علیرضا ذیحق
اولکه ده حكايه ژانري‌نين و مدرن اوسلوب لارلا ياراديلماسي، ميرزا فتحعلي آخوندزاده (1257-1191 هـ.ش) نين آذربايجان توركجه‌سيندن فارسجايا ترجمه اولان حكايه‌لري ايله درين بير باغلي ليقي واردير. اونون «آلدانميش كواكب» و «يوسف‌شان حكايتي» آدلي قيساجا رومان لاري 1253- نجي گونش ايلينده ميرزا جعفر قراجه‌داغي طرفيندن ترجمه اولونور و ايران ادبي ياراديلجيقيني اؤز تأثيري آلتينا آلير. او اثر محتوا و فورم باخيميندان، ايران ادبيات تاريخي‌نين نثر ساحه‌سيني يئني بير باشلانيش‌لا اوز به اوز ائدير و الهام قايناقي اولاراق حاج زين‌العابدين مراغه‌اي (1290- 1218 هـ .ش) و عبدالرحيم طالبوف (1289- 1213 هـ .ش) كيمي قاباقجيل يازارلار يئتيشديرير. حاج زين‌العابدين مراغه‌اي «سياحتنامة ابراهيم بيگ» آدلي كيتابيني 1274-نجي ايلده چاپ ائده‌رك آرديندان عبدالرحيم طالبوف «مسالك المحسنين» و «كتاب احمد يا سفينة طالبي» كيتابلاري ايله ايران حكايه يازما تاريخي نين يئني تمل‌لريني قورورلار. تكنيك باخيميندان يئني ليك داش‌يان بو حكايه اثرلري مشروطه چي‌ليك ايده‌آل لارينا صادق قالاراق بير سيرا تاريخي رومان‌لارين ياراديلماسينا ميدان آچيركي اؤز انكشافيندا اجتماعي رومان‌لارين يازيلماسينا سبب اولور.
اجتماعي رومان‌لار كي 1300- نجي ايلدن باشلاناراق يازيچي‌لار طرفيندن يازيلماغا باشلانير مشروطه ايل‌لريندن سونراكي اومود سولوق، عدالت سيز ليك و امنيت سيز ليگي گؤستر‌ه‌رك ايرانين سياسي و اداري قورولوشون‌دا اولان فسادي گؤز اؤنونه سرير. آنجاق چوخ مدت‌لره‌جان رومان‌لارين اوخوجويا تانينان پرسوناژلاري عموميت‌له يا فاحشه‌لرديلر يا دا دؤولت مأمورلاري.
1300- نجي ايلده چاغداش ايران ادبياتي يئني بير ادبي حادثه‌ايله قارشيلانير اودا محمدعلي جمالزاده‌نين «يكي بود و يكي نبود / بير وارميش بيري يوخموش» آدلي قيسا حكايه‌لر توپلوسونون نشري‌دير. جمالزاده‌نين بو حكايه‌لري كي 1293- نجي ايلدن باشلاناراق 1300- نجي ايله‌جان يازيلميشدير ايران رئاليزم ادبياتي‌نين ايلك تملي‌كيمي ده‌يرله‌نير.
جمالزاده ساده و شيرين بير نثرايله توپلوم داكي چئشيدلي تيپ‌لري جانلانديرماق‌لا فاناتيزمه و كؤهنه اوصول‌لارا قارشي چيخير. اجتماع‌دا اولان چاتيشمازليق وخسته‌ليك‌لري ساتيريك دولو بير غم‌له وصف ائتمه‌‌يه چاليشير.
جمالزاده‌دن سونرا حكايه ژانري‌نين اَن آدليم و دونيا شهرتلي بؤيوك يازاري صادق هدايت (1330-1281 هـ.ش) 1309- نجي ايلده ايلك اثري «زنده بگور/ ديري‌كن گؤردا» لا ائله بير ايشه امضا آتيركي مترقي چاغداش حكايه تاريخي‌نين أن مدرن اؤرنك‌لريني ياراتماقلا گلهجك ادبي نسيل‌لره بير ائتگي‌لي ميراث باغيشلايير.
