Nizami Gəncəvi və “erməni məsələsi”
ذکی الله بايراملي
Zəkiulla bayram
بللي اولدوغو کيمي، بو ايل اؤلکه ميزده داهي شاعيريميز نظامي گنجوي نين 880 ايلليگي طنطنه لي شکيلده قئيد اولونور. ايل عرضينده نيظامي نين حيات و ياراديجيليغي، دونياگؤروشو، اثرلري نين جاهانشومول اهميتي، فلسفي-ايجتيماعي ماهيتي و س. باره ده نيظاميشوناس عاليملرين فيکير و مولاحيظه لري، مقاله و موصاحيبه لري موختليف مطبوع اورقانلاردا نشر ائديلمکده، تئلئويزييا و راديودا ايشيقلانديريلماقدا، علمي و کوتلوي ايجتيمايته چاتديريلماقدادير. اؤزلليکله، " آذربايجان " ژورنالي نين تشکيل ائتديگي " نيظامي صؤحبتلري " و "ادبيات قزئتي " نين بوتؤو بير ساييني " گنجه لي مودريک " ه حسر ائتمه سي چوخ ياددا قالان و ديقتچه کي جي حاديثه لر کيمي آيريجا قئيد اولونماليدير. تأسوف کي، بوتون بو صؤحبت، موذاکيره و تحليللر زاماني بير مسله، دئمک اولار کي، تدقيق و تحليل موستويسيندن کناردا قالميش، حؤرمتلي عاليملريميزين ديقتيني جلب ائتمه ميشدير. بو، نيظامي اثرلرينده يئر آلان " ائرمني مثله سي " ، داها دوغروسو، بو مسله ايله باغلي بديعي ترجومه لرده يول وئريلن بير سيرا جيدي قصورلاردير.
اؤنجه اونو دئمه لييک کي، " خمسه " نين آنا ديليميزه بديعي ترجومه سي، بللي اولدوغو کيمي، 20 يوزايلين 40-جي ايللرينده استالي نين گؤستريشييله نيظامي نين 800 ايلليگي ايله باغلي اولاراق باشلانميشدي. همين دؤورده بوتون سووئتلر اؤلکه سينده، اؤزلليکله، سووئت آذربايجاني جومهوريتينده ايجتيماعي-سياسي وضعيتين نئجه اولدوغونو چوخلاريميز ياخشي بيليريک.
1937-جي ايل رئپرئسسييا " فيرتيناسيندان " کئچميش، ح.جاويد، م.موشفيق، ا.جاواد، ف.کؤچرلي، س.مومتاز، ع.زئيناللي، ح.عابيد و ب. گؤرکملي شاعير و عاليملرين فيزيکي محو ائديلمه سيني گؤزلرييله گؤرموش آذربايجان ضياليلاري کونجه سيخيلميش، کومپلئکسلي و گؤزو قيپيق حالدا ايديلر. بير سؤزله، ساغ قالميش آيدينلاريميز دؤولت و حاکيميت قوروملاريندا آت اوينادان، ميللي روحلو اينسانلاري هر يئرده گؤزومچيخدييا سالان ائرمني-روس چينوونيکلري و اونلارين يئرلرده کي قولبئچه لري نين قارا-قورخوسو آلتيندا ايديلر. بلي، محض بئله بير واختدا نيظامي اثرلري نين بديعي ترجومه مسله سي گوندمه گلميشدي. بيزيم فيکريميزجه، ائله اونا گؤره ده بؤيوک شاعيرين بير چوخ فيکيرلري تحريف اولونموش، نيظامي اثرلرينده " ائرمني ايزلري " گؤرونمه يه باشلاميشدي. بونو سانکي بيلرکدن ائدن ترجومه چيلر، رئپرئسسييا اولونموش سلفلريندن فرقلي گؤرونمک، خالقلار دوستلوغو و بين الميللچيليک ايدئيالارينا گويا داها صاديق اولدوقلاريني گؤسترمک اوچون نيظامي متنلرييله بئله داورانميشديلار.
