بئله بيزيم ديليميزده يارانان و سونرا باشقالاري نين ايشلتديگي سؤزه و يا جمله تيپينه راست گلمک اولمور. بيز بو گون /پيپئلينئ/ سؤزونو اينگيليسجه دن گؤتوروب ديليميزه (بورو کمري/ کيمي ايفاده ايله ترجومه ائديريک. حالبوکي /کمر/ و  /بورو/ سؤزلري ديليميزده ايشلنن  سينونيملردير» (10- ص. 18) و س. ملاحظه لري مباحثه دوغورور؛ بئله کي، نفت صنايعسي نين (و اونون تئرمينولوگيياسينين)  يارانيب فورمالاشماسي دنیادا  گئنيشميقياسلي بير حاديثه  اولوب يالنيز آذربايجانين  بو ساحه ده کي  اوغورلاري ايله محدودلاشمير.  بين الخالق ديلده اينگيليس ديلينده ايشلنن و طبیعی کي، کيفايت قدر پوپوليار اولان پيپئلينئ تئرميني آذربايجان ديلينه «بورو کمري» شکلينده  چئوريلميشدير کي، بو عئيني اوغورلا «بورو خطي» ده اولا بيلردي. لاکين «بورو» سؤزو ايله «کمر» سؤزونون  آذربايجان ديلينده سينونيمليگيندن بحث ائتمک دوغرو دئييل… «گر بيز عصرين مقاويله سيني ايمضالاياندا بو سؤزلردن بيريني  مقاويله نين متنينه سالسايديق و بوتون دنیا اونو بو شکيلده ايشلتسيدي، اوندا بيز دئيه بيلرديک کي، ديليميز ده  قلوباللاشمادا ايشتيراک ائدير» (10- ص. 18) شکلينده کي  تعصوبکشليک ده بين الخالق مقاويله لرين حاضيرلانماسي تئخنولوگيياسي باخيميندان او قدر ده منطيقلي سسلنمير. و بورادان او نتيجه ني چيخارماق دا دوزگون دئييل کي، «دئمه لي، بين الخالق عالمده آذربايجان ديلي نين تاثير دايره سيندن دانيشماق معناسيزدير» (10- ص. 19). آنجاق پروفسورون آشاغيداکي  فيکيرلري تاماميله دوغرودور کي، آذربايجان ديلي «بو گون ده بؤيوک آذربايجان خالقي نين  سايه سينده ياشايير. بونون ان قيسا يولو  اقتصادیاتيميزين قودرتلي اولماسيندان کئچير.  اؤزوموز استحصال ائديب آد وئره بيلسک،  همين آد بيزيم محصولوموزلا بيرگه دنیايا ياييلا بيلر» (10- ص. 19).

اقتصادياتين، خصوصيله معاصر تئخنولوگييالارين مختلیف ساحه لرينه آدلانديرما باخيميندان آرتيق چوخدان نفوذ ائتميش اينگيليس ديلي بوتون ديللري نينکي  قاباقلاميش، ائتنوقرافيک اهميتلي آدلاردان باشقا، دئمک اولار کي، بوتون آنلاييشلاري (ادلاري) ايفاده ائتمک ايديعاسيندادير.

بو ايسه قلوباللاشما اوزره متخصيصلرده بئله بير سوال دوغورور: «هومو پوستيندوستريئنس هانسي ديلده دانيشاجاق؟ دوغرودانمي يالنيز  اينگيليس ديلينده؟» (5- ص. 123). و  همين سوالا بئله بير «غیری- عادي» جاواب وئريلير: « اصلینده، بو سوالا  تاخيليب قالماق  او قدر ده اؤنملي دئييل. اساس اودور کي، هومو پوستيندوستريئنس قلوباللاشمانين يئني مارکاسينا چئوريلمکده دير. بو  چئوريلمه دنیاينين بير چوخ  قلوبال پروبلئملرينه ده باخيشلاري دييشه  بيلر. گؤرسن،  بير- بيرينه اوخشايان، عيني جور دوشونن، عئيني هدفلره يول آلان يئني چاغين انسانلاري آراسيندا يئنه اراضي موناقيشه لري، ديني موحاريبه لر سيويليزاسييالارين توققوشماسي باش وئره جکمي؟ اگر بوتون بونلار باش وئره جکسه، کيمين  هانسي ديلده دانيشماسينين نه معناسي وار؟  و يا دوغرودان دا، اگر باش وئرميه جکسه،  هومو پوستيندوستريئنسين ده هانسي ديلده  دانيشماسي نين دا هئچ بير اهميتي اولماياجاق!» (5  ص. 123- 124).

