يارپاق تؤكومي
یازان :علیرضا ذیحق
خوي لو شاعير " عبدالعلي آيرُملو" نون ايتگي سي
باشي دومان داغلار كيمي گؤزو ياشلي باغلار كيمي
منيم قيشيم بئله كئچدي منيم كئچدي ائله يازيم
عبدالعلي آيرُملو ( وفا )
بير شاعير ايتگي سي يارپا ق تؤكومي دئييل كي خَزَل اولوب آياق لار آلتيندا تاپدانا . اونون وارليق كؤكؤ قوروسادا ، دوشونجه سي و دويغوسو گور بير شلاله تك زامان دان زامانا آخيشان كلمه لر له ، اؤز ياشاميني قورو ماق دا دير. آنجا ق طبيعتين داغي داشي تپه سي اولا راق ، صنعتكارلارين دا يارا ديجيليقي ، حجم د ن آسيلي اولماياراق ، مُحتوا ، مضمون و هو نَر با خيمين دان گاهدان قوملارا قاريشان پارلاق اينجه بير داش دي گاهدان دا هوندور بير داغ و يا چوخ صفالي ياشيل جا بير تَپه .
" خوي" ون توركجه سؤيله ر ائل شاعيري "عبدالعلي آيرُملو " كي شعرده " وفا " تَخَلُص ائديردي ايسه اؤز واخت سيز ايتگي سي له ،بيزي بير ادبي ميراث لا اوز اوزه قويور كي اونون دَيَرلري هله تنقيد باخيميندان آراشديريلماييب دي. آنجاق شاعيرين آنا د يل ده يازديقي شعرلر ، آذربايجان ديل وادبياتي نين كئچميشي له سيخ باغليليقي وار. اونون شعر ديلي نين آخيجي ليقي ، " علي آغا واحيد " ين پوئزيا ميراثي ني يادا سالا راق آذربايجان عاشيق شعري نين اؤزه ل ليك لريني ده اؤزونده داشي يير. او شعرلرينده ، چاغداش ليق و كلاسيك فورمالار آراسيندا بير كؤرپو قوروب ،ادبيات سئوه ر لَرين كؤنول آلقيشي ايله اوغرانير. دئميره ائلين كؤنلونو فتح ائدير كي بيليره م هر ايجتيماع دا ، اوزامانا جان كي آنا ديلي مدرسه لرده اوخونموري و اوخونورسادا ،موعا صير ادبيات لا گونلوك حالدا آياقلاشميري و جانلي ياراديجيليقين ايزيني كيتاب لارصحيفه سينده گؤرمك ا ولمور، هئچ بير ادبي ايش ، شعر سه يا حئكايه – نشر آخساق ليقي هله قالسين بير ياندا - ائده بيلمه يه جك كي گرچك قييمه تيني تاپميش اولا . اودا بير توپلوم دا كي ادبيات و ايجه صنعت حاققيندا چيخان درگي لر ، حتتا آز بيرعؤمور سورمه دن چئشيد لي بهانه لرله باغلا نيرلار.
گؤركملي شاعير "عبدالعلي آيرملو " ( 1387- 1331ه. ش ) نون اثر لرينه تنقيدي حالدا ياناشما دان ، دئمه لي يه م آدي وشعرلري بير خوي لو اولاراق قولاغيما دَيسه ده ، ايلك گؤروشوموز " 1385" نجي ايل ده ايدي اودا " اَورين خوي " درگي سي نين دفترينده ايدي . آزسونرا دا " اوستاد شهريار " حاققيندا قورولان بير شعر آخشاميندا كي باني سي خويون "دانش " آ دلي ادبي انجومني ايدي.