دئمه لييک کي، بير چوخ داهي صنعتکارلار کيمي، نيظامي گنجوي نين ده اثرلرينده ياشاييب-ياراتديغي دؤور، موحيط و جوغرافي آرئال حاقيندا يئترينجه بيلگي و معلوماتلار واردير. بو کيمي بيلگي و معلوماتلارين چاغداش اوخوجويا دوغرو و دقيق چاتديريلماسي دا ترجومه چي- شاعيرلر اوچون ان واجيب مسله لردن بيري اولماليدير. چوخ تأسوف کي، " گنجه لي داهي " نين بو باخيمدان بختي گتيرمه ميشدير. بئله کي، " خمسه " يه داخيل اولان پوئمالارين آنا ديليميزه ترجومه سي زاماني قافقاز تاريخي و جوغرافيياسي ايله باغلي اولان مقاملاردا داها چوخ تحريفلره يول وئريلميش، " ائرمنيستان " ، ائرمني و س. کيمي قوندارما ائتنونيم و توپونيملر نيظامي متنينه يول تاپميشدير.
بيز بو مسله ايله باغلي آراشديرمالاريميزي 2011-جي ايلده گنجه ده چوخ نفيس شکيلده نشر اولونموش نيظامي " خمسه " سي اوزرينده آپارميشيق. ديقتلاييقدير کي، يوخاريدا سادالاديغيميز بديعي ترجومه نؤقصانلاري " خوسروو و شيرين " اثري نين پروف. خليل يوسيفلي طرفيندن ائديلميش ترجومه سينده تاماميله آرادان قالديريلميشدير. چوخ تأسوف کي، حؤرمتلي موعليميميز، پروف. خ.يوسيفلي بو نشره بوتونلوکله جاوابدئه شخص، داها دوغروسو، علمي رئداکتور اولسا دا، باشقا پوئمالارين ترجومه سينده واختيله يول وئريلميش بير سيرا يانليشليقلار و قوصورلارا توخونماميش و ان اساسي، " ايضاحلار " بؤلمه سينده ده هئچ بير آچيقلاما وئرمه ميشدير.
بلکه ده ايندن بئله ان آزي 40-50 ايل نيظامي سئورلرين استولوستو کيتابي اولاجاق، کيتاب رفلريني بزيه جک بو گؤزل و نفيس ترتيباتلي نيظامي "خمسه " سي يوخاريدا گؤسترديگيميز چوخ جيدي نؤقصانلاري دا هله نئچه اونيللر اؤزونده ياشاتمالي اولاجاق. اونا گؤره ده بيز داهي شاعيريميزين يالنيز " ايسکندرنامه " پوئماسي، داها دوغروسو اونون "شرفنامه " حيصه سيندن دانيشاجاغيق. نيظامي نين سون و ياراديجيليغي نين يئکون اثري اولان "ايسکندرنامه " نين بيرينجي حيصه سي - "شرفنامه " ، بيلديگيميز کيمي، تانينميش يازيچي و معاريف خاديمي عبدالله شايق، ايکينجي حيصه سي – " اقبالنامه " ايسه ميکاييل رضاقولوزاده طرفيندن ترجومه ائديلميشدير. اونو دا دئمه ليک کي، عرب و فارس ديللرينه اوشاقليقدان ياخشي بلد اولان ع.شايق " شرفنامه " ني، او بيري ترجومه چيلردن فرقلي اولاراق، بيرباشا اوريژينالدان ترجومه ائتميش، نئجه دئيرلر، نيظاميه بير کؤينک ياخين اولموشدور.
عجبا، ماکئدونييالي ايسکندرين دؤورونده، يعني ائرادان تخمينن 320 ايل اؤنجه، ياخود ائله نيظامي اثرينده قافقازدا ائرمنيستان آدلي دؤولت، ياخود اؤلکه وارديمي؟ – البته، يوخ! ائرمنيستانين قافقاز، عومومن دونيا خريطه سينده گؤرونمه سي دونه نين حاديثه سيدير. بو گون چوخلارينا بلليدير کي، بو ايدئيا روسييا ايمپئريياسي نين قافقاز سياستي نين ترکيب حيصه سي کيمي، 18 يوزايلين سونلاري و 19 يوزايلين اوللرينده اورتايا آتيلميشدي. بس اوندا "شرفنامه " ده " ائرمنيستان " کلمه سي نين ايشلنمه سيني نئجه ايضاح ائتمک اولار؟ مثلا، " دارا ائلچيسي نين ايسکندرين يانينا گلمه سي " بؤلمه سي نين سونوندا ايران شاهي نين يونانلارا قارشي قوشون چکمه سي تصوير ائديلرکن دئييلير:
کين ايله يونانا دوغرو يول آچدي،
کئچديگي يئرلرده بايقوش اولاشدي.
