زامانلا آياقلاشماق استقامتينده اولان بوگونكو شعريميز معاصر عومرونون انكشاف دؤورونو ياشاماقدادير. ائلجه‌ده شعريميزين قديم دؤورلريندن باشلايب بوگونكو عومرونه ده‌ك بيراؤته‌ري باخيشدا اونون ايره‌ليله‌ييشده و قاباريقليقدا ياشاديغيني باشادوشه بيليريك. معاصرليك شعر فورمالاريميزين آغير آدديملارلا آدديملاديغي آغيرعصيرلرين جان‌كؤينگي كيمي گؤرونه‌نن كلاسيك قابيقلاريندان چيخيب، اؤلچو، موضوع، و محتوالارين چاغداش روحوموزا اويغون و گره‌كلي اولدوغونو اويغونلاشديرماقدير دئيه بيليريك‌سه، بوگونكو شعريميز معاصرلشمكده‌دير. بونو شاعرلريميزين مضمونجا تكرارچليقدان ياخاقورتاريب معاصر ژانرلاردا يازديقلاري شعرلردن باشادوشوروك. آذربايجان شعرنين اينديكي خصوصتيلري‌نين قاباريق سيماسي اونون ايگيرمينجي عصرين اوخوجولارينا وئره‌بيلديگي يئني ياشايش تفكرلريندن قيدالانان مضمونلار و آزاد احوال روحيه‌نين بوتون بُعدلرده طلب ائتديگي كيمي ريتميك و آزاد قاليبلر و فورمالاردير. دونيا شاعرلري چاپ و مطبوعات واسطه‌سيله اؤز اؤلكه‌لريندن آشيب اوزاق اولكه‌لرده اوخوندوقلاري بيردؤورده، ياريم عصردن آرتيق ياساقليقدا هوپ توتموش آذربايجان شعري، مبارك 22 بهمن انقلابي‌نين اورتايا چيخارديغي آزادليقلار نتيجه‌سينده بيرداهايئني ليك ماهييتينه مالك اولدوغو شرطريلريله ايله انكشاف دؤورنو باشلايا بيلدي. اوزون ايللر بوير شعرلريني مطبوعاتيميزدا و شعركيتابلاريندا اورتايا چيخاران شاعرلريميزين محتوالي اثرلرينده اولان جذبه‌لر باره‌سينده، اونلارين فردي ايفاده طرزي، ياراديجيليق قابليّتي و شاعرانه گؤروشلرينه داير دوشونجه‌لريمي تقديمات كيمي حاضيرلاديغيم آز حجملي مقاله‌لر، محتشم تبريز شهرينده چاپ اولان ارك هفته‌نامه سينده درج اولونوبدور. ايكي ايله ياخين مدت‌ده آرديجيل سرياللارلا «ايللرين قاناديندا» باشليقلي چاپ اولان مقاله‌لريم حاقيندا قاباقجادان «ارك» هفته‌نامه سينين محترم امكداشلاريندان ائله‌جه‌ده، تشويقچيم اولان حؤرمتلي جبرئيل‌سيف هريس و جنابلاريندان تشكرلريمي بيلديرمك ايسته‌ييرم. «ايللرين قاناديندا» آدلي مقاله‌لريمي توپلايب كيتاب كيمي بيريئرده اوخوجولارا چاتدرماق ايسته‌ميشم سه، مونوگرافلاردا سؤزو گئدن شاعرلريميز حاقيندا گنيش فيكير مبادله سينين امكانسيزليغيناگؤره، يقين‌كي‌مني عفو ائده جكسنيز.
احتراملارلا: تهران ـ ائل‌اوغلو قيش ـ 1377
آغيارلي
1336
گؤزه‌لليكلر يوردو، قوچاقليقلار بئشيگي اولان مقدس تورپاغيميز آذربايجان، ائله‌جه‌ده هنر و ادبيات اوجاغي اولموشدور. اينجه خياللي، درين دوشونجه‌لي و عموم بشريت اوچون سعادت آرزيلي شاعرلر بئجرميشدير. قيرخ ايل بوندان قاباق «قره‌داغ» دا يئرلشميش اولان هريس خانمرود ماحالي‌نين شيخ اسحق خانقاهي تُربه سينين آديني داشيان «خه‌نه‌يه» (خانقاه) كندينده دونيايا گله‌ن بيركورپه‌نين آديني حسين سسله‌ديلر. سئحر ائديجي طبيعتي اولان خه‌نه‌يه كندينده بويا باشا چاتماقدا اولان حسين، يئني يئتمه ليك ايللريندن بري حياتلا طبيعتين گؤزهلليكلريني بير يئرده دويار و حيس ائدردي. اكين يئرلرينده امك‌له آنا طبيعتين ثمره‌سي بيرليكده بار وئره‌ركن، اوشاقليق عالمي‌نين ايستكلرينه اويغون اولاراق نه‌لر دوشونوردوسه، ائله او ايللرين كـپنك سيمالي گونلري نين يوموشاق قانادلاريندا قالدي. او كويره‌ك قانادلاردان چيرپيليب تؤكوله‌ن بير اووج كپنك اونو كيمي آغ آپباغ خاطره لر و او ايللره عايد اولان آغ گونلر اولدو. گنج حسين سونرالار شعر يازدي، هنر و ادبياتا ماراق گؤستردي. دوغما كندي‌نين يايلاقلاريندا «آغ يار» آدلانان بير داغ جيغازين عنوانيني اوزونه شعر آدي گؤتوردو، حسين «آغيارلي» تخلو ـ صوايله شعرلر يازدي. دئمك اينجه‌صنعت دونيا سيندان اؤز پاييني آلابيله‌ن «آغيارلي» اوچون، حيات اوغورلو اولودو. پاك آد، نجابت و صميميت لرله يوغرولموش طالع اونون حياتدان آلابيلديگي پايي اولدو. اؤتن ايللر عرضينده تهران، تبريز و ساير شهرلريميزده بورا خيلان نشريياتيميزدا احساسلي و دويغولو شعرلري ايله چيخيش ائدن حسين آغيارلي بوگونلر قيرخ ياشيني آرخادا قويدو. قيرخ ايل دئديگين بيرعومورون آزياريسي دير. ايللر بيرـ بيري نين آرخاسينجا اوچوشورلار. بيز ايسه اونلارين قانادلاري ايله گله جكلره دوغرو چيرپينيريق، اوچوروق. ايللر بيري ـ بيرينه قوغوشور، كدرلي، سوينجلي، ايستكلي ايللر، اوغورلو، بعضاً ده اوغورسوز ايللر اولورلار. اوغورلو گونلر بيرشاعر اوچون اونون، ياراديجيليق دؤورنده اولان گونلري و ايللري دير. بير شاعرين ياراديجليقلا اؤتن گونلري اونون اصيل عؤمرو ـ گونو ساييلار. دئمك اوغورسوز گونلر شاعر حياتيندا عومور ـ گون حسابيندا دئيل! يئني يئتمه‌ليك ايللري هربير شاعر و ياراديجي اوچون فورمالاشمانين ايلك بينؤره سي‌دير دئسه‌ك، اوايللرين حرارتيني، ايستك و آرزولاريني شاعرين اثر لرينده‌تا بليريك:
سانكي گونش دوغدو
خوروزلارين بان سسي ايله
بولبوللرين نغمه سيله
اؤز يوخومدان اويانديم من
يئني شعير هوسيله...
دائم اوخوجوسو اولان بير اثر اؤز عومرونون سونونو گؤرمه‌يه‌ن بير اثر اولابيلير، يانيب قورتارماماق داهادا گؤزل دير، يانا ـ يانا قالماق سئودانين سونا چاتمازليغيني گؤستر مكدير. ايلدريملار چاخيرلار، بير گؤز قيرپيميندا آليشيب سؤنورلر، بير آنين ايچينده يانقيلاري كوله دؤنور، قورتارير، سونو اولمور. آنجاق گونش؟! سؤنمور، يانا ـ يانا قالير ائله جه انسان اوره‌يينده سونولمز اولان سئوگي ده سونسوز اولور، هميشه ليك اولابيلير، داها دوغرو سو سؤنمز اولور. شاعيرخياله‌ن دانيشديرديغي مخاطبيني يانارليغا چاغيرير، يارانميشلاري بيري بيرينه سئويملي، گره‌كلي ايسته يير. شاعيردونياسي آرزيلار دونياسي دير دئسه‌ك «آغيارلي» آرزيلاري گئنيش، و مقدّس دير او ائل اوچون، وطن اوچون و انسانلار اوچون فرحلي و معنالي حيات ايسته‌يير. بيزايسه شاعيريميزه داها دا اوغورلو گونلر آرزيلاييريق.
يانا ـ يانا
بير شمع اولوب اريئيدم
دوست باغيندا يانا ـ يانا
سوينج اولوب يئريئيديم
ياناغيندا، يانا ــ يانا
بير دومان سيز داغ اولايديم
ياشيل ـ ياشيل باغ اولايديم
نه اولاردي، ياغ اولايديم
چيراغيندا يانا ــ يانا
سارسيلميان ائل اولايديم
ائله، قيزيل گول اولايديم
بيردانيشان ديل اولايديم
دوداغيندا يانا ــ يانا
آل قان اولوب بله نئيديم
ايشيق اولوب اله نئيديم
وطن دئيه چيله نئيديم
قوجاغيندا، يانا ــ يانا
«آغيارلي» يام گلديم جانا
نئجه‌قالديم‌يانا ـ يانا
بير شمع اولوب چاتام سونا
اوتاقيندا، يانا ــ يانا
ياديندامي؟!
دانيشيرديق سحره‌ده‌ك
ايناملارلا، ايستكلرله!...
گوله - گوله آرزيلاري
پايلاييرديق اوره‌ك، اوره‌ك
ايندي نيه؟
اوره‌كلرين كؤزو سؤنور؟
سئوگيلرين گؤزياشينا غم يويونور؟!
گل، ايندي‌ده
كونول لرين آيناسي‌نين پاسين سيله‌ك
اولسون هامي‌گؤي اولدوزلو،
يئرايشيقلي
يارانيشلار بير ـ بيرينه ياراشيقلي
هميشه ليك آيدينلاشسين
ايكي كؤنول، ايكي اوره‌ك
بير - بيريله پاريل، پاريل آينالارتك!
بيرده اولسون ياشايشلار معناسيندا
عومور گؤيچك،
حيات گؤيچك ...
آنا
درد اليندن گؤزلريمين ياشيني
آجي هيجرانيندا سوزه‌رم آنا
ائليمدن اوبامدان آيري دوشه‌لي
شعرايله كؤنلومو بزه‌رم آنا
باغيندا گول آچيب باغيندا سوللام،
وصلينله گول كيمي قونچايا دوللام
سنين گؤروشونه منتظر اوللام
حسرتلي فرقته دؤزه‌رم آنا
سنسيز اوره‌گيمي چن ـ دومان آلي
آيريليقدان قلبيم اولوب يارالي
ايستي قوجاغيندان دوشدوم آرالي
اودورغربت ائلده گزه‌رم آنا
سن‌اولماسان مجتليم كيم اولار؟
غم‌چكه نيم صداقتليم كيم اولار؟
سندن باشقاخوش نيتليم‌كيم اولار؟
سنسيز بوحياتدان بئزه‌رم آنا
«آغيارلي» يام يئنه دوشدوم هيجرانا
دونيالار بيرياناسنده بيريانا
عشقين اوره گيمده دؤنوب عمانا
جوشغون دنيزلرده اوزه‌ره‌م آنا
آي‌آراز
سيلديريملار دايانيبدير اونومده
آچمالي‌يام اوره‌ييمي من سنه
دردلي‌اولسان ياناجاقسان درديمه
داغ دؤشونده بيرداغچيام آي‌آراز
سوگؤرمه‌ميش بير باغچايام آي‌آراز
گونلريمي بوايزلره وئرميشم
اوره‌ييمي‌دنيزلره وئرميشم
شمشك‌لره، اولدوزلارا وئرميشم
دردالينده اوراقچايام آي‌آراز
سوگؤرمه‌ميش بير باغچايام آي‌آراز
بولبولويم بوداغيمين، گولومون
ياراسي‌يام اؤزاوبامين، ائليمين
تالاني‌يام امگيمين، اَليمين
بؤلوك-بؤلوك بيرآغچايام آي‌آراز
سوگؤرمه‌ميش بيرباغچايام آي‌آراز
«آغيارلي» يام سيرداشيمدان آل‌خبر
گؤزه ـ گؤزه گؤز ياشيمدان آل‌خبر
گؤروشمه‌سه‌ك‌باش داشيمدان آل‌خبر
وطنيمدن بير پارچايام آي آراز
سوگؤرمه‌ميش بير باغچايام آي‌آراز
ساپلاق1322
اوتوزبئش ايله ياخين آذربايجان ادبياتيندا قلم چالان قدرتلي شاعير «ساپلاق» بوتون شعر سئوه‌رلريميزه تانيشدير. جدي و ساتيريك شعرلريله ايندي‌يه ده‌ك ايكي جيليد دولغون اثر چاپا يئتيرن «ساپلاق» ين شعرلريني اوخوياندا دائم بير شاعير قدرتيني اويره‌نير و باشا دوشوروك. باشقالاري كيمي اقتداريني كئچميش استاد شاعيرلريميزدن ارث آپارميش و اؤز دونيا گؤروشونو فيكير درينليگيله بيرليكده اوخوجولارينا يئتيره‌ن شاعيريميز، دئمك ادبيات گؤيلرينده قوشا قانادلي اوچور. اونون بير قانادي جدي شعيرلري بير قانادي ايسه ساتيريك شعرلري اولموشدور. بونونلا بئله «ساپلاق» ين آدي گلنده دوداقلارا تبسّم قونور اوخوجونو حيرتلنديرير او اوزون ايللر بويو صابر، معجز و هم‌يئرلي‌سي «هجري » نين قويوب كئتديگي طنز يوللاري‌نين دوامچي‌سيدير. «ساپلاق» اوست - اوسته بو گونكو «قره‌داغ» شاعير لرينين، ائله جه‌ده آذربايجانيميزين، گؤركملي و آغ ساقال شاعيرلريندندير. بو گونكو ساتيريك شعريميزده «ساپلاق» اولمايان يئرده شعر يوخودور. ساير اولكه‌لرده ده تانينميش شاعيريميز «ساپلاق»ين اثرلري و آد ي حؤرمتله اوخونور. دئمك «هريس» ولايتينده ايشيقلي دونيايا اللي ايكي ايل بوندان قاباق‌گؤز آچان شاعيريميز بوگون و صاباحيميزين ادبي گنجينه لريندن بيري دير. يقين‌كي، اونون گله‌جكده چاپ اولان اثرلريني‌ده گله‌جك نسليميز سئوه ـ سئوه اوخوياجاق. «ساپلاق» بير اجتماعي شاعيركيمي لحظه‌لره و گونلره يازمايبدير، بلكه ائله يازميش كي ابديه‌ته قووشماغا قابليتي اولسون، قالابيلسين. قالارگي اثرلر يازيب يارادان خيراله حق‌بيگي «ساپلاق»ين شعرلري نين تحليل‌لري كيچيك صحيفه‌لره سيغماز. يقين‌كي ادبيات عاليملريميز اونون اثرلري حاقيندا علمي ايشلر يازمالي و اونون ياراديجيليق دونياسيني جمعيتميز اوچون هر طرفلي آچيقلا مالاري‌ايله آراشديرماليديرلار. اولسون كي بو ايشي ادبيات سئورلريميز گله‌جكده رغبت‌له گؤره‌جكلر. گنجليك ايللريندن بري ادبيات سئورلرين و اديبلريميزين ائله‌جه ده اوخوجو كوتله‌لري‌نين ماراغيني قازانان شاعيميزين اثرلريندن اورنكلر وئريريك. قوي هميشه اوره كلره سئوينج، دوداقلارا گولوش گتيرسين.
فلسفه و سفسطه
سئوداميزين قانا - قانا سيرريني
سفسطه‌يه ساتمايان كيم ساتان كيم
سيناق واختي گوچ گلنده عزابلار
ايلقاريني آتمايان كيم آتان كيم
تولكولويون گؤلگه‌سيني بوشلا گل
آصلان ليغي كيشي ليگي خوشلاگل
آيدين آچيق علوي يولو توشلاگل
دالدالاردا ياتمايان كيم ياتان كيم
اوزوم اوسته يولوموزلا سوروننم
زيروه‌لرين دومانينا بوروننم
نادانلارا توز تورپاقلي گؤروننم.
يول توزونا باتمايان كيم باتان كيم
قيغيلجمام بير كهرين نالينا
ياتماليام كؤهله نيمين يالينا
انسانليغين شرافتين يولونا
غيرتيله چاتمايان كيم چاتان كيم
اوچانميرسان قاناديني قيناما
سن «ساپلاق»ي فلسفه ايله سيناما
سؤز وئرميشم يولوم آدلي آناما
بو سئودادا اودوزان كيم اودان كيم
اَشي دور بورجوداليم. دونيا ناناش ناش اولاجاق
عموسام هرنه دئسه‌هاميسي بير باش اولاجاق.
«جاز» هواسيله بريك اوينا ياجاق قوردلا، قويون هله‌بوندان
سورا دير چال‌ها چالين، سوي‌ها سويون
دنيادا حاكم اولور تازه‌نظام، تازه اويون
بواويوندا نئجه گؤر پيرداشا - پيرداش اولاجاق
اَشي‌دور بورجوداليم، دنيا ناناش - ناش اولاجاق.
***
تازه‌بير نظمه‌دوشور گردش دوران آبالام
آچيلير پوللولارا بيريئني دوران آبالام
يوخسولابخش اولونور درد و غم ارزان آبالام
وار ليلار يوخسولونان لاپ بئله قارداش اولاجاق
اَشي دور بور جوداليم دونيا ناناش - ناش اولاجاق
بؤيله بيرنظمده يوخدور داها شيطانين الي ائيله تنظيم ائديلير سرمايادارليق تَملي
آغ ساراي دان هاميا، بيربالا پورسوق دئيه‌لي؟
دام - دوواردان يوخاري ديرماشا ديرماش اولاجاق
اشي‌دور بورجوداليم دونيا ناناش - ناش اولاجاق
گرچه هريئرده حقيقت دئيه‌ن ائللر تالانير
امن آمانليق يئرينه قان بئشيگي ييرغالانير
هاردا زحمت‌چكن انسان گؤرورسن آج‌دولانير
«آغ ساراي‌دان» هله‌چوخ يئرلره گؤزقاش اولاجاق
اَشي دور بورجوداليم دونيا ناناش - ناش اولاجاق.
«قارا داغ»، عيبي ندير وارطانا پئشكش چكيلير
يئني نظمين بالاجا توخمدور اوردا اكيلير
اينجيمه عيب‌ايله‌مز باش كسيلير قان‌تؤكلور
وارلي‌نين قسمتي بو اورتادا داش - قاش اولاجاق
اَشي دور بور جوداليم دونيا ناناش - ناش اولاجاق.
هريسلي 1337
گوللو، چيچكلي يايلاقلار، دورناگؤزلو بولاقلار، گئنيش چمنليكلر، بوز بولودلار ياتاغي اولان «اؤكوز داغي» نين اتكلرينده يئرله‌شن «هريس» ماحاليندا ايندييه‌ده‌ك كلاسيك و معاصر دؤورلرده سيناقدان گئچميش واستادليق مقامينا چاتابيله‌ن شاعرلريميز، هئچ‌ده آز اولمايبدير. كلاسيك شخصيتلريندن
توپچي هريسي، شيخ‌اسحق خانقاهي، هجري هريسي شيخ سليم هريسي، و سايره لري آد آپارماق اولار. بوگونكو دؤرده‌ده او ماحالين چاغداش شاعرلري اؤزونه مخصوص يئر توتور. بو ولايتده بويا ـ باشا چاتان و شعرلري‌ايله حؤرمتلر قازانان شاعرلردن: «ساپلاق، ايلديريم، بهرام‌نژاد، حاج موسي هريس نژاد و حسين آغيارلي»ني‌آد آپارا بيله‌ريك. همين نسلين يوكسك سويه‌ده شعر يازان شاعرلري‌نين بيري ده، زين‌الدّين هريس نژاد دير. «هريسلي» تخلوصوايله شعر يازان بو اسلوبلو شاعيريميز گنج ياشلاريندان اؤز هنر و استعداديني ادبي محفل لرده ثبوتا، يئتيرميشدير، واختي ايله دوري مطبوعاتدا آرا ـ سيرا اونون اوخوجوسو اولدوق. موزون شعرلري ايله اجتماعي حياتيميزا ياناشان «هريسلي» كوتله‌نين ماراغيني قازانان مسئله‌لره داير اثرلر يارادير، اونون شعرلرينده درين فلسفه، حياتين گؤزه‌ل ليكلرينه لازم اولان دويغولار و دوشونجه‌لر ياتير.