مؤليفين ديل مسله سينه اراضي، ياخود دين مسله سيندن کناردا باخماسي دوغرودور، چونکي انسيت واسيطه سي اولان ديلين، ياخود ديللرين گله جک طالعيي همين تاسيساتلاردان بيرباشا آسيلي اولا بيلمز. کئچن عصرين 50- جي ايللرينده ديلين «بازيس»، ياخود «اوستقوروم» اولوب- اولماماسي  ايله باغلي سووئت مذاکره لري ده گؤستردي کي،  ديل خوصوصي حاديثه دير؛ اونو نه «بازيس»، يعني اقتصادی مادي خاراکتئرلي، نه ده «اوستقوروم»، يعني معنوي ائتنوقرافيک خاراکتئرلي تاسيساتلارا آيد ائتمک اولماز. لاکين بوتون دنیا اوچون عمومي اونيوئرسال اولان سحو تصوورلر ديلي هميشه معنوی-ائتنوقرافيک (مدني!) حاديثه لر سيراسينا داخيل ائتمکله اؤزونو چيخمازا سالميشدير.  قلوباللاشما ايسه، اونون  طرفدارلاري نين، ياخود عليه دارلاري نين نه دوشونوب-دوشونممه لرينه باخماياراق، موجود آنلاييش تصوورلره آناليتيک ايضاح طلب ائدير؛ ائله بير ايضاح کي، اورادا  يالنيز بير مئتودولوژي ايستيناد منبعي وار، او دا انسانين طالعييدير. ملتيندن، دينيندن و جوغرافيياسيندان آسيلي اولماياراق، انسانين (جعميتين!) طالعيي نئجه اولاجاقسا، ديلين ده طالعيي ائله اولاجاقدير. بو ايسه قورخو يارادير… «دنیادا قلوبال ديل مسله سي ايکي مهم اعتيراضلا  مشايعت اولونور. بير طرفدن بو، ديل ايمپئرياليزمي قورخوسونو يارادير…  ايکينجي اعتيراض ايسه ملی آزليقلارين قلوبال ديل سیاستينه قارشي چيخمالاري ايله باغليدير» (10-  ص. 23).

بو ايسه او دئمکدير کي، هم «ديلي بين الخالق ديله چئوريلميش اينگيلتره نين اؤزو بئله لينقويستيک ايمپئرياليزمين گئنيش وسعت  آلماسيندان ناراحتدير»، هم ده اينگيليس ديلي نين «تهلوک»سيني حس ائدن ديللر… مثلا، سونونجولارين نماينده سي اولان آذربايجانديللي شاعير يازير:

 

سلام عليکوم!

ديللرين اجلي چاتدي!

عليک السلام!..

بو هله هاراسيدي:

لئيلي اينگيليس ديلينده اؤلور،

مجنون اينگيليس ديلينده

خيففت چکير

قذافيني

بو ديلده سؤيور ليبيا.

جللاد «ياسين»ي

بو ديلده اوخويور

يالينجاق قاراباغ جاماعاتي

اينگيليس ديلينده اوشويور،

ATT اينگيليسجه

ناغيل دؤشه يير!

(واقيف بهمنلي).

 

بو، آذربايجانلي شاعيرين، سادجه، ايمپروويزاسييالاري دئييل، بین الخالق ديلين (و سياسي- اجتماعی نفوذون) تضيقينه قارشي ملی ديره نيش و يا رئاکسييادير. عيني زاماندا قلوباللاشان دنیانين ياراتديغي اوبيکتيو سوسيال- معنوي منظره يه قارشي رئگيونال ائتنوقرافيک (سوبيئکتيو) اعتيراضدير کي،  ملی موقعدن اولدوقجا معنالي، بين الخالق موقعدن ايسه اولدوقجا سادلؤو (کوستار) گؤرونه بيلر.

شاعيرين پوئتيک اوغورو ايسه بين الخالق تشکيلاتلا-رين فاليتينده کي  «آنلاشيلمازليقلار»ين، عومومن قلوبال  ماراقلارين «انگيليسجه اولدوغونو»، يعني ساده  آذربايجانلي اوچون آنلاشيلماز اولدوغونو دئمکدن عبارتدير. يئني  ديل کيمي موناسيبت ده آنلاشيلمازدير

بونونلا بئله شعرين فلسفه سي آذربايجانليلارين  اساس بين الخالق ديله موناسيبتيني عوضوي وحدت ده، ياخود  بير کل حاليندا ايفاده ائتمير، يالنيز اؤلکه نين آغريلي بير  پروبلئمينه بين الخالق تشکيلاتلارين (و اوبرازلي شکيلده، بين الخالق ديلين) کونيوکتور موقعييني عکس ائتديرير.

عمومیتله ايسه، آذربايجاندا اينگيليس ديلينه پراکتيک ماراغين نه قدر پئرسپئکتيولي اولدوغونا اينانماق اوچون يالنيز بير فاکتي خاطيرلاماق کيفايتدير کي، اينگيليس ديلي خاريجي (و بين الخالق) بير ديل اولاراق اوندان اول اؤلکه ده دولت ديليني  آرخا پلانا کئچيرده جک قدر گئنيش نفوذا مالک روس ديليني تماميله سيخيشديرماقدا، يئني ديل- انسیت موناسيبتلري و يا  منظره سي ياراتماقدادير.