سونرالار دا شعرلريني آرا سيرا " اورين خوي " هفته لي گي نين صحيفه لرينده ايزله ر كن اوشعرلر ين بير نئچه سيني ده 1385 نجي ايل ده حؤرمتلي يازيچي و ژورناليست " مرتضي مجدفر " ، تهران دا چيخان " همشهري " گونده لي گينين توركجه صحيفه لرينده درج ائتدي. شعرلري نين مضمونو دا ، سئوگي ، وطن ، آنا ديله محبت ، باريش و عدالت چاغريشي ايدي:
من ائليمين سؤزلريني نئجه اؤزگه ديله يازيم
بير سيز دئيين من گؤي گؤزه ، نئجه قارا گيله يازيم
آي خان چوبان آراز موغا ن من سارامي تاپانماديم
دئييره م نه دئييرسيز بير كاغيذ دا سئله يازيم
دلي لردن اِيوازخاني موغان دا دا خان چوباني
ستارخاني تبريزينه سوناني دا گؤله يازيم
" آيرملو " نون شاعير قلبي ، سيخينتي لارا و آجي لارا دؤزمه يه رك دايانيرسا دا، بير تَهَر دئمك اولار كي چوخلو ايجتيماع لار دا اولدوغو كيمي اودا هنجارسيز دوروم لارين قوربا ني اولدي. بير ووجود دا داشي نان روح ، نه قَدَر لطيف و اينجه اولورسا دا ، بير يارپاق تك او قَدر ده تئز شاختايا گلير. هر كسين حياتيندا بير باشقا شكيل ده اَسَن سازاخلار ، اگر بيري شاعير اولورسا و يا قانيندا هونَر جوهري آخيرسا اونون جيسمي زاوالي داها دا شيد دَ ت لي اولور. آمما صابا حا يول آچان دويغولو كلمه لره ، هئچ زاوال يوخ دور. " آيرملو " نون شعرلرينده ايسه قاليجي ليق عطري وار و اگر اونون سئچيلميش شعرلري بير بيليك لي شعر ناقيدي طرفيندن ييغليب چاپ اولورسا ، اوندا بو خوصوصدا دا ها اطرافلي دانيشماق اولار .
"آيرملو " اوجا بويي و غورورلو كسكين باخيشي لا ، ايندي آراميزدا دولا شيب گؤزه گؤرونمه سه ده ، آنا ديليميزين شعر دفترينده ، هميشه گؤرسه نه جك دير.
۷/۲/۸۷
كيتاب تنقيدي
كوسن سئوگيلي بيرگون باريشار
بر بال انديشه
غلامرضا انزابي پور(1314 هـ . ش ـ خوي)
ناشر: انتشارات پيري ـ تهران
چاپ اول،1384
گؤزل سؤز بوخچاسين"انزاب" آچاندا
دوشور ياده خويون كئچميش زماني
"بهرام صاحبدل"
"انزاب خوئي" نين ياراديجيليق خزينه سينه دالديقدا دويغوو دوشونجه دالغالاري اينسان حيسّي ني شعرين جوشغون دنيزينه آپارسادا بير باليقچي تك آتيلان توري ديشاري چكديك ده، اونو اينجي لر و مرجان لارلا دولو گؤردوك ده، بو سياحت دن دويماق اولمايير. او اؤز شعرلري نن بيزي حياتين ائنيش و يوققوشلاري له قارشي ـ قارشي يا قويدوقدا، اوكي اينسان اوره يينده ايشيل ـ ايشيل پارلايير سئويملي بير صاباحين پارلاق گونشي ديركي كوسن سئوگيلي لرين بير ـ بيرلريله باريشماسي و اومود قيغيلجيم لاري نان قارانليق طالع لره ظفرچالما موژده لري دير.
"انزاب" ين شعر دونياسي، بير سئحيرلي قارتال قانادي ديركي آدامي سمالرين ايلاهي نوري له قاووشدورسادا، يئنه بيرداها تورپاقا باغلايير.
يئر اوزونده كي فلاكت لره، آجي ليق لارا و عدالت سيزليك لره گؤزيوممادان، بوتون قلب لري گؤي اوزه رينده سئير ائتديرسه ده بير اعتراض بايراقي كيمي جوشدورماقا چاليشير. او اينسان سعادتيني باريش دا و نغمه دولو دوداقلاردا گؤروب بير آن اولورسادا كدر و گؤزياشي ياغديران قابيل و نمرودلارين ظولمونو اونودمايير.
گؤركملي ادبيات اوستادي "دكتر شهريار حسن زاده"، "انزاب خوئي" نين "بر بال انديشه / دوشونجه لر قاناديندا" آدلي كيتابينا يازديقي اؤن سؤزده اونون غزل لرينده اولان اينجه و الوان خيال لارين درين لي يينه ايشاره ائده رك بئله بير فيكري ايره لي سوروركي: "بو باجاريلي شاعيرين غزل عالمي، بوتون عصرلرين شعر اؤزل ليك لريندن قايناقلاناراق، اؤز ياشاديقي ليريك حيس لري آخيجي وزن و قافيه لر ايله آليش ديرسادا، يوردونون دوغال ووقاريني، بولاغ لارين سرين لي ييني و چايلارين دنيزه آخان ترنّم لريني عشق نامينه عكس ائتديرمه يي ده اونوتمايير... او وارليقين سيرلارينا مبهوت قالاراق ايلاهي و عيرفاني دويغولار، شاعيرين عاطيفه، دوشونجه و احساسينا صاف و معنوي بير جلا وئرير..."