«هريسلي»نين كتاب شكلينده اثرلريني اوخوماق آرزوسيله «اوتوزدوققوز ياشيندا» اؤز آنا تورپاغيندان آيريلا بيلمه‌يه‌ن شاعيريميزه اوزون عومور، ادبيات يوللاريندا اوغورلو آدديملار ديله‌يره‌ك، هريس محاليندا اولان گنج شاعير و يازيچيلاريميزا، اونلارين آراسيندا بؤيوك شهرلرين آللي ـ گوللو بر-بزه‌گينه آلدانميان يورد سئور، خالق سئور شاعيريميز «هريسلي» بير بؤيوك نعمت دير دئمگيميزه داها آرتيق‌امين اولابيليريك. آتاسي حاج موسي شاعير اولدوقدا ادبيات اوجاغي اولان بير عائله‌ده حيات سوره‌ن «هريسلي» اوز دوشونجه ايشيغيني بوتون كؤنول‌لره چيله‌يه‌جه‌ك دئمه‌گه امينم... ايندي ليكده اونون سون زامان‌لاردا يازديغي شعرلرينين اوخوجوسو اولماقلا موفق شاعريميزه جان ساغليغي آرزيلاياق.
«يانيق كرمي»
يورغون خياليمي يئنه بيركره
نغمه قانادينا ميندير كرمي
دولاندير داغ با داغ، دره به دره
«اصلي» ديارينا اندير كرمي
آرزيم دوستاق اولوب بدن ايچينده
قورخورام چورويه كفن ايچينده
سرحد اسيرييم وطن ايچينده
شيغي سرحدلري سيندير كرمي
هاراي، هاراي چكديم هاياگله‌ن يوخ
آغلاديم گؤزومون ياشين سيله‌ن يوخ
سئودالي كؤنلومون ديلين بيله‌ن يوخ
ديندير اوره‌ييمي، ديندير كرمي
منه پاي وئريبدير وطن، غيرتي
بو يولدا خوشلارام هرمصيبتي
آجيني، آغريني، دردي، حسرتي
سيزلاجانيميزا، سيندير كرمي
عشقين آتشينه من وورولموشام
يانارام اودونا، هر سحر آخشام
سنين اوجاغيندا يانماقلا خوشام
ياندير «هريسلي» ني ياندير كرمي
بيرچاي
بير چاي ايديق،
گور چاي ايديق.
شاققيلدارديق دره‌لردن، دوزه‌ن‌له‌ره؛
دوزه‌ن‌لردن ده‌نيزلره.
يوللار بويو،
داشدان داشا وورولموشدوق؛
گؤز ياشي تك‌دورولموشدوق.
بير بوغاناق، بير فيرتانا قوپاركن، بيز-
شيريم - شيريم پارچالانديق؛
چؤله، باييرا جالانديق؛
چوخ چكميشدي، دورولموشدوق؛
تئز بولانديق،
تئزبولانديق،
بيرجه پارچا موندار لئشه حسرت‌قالان -
كافتارلارين، تولكوله‌رين گونو دوغدو
زينه‌سودان، بولانيقدان
قارينلارين باليقلارلا
دويوردولار.
موندار لئشه تامارزي‌لار
تازا باليق بويوردولار...
بير چاي ايديق؛
گور چاي‌ايديق.
پارچالانديق زينه - زينه
قووشوروق بير چاي اولاق، آمما، يئنه،
قاريشيريق گور چاي اولاق آمما، يئنه
تاكي آخاق
نسيل‌لردن نسيللره؛
عصيرلرده‌ن عصيرلره
بيرله‌شه‌ريك يئنه ده‌بيز؛
يولوموزا گؤز تيكيبدي ماوي ده‌نيز.
بيرله‌شه‌ريك يئنه‌ده بيز.
آذربايجان
اودلار يوردو
مكانيميز، مسكنيميز؛
دؤغولموشوق آلوودان بيز؛
قوپولموشوق بيز، آتش دن؛
سؤنوكمه‌يه‌ن اودوق آنجاق؛
ايشيغيميز سالخيم - سالخيم،
حرارتي پايلاييريق قوجاق - قوجاق
بيزه هر كيم‌ياخينلاشسا
دوست اولارسا، قيزيناجاق؛
دوشمان اولسا، ياناجاقدير؛
«آذربايجان» واژه‌سي‌نين -
معناسيني قاناجاقدير.
حسن ايلديريم
1337
شوش قايالاري ده‌لي بولودلارلا چولغالانميش داغلارين آراسيندا يئرله‌شه‌ن گوللو ـ چيچكلي گوي چمنليكلر بئشيگي اولان «هريس» محالي‌نين اينجه خياللي شاعيرلريندن بيري‌ده چاغداش شاعيريميز «حسن ايلديريم» دير. ادبياتيميزين پارلاق سيمالاريندان اولان «ايلديريم» اوزون ايللر بويو توكنمز ماراق و سئوگي‌ايله شعر، نثر و ساير هنر عالملريني اطرافلي مطالعه ائله ديگينه گؤره، بوگون آذربايجانيميزين اقتدارلي شاعيرلريندندير. داها دوغروسو «ايلديريم» دنياسي چوخ گئنيش دير، اونو آراشديرماغا سوييه‌لي دانيشيق گره‌كله‌نير. او بوتون كلاسيك و معاصرلريميزله برابر دنيانين آدليم شاعير و يازيچلاريني آراييب آراشديرير و بو باره‌ده سيستم‌لي مطالعه نتيجه سينده بوگون شعر و صنعت دنياميزدا يوكسك سويه‌ده نظر صاحبلريندن اولموش و احتراملارا لايق باجاريقلار اله گتيرميشدير.
«ايلديريم» ايندي‌لر اؤز تواضع كارليقلارينا گؤره رسمي دانيشيق سالونلاريندا چيخيش ائتميرسه‌ده يقين كي، بير گون ادبياتيميزين چوخ ساحه‌لرده آغير يوكونو چيينلرينده ساخلايانلاردان اولاجاق. اوگوجلو شعر تنقيد چيلر لريندندير.
«ايلديريم» آراشديريجيليغيندا هميشه فيكيرلردن اوزاق قالابيلن نقطه‌لره راست گليريك. او بوتون جان يانقيسي‌ليكه هنر و ادبيات ميدانيندا تلاشدادير. اؤز عالي تحصيلاتيني طب رشته سينده اوخوسادا استاد شاعيرلردندير. داها دوغروسو اينجه خيال و درين دويغولار شاعيري‌دير. شعرلرينده اولان پويتيك‌ليكه بيرگه ديل، خيال و مضمونلار چوخ گوجلودور. يقين‌كي، «حسن ايلديريم» بو اقتداري يالنيز سارسيلماز اراده و مطالعه ايله اله گئچيره بيليبدير. بيز اونون شعرلريني آراـسيرا مطبوعاتدا اوخوياركن درينليكلره جوموروق، دئيه بيله‌ره‌م، گوزگولر درينليگينده اولان بير درينليكلره. بيز اونون فلسفه‌سينده هميشه انسانا قايغي، حياتا سئوگي و ياشاماغا يانقي تاپيريق. شعرينده خيال عنصرلري گوجلودورسه، او خيال بيزي اويغولارا اويدورمور، بلكه ذهنيميزده سئوال يارادير، بيزي دوشونجه‌يه چاغيرير؛ بيزي مدرن شعريتين گتيرديگي اوستونلوكلرله تانيش ائدير. ايسته‌رديم «حسن ايلديريم» ين يئني اثرلريني اوخوماقلا، سؤزو شاعيره وئره‌ك، باجاريقلي شاعير و تنقيد چيميزه يئني ـ يئني باشارلار و اوغورلو آدديملار ديله يه‌ك...
ساري ليق آزاري
ساري ابليس‌ين يامان دووتووتوب!
ابليس اووسونلاييب بويالاري
ياشيلليق لاري
ماوي‌ليك‌لري اودوب
ساري لاييب رؤيالاري!
ساري ابليس‌ين دؤورونده:
گؤنش دوغار ـ
ساچاقلاري ساري
آي باتار ـ
شافاق لاري ساري
ساري آزارلي عالمين:
گوندوزو ساري
گئجه‌سي ساري
ساري ابليس ساري‌ليق آزارينا ساليب آداملاري:
گؤزلرين باخيشي ساري
چاغيريشلار ساري
گؤروش‌لر ساري
ساري قيزديرمالي اوره‌كلرين:
سئودالاري ساري
سئوگي‌لري ساري
....
آمان، آمان الله
هاراميز وار
هارا گئده‌ك؟
نئجه قوروياق
نه ائده‌ك؟
اوره‌كلريمزده گيزله‌نن قيزيل گوللو باهاري؟!
اولدوزلار - باخيشلار
گئجه‌بولود ايچيندن
اولدوزلار چيخير، باتير،
خياليمداكي گؤزلر
اويانير... باخير... باخير
ايشيقلار گؤيده سوزور
باخيشلار خياليمدا
سيس قونموش گؤزلريمده
بولودلار خياللاشير،
خياليم بولودلاشير.
اولدوزلار دؤنور گؤزه؛
باخيشلارلا اولدوزلار اوره‌ييمه داراشير.
گؤي اوزو چيچك - چيچك؛
چيچكلردن قان دامير.
خياليمداكي گؤزلر
چيچكلره بويلانير.
حسرت ناخيشلي گؤزلر
پاييزلي، قيشلي گؤزلر
ساريلير اولدوزلارا.
شيمشك چاخيشلي گؤزلر،
قارتال باخيشلي گؤزلر
سريلير اولدوزلارا.
بولودلو خياليم
خياللي بولوتلار
چالخالانير ده‌نيز كيمي.
دالغالاري باخيش - باخيش؛
ماياقلاري اولدوز - اولدوز.
يئر - گؤي آراسي دنيز
اوره‌ييم قيزيل گمي
دويغولاريم يئلكه‌نيم.
گميمه غم قالانير
قيزيل گمي ييرقالانير؛
ماياقلار سؤنور، يانير؛
دنيز هئي دالغالانير.
دنيز هئي دالغالانير.
عمران صلاحي
1325
تهراندا دونيايا گله‌ن شاعيرلريميزين اقتدارلي سيمالاريندان بيري‌ده «عمران صلاحي» دير. عمرانين آتاسي زنجان اطرافيندا «شام اسبي» كندينده اولوب، اؤزوايسه تهراندا دونيايا گؤز آچيب، فارس ديللي جماعات آراسيندا ياشاديغينا باخماياراق، ديليميزي ائو آراسيندا اؤيرنميش و گؤزه‌ل شعرلر يارادميشدير. ـ گنجليك چاغلاريندان بري آذربايجان ادبياتيني اؤيرنمگه باشلاميشدير. مطبوعاتميزدا سوييه‌لي اثرلري ايله چيخيش ائده‌ركن اوخوجو گروپلاري‌نين ماراغيني قازانا بيلميشدير. ايكي‌ديلده (فارسي ـ توركو) كسگين قلم صاحبي دير. اونون نثر اثرلرينين اوخوجولاري داها دوغروسو كوتله‌لر اولوبدور.
دوداقلاريندا هميشه تبسوم اولان «عمران صلاحي» ني گؤرنده سانيرسان‌كي، ائله اينديجه بو تبسوملر آراسيندان، شكردن شيرين سؤزلر سوزوله‌جك! دوغروداندا، اوشيرين تبسوملر، اونون دوداقلارينا اوره كدن قوپوب گلن حرارت نمونه‌سي‌دير. ايلك دفعه آذربايجان ديلينده «پنجره‌دن داش گلير» آدلي شعر كتابيني انقلابين ايلك گونلرينده چاپايئتيردي. اونون اثرلريني ساير مجموعه‌لر و مطبوعاتدا اوخويوروق. او، يئني‌ليك سئوردير، يئني فكرلرله دولو اولان شعرلر يازار. شعرلرينده اولان شيرينليك ائله اونون اؤزونه مخصوصدور. گوجلو قلم صاحبي اولان عمران صلاحي فارس ديلينده (طنز آوران ايران، قطاري در مه و...) كيتابلاري‌نين مؤليفي‌دير. اونون شعرلرينده تصويرلر سني دينديرير، ايماژلارسني اؤزيله چكيب شاعرين ايسته‌ديگي نقطه‌يه آپارير. بيز اونون اثرلرينده هميشه انسانا محبت و حياتا قايغي تاپيريق. او اؤز شيرينليك‌لريني مصراعلارا بوكوب، اوخوجولارينا وئرير، اوخو جوايله هميشه‌ليك تانيش اولور.
شعرلري ائله‌جه‌ده نثر اثرلري اديبلريميز و ائليميز طرفيندن تقديره لايق بيلينن «عمران صلاحي» يه اوزون عومور ديله‌يه‌ره‌ك، اثرلرينده‌ن اؤرنكلر اوخويورق
بير جيبينده فشنك
بير جيبينده نوغول
بير گؤزونده زهر، بير گؤزونده بال
«بوردان بير آتلي گئشدي»
ميدان چيخيبدير آيا
آي اِنيبدير ميدانا
توزلو آيين ايشيغيندا
«آتين اويناتدي گئشدي»
گولله سسي خوروزلاري اوياتدي
بير اوجا باغيرتي گؤيده داغيلدي
قان داياندي ايواندا
«گون كيمي شفق سالدي»
كؤهنه صانديقلاردا، كؤهنه كيتابلار
كؤهنه كيتابلاردا، كؤهنه ناغيل‌لار
كؤهنه ناغيل‌لاردا قديمكي اوره‌ك
«آي‌كيمي باتدي گئشدي»
بوسسين ساحيلينده
بوسسين ساحيلينده
قيپ - قيرميزي گوللر
آغ - آپياغ صدفلر
بوسسين ساحيلينده
اوزون ساچلي دالغالار
دالغالاردا سينيق - سينيق گمي‌لر
بوسسين ساحيلينده
گؤزل باغلار، باغلاردا
شيرين - شيرين ميوه‌لر
بوسسين ساحيلينده
بيري مني گؤزله‌يير
يئلكن‌لريم دومانلاردا آچيلير
ايكي دامجي
دئديم: يارپاقلارا باخ!
باخدي، آمما دانيشمادي
دئديم: بوداقلارا باخ!
باخدي، آمما دانيشمادي
خياوانلاري دولانديق
كوچه‌لري دولانديق
دانيشمادي
بيرساعاتدان سونرا دئديم:
- ايكي كلمه دانيش منله
باخدي منه، ايكي دامجي دانيشدي!
آينا كيمي
آينا كيمي
پارچالانديق، سينماديق!
داش آتانلار بيلمه‌ديلر، پارچالانميش آينادا
بير آيدان مين‌آي چيخار
بيرگونشدن مين گونش
بير اولدوز دان مين اولدوز
پارچالانديق آيناكيمي
چوخالاريق
چوخالداريق اييشيغي
داغلي
1347
اطرافيني آللي ـ گوللو يايلاقلار، چوپورلوقلاريندا تايا دومانلار گيزله‌نن قاياليقلار بوروموش «پيقان» كندينده دونيايا گلن سلمان صفريان «داغلي» تخلوصوايله شعرلر يازير. كليبر ماحاليندان اولان گنج ياشلي شاعيريميزين، يئني ليك روحوايله دولو اولان شعرلري‌ايله تانيشيق. اونون شعرلرينه ديقت يئتيرديگيميز واختدا، او ماحالين اهالي سينده اولان كؤيره‌كليك، استقامت، صداقت و انسان سئورليك‌لر گؤز اؤنونده جانلانير. شاعير خالقين لكه‌سيز گوزگوسودور دئيرلرسه، تام معنادا باشا دوشولور.
«داغلي» گنج شاعيرلريميزدن اولسادا، ايلهاملي قلمي، آيدين دونيا گؤروشو واردير. بوگونكو شعريميز هانسي سويه‌ده اولمالي‌دير دئيه، ايشيقلي گله‌جگنيه ايز آچان بير شاعيردير. او كلاسيك فورمالار يميزدان اوزاقلاشديقجا يئني شعرلر فورماسيني منيمسه‌يير، دئمك لازم ديركي، كلاسيك‌لريميزين يازديقلاري فورمالاردا يازماماق اونلاري ردّ ائتمك معناسيندا دئيلدير، بلكه، حياتين آهنگي ايله تؤره‌نن اؤلچو ـ بيچي‌لر بيزي اؤزوايله هماهنگ ائدير. مجبوراً بوگونكو ياشامين ايستكلرينه اويغون شعر فورمالاري يارانير.
«داغلي» شعريني احتوا ائدن موضوعلار بو گونكو اجتماعميزين ايستكلري و قايغي‌لاري‌دير. او گنج نسليميزين يئني ليكلره دوغرو يؤنه‌لن شاعيرلريندندير. منه ائله گليركي گنج ياشدا اولان شاعيرلريميز ياخين گله‌جكده ادبياتيميزي دونيا ادبياتينين سوييه‌سينه ياخينلاشديراجاقلار. بونلار دوننلريميزين اوزه‌رينه ياتميش غم توزونو سيله‌جك و غم فضاسيندا اويان ذهنيتيميزه شادليقلار چيله‌يه‌رك قلبيميزي سؤينديره‌جكلر. ساير قره‌داغ شعرلري كيمي «داغلي» نين شعرديلي مني اينانديريركي، شعريتيميزه هر جهت‌لي باخانلار و اهميت وئرنلر آز دئيل و گله‌جك اونلارين‌دير، آخي زمانلا ايره‌ليله‌سك يالنيز بئله اولمالي‌دير. او فرانسيز ديلينده عالي تحصيل گؤرموش، ادبيات يوللاريندا هميشه آختاريشدا اولان شاعردير.
گنج شاعيريميزه هنر يوللاريندا اوغورلار ديله‌يه‌رك شعرلريني بيرليكده اوخوياق.
لام آخ!
هامي بيزه آغلاييردي
هامييا آغلايان سن
آغلامادين
منه‌گوره
بولود كيمي پؤرتموش من،
آغلاماديم
سنه گوره
بير آزادا دؤز... قارا دؤهول سسي گلير
دوزدور، داملا ياخشي ايتر دنيزده
يئنه گؤزله جوشماياسان!
بيليرسنمي؟ بيزي اونودماياجاقلار
كشفياتچيلارا بنزه‌ر:
رسام گؤزلر
نامحرم گؤزلر،
موندار گؤزلر
جوشماها!...
لام آخ.
توي
آرزيلاريمين باشيندان آتديغيم آلما
قيسمت اولمازدي دنيز اوغرولارينا
قارا بولود
قارا گونده
يازيق - يازيق يازيلماسايدي
يانديردي باخت ائوين
قاچماميش بوزوشن دوداقلار.
سؤزلنمه‌دي ديلكلر.
بيزيمكي قالدي
خزه‌للرين خور گوروهو اوخويانا
يومارام اوناده‌ك اللريمين خيناس ي ن
اينانميشام ،
اينانيرام ،
بيرده آلما آتاجاغام .
سوسوز
بوتون سؤيله‌نيلميش سؤيلر
سوكوت بؤيوكلوكده
بيرآلقيش بورجلودور سنه.
گونشي‌ده اوتانديرير
سنين اسره‌ك باخيشلارين.
من كيمه‌م؟
يالنيز بير سوسوز.
كاش تاپايديم سني.
كاش ايته‌يديم سنله.