صادق هدايت «حاجي مراد» و «داش آكل» كيمي حكايه‌لرله استبداد و خرافات چنبرينده ياشايان جامعه‌نين چيركين اوزونو افشا ائتمك‌له گرچك‌لري اولدوغوكيمي قلمه آلير. او حكايه‌لرينده أزيلميش كوتله‌لرين نه تهر اجتماع‌دا قوربان اولماق‌لارين دان سؤزا آچاركن حاكميت قووه‌لري‌نين بير پارا ادعالاريني كي جمعيتي خوشبخت بيليب اجتماعي سياسي قورولوشدا هئچ بير عيب اولماماغي تبليغ ائدير، يالانلايير و بئله ليك‌له متعهد بير ادبياتين دوغولوشوكي ائده‌بيلر دوزگون و درين هنري جؤهري اولاركن، بشري ايده آل‌لاررا دا صادق اولا انكشافا دوغرو يول گئدير.
1300 دن 1320- نجي ايللره جان كي ايران‌دا پهلوي ديكتاتورلوقي قارا حؤكمونوسورور، مترقي حكايه‌ژانري كوچه‌يه و خالقاساري بير پنجره آچيركي اوندا پوچ‌لوق دويغولاري دالغالاناركن حكايه ژانري كوچه‌يه و خالقاساري بير پنجره آچيركي اوندا پوچ‌لوق دويغولاري دالغالاناركن حكايه اثرلري اينسانلارين ياشاييشيندان ائتگي‌‌له‌نير و حوزون‌لو و آجي بير داد آلير. اوقدر آجي‌كي حتي بعضي يازيچي لاردا اؤز روحي وارليق‌‌لاريني پوچ‌لوق جانياغيندا اسير گؤرورلر و انتحار، سون يول كيمي حياتلاريني نوقطه‌له‌يير.
استبداد و سنت قورباني اولان بير جامعه‌ده، ضيالي‌لر اؤزلريني قارقيش لانميش بيليب ايچري دونيالارينا جومورلار و توپلوم‌داكي چوروك لوك‌لر له بيرليكده اؤزلريني لعنت‌لن ميش و چوروموش بيليرلر. اوراجان كي صادق هدايت «داش آكل» حكايه‌سينده، ايران ياشاميندان اومود سوزلوق لارلا دولو جانلي بير تصوير وئرير. عشق مقوله‌سيندن صؤحبت ائله‌ركن، حكايه‌نين قهرماني عشقينه نه‌قدر ياخين‌لاشديقجا بدبخت چي‌ليك لر ده اونو اوقدر آرتيق باسير و اؤلوموسون سئچيم كيمي قارشيندا گؤرور.
صادق هدايت‌ين آرديندان بزرگ علوي (1375-1282 هـ.ش) «چمدان» آدلي حكايه‌لر توپلوسو ايله 1313- نجي ايلده حكايه‌سماسي‌ني ايشيقلانديرير و سونرالار «چشمهايش/ اونون گؤزلري» (1331) روماني‌نان بؤيوك بيرشاه اثرين ياراديجي‌سي اولور. بو‌ايللرين (1320-1300 هـ.ش) اَن تأثيرلي اثري صادق هدايت‌ين «بوف كور- كوربايقوش» (1315) روماني ديركي دونيا سويه سينده ياشار بير اثركيمي كلاسيك له‌‌شيب دي.
1300- نجي ايلين شهريورينده كي رضاشاهين ديكتاتورلوقي سونايئيتر ايران ائده‌بيلير آزجا دا اولسا راحات‌ليق لا بير نفس چكسين. 1320 دن 1332- نجي ايللره جان ايران‌دا گئده‌ن كوتله‌وي اعتراض‌لار ، سياسي حزب‌لرين قورولماسي، ضيالي‌لرين چئشيدلي دسته‌لرده توپلانماسي، نظامي حكومت‌لرين و وجودا گلمه‌سي و چاغداش نسلي اعدام‌لار او زيندان‌لارا سوروين وضعيت‌لر، اوايللره ده‌ييشيك بيرسيما باغشيلايير. معاصر تاريخين بو بؤلومونده جلال‌آل احمد، به آذين، صادق چوبك و ابراهيم گلستان كيمي حكايه‌يازارلاري يئتيشيلير كي قاباقجيل ادبياتين گؤركمي نماينده‌لري اولوب اجتماع‌دا و كولتورده كئچن گرگين ليك‌لر اونلارين اثرينه يول تاپير. آنجاق خاطيرلاتماق كي بو دؤورون لاپ پارلاق حكايه يازاريندان سؤز آچاندا بزرگ علوي دن آد آپاريليركي ياراديجيليقي 1320- نجي‌ايلدن قاباق باشلانميشدير.