انزاب خوئي ني 1357ـ نجي ايل بير آذربايجانلي گنج شاعير اولدوغومدا، ايلك دفعه اوستاد كريمي مراغه اي نين اونا ايتحاف ائتدي يي شعر ايله كي كيتابلاري نين بيرينده چاپ اولموشدو تانيديم و سونرالار بير توركجه غزل ايله كي چوخ كئچميش ايللرده "وارليق" درگي سينده گؤرموشدوم، اونون دولغون و بديعي بير ياراديجيليقا صاحيب اولدوغونا اينام تاپديم. آنجاق1380 ـ نجي ايل دن بويانا"اورين" درگي سي‌نين شعر و ادبيات صحيفه لرينده چاليشديغيم دا و سونرالار باش كاتيب اولدوغومدا، شاعيرين نشريّه يه هديه ائتدي يي شعرلري گؤردوك ده، اونلاري گؤزل و دَيَرلي بيلركن، گئنيش شكيلده يايماقا چاليشديم.
"اورين" درگي سي، همشهري لر ايچينده بؤيوك ايستيقبال لا اوغراماق ايله "اوستاد انزاب" ين شعرلري بئله ليك له خلق ايچره ياييلاراق كؤنول لرده اؤزونه بؤيوك يئر آچدي. حتتا ياديمداديركي سونرالار رحمتلي شاعير "سيدمنصور ديبا" نين ياس مراسيمينده من ايله سئويملي و ياراديجي شاعير "هاشم عابدي" مسجيدين ايچري قاپيسيندا آغيزدا دوروب فاتحه يه گلن لري قارشيلاياراق، تانيماديغيم بير نئجه نفر گليب "اوستاد انزاب" ين بو مجليس ده اولوب اولماديغيني سوروشدولار. اونلار شاعيرين شعرلريني "اورين" ده اوخودوقلاري ايچون اونو گؤرمك آرزوسوندايديلار.
"انزاب خوئي" نين "دوشونجه لر قاناديندا" آدلي كيتابين دان اؤنجه اونون "حج نامه" كيتابيني دا اوخوياركن، شاعيرين طنز باخيشي ايسه مني حيرت لره دوشورموشدو.
انزاب خوئي اينجه دويغولو و معنوي گؤزل ليك لره و ورغون اولان بير اينسان دير كي آزاد بير اوره ك له، هميشه محبت و دوزلويون نغمه كاري اولوبدور. او خويون ادب سماسي نين قاليجي بير اولدوزو اولاركن، گؤركملي تاريخ عاليمي و تدقيقاتچي "علي آقاسي" نين اونودولماز آتاسي و آذربايجانين آدليم شاعيري "دانش" تخلّص لي رحمتلي "اوستاد محمدآقاسي"يا اتحاف ائتدي يي بير شعرده سؤيله دي يي كيمي بيزده اونو انزاب خوئي يه قايتاراراق اوره‌ك دن سسله نيريك:
تا كي وار يا اولاجاق درس و كلاس
سنـه تعظيم، سنـه آلقيش، سنـه پاس
اوره‌ك چيرپينتي‌لاري
«خوي»لي شاعير بهرام صاحبدل‌ين ياراديجيليقي حاققيندا
درين مضمونلو گؤزل شعرلري ايله باشاريلي ياراديجيلقا امضا آتان، «هايِم» تخلص‌لي «بهرام صاحبدل» چاغداش «خوي» ادبيات سماسي‌نين پارلاق اولدوزلاريندان بيري دير.
خلقين باشادوشه جه‌يي بير ديلده يازيب ياراتماق و أزيلميش كوتله‌ين آجي حياتيندان الهام آلاراق تمثيل فورماسيندان بهره‌‌لن مك شاعيرين اثرلرينده تأثيرلي ايز بوراخيب اونلارين ياشارليقينا يول آچير.
