مدیر مسئول : دکتر حسین شرقی دره جک سوی تورک
هر بیر اولوسون دوغولوش و وار اولما فلسفه سی و داستانی واردیر. ائله دونیامیزی دا گوزللشدیرن بو فرقلی اولوشومون رنگارنگلیی دیر. یارادیلیشدان اوزو بری هر بیر میلت و اولوس اوز وارلیغینین اونا وئردیی اوزللیکلرله تانینماقدادیر.اولوسلارین ایچ ماهیتی و دیش (خارجی) ماهیتی واردیر. ایچدن بسله نیب دیش دان بهره له نیر. نه قدر عمرو اوزوندورسا بیر اولوسون او قدر ده الده ائدینیملری چوخ و گوزه گلیملی دیر.
یارادیلیش کدلاریمیزا اساسا آنتروپولوژی یاپیمیز اورتایا چیخیر. یاشادیغیمیز جغرافییایا اویغون دیل و حیات طرزی اولاناقلار میدانا گلیر.یاشام طرزی و دوشونجه فورماسی بیزی باشقالاری ایله فرقلندیریر. داغلیم اراضیمیزین بویوک وکیچیکلیی بیزه یاردیجیلیق امکانلاری سونور.
قونشو اولوسلارین گلیشیمی بیزی ده ائتگیله یه بیلر.اونا گوره ده قونشو خالقلارین بیر بیرلرینه بنزرلیکلری چوخ اولور.ثروت و دولت ایسه بیر اولوسون تمل داشی دیر. وار و دولتدن زنگین خالقلار تاریخ ده اوزلرینه محکم یئر توتا بیلیر و باشقالارینی دا تاثیر دایره سی آتینا آلابیلیر. او اوزدن جنگاورلیک و عزمکارلیق بیر اولوسون تاریخی یادداشینین محفوظ قالماسینا زمین یارادیر.
قهرمانلیق تاریخی ایله بیلگه لیک پاراللدیر. گوجو اولان لاکین عقله صاحیب اولمایان بیر خالق تاریخ صحنه سینده اوزون سوره قالا بیلمز.گئت گئده کیچیلرک ائتنیک خالقلارا چئوریلر کی گونوموزده اونلارین بیر چوخونا شاهیدیک. آنجاق تمللی و کوکلو بیر اولولوس هم فیزیکی (حربی) هم ده انتلئکتوال گوجه دایالی دیر.
یئر کوره سینین نه قدر گئنیش اراضیسینه یایلیب و صاحیبلنه بیلمیسیزسه او قدر عقللی و او قدر ده گوجلوسوز دئمکدیر.
بیز تورکلر ایسه دونیانین دوغوسوندان تا باتیسنا قدر اوزانان بیر جغرافی اراضیه یاییلمیش بیر اولوسوق.دونیانین او بیر اوجوندان یعنی سیبریادان بو بیر اوجو یعنی آوروپایا قدر ان گوزل و وئریملی تورپاقلار بیزیم منسوب اولدوغوموز اولوسا آییدیر.
بو اراضیلرده هم اوز هگمونلوغوموز یاراتمیش و قوروموشوق هم باشا خالقلارا چوخلو ساحه لرده تاثیر ائتمیشیک و اونلارلا مدنی و تجاری تبادلاتدا بولونموشوق.گوستردیمیز ائتگی و آلدیغمیز تاثیر نتیجه سینده اوز ایچیمیزده فرقلشمه لره و یئرل خالقلاشملارا معروض قالمیشیق (ازبک , تورکمن , چواش , باشقورد , اویغور , قازاق , آذربایجان , تورک کیمی بولوملره آیریشمیشیق لاکن آنا عنصر اولان تورکلوک هامیسندا عینی سویه ده قالماقدادیر.
بو گوسترگه لر اورتاق بیلیم , ادبیات و دولت قوروجولوقلاری , دیل , دین , توره و س... کیمی یاپیلاریمیزدا عینا قالماقدادیر . او اوزدن بیزلره تورک اولوساونون تورک خالقلاری دئییرلر.
بئله اولدوغو حالدا اورتاق دیرلره مالیک خالقلاریق کی بیر بویوک و اصیل بیر میللتین و اولسون اوولادلارییق.دینی و اینانج دیرلره صاحیبیز.میللی ادبیاتا اورتاغیز.ایلک کوکون بیزه وئردیی اقربالیق باغلیلیقلارینا صاحیبیز.اورتاق میللی مفکوریه اساسلانان میلت اولوشومونا صاحیبیک.
بوتون بونلار بیر آرایا گلنده بیز مشترک بیر دده بابایا صاحیب اولدوغوموزا گوره بو اولوسا منسوب اولان هربیر فردین باشاریسی اورتاق مدنیتین مالی سایلیر. فارابی , بیرونی , احمد یسوی, نظامی گنجوی , فضولی , نسیمی, امیر تیمور , نادر شاه , فتحعلی خان , بیلگه قاغان و دده قورقود , اوغوز خان و یوزلرله بویوکلریمیز بیر محور اطرافیندا قوروب یاراتدیقلاری دیرلر هامیمیزین دیری محسوب اولونور. البته اونوتمایاق کی بیزیم هامیمیز دونیانین و دونیا اینسنانینین آیریلماز پاچاسییق.
قازانیملاریمیز اورتاق بشری دیرلر قازانیمی اساسیندا بیزه وار اولما زمینی یارادیر.لاکن بیزیم دیرلریمیز بیزیم اوچون اونملی اولمالی دیر کی باشقالاری طرفیندن ده سایقی و حورمت گورسون.
یاخین گئچمیش ده تلویزیوندان بیر ادبیات خوجاسی اوز ادبیاتلارینی تدریس ائدرکن بیزیم دیریمیز اولان محمد فضولیمیزی تحقیر ائدرک اونو فضول او ادبی اوغورو کیمی اوز اویرنجیلرینه تقدیم ائتدی. آنجاق خالقیمیزین دویارلیلیغی سایه سینده حقیقت بلیرلندی و معلوماتدان یوخسون خوجانین حسابی وئریلمیش اولدو. قید ائتمک لازیمدیر کی بئله آلچالدیجی عمللر یالنیز اوزلرینی حقیر بیلنلردن باش وئره بیلر. حال بو کی بیز تورکلر آنا دیلمیزین تدریسیندن محروم اولا اولا اوخوموش و ادبیات اوزره دکترلوق درجه سی آلمیش بیریسینه اوز دیرلریمیزه صاحیب چیخاراق جواب وئرمیش اولدوق. اونلارین عمللری ایستر بیلرکدن یادا بیلمه یرکدن اولسادا بیزلرین گئجیکمه ین تپکیسی اونلارین عمللرینین نه قدر زشت اولدوغونو گوستردی.
داخیلا بویوک اولوسلار داتا باشقالارین تحقیر ائتمز. اونا گوره کی اوزونو تثبیت ائتمک اوچون کیمسنین کیچیلدیمه سینه احتیاج دویماز.
چاتیشمایان جهتلرینی اوز ایچینده دوزنلمه یه چالیشار. کیمسه یه کوتو نیت ده اولماز اون گوره کی اوز سحوینی اوزو دوزلتمه یی بیلر.تورک اولوساونون منوییاتیندا کیمسه یه اولوم و یا تحقیر شعاری یئر آلمامیشدی. بیز بوتون مدنیتلری هر زامان اویموشوق و اوندان بهره لنمه یه چالیشمیشیق. اینسان اولماق اینسانلیغین غایه سی دیر.