مدیر مسئول : دکتر حسین شرقی دره جک سوی تورک
SORUMLU MÜDİR :DR.HÜSEYN ŞƏRQİDƏRƏCƏK SOYTÜRK
اینسانین یارانماسیندان ایکی میلیون ایل گئچمه سینه باخمایاراق بو یاراتیق هر زامان اویرنمک و دییشمک پئشینده اولموشدور.دییشیم , دونوشوم و اینکیشاف حیاتین دوغرویا یورومه سینین اوچ اونملی فاکتورودور. بونلاردان غافیل اولان توپلولوقلارین گله جه یی یوخدور. زیرا اونلار اییتیلمیش توپللوقلارا یئم اولماق زوروندادیرلار.آنا دیللرینده اوخویوب یازا بیلمه ین توپللوقلار ایسه دوشونمک و ایره لیلمک فاکتوروندان محرومدورلار. چونکو مرکزلشمیش و کمپلکس حالیندا بیلیم و ایتیمه مالک اولمایان اولوسلار یا خود توپللوقلار حقیقی معنادا دونیانین ایره لیلیش دوزنیندن گئریه قالیرلار. اونلار اوز کافالارینین یئرینه باشقالارینین قافالاریلار دوشونمه یه باشلاییرلار . بونوندا آدی آسیمله یعنی اوزوندن اوزاقلاشما دیر. بو وضعییتین داها قاباریق فورماسی مانقورتلاشماقدیر. کوله و قول اولماق بو تور یاشامین قاچینیلماز حالی دیر.
هرکس اوزو اولماق ایسته ییرسه ایلک نوبه ده اوز ژنتیک کدلاری اساسیندا تعلیم و تربیه آلمالی دیر. اوز اوزلویوندن محروم هر بیر اینسان هر بیر بیریی ایلک اونجه تاریخی یادداشیندان اوزاقدا قالاراق تاریخی اونوتقانلیغا معروض توتولور. آنا دیللی تعلیمین قاشیسینین آلینمات سبب لریندان بیری محروم ائدیلن خالقین تاریخی یادداشینی سیلمکدیر. بودا او آنلاما گلیر کی سیز جانلی وارلیق اولاراق کوله (برده) گوره وینینی یئرینه یئتیرمکده سینیز.
اوخومایان میللتلر کولتور , مدنیت و اینجه صنعت و صنایع هم ده اوره تیم (تولید) باخمیندان یوخسون اولدوقلارینا گوره باشقا میللتلرله اینتقراسییادا محکوم و مصرفی دوروما دوشورلر. اوچ و یا دورد نسل دییشیمیندن سونرا ایسه بوزقونلوغا اوغرایاراق تاریخین یوخ اولما مکانیزماسیلا باشقلاربنین ایچینده ارییب و یوخ ائدیلیرلر.
ذاتا آنا دیللی تعلیم و تربیه نین یاساقلانماسینین هدفی بوندان عیبارتدیر کی :
- سن کیم اولدوغوندان بی خبر قالاسان و مرکزلشمیش ایتیم و اویرتیمین (آموزش و پرورش) آسیمیلاسیون دییرمانیندا باشقالارینین سنین اوچون و سنین علیه اولان تعلیم مکانیزملریله تمامی ایله اوز آنا کدلاریندان اوزاقلاشاسان و اینسانلیقدان ساده فیزیکی گورونتویه صاحیب اولاسان . آنجاق اویره دیلن مدنیتین نوکرینه چئوریله سن.
- محروم ائت و یکدست قیل سیاستی اوجوز ایش قووه سینین راحت اداره سیتمی دیر.
تاریخی بوشلوق یارات و ائلاستیک اینسان کیتله سی ایجاد ائت و ایسته دیین یونده اونو قوللان.- مدنیتلری قتل عام ائتمک و استعماری یونتیم سیستمینه خیدمتدیر. امپریالیستی و فاشیستی آنتی اینسانی مفکوره دیر.
- آرخاسیندا سیجاق گوجلرین دوردوغو و مالی امکانلارین اولدوغو همچنین جغرافی شرطلرینه چیخارلارینی آلت اوس ائتمک اوچون یوخسون مدنیتلرینی قاباریق شکیل ده کوکلو مدنیتلره قنیم کسمک و او مدنیتی اوز چیخارلاری دوغرونتوسوندا استفاده ائتمکدیر.
بونلار ساده جه آنا دیللی تحصلین اولماماسینین گورونن اوزودور. آلت قاتلاردا ایسه درین دوولت سیاستلری بولونماقدادیر. بودا یوره سل و کوره سل گوجلرین ماراقلارینین تامیناتی مسله سی دیر.
آنجاق او کی قالدی بیز نیه آنا دیلمیزده اوخوماقدان محروموز ؟ اونو دئیه بیلرم کی چونکو بیز چوخوق و سایجا بوتون قوملردن قات قات اوستونوک و درین گئچمیشیمیز و دوولتچیلیک تاریخیمیز و حافیظه میز وار.
دیلمیز اویوملو و درین هم ده زنگین ادبی , علمی و مدنی بیریکیمه صاحیب دیر.
بیرده کی بیزیم دیلیمیز محلی و قومی دئییل منطقه ای و بین اللملی دیر . ان آزی بیزه یاپیشیخ ایکی دوولتین رسمی دیلی دیر. بو دیلله چین دن و سیبریادان هم ده روسیه دن ,قفقازدان , آنادولودان آوروپایا قدر یاییلمیش دیر و حال حاضیردا آلتی دوولت ده و بیر چوخ اوزرک جمهوریت لرده و توپللوقلاردا رسمی دیل دیر.
دیلمیزین گوجو اونون باشینیند بلاسی دیر و حال حاضیردا دونیا دیللری سیراسیندا اولماغ باخمایاراق اولکه داخیلینده بللی ماراقلار سببیندن تحصیل ائدیلمه سی یاساقدیر.
آنجاق قید ائتمک لازیمدیر کی دیل سیاسی اولچوکدن اونجه اینسانی فاکتوردور. دیله تانرینین بشرییته هدییه سی کیمی باخماق لازیم دیر. کوکلو مدنیتلر و زنگین دیللر باسقیلارلا یوخ اولمورلار هئچ. بلکه داهادا مکملله شیرلر و پوخته له شیرلر . نئجه دئییرلر دیره نیش ادبیاتینا ییه له نیرلر و بو دست آورد اونلارین اوزون سوره گله جکلرینی تامین ائدیر.
سون اولاراق قید ائتمک ایسه ییرم گرچی دولت دسته اولمایان بیر دیله و ادبی ثروته صاحیبیک آنجاق کوره سل سوز خزینه سینه و اوره کدن سئویلن و کونوللرده بسلنن بیر اویقارلیغا صاحیبیک. ایندی اینترنتین و سانال دونیانین یاییقینلاشماسیلا برابر بیزده منزوی دورومدن چیخمیش ساییلیریق. بیر چوخ مدنیت مرکزلریله عینی قدری و کوکو هم ده فوندامنتی پایلاشدیغیمیزا گوره راحاتجا دیل و ایتیم ساحه سین ده اوزگور بیر آلانا ییه لنمیسش دورومداییق.
اوجاغیمیز یانماسادا توتمک ده دیر ....