دوغما يوردا و ائله باغلي ليق شاعيرين دويغولو كؤنلونو چولقالاركن اجتماعي حياتيميزين ائنيش و يوققوشلاريني بديعي ياراديجيليقيندا عكس ائتديرير و دؤروموزون دورو و پارلاق، آيناسي اولور. او حاقسيز ليق لارا، قارشي دوراراق چيركين مناسبت‌لري قارقي يير و حاقلي اولاراق بئله دئيير:
قارا گونون عؤمري آزدي دئييل‌لر سويوق قيشين دالي يازدي دئييل‌لر
شاعيرين محبت اُجاق‌لي و وطن سئوگيسي له آليشيب توتوشان بير قلبي وار. اونون محبتي بير قارتال تك قاناد گريب اؤلكه‌ني، توپراقي، داغي و داشي بورويوز و«سؤيله‌يين سهنده هاراي آي هاراي» دئييب شهريار ايتگي‌سيني بئله ده يرلنديرير:
اي گؤزل وطنيــم آذربايـجانـيم اولدوز تك سينه‌نده باتدي شهريار
اي شرف اؤلكه‌سي‌اي شيرين جانيم
قوينوندا جان كيمي ياندي شهريار
آنالاردا وطن توپراقيندا بوي آتيب ديرچه لديك لري ايچون، آنا وطن اونون شعرينده بيرآنادان اوستون توتولور و وطن سئوگيسي بير دنيزتك شعرينده دالغا ووروب داشيري:
اي وطن دونياده سن شأنيم ووقاريمسان منيم
مسكنيم، يوردوم، يووام دوغما دياريمسان منيم
سنده بوي آتديم اوجالديم اي‌آنامدان مهربان
شادليقيم، ذوقوم سئوينجيم غمگساريم‌سان منيم
دوز چؤره‌يي ايتيرمه‌ين و دوغما يوردو «خوي» شهرينه دونيالار قدر محبت بسله‌ين شاعير، «خوي»ون آدليم شاعيري رحمتلي «استاد آقاسي» ني‌دائبله يادا سالير:
سن شهريميزين افتخاري شانيسان اوستاد
بيز خويلولارين گؤز بيه‌يي جانيسان اوستاد
هابئله خوي مولكونون ادب صحيفه سينده ياشار بير آدامالك اولان بارلي وو قارلي ائل شاعيري «هاشم عابدي» يه خطاب بئله سؤيله يير:
يازي گليب طبيعتين گلمه ييبدي هله يازيم
گؤزوم يولدا قولاق سسده منتظرم گله يازيم
عابد اوره‌ك چيرپينتي سين شاققيلدايان سئله‌يازيب
منده كؤنول سؤزون قويون آچيلمايان گوله‌يازيم
شاعيرين جانلي و رنگلي ليريكاسي واردير. اونون غزل‌لرين اوخودوقدا فضولي‌لردن آخيب گلن «آيدين و دورو» ليريك چشمه‌لرين سرين شلاله‌سيني دويوروق. گؤزل ليك‌لر گؤزه چارپير و دويغولار دالغالانير. كؤنول عشقه دالير و حيات، محبت جالايير:
عشقينده روسواي اولماقيم دونياده عزتدير منه
كويينده مسكن ائتمه‌قيم شأن و شرافت دير منه
عاشق‌لرين باش آرزوسو چاتماقدي يار وصالينه
گؤرمك گؤزل رخساريني بير عمر حسرتدير منه
قاشين‌لالين ائت كمان كيپريك اوخون وور‌سينه‌مه
يار باغريمي سؤك سئوگيليم عين سعادت‌دير منه
اسكي و چاغداش آذربايجان ادبياتي‌ني أن ياخشي اوخويوب بيلن گؤركمي شاعيريميز، آذربايجان ديلي نين بوتون ادبي- بديعي اينجه ليك لريندن اؤز اثرلرينده استفاده ائتمك له برابر، ياشاديقي دوغما دياري و اؤز عصري‌نين قاليجي بير ايزي اولاراق و بوتون وارليقي ايله سئوديگي كندلي و شهرلي كوتله‌لري نين دانشيديقلاري ديل اسلوبونا صادق قالماق نيتي‌له و يارا ديجيليقي تكجه ضيالي لر ايچون يوخ بلكه بوتون خلق ايچون لذت وئريجي اولماقاخاطير، اثرلري بعضاً لهجه ايله قاريشير كي بو دا شاعيرين ياراديجيليق اؤزل ليك لريندن بيري دير:
