مدیر مسئول و باش یازار : دکتر حسین شرقی دره جک
Sorumlu müdür və baş yazar Dr. Hüseyn Şərqidərəcək SOYTÜRK
اعتراف اتمک گرکدیر کی مدنییت آرئناسیندا چوخ جان سیخیجی تدبیرلرین حیاتا گئچیریلمه سی نتیجه اعتباریله عکس نتیجه وئرمکده دیر. اولوشا بیلن آلت یاپیی کین ونیفرت دن باشقا دئییل دیر. سئوگی و باریشی سرگیله ین مدنی کوراللارین اویقولاماسی نتیجه اعتباریه سئوگی و قارداشلیغی گتیرمک ده دیر.
تک یونلو باخیشلارین البته تک و رادیکال سونوجلاری اولا بیلر. گوج کیمین الین ده دیرسه او گوجونو اوز منفعتلری اوغروندا قوللانیرسا و باشقلارین گورمزدن گلیرسه او زامان اجحافا اوغرامیش کسیم ده زامانی گلدیک ده انتقام پولتیکاسینی اویقولاماقدان کنار دورمایاجاقدیر.
بیز بو گونوموزو یوخ بلکه 100 ایللر سونرامیزی عدالت و مساوات چرچیوه سینده قوروماغی اساس هدف سئچمه لییک.
کیمسه لرین اویونونا گلمه دن اوز اویونونموزو اوز دوغرولوقلاریمیز اوزرینده قورمالییق. قونشولوق و قارداشلیق پرینسیپلرینی رهبر توتمالییق . تک کولتورللوک و تک دیللیک دن چکینمه لییک زیرا زامانین گئدیشاتی هر کسی اوز وارلیغینی بیلمه یه و اونو قوروماغا واقیفلندیرمیشدیر.
مرکزلشمه یونتیم سیستمی ذاتا سونا اوغرامیشدیر. هر کس برابر حق صاحبی کیمی اداره ائتمه دن اوز پایینی آلابیمه لیدیر.
اوزون سوزون قیساسی :
- نیه بوتون خالقلار ایتیم و اویرتیم ده برابر حوقوقا مالیک دئییل ؟ ( سنین قانین منیم قانیمدان رنگلی دئییل)
- یاییم و سوسیال مئدییا نیه بیری اوچون دولت امکانلاریندان بهره له نیر و باشقا دوغمالارا ایسه اوگئی مناسبت بسله نیر؟ 3.تلویزیون و دیگر میللی پلاتفورملار نیه بیر دیل و فرهنگین خدمتین ده دیر؟
4.آموزش و پرورش هم ده عالی تحصیل نیه صرف بیر مدنیتین انحصاری آلتیندا دیر ؟ حال بو کی بیز بو اولکه نی دوشمنلردن قورماق اوچون برابر ساواشیب و برابر اولموشوک.
5. نیه بیزلرین گوزو قولاغی باشقا اولکه لرین تلویزیون و سوسیال مئدییا وئرلیشلرین ده اولمالی دیر. حال بو کی بیزیم اولکه نین امکانلاری بونا قادیر دیر کی بوتون یئرلی اهالینین میللی فرهنگی اساسیندا وئرلیشلر حاضیرلاسین.
6. نیه شاعیرلریمیز , خواننده لریمیز و مهندسلریمیز باشقا اولکه لرین موسسه لرین ده و اجتماعی پلاتفورملاریندا اوزونو گوسترمه لی و هنرینی سرگیله مه لیدیر ؟
گورسن زامانی گلمه دیمی کی بیز ده تک و واحد ایرقچیلیقدان چوخ کولتورلولویه کئچک ؟
بیر – بیریمیزی ازمک دن بیر – بیریمیزی سئومه یه کئچمه نی زامانی گلمه دیمی؟
سون سوز : بیر – بیریمیزی اونون و بونون نوکری حساب ائتمک دنسه بیر- بیریمیزین دوستو اولماغین زامانی گلمه یه جکمی.
یاد و یابانجیلیق معامله لری و اویونلاری سون بولمویاجاقمی ؟
اوز اولاق, دوغرو اولاق و گوجلو اولاق ....
بیریمیز اوز ده او بیریلری آشاغیدا پرینیپی آرتیق تاریخه قووشموشدور. وحدت احترام متقابیل ده دیر. بیز بیر بالونون ایچین ده ییک احتیاطلی اولماق و صمیمی اولماق هامیمیزین یارارینادیر.
ایللردیر بیر اولکه نین وطنداشی اولماغیمیزا باخمایاراق بیر تورک کیمی مدنی و سیاسی حتی آموزشی باسقیلارا معروض قالدیق. آچیلان هئچ بیر صاباح گوزل گله جه یین مژده چیسی اولمادی.اوشاقلاریمیز دیلمیزی اونوتدو . بویوکلر ایسه هویتینی. داها آیدین گله جک دن بیر ایشیلتی گونمور.
قیزیمین مبایل تلفونونو بازاردا اوغورلامیشدیرلار.اونولا برابر لازیم اولان اداره یه گئدیم.
قیزیم دئدیی آتا سن دینمه من دانیشاجام . دئدیم نیه دئدی آخی سن دکتر اولسان دا دانیشان دا تورکی لهجه وارین دی. من ... نیرام.
ائله بیل باشیما سومار دا بیرخمپاره دوشدو.دئدییم قیزیم من جانبازم بو نه سوزدور . دئدی لطفا ساکتدور آتا.
دئمه لی من ایللر بویو سیستماتیک تحقیرین قربانی اولدوغو ان سئودییم اولادیمین دا بو تحقیردن آنلادیغیندان باشا دوشدوم.
آنجاق سوسماق بو مشکولون حلی دئییل. میللی سویه ده بو تحقیرلرین آرادان قالدیریماسی اساس مسله دیر.
منیم آلچالمام سنی اوجالدیرسا او زامان سئوینمه نه گرک یوخدور. بلکه اوتانمان لازیم دیر. دویمه تاختا قاپینی دویرلر دمیر قاپینی...
***
دیرناق قوپارمی اتدن؟
هورولمه سه ایپی چپ دن
وئر ال له آلار کامین اینسان
چپر هورمکدن گلر کدر غم
دوغرو اوتور دوغرو دولان
فانی دیر دونیا ایلکدن ازلدن
منت گوتورمز داشینان یوک
اوزونون اولسا آجی بالدیر اینان
اینسانی اوجالدان شرف دیر لیاقت
مین وارین اولسا بوش پیمانه دی
عالم علامت ده هویت دیر سرر جان
جانسیز بدن دن اونما تمنا
بوشا گئدر ایلقاری دوست اولسا حالا
زینهار آغلاتما سیخما یار کونلون کی
اوندا وفا آختارسان بولامازسان هیچ زامان
روان ایله عقلین اورک پریشان دیر
جهد محو اولسا دونر تیغ زامان امان دیر
ترسه یوخ دوزگون باخ گوزومه
ایچیم دکی تلاطوم البت کی عیان دیر
بسلمه کین و کدورت مات ائدر روحونو
ساغلام اینانجا آرخلان دوغرو داوران
سرر حقیقت ذات طبیعت عدالت دیر اینان
سوی تورک اوساندی, دینمز روحو بیر آن.