آخدي دنيز کيمي ائرمنيستانا،
کولک ده چاتمادي اونون توزونا.
(نظامی گنجوي. ايسکندرنامه. ترجومه ائدنلر: ع.شايق (شرفنامه)، م.رضاقولوزاده (اقبالنامه)، ايضاحلارين مؤليفي: ح.جعفر، اؤن سؤزون مؤليفلري: ق.علييئو (شرفنامه)، ز.قولوزاده (اقبالنامه)، علمي رئداکتور: خ.يوسيفلي، گنجه، 2011، ص. 69).
آجيناجاقلي حالدير کي، بو کوبود خطا "ايسکندرنامه " نين فيلولوژي ترجومه سينده ده اؤزونو گؤسترير. دوغروسو، بونو گؤزلريمله گؤرمه سم اينانا بيلمزديم، چونکي بو اثرين فيلولوژي ترجومه سيني کئچميش سووئتلر بيرليگي ميقياسيندا تانينميش ترجومه چي- شرقشوناس پروف. غضنفر علييئو ائتميشدي، اؤزو ده 20 عصرين قارا-قورخولو 40-جي ايللرينده يوخ، 80-جي ايللرده.
جوشغون دنيز کيمي ائرمنيستانا گيردي،
اوردونون توزوندان صبا يئلي سورعتدن دوشدو.
(نظامی گنجوي. ايسکندرنامه (شرفنامه)، فيلولوژي ترجومه، ايضاحلار و قئيدلر پروف. قضفر علييئويندير، باکي: علم، 1983، ص. 118).
همين ميصراعلاري ديقتله اوخويان و تاريخدن آز-چوخ خبري اولان هر کس بورادا صؤحبتين ارمنييه آدلي تورک بؤلگه سيندن گئتديگيني باشا دوشر. ايندي ايسه، گلين گؤرک، بو، اثرين اوريژينال متنينده نئجه دير:
بئرمن درامد چو دريايئ-توند،
صبارا شود از گردئ-او پايئ-کوند.
(کلیات حکيم نظامي گنجوي، مقدمه و شرح حال: از پروف. شبلي نماني، به اهتمام: م.درويش. چاپ اول، 1366، ص. 1054).
(ترجومه سي:
جوشغون دنيز کيمي ارمنه چاتدي،
صبا يئلي ده اونون آياغي نين توزونا چاتمادي.)
گؤره سن، 20 يوزايلين 40-جي ايللرينده اثري ترجومه ائدن گؤرکملي يازيچي و ايجتيماعي خاديم ع.شايق ارمنله ائرمنيستانين فرقيني بيلميرديمي؟ – البته، بيلمه ديگينه اينانماق چتيندير. يوخاريدا دئديگيميز کيمي، آمانسيز رئپرئسسييا تدبيرلريني گؤزلرييله گؤرموش، دوستو و همکاري ح.جاويدين اؤزونون و عايله سي نين باشينا گتيريلنلري ياخشي خاطيرلايان آهيل ياشلي يازيچي-ترجومه چي، سادجه، آشيري احتياطليليق گؤستره رک کيملرينسه خوشونا گلمک، گويا اؤزونون ميلتچيليک دويغولاريندان تاماميله اوزاق، او دؤورون ديلييله دئسک، بين الميللچي بير صنعتکار اولدوغونو ديقته چاتديرماق ايسته ميشدي. داها دوغروسو، تانينميش يازيچي اؤز شخصي حياتيني قوروماق نامينه نيظامي کيمي داهي صنعتکاري تحريف ائتمکدن بئله چکينمه ميشدي. ان آجيناجاقليسي اودور کي، بو بويدا يالان و ساختاکارليق نه آز-نه چوخ، دوز 70 ايل داوام ائتميش، حتّی سووئتلر داغيلاندان سونرا دا، دؤولت موستقيلليگيميزين 20 ايلليک دؤورونده بئله اولدوغو کيمي ساخلانميش، جيلددن-جيلده، کيتابدان-کيتابا کؤچورولموشدو.