بيليرسن دئييب‌لرآتا بابالار
ناموسي آتيبلار ايته يئميوب
ائشيدين سؤزومي‌جوان بالالار
بابالار موفته‌سوز هئچ دئميوب
حرمتلي اديب شاعيريميز «بهرام صاحبدل»ين أن سايقي ده‌ير ادبي اؤزل ليك لريندن بيري ايسه، تانري يا درين اينامي و عرفان بولاغيندان يارارلانديغي دير كي اونون چوخ جهت‌لي ياراديجيليقندا بؤيوك تأثيرلر قويور و ديني مناسب لر ايچون يازديقي خصوصاً مولا علي‌نين وصفينده‌‌كي شعرلري هله چاپ اولمادان شفاهي شكلده ياييلار كن مؤمن اينسانلارين سئوگيسي‌ني قازانير:
ساليبسان دونياني مولا حيرته وئرميسن عالمده جان حريته
اولموسان حامي نبي اكرمه دؤزموسن چوخ دين يولوندا زحمته
كعبه‌يه مولاوئريب‌سنسن‌شرف
كعبه‌نين ايجادينه سن سن هدف
جان وئريب سن آللاهين پاك دينينه جان سنه قربان اولا شاه نجف
صاحبدل‌ين توركجه ديواني كيمي فارسجا ديواني‌دا چوخ زنگين ادبي- بديعي اؤزل لي‌يه صاحيب ديركي بونلارين بيرليكده چاپ اولوب ألده ائديلمه‌سي، ادبيات سئوة رلرين نئچه ايل ليك آرزو لاري‌دير. او اومودلاكي سئويملي شاعيرين بو ايكي جيلدليك ديواني، دوز گون تنقيدلرله اوغراييب معاصر آذربايجان ادبياتي نين انكشافيندا ده‌يرلي رول اوينايا.
آنجاق دئمك كي شاعير اؤزو دئسه ده«بير چيپلاق آغاجام خزان چاغيندا» بيز بونا اينانميريق و اينامي‌ميز بودوركي «شاعير عؤمرونون گؤزل يازلاري» هله اؤتمه ييب دير و گله جك ده ديواني نين باشقا جيلدلريني ده گؤزله‌ييب يئني اثرلرينه شاهد اولاجاييق.
26/8/80 خوي
من ديرييم اؤلمه مي شم بير بؤيوك تاريخيم وار
آذربايجان شاعيري، «مير حسن سربلند» ين ايتگي سي اوچون
فوجامان آذربايجان شاعيري «مير حسن سربلند» ين اوره‌ك سارسيدان اؤلوم خبريني 83 نجي ايلين ايلك گونلرينده ائشيده‌‌ركن، كئچميش ايللرين يادينا دوشدوم. او ايل لر كي ايران اسلام انقلابي ظفر چالميشدي و قيفيل‌لي ديل‌لر آچيلار كن گؤركملي شاعيريميز اوزون ايللر يازيب گيزله‌تدي‌يي آنا ديلده كي شعرلريني ايشيق اوزونه چيخاريردي. اوها بئله يئني دويغولاريني قلمه آليب انقلاب گونلريندن بئله سؤز آچيردي:
وطن بهار اولدي قيزيل گول آچدي ملت‌غالب اولدي پهلوي قاچدي
جوان قيزلارتئله غنچه گول ساچدي «ده‌ده قورقود»اولادلارن ياشاسين
او شعرلرينده تاريخي آجي گرچك‌لره داياناراق انقلابين ألده ائتديگي باشاريلاردان دانيشير و «آذري ائلي‌يم اؤلمه‌ين ائلم،ايرانين باشي يام من قيزيل تئلم» ديئه‌رك «آناديلي» بير نيشگيل اولوب اوره‌ك دونياسيني قارا بولودلار چولقاركن منحوس پهلوي رژيمي‌نين بو حضوصدا ائتديگي ظولم‌لري يئني نسيل‌لره آيدين بير ساياقدا گؤسترمك ايچون چوخلي گؤزل شعرلرين ياراديجي‌سي اولور:
يازا بيلمزديم آناديليمي
پهلوي كسردي منيم أليمي
ائيله مه‌ددي‌تاريخ‌قبول ظولومي
توركي ديلي‌منيم آنا ديليمدي
تورك ائللري منيم قديم ائليمدي