بو ايللرده صادق چوبك (1295 دوغومي) ايلك حكايه‌لري‌ايله چيخيش ائديب باشارا بيلير‌كي اؤز عصرينين اؤزه‌ل ليك‌لريني اثرلرينده انعكاس ائتديرسين. صادق چوبك، حكايه‌لرينده ائله بير قورخونج فضا ياراديركي ياراتديقي دونيادا، عشقه و محبته هئچ يئر اولمايير. كيمسه كيمسه‌يه اينانمايير و تكجه قورخو، چيركين ليك، پيس‌ليك، كثافت و اؤلوم دوركي هميشه واقعيتي واردير. اونون «خيمه شب بازي» كيتابي 1324- نجي ايلده چاپ اولورسادا گلهجك ايللرده ايسه ياراديجيليقي دوام تاپير و 1345- نجي ايلده چاپ اولان «سنگ صبور/ صبيرداشي» روماني كي ماجرالري 1313-نجي ايلين حدودلاريندا كئچير اونون لاپ مشهور اثري اولور. بو رومان او عصرين بولانديريق و قورخودوجو ياشام طرزي‌نين آيناسي اولوب و رضا شاه زماني‌نين باشي داشا ده‌يميش و اومود سوزلوقا قاپانميش آيدين اينسانلاري‌نين گرچك حياتيندان سؤز آچير.
بو ايللرده اجتماعي رومان‌دا عصرين تأثيرلي حكايه‌طرزي اولور و محمد مسعود كي «مرد امروز» آدلي گونده‌ليك درگي‌نين باش مديري ايدي 1322- نجي ايلده أن چوخ اوخونموش اثري «گل‌هايي كه در جهنم مي‌رويند/ جهنم ده چيخان گول‌لر» ايله ائله‌يه بيلير رضاشاه سلطنتي‌نين سون ايل‌لريندن سؤز آچماقلا بوتون گيزلي و آجي گرچك‌لري كي رشوت، آج‌‌ليق، فحشا و ظولم‌‌ايله دولو ايدي بيان ائده. محمد مسعود حقيقتي افشا ائتمك‌له، جانيني ألدن وئريب ترورا قوربان گئدير. بو دؤورون اجتماعي رومانين دان سؤز آچديقدا بير باشقا سيما، عمار عصار يا ع. راصع (1336-1276 هـ .ش) ديركي 1325- نجي ايلده «با شرفها / شرفلي‌لر» آدلي كتيابي‌له چوخلي شهرت قازانير.
آنجاق قيد ائتمك‌كي هر عصرده اولدوغو كيمي، او عصرده ايسه ايكينجي درجه‌لي ادبيات دا كي اوندا هئچ بير يئني‌ليك يوخدور و هونري جؤهردن اوزاق دير، اؤز ياشامينا دوام وئرير و عشق‌ايله جنايت دن سؤز آچماقلا يالانچي هيجانلار ياراديب كتاب شكلينده و يادا مختلف ژورنال لاردا آرديجيل اولاراق چاپ اولورلاركي سو اوزونده‌كي كؤپوك‌لر كيمي زامانلا اونودولورلار.
بو ايللرده زيندان ادبياتي‌دا ايلك دفعه اولاراق اؤزونه بير ژانركيمي تاني‌نير و بوساحه‌ده محمد جعفر پيشه‌وري‌نين «يادداشت‌هاي زندان» آدلي اثري بير باشلانيش كيمي قيمت‌لن مه‌لي‌دير. پيشه‌وري‌نين بو اثري «آژير» درگي‌سينده (1323-1320) مقاله شكلينده چيخسادا خاطيره لرله دولو اولدوغو ايچون، سونرا ايران دا يازيلان زيندان حكايه‌لري‌نين اؤرنه‌يي اولور. پيشه‌وري نين آرديندان بزرگ علوي ده «پنجاه و سه نفر» (1321) كيتابي ايله چيخيش ائدير. حكايه طرزينه گلديك ده ايلك زيندان حكايه‌سيني بزرگ علوي يازير و سونرالار آل احمد «از رنجي كه مي‌بريم/ چكديگيميز اذيت‌لردن» (1326) كيتابيندا و ابراهيم گلستان «آذر، ماه آخر پاييز/ آذر، پاييزين سون آيي» كيتابيندا زيندان حاققيندا حكايه‌لر يازيرلار.