كاش باتايديم سنله
سوكوت بوشلوغونا
باش قاتماقدان اؤتور
سؤزلرله اويناماق
هاچانا قده‌ر؟!
فلكين كيل اوراخچاسي
بيچه بيلمير
جيغيرلارين يوخوسوندان قارانليغي
فلكين كيل اوراخچاسي.
آهيم‌اودو، چاشقين قاليب
يول تاپانمير
يوكسلنمير اوراخچاني سووارماغا
جرگه‌لرده
باششاقچي قيز
يارالارين سايابيلمير
قافلانتي
1312
مقدس اؤلكه‌ميز آذربايجانين ميانا بؤلگه‌سينده يئرله‌شه‌ن «چاراويماق» ماحالي نين «حيدرآباد» كندينده ايشيقلي دونيايا گؤز آچيب، گنجليك ايللريني او كندين سئحر ائديجي طبيعتي‌نين قوجاغيندا سوره‌ن «مراد علي قريشي» (قافلانتي) آلتميش بئش ياشينا ياخينلاشماقدادير. ياريم عصره ياخين دوغما يوردوندان اوزاق دوشوب ميليونلارلا سويداشلاري كيمي تهراندا مسكن سالميشدير. اوتوز ايله ياخين آنا ديلينده شعرلر يازان «قافلانتي» ادبيات سئوه‌رلريميزله اؤز كتابلاري و مطبوعات وسيله‌سي‌ايله تانيشدير. او، چئوره‌سينده ياشايان انسانلارين آغري ـ آجيلاري، ايستك و هيجانلاريني ساده و صميمي مصراعلاري‌ايله اوخوجولارينا چاتديرير. كؤيرك قلبلي شاعير قافلانتي، اؤز تخلوصونو قافلانتي داغيندان (قافلانكوه) گؤتوروبدور. او ايستي قانلي يوموشاق احوال ـ روحيه‌لي بير انسان ديرسا شعرلرينده عيبجرليكلره قارشي سرتليك وار، قاباريقليق وار، انيلمزليك و مبارزليك روحو واردير. شاعير قافلانتي‌نين آلتميش بئش ايل ثمره‌لي عومورو ادبياتيميز اوچون داهادا اوغورلو اولوبدور. ايندييه‌ده‌ك «سئچيملش‌اثرلر» او احساسلي شاعريميزين (كنديميزين بير ايلليك تاريخي)، «شعر مجموعه‌سي» و «عومور آيناسي» عنوانلارلا كتابلاري چاپدان بوراخيليب دير، قافلانتي ياراديجيليغيندا موضوع جغرافياسي گئنيش، تخيّل عنصري ايسه وسعتلي و شيرين‌دير. اونون خيال دونياسي مصراعلارا چئوريلنده پوئتيك اثرلر و پؤيئمالار يارانير، اوخوجولارين احتراميني قازانان قافلانتي مختلف ژانرلاردا اثرلر يارادميشدير. او بوتون كلاسيك فورمالاردا استعداديني ثبوتا يئتيرميش بير شاعيردير. قوجامان شاعيريميز بوتون اثرلريني چاپا يئترسه ايستكلي اوخوجولاريميزلا فيكير مبادله‌ميز داها گئنيش، داها فاكتيلي اولاجاقدير. قافلانتي ياراديجيليغيني آراشديرماق بوكيمي آز حجملي مقاله‌لرله ممكن دئيل. اونون باره‌سينده داهادا آرتيق فيكير مبادله‌سي ائتمك اوچون اؤتن ايللرده تانينميش شاعير و ادبياتچيميز «حسن ايلديريم»ين، قافلانتي‌نين «عومور آيناسي» آدلي كيتابينا يازديقي اؤن سؤزه مراجعتيميز گره‌كلي گؤرونور شاعيرميزين يئني يازديغي اثرلريني‌اوخوماقلا، سيزين‌له بيرليكده ادبيات يوللاريندا «قافلانتي»يا اوغورلار ايسته‌ييره‌م.
«داغلارا، داغلارا»
ساتاشاندا گويه‌نيره‌م
اؤزوم داغلارا، داغلارا
اوره‌ك دئيير شيرين نغمه
دوزوم داغلارا، داغلارا
گونش گؤيدن اؤگئي باخير
دولو دوشور، شيمشك چاخير
ايلديملار سونكو تاخير
بيزيم داغلارا، داغلارا
ذيروه‌لري دومان آلير
بوز بولوتلار كؤلگه سالير
ايللر اؤتور تكجه قالير
دؤزوم داغلارا، داغلارا
فصيل، فصيل كولك اولور
ياماجلارين رنگي سولور
باخا - باخا ياشلا دولور
گؤزوم داغلارا، داغلارا
«قافلانتي» يام ايلدن - ايله
گؤزله‌ييرم باهار گله
دئيلمه‌ميش قالير هله
سؤزوم داغلار، داغلار.
آيلار ايللر گؤزه‌ليم گؤزله‌ييرم سن‌گله‌سن
ايلقاريم، ايلقارينا سؤيله‌يه احسن گله‌سن
اويماديم هر گؤزه‌لين نازينا بير آندا اينان
نقدر وارنفسيم سسله‌ييرم سن‌گله‌سن
فرقتين ائتدي منيم با غريمي‌شان - شان گؤزليم
عشقه جانيمدا گئده، سؤيله‌يره‌م سن گله‌سن
ياريليبدير، ياريلار، دان يئري ظلمت گئجه‌ده
سحرين زمزمه‌سين دينله ييرم سن گله‌سن
پوزماييب آنديني ايلقاريني «قافلانتي» دؤزور
دردينين چاره‌سي بو دهرده‌سن سن گله‌سن
هيجران
اودونا يانيرام قارا هيجرانين
آيريليب ائليمدن ياشيل باش‌صونا
سارسيلديب هجراني سالارام يولا
سالسادا اؤزونو گونده بيردونا
قورسالار يولومدا ياغيلر تله
سيرريمي آچمارام هر يئته‌ن بيله
گؤزله‌رم نازنين نگاريم گله
ازلدن باغليدير ايلقاريم اونا
سئويملي دلبري سئوديم اوره‌كدن
دؤنمه‌يب، دؤنمه‌رم نازلي ملكدن
قورخمايب قورخمارام قاردان كولكدن
بوراندا - بوسقودا اللريم دونا
تيكيليب يوللارا آختارير گؤزوم
اونا اوره‌گيمي وئرميشيم اؤزوم
دؤزه‌رم هيجرينه گركدير دؤزوم
قويمارام اوزومه غم توزو قونا
داريخما «قافلانتي» گزيب آرارام
تاپيب او گؤزه‌لين ساچين دارارام
قارانليق گئجه‌نين باغرين يارارام
يئتيرره‌م هجرنين حياتين سونا
الياس واحدي
1347
ادبياتيميزي سئونلرين سايي كميتجه معلوم اولماديغي كيمي شاعيرلريميزين‌ده كميتي كيمسه‌يه آچيق ـ آشكار دئيل. آذربايجان ديلينده يازيب يارادانلارين بير ـ بيري ايله‌سيخ علاقه‌لري اولماديغينا و اونلاري بير ـ بيري ايله علاقه‌لشديره بيله‌ن مركزلرين يوخلوغو، شاعير و ياراديجيلاريميزي غريب‌ليكده يا شادميشدير. ائليميزين، اوباميزين احساسلي جوانلاريندان بيري‌ده مختلف ژانرلاردا پوئتيك شعرلر يازان «الياس واحدي» دير. ادبياتيميزا درين سئوگي و توكنمز ماراقلا قدم قويان شاعير «واحدي» يه اوغورلو يوللار قوجاق آچميش و اونا آيدين گلهجكلر گؤسترير. گله‌جكده موفق شاعيرلريميزدن اولاجاقدير، اونون شعر ديلي‌تميز و آيدين‌دير. خيال دونياسي ايسه وسعتلي‌دير. يئني‌ليك حيسي، انساني نيت‌لر و حياتا پاك عشق اونون شعرلرينين و صنعت دونياسينين ايلك ماياسي‌دير. او، ايندي‌ليكده آناديليميزين اؤزونه مخصوص سويه‌سينده چوخ شاعيرلريميز كيمي مختلف موضوعلاردا شعرلر يازير آنجاق‌فورمالاشماغا باشلاميشدير. گله‌جكده اؤزو آچديغي ايزلرله ادبيات يولوندا يورولماز قدملر گؤتوره‌جك اولدوغونو يوكسك استعدادي ايله بيزه ايندي‌دن بللنديرير. جوان شاعيريميز «واحدي» مياندواب شهري‌نين آذربايجان ديلينده يازان شاعيرلريندندير. «الياس واحدي» يه شن حيات‌آرزولاماقلا گنج عومرونون اوتوز اينجي باهاريني يئنيجه آرخادا قويموش جوان شاعريميزه حيات يوللاريندا، علم و ادبيات عالمينده نائليتلر آرزولاييرام، قلمي الهاملي، يولو ايشيقلي اولسون. اونون ياراديجيليق دونياسيندان اؤرنكلر اوخويوروق.
«داغ بابا »
هاچانساكي سني يادا سالميشيق
آغ گونلري دئيه ـ دئيه قالميشيق
گون وئريليب وئريلمه‌ييبدير ايشيق
قورخو ـ قارا، اوره‌كلرسه آغ‌بابا
دردلريميز ديكه‌ليبدير داغ‌بابا
بو يانقينليق هاردان اسدي چؤللره
بار دئينده وار گلمه‌يير ديللره
قوراقليقدير، آغلايان يوخ گوللره
يوخودادا گؤرمه‌ييريك باغ بابا
دردلريميز ديكه‌ليبدير داغ بابا
دولغون يئللر، بيزه ساري بيراسين
بو قورداقلار سؤروب يئرين شيره‌سين
كيم يخاجاق سوسوزلوغون بره‌سين
هامي‌ليقجا اؤلوشگه‌ميش تاغ‌بابا
دردلريميز ديكه ليبدير داغ بابا
گؤزدن آخان قانلي ياشدير سيليريك
قانيميزا گولدورورلر، گولوروك
بو گولمه‌لي ياشاييشا اؤلوروك
ياشام ـ اؤلوم، نئجه اولوب لاغ بابا
دردلريميز ديكه ليبدير داغ بابا
اووچو وورور بيزسه باشي قارداييق
يووا هاردا بيز اؤزوموز هارداييق
مين‌بير يئره بؤلونه‌جك بير پاييق
دونيا اولوب يامان بير اوولاغ بابا
دردلريميز ديكه ليبدير داغ بابا
اللر اوسته گئدير اومان آرزيلار
سويوق تورپاق نه‌دن بيزي آرزيلار
ايچيميزده يئنه‌ده چوخ آرزي‌وار
بو غملردن باشين اولسون ساغ بابا
دردلريميز ديكه ليبدير داغ بابا
بوغازلاردا دويونله‌نير بو سسلر
گؤزلريميز ايسلانماغي هوسلر
قانلار جوشسون بيزسه تؤكك قانلي‌تر
گؤزه‌لرين يوخوسونا ياغ بابا
دردلريميز ديكه ليبدير داغ بابا
«اووچو و اوو»
بير اووج داري
بير دسته قوش
هاميسي آزقوش
گؤيده له‌لك اييي‌وار
يئرده آجليق قوخويور
اووچولار بوسقودا
سس‌سيزليگه داليب گورولتولو گولوشلري
ياشاماغا يوخ
يالنيز اؤلمه‌يه گليب‌لر بو كور قوشلار
گؤزوموزده قارتال قفسي
ايچيميزده اؤتمك هوسي
كؤكسوموز اوزه‌رينه چؤكوب
اووچولارين قارا نفسي
اوولانير
ايشيق قاناد سس‌ده
اذن‌سيز چيخان نفس‌ده
داريخير غريبسه‌ميش گؤي‌لر
غرورلا ياشايير دار آغاجلاري
كيشي‌لر ديللريندن آسيلان چاغدير
قادينلار يئريكله‌يير، بير آغيز سؤزه
اوشاقلار دوغور، ديلسيز - آغيز سيز
ساچلاريندان آلوو ساچير
باشي‌شيطان، گؤوده‌ييي حئيوان بو اوشاقلار
سئويريك، سئويليريك
سئوگي آدينا آچيلير گؤزلر
نه‌ايسه گوناه ياغير باخيشلاردان
سئوگي بورادا ايكي هئجا غريبليك دير
و بيز تولكو سسي ايله ياشاييرق هئجا - هئجا
قاپانيب ياغيش قاپيلاري
اوز چئوريب تانري بيزدن
بو نه سويوقدور اسير ايچيميزدن
حبيب فرشباف
1323
زامانلا آدديملايان شاعرلريميزين بيري‌ده، حبيب فرشباف‌دير. او چاغداش شعريميزين يوكسك پلله‌لرينده يئرتوتان انسان سئور شاعيرلريميزدندير. صاف اوره كلي، تميز وجدانلي شاعير انساندير. ادبياتيميز، ائليميز و بؤيوك آماليميز اوغروندا وطنداشليق بورجونو باجاريقلا اؤديه‌ن شاعير «حبيب فرشباف» رئال اجتماعي حياتيميزي اونودولماز مصراعلاري ايله متصورائدن بير الي قلملي‌دير. اوقاباقچيل ادبياتيميزدا اؤن سيرادا ايره‌ليله‌يه نلردندير. بو آيدين دويغولو، اينجه خياللي شاعريميزين اينديه ده‌ك ايكي جيليد چاپ اولموش اؤنملي شعر توپلوسونون اوخوجوسو اولموشوق (قره‌داغ كندليلري ـ دان يئري) اونون اثر لرينده حريّت و انسان سئورليگه حقيقي حؤرمت گؤروروك، فاغير و مظلوم انسانلارا قايغي گؤروروك. اوشاق ادبياتيميزا، اوشاق شعريميزه ده‌يرلي شعرلر آرتيران شاعريميز «حبيب فرشباف» اثرلرينده سعادت يوللاريني آختارمادادير. او، هميشه اؤز
اوخوجو كوتله‌سيني فيكيرلشمه‌گه چاغيرمادادير. او، انسانلارين گله‌جگينه هميشه اوميدله، نيك بين ليكله ياناشير.
كلاسيك و سربست فورمالاريندا شعرلر يازان حبيب فرشباف اللي‌اوچ ايل بوندان قاباق ادبيات اوجاغي اولان تبريز شهرينده ايشيقلي دنيايا گؤز آچيب همان شهرده بويا ـ باشا چاتيبدير.
ايسته‌رديم تبريزده آنادان اولوب. آذربايجانيميزين باش اوجاليغيني ـ اوره‌ينده يئرلشديرن و بوتون انسانلارا قايغي گؤستره‌ن شاعريميزه قره‌داغ كندليلري طرفيندن‌ده، اوزون عومور و سعادتلي گلهجكلر آرزولاديغيمي بيلديرميش اولام. استاد شاعريميزين اثرلريني بير ليكده اوخوياق.
...
تجربه تسبئحين اله آلماغا
گونلري، گونلره دوزه‌سن گره‌ك
دوستونو دوشماندان آييرماق اوچون
زمان سؤز گجيندن سوزه‌سن گره‌ك
ازلدن دوزلره آخماز صاف سولار
داشدان ـ داشا دئيب گليب دورولار
شيپ ـ شيرين اولسادا اولو آرزولار
آجييا ـ آغرييا دؤزه‌سن گره‌ك
گئنيش بير عماندير غوغالي حيات
داغ تك قاسيرغالار گلير قات باقات
ديزين قوجاقلايب اوتورما هيهات
نجات ساحلينه اوزه‌سن گره‌ك
انسان
هاوا قيرخ درجه سويودو بيرده‌ن؛
انسان ياشادي
هاوا قيرخ درجه قيزيشدي يئنه؛
انسان سارسيلمادي؛
انسان ياشادي
تكجه يارپاق اولدو كئچينه‌جه‌يي؛
انسان ياشادي
قارا تورپاق اولدو يورغان - دؤشه‌يي؛
انسان ياشادي
هر چتين بيرگونه، پيس شرايطه
اوآليشابيلدي، او دؤزه‌بيلدي
تكجه كلمه بويدا عدالتسيزلييه
نه آليشا بيلدي. نه دؤزه بيلدي
آخي او، انسان كيمي ياشاييردي؛
آخي او، انسان آدي داشييردي
سفر
سفرده‌يم گونده‌ن گونه
آيدان آيا
ايلده‌ن ايله
سفرده‌يم
كوره‌گيم ده ياشايشين آغيرليغي
اوره‌ييمده قانيم كيمي‌اوميد
گؤزلريمده هيجران بويدا كدر
تؤوشه‌مه‌ديم هئچ سفرده
فيكيرلردن فيكيرلره سفريم قدر
ماوي‌ليك
باخيشين ماوي‌دير، گؤزلرين ده‌نيز
نگار خياوي
1339
«منيم شعريم،
منيم درديمله درمانيم.
منيم غربت آداخلي در بدر عومروم.»
يوخاريدا گلن ميصراعلاردا، شاعير اؤز مُناسبتيني، اؤز ياراديجيليق دونياسينا بيلديرير. دئمك بورادا، شاعيريميزين هم دردي، همده درماني اولان شعرلري‌دير.
بو هانسي درد ديركي، درد اولدوقدا درمان دا اولابيلير. بير آز ديقت يئتيرنده باشا دوشوروك كي، چؤره ميزده و حياتدا اولان ـ عيبجرليكلر، بير الي قلملي اوچون دوغروداندا درد دير، اوره‌ك آغريسي دير. در حال درمانديرسا، اوره‌ك آغريلاريني ميصراعلارا بوكوب خالقا تقديم ائتديكده، توپلوم آراسيندا، دوشونجه سينه،
آرزو و آماللارينا اورتاق اولانلاري شعرلرينين واسطه‌سيله تاپماغي‌دير، اونلارلا ميصراعلاري وسيله‌سيله تانيش اولماغي‌دير. دوغروداندا، اوخوجولارلا فيكير مُبادله‌سي ائتمك بير شاعير اوچون اوره‌ك آغريسينا درمان ائتمكدير.
«منيم غربت آداخلي در بدر عؤمروم.»
بو ميصراع اؤز عالميله صميمي ياشايان و اؤز ايچريسينده باش وئره‌ن فيرتانالاردا ياشايشين معناسيني هيجالايان بير اوره‌گين چيرپينتيسي‌دير. بو غربت آداخليسي اولان عومور، دئمك ائله شعرين اؤزوندن باشقا سي دئييل. بس شاعيرله شعرنين بير ـ بيري‌ايله قوغوشدوغو عومور، غربته دوشه‌ن آنلار و لحظه‌لردير، بو غربتين مسافرلري ايسه شاعيرله شعرلري‌دير. دئمك اؤزونو شعريندن آييرا بيلمه‌يه‌ن شاعير، بو كيمي ليريك حيسلرله بيزي اوز روحوايله يوغرولموش ميصراع لاريندان بيري ده بئله دير:
سني درديم دووارلاردان
يتيشميش ناركيمي سن پارچالاندين
وارليقين بارلي بوداغيندان
كؤزه‌ردين سينه داغيندان
دئملي، شاعير او شاعيرانه لحظه‌لري و شعرين حضورونو، ال آتيب وارليغين بارلي، بهره‌لي بوداغيندان درميش و شعر ايسه قيپ قيرميزي ناركيمي يئتيشه‌ره‌ك پارچالانميش اولور. «يئتيشميش» دئديكده، شعر هميشه يازمالي اولمور دئديگي‌دير، ايلهام هميشه ال چاتاردا دئيل، دئديگي‌دير. آنجاق او، بارلي بوداقدان دريله‌ن شعر ايسه نار رنگينده‌دير. اوره‌ك «قاني رنگينده‌دير» دئيه‌جيگيني گؤستر مك ايسته‌يير.
بو كيمي يئني‌ليك‌لرله شعردونياميزا يئني‌ليك گتيره‌ن شاعيره «نگار خياوي» گؤستريركي فورمالاشماق بير شاعيرين ايلك ياراديجيليق ايللرينده مهم اولورموش. بو مسئله اؤزگه‌لره اوخشاماق ايسته‌مه‌ينلرين اراده سيندن آسيليدير. وطنيميزين اردملي شاعيرقيزي نگارخياوي اوتوز سگگيزايل اؤنجه آذربايجانيميزين خياو شهرينده (مشكين شهر) آنادان اولموش و اؤز مقدس يوردوندا بويا ـ باشا چاتميشدير.