ائله همين بؤلمه نين آردينجا داوام ائدن حيصه ده عيني فيکير، اولدوغو کيمي، يئنه تکرارلانير:
کئچن پادشاهلاري اؤيرنميش بير پير
سوروشان کيمسه يه بئله نقل ائدير:
دارا اوردو چکدي ائرمنيستانا،
سانکي بير قيامت چؤکدو هر يانا.
(نظامی گنجوي. ايسکندرنامه. ترجومه ائدنلر: ع.شايق (شرفنامه)، م.رضاقولوزاده (اقبالنامه)، ايضاحلارين مؤليفي: ح.جعفر، اؤن سؤزون مؤليفلري: ق.علييئو (شرفنامه)، ض.قولوزاده (اقبالنامه)، علمي رئداکتور: خ.يوسيفلي، گنجه، 2011، ص. 70).
بلي، بو يانليش دا فيلولژي ترجومه ده عينيله تکرار اولونور:
دارا اوردونو ائرمنيستانا چکجک،
ائله بيل اورادا قييامت قوپدو.
(نظامی گنجوي. ايسکندرنامه (شرفنامه)، فيلولوژي ترجومه، ايضاحلار و قئيدلر پروف. قضنفر علييئويندير، باکي: علم، 1983، ص. 119).
تصوور ائديرسينيزمي، دارا و ماکئدونييالي ايسکندرين دؤورونده قافقازدا ائرمنيستان آدلي اؤلکه دن صؤحبت گئدير. ايندي بونو اوخويان شاگيرد و طلبه لري، ائلجه ده نيظامي ياراديجيليغي و قافقاز تاريخييله ماراقلانان ياد ائللي بير اوخوجونو قديم دؤورلرده بورادا " ائرمنيستان " ، ياخود منفور دوشمنلريميزين دئديکلري کيمي، " دنيزدن-دنيزه بؤيوک ائرمنيستان " اولماديغينا نئجه اينانديرا بيلريک؟! بير حالدا کي، بونو 12 يوز ايلده داهي شاعير و تاريخچي سايديغيميز ن.گنجوي دئيير و 20 يوزايلين ايلک اونيلليگينده بير نئچه تانينميش آذربايجان يازيچي و عاليملري، دولاييسييلا دا اولسا، تصديق ائديرلر. هله اونو دئميرم کي، نيظاميني آذربايجان تورکجه سينده اوخويا بيلن آوانتوريست ائرمني ادبياتشوناس و تاريخچيلري نين " بؤيوک ائرمنيستان " خولياسينا نئجه جاواب وئرمک اولار؟
ايندي ايسه، گلين، همين ميصراعلارين اوريژينالداکي واريانتينا باخاق:
گزارنده شرح شاهنشه ي،
چنين داد پورسند را آگهي
که، دارا چو لشکر به ارمن کشيد،
تو گفتي که، آمد قيامت پديد.
(کلیات حکيم نظامي گنجوي، مقدمه و شرح حال: از پروف. شبلي نماني، به اهتمام: م.درويش. چاپ اول، 1366، ص. 1055).
(ترجومه سي:
شاهنشاهين اولوب-کئچنلريني شرح ائدن،
سوروشانلاري بئله آگاه ائدير
کي، دارا ارمنه قوشون چکدي،
سانکي قيامت باش وئردي.)
ماراقليدير کي، " ايسکندرين ايران آتشکده لريني داغيتماسي " حيصه سينده ايسه جغرافي آد و اؤلکه کيمي " آذربايجان "آدي نين چکيلديگيني گؤروروک.
عاقيللر مصلحت گؤردولر اونا،
اورادان ترپنسين آذربايجانا.
(نظامی گنجوي. ايسکندرنامه. ترجومه ائدنلر: ع.شايق (شرفنامه)، م.رضاقولوزاده (اقبالنامه)، ايضاحلارين مؤليفي: ح.جعفر، اؤن سؤزون مؤليفلري: ق.علييئو (شرفنامه)، ض.قولوزاده (اقبالنامه)، علمي رئداکتور: خ.يوسيفلي، گنجه، 2011، ص. 99).