جلال آل احمد (1348- 1302 هـ . ش) ايلك حكايه‌سيني 1324-نجي ايل ده «زيارت» آدي‌ايله «سخن» درگي سينده چاپ ائتمك له ايران حكايه تاريخينده يئني بير يازار دوغولوركي گلهجك نسيل‌لرده بويا باشا چاتان يازيچي‌لارا درين تأثير قويور.
جلال آل احمد ديندار بير عائله‌دن چيخديقي ايچون اوشاقليق‌دا، ديني اعتقادلاردان سون درجه ائتگي لن مه‌سيني و ياشاديقي او حيات يولونو حكايه‌لرينده عكس ائتدير مه‌يي، بير پارا يئني‌ليك لرله دولوايدي كي اوندان اول، كيمسه او مقوله‌لره گيرمه ميشدي.
به آذين «محمود اعتمادزاده» ده بو عصرين (1332-1320) ياراديجي يازارلاريندان ديركي أن چوخ به يه‌نيلن اثري «دختر رعيت/ رعيت قيزي» بو دؤورده كند ياشامينا حصر اولونموش كتاب‌دير.
بونو دئمك‌كي ايران دا كند حياتيني ترسيم ائده‌ن ايلك حكايه اثري «ملانصرالدين» ژورنالي‌نين باش مديري «جليل محمد قليزاده» نين «تسبيح خان / خانين تسبئحي» حكايه‌سي‌ديركي 1309- نجي ايلده چاپ اولاركن ايران يازارلاريني اؤز ائتگي‌سي آلتينا آلير. جليل محمد قليزاده بو حكايه‌ده آذربايجان كندي‌لري‌نين خان ظولموندن جانا دويدوقلاريندان و خرافات‌لي بير حيات سورمه‌لريندن سؤز آچير. ائله بير مضمون‌كي ايللر بويو يازارلار طرفيندن استقبال اولونور و اؤز انكشافيندا باعث اولوركي آذربايجانين بير باشقا ائولادي غلامحسين ساعدي 1343-نجي ايلده «عزاداران بيل/ بيل عزالي‌لاري» آدلي كيتابيني چاپا وئرمك‌له دونيانين أن بويوك حكايه اثرلري‌نين بيرينه امضا آتسين. بير اثركي اونون گؤزل ليك لري و ادبي- بديعي سئحيرلي چئشيدليگي، آذربايجان دا كئچن كند حياتينا اختصاص تاپسادا، دونيانين أن آدليم حكايه اثري كيمي تنقيدچي‌لر طرفيندن قيمت‌له نيب‌دير.
(1340 – 1332) ايل‌لري يئني بير دؤنم كيمي ايران حكايه يازما تاريخيني آيري بير بؤلومه آييرير. 1332- نجي ايلده 28 مردادين كودتاسيندان سونرا محمدرضا پهلوي حوكومته قاييدير و ايكينجي درجه‌لي ادبيات‌دا مطرح اولان موضوع‌لار‌دا پوچ‌لوق، هوس و اويوشدوروجو جوانلارين قبله‌گاهي اولور و گنج‌لر بو اثرلرده عصيانا فيكيرلش‌مه دن تكجه لذت چكمه‌يه و اؤزلريني اونوتماقا جهد گؤستريرلر.
بو دؤوره‌ده بهرام صادقي (1363- 1315 هـ . ش) قيسا حكايه‌لري‌ايله عصرين آجيماسيز ليقيندان سؤز آچاركن باشاييشين آغري وئره‌ن جهت‌لريني ساتيريك بير باخيشلا عكس ائتديرير. بهرام صادقي أن بديعي اثرلريني (41-1332) نجي ايللر فاصله سينده ياراديركي سونرالار حكايه‌لر نوپلوسو «سنگر و قمقمه‌هاي خالي/ سنگر و بوش قومقومالار» 1349- نجي ايلده درگي لردن گؤتورله نركن كيتاب شكلينده چاپ اولور.