اينديه‌ده‌ك اونون چاپ اولموش اثرلريندن ايكي جيلد «منيم شعريم» و «كؤگله‌ده‌كي‌سي» آدلي كيتابلاري‌ايله تانيش اولدوق. اونون اثرلري، انقلابدان سونرا چاپ اولان شعر كيتابلاريميزين ده‌يه‌رلي‌لريندن‌دير. ايلك اثرلرينده موفقيت‌لرله ادبيات عالمينه آياق قويان «نگار خياوي» يه اوغورلو ايللر. ديله مكله سويه‌لي اثرلري، و كيتابلاري‌نين اوخوجوسو اولماق آرزوسيله شاعيره‌ميزين شعرلريندن بيرليكده اوخوياق.
سئوگي يوواسي
اللريميزي توخودوق
يوواميز ديكلدي
ايچينده يووالانان جوجه‌لر
جيويلده شير
قوندوم سؤيودون باش بوداغينا
سنه كوره كلنديم
چكمه كوره‌ييني
سئوگيميز چؤكر
بوتون يالقيزلارين دريسيندن
آدديملاريما آياققابي تيكيب‌لر
سارسيلماز، دايانماز
بوتون يالقيزلارين شيره‌سيني چكيب
سوساميش گؤزلريمه ايچديريبلر
سس‌سيز، سميرسيز
وبوتون يالقيزلارين دوشونجه‌سي
يالقيز اوتاقيمين گئنيش هاواسيندا
بوغولا، بوغولا
باغريما سيغينيب‌لار
* * *
اَه، بوراخ، بوراخ سؤز سوسله‌مگي،
قوي دردلي - دردلي اوغوناق
دئينييب - دئينييب،
گولمكدن قيريلاق
بودا بيرجور كئفنن ديغلاماقادي،
بودا ياشامين اوبيريسي‌دي.
داود اهري
1338
اونودولماز شخصيتلر بئجره‌ن قره‌داغ ماحالي، آذربايجانيميزين شعر و موسيقي اوجاقلاريندان اولدوغو هامييا بللي دير. بوگون اورتاق ادبي ديليميزه ياخين و اونون مهم قايناغي قره‌داغ ديالوغودور. قره‌داغ، بولگه‌سينين عادي جاماعاتي آراسيندا گئدن ديالوغون ايزيني ادبي ديليميزده تاپا بيليريك. اونا گؤره، قره‌داغ شاعيرلري جاذبه‌لي اثرلري ايله ياناشي ادبي ديليميزين تمثيلچي‌لريندن ساييليرلار. بؤيوك و مقدس تورپاغيميز آذربايجاندا جور به جور بؤلگه ليك‌لرين دئييم طرزي اولدوغونا باخماياراق سون اؤتن ايگيرمي ايلده اورتاق ادبي ديليميز اديبلريميز آراسيندا فورمالاشمادادير، بوفورمالاشمانين قدرتلي قولو قره داغ شاعير و يازيچيلارينين ادبي ديل قايدا و اوسلو بلارينا عايددير. قره‌داغ بولگه سينده اؤزونه مركزييت حقوقو قازانيب، او ماحالين مركزي اولان اهر شهرينده ايشيقلي دنيايا گؤز آچان شاعير «داوود اهري» گنج شاعيرلريميزدندير. «قارانقوش» امضاء سيله شعرلر يازان «داوود اهري» يئني باخيشلي شاعيردير. اونون ايلك تجربه‌سي اولان «بير گون پاييزدا» آدلي كيتابي‌نين اوخوجوسو اولدوق. اونون ايلك شعرلر توپلوسوندان بئله باشادوشمك اولوركي، «داود اهري» قره‌داغ كلاسيك شعرينين چئشيدلي فورمالاريندان اوزاقلاشيب، سربست و آغ شعر فورمالارينا دوغرو يؤنه‌ليب. اونون ايلك آدديمي اولان بير «گون پاييزدا» اثرينده مضمونجا گؤزه‌ل شعرلر و مينياتور اثرلرله راستلاشيريق. او بيزي شاعيرانه لحظه‌لري ايله تانيش ائده بيلميشدير. «داود اهري»نين شعرلرينده جانا سينه‌ر ليريزم واردير. اونون اثرلريني اوخويار كن، اوندا اولان گيزلي و شيرين رومانتيزمه ال تاپماق ممكن اولور. اونون يوموشاق شعر ديلي واردير. بلكه‌ده بو كؤيره ك‌ليك و يوموشاقليق اونون شخصي رفتارلاريندان تؤره‌نيبدير. اونون شعرلرينده خيال عنصري شاعيرانه بير تخيّلون رومانيتكجه‌سينه فورمالاشماسيني گؤسته‌رير. ايلك آدديملاريندا ادبياتيميز اوچون آرديجيل اولاراق. ايره ليله‌ييش گوردوگوموز «داود اهري» يه ادبيات اوغروندا اوغورلو يوللاردا جان ساغليغي و آيدين گله‌جك آرزوسيندايام. اورنك اوچون اونون شعرلريندن اوخوياق.
آلقيش
قارانقوشلاري
سورگونلرده سالديرديق
يارپاقلاري يانديرديق
اللريميزي
گؤيلرده قالديرديق!
هله پاييزدان قالميش
گؤيلردن قار ياغديرديق
داها دئميرم
اينك‌لري اوزگه‌لره‌ساغديرديق
اكين يئرلرينده
سويرق قبيرلر قازدير ديق
اينانديق، اينانمايانلاري قانديرديق!
كيمسه‌يه قولاق وئرمه‌دن
قويروغو كسيلميش
قارا آتلاريميزي
چاپديرديق.
سئوينديك سويوق اللري
بير ـ بيرينه چالديرديق...!
اؤلوم
دئيير: «فرشته سيز اؤلوم
الله‌سيز
شيطان سيز اؤلوم،
جهنّم سيز
جنّت سيز اؤلوم،
بير باشقا دونيادان
دونياسيز اؤلوم!
دئييرم:
- دئييرسن
بس من نئجه اؤلوم،
بلكه بير گون سني
بير دؤنه گؤروم؟!
قاليبدير سنده
آرزيلي گؤزوم،
سؤيله بو درده
نئجه دؤزوم؟!
دئيير:
قالميشام بو ايشه مات
هله اؤزوم ...!
كدرلي اؤلوم!
ياديندامي دونن
دولوخدو گؤزلرين
دئدين:
- باخ!
يول لاردا كولك اسير...
دئديم:
- اينانما قيشا
داها ياز گلير!
ايندي
گؤزلرين آيدين،
ساريشين ساچلارين
اليمده گزير ...
آذر پويا
1335
مين ايلليك مكتوب ادبياتيميرين بئشيگي اولان آنا تبريز اديبلر و اديباتچيلاريميز اوغروندا هله‌ده اؤز آناليق مقاميني ايتيرمه‌ميشدير. اولو «خاقاني» يه آنا ساييلان تبريز، اينديسه چاغداش شاعيرلريميزين ميصراعلاريندا ايستي قوجاقلي، كؤيره‌ك اوره‌كلي، دوغما آنا كيمي اؤزونو عكس ائتديرير. تبريز ده بويا ـ باشا چاتان اديبلريميز هميشه خارق‌العاده ايشلرين مؤليفي اولموشلار. شرق عالمينده اؤن سيرادا ايره‌ليله‌يه‌ن تفكر صاحبلري آراسيندا تبريز ضياليلاري هميشه اؤزلرينه پلله‌لر اله گئچيريبلر. يئري گلديكده دئمك ايسته‌ييرم كي، تبريزين اوره‌گي هميشه زامانين نبضي‌ايله دؤيونمكده اولوبدور.
تبريز هميشه داهيانه تفكرلر قايناغي، اقتدارلي انسانلار بئشيگي، بيليك و مدنيت اوجاغي اولماقلا، آذربايجانيميزين مركزييتينه چئوريليبدير. بو مركزيته سبب تبريزده يارانان ادبيات‌دير، اينجه صنعت‌دير، دائم انكشاف و يوكسه‌ليشده اولان علم و مدنيت دير.
ايندي ايسه، ائليميزين داهادا اردملي شاعير و يازيچي ائولادلاري او شهرده ياشاييرلار. تبريز هميشه‌يئني يئتمه جوانلاريميزا، ادبيات و اينجه صنعت هوسكارلاريميزا، قيدا منبعي اولوب، نسيل - نسيل اديبلريميز و عاليملريميزي قيدالاندير يبدير.
حادثه‌لر و دوشونجه‌لر قايناغي اولان تبريزده ايشيقلي دنيايا گؤز آچيب، او محتشم شهرده بويا ـ باشا چاتان اديبلريميزين بيري‌ده «محمد نقي ناصرالفقرا» دير.
«آذرپويا» تخلوصو ايله مطبوعاتدا تانينميش «ناصرالفقرا»، اؤلكه ميزين ايستي قانلي، درين دوشونجه‌لي ضياليلارينداندير.
شاعير اوره كلي «آذرپويا» استاد شهريارين اوغورلو اثري «حيدر بابا يا سلام» كيتابيني آنا ديليميزدن فارسجايا ترجمه ائديبدير. «سيمرغ و قاف» آدلي بو محتشم ترجمه اثري، اونون بويوك استعداديني، اوخوجو كوتله‌لرينه گؤستره بيلدي. او «حيدر بابا» نين تايسيز ترجمه سيله گوستردي كي، قابلييتلي بير ترجمه‌چي‌دير. او مختلف فورمالاردا شعرلر يازير. «آذرپويا» شيرازلي خواجه حافظ ين غزللريندن آنا ديليمزه ائتديگي ترجمه‌لري ايله كوستريركي، چتين ايشلرين عهده‌سيندن گله‌بيله‌نلردندير او يئني‌ليكلر عاشقي‌دير. اؤزو ياراتديقي اسلوبلا ترجمه اثرلرينه بارزليك وئرير، خصوصي بير سيما وئرير. يئني باخيشلارلا كلاسيك ادبيات خزينه‌سيندن ائتديگي ترجمه‌لره گؤره تقديره لايق ايشلر گؤره‌ن «آذرپويا»نين ترجمه‌چي‌ليك اقتداريني، تقديمات كيمي حاضيرلاديقيم بو آز حجملي مقاله‌ايله گؤسترمك نيتينده اولماد يغيمي قاباقدان دئملي ايديم.
اونون ترجمه‌لري باره‌سينده اطرافلي بحثلر آرايا چيخارتماق اولار. ياراديجيليغينين آغير حيصه‌سيني غزل ژانري احاطه ائدير. چاغداشليغين تام معناسيندا ايره‌ليله‌ينلريميزدندير. اقتدارلي ترجمه‌چي شاعيريميزه جان ساغليغي آرزولاياراق ادبيات اوغروندا استقامتلي آدديملاري‌نين آرزوسيندايام. آذرپويا جنابلاري‌نين اثرلريندن اورنكلره، يئنه بيرليكده مراجعه ائده‌ك.
دشمن كلمه‌سيني باشادوشمورم
آيريليق آتينامينديرير مني
ازه‌لي دوستلاريم؛انسان و تورپاق
محبت گؤلونده چيمديريرمني
آيريليق، اؤزگه‌ليك، نفرتله يادام
آيين‌ليق، شايين‌ليق، عشق‌له شادام
جنتي بونلارا ساتيبدير آتام
بونلاردير هردن بير دينديرير مني
سنله بير گؤيلره قالخماق ايسته‌رم
گويلردن يئرلره باخماق ايسته‌رم
ايلديريملار كيمي شاخماق ايسته‌رم
ياغيش‌وار، تورپاغا ائنديرير مني
نوروز بايرامي
گؤزله ييرديم سني
باهارين بيراينجي گونونده
نوروز گونونده
قارا بولوت‌يوخ، بوگون‌ده
آغ بولودلار، بير - بيرينه سيخيلميشدي
دئديم سن‌گلركن، سينار بولودلار، آچيلارهاوا
گلمه‌دين، گؤز ياشلاريم قاينادي، بخار اولدو
قاريشدي دومانا ياغيش ياغدي اونداكي‌من
آنامينان گؤروشدوم، اؤپوشدوم، بيردفعه‌ده سن
گئچن يول آغ گئيندين آخي ياغيش قارا دؤندو
دئديم سن‌سئوردين آغ دونو، بلكه‌گلرسن
كولك اولدو، گؤزلر دولدو، گلمه‌دين
ايندي گؤزله‌ييرم سني
گله‌ن بايرامدا
ميثمي
1302
معاصر ادبيات تاريخيميزين يازيسيز قالان آغ واراقلاري، اونون يازيلي صحيفه‌لريندن نئچه قات آرتيقدير. چوخ سايدا اولان شاعير و ياراديجيلاريميز هله‌ده اؤز اثرلريني چاپا يئتيره بيلمه‌ديكلرينه داير، عموم كوتله آراسيندا تانينا بيلمه‌ميشلر. يئتميش بئش ايل اؤنجه محتشم تبريز شهرينده، اصيل بير تبريزلي عائيله سينده دنيايا گؤز آچان شاعيريميز اوستاد علي ميثمي فارس و تورك ديلينده اونودولماز اثرلر يارادان. قدرتلي شاعيرلريميزدندير. ياريم عصردن آرتيقدير كي هر ايكي ديلده گوجلو شعرلر يازير. شعرلري صنعت ذيروه‌لريندن قوپان رايحه‌لره بنزه‌يير. پوئتيك اثرلرين شاعيري‌دير. اؤز اثرلرينده هميشه ياشاما، توپلوما و بوتون بشرييت اوچون قايغي‌سيني گؤسته‌رير.
او حياتدا سئوه‌ـسئوه ياشايبدير، يانماق اوچون ياشايان بير حقيقي شاعير انساندير. اونون شعرلرينده اولان يانقي ايله اويانار ليقدان تؤره‌نن احساسلي مصراعلاردير. شعر حاقيندا كسگين نظر صاحبلريندندير.
شعرده تنقيده لايق اولابيلن بير نقطه هئچ واخت اونون ايتي باخيشلاريندان ياينماق امكاني تاپابيلمز. صلابتلي مصراعلاريندا ايسه اوخارلانميش ايتيليگي ياتيبدير. كلاسيك و سربست فورمالاردا و داها آرتيق غزل ژانريندا شعرلر يازان اوستاد ميثمي نين شعرلر توپلوسونون چاپ اولونماسي شككسيز اولاراق ادبيات خزينه ميزه يئني‌ليكلر آرتيراجاقدير. قيرخ آلتي ايل بوندان قاباق امپريالييزمين اوچونجو دنيا آدلانان ملت‌لره قارشي حربه ـ زوربالارينا و او زامان اوچونجو دُنيا ساواشي‌نين سكسكه سيندن آسيلي اولاراق يازديغي صُلح شعري واختيله ايران اؤلكه‌سينده اولان صُلح سئوه‌رلر طرفيندن آلقيشلارلا قارشيلانير، صُلح پرستشكارلاري طرفيندن يغينجاقلار و ميتينگ‌لرده صلح مارشي كيمي اوخونور. عادتاً حياتدا اولان شاعيرلرين حاقيندا سؤز گئده‌رسه، اونلارين سون شعرلريندن اورنگ اوچون اوخوجولارا تقديم ائده‌رلر، آنجاق الينيزده اولان تقديمات كيمي حاضيرلاديقيم مقاله‌ني يازديغيم چاغدا، يئنه امپرياليستلرين ميليتار قوه‌لري فارس كؤرفه‌زينه هوجوم چكميش كيمي آخينداديرلار. او قارا قوه‌لر اؤزلري قوندارديقلاري «عراق بحراني» ني بهانه ائله‌ميش، فاغير عراق جاماعاتيني داها دا قره گونلره چؤكدورمگه گليرلر. گؤرونوركي امپرياليستلر طرفيندن، ايندي ده صُلح مسئله‌سي تهلكه‌لر آلتيندادير. ايسته‌رديم يئنه اوستاد «ميثمي»نين قيرخ آلتي ايل اؤنجه يازديقي صُلح شعرينين بيرده او خوجوسو اولاق. اونون ساير اثرلري ده بئله دير. هاچان اوخوماق ايسته‌سن تاپ-تازادير. اونون اوره‌يينده بير ياشيل باهار هميشه گؤيرمكده‌دير. اوستاد شاعريميزين آرزي چيچكلري سولماسين دئيه، انسان سئور شاعريميز اوستاد ميثمي حضرتلرينه شانلي عومور سعادتلي گونلر آرزولاييرام. قوي دنياميزدا باريش، دوستلوق، امن آمانليق حؤكوم سورسون. بيرداها اونون اثرلرينه مراجعت ائديريك.
صلحون نغمه‌سي
قوي آغ گؤيرچينلر اوچسون گؤيلرده
قوي صُلحه سس وئرسين ائللر هر يئرده
قوي حقّين اوزوندن آچيلسين پرده
چالينسين ائللرين شن ترانه‌سي
هيتلر مكتبيندن درس آلانلارين
ووروشما اودونو يانديرانلارين
اوغورسوز بايقوش تك بانليانلارين
بوتون اؤلكه لردن كسيلسين سسي
پارلاسين هر يئرده صُلحون اولكري
آچيلسين ائللرين آيدين سحري
قالماسين ظُلمتين، جهلين اثري
اوجالسين گؤيلره صُلحون نغمه‌سي
صُلحه سس وئريلسين بوتون جاهاندا
بئشيكلر بومبادان قالسين آماندا
قيزيل گوللر آچسين آذربايجاندا
بزه‌نسين امكدن حيات صحنه‌سي
سئوگيليمه...
من سنين عشقيني ائتديم اختيار
بوتون گوزه‌للرين حوسنو سنده وار
لاله‌تك قلبيمي ائدير داغدار
لاله‌يه بنره‌يه‌ن ياناغين سنين
سالدي مني مين آزارا گؤزلرين
قلبيمه چوخ ووردو يارا گؤزلرين
آغ گونومو ائتدي قارا گؤزلرين
سينه‌مي داغلادي فراقين سنين
وفالي عاشقم ائل‌بيلير،هامي
شعريم‌محبتدن آلير الهامي
قارانليق بورويه‌ر فيكير دونيامي
قلبيمده يانماسا چراغين‌سنين
وفالي عاشقيم ائللر عاشقي
حقيقتدن دئيه‌ن ديللر عاشقي
بير بولبولم قيزيل‌گوللرعاشقي
اوچوپ قونان يئريم بوداغين سنين
شرط‌لي عشق
من سني سئويره‌م نازلي دلبريم
گل‌سنده بوائلي بو وطني سئو
سون مني عشقينده امتحانا چك
دوزگون عاشق اولسام، سنده مني سئو
سئوگيليم، عاشقم گول ياناغينا
شكر سؤزلرينه بال دوداغينا
قوي قدم شوقيلن آرزي باغينا
من بيرشيدا بلبل، سن چمني سئو
بوائلي بوديلي بو وطني سئو
من سني سئويره‌م، سنده‌مني سئو
ميانالي عليرضا
1335
باهار طراوتلي شاعيريميز ميانالي عليرضا قيرخ ايل بوندان قاباق ميانا شهرينده آنادان اولدو. او گنجليك ايللرينين ايلك چاغلاريندان شعريميزله ائله‌جه‌ده ادبياتيميزلا تانيش اولموش بير ياراديجي شاعردير.اون‌يئتدي ايل بوندان ايره‌لي، تبريز ده يارانان شاعيرلر و يازيچي‌لار جمعييتينده، ايلك دفعه گؤردوگوم ميانالي عليرضا، ائله او ايللردن بري سارسيلماز اراده ايله آنا ديليميز، شعريميز و نثريميزين انكشاف تاپماسينا، انتشار تاپماسينا جدّي تالاشلار گؤستره‌ن شاعيردير. چوخ سايدا كيتاب و مقاله‌لرين مؤليفي ميانالي عليرضا اينجه خياللي شاعيردير. ياشيدلاري آراسيندا، اؤز شعر فورماسيني هامي دان تئز يئيه‌له‌نيبدير. شعرصنعتينده هامي دان تئز فورمالانان عليرضا، بوگون ادبي ديليميزله دوزگون اسلوبدا شعرلر يازان شاعيرلريميزدندير. اونون شعرلرينده محبت موضوعسو، وطن عشقي و انسان سئوه‌رليك ساير مؤضوعلاردان آرتيق يئر توتور. اونون شعرلريني اوخوياركن بير انسان تفكرونده اولان اينجه ليكلره ال آپارا بيليريك. او اينجه ليك‌لر و سئوگي‌لرله يوغرولموش تالاشلار شاعيري‌دير. اونون يارادجيليق يولو (آذربايجان شعرينده) اؤز حياتي دؤرونده زيروه‌يه قالخيب، ذيروه‌له‌شه جك ادبياتيميزين كؤكسونده ايزي ايتمه‌ز يوللاردان اولاجاقدير. ميانالي عليرضا محتوالي شعرلر يازماقلا بيرگه، بير شعر تفسيرچي سي كيمي‌ده تانينير. اونون ادبي باخيشلاري هميشه اهميتلي و قيمتلي اولوبدور. شعريميزين كلاسيك و سربست فورمالاريندا، ائله‌جه‌ده مدرن شعر ساحه‌سينده اؤز اقتداريني اوخوجولارينا آيدينلاشديران «ميانالي عليرضا» اوچون بير قلمداش كيمي هميشه اوغورلو يوللار، نائيليترلرله دولو اولان اوزون عومور ديله‌ييرم. ايسته‌رديم شعر دنياميزين ذيروه يوللاريندا اولان شاعيريميزين «يوللار» شعريني وسايرشعرلريندن اؤرنكلر اوخوياق. اونون شعرلري هميشه تازا و گؤزه‌لدير.
