İRANDA TÜRKLƏRİN DURUMU UCUNDA IŞIQ GÖRÜNMƏYƏ TÜNEL KİMİDİR.
SORUMLU MÜDÜR :
Dr.HÜSEYN ŞƏRQİDƏRƏCƏK ( SOYTÜRK)
مدیر مسئول و سردبیر :
دکتر حسین شرقی دره جک (سوی تورک)
اولکه نین بوتون دردلرین ده اورتاق اولماغیمیزا باخمایاراق پای بولوشومونده ندنسه غریبه کیمی اولوروق. ان آزیندان 100 ایلدیر بو مدنی - اکونومی و سوسیال دوروم دییشمه دن اولدوغو کیمی داوام ائتمک ده دیر. باخمایاراق بوتون سورونلارین حللین ده اون جبهه ده اولوساقدا نهایت سورونلار چوزولندن سونلار غالیب یاپای مدنیتهضرر گلمه سین دئییه گئنه اوصلو اوزاق توتولوروق. یادا ایندی اولکه نین وضعییتی بئله ایجاب ائدیر کی بیز گرک مدنی و اقتصادی و تمل حاقلاریمیزدان واز گئچمیه زورلانیریق.
چتین گونده قارداش خوش گونده ایسه تانیش اولوروق. گوزومو آچاندان بیرجه آنا دیللی مکتبین حسرتین چکرک یاشاییرام. ارمنیه و فارسا باخاراق چوخ کوتو حیسلر یاشاییرام. اونلارین آناسی و آنادیلی گورسن ندن بیزیم آنامیزدان و آنا دیلیمیزدن گرامی توتولور؟.
اولکه نین داشی دا دیواری دا بیز اولا- اولا حتی یاشادیقلاری باش کندده آثار تاریخی دئدیکلری بوتون اثرلر بیزیم دده لریمیزه عایید اولا – اولا هیچ بیر خیابان و کوچه ده اونلارین آدی گئچمیر.تهرانین باش کند قوروجوسو قاجار خانی آغا محمد خان اولسادا من هر گون کریم خان کورپوسوندن کئچیرم. گلستان و سعدآباد و دیگر تاریخی یئرلر قاجارلار یادیگاری اولسادا آنجاق اونلارین هیچ یئرده بیر ایزی و توزو یاد ائدیلمیر.
سلجوقلولارین باش کند ائله دیکلری ری شهرینده بئله اونلارین آنیسینا هئچ بیر عابیده یوخدور. اولو طغرولون مقبره سی بئله قریبسنلمیش بیر دورومدادیر. بو تاریخی اثر باشقا تجاری و حاکم کولتور قورویوجو و اینکشاف ائدیرجی بینالارین کولگه سین ده گورونمز حال آلمیشدیر.
تاریخی خدمتلریمیز و بو گونکو رشادتلریمیز نیه گوز آردی ائدیلیر؟ گورسن بیزی نیه دیشلاماق ایسته ییرلر. بیز اونلاری سئوگی دولو حسللریمیزله باغریمیزا باسیریق. ادبیاتلارینی و مدنیتلرینی هم اویره نیریک هم تبلیغ ائدیریک. چوخ تاسف بیزیم مدنیمیزین تانینماسینادا اونلار هئچ ایش گورمور هئچ هر گون اونون یوخ اولماسینا امکان یارادیرلار.
دوغروسو من بئله قارداشلیقدان یورولدوم. دده پاییندان اوزومو محروم حیس ائدیرم. هر گون ازیلمک دن و آشاغالانماقدان اوتانج حیسی گئچیریرم. ائولادلاریمیز فولکلوروموزدان و دده بابا یادیگارلاریمیزدان یوخوسون ائدیلرک کولتور دونوشوم مکانیزمالاری ایله باشقاسینا دونوشدورولورلر. ائولاد آتا- آناسینین دیلیندن و کیملییندن هئچ بیر شئی بیلمیر. حتی تورک دیلی و کولتورو آشاغالاناراق فوبیا قایناغینا چئوریلمیشدیر.
کیملیک بحرانی ایلییمیزه قدر ایشله میشدیر. بوتون قاپیلار و مادی و مدنی قایناقلار آسیمیلاسونا خیدمت ائدرک اوزوموزه قاپانمیشدیر. تاریخیمیز و حتی آدیمیز – دیلیمیز ساختالاشدیریلمیش. اینسانلاریمیز دیلیمیزی چوخ برباد وضعییت ده دانیشیرلار. بو تونلین اوجوندا ایشیق گورونمور...