بو دؤورده جلال آل احمد ايسه چوخ آلقيش لانان اثري «مدير مدرسه / مكتب موديري» (1337) كيتابيني چاپا وئرير و جمال ميرصادقي (1312 دوغومي) يازديقي حكايه‌لري‌له اؤزونه آد قازانير.
1340- نجي ايلدن 1357- نجي ايله قدر ايران حكايه يازما تاريخينده ائله ده‌يرلي و بديع اثرلر يارانير كي دونيا مقياسيندا شهرت ألده ائتمك‌له چوخلي يازارلارين اثري مختلف ديل‌لره ترجمه اولونور. غلامحسين ساعدي (گوهر مراد)، صمد بهرنگي، محمود دولت‌آبادي، سيمين دانشور، هوشنگ گلشيري و احمد محمود اوعصرين اَن ياخشي و گوجلو يازارلاريندان اولاراق، معاصر ايران ادبياتي ني دونيايا تانيتديرماقدا بؤيوك رول‌لاري اولور.
غلامحسين ساعدي (64-1314 هـ .ش) او عصرين بيرينجي بؤيوك يازاري‌ديركي اونون حاققيندا جلال آل احمد بئله ديئير: «اگر قلم عالمينده خيرقه باغيشلاماق رسم اولسايدي و اگر منيم بئله بير ايشه لياقتيم و حاققيم اولسايدي، اؤز خير‌قه‌‌مي دكتر غلامحسين ساعدي‌نين چيي نينه سالارديم.»
غلامحسين ساعدي‌نين حكايه دونياسي كدرلي بير دونيا ديركي او دونيانين اؤنونو حاقسيزليق، يوخسول‌لوق، خرافات، دلي‌ليك، قورخو، دهشت و اؤلوم قارا بير پرده كيم توتوب‌دور. تورپاق لاريندان أل اوزموش اكينچي‌لر، ديدرگين كندلي‌لر، شبهه‌لي و اينام‌سيز آيدين‌لار، ديلنچي‌لر، سرسري‌لر و اجتماع دا هئچ حاققي اولمايان آواره‌لر، اونون حكايه‌له‌رينده اينانديريجي شكيلده جانلانماقلا، پيرتلاشيق و قورخاق بير توپلومو گؤز اونونه گيتريرلر.
جامعه‌ده كي يئر آلتي دونيالاري‌نين خشونت و آجيماسيزلي‌غيني عكس ائتديره‌ن بر اثرلر طبقاتي تضاد دان دانيشاركن اؤز عصرينين فلاكت‌لي معاصر ياشاييشيني عجيب ليك وحيران ليق‌لا بويانان قورخونج بير باخيشلا تصويره چكير. اونون اثرلري اينسانين اينساليقي‌نا قارشي اولان اجتماعي قورولوشا و حاكميته قارشي يوكسك اعتراض سسي اولاراق حكايه‌ده‌كي شخصيت‌لري، روحي خسته‌ليك لرله چير پيشان ديده‌رگين اينسانلارديلار. اونلارين اطرافيندا كئچن هر بير واقعيت، اونلاري دوشوندوره‌ركن پيس‌ليك لره هئچ واخت، عادت ائله ميرلر.
غلامحسين ساعدي‌نين «واهمه‌هاي بي‌نشان / آدسيز سان‌سيز قورخولار» ، «گور و گهواره/ گؤر و بئشيك» و «ترس و لرز/ تيتره‌ييش و قورخو» كيمي كيتابلاري سئحيرلي وقورخولو بير فضا ياراتماقلا ياشار اثرلر ديلر كي اونلارين تأثير گوجو چاغداش ايران ادبياتي‌نين انكشافيندا اونودولمازدير.
بوعصرده غلامحسين ساعدي‌دن سونرا ايكينجي بؤيوك آد باشقابير آذربايجانلي يازار صمد بهرنگي (1347- 1318) يه عاييد ديركي اونون «ماهي سياه كوچولو/ بالاجا قارا باليق» آدلي حكايه‌سي دونيا كلاسيك‌لرينه قاريشان بير اثردير. صمد بهرنگي ايران اوشاق ادبياتي‌نين باني‌سي اولاراق حكايه‌لري بوتون گنج‌لر و ياشلي‌لار طرفيندن ده آلقيشلانير و اثرلري ايرانين أن چوخ ساتيلان كيتابلاري سيراسيندا پارلاق بير يئر آلير.