..................
يوللار، يوللار، يوللار،
فيكير ايشله ديكجه، گؤزايشله ديكجه
نه قده‌ر گئديرسن، قور تارمير اونلار
يول واركي انساني ساپاند داشي تك
اوجا ذيروه‌لردن دره‌يه توللار
يول دا وار، انساني درين دره‌دن
سعادت قوشوتك ذيروه‌يه يوللار
يوللار، يوللار، يوللار
انسان وار اليندن، دوشونجه سيندن
يول آللار،
يارانار
ياشايار اونلار...؟
اوخوياندا بولبوللر،
سن ياديما دوشور سن
چيچك آچاندا گوللر
سن ياديما دوشور سن
باهاريم سن، يازيم سن؛
گولمه‌ره‌م سن گولمه‌سن
سن سيز هرآن بيليرسن
سن ياديما دوشور سن
قيزلار ساچين هؤره‌نده
اوغلان ساليركمنده
من‌اونلاري گؤره‌نده
سن ياديما دوشور سن
قويما قالام يازي ته‌ك؛
ياشايام تامارزي ته‌ك
ايكي همدمي گؤرجه‌ك
سن ياديما دوشورسن
بيرچيخيش يولونون تامارزي‌سي‌يام؛
هاچاندير يول چكير اوره‌ييم، گؤزوم
داها توكنيبدير دير دؤزوموم منيم؛
چوخداندير گزيره‌م دؤزومه دؤزوم
گيلئي - گوزار يئري هئچ يوخدور منه؛
اؤزوم ائيله‌ميشم، نه ائيله‌ميشه‌م
هه‌رده‌ن سوروشورام اؤزومدن - اؤزوم
گوناهيم نه‌اولوب، من‌نئيله ميشه‌م؟!
هيچ نه‌گئتمير آخي اؤز قايداسيلا؛
هارداسا عيب‌وار، نقصان‌وار يقين
هامي باش قاچيرير ائله‌ديييندن؛
بيري‌من
عيبيمين تاپميرام بيرين
بئله‌گئتسه هه‌له به‌ته‌رلشه‌جك؛
دوشه‌جك بيرداها دويونه - دويون
دئييره‌م:
ايندي كي بئله گليبدير
اوره‌ييم، سن بير آز گوناهلا اؤيون
گوناهين وارديسا چيخيش يولو وار
يوخسا نه آختاريب، نه‌يي گزيرم
گوناهكارام بلي،
گوناهكارام من
تسليم‌واردي كي بئله دؤزورم
سن ده گل اوخوجوم، قينامامني؛
سن ده‌گوناهكارسان، والله گوناهكار
آلساق بوينوموزا نقصانيميزي
دونياني دوز يولا قايتارماق اولار
يوخسا نه آختاريب، نه‌يي گزيريك؟...
ائله اولسا بير آز اميد يئري‌وار.
سن مني، من سني قيناماياق چوخ!
سنده گوناهكار سان،
منده گوناهكار
جمشيد شيباني
1306
«داوا آپاردي نئيليم
قلبيم قوپاردي نئيليم
اوغول-اوغول دئمكدن
ديليم قاباردي نئيليم»
(ائل)
يوخاريدا گلن يئدي هيجالي ميصراعلاري، بيراينجي دفعه اولاراق ائشيدديگيمدن اون دؤرد ايل كئچير. گؤزونون ايلك اوونو عراق - ايران ساواشيندا شهيد وئرميش بير آنا، قيد ائتديگيم باياتي‌ني، هله خام تورپاغي ياپريق‌ميان بير مزارين اوستونه سريلديكده، اوره‌ك آغريديجي اينيلتي‌لرله آغي دئييب سيزلاييردي. ايگيد اوغولونون عزاسيندا، بو احساسلارلا دولو اولان مصراعلاري آغي‌لايان او قاراداغلي آنا، مزارليغا توپلاشانلارين سوموكلريني گيزيلدتدي.
ساچلارينا دن دوشمه‌يه‌ن او آنا، تيتره‌ك سس‌له، دوداقلاريندا سون مصراع نين، سون هيجاسيني دوداقلاييب قورتار ماميشديركي، گلنلرين گوزلريندن قور اله‌ندي، كؤكسولرينده اوجاق چاتيلدي، مزار باشينا يغيلانلار آلوولو بولوتلار كيمي گورولتولو آغلاشديلار. همين مصراعلاردا اولان احساسلار اونلاري چاخناشديردي، ده‌يينديردي.
او گوندن بري باياتي‌يا اولان سئوگيم داهادا چوخالدي. حقيقتاً شعريميزين آنا فورماسي اولان باياتي يا احتراميم بير داها آرتدي. باياتيلارا ديقت يئتيرسه‌ك، اونلارين اجتماعي حياتيميزدا تجروبه اولونموش حاللاردان تؤرنديگيني باشا دوشه بيله‌ريك. باياتي‌لار بيزيم حيات لوحه‌لريميز، ياشايش منظومه‌لريميزديرلر. اؤز ياراديجيليق ايللرينده آرديجيل اولاراق باياتي يازان شاعرلريميزين سايي، هميشه آز اولوبدور. اؤتن ايللر عرضينده تبريزده نشر اولان روزنامه‌لرده بير باياتي شاعيري‌نين آدي‌ايله تئزـتئز راستلاشيريق. او احساسلاريني باياتيلاري ايله بيزه چاتديران، درين دوشونجه‌لي، پاك احساسلي و حقيقتاً شاعير اوره‌كلي، «جمشيد شيباني» دير.
يئتميش ايل بوندان ايره‌لي تبريز شهري‌نين ضيالي، مدني و اصيل بير عائله‌سي اولان «شيباني» عائله‌سينده دونيايا گؤز آچدي. تبريزين مشهور راستا كوچه‌سي‌نين «ملا احمد مسئله‌دان»
در بندينده ايشيقلي دونيايا گوز آچان جمشيد شيباني‌نين آتاسي مهدي شيباني، او ايللر تبريز شهرنين «مدارس نوين» آدلانان مدرسه‌لري‌نين باش مديري و مؤسسلريندن اولوبدور. آتاسي مرحوم «مهدي شيباني»معارف ادره‌سي‌نين خدمتينده اولدوغونا، ساير شهرلرده ده ياشاييبدير. قارداشي «فرهاد شيباني» ايسه چاغداش دؤروموزده يئني شعرلر اسلوبوايله گؤزه‌ل اثرلر يازيبدير. «جمشيد شيباني» اؤز باياتيلاري ايله پوئتيك دوشونجه‌لريني، اوخوجولارينا چاتديرا بيليبدير. آنجاق دئمك اولاركي بو رومانتيزمين و ليريزمين قايناغي شاعيرين حياتيندا اوز وئرميش حادثه‌لردن آسيلي اولور. خرمشهرين آزاد ائديلمه‌سينده، 1361 اينجي گونش ايلي (خرمشهر آزاد اولان گون) قهرمان اوغلو شهيد «خسرو شيباني»ني شهيد وئره‌ندن سونرا، اونون اوره‌ينده هميشه‌ليك يانارليقدا اولان بير اوجاق آلوولانير.
يانيقلي احساسلارين اوجاغي اولان بير اوره‌ك او گوندن بري داها دا آرتيق آليشير، سؤنولمز اولور. عومرونون چوخ ياري‌سيني باشا ووردوقدان سونرا، ايگيد اوغلونو دؤيوش ميدانيندا شهيد وئرير، داهادا باياتي يازماق اونون بويونا بيچيلير. دئمك، باياتي‌دا اولان يانقي «جمشيد شيباني»ني تاپير. اونون چاخماغي او حادثه‌دن سونرا، چاخيلير. او اؤز جوانليق‌ايللرينده ساير شعر قاليبلريميزده تجربه‌لر، ائديرميش‌سه‌ده آنجاق باياتي اونون اساس ياراديجيليق چرچيوه‌سيني تشكيل ائدير.
بيز اونو بير احساسلي باياتي شاعيري كيمي تانييريق. او چاغداش دؤروموزون ده‌گرلي باياتيلاريني يازماقلا، ادبياتيميز اوغروندا اؤز بورجونو اؤده‌يه بيليبدير. او اوره‌گي سئوگي‌لرله دولو انسان سئوه‌ر بير شاعيردير. صميمي انسان، زحمت‌كش آدامدير. «جمشيد شيباني» حضرتلرينه اوزون عومور ديله‌ييره‌م. اوره‌گي سئوگي‌سيز، الي قلم‌سيز اولماسين،باياتيلاريندان اوخوياق.
شهادت تويون اولدو
روزگار اويون اولدو
منيم يارالي سينه‌م
غمله قول بويون اولدو
* * *
«خسرو»آ، گؤزلر آغلار
كؤزه‌رميش كؤزلر آغلار
ائوي ييخيلان جانيم
اؤلونجه گؤزلر آغلار
* * *
داغلار، داغلار، آ داغلار
بولوددان اوجا داغلار
اونودولماز درديمه
تانيش آغلار، ياد آغلار
گؤرورسن آلاداغي
آليبدير لالا داغي
داغ-داشي چاپماق اولار
چاپيلماز بالا داغي
گئديرم گؤي چيمنه
گوي ده‌ريب گويچو منه
گؤزونون ياشين تؤكور
آغ بولود، گؤي چيمنه
گؤره‌سن هاچان گلر
گؤنلومو آچان گلر
بولاق اوسته‌ن ائوميزه
گؤزومدن قاچان گلر
تؤكولون هايا گلين
چيمنه-چاياگلين
يارسودا آيا باخير
آي باخير، آياگلين
رشادتي
1325
قره‌داغ ماحالي‌نين مركزي ساييلان اهر شهرينده اللي‌اوچ ايل قاباق دونيايا گله‌ن «باقر رشادتي»ايللرديرگي تبريزده ياييلان درگي‌لر و نشريه‌لر واسطه‌سيله، قيسا ميصراعلي و آز حجملي شعرلري ايله چيخيش ائدير. قره‌داغ شعرينين ريتميك و اويناق خصوصيتيندن اوزاقلاشيب. داهادا مُدرن شعر چرچيوه‌لرينه سيغماق ايسته‌يه‌ن رشادتي اؤتن اون ايل عرضينده فعال شاعيرلريميزدندير. اونون اؤزونه، خاصّ بير فورماسي وار. اؤزو اولماق ايسته يير (فورمادا)، آنجاق درين دوشونجه‌لريني ائله او قيساجا و آز حجملي شعرلرينده اوخوجوسونا چاتديرير. ايستي قانلي پاك اوره‌كلي انسان سئوه‌ر، يوردسئوه‌ر بير شاعيردير. اونون قوشما، باياتي، گرايلي، دوردلوك فورمالاريندا شعرلري وارسا، داها آرتيق آغ شعرلر يازير. تبريزـتهران‌ـزنجان شهرلرينده ياييلان نشريياتميزدا اونون فولكولوروموزا عايد توپلاديقي موضوعلاري‌نين اوخوجوسو اولموشوق. چاپا حاضيرلاديقي شعرلر توپلوسو واردير. اؤز شعرلري اوچون ياراتديقي سيما «رشادتي» ني اديبلر آراسيندا تانيتديرير. قلمي ايلهاملي. يولو اوغورلو اولسون، شعرلريندن نمونه اولاراق تقديم ائديريك.
باهارپايي...
بير اورمان سولغونلوق
- پاييز نشاني
بورويوب عومرومون
ياز گؤرونجه‌گين
قوپوزلو آغ آتلي
گئجيكيب سه‌ده
سازي نين سسيني
ائشيديره‌م من!
تله‌سين - تله‌سين
خبر وئره‌ره‌ك
باهاري ائليمه
پاي گتيره‌جه‌م.
سنلي اولسون
فلك چرخي فيرلاناجاق،
سن اولساندا، اولماساندا
چاليش گيلن:
ياشاييشي چيچك لندير،
انسانليغي يوكسك لندير
دولانيشلار،
سنسيزكي يوخ
سنلي اولسون
بيرگون اگرسن اولماسان،
زامان دورسون،
ساغروقورسون!
اؤتن‌لر قارا
دئو ايدي گؤزده!
بوگونلر هرتازا تاپينتي
بشرژنين‌ده
خيال ديكسينتي سي
تؤره‌دير بيزده!
ظنيمجه،
بوساياق كئچرسه‌حيات
ياشيلليق آرزوسو
دؤنه‌جك داشا
ده‌يه جك باشا!
صاباحلاراقاپي
حسنونون ايشيغي تك
اؤره‌ييم‌له بيله‌ييم‌له،
ديله‌ييم‌له
هيم‌لشميشم، بيرلشميشم
بودنيادا قارانليغي هرنه وارسا ايشيقلادام
صاباحلارا،
قاپي آچام.
بختيار نصرت
1313
اينجه خياللي، شيرين دويغولو شاعريميز «بختيار نصرت» آذربايجانيميزين سراب بؤلگه‌سينده ياشيل ياماجلي، سرين قوزئيلي «بافتان» كندينده بير اكينچي عائله‌سينده ايشيقلي دنياميزا گؤز آچيبدير. ائل - اوباميزين قايغي‌سيندا اولان اوره‌گي ته‌په‌رلي شاعريميز «بخيار نصرت» ايندي عومرونون آلتميش دؤرد اينجي باهاريني ياشايير. تهراندا ساكن اولموش و ماهر ايشچي مقاميندا تقاعد ايللريني سورمكده‌دير. ايلك ياراديجيليق ايللرينده يازيب توپلاديغي «قيزيل قان» آدلي‌كيتابيني اون‌آلتي ايل اؤنجه چاپا يئتيرميشدير. داها سونرالار يازديغي شعرلري ايلك شعر مجموعه‌سيندن فرقلي‌دير. وطن سئوه‌ر و هومانيست روحلو شاعير بابادير. داها آرتيق سمبوليك شعرلر يازان «بختيار نصرت» اؤز شعرلرينده محيطين‌ين گؤزهلليكلريني، عيبجرليك‌لريني قلمه آلير. اونون ليريك اثرلريني اوخوياندا هميشه سئودالي بير اوره‌گين حرارتيني مصراعلاردا حيس ائده بيليريك. شعرديلي سليس و آخيجي دير. مختلف فورمالارين شاعيري دير. او هميشه خيالين يوموشاق و ايلهاملي قانادلاري ايله انسان عومرونده اولان ائنيشلي ـ يوخوشلو يوللاري، شعرلرينده عكس‌ائتديرير. حياتا بير شاعيركيمي باخير. اونو سئوير، اونا آجيلانير. حؤرمتلي «بختيار نصرت» اوچون اوغورلو عؤمور، ايستي اوره‌ك، شيرين چاغلار آرزوسيندايام. اونون ايپك دويغولاريندان سوزولوب كؤيره‌ك ميصراعلارا چئوريلن شعرلريندن بيرنئچه سيني بيرليكده اوخوياق.
شبنمين تئللرينده!
باهار يوخوسو گؤروردوم،
بو گئچن گئچه
اولدوزلار آليشيردي
شبنمين تئللرينده
من‌ايسه
قناري ديليجه دانيشيرديم
باهار يوخوسو گؤروردوم
بوگئچن گئجه
شلاله برج‌نين آلتيندا
چوبان قوشو،
اوخويور
گؤي قورشاغينين آلتيندا
سحر نامازيمي اوخويوردوم
وطنيم
وطنيم،
اؤنده دايانيب دوغما بير اره‌ن
آلنيندا قيريش
كوره‌يينده
شله
ندنسه
كوسگوندور قيزقين اوره‌گين
نه‌اوچون؟
افوقلرين گولمز!
اولدوزلارين يانماز
اولمييا كؤهله‌ن آتلارين‌بودره ييب
قارتاللارين زنجيرده دير
وطنيم
هر سحر يوخودان دوراندا
سني تاپيرام
ديزلريمين قووه سينده
اورگيمين آغريسندا
آغاران ساچلاريمدا
آغاران ساچلاريمدا.
هله
باهار هله يول اوسته‌دير
سس اوجالير دره‌لردن
باشين ايير ياشيل بوداق
بيزيم ائوه پنجره‌دن
گونه‌باخان ديوار اوستن
قونشوموزا دؤنوب باخير
سارماشيغين داماريندان
شقايقين نورو آخير
گوچينلر اويغودايكن
شنليك قورور ايوانيميز
بؤيله چيچك ايندييه‌دك
آچماميشدير ايوانيميز
آي شافاقي چكيلمه‌دن
باغچاميزين ياناقيندان
دان اولدوزو سلاملايير
نيلوفرين بوداقيندان
شبنم گزير يارپاق اوسته
او افسونلو گؤزلر كيمي
غنچه يارير دوداقلارين
كؤكسومده‌كي سؤزلر كيمي
شكيبي
1334
تبريزده ياشايان عاشيقلاريميز، ساز و سؤز اوستاسي اولان «يداله شكيبي» ني ياخشي تانييرلار. او بير ايفاچي شاعير عاشيق دير، گؤزل ساز باغلايير. قره‌داغ ماحالي‌نين كليبر منطقه‌سيندن اولان «شوخانا» كندينده 1334 ينجي گونش ايلي آنادان اولوب. او ساده خالق ديلينده يازديغي شعرلرينده اؤلكه‌نين و دوغولدوغو ولايتين گؤزه‌لليكلريندن سؤز آچير. اوره‌گي ائل اوچون، چيرپينان بير شاعيردير. كلاسيك عاشيقلاريميزين، قديم ادبياتيميزدا سون نسيللره قويوب گئتديكلري قاليب‌لرين عموميتينده گؤزل قوشمالار ياراديبدير. عاشيق پوئزياسي‌نين ايستگينه اويغون اولان موضوعلاردان و مضمونلاردان فايدالانيب. معاصر بير شاعير عاشيقين يارادا بيلديگي شعرلرين شاعيري دير.
او، شعرلرينده انسانلاري دوستلوغا، قارداشليغا و محبت يوللارينا چاغيرير. اونون سايره‌لرله دئييشمه‌لري قديم دؤورلردن بري عاشيقلاريميز آراسيندا سيناق ميداني كيمي گؤرونن هنر زيروه‌سينه قالخان بير ايزدير. دئمك هر يئتن دئيشمه‌لردن ياخا قورتارا بيلمز.
