ŞƏXSİYYƏTLƏRİ
ادبی چلنگ(3)
صدیار وظیفه ائل اوغلو
علیرضا ذیحق«آغ چایلی»
ƏLİRZA ZİHAQ “AĞÇAYLI”
چاغداش آذربایجان ادبیاتینین اونودولماز ایللرینین قلم عسکرلرینین بیریده «خوی» شهرینده بویا - باشا چاتان یورولماز یازیجی ، شاعیر و تدقیقاتچی عالیم اوستاد علیرضا ذیحق «آغ چایلی» دیر. او، اثرلرینده «آغ چایلی» تخللوص ائدیر. شعیر و ادبیاتیمیزلا اوغراشماقدا ایکن، گنجلیگیمیزین شاقراق و هیجانلی گونلرینین بیرینده اونونلا تبریز شهرینین تربیت کیتابخاناسیندا 1359 -نجو ایلین یای فصلینده ،یارانماقدا اولان" آذربایجان شاعیرلر و یازیچیلار جمعیتی" نده تانیش اولموشام. او ، همن یای گونلرینده همکاری گنج شاعیر چنگیز سربلند«چؤل اوغلو»( ایندی چنگیزپولاد اوغلو تخللوص ائدیر) ایله هر هفته جوما آخشاملاری خوی شهریندن اوتوبوسلا تبریزه گلر و شعیر آخشاملارینین دایمی ایشتراکچیلاریندان اولاردی. یاشداشیم اولان «آغ چایلی» ریاسیز، ایددعاسیز، دیققتچیل ، پاک احساسلی بیر گنج شاعیر ایدی. و جمعیتده تئزلیکله سئویلهن و سایغیلارا قابل گؤرونن بیر قلمداش اولدو. دئیه بیلرم کی اکثرییتینی گنجلر تشکیل ائدن " آذربایجان شاعیرلر و یازیچیلار جمعیتی" نین آراسیندا بارماقلا گؤستریلن گنجلرین بیری اولدو. او چالیشقان بیر قلمداش کیمی هر ضمینه ده آخاریشدا و چالیشمادا ایدی. بیر- ایکی آی انجومنه گلندن سونرا ، تبریزده یایملانماغا باشلایان آیلیق « دده قورقود» مجلله سیله همکارلیغا باشلادی و منیمده شعیرلریمی، سونرالار باش یازاری اولدوغو ژورنالدا درج ائدیردی. او، اؤلکه ده اوز وئرمیش اینقیلاب نتیجه سینده یئنی دیرچه لیش مرحله سینی یاشاماقدا اولان ادبیاتیمیزین آغیر ایللرینده بیر قلم عسکری کیمی فولکلور و ادبیاتیمیزین کئشیگینده اولدو. «آغ چایلی»اینکشاف ائتمکده اولان چاغداش آذربایجان ادبیاتینین بیر فداکار ائولادی کیمی عؤمرونو ادبیاتیمیزا و اونون گلیشمه سینه وقف ائتدی. او،خالق اوچون یازدی، خالق اوچون یاراتدی. او، اوزون ایللر بویو اوره گینده چاغلایان وطن سئوگی ایله یازدی، یاراتدی و قلم اثرلرینی نشر ائتدی. یاخشی بیلیریک کی اؤتن اون ایللیکلرده یازیب یاراتماقدان سونرا اونو نشر ائتمگین نه کیمی چتینلیکلری وار دیر. «آغ چایلی» اؤز اثرلرینی یایدیقدان علاوه، یوزلرله قلم صاحیبلرینین اثرلرینی ده، نشر ائتدیگی قازئت و ژورناللاردا مینلرله اوخوجونون الینه چاتدیردی. او عؤمور بویو توکنمز بیر سئوگیله فولکلور و ادبیاتیمیزی اؤیرندی و اؤیرتدی. اونون قلم اثرلرینده آذربایجان اینسانینین آرزی و ایستکلرینی آجیلی شیرینلی حیاتینی ،اینام و اینانجینی اولدوغو کیمی تاپیریق. «آغ چایلی»، رئال دوشونجه سینده اولان دونیا گؤروشونو یاراتدیغی رومان و حئکایه لرینده شعیر و پوئمالاریندا خالقا چاتیرماقدا گونوموزون اوغورلو یازارلاریندان اولدو. میللی وارلیغیمیز اولان فولکلور و آشیق ادبیاتیمیزین توپلانیب اینکیشاف ائتمه سینده چالیشانلاریمیزین اؤن سیراسیندا دایانلاردان اولدو. او، ایلک دؤنه اولاراق توپلاییب نشر ائدیگی حئکایه لری، ناغیللاری و آشیق داستانلاری ایله اؤز میللی بورجونو شرفله یئرینه یئتیرن بیر قلم اوساتدی اولدو. بارلی - بهرلی عؤمرونون 65 ایللیگینه حصر ائتیگیمیز بو اؤزه نشرده اونون حاقیندا یازیلان یازیلار و اونون قلمینین محصولو اولان اثرلر یقین کی هر نه یی دئیه جکدیر.سایین علیضا ذیحق «آغ چایلی» نین 65 ایلیگینی اورکدن تبریک ائدیرم اونا اوزون عؤمور باشاریلار و اوغورلار آرولایرام .