صمد بهرنگي‌نين يازي طرزيندن استقبال ائده‌ن چوخلي يازارلار اولورلاركي بو آرادا علي اشرف درويشيان (1320 دوغومي)، بهروز تبريزي (دهقاني) و منصور ياقوتي (1327 دوغومي) ني آد آپارماقلا دئمك‌كي بهرنگي‌نين ايشيلتي‌لي ياراديجيلغي أل چاتماز بير زيروه‌ديركي فتح اولونمازليق سويه‌سيني عصيرلر بويو قوروياجاق‌دير.
1348- نجي ايلده سيمين دانشور، «سووشون» آدلي روماني‌‌ايله يئني بير فصيل آچاراق، شاعيرانه، محكم و دقت‌لي بير نثرايله، ايكينجي دونيا محاربه‌سي ايللرينده ايرانين فارس منطقه‌سينده كئچن كئشمه كئش‌لري تصويره چكير. سيمين دانشور او زمانه‌دن دانيشسادا معاصر سياسي- اجتماعي مناسبت‌لره ده بديعي اشاره‌لري اولور. بو اونون ايلك اثري دئييل‌‌دي بلكه أن ده‌يرلي و گؤركملي سي‌ايدي. سيمين دانشور، جلال آل احمدين حيات يولداشي اولاراق اونون مبارز روحونو و عصيان چي‌ليق دويغولاريني گيزلي اولسادا رومان‌داكي قهرمانين سيماسيندا جالانديرماغا چاليشير.
محمود دولت‌آبادي (1319 دوغومي) ايسه «لايه‌هاي بياباني» (1347) و آو سنة بابا سبحان / بابا سبحان حكايه‌سي» (1349) كيتابلاري لا بو دؤورون حكايه سماسينا آياق قويور و گله‌جه‌يين ساييلان يازارلاريندان اولور. اونون «كليدر» و «جاي خالي سلوچ / سولوچون بوش ئيري» رومانلاري ايران حكايه‌سي نين پارلاق اثرلريندن ديلر.
بو عصرين داها بؤيوك ايسمي هوشنگ گلشيري ديركي «شازده احتجاب» روماني‌له شهرت تاپير و تكنيك جهتيندن چاغداش ادبيات دايئني ليك‌لره سبب اولور.
1353- نجي ايلده ايران ادبيات سماسيندا يئني بير اولدوز دوغور اودا احمد محمودون «همسايه‌ها / قونشولار» روماني‌‌دير. بو رومان ادبي بديعي گؤزل ليك‌لره ماليك اولان بير اثرايدي كي شبهه سيز اؤلمز بير ميراث كيمي عصيرلره داشيناجاق‌دير. «همسايه‌ها» چاغداش اجتماعي سياسي درووما توخوناركن هونر جوهري اوندا دالغالانيردي و هئچ بير شوعار وئرمه‌دن صمد بهرنگي نين اثرلري كيمي اعتراض بايراقي داشي‌يان و كوتله‌لري عصيانا چاغيران بديعي بير شاه اثرايدي.
چوخلي حكايه اثرلري‌كيمي سانسورا معروض قالان بو اثرايسه، بير دفعه چاپ اولسادا آز بير مدت‌ده ياساقلانير. بو دؤورون اوخومالي رومان‌لاريندان بيري ده «دايي جان ناپلئون» ايدي‌كي ايرج پزشكزاد (1306 دوغومي) اونو 1351- نجي ايل ده چاپ ائدير.