آنجاق شكيبي‌نين قوشمالار، گرايلي‌لار و مخمس‌لرينين دينله‌ييجي‌سي اولموشوق. سازينين پرده‌لرينده شادليقلار گولله‌نسين، عومرو اوزون، يوللاري اوغورلو اولسون.
قالا - قالا
نانجيبه كؤنول وئرمه
سالار سني قالا - قالا
مرد اودونا اوره‌گيني
چاليش‌كي هي قالا - قالا
مرد دونيادا شهرت آليب
دؤيوشلرده توفان ساليب
مرد كيشي‌دن نشان قاليب
«كليبر» ده قالا - قالا
«شكيبي» نين حق نداسي
ائله چاتار سر صداسي
تولكو اولماز شير بالاسي
دنيادا يوز قالا - قالا
ازليندن يار درديني يار چكر
گل سنه اؤيره‌نيب آي اوزوم - اوزوم
گلسه‌نم ازل كي پاك عشقيميزين
يولوندا جانيمي آي اوزوم - اوزوم
پرپر اولدوگو للريميز، نه‌يازدي
آيريليقدان يار مكتوبا، نه‌يازدي
مژگان اوخون باغريم باشين، نه‌يازدي
ايستيرسن اليمي داي اوزوم - اوزوم
گؤز ياشيمدان بئزيكيبد ير دريادا
قيما گيله‌ن باخ آچيليسن در، يادا
غرق اولموشام عشق آديندا دريادا
يئتيش امداديما داي اوزوم - اوزوم
ميسكين «شكيبي» يم ساغالار درديم
درد بيلمز جانانين جانينا درديم
يازدا، باغ بسله ديم پاييزدا درديم
گل سنه ساخلاديم پاي اوزوم - اوزوم
سؤنمز
1307
يئتميش ايل بوندان ايره‌لي، وطن گؤيلريني قارا بولودلار چولغالاديغي بير حالدا محتشم تبريز شهرينده دونيايا گله‌ن «كريم مشروطه‌چي» او گونلرين آغريلي - آجيلي اولدوغونا گؤره، كؤيره‌ك اوره‌كلي شاعرلريميزدن اولدو. او ايندي مقدس تورپاغيميز آذربايجانين، احتراملارا لايق شاعيرلريندندير. «سؤنمز» تخلوص ائدير. اونون اثرلرينده، بشري دوشونجه‌لر و اينساني آرزولاري بوتون مصراعلاردا تاپماق ممكن اولار.
احساسلي شاعيريميز «سؤنمز» اؤز بركتلي ياراديجيليق ايللرينده گنج شاعيرلريميز اوچون ايلهاملي اثرلرين مؤليفي اولوبدور. بيز اونون اثرلري ايله آنا ديليميزده چاپ اولان نشريه‌لر و مجموعه‌لر واسطه‌سيله تانيش اولموشوق. «سؤنمز» ين، «آغير ايللر»، «عيسانين سون شامي، شئح مونجوغو» و «آمان داغلار» آدلي شعر مجموعه‌لري اينديه‌دك چاپ اولوب و استقباللارلا قارشيلانيبدير. اوستاد «شهريار»ين «حيدربابا يا سلام» اثريني آنا ديليميزدن فارس ديلينه ترجمه ائتميش «سونمز» هر ايكي ديلده مهارت و باجار يغيني اوخوجولارينا گؤسته‌ره بيليبدير.
او، گولر اوزلو، پاك قلبلي، تميز وجدانلي شاعير دير. شعريميزين بوتون قاليبلرينده، خصوصيله، جناس شعرلر فورماسيندا ادبياتچيلاريميز آراسيندا لايقلي آد قازانميش بير شاعير دير. سؤنمز ياراديجيليغي رنگارنگ‌دير، چئشيدلي‌دير. حياتدا اولان چتينليكلره، اوغورلارا، اوغورسوزلوقلارا داير موضوعلار اونون مضمونلو شعرلريني تشكيل ائدير. بيز اونون اثرلريني اوخوياندا شاعيرين فيكير دونياسيلا راضيلاشا بيليريك، اونون خيال، دويغو و دوشونجه‌لرينده انسانا و حياتا اولان قايغي اوچون، «سؤنمز» شعريني بير داها دا آرتيق سئويريك. باجاريقلي شاعريميز ايستكلي «سؤنمز»ين احساسلي اثرلرينين اوخوجوسو كيمي اونا عومور و ياراديجيليق يوللاريندا، اوغورلار ديله‌ييره‌م. قوي اونون ايلهاملي قلميندن آلديغيميز پايلاري اوخوجولارلا بيرگه بؤلوشه‌ك، هره اؤز پاييني آلسين.
، شاعر
شاعر دئديگين آخماسا آل قان اوره گيندن
بير گول دره بيلمز، او گولوستان اوره‌گيندن
قان اولماسا كؤنلو گئجه‌لر قانلي شفق‌تك
البته آچيلماز سحري دان اوره گيندن
بيرذره چراغديركي يانار هرگئجه كوندوز
سورسان كي‌تؤكر ياغ اونا هاردان؟ اوره‌گيندن
توفاندا پناهسيزلار اوچون يئلكن آچانماز
هر دم‌كي اونون قوپماسا توفان اوره گيندن
ميليون گوله قونمازسا چاليشقان آري‌لار تك
شهدين داديزانماز بيزه، شان - شان اوره گيندن
گؤزلر ايچينده
يوزگؤز اولا، سن باخاسان يوزلر ايچينده
شهلا گؤزون، آي قيز! سئچيلير گؤزلر ايچينده
دولموش اوخومار گؤزلري سانديم‌كي، سحرده
شبنم‌دي، پاريلدار تزه نرگيزلر ايچينده
او گول اوزه تمثيل اوچون اولدوز دئسم، آزدير
اون‌د ؤ رد گئجه‌ليك آي‌دير اوزون، اوزلر ايچينده
پروانه‌دن اؤيره‌ن كي نئجه شمعه قووشد و
پاك عشق حلالدير، دئمه‌لي، بيزلر ايچينده
درياده اوزورسن يولونو ايزله‌يه بيلسم
آنجاق يازيلاركن ، پوزولان ايزلر ايچينده
ال قويدو حكيم قلبيمين ا وسته ائله بيلديم
ارسين‌دي، گزير بوآليشان كؤزلر ايچينده
مين حوسنونه حئيفيم گلير او اگري قاشينلا
بير اگري، خطادير، گزه‌مين دوزلر ايچينده
بير سؤزدي محبت سؤزو، عالم ده وطن تك
يوخ باشقا گؤزه‌ل سؤز بوقده‌ر سؤزلر ايچينده
وجدانيني كيم گؤزله‌سه اؤز ياخشي گونونده
وجدان‌دا، يامان‌گونده اونو گؤزلر ايچينده
هرگون‌كي سنيله گئچيره‌رعومرونو «سؤنمز»
بيرعومره برابردير، او، گوندوزلر ايچينده
سحر خانم
1331
ادبيات تاريخيميزده شعريميزين بايراقدارلاريندان اولان قادين شاعرلريميزين سايي آزدا اولمايبدير. او جمله‌دن، مهستي گنجوي، خورشيد خانيم ناتوان، حيران خانيم، پروين اعتصامي و ... چاغداش ايللريميزده ايسه، مدينه خانيم گلگون، حكيمه بلوري و «سحر» خانيمدان آد آپارمالييق.
مقاله‌ميزي اؤز ياراديجيليغينا حصر ائدن «سيده حميده رئيس زاده» (سحر) خانيم اردبيل شهرينده آنادان اولموش و او شهرده بويا ـ باشا چاتميشدير. ايندي ايسه اوزون ايللرديركي تهراندا ياشايير. عومرونون قيرخ آلتينجي باهاريني سورمكده دير. شعر و صنعت باغينين عاشيقلريندن اولان عارف شاعره‌ميز «سحر» خانيم شعر دونياميزدا يوكسك پيلله‌ده يئر توتان بير شاعيره‌دير. او خالقميزين مختلف طيف‌لريني اؤز اوخوجو گروپونا چئويره بيلميشدير. بو اؤزو، بير شاعير اوچون داهادا بؤيوك اوغوردور.
بئله اولدوقدا، شاعير اوخوجو كوتله‌سي‌نين سورغو و ايستكلرينه شعر ديلي ايله جوابده اولدوغونو و باجاريغيني بيلديرير. منه ائله گليركي بؤيوك آذربايجانيميزين ادبيات گؤيلرينده ايكي پارلاق اولدوز هله‌ده اوره‌كلري اوخشايير، هله‌ده اورهكلره حرارت، باخيشلارا نور چيله‌يير. اونلار محتشم تبريز شهري‌نين شاعير قيزي «پروين اعتصامي» و اردبيل شهري‌نين عظمتلي شاعره قيزي «سحر» خانيم دير. آدلاريني ياناشي چكديگيم شاعيره‌لرين هر ايكي‌سي اؤز استعدادلارينين نتيجه سينده ادبيات تاريخيميزده اوزون عومور سوره جكلر. جرعتله دئمك اولاركي، اونودولماز شاعيرلريمزدن اولاجاقلار. قادين شاعيرلريميزدن سؤز گئديرسه، دئمه‌لي‌يم كي، يئني شعرلري ايله اؤتن ايكي ايل عرضينده ادبيات عالمينه قوشولان خياولي شاعيره «نگار خياوي» دا بؤيوك اوغورلارلا ايره‌ليله‌يشده‌دير.
آنجاق سؤز مُحتشم شاعيره‌ميز سحر خانيمدان گئدير. او ايلك فورمالاشما دؤورونو «ماويلر» آدلي يايديغي شعر كيتابيندا گؤسته‌ردي، سونرا انكشافيني و اقتداريني «ياشيل ماهني» و «آيلي باخيش» آدلانان شعر كيتابلاريندا اوخوجولارينا گؤستره بيلدي. اديب شاعيره‌ميز مين‌اوچ‌يوز يتميش‌آلتينجي گونش‌ايلي‌نين سون گونلرينده كلاسيك ادبياتيميزين قدرتلي شاعيري «قوسي تبريزي»نين شعر ديواني‌ني تدوين و تصحيح ائتميش و چاپدان بوراخميشدير.
او هميشه اوخوجولاري طرفيندن بير موفق شاعير كيمي آلقيشلانيبدير. شاعيره‌ميز «سحر» خانيم چاپا يئتيرديگي سونونجو شعر كيتابيندا «آيلي باخيش» عرفان شعرينين جذه‌به‌لرينه ايليمشميش كيمي، همان دايره‌ده وسعتيني گنيشلنديرميشدير. او هميشه اوغورلو شعر ديلي ايله تصويرلر، تشبيهلر و قاليبلرده موفق بير شاعير كيمي چيخيش ائدير.
«سحر» خانيم حاقيندا، اطرافلي باخيشلارين گره‌كلي اولدوغونو باشا دوشه‌ركن بو آز حجملي مقاله‌يه سيغماز اولان بحثيني، باشقا آرخاينيليقلاردا آچا بيله‌ريك دئييه، اوغورلار شاعيري اولان شاعيره‌ميز «سحر» خانيم اوچون ساغلامليق و باشاريلار ديله‌ييرم. يولو اوغورلو اولسون، گله‌جگي آيدين.
گل عشقه اوياق، قوي بيزه ديوانه دئسينلر
ظلمت ديله‌ينلر، گونه بيگانه دئسينلر
آچ قوللاريني آل مني نيسگيل بوداغيندان
قوي‌قوينووا، قوي قوينون ايچين لانه دئسينلر
سئودالره سيغماز باشيمي آل دؤشون اوسته
گلمكده بوكافرقيزي ايمانه دئسينلر
ال‌سال ساچيما، دويغو دواميله تومارلا
ايلقار يوواسي جمع پريشانه دئسينلر
كئفلن گؤزومون عشقه اوزالميش باخيشيندان
قوي گؤزلريمه خلق آرا ميخانه دئسينلر
ديلدن - ديله سال گيزلي باخيشلارداكي شوقي
ائلدن - ائله قوي سريمي‌دستانه‌دئسينلر
سيغماز ديلگين يئلكني يئللرده، قاناد چال
قوي دوشدو باشي عشقده طوفانه دئسينلر
دالماقدادي دالغالاري باعزيما گل قوي
چكدي سحري عشق الي بيريانه دئسينلر
دؤنرگه
منيم سؤزلريمده سئويم
سنين اللرينده اينام
اونون گؤزلرينده
انكار پرده‌لري
اومنيم گئچميشيم
سن‌منيم سونرام
بارز
1298
هميشه اقتدارلي شاعيرلر بئشيگي اولان قارا داغيميزين سئويملي شاعيرلريندن بيري ده اوستاد «بارز» دير. ياريم عصردن آرتيقديركي، آنا ديليميزده يوكسك سويّه‌لي شعرلر يازير. «بارز» تخلصو ايله احساسلي شعرلر يازان «عباس اسلامي» 1298 گونش ايلي قره‌داغ ماحالي‌نين مركزي اولان اهر شهري‌نين شمال سمتينده يئرلشن هوندور قاياليقلي «شيور» داغي‌نين اتكلرينده يئرلشن «آي پيرزان» كندينده بير روحاني عائله سينده دونيايا گؤز آچدي.
اوستاد شاعريميزين آتاسي مرحوم ميرزا جعفر شيخ‌الاسلام اؤز حياتي دورونده آچيق فيكيرلي بير روحاني ايميش. مشروطه انقلابي‌نين طرفداري اولان شيخ‌الالسلام، اؤز اوغلو عباسي تربيه ائديب، اونا آچيق فيكير، بيليك و جسارت درسي اؤيره دير. عباس بارز بركتلي عؤمرونون باشا - باشيني قره‌داغ ماحاليندا ياشايير، و ايندي ايسه دوغولدوغو كندده حياتيني سورمكده دير.
عباس بارز وطن سئوه‌ر و انسان پرور بير شاعيردير. لايقلي ائولادلار تربيه ائتميش و اوغلو «ساحل» احساسلي شاعيرلريميزدندير. قره داغ بؤلگه‌سي‌نين افتخارلي شاعيري اوستاد «عباس بارز» محتشم شهريارين «حيدربابا يا سلام» فولكولوريك منظوم اثرينه استقبال يازان ايلك شاعيردير.
«ائل داياغينا سلام» آدلانان همان كيتابدا بارزين دونيا گؤروشو، پاك احساسلاري، پوئتيك و مضمونلو ميصراعلاري، اونو عموم كوتله آراسيندا سئوديره بيلميشدير. او كلاسيك شعر قاليبلرينده ماهر بير رسام كيمي پوئتيك اثرلرين مؤليفي دير. شعرلرينده اؤلكه‌ميزين كوتله‌وي دوشونجه‌لرينه داهادا آرتيق يئر وئرن «بارز» ائليميزين، اوباميزين دردلري ايله تانيش بير شاعير دير.
«آموزش و پرورش» اداره‌سينده تقائد مقامينا چاتميش اولان قوجامان شاعيريميز «بارز» سئوگي‌لر شاعيري دير، محبت وورغونودور. او فارس ديلينده‌ده ماهرانه غزللر يازيبدير.
قره‌داغ شاعرلري‌نين اوغورلو شعر قاليبي اولان قوشما ژانري عباس بارزين اينجه خياليني اؤزونه سيغينديرا بيلن شعر فورمالاريميزداندير. آدي هميشه ادبي محفيللريميزده احتراملارلا چكيلن قدرتلي شاعيريميز «بارز» هميشه ذيروه‌ليكلري آغ جونالارا بورونموش، كؤكسو سيس دومانلي اولان «شيور» داغي‌نين سرت قايالاري كيمي سرت روحيه‌لي باريشمازليق استقامتينده گؤرونن شاعيردير. ائنيلمزليك، مبارزليك، اينام و جسارت اونون خالق ديلي ايله يازيلان منظوم اثرلرينين قاباريق خصوصيتي‌دير. شاعيرين ياشاديغي محيطي دؤوره‌ليين چوپور قاياليقلارين قاباريقليغي اونون عدالتسيزليگه، نادانليغا و رذالتلره معترض اولدوغونون سببكاري‌دير دئسك، انسان اطرافيندا اولان طبيعتين ائتديگي تأثيره اينانيريق. ثمره‌لي عومرونو شعرله، صنعتله سورن شاعيريميز اوستاد عباس بارز حضرتلرينه جان ساقليغي، اوزون عومور وشن حيات آرزولاياراق، اونون اثرلرينه مراجعتله سؤزه سون قويورام.
گئجه‌لر
تنگ اولور باشيما تك‌ليك ساري عالم گئجه‌لر
بير نفر اولمادي من‌لن اولا همدم گئجه‌لر
عشقه بيگانه اولانلار نه‌بيلير كيم نه‌چكير
چكمه‌سين من چكني اهل جهنم گئجه‌لر
بير منم، بير بو قلم، بيرده‌بو ويرانه كؤنول
اوچوموزده گليريك ناله‌يه باهم گئجه‌لر
كيمسه بيلمز اوره‌گيم سرريني دونيادا منيم
ياز قلم، دورماكي سنسن منه محرم گئجه‌لر
پرده‌لي قويدو سؤزون «بارز»ه فاش ائيله‌مه‌دي
سررلر اؤرتوگو، بوقورخولو مبهم گئجه‌لر.
خيال اولدوزو
زمان - زمان آدديم آتير هردن بير
خيال سماسيندا، خيال اولدوزو
بيلميرم فيرلانير هانسي مداردا
هالي اولدوزو تك او حال اولدوزو
مجهول تئوري تك قاليبا سيغمير
ييغلماز قويروغون اوزادير ييغمير
ضربه‌لر آلتيندا قالير، چيغيرمير
محال فرضيه‌نين محال اولدوزو
نه‌يه‌بنزه دير سن، بنزه مير اونا
دونوندان سايريلير اؤزگه بير دونا
وارليغين عومرو تك يئتيشمير سونا
افسون - افسانه نين فينال اولدوزو
اينجه تفكورون پارلاق آيناسي
بير دونداگؤسته رير توي ايله ياسي
فيزيك گيرناسيندا دارتان الماسي
قويماز ساچسين بيزه سئوال اولدوزو
قولاغيم سسده‌دير، گؤز انتظاردا
قالمادي آمانيم، نازلي نگاردا
قارانليق ائولره بيزيم دياردا
بس هاچان نور ساچار وصال اولدوزو
سالينماز كؤنلومو سال سايا بارز
گونش باجاسيندان باخ آيا بارز
هاچان كي توش گلدي تاي - تايا بارز
افقدن باش وئره‌ر كمال اولدوزو
آهني
1312
اوره‌ك اوخشايان آنا طبيعتين سئحر ائديجي گؤزل‌ليكلريني اؤزونده جمع‌لشديرن قره‌داغ بؤلگه‌سيني، مختليف ماحاللار تشكيل ائدير. او بؤلگه‌ني تشكيل ائدن اون سگيز ماحالين بيري‌ده «گرمه‌دوز» (گرمادوز) ماحالي‌دير. سؤز گئدن گرمه‌دوز ماحالي‌نين تانينميش شاعيرلريندن بيري‌ده «آلله‌وردي آهني»دير. «آهني» كلمه‌سيني اؤزونه شعر آدي گؤتورموش آغ ساققال شاعيريميز ائل آراسيندا درين حؤرمتلره ماليك بير انساندير. گرمه‌دوز ماحالي‌نين مشهور كندلريندن اولموش «موولان» اونون دوغولدوغو كندين آدي‌دير. او عومرونو باشدان-باشا همان كندده ياشاميش و ياشاماقدادير. اؤز ماحاليندامدريك آتا كيمي حؤرمت‌له‌نن «آهني»، يازديقي شعرلرينده اؤز ايستي قانلي‌ليغيني، اؤز عاطفه‌سيني آيدينجاسينا گؤسته‌ره بيلير، ساده خالق ديلينده شعرلر يازير. قره‌داغ شهرلري‌نين هئچ بيرينده اينديه‌ده‌ك هئچ‌بيرگونده‌ليگين و ادبي نشريه‌نين انتشار تاپماماسيناگؤره، بؤلگه‌نين اراضي‌سينده يازيب يارادان شاعيرلرين شعرلري يالنيز قره‌داغ عاشيقلاري‌نين وسيله‌سيله اورادا ياشايان جاماعات آراسيندا آيري‌قونشو بؤلگه‌لرده ياييلير و بو گئديش هله‌ده دوام ائدير. شاعير و ايفاچي عاشيقلاريميز تاريخ بويو ادبياتيميزي ائلدن-ائله، ماحالدان-ماحالا يايميش و اونون انكاشافيندا مهم رول اويناميشدير. «آهني»نين شعرلري كلاسيك قاليبلرده اولور، داها آرتيق قوشما، گرايلي و مخمسلري واردير. او اؤز شعرلرينده عادي كوتله‌نين، خصوصيله اؤز چوره‌سينده ياشايان انسانلارين ياشايش طرزيندن، ايستك و آرزولاريندان، حيات و معيشتلريندن سؤز آچير. اونون شعرلرينده شيرين ياشايشا و حياتا ديقت يئتيره‌ن بير اولوسال انسانين دونيا گؤروشونو تاپماق ممكن اولور.