نيظامي متنينده بو سؤز " آذرآبادگان " شکلينده ايشله نير، اؤزو ده بو، " شاهنامه " مؤليفي ا.فيردووسي نين ديليندن سؤيله نير. اصلینده بيزيم خيريميزه اولان بو مسله ايشين ترسليگيندن يئنه زيانيميزا ايشله يير، داها دوغروسو، بورادا ائ.ا. دؤورلرده ائرمنيستانلا آذربايجانين، لاپ بو گونکو کيمي، ياناشي-قونشو اؤلکه لر اولدوغو دولاييسييلا تصديقله نير. حالبوکي، ائرمني ائتنوسونون قافقاز اراضيسينه کؤچورولمه تاريخي نين ان اوزاغي 200 ايلدن او يانا گئتمه ديگي، يوخاريدا قئيد ائتديگيميز کيمي، تاريخله ماراقلانانلارين چوخونا گون کيمي آيديندير.
او دا ماراقليدير کي، " ايسکندرين عربيستانا گئتمه سي و کعبه ني زيارت ائتمه سي " بؤلومونده بير صحيفه ده نه آز-نه چوخ، دوز 5 يئرده " ائرمنيستان " آدي چکيلير. دوغرودور، بورادا بير دفعه يئنه "آذربايجان " اؤلکه سي و " طيفليس " شهري نين ده آدي کئچير. عدالت نامينه دئمه ليک کي، فيلولوژي ترجومه زاماني بو فصيلده " ارمن " سؤزو نيظامي متنينه يول تاپير. " آذربايجان " سؤزو ايسه، محض نيظاميده اولدوغو کيمي، " آذرآبادگان" شکلينده وئريلير.
(نظامی گنجوي. ايسکندرنامه (شرفنامه)، فيلولوژي ترجومه، ايضاحلار و قئيدلر پروف. غضنفر علييئويندير، باکي: علم، 1983، ص. 196).
بؤيوک آذربايجان حؤکمداريندان
بير ائلچي گله رک دئدي: حؤکموران،
نه اوچون رام ائتدين بوتون دونياني؟
سيلدين روزيگاردان ظولمو، توغياني؟
وئردين هر اؤلکهيه قورتولوش، آمان،
ائرمنيستان ندن چيخدي خاطيردان؟
(نظامی گنجوي. ايسکندرنامه. ترجومه ائدنلر: ع.شايق (شرفنامه)، م.رضاقولوزاده (اقبالنامه)، ايضاحلارين مؤليفي: ح.جعفر، اؤن سؤزون مؤليفلري: ق.علييئو (شرفنامه)، ض.قولوزاده (اقبالنامه)، علمي رئداکتور: خ.يوسيفلي، گنجه، 2011، ص. 112).
طبیعی کي، بورادا دا هئچ بير ائرمنيستاندان صؤحبت گئده بيلمز، يالنيز ارمن اولا بيلر. اونو دا دئمه ليک کي، اثرده آذربايجانلا ارمن قونشو اؤلکه لر کيمي گؤستريلير. سادجه آذربايجان حؤکمداري ايسکندره ارمنلرين هله ده اودا سيتاييش ائتمه لريندن شيکايتله نير، واحيد آللاهي تانيماديقلارينا گؤره اونلارين جزالانديريلماسيني ايسته يير. نييه؟ – چونکي ماکئدونييالي ايسکندر ايراني دا آلديقدان سونرا اوراداکي بوتون آتشگاهلاري داغيتميش و بير آللاها سيتاييش ائتمه لريني طلب ائتميشدي. بونو ائشيدن و بيلن نوشابه ايسکندري اؤز اؤلکه سينه دعوت ائدير و قونشو اؤلکه – ارمنده حؤکم سورن قانونسوزلوق و آللاهسيزليغا سون قويولماسيني خواهيش ائدير. تاريخدن بللي اولدوغو کيمي، بير آلله ايدئياسي نين " ايسکندرنامه " ده بو جور کسکين شکيلده قويولماسي، البته کي، نيظامي نين اؤز فانتازيياسي، اثرين باش قهرمانينا " يوکله ديگي " ان يوکسک اسلامي-انساني ميسسييا ايدي.
