Bir yeni ilə başladıq ! dəyərliçoxsaylı xudafərin oxucuları uğurlar olsun.
Sorumlu müdür və başyazar: Dr.Hüseyin ŞƏRQİDƏRƏCƏK SOYTÜRK
مدیر مسئول و سردبیر :
دکتر حسین شرقی دره جک (سوی تورک)
آرخادا قویدوغوموز کهنه ایلی یاواش – یاواش خاطره لر یاداشیمیزا حک ائدیریک. البته اوزوموزوده وار- گل ائتمکدن چکینمیریک. نه لر دوزگون و نه لری یانلیش ائدیکلریمیزین حسابینی هم اوزوموزه و هم ده لازیم اولانلارا وئریریک. آنجاق ان چتین حساب ویجدان حسابی دیر. بودا هر کسین اوزونه قالیب. انشالله هامیمیز اوزو آغ و آلینی آچیق اولاریق.
اما گوزوموزون قاغیندا گونلر- هفته لر- آیلار و ایللر حتی ثانیه لر و ساعاتلار دییشیر .گورسن بیز نه قدر دییشیریک. یاش اولاراق بیر ایل قوجالدیق بو بیر فاکت دیر. لاکن باش اولاراق گورسن نئجه اولدوق؟. گون دونن و ایل گئچن ایل دیرسه ائله "کهنه حامام کهنه تاس "دیر. یوخ قیشی آتلادیب باهاری ایچیمیز ده یاشاتماغی باجاریریقسا اوندا نینسه گویرمه سینه اومود واردیر دئمک.
بللی کی هر شئی مادی قازانج دئییل . معنوی و مدنی ال ده ائتیکلریمیز چوخ اونملی دیر. حتی اساس قازانیملار اونلاردیر. یوخ تسبح تکی یئرین ده سایمیشیقسا اوندا باشقا سایانلار گئنه بیزی اوز فکیر کوله لری یاپاجاقلار و خمیر هله چوخ سو ایسته یجک.
بو ایل نه قدر میللیلشمک اوچون یعنی اوز اولماق اوچون نه قدر امکان آییرمیشیق. یازماق و اوخوماق اوچون نه قدر زامانیمیز وار. اوزگورلوک و دوغرو یاشام اوچون هانسی مجادله لری وئرمه یه قادیریک. گزمک و گورمک پلانی پراگراملاریمیزدا نئجه یئر آلماقدادیر. صله رحم و دوست گوروشلری بیزیم اوچون هانسی اونمی داشییر. اینسان اولاراق ایچیمیز ده خییر ایشلره نه قدر یئر آییرمیشیق. بوتون بونلار و بونا بنزر ایستک و عمللر گووده میزین ایچینده جان آتان روحوموزون و بینیمیز ده قاینایان عقلیمیزین و اراده میزده ظهور ائدن من کیمم سوالینا جواب اولاجاق. میللی کیملیک – اولوسلار آراسی سئوگی و کوره سل باریش یقین کی مثبت دوشونجه لردن توره ییجک.
اوغورلو- موتلو وسئوگی دولو بیر ایل دیله ییله سیزلره 365 آرزو ائدیرم. قالین ساغلیقلا...
ائلیمیزین و ادبیاتیمیزین دیرلی اوغلو صدیار وظیفه "ائل اوغلو"
ائلیمیزین و ادبیاتیمیزین دیرلی اوغلو صدیار وظیفه "ائل اوغلو" نون 65 ایللیک یوبلییی مناسیبتیله درگیمیزین 10لارجا صحفه سینی بو یورولماق و دورماق بیلمه ین شاعیر و ادیبیمیزه حسر ائتمیشیک.من اوز نوبه مده عزیز دوستوم و ایللر بویو بیرگه چالیشیب امک صرف ائتدیمیز خدافرین درگیسی امکداشیما اوزون عمر و جان ساغلیغی دیله ییرم.
ائل اوغلو تمناسیز ادبیات خادیمی دیر. نثر و نظمین باجاریقلی استادی دیر. اونون اوره ک اوخشایان شعیرلریله یاناشی درین مضمونلو رمانلاری دا اوخوجو دا مثبت تاثرات یارادیر. شاعیر کیمی اوزودور. یازار کیمی ده کیمسه یه بنزمه ین و اوز دستخطی اولان آراشدیرماجی ادبیاتچی دیر. 5 ایله یاخین خدافرین درگیسین ده چیین چیینه چالیشدیق. اورتایا قویدوغوموز ادبیات معجزه سی اولان خدافرین درگیسی البته همیشه دیرلی و قیمتلی استاد ائل اوغلویا شان وشهرتله یاناشی خالق و ائل سئوگیسی ده قازاندیرمیشدیر. ایلک آدیملاری برابر آتدیق.و ژورنایستیکانین چتین یوللارینی یورودوک. هیجان و قورخولارا غلبه چالدیق.
بوتون بونلارلا یاناشی تدقیقاتچی ائل اوغلو نظامی گنجوینین تورکجه اثرینی تاپیب اورتایا قویماقلا تاریخی شاهکارلیغا امضا آتدی.البته یاشادیغیمیز جغرافیا دا تورکجه یه اولان اوگئی مناسیبت اونون بو عظمتلی ایشینی چوخدا اونه چیخماسینا اجازه وئرمه دی لاکن اونون اهمیتلی ایشی بیر گون لاییق اولدوغو قیمت و توجه شایان اولاجاقدیر.
ص.وظیفه حاقیندا صحفه لرله مقاله یازا بیلرم. آنجاق بو بیر یوبلیی تانیتیمی اولدوغوندان بونا کیفایتله نیرم.گون او گون اولسون حاققیندا کنفرانسلار و آراشدیرمالار تشکیل ائدیلسین.
تانری سیزی قوروسون یولونوز اوغورلا دولو و گئدرلی اولسون عزیز همکاریم گوزل شاعیرم وتایسیز ادیبیمیز.
سایقلارلا :
دکتر حسین شرقی دره جک (سوی تورک)تهران 9/12/1402