1401-جی ایل چیلله‌نین 13-جو گونو قیسا بیر خبر یاییلدی: حاجی علی نشانی وفات ائتدی. خبر نه قدر قیسا اولسا دا یوز او قدر آغیر و سارسیدیجی ایدی.
علی نشانی‌نی اورمو شعرینین آتاسی سایساق یانیلماریق. او تک جانینا جانلی بیر تاریخ ساییلیردی. اورمو شعرینین تاریخده اوخودوغوموز شخصیتلری ایله اوتوروب دورموشدو بو انسان. اونلاردان شیرین خاطره‌لر دانیشاردی. مریم خانیم جهانگیرینی گنج قیز دئیه تقدیم ائدردی. میرجلال صابره یازدیغی شعر 1325-جی ایل اورمودا چیخان ارومیه قزئتینده چاپ اولموشدور.
علی نشانینین باغبان قیزی و بند شعرلری خلق ماهنیسینا چئوریلیب 70 ایلدن چوخ خلقیمیزین دیلینده ازبر اولان ماهنیلارا چئوریلمیشدیر.
یازدیغی شعرلر آخیجیلیق و دولغونلوق باخیمیندان داها دگرلی اثرلر سیراسیندا دایانیر. بو اونون یالنیز سونکو شعرلری دگیل هله گنج یاشلاریندا یازدیغی شعرلرده ده اؤزون گؤسترمکدهدیر.
علی نشانی 1324-ده ملی حکومت زمانی هله چوخ گنج و دئمک 19 یاشیندا اولدوغونا باخمایاراق اونون شعری همین ایل حاضرلانان و مکتبلرده اوخونان آنا دیلی کتابینا داخل اولموشدور. او بیر ایلده درس اوخویان اوشاقلار علی نشانینین شعرین ده اوخویوب منیمسمیشدیلر. اؤزو دانیشاردی: "ملی حکومت زمانی تبریزه گئتمیشدیم. بیر ده گؤردوم فداییلر دسته-دسته خیاباندا اویان-بویانا گئدیر و منیم شعریمی اوخویورلار."
تبریزده اولدوغو زمان سلیمان رستم، جعفر خندان، بالاش آذراوغلو، محمد بیریا و باشقا ادبی شخصیتلر ایله گؤروشموش و صحبته اوتورموشدور. اونلار اونو باکییا دعوت ائدیر و اورادا چیخیش ائتمگینی ایسته‌ییرلر آنجاق نهدنسه بو گئدیش و چیخیش اولمامیشدیر.
اورمونون مرکز میدانی، ایندی تاریخی آبیده ساییلان ایالت میدانی و امام خیابانلارینین انشاسینین شاهدی اولموشدور. همین خیابانی چکمک اوچون اورمونون تاریخی بازارینین پارچالانماغیندان دانیشاردی.
ملی حکومت داغیلدیقدان سونرا شعر یازماقدان باشقا گوناهی اولمایان علی نشانی ده بیر چوخلاری کیمی سورگونه گئدیر. نئچه ایل یزدده و لرستاندا سورگون حیاتی یاشاییر. سورگوندهکی ایللرین آجی خاطره‌لری هئچ ده اونون یادداشیندان سیلینمه‌دی و سون گونه‌دک اونونلا یاشادی. بو اوزدن ده سونراکی ایللر چوخ ادبی جمعلره قاتیلمادی، مطبوعاتدا چیخیشی اولمادی و بیر تهر هؤووشنه ایچینده اولدو. بازاردا اؤز ایشی ایله اوغراشدی و آنجاق اونون یانینا گئدن ادبیات اهلی ایله دئییب دانیشماغا قناعت ائتدی.
قوجامان شاعر چوخ گنج یاشلاریندان حیاتینین سون گونلرینه‌دک اورمو بازاریندا قوماشچی اولدو آنجاق هئچ نه اونو شاعر روحوندان آییرانمادی. او شاعر یاشادی. شاعر دوشوندو و شاعر یازدی. بازاردا اونا مراجعت ائدن اوفاجیق بیر قیز اوشاغینا فاطمانین قصه‌سی کیمی پوئما یاراتدی.