قاباقجيل ادبياتا و وورغون لوق گؤستره‌ن سينما و تلويزيادا بير پارا حكايه اثرلريني فيلمه آليركي اونلاري قيد ائتمك گركلي‌دير. غلامحسين ساعدي‌نين يازي‌لاريندان «گاو / اينك» و «دايره مينا» آدلي سينما فيلم‌لري دوزه‌ليركي ايكي سي نين ده يؤنه تمه‌ني داريوش مهرجويي اولور. صادق چوبك‌ين «تنگسير» روماني كي امير نادري يؤنه‌لدير و «خاك/ تورپاق» فيلمي كي محمود دولت‌آبادي‌نين «اوسنه بابا سبحان» اثري اساسيندا مسعمود كيميايي طرفيندن يؤنه لديريلير. ها بئله «شازده احتجاب» كي بهمن فرمان آرا فيلمه چئويرير و «دايي جان ناپلئون» كي ناصر تقوايي طرفيندن آرديجيل ديزي كيمي تلويزيا ايچون دوزه‌لير.
زمانه‌نين باشقا آدليم حكايه يازارلاريندان ائلي يه بيل ليك ناصر تقوايي، نادر ابراهيمي، اسماعيل فصيح، مهشيد اميرشاهي (1319 دوغومي) ميهن بهرامي (1324 دوغومي)، محمود گلابدره‌اي و شهر نوش پارسي پوري آد آپاراق.
1357 نجي ايلده هله ايران اسلام انقلابي ظفرچالمادان بيرنئچه آيين ايچينده 130 ميليون نسخه كيتاب ايران‌دا چاپ اولوب ييلماقلا بوتون مترقي يازارلارين اثرلري كي سانسور نتيجه‌سينده چاپ ايذين لري يوخ ايدي و يا تكجه بير كره گون اوزو گؤروب ياساقلانميشديلار، يئني‌دن ياييلماغا باشلايير و كيتاب اوخوماغا خلق ايچره او قدر هوس و علاقه يارانير كي ايران تاريخينده هئچ واخت سابقه‌سي يوخ‌ايدي.
انقلاب‌دان سونرا اَن چوخ تأثيرلي حكايه يازارلاريندان رضا براهني ( 1314 دوغومي) ديركي «بعد از عروسي چه گذشت/ توي دان سونرا نه كئچدي» (1361)، «چاه به چاه / قويودان قويويا» (1362) و «آواز كشتگان / اؤلولرين ماهني‌سي» و «رازهاي سرزمين من/ يوردومون سيرلاري» كيتابلاري‌له اؤزيئريني ايران حكايه يازما تاريخينده ابدي‌لش ديرير. براهني‌نين آذربايجانلي اولدوغو ايچون، يازديقي رومان‌لاردا آذربايجانين اجتماعي ياشامينا و آذربايجان لي‌لارين ملي دويغولاريندان و استبدادا قارشي آپارديقي مبارزه‌لردن سوز آچيلير. انون «آزاده خانم و نويسنده‌اش/ آزاده خانيم و يازاري» (1367) روماني فورم جهتيندن يئني‌ليك لرله دولو بديعي بير اثردير.
عزاله عليزاده (1375-1327)، منيرو رواني‌پور (1333 دوغومي)، عباس معروفي (1336 دوغومي) و محسن مخلمباف انقلاب‌دان سونراكي أن تانينميش و قاباقجيل حكايه يازارلاريديلار كي محتوا و فورم باخيميندان گؤركملي ياراديجيلق‌لاري اولوبدور. مسعود كيميايي‌نين «جسدهاي شيشه‌اي/ شوشه جسدلر» آدلي 812 صحيفه‌ليلك رومان اثري أن سون حادثه اولاراق ايران حكايه ادبياتيني 1380-نجي ايلده نوقطه‌له‌يير.
بوردا غلامحسين ساعدي‌نين بير سؤزونو خاطيرلاتماق ايسته‌ييرم كي ديئير: «دوزدوركي هنرساحه سينده اكثريت، ظاهيرده صنعتكارا بنزه‌ر آداملار ايله‌دي آمما گرچك گوج او قاليجي هنرده ديركي خلقين دوزگون هنرمندلري ألي‌له
يارانير و بوتون نسيل‌لره ميراث قالير.»
1383- خوي
قايناقلار:
1- ميرعابديني، حسن: صد سال داستان‌نويسي ايران، 3 جلد، نشر چشمه، 1377
2- آرين‌پور، يحيي : از صبا تا نيما، دوجلد، كتاب هاي جيبي، 1350
3- آل احمد، جلال: هفت مقاله، رواق، 1357
4- مؤذن، ناصر، ده شب: انتشارات اميركبير، 1357.
***