عاشيقلاريميز طرفيندن اوستاد نامه كيمي قبول اولونوب، توي - دويونلرده و شنليك مراسملرينده اوخونان بير شعري، اونون شعرلرينده اولان جذبه‌نين نشانه‌سي‌دير. بيلديگيميز كيمي، اوستاد نامه‌لر، عاشق ادبياتي و شيفاهي خلق ادبياتيندا حيات درسليكلري كيمي اولان محتوالي منظوم اثرلره دئيريك. شعرلري اوستاد نامه كيمي قبول اولان شاعيرلريميز هميشه آز اولوب. «آهني» يه شيرين حيات، اوزون عؤمور ايلهاملي ايللر آرزولاييرام.
هئچزاد-هئچزاد
ده‌لي كؤنلوم ايچمه عشقين جاميني
بير زامان دئيه‌رسن داي هئچزاد-هئچزاد
گؤزده ايشيق قالماز، بدنده طاقت
آه چكيب دئيه‌رسن، واي هئچزاد - هئچزاد
عزيز شيرينجه‌لر دؤور - برينده
دانيشيب گوله‌رلر اؤز كئفلرينده
چاغيرسان هر بيري دورار يئرينده
وئرمزلر هايووا، هاي هئچزاد - هئچزاد
خزان اولار بولبوللرين يان گئچر
خياليندان غم گئچر - افغان گئچر
گونلر - آيلار قاباغيندان سان گئچر
بير گونو سايارسان، آي هئچزاد - هئچزاد
گؤرن دئييه‌ر جان - جان سنه جان اولماز
فايدا وئرمز خسته جانين جان اولماز
ورثه‌لر بؤلوشنده مان اولماز
هئج سنه وئرمزلر پاي، هئچزاد - هئچزاد
اولماسا گولشنده بير بولبول هئچزاد
چمن هئچزاد، چيچك هئچزاد، گول هئچزاد
آيري دوشه ائللرسندن بيل هئچزاد
وئرمزلر هايووا، هاي هئچزاد - هئچزاد
ياخشي يامان بو دنيادا گئدندي
گؤرموشم دنيادا چوخ دردمندي
«آهني» هئچ بيلنميرم ندندي
هامي دئيير دنيا، واي، هئچزاد - هئچزاد
چاي اوغلو
1318
بهروز دولت‌آبادي «چاي اوغلو» آناديليمزده ساده و صميمي خالق ديلينده شعرلر يازان شاعيرلريميزدندير. اونون ايلك شعرلر توپلوسو اولان «باياتي بايات اولماز» كيتابي‌نين اوخوجوسو اولموشوق. «چاي اوغلو» همن اثرينده، ائليميزين، آرزولاريني خالق اوچون يازديغي مصراعلاريندا عكس ائتديرمگه چاليشميشدير. آغير دردلرين آغي‌چي‌سي كيمي گؤرونن «چاي اوغلو» كلاسيك شعر فورمالاريميزين سليس و آخيجي قالبي اولان باياتي اؤلچوسونده و ساير شعر قاليبلرينده اوره‌گه ياتان شعرلر يازير.
او دردلريني، قايغي‌لاريني، سئوگي و ايناميني چيلپاقجاسينا اوخوجولارينا چاتديرماقدا اؤز ياراديجيليق چرچيوه‌سيني معين‌لشديرميشدير. بو خالق شعرينين داهادا صميمي خصوصيتي اولابيلر، اوخوجوايله واسطه‌سيز قونوشور، اوخوجوايله اورتاق دانيشيق‌ديلي يارادير، ادبي‌لشميش دانيشيق ديلي. دئمك ايسته‌ييرم‌كي راحاتجاسينا باشا دوشوله‌ن مصراعلار يقين‌كي سونرالار ادبي‌لشميش دانيشيق ديليميزه تأثيرلي اولاجاقدير.
اديبلر بئشيگي اولان آذربايجانيميزدا آلتميش ايل‌اونجه آنادان اولوب، ايندي‌ليكده تهراندا ساكينلشميش اولان شاعريميز «چاي اوغلو» جنابلارينا سعادتلي گونلر. اوغورلو آدديملار آرزولاياراق، اونون چاپ اولمويان اثرلرينين‌ده اوخوجوسو اولاجاغيميز گونلرين تاشاسيندايام، ايسته‌رديم شاعيريميزين شعرلري ايله قونوشاق!
...
هر بير اولدوز آخان زامان
بير انسان دنيادان كوچر
يورغانيمين دئشيگيندن،
گوره‌رديم اولدوز آخير،
آخيردا، اوره‌گيمي ياخير
اولدوزومو آرايارديم،
اونون پارلاق ساچلاريني
خياليمدا دارايارديم
اووجلارديم ايشيقيني
سپه‌لرديم جانيما
زامان نه قدر اؤتوب كئچه
باشيما قار تؤكوب كئچه
ناغيل‌لارا من داليرام
اونلاردان ايلهام اليرام
شعريمه ناغيل چاليرام
سازيمدا ناغيل چاليرام
دنيا واركن سازيم ايلن
سؤزوم ايلن
باياتي، آغي دئييه‌ركن
ياشاييرام...
انسانين ابدي ايشيغي
نه قدر گئجه اوزون اولسا
يئنه سحر آچيلاجاق
نه قدر افق توتقون اولسا
بيليرم كي صاباح تئزدن
دان يئريني سؤكه جكدير
گؤزل بيرگون
ايله گون كي
مئح توتانماز اونون اؤنون،
ايشيغي صاف
داها شففاف
بيليرم كي افق چاتيب كوره گينده گتيريري منه سحر،
بوناگؤره قيناميرام
افقو من سيناميرام،
من انسانام
ابدي بير ديله‌گيم وار،
سحر مندن دوغاجاقدير،
قارانليغي بوغاجاقدير
من چاتميشام كوره گيمه گؤزه‌ل سحر
آنجاق كي، دورماياجاغام
اوره گيمين ايشيغي ايله
ايشيقلاديب ده‌ره‌لري
قالخاجاغام اوجالاردان - اوجالارا
كائناتا ايشيق ساچام
مراديمين آتين مينيب چيلپاق چاپام
بيليرم كي، اگر دورسام دوناجاغام
ترپشمه‌سم
لئشخورلارين، اللرينده قالاجاغام
بونا گؤره -
سارسيدانماز افق مني
من انسانام،
صاباح تئزدن
دان يئريني چاپاجاغام
من سحرم آچاجاغام
من سحرم آچاجاغام
يالقيز
1316
عصرلر بويو صنعت و ادبيات ميدانيندا قوجا شرقين بايراقداري اولان، داهي شاعرلر و متفكرلر بئشيگي تبريز شهرينده ياراديجيليقلا مشغول اولان شاعرلريميزين بيري‌ده طنز شاعري «مجيد صبّاغ ايران» «يالقيز»دير. او تبريزلي‌لر آراسيندا بير اسلوبلو شاعر كيمي آرتيق سئويلير. اونون طنز ديلي‌ايله اجتماعي مضمونلاري احتوا ائده‌ن شعرلرينه، تبريزلي سويداشلاريميز توكنمز ماراقلا اهمييت وئريرلر. او بوگون ادبياتچيلاريميز طرفيندن آلقيشلانا بيله‌ن طنز شاعريميزدير. حقيقتاً ديقتلر شهري تانينان تبريز شهرينده بوقدر سئويلمك و اوغورلو قارشيلانماق ها مينين ايشي دئيل. او بيراينجي نوبه‌ده «يالقيز» تخلوصونو اؤزونه شعر آدي گؤتورموشدورسه، اونون اصيل شعر آديني خالقيميز وئريبدرير.
اونا محتشم شاعرلر يوردوـياتاغي اولان آنا تبريزده خالق و اديبلر آراسيندا «طنز پيغمبري» دئييرلر. باخ بو اونودولماز بيرآد، پوزولماز ايلقاردير. ياخشي بيليريك كي هميشه خالق دئيه‌ن اولوب، خالق وئرديگي عنوان ده‌گيشيلمز اولوب، اونودولماز اولوب. دئمك ايسته‌ييرم‌كي، «يالقيز» ائليميزين و اديبلريميزين بوكيمي كسكين رأي‌لريني قازانا بيليبدير. بو قازانج بيرشاعرين ياراديجليق ايللرينده الده ائده‌بيلديگي شرف نشانه‌سي‌دير. آلديغي قيمت و ده‌گردير. اؤتن ايلين سون ياري‌سيندا «يالقيز» ين ايلك شعر كيتابي چاپدان بوراخيلدي. «جيغان - ويغان» عنواني ايله چاپا يئتيريلن او ساتريك اثر اوخوجولار و عاليملر طرفيندن رغبتلرله قاريشلاندي يالقيزين شعرلريني اوخودوقدا تبريزلي‌لرين اؤزونه مخصوص اولان بيرساتيرا ايله راستلاشيريق منجه اونون ساتريك شعرلري چاغداش دؤوروموزده تبريز شهرنين طنز مكتبي كيمي اورتايا چيخابيله‌ن بير اسلو بدور. (بوباره ده دانيشماغيميزي، آيري واختلارا ساخلا مالي گؤروره‌م) دئمك لازيمديركي اونون شاعرانه مضمونلاري هميشه گوزه‌ل اولوبدور، مصراعلاري ايسه، بيزي گولدوره - گولدوره آغلادير، آغلادا - آغلادا دا گولدوره بيلير، بو بيرطنز شاعري‌نين اقتداريني گؤسته‌رير. يالقيز ايندي عومرونون آلتميش بيراينجي يازيني ياشايير. اونا اوزون عومور، گوله‌ر اوز ايلهاملي چاغلار آرزولاييرام. قوي ساتيرا لاري ايله بيزي هميشه گؤلدورسون، سؤز اونوندور.
بايرام‌خان، اوروج خان ايله يئتمشيده دوروشدو
بيرفير تيناسالدي ايكي خان دوردو، ووروشدو
بايرام‌خاني مغلوب ايله‌يب ميرزا اوروج خان
بايرام بو ووروشما قدا دالي اؤتدو، سوروشدو
حاكم ائله‌كي اولدو اوروج خان مظفر
ايشلر دويونه دوشدو، بورولدوقجا بوروشدو
تبليغ ائله‌دي آنجاق اؤزون سؤزده عمل يوخ
گؤر بيرنفرين حاليني بير آيدا سوروشدو؟
دؤرد يوز تومنه ات، نه‌جور آلسين بو رعيت
خان بيلمه‌دي ائل خوش گونه چوخداندي اوروجدو
گوندوز چوخو هوپ توتدو، يئدي ياتدي ائوينده
افطار گئچيب خلق گئجه گئتدي گؤروشدو
گؤز تيكميش ايديك بايراما، بئش گون اولا شنليك
شنليك دئديلر اوچ ايله‌جه پيش فروشدو
گلميشدي گئجه شاعري عزرائيل آپارسين
چكديم بوغونون آلتينا ال چكدي سوووشدو
بودفعه دئدي من گئديره‌م «يالقيز» اؤزون بيل
گلسم بوسفر گئتمه‌لي سن، مرج قوروشدو
يانديران چون اؤزو يانماقدادي توودان دوشه‌جك
سؤنه‌جك شعله‌سي يانديقجا، آلاودان دوشه‌جك
اوكي ميدان گؤتوروب خلقه‌ده هيچ دوو وئرمير
گؤره‌جكلر نئجه بيرگون اودا دوودان دوشه‌جك
اژدها تك نفسيندن بئله‌كي پوسكؤرور اود
نفسي گيزلنه‌جك آيناسي هوودان دوشه‌جك
چوو ساليب هريئره بيرباخ، آدي ديللرده گزير
ياتاجاق سس صداسي آد - ساني چوودان دوشه‌جك
سؤزو كسگين دي قيلنج تك سسي خنجردن ايتي
كوته‌ليب كسمه‌يه‌جكدير سؤزو سوودان دوشه‌جك
عرب امر ائيله‌يير اَذهب، دئيري توركوده گئت
فارسجا دستور «برو» هر اوچو، رودان دوشه‌جك
يالقيزين جاني گيرودور يازير ائل درديندن
اونداكي جام جاني سيندي گيروودان دوشه‌جك
بختيم كوسوبدو مندن، اوز دؤنده‌ريب آتيبدير
بيلمم گئديب هاياندا يورغون دوشوب ياتيبدير
خوش گئچمه‌دي اومنله باش ساخلاسين وطنده
باشين گؤتوردو قاچدي، جبراً مني آتيبدير
بيچاره اللي - ديللي، ايتگين دوشوب ديده‌رگين
او گئتمه دير گئديبدير، گؤزدن ايتيب - باتيبدير
توفانه راست‌گليبدير، ياكي قارا دوشوبدور
بيلمم اؤلوبدو، ياكي، سرمنزله چاتيبدير
غربت ده ائل غميله من تك گئچيردير عومرون
ياكي رقيبيم ايله، او جان ـ جانا قاتيبدير
«يالقيز» گؤره‌رسن آخير، بيرگون تاپيلدي بختين
گلدي وطنده گؤردون سانما سني ساتيبدير
عاطف
1324
بيز ايگيرمي اينجي عصرين سون ايللرينده، هله‌ده اؤز ميللي خصوصيتلريميزي قورويوب ساخلاديغميزا گؤره خوشبخت ساييلان مللتلردن بيري اولابيله‌ريك. ائليميزين، اوباميزين، وطنداشلاريميزين پاك احساسلاري، دوم-دورو دويغولاري، هومانيست و ايستي قانلي‌ليغي بيزيم خالقين احتراملارا لايق گؤرونن خصوصياتي ساييلير. بيز بو صميمي خصوصيتي بوگون ايره‌لي گئده‌ن هنر و ادبيات يوللاريندا اولان ياراديجيلاريميزين قلم و اثرلرينده گؤره بيليريك، ائله‌جه‌ده بونونلا ياناشي ائليمزده، اوباميزدا اولا بيله‌ن نيسگيللري، چاتيشمامازليقلاري، آغري - آجيلاري، ظفر و اوغورسوزلوقلاري چاغداش ادبياتيمزين عكس صداسي دئيله‌ن صنعت نمونه‌لريندن آلابيليريك. هله‌ده بيزيم شعريميزين حقيقي نماينده‌لري عموم كوتله‌نين گره‌كلي اولان موضوعلارينا دايرقلم چالان شاعرلريميزديرلر. بيز آذربايجان شعرينده اؤزونه خصوصي يئرقازانان، قاباقجيل و كوتله‌وي كاراكتر داشيان «قره‌داغ» شعرينه ديقت يئتيرنده، قره‌داغ شعرينين، آنا طبيعتله قاينايب قاريشديغيني، چئوره‌ده اولان احساسلارلا محيط‌ده اولان گؤزه‌ل‌ليكلري احساسلي مصراعلارا سيغينديرا بيلديگيني باشا دوشه بيليريك. اللي‌اوچ ايل بوندان ايره‌لي هنر و ادبيات اوجاغي اولان قره‌داغ بؤلگه‌سي‌نين كليبر ماحاليندا «كلان» آدلانان بيركندلي عائله‌سينده ايشيقلي دنيايا گؤز آچان شاعر «عاطف» او ماحالين احساسلي شاعرلريندن بيري‌دير. بيز اونون ايلك شعر مجموعهسينين اوخوجو سو اولدوق. «شعر گوزگوسو» اونون ايلك تجربه‌سي اولسادا شاعرين كلاسيك قاليبلريميزده مهارتيني گؤسته‌ره‌بيلير. آدي چكيله‌ن شعر كيتابيندا و تبريز نشريه‌لرينده چاپ اولان شعرلري، نشان وئريركي او هميشه تالاشدادير. هميشه ايره‌ليله‌مك آرزوسيندادير.
هنر و ادبيات يوللاريندا، اييره‌ليله‌يه بيله‌ن شاعرلريميز صاباحلارين اوغورلارينا دوغرو آتديقيميز آداديملاردا اؤز مثبت تأثيرلريني گؤسته‌ره جكلر. شاعر «عاطف»ين شعرلرينده انسانلارا حؤرمت، گله‌جگه اينام و بشريته سعادت آرزويلاريني تاپابيليريك.
بيز اونون اثرلريني قره‌داغ شعرينين چرچيوه‌سينده آراشديرديقدا، شاعريميزين سوييه‌سيني داهادا اولدوغوكيمي باشا دوشه بيله‌ريك. شاعريميزه جان ساغليغي آرزولايب، الهاملي قلميندن احساسلي شعرلر گؤزله‌ييريك. ايسته‌رديم اونون احساسلي شعرلريني بيرليكده اوخوماقلا سؤزو شاعريميزه تاپشيراق.
«حسرت»
بو فلك بير كوينك توخويوب منه
ساياسي داغ-دوگون، ناخيشي حسرت
اوره‌گيم چيرپنير دالغالي چاي تك،
سكوتو غم، كدر، آخيشي حسرت
سونون گؤرمك اولمور اولو دونيانين
كؤزوندن چوخ اولور كولو دونيانين
سينه‌ني تنتيدير، يولو دونيانين
ائنيشي آه-زار، يوخوشوحسرت
زامان قووراسيندا سورتولور عومور
حسرت كوره‌سينده سو اولور ده‌مير
اوره‌ك آتشيندن اودآلير كؤمور
يانيشي اود-آلو، ياخيشي حسرت
ترسينه فيرلانير چرخين گرديشي
ظولمدن قيريلير ياي‌ين كيريشي
«عاطف» بئله ديرسه دونيانين ايشي
آز ايشي سئوينجدير، چوخ ايشي حسرت
تجنيس
نيسگيل اوره‌يني قوي ياتاق ائدسين
سررين دئمه هر وفاسيز يارا، دان
نامرد ملحمينه بيتيشمه سيندن
مرد اوخونا، قان سوزوله يارادان
نيه‌گره‌ك انسان دؤزه ظولمه، تا
باسا اوزنگيسين مينه ظولم، آتا
دوستاخائين نامرد، دوشه ظولماتا
مرد اوزونه ايشيق ساچا يارا، دان
«عاطف» دوستو ازل باشدان سينا، سن
هرناكسه قالخان ائتمه سينه، سن
مرد يولوندا اؤلوب گئدسن سين نه‌سن
اوردا سنه امداد اولار يارادان
كؤنلوم كوسوب داهي سندن باريشماز
اوچولوبدور محبتين حاصاري
اوره‌گيمين صاپين چكيب قيربسان
دوزلميركي ها، چنگله، ها، ساري
معماريديم زحمت چكديم بو تاغا
باغوانييدم حسرت قالديم بوتاغا
بولبوليديم قونانماديم بوتاغا
گول عشقيندن رنگيم اولودو ها، ساري
گل «عاطف» ين سينيق كؤنلون ساري‌سن
يؤن چؤويرمه ياد كيمسيه ساري سن
شوخ طرلانا غنيم ائتمه ساري سن
عومور بويو گل اوجاتماها، ساري
مفتون اميني
1306
معاصر ادبيات تاريخيميزده باجاريقلي شاعير كيمي اؤز اقتداريني گون به گون زيروه‌لشديرن هنر و ادبيات يوللاريندا اؤز دؤرونون اوخوجولارينا هميشه يئني‌ليك‌لرله دولو اولان مضمونلو شعرلري ايله جوابده اولابيلن شاعيرلريميزين بيري‌ده «مفتون اميني» دير.