" ايسکندرين البرز داغينا گئتمه سي " بؤلومونده ايسه ترجومه چي نين " خزر دنيزي " کيمي وئرديگي دريانين نيظامي نين اوريژينال متنينده "درياي خزران " ، يعني " خزرلر دنيزي " کيمي تقديم اولوندوغونو گؤروروک.
(کلیات حکيم نظامي گنجوي، مقدمه و شرح حال: از پروف. شبلي نماني، به اهتمام: م.درويش. چاپ اول، 1366، ص. 1161).
بو دا، بيلديگيميز کيمي، تاريخي حقيقتلره اويغوندور. يئري گلميشکن، " ايسکندرين دربند قالاسيني آلماسي " بؤلومونده شيروان و دربند بؤلگه لري نين ده آدي خاطيرلانير. (يئنه اورادا، ص. 1165).
بيلديگيميز کيمي، هينديستاني آلديقدان سونرا چينه سفر ائدن ايسکندر يولدا روسلارين برده يه هوجوم خبريني ائشيدير. بورادا دا يئنه " ائرمنيستان " مسله سي اورتايا چيخير.
چوخ کئچمز کي، روسلار گيرر هر يانا،
داغ چکر روم ايله ائرمنيستانا.
(نظامی گنجوي. ايسکندرنامه. ترجومه ائدنلر: ع.شايق (شرفنامه)، م.رضاقولوزاده (اقبالنامه)، ايضاحلارين مؤليفي: ح.جعفر، اؤن سؤزون مؤليفلري: ق.علييئو (شرفنامه)، ض.قولوزاده (اقبالنامه)، علمي رئداکتور: خ.يوسيفلي، گنجه، 2011، ص. 168).
نه ياخشي کي، بو دفعه ده فيلوژي ترجومه مؤليفي پروف. ق.علييئو " ائرمنيستان " يوخ، محض اوريژينالدا اولدوغو کيمي، ارمن توپونيميني ايشلتميشدير.
غريبه دير کي، بونون آردينجا اولان بؤلمه ده ترجومه چي ع.شايق، گؤرونور، وزن و قافيه نين طلبينه گؤره " ائرمنيستان " دئييل، " ارمن " سؤزونو متنه گتيرير: " بريشاد ارمندن، بو اتيفاقدان " . (يئنه اورادا، ص. 173).
" ايسکندرين روسلارلا ووروشماسي " فصلينده، بللي اولدوغو کيمي، قارشي-قارشييا دايانان ايکي اوردودان نؤوبيله جسور پهلوانلار اوز-زوه گلير و دؤيوشورلر. بو مقامدا ايسکندرين طرفينده ووروشان ارمن قوشونوندا شروه آدلي قورخماز بير جنگاوردن دانيشيلير و او، رقيب اوردودان اولان آلانلي فرينجه آدلي دؤيوشچونو بير قيلينج ضربه سييله يئره سرير.
نه قدر غريبه اولسا دا، ترجومه چي بورادا يئنه "ارمن " دئييل، " ائرمنيستان " سؤزوندن يارارلانير.
آجيقلي بير آسلان ائرمنيستاندان
ووروب اؤلدورمکده جسور پهلوان.
آدي شروه، اؤزو دؤيوشده کاميل،
نه آسلان تاي ايدي اونا، نه ده فيل.
(نظامی گنجوي. ايسکندرنامه. ترجومه ائدنلر: آ.شايق (شرفنامه)، م.رضاقولوزاده (اقبالنامه)، ايضاحلارين مؤليفي: ح.جعفر، اؤن سؤزون مؤليفلري: ق.علي يئو (شرفنامه)، ض.قولوزاده (اقبالنامه)، علمي رئداکتور: خ.يوسيفلي، گنجه، 2011، ص. 180).
دئمه لي، " شرفنامه " نين بدیعي ترجومه سيندن بئله گؤرونور کي، قافقازدا " ائرمنيستان " آدلي دؤولت وار، اؤزو ده آذربايجان و روم ايله قونشودور، هله قافقازا هوجوم ائدن روس قوشونلارينا قارشي ايسکندرين طرفينده دؤيوچمک اوچون آيريجا قوشون دا چيخارير.
