Dil və ədəbiyyat ortaq kültür bağlarının təməlidir.
Sorumlu müdür və Baş yazar: Dr. Hüseyın Şərqidərəcək (Soytürk)
مدیر مسئول و سردبیر : دکتر حسین شرقی دره جک (سوی تورک)
دونیا خالقلاری یارادیلیش دان بری فرقلی جغرافی بولگه لرده یاشادیقلاریندان دولایی آیری– آیری دیل و اینانجلارا بولونموشلر. زامان سورجینده بو توپلوملار فرقلی دیرلره صاحیب اولموشلار. آنجاق اوز توپلوم و یاخین اقربا توپلوملاردا بو پروسس ده اورتایا چیخمیشدیر.
تاریخین ان قدیم انسان توپلولوقلاریندان بیری ده "تورک" توپلولوغودور. تاریخین و زامانین ان درینلییندن قوپوب گلن تورک کیملیی و وارلیغی اصلینده بیر اصالت و سویلولوغون حقیقی معناسی دیر.
زامان سوره جینده گلیشیب و اولوشوب ایندی کی حال و دورومو کسب ائتمیشدیر. تاریخی بیر داغ و دامغا کیمی اوره یینه باسان تورک وارلیغی سوره جین گئدیشاتیندا چوخ تلاطولو چاخانتیلاردان ساغ و سالیم قورتارماغی باجارمیشدیر.
تورک اینسانی ایناملی و عزمکاردیر. وارلیغا اینانان و ذکاسینی بو استقامت ده یوکلیین بیری دیر.وار اولوشون اسرار انگیز اولاناقلاریندان بیری ده کولتور و دیل دیر. دیل زامانین اولایلارینی کولتور بطنینده داشیان و اونو هر زامان دیری و زنده توتان دیر. بللی مقطع لره هر بیر ملت یادا اولوس اضمحلالا اوغرامیش اولور و ائله او میللتین اولومو ده اورادان باشلاییر.
حیاتین هر آنی چابا و مبارزه اولدوغوندان اولوسلاری بیرلشدیرن فردلر ده اولوسون هر گونکو وار اولما دینمیزمینده اشتراک ائدیر. هر بیر انسان فردی بیلرک یادا بیلمه ییرک بو پروسه دوردا قاتیلیم پایی واردیر.
بو اولوشومون آدی ایسه کولتوردور. کولتور هر بیر ملیتین زامانلا بیریکدیردیی مادی و معنوی وارلیق دیر. گئنه دیل بو قاطارین لوکوموتیوی دیر.
دیلین اساسیندا ایسه ادبیات یارانیر یعنی بیر کولتورون دونن دن بو گونه و یارینلارا داشینماسینین آراجی دیر. اونا گوره ادبیات سیز میلی اولوشوم یوخدور. میللی کیملیک و میللی وارلیغین خزینه سینین صاندیغی ایسه ادبیات دیر. دیل و ادبیات دان محروم قیلینان توپلوملار گله جک ده وارلیقلارینی داوام ائدیره بیلمزلر.
گئچمیشی گله جه یه داشیان و ایندی قوروب محکملندیرن یگانه فاکتور دیل ، ادبیات و کولتوردور. مضمون و ماهیت اعتباریله هر بیر اوز خالق و قاداش خاقلار بو زامان سوره سینده اورتاق حرکتین پارچالاری دیر.تورکلوک و تورکیزم ده بو ماهیتدن دوغان مضموندور. تاریخی و دونیوی حادثه دیر. واریمیش و وار اولاجاقدیر.