73 ايل اؤنجه گؤزه‌لليكلر بئشيگي اولان آذربايجانيميزين اتكلريندن آخيب اورومو گؤلونه تؤكولن جيغاتي چايي‌نين ساحيللرينده اكينچي‌ليكه مشغول‌اولان‌بير عائله‌ده دونيايا گؤز آچمين مفتون ايلك جوانليق ايللريندن بري شعر و ادبيات اوجاقلاريندا احتراملارلا قارشيلانا بيليبدير. اوزون مُدّتلر اورتا تحصيل دؤورونه شامل اولان درس‌ليك كيتابلاريندا اونون قهرمان تبريزين گؤز به‌به‌گي ساييلان ارك قالاسينا يازديقي شعرينين اوخوجو اولان وطنداشلاريميز، اوستاد شاعيرين درين احساسلارايلا ائله‌جه‌ده شعرقابليتري‌ايله تانيشديرلار
او هميشه قدرتلي بير شاعير كيمي باجاريغيني ثبوتا يئتيريبدير. ايگيرمي ايل بوندان قاباق اونون «عاشيقلي كروان» آدلي آناديليميزده يازديغي شعر مجموعهسينين اوخوجوسو اولدوق. هومانيست شاعير «مفتون اميني» فارسي عروض اؤلچو سونده يازديغي «عاشيقلي كروان كيتابيندا درين دوشونجه‌لريني بيرداها گئنيش اوخوجو كوتله‌لرينه چاتديرا بيلدي. ياريم عصردن آرتيق كلاسيك و چاغداش شعرفورمالارينين بوتون نوعلرينده اونودولماز اثرلري اولان مفتون اميني ايند بوگونه‌ده‌ك
بير چوخ كيتابلار و مقاله‌لرين مؤليفي اولوبدور. او حقيقتاً زامانين طلب‌لرينه اويغون اولان موضوعلارين و فورمالارين موفق شاعيرلرينديرندير.
قاباقجيل شاعيريميز اوستاد مفتون اميني جنابلارينا اوزون عومور، شن حيات، شيرين ايلهاملار ديله ييرم.
رباعيلر
باهار يولدان گليبدير، گول چيچكلي
دوروب ايواندا، بير قيرميز اتكلي
شرابين رنگي فرق ائتمز عزيزيم
گره‌كدير ساقي اولسون آغ اوره‌كلي
اوشاقليق آغزي، ساققيزلار نه دادلي
بولاقدان چيخما يارپيزلار، نه‌دادلي
نه‌چوخ زاد واركي داد وئرمز بوگونلر
او گونلر بئيله دادسيزلار، نه‌دادلي!
عزيزم چنلي بئلده‌داش بوران وار
دورآت دان نسله گلميش يوز قولان وار
منيم گونلوم‌ده، بوش بير «چنلي‌بئل» دير
كي اوندا تكجه بير عاشق جنون‌وار
ايچك، بوجامي، اوزلر آغليغي ايله
قيزارداق رنگي عشغين ساغليغي ايله
سويوق دنياني باسمشيدير و لاكين
نه غم واردير اوره‌كلر داغليغي ايله
* * *
زامان چون بير يامان قيزغين كوره‌ن‌دير
اونو كيم ساخلاياندير، كيم سوره‌ندير
اوچور يئللرتكين، كنده، شهرده
دئيير: كروان گئچن دير، ايت هوره‌ن‌دير
* * *
ساليب دير خالچاسين ايواندا عمه
بئلين ده‌شال، الينده جزوه عمه
عزيزيم، بير سؤزوم‌وار، يادگار ليق
آتا مينمه، ايه‌ر مين سن، دا انمه
يانار
1347
اؤتن ايگيرمي ايل عرضينده هنر و ادبيات ساحه‌لرينده گئنيش دگيشيكلرين شاهدي اولدوق. داها آرتيق شعر ساحه‌سينين اوغورلو ايللرينين شاهدي كيمي دئييه بيليرم كي، بو دؤورده عرصه‌يه چاتميش گنج شاعيرلريميز بيري ـ بيريندن گؤزه‌ل، دولغون و محتوالي اثرلرين شاعيرلري اولدولار. همين دؤورون موفق شاعيرلريندن بيري ده گنج‌شاعير «يانار» دير.
اوتوز اوچ ايل بوندان ايره‌لي اردبيل شهرينده دونيايا گلن عبداله بهمني «يانار» گنجليك ايللرينين ب‌اوّللرينده لايقينجه آلقيشلارلا قارشيلانان شاعيرلريميزدن اولدو. اونون احساسلارلا دولو اولان شعرلري بوتون ادبيات سئورلرين، شاعيرلرين و اديبلرين ماراغيني قازانا بيلدي و سئويله‌ـسئويله اثرلري اوخوندو. اونون پاك احساس و دوشونجه‌لري ايله شاعيرليك قابليتي اوخوجولاريني بعضاً حيرتلنديردي. كلاسيك فورمالاردا آذربايجان شعرينين باجاريقلي گنج شاعيري ساييلان «يانار» سونرا سربست شعر فورمالاريندادا اؤز باجاريقي‌ني سيناقدان اوغورلا گئچيره بيلدي. اونون اوره‌ينده اولان وطن سئوگي‌سي، ائل قايغيسي و انسانلار اوچون سعادت آرزوسو اؤز انعكاسيني «يانار»ين ياراديجيليق دونياسيندا عكس ائده‌بيليبدير. اونون شعر مجموعه‌لري‌نين اوخوجوسو اولماق آرزوسيندايام. اوره‌گي ته‌پرلي. شعري ايلهاملي، عومورو نورلو اولسون؛ شعريني اوخوياق.
يوخوشلاري سرتليكده
هربيري بير قايادي
بويول
بير گونشه دير
بويول
پارلاق آيادير
نه ياخشي كي بويولون گئديشي ائنيش دئيل
ديزلري بوكولنلر
اونو انيب گئده‌رلر
چيخيريق يوخوشلاري
يوللار يورورلار بيزي
آنجاق ييخابيلمه‌يير
يوللار اوميديميزي
يخيليريق، دوروروق
اراده‌ميز بركييب
ده‌ميره، داشا دؤنور
آياغيميز آلتيندا
يوللار عاجز گؤرونور
آتيريق آدديملاري
سرت آدديملار اؤنونده
قورخولار چؤكور ديزه
اؤلوم باش ايير بيزه
آتيريق آدديملاري
تاپدالانير غرورلار
سرت آدديملار اؤنونده
يوللاردا يورولورلار
سنين اوچون وطن
آغلارام، سيزيلدارام
گولله‌م سنين چون وطن
لازيم گلسه مين‌دفعه
اولله‌م سنين چون‌وطن
سنه ايري باخسا ياد
قوپار كؤكسومده فرياد
جاندان كئچه‌ن بير ائولاد
اوللام سنين چون وطن
سنه باغليدير اوره‌ك
سن سيز نه‌كام نه ديله‌ك
اولارام بير آغ چيچك
سوللام سنين چون وطن
بنؤوشه و انسان!
بنؤوشه‌لر گول آچيرلار،
لاله‌كيمي،
نرگيز كيمي
بنؤوشه‌لر بزه‌نيرلر،
گلين كؤچه‌ن بير قيز كيمي
دسته دسته
بنؤشه‌نين بويوبسته
ظريف،
اينجه،
گؤزه‌لليگي اوره‌يينجه،
دؤزومو يوخ،
داوامي يوخ قيشا،
قارا
بنؤوشه‌لر قانادلانير
بنووشه
بوباهاردان او باهارا
بوي آتيرلار كول ديبينده؛
اونلار خوشبخت عومور سورور
بنؤوشه‌لر كول ديبيندن
يئري گؤرور،
گؤيو گؤرور
قولتوقلاردا ياشاسادا
گوللر اوچون بير مان دئييل
بو ايش ماندير منه،
سنه
بنؤوشه‌كي
انسان دئيل
سليمان ثالث
1324
اوزون ايللر بويو تبريز شهرينده اؤز احساسلاريني قاراداغ شعرينين موفق قاليبي اولان قوشما قاليبلرينده اوخوجولارينا چاتديران شاعير «سليمان ثالث» اينجه خياللي شاعيرلريميزين بيري‌دير.
سليمان ثالث اللي‌آلتي ايل بوندان قاباق تبريزله قره‌داغ بؤلگه‌لري‌نين بيرـبيرينه قوغوشدوغو نقطه‌ده يئرله‌شن «آرپادره‌سي» آدلي‌كندده آنادان اولوبدور. عومرونون اللي‌بئش باهاريني آرخادا قويان شاعيريميز سليمان ثالث ايلك انقلاب ايللرينده چاپ اولان مطبوعاتدا احساسلي شعرلريله چيخيشلاريندا گؤستردي‌كي. ائليميزين- يوردوموزون قايغي كش، صفالي ائولاد لاريندان بيري‌دير. او، اوزو گوله‌ر شاعير انساندير.
«پالاز اولام يوخسول ائوه سالينام
اوندا شيرين اولا ربو حيات منه»
مخمس شعري ايله اوزون ايللر بويو شعريميزين خالق حياتيندان غافل اولماديغيني گؤستردي. او بير چوخ قوشما، غزل، گرايلي و دوبيتلر شاعيري‌دير. ايندييه‌ده‌ك شعر مجموعه‌سيني چاپا يئتيرمه‌ميشديرسه اونون تواضع كارليغيندان آسيليدير؛ احساسلار لا بيرگه اونون شعرينده درين خيال، شيرين آرزولار و گؤزه‌ل شعريت واردير.
سليمان ثالث اؤز باجاريغيني و استعداديني تبريز نشريه‌لرينده درج اولونان شعرلري ايله ثبوتا يئتيريبدير. اونا اوزون عومور، اوغورلو گله‌جك آرزولاييرام. قوي شاعيرين ايسته گي ني‌ده، اونون شعرينده گؤره‌ك.
ايسته‌يي وار
گونش سريب ساچلاريني
آغاجلارين بوداغينا
باهارفصلي بزه‌ك وورور
چيچكلرين ياناغينا
شيدا بولبول شن‌ـشن اؤتور
ياشيل يارپاق بوداقلاردا
قانيم كيمي قاينارليق وار
چشمه‌لرده، بولاقلاردا
سينه‌م دولوب بوشالديغي
يازين بوصاف هاواسيندان
كؤنول دويمور گؤز اوخشويان
ياييلاقلارين صفاسيندان
بو بوساطلا يئر اوزونده
ابدي قال سن اي باهار
شاعيرينده اوره‌ينده
بئله آرزو ايستگي وار
سحر
آچدين گؤزله‌ريني بو دونيايه سه‌ن
بورانلي، شاختالي بير قيش آخشامي
كولكلر پايلادي بو خوش خبري؛
آتان تك، آنان تك سئويندي هامي
سئويندي ائل - اوبا، سئويندي وطن؛
داغلار چال پاپاغين ياناكي قويدو
بشرين حياتي بئله دير آنجاق
بير ائوده ياس اولسا، بيرينده تويدو؛
كؤنول سئوينديره‌ن، دوداق گولدوره‌ن
بو ائوده سن اولدون، سن اولاجاقسان
قوروسان ناموسو، عاري آنان تك
دان اولدوزو كيمي پارلاياجاقسان
بؤيو گئت مكتبه، درس اوخو دوشون؛
وطنين كئچميشين، گله‌جگين قان
دردينه شريك اول ائلين - اوبانين؛
سئوينه‌نده سئوين، لازم اولسا يان
چاليش حيات بويو اي عزيز بالا
قويما شر قاتيشسين طبيعتينه
قلبينده ائللره حؤرمت بسله‌سن؛
امينم زوال يوخ سعادتينه
سه‌نين بو دونيايه گه‌ليشين آنجاق
سيلدي اوره‌كلردن غمي - كدري
منيمده كؤنلومون آرزوسو بو دور
اولاسان ائللرين خوشبخت سحري
وطن
باشدان باشا بو وطن
بيزيمكي‌دير اوشاقلار
وطنسيزي هميشه
يولدان اؤتن آياقلار
بولاقلاري، چايلاري
قانيميزدير، قانيميز
دنيزلري، چؤللري
اوره‌ييميز، جانيميز
دشمن هجوم گتيرسه
داغلارينا داياننيق
بير آجي زهر اولوب
خؤره‌يينه جالاننيق
حيات بويو وطنسيز
اولماسين بير آنيميز
اونو عزيز سانماغا
حكم ائدير وجدانيميز
بي‌تا
1346
سون ايللرده آنا تبريزين شعر و ادبيات اوجاقلاري چوخ سايلي شاعير و يازيچي‌نين يغينجاقي اولوبدور. تك تبريزين يوخ بلكه بير چوخ كند و شهرلريميزين شاعير بالالاري، يازيچي و ادبياتچيلاري تبريزده اولان جذبه‌لره گؤره اورايا توپلاشا بيليبلر. داها آرتيق گنج ياشلي شاعيرلريميز تبريزده ديرلر.
تبريزده آنا ديليميزده احساسلي و شيرين شعرلر يازان شاعيرلريميزين بيري ده عومرونون اوتوز بيرينجي باهاريني سورمكده اولان محمد جعفري (بي‌تا) دير. فارسجا تخلوص ائده‌ن ايستكلي شاعير «بي‌تا» توركجه گؤزه‌ل شعرلر يازير. اونون شعرلرينده شيرين حيات فلسفه‌سي و شاعيرانه دونيالار يئرلشيبدير. اصيل تبريزلي عائله‌سينده دونيايا گلن «بي تا»نين
شعرلرينده، بير شاعيرله طبيعت آراسيندا اولان باغليليغي باشا دوشه بيليريك. ايندي تبريز شهرينده ياشاييب ياراديجيليقلا مشغول اولان «بي‌تا» شعريميزه اهميتله ياناشير. او شعرين گؤزه‌ل‌ليكلرينه، محتواسينا، تكرارسيزليغينا ديقّت يئتيرير. هله‌ده شعر مجموعه‌سيني چاپا يئتيرمه‌ييبدير.
گنج شاعير «بي‌تا» آنا طبيعتين چيلپاقليغيندان، اؤز مصراعلاريندا اولان دويغولارينا دون گئيديرير. اونون شعرلرينده يئني‌ليك نشانه‌لري گؤرونور. قوي هميشه قلمي ايلهاملي، يولو اوغورلو اولسون. يقين‌كي گله‌جك يئني نسيللرين اولاجاق، سؤزو گنج شاعريميزه وئره‌ك:
اومود يولو
سئوگي‌گيله مين يول واردير
مين بويادا
هر يولوندا، سئوينج واردير
ايستك واردير
من گئدن يول
يام ياشيللي، دويغولودور
به‌يندييم يولون آدي
اومود يولو
بو يولو بير من تانيرام
بير سئوگيليم
چونكي بيزيم دؤرد گؤزوموز
يام ياشيللي، دويغولودور
سئوگي چم‌خمي
منيم‌ديله‌ييم
سئوگي ياساسي
وورغونلار كؤرپوسو
باش ايمه‌كدير
يالوارماقدير، يالوارماق
زامان اوشاقلارينا
قورشون ساتيرلار
ايلغيم ساتيرلار
زامان اوشاقلاري
ليريك قوشماجالار دئيرلر
بوچارشيدا ساغلامليق
انسان ده‌يه‌ري‌ايله آلينير
وحياتيميزي صنعي قمرلر
محكمه‌يه اوتوروبلار
و بو محكمه‌لري بيلكي سايارلار ثبت ائديرلر
گله‌جه‌يه
قورو آغاج
قارا قاباق، قارا بولود
قييها چكيب باغيريردي دنيزلره
ايلان كيمي قيوريلاركن، آچيليردي
آجليغيني چولغاديردي اورهكلره
قيشقيراركن داغي داشي شاللاقليردي
آغاجلار اسولغون اولوب تيتره‌ييردي
بيرمحتشم قورو آغاج
آنجاق اوردا پولاد كيمي داياناراق
قيلينج تكي ايكي بؤلدوقارا يئلي
بولودوندا باغرين ياردي
گونش چيخيب گولدو سحر
دورنالارا فرح‌لندي سمالرده
چايلار آخدي، گوللر آچدي
قيزيل تئله عطير ساچدي
شنليك عطري سپه‌لندي
هر بيريانا دولاناراق
ليلا كحالي
1356
اوزون عصرلر بويو ادبياتيميزا گؤزه‌ل اثرلر بخش ائدن شاعيره‌لريميز، هميشه اؤز دويغولاري‌نين ان پاك و احساسلي قيسملريني صنعت قاليبلرينه سيغينا بيله‌ن فورمالارلا بيزه چاتديرميشلار.
قادين شاعيره‌لريميز كلاسيك دؤورلريميزين ان حزين ناله‌لريني، ان اوره‌ك آغريديجي موضوعلاريني سون نسيللرينه يادگار قويموشلار. ايندي‌ليكده آنا ديليميزده شعرلر يازان شاعيره‌لريميز همان نسلين سلاله‌لري كيمي گؤرونورلر. قورتاراجاق آيلاريندا اولان عصريميزين عرضينده بير چوخ شاعيره‌لر يميز ادبيات سئورلريميزين آلقيشلاريلا قارشيلانديلار. اونلار اؤز دؤرلري‌نين شاعيره‌لري و ادبياتچيلاري كيمي قيمتلي اثرلر يازماقلا خالق طرفيندن دئيه‌رلريني الده ائده بيليبديرلر. هئچ‌بير صنعتكارين دئيه‌ريني خالق كيمي اؤده‌يه‌ن اولماز، سون سؤز خالقين وئرديگي دئيه‌ردير.
گنج ياشلي شاعيره‌لريميزين اثرلريني آرا - سيرا مطبوعاتيميزدا سير ائده بيليريك. همين گنج نسلين باجاريقلي شاعيره‌لرينين بيري‌ده زنگان بؤلگه‌سيندن اولان گنج شاعره‌ميز «ليلا كحالي» دير. او، ايندي عالي تحصيل ايللريني اوخوماقلا برابر فارس و تورك ديللرينده احساسلي و قابليّتلي شعرلر يازير. يئني نسلين شعر ديلي اونون اثرلرينده اولان بارز خصوصيتلرين بيري‌دير. اونون اوغورلو گله‌جگيني زامان اؤزوايله‌گتيره‌جك دئييه موفق شاعيره‌ميزين شعرلرينه مراجعت ائده‌ك.
دووارلار داش ايدي
داشدان دووارلار
دووارين چينينده ايستي نفس‌لر
اسيردي چيرپينان اودلو اؤركدن
كيشي داش دئيلدي
كيشي آغليردي
دووالار داش ايدي
داشلاردان دووار
اوزاخدان دئديلر كيشي داش ايدي
آتا
اوشاقلار قاچيردي قاپييا ساري
آخشام ايدي، آتاچؤلدن گليردي!
آتانين گؤزلري درين باخيردي
دوداغي گوله‌نده - ايكي گؤزوندن
مين خيال گئچيردي، تئزده ايتيردي!
باخيشي، شنليگي ائوه سپيردي
اوشاقلارين اوزون، بير ـ بير اوپوردو
قاپيدا، آتانين قالان دردلرين
دينمه‌ز، سس‌سيز كوچه نئجه چكيردي؟!
قالي
قاليني كسه‌ن گون اِئوه گلديلر
نه‌رنگلي، نه‌گؤزل اولوب دئديلر
ساريني گونشدن، گؤيوده، گؤيدن،
آليب‌مئشه‌لردن ياشيل رنگيني
قيرميزلاري، يانار گوللردن آليب
گئجه‌لر توخونوب،
قاراني اوندان،
آمما بوايشيقي، هارادان آليب؟
سوروشوب باخديلارقيزين اوزونه
بيلمه‌ديلر قيزين داها گؤزلري
ايشيقي سئچمه‌يير قارا گئجه‌دن
گؤزلرين باغلادي جواب وئرمه‌دن
يارا بارماقلارين، الينده سيخدي
آجيني ياواشجا بوغازدا اوتدو
نئچه‌يه گئدره‌بو؟ بيري سوروشدو!