اوروجلوق آیی بو گون قورتاردی . مجازی دونیا دا هامی بیر – بیرینی تبریک ائدرک معنوی بورجونو اوده میش اولدو.ائله بیل بیر یوک دور آدامین بوینوندا . مجبورا اونو یئرینه یئتیرمه لیسن. اولسون بونا کیمسه اعتراض ائتمیر.
آنجاق اوروجلوقدا آج قالماق ثاواب اولسادا ایندی آرتیق یئمه مک گوناه ساییلیر.
یولومو محله میزین سوپر مارکتینه توشلادیم کی ، ائوه بیر شئی لر آلیم.گیرن کیمی ایچرینین چوخ شولوغ اولدوغونو گوردوم.بایرامین گونو گوره سن بو مارکت نیه بو قدر قالابالیقدیر. اوزو – اوزومنن سوروشدوم .
بیر آز قاباغا گئتدیم گوردوم ماکارونی صفی دی.ائله مارکتین گیریشیندن ده گوروررسن کی دئمک اولارکی مارکت بوش دور. ایلک گیریشده بیسکویت و چورک محصوللاری سونرا ایسه گازلی و سو کیمی ایچه جک محصوللاری واردیر. آنجاق ایچریه دوغرو دئمک اولار کی مارکت بوش وضعیت ده دیر. بیر آز هیند و تایلند دویوسو سونرا اونون اوست طرفینده یئرلی دویو ده مایوس – مایوس مشتریلره باخیر.چونکو اونو آلماغا کیمسه نین مادی گوجو یئتمیر. هره بیر اوف چکیب ایره لیله ییر. یان طرفده برک و دورو یاغلار پوز وئره وئره آداما باخیر . ائله بیل ایندی آتیلیب گیره جک گوزووه. قیمتلری او قدر باهادیر کی هیچ کس اونلارا باخمیر.
سول طرفده تمیزلیک کاغیذلاری و یویاجاق مایع لری وار اونلاردا مشتریلره ایری – ایری باخیرلار.
کیمسه اونلارین ترس و باهالی باخیشی اوجوباتیندان یاخین دوشمور اونلارا.
هاما بیر استقامت ده گئدیر. سول یانادا ات و سوت اورونلری واردیر. ات او قدر باهادیر کی گرک گوزونو یوموب اونون یانیندان اوته سن کی ، مبادا قیمتلرین شاواغی گوزلرینه زیان وئرمه سین.
نهایت گئدیب چاتییق اساس مسله یه یعنی ماکارونی و حبوبات اورونلرینه . لوبیا و مرجیمک آداما ترس باخیردی. نوخود ایسه آز قالا گوزو چیخاردیردی. خرما دا کی اوز کیفینده ایدی. هامی جومموشدو ماکارونینین اوستونه .منه چاتاندا دورد پاکت قالمیشدی. باخدیم آرخاما گوروم بونلاری من آلیم یا بو وطنداش. جاوان اوغلان ایدی . نیگران حال دا منه و ماکارونی لره باخیردی.
سوروشدوم کی ، سیزه نئچه پاکت لازیم دی. باخدی اوزومه گولومسه دی و دئدی ک: اویرنجیم اوللر یومورتا آلیب ییردیک ایندی او باهالشیب یالنیز اومید ماکارونیه قالمیشدی کی دئییرلر بو گوندن ایکی یوز دفعه باهالاشاجاق. هامیسین سیز آلین او منه دئدی.
دئدیم یوخ منه بیر پاکت یئتر اوچو سنین بیری منیم اولسون .
بیر آز تعرف دن سونرا من دئین کیمی اولدو .
سونرا طلبه منه دئدی هیچ بیلرسیز مارکتلرده ماکارونی یوخدور ؟ یوخ دئدیم بو مسله دن خبریم یوخدور. اولماسینا اولاجاق اما بیز داها اونودا دویو ، ات ، نوخود ، لوبیا , مرجیمک , و سوت قاتیق کیمی آلا بیلمه ییه جییک.
ایکیمیزده نیگران باخیشلارلا بیر – بیریمیزدن آیریلدیق. گورشمسک ده عین درد ده اولدوغوموز محقق عینی ایدی.