علی نشانینین شعرلرین اوخویارکن اونو بیر رئالیست شاعر گؤروروک. اجتماعدان، اوشاقلیغیندان، بازاردان و تجربه ائتدیگی هر نه‌دن یازان بیر شاعر هئچ ده رومانتیک بیر دونیا یاراتماییر و اونون یازدیقلاری اطرافینداکی گرچکلری تصویره چکن بیر تابلولار اولموشدور.
اوزون ایللر یازیب یارادان علی نشانی نهایت 1388-جی ایل کتاب چیخارتماق قرارینا گلیر. نوتلارین ترتیب ائدیب منه وئریر. کتابی ترتیبه سالیب نهایی باخماق اوچون اونا قایتاریرام. کتابین اوستونده «حاج علی نشانی» سؤزونو گؤروب تپکی گؤستریر. «آخی ددم منه آد قویاندا علی آد قویوب حاج علی دئمه‌ییب کی» دئیه حاجی سؤزون سیلدیریر. کتابین اوستونده آنجاق «علی نشانی» یازیلیر.
64 ایل اوندان قاباق، 1325-جی ایل ملی حکومت طرفیندن یایینلانان «شاعرلر مجلسی» کتابیندا دا همین آد ایله چیخیش ائتمیشدیر. او زمانین مطبوعاتیندا دا «علی نشانی» تانینمیش بیر آد اولموشدور. اؤزو همین ایللردن دانیشاندا «جوانلیق ایدی شعریم چاپ اولاندا ذوقا گلیردیم سئوینیردیم» دئییردی «منی ده تشویق ائتمک اوچون شعریمی چاپ ائدیردیلر یوخسا اورمودا یاشایان یوخسول بیر اوشاغین شعرینده نه اولا بیلردی کی؟» بو قدر تواضعکار بیر انسان ایدی و عمرونون سونونا قدر بو اخلاقی اؤزو ایله داشیدی.
مرحوم علی نشانینین 1323-جو ایل یازدیغی و ملی حکومت زمانی بیرینجی آنا دیلی کتابیندا چاپ اولان شعری:
قوجا باغبان
قوجا باغبان ايشله دايانما بير آن
ايشله‌ين ال باغچا گؤرر، بار گؤرر
بو بللیدير سعى ائيلسه باغبان
آلما گؤرر، هئيوا گؤرر، نار گؤرر
باهاردان يارانير هر لاله هر گول
مرامه يئترسن غم ائتمه كؤنول
چون هر زامان قيشين سونوندا بولبول
لالهلى سونبوللو بير باهار گؤرر
بولبول گرك دؤزه بيلسين خزانا
اگر چه عاشقدير او گولستانا
عاشق اگر دؤزه بيلسه هجرانا
آرزويا چاتيب نازلى يار گؤرر.
1324-جو ایل یازدیغی آذربایجان شعری:
آذربايجانيم
سن اى منيم آنا يوردوم عزيز آذربايجانيم
بير باخ سنين هوسينله قانادلانير ترلانيم
بودور یئنه سنين ايچون حصر اولونور داستانيم
ياشا منيم يوردوم يووام ياشا عزيز وطنيم
ياشا آنام، ياشا وطن، ياشا دوغما مسكنيم
قلم سنين، داستان سنين، وارليق سنين، جان سنين،
آچ تاريخى ورقله باخ، شهرت سنين، شان سنين،
باقرخان تك قهرمانلار، شانلى ستارخان سنين،
ياشا منيم باغيم، باغچام، ياشا گؤزل گولشنيم
ياشا آنام، ياشا وطن، ياشا دوغما مسكنيم،
ازل گوندن سنين ايچون يارانميشدير قلميم
اگر من بير پروانهيم سنسن چيراغيم شمعيم
سن هر زامان يادا دوشسن آزالير درديم غميم
سنسيز يقين اوچا بيلمز كؤنول ترلانيم منيم
ياشا آنام، ياشا وطن، ياشا دوغما مسكنيم.
