علی تقی زاده
جولمه قایغو
ایلک دفعه دونالد ترامپ آمریکانین پرزیدنتی سئچیلنده ، ایلک فرمانلاری نین بیری ، آمریکانی پاریس کنفراسیندان چیخارماق اولدی. هله او کنفرانسین جوهری قورومامیشدی. هم چوخ مکدر اولدوم همده حیرت ائله دیم کی دونیانین ابرقدرت اوُلکه سی ترامپ کیمی ساوادسیزا تاپشیریلیب. سانکی اونون ئولکه سی بو یئر کوره سیندن کناردادی و اقلیم دییشمه لریندن ضرر چکمز. بو شعری اوندا یازدیم .
آنام دانلاییردی بیرگون آتامی،
دئیردی: آی کیشی قوصهنی اونود
بئزدیریر سن چکن دردلر آدامی،
گل اؤز کؤچونو سور اؤزگهنی اونود!
سانجیسی جانینا دولوبدی یئنه،
دئییرسن آغیردی قارشیداکی قیش
قونشو کندی دولو ووروب سنه نه؟!
سنین حؤکمون ایله یاغمیرکی یاغیش!
جولمه قایغوسان می نه سن آخی سن؟
نبینین اؤکوزو اؤلوب کی اؤلوب
باباش خستهلنیب بیر آی دئیهسن،
باغچادا چیچهیی سولوب کی سولوب
سوروشدوم آنامدان، آنامسا دئدی:
یازیق آتان کیمیداییم نیگران-
جولمه قایغو آدلی خایین بیریدی!
جومله یارانمیشین قئیدینه قالان!!
جانین آلولارا، اودلارا آتار،
حیاتی دیدیکجه سرتدی, چتیندی
ترسه یئل اسنده ماتمه باتار،
دئیه ر: نئچه آغاج سیناجاق ایندی!
ائلهجه هم سفئه،همیخئیرخواه،
قریبه بیر اینسان ملگیم اولوب
قایغوکشلیغینا چوخ چکمیشم آه،
آغیر عذابینا گؤزلریم دولوب
اؤز عؤمرونین شیرین آنی بیلینمز،
سیزلار اؤزگهلر غمینه نی کیمی
اورهک قانی گؤزلریندن سیلینمز،
کرکسه دیدیلن پرومتئی کیمی!
***
عؤموردن اوزولوب، سوزولوب ایللر،
آتام دا آنام دا تورپاغا گئدیب
ساچیمیآغاردیب اؤتن فصیللر،
یاشیم اللی بئشه، آلتمیشا یئتیب
خبرسیز الیمدن اوچان ایللرین
کیتابین آچیرام اؤنومه هرگون!
سون ایللر گؤرورم باخاندا درین،
ندنسه کدرسیز اؤتمهییر بیرگون!
ایندی آتام کیمیمن ده دئیهسن-
جولمه قایغو سایاق عومور سورورم!
آنجاق قایغوموزون کیفیتین من-
یامانجا فرقلی, باشقا گؤرورم!
آتامین چاغیندا اونو سارسیدان-
قونشونون قوهومون درد -المیدی!
منیم باغریمی سا اودی قارسیدان
یگانه حیاتلی یئرین غمیدی!
یازیق عالیملرینهارای سسینی-
عاوام آنلامادی، باشچی سایمادی!
آنا طبیعتین یالوارماسینی –
فلکلر ائشیتدی، انسان دویمادی!
اوزون لایهسینی زدهلهمیشیک،
داها قورویانمیر حیاتیمیزی.
اؤلومجول شعایا بویور دئمیشیک،
اودا سرطانلا سوپورور بیزی.
داها بولودلاردان یاغیش یئرینه
هردن مئشهلره اسید چیلهنیر.
اود وورور سپیلجک بیتگیلرینه،
داغلارا، داشلارا اؤلوم الهنیر.
ایل به ایل چوخالیر یئرین ایستیسی،
اریییر هر ایکی قوطبون بوزداغی.
شهرلرین آرتیر اییی, توستوسی،
ماسکادان دا گئچیر توزو، تورپاغی.
اوکیانلار آرامسیز بوشالمادادی،
یئم اولور جانلیسی بو آج انسانا.
حیاتیمیزیندا قالماییب دادی،
داها یئر کورهمیز گلیبدی جانا.
ایکی له ایکینی دؤرت بیلمیر چوخی!
دئییر دندان وئرن نانین وئرهجک!!
نییه دوشونمهدیگ گؤرهسن آخی،
سوفره میز نه سایدا آجی گؤرهجک ؟
حسابسیز، کتابسیز ساییمیز آرتیر،
چاتیشماییر داها نه سو، نه چؤرک.
او کی بؤیرهیینی چؤرهیه ساتیر
زاواللی حیاتی نهیینه گرک؟
دئدیک بس نه قدر قیریب اودلاسان
طبیعت نه کوسر، نهده اینجییه ر!
قولام خدمتینده سنین ای انسان
بوتون یارانمیشا آغاسان- دئیه ر!!
بالیقلار ایل به ایل دوغوب تؤرهسه
سولاردان پاییمیز اوزولمییهجک!
تورپاغا گوبرهنی بوللو ائلهسک
تاخیل زوماریمیز کسیلمییهجک!
قیریلان بوداقلار وظیفه کیمی-
یئنیدن جوجهریب بوی آتمالیدی!!
سایسیز یاراسینین اولوب حکیمی،
بیز وووران یارانی ساغالتمالیدی!!
بو سهو آنلامیلا سؤکوب تالادی-
آنا طبیعتین باغرینی انسان!
ایلیشدیگی اؤزو قازان چالادی
وئریر حیاتینی جهلینه قوربان!
یاخشی تانیمادیق نعمتلرینی،
قدرینی بیلمهدیک او گؤزللیگین!
اؤلچوب بیچنمهدیک دایاز، درینی
قیمتین دویمادیق علمین, بیلیگین!
بیز اؤز الیمیزله کئچمیشیک تورا،
یامان یوردوموزو قویدوق وئرانا!
کیم بیلیر نئچه مین ایللردن سورا-
بیرده بو یئرلرده حیات یارانا!
علمه، آنلاییشا باغلیدی هر شئی،
آرتیق بللیدی کی نه یین نه سیدی.
منجه جولمه قایغو، یادا پرومتئی
انسانین ادراکی دوشونجهسیدی .
1396 یای کرج