البته، بو ميثاللارين ساييني آرتيرماق دا اولاردي، آنجاق بيز بونلارلا کيفايتلنيب فيکريميزي يئکونلاشديرماق ايسترديک.
بلليدير کي، سون ايللرين تاريخ آراشديرمالاري و اينتئرنئت رئسورسلاريندا عدالتلي تاريخچي و وطنپرور ضياليلاريميز ائرمني ائتنوسونون قافقازا کؤچورولمه تاريخي و يئرلشديريلمه سي حاقيندا حقيقتلرين گئنيش آوديتورييايا چاتديريلماسي اوچون يئترينجه امک قويور و موجاديله آپاريرلار.
بئله بير واختدا، دونيا ادبياتيندا اؤزل يئري اولان، بو ايل بوتون اؤلکه ميقياسيندا 880 ايلليگي قئيد اولونان داهي آذربايجان شاعيري نيظامي گنجوي نين "ايسکندرنامه " اثريني ديقتله اوخويان هر کس، طبیعی اولاراق، ائ.ا. و ياخود نيظامي دؤورونده قافقازدا " ائرمنيستان " آدلي بير دؤولتين وارليغي حاقيندا دوشونمه لي اولور. آجيناجاقلي حالدير کي، آرادان کئچن 80 ايل و دؤولت موستقيلليگيميزين برپاسي نين 30 ايلليگينده نيظامي اثرلرينده يئر آلان بو کوبود و باغيشلانماز تاريخي يانليشليقلار هله ده اولدوغو کيمي ساخلانماقدا، گله جک نسيللره ده اؤتورولمکده دير. حاقيندا دانيشديغيميز " شرفنامه " ده آدلاري کئچن ترجومه چي، ترتيباتچي و علمي رئداکتورلاردان هئچ بيري، هئچ اولماسا، بير چيخاريش، ياخود قئيد-شرط شکلينده ده اولسا، بو مسله يه بير آيدينليق گتيرمه ميش، نئجه دئيرلر، هر شيي اوخوجونون اختيارينا بوراخميشلار. غريبه دير کي، صحيفه لرين آشاغي حيصه سينده، ياخود تکجه " شرفنامه " نين 30 صحيفه دن عيبارت اولان "ايضاحلار " بؤلومونده " ائرمنيستان " کلمه سي نين ترجومه يه نئجه يول تاپديغي و تاريخي حقيقتلري عکس ائتديرمه ديگي باره سينده بيرجه قئيده ده راست گلينمير. اؤزلليکله، باره سينده صؤحبت آچيلان نفيس و فوندامئنتال نشرين علمي رئداکتورو، حؤرمتلي نيظاميشوناس عاليميميز، پروف. خليل يوسيفلي نين، حقيقتن، چوخ جيدي و حياتي اؤنملي بير مسله ده بو قدر لويالليق و لاقئيدليک گؤسترمه سيني هئچ جور باشا دوشمک اولمور. يئري گلميشکن، اثرين فيلولوژي ترجومه سيني حياتا کئچيرن تانينميش شرقشوناس عاليم، پروف. ق.علييئوله ياناشي، بو ايشده امگي اولان رئداکتور، پروف. حميد مممدزاده و رايچي، پروف. رحيم سولطانوو دا ائرمنيستان-ارمن مسله سي حاقيندا هئچ بير موناسيبت بيلديرمه ميش، بو مسله نين اوستوندن سوکوتلا کئچميشلر. نه قدر تعجوبلو اولسا دا، بو ايل " ادبيات قزئتي " نين و " اولدوز " ژورنالي نين نيظاميه حسر اولونموش اؤزل سايلاريندا يئر آلميش چوخسايلي مقاله لرده ده بو باره ده هر هانسي بير قئيد و يا ايراد گؤرمه ديک. اينانماق ايسترديک کي، هئچ اولماسا، داهي شاعيريميزين 900 ايلليگينه دک بو آناخرونيزمه سون قويولار، نيظامي متنينه يول تاپميش بير سيرا ضررلي و باغيشلانماز نؤقصانلار آرادان قالديريلار.