1395-جی ایل شعر حاقیندا دوشونجه‌لرینی داشییان شعر:
شعر
هنر اولدوزلارينين گؤيده ثريّاسيدي شعر
معرفت گولشنينين نرگسِ شهلاسيدي شعر
جهل بتخانه‌سينين الده تبر، بتشكني
مدنيّت گولونون بولبولِ شيداسيدي شعر
اينجه‌صنعتدي كي، هر اؤلچوده، هر قاعدهده
معنويّت سؤزونون منبع معناسيدي شعر
شعردیر گؤسترن اؤز شاعرينين كيمليگيني
حافظين، خيّامين افكارينين افشاسيدي شعر
خيّامين اينجي رباعيلري، مشهور اثري
مولوي مكتبينين مدرکِ اعلاسيدي شعر
اولو فردوسي قوران بير ابدي كاخِ بلند
سعدينين گوللو گولستانِ مصفّاسيدي شعر
قرنلردير ياشادان شانلي نظامينين آدين
هر زامان شاعرينين ضامنِ احياسيدي شعر
عشقي تصويره چكن شاعرين اؤلمز اثري
آدلي منظومه مجنون و لئيلاسيدي شعر
ادبين قدرينه برهاندي فضولي غزلي
هنرين، صنعتين ان زيروه‌لي عنقاسيدي شعر
سوروشون شهريارين شاهكاري حيدربابادان
ان گؤزل اينجيلرين پارلايان الماسيدي شعر
ساهرين يازديغي يوخسول توخوجو ايشچي قيزين
بوغولان آرزوسو، نيسگيل دولو دونياسيدي شعر
وطن اهلین مدنیت یولونا سوق وئرن
صابرین هوپ هوپونون نامه شیواسیدی شعر
گؤستريب شاعريميز اورمولو بهرام اسدي
اونون عرفاندا درين جومدوغو درياسيدي شعر
ادبيّات چكير انساني كمال زيروه‌سينه
نردباندير كي، اونون پلّه زيباسيدي شعر
شعر و عرفاندير آچان عالمِ اهليّته يول
اهليت درسينين ابزار و الفباسيدي شعر
وارليغين بوللو گؤزلليكلرينين تابلوسودور
خلقتين عكسيدي هر وصفینین انشاسيدي شعر
گئجه‌نين يئرده ايشيق تشنه‌سينين گؤيده الي
گونوزون گون كيمي آيدينلادان آيناسيدي شعر
ادبيّات باغينين وئرديگي هر بير مزه‌ده
جوربه- جور ميوه‌لري، آلماسي، هئيواسيدي شعر
شاعرين شعرينه انگيزه حوادثدن اولور
ائشيديب گؤردویونون صوت و سيماسيدي شعر
خفقانلاردا گاه اوست اؤرتولو مضمونلار ايلن
مطلبين نقطه تفسير معمّاسيدي شعر
اویادان خلقی شبسترلی چیغیرقان خوروزون
پرده‌سیز طنزلی الفاظ فرحزاسیدی شعر
ظلم و حقسيزليیه قارشي چيغيران خلقلرين
قورتولوش دينمه‌ده فرياد و تقلاّسيدي شعر
انتظام عالمينين نقشيني ترسيم ائله‌ين
نظم ایله صف- صف اوچان گؤيده‌كي دورناسيدي شعر
هر اؤتن دؤورانين اؤز حال و هواسين داشيیان
زامانين وصفیني تصوير ائدن عكّاسيدي شعر
داشيان عُرف ايله معنا وئرن ادراك و شعور
هر ائلين اؤز ديلينين عمق و پهناسيدي شعر
فيلمدير سانكي تماشاچيدا احساس يارادان
چوخلو تصويرلرين صحن تماشاسيدي شعر
سس قولاق باغليسيدير، سؤز قولاغين سيرقاسيدي
ائشيدن هر قولاغين اينجيلي سيرقاسيدي شعر
شاعرين پخته‌لي‌یين خامليغين اثبات ائله‌ين
هر ايكي حالدا اونون حاصلِ احساسيدي شعر
گوجون آز، قافيه بول، ايندي «نشاني» بورادا
شهرياردان كؤمه‌یين بابِ تمنّاسيدي شعر.