1359- نجي ايللرده «ده ده قورقود» ادبي درگي سينده «دكتر حسين فيض‌الهي وحيد» له بيرگه باش يازار عنواني‌له گؤره و داشيديقيم ايللر «ده ده قور قود» ژورنالي‌ني شاعيره چاتديرديق. اودا رحمتلي شاعيرين اوغلو «چنگيز سربلند» ين ألي ايله كي آذربايجانين ضيالي يازيچي و شاعيرلريندن دير. مير حسن سربلند « ده ده قورقودي» گؤرجك اونا كؤنول وئرير و درگي ده چاپ اولماق ايچون بير پارا سئويملي شعرلر يازيب يوللايير. آنجاق شهرت دن قاچديقي ايچون، اؤزونه مستعار آدلار سئچيركي «م. س. پولاد» و «مسد» ياديمدا قالان آدلارديلار. اونون شعرلري درگي‌ده چاپ اولاراق آذربايجان چاغداش ادبيات اولدوز لاري‌نين بيرينه آرتير و شعرلري ديل‌لر ازبري اولور. اوراجان كي 60-نجي ايلده تبريزلي شاعير «سليمان ثالث» اوستاد شاعيري گؤرمك ايچون اورمويا گئتمه‌يه جان آتير و اورمودا اونون قوناغي اولور. شاعيرين ده ده قورقود درگي‌سينه بسله‌‌دي‌يي سئوگي‌سي‌نين نه قدر يوكسك اولدوغو بو شعرلريندن داها آرتيق آيدين لاشير:
پهلوي گر كسدي منيم ديليمي
منه ياد ائيله‌دي طايفام ائليمي
انقلاب بئجردي باغدا گولومي
ده‌ده‌قورقود اولادلارين ياشاسين
ياشاياجاق هر واقت آدين ياشاسين
شاعيري اوايل‌لرده اورمودانشگاهيندا ترتيب وئريلن بير عاشيق‌لار كنسرتينده ده خاطيرلاييرام كي باشي آغ ساچ لارلا دولو اولسايدي دا گنج لردن داها آرتيق كنسرته مفتون ايدي و مجلس سونا يئتديك ده اوره‌ك جوشقولاريني في‌البداهه بو شعرلري‌نن بيزه چاتديردي:
اي عاشيق سازيوي باس دؤشووه
قهرمان تاريخلي ائليندن دانيش
جه‌جه ووربولبول تك اؤزگلشنينده
چيچك‌لي باغلارين گولوندن دانيش
ووقارلي صمدني وفاسيندان دئه
آرازين سويوندان سئليندن دانيش ...
تأسف‌لركي شاعيريميز اؤز حياتي دؤرونده شعرلريني بير كتابا ييغيب يايماقا هوس گؤسترمه‌دي و شايدده معيشت دورومو بونا ايزين وئرمه‌دي كي اومود وار گله جك‌ده اونون شعرلري اديب اوغلو چنگيز سربلندين همتي‌له چاب اوزو گؤرموش اولا. آنجاق 82- نجي ايلده «اورين» درگي‌سينده باش يازار عنواني‌له چاليشديقيم گونلر شاعيرله يئنه باغلانتيم اولوب «اورين» درگي سي ائده بيلدي شاعيرين رسيم‌لريني شعرلري ايله بيرليكده چاپ ائده‌رك ادبيات سئوه‌ن‌‌لريميزه ويئني بوياباشا چاتميش آذربايجان ادبيات اوخوجولارينا اونون ياراديجيلقي ني تانيتديرا و بو اَن ده‌يرلي باشاريلاردان دير كي ائده بيلديك ديري ليگينده چوخلي هفته لر اونون شعرلري ايله «سون پاريلتي» آدلي ادبيات صحيفه‌لريميزه بزه‌ك وئريب اوستاد شاعيريميزدن تجليل اولونا.
اونون ووقارلي سيماسيني بو شعري اوخوياركن هله خاطيرلاييرام و ايناميم واركي اواگر دوز‌گون تانينا و شعرلري بوتون لوك‌له چاپ اولوب ياييلا، آذربايجان ادبياتي‌نين قاليجي سيمالريندن دير و اؤز دئديگي كيمي:
آيلار كئچدي ايللر كئچدي من كئچمه‌ديم ائليمدن
دوران گلدي دوران كئچدي من دؤنمه‌ديم ديليمدن
يورديولوندا ائل يولوندا من قورخماديم اؤلومدن
بو دؤزومه بوسؤزومه بير عالم شاهيديم وار
اؤلمه ميشم من ديرييم بير بؤيوك تاريخيم‌وار